ঐগী নুংশিরবা ভারত মচাশিং
পুম্নমকপু খুরমজরি!
নবেম্বর ২৬ অসি ভারত মচা খুদিংমক্কী চাউথোকচনীংঙাই ওইরবা নুমিৎ অমনি। ১৯৪৯গী নুমিৎ অসিমক্তদা কন্সতিত্যুএন্ত এসেমব্লীনা চমম্নবা য়াওদনা অমসুং থাজবগা লোয়ননা লৈবাক অসিগী চাউখৎ থৌরাংগী লমজিং-লমতাকপীরিবা শেংলবা দোক্যুমেন্ত অমা ওইরিবা ভারত সংবিধান অসি লৌখৎখি। মসিনা মরম ওইদুনা চহী তরারোমগী মমাং, ২০১৫দা এন.দি.এ. সরকারনা নবেম্বর ২৬ অসিবু সংবিধানগী নুমিৎ হায়না পাংথোক্নবা ৱারেপ লৌখি।
ঐহাক্কুম্বা লৈত-লাইর নংদুনা অমসুং শেল-থুমগী ফিবম ফবা নত্তবা ইমুংদগী হৌজরকপা মীওই অমনা চহী ২৪ হেন্না লেপতনা সরকারগী মকোক ওইনা থবক তৌবা ঙমহনবীরিবা অসিমক ঐখোয়গী সংবিধানগী শক্তিননি। ২০১৪দা ঐহাক্না অহানবা ওইনা পার্লিয়ামেন্তদা খোংদাজরকপা মতমদা ঐহাক্না শক্তি লৈরবা গনতন্ত্রগী শেংলবা লাইশং অসিগী কাখৎফমদা ইকোক নোঞ্জখিবা মীকুপ অদু ঐহাক হৌজিক ফাওবা নীংশিংলি। অমুক হন্না ২০১৯দা, মীখলগী ফল লাউথোক্লবা মতুংদা, ঐহাক্না সংবিধান সদনগী সেন্ত্রেল হোলদা চঙলকপা মতমদা ঐহাক্না ইকায় খুম্নবা উৎপগা লোইননা ঐহাক্কী কোকথক্তা সংবিধান থাংগৎচখি। সংবিধান অসিনা ঐহাক্কুম্বা মীওই কয়াদা মঙলান মঙফাওনবা ঙম্নবগী শক্তি অমসুং মদুগী মায়কৈদা থবক তৌবা ঙম্নবগী পাঙ্গল পীবীরি।
সংবিধানগী নুমিৎ অসিদা ঐখোয়না দাক্তর রাজেন্দ্র প্রসাদনা লুচিংখিবা কন্সতিত্যুএন্ত এসেমব্লীগী সংবিধান শেম্বদা শরুক কয়া অমা তমখিবা ইথিল পীনিংঙাই ওইরবা মীহুৎশিংবু নীংশিংলি। ঐখোয়না তুংলমচৎপু মমুৎ তানা উবা ঙম্বা মীৎয়েং অমগা লোয়ননা দ্রাফ্তিং কম্মিতী লুচিংখিবা দাক্তর বাবাসাহেব অম্বেদকরনা হোৎনজখিবা কয়াবু নীংশিংলি। কন্সতিত্যুএন্ত এসেমব্লীগী শক্নাইরবা নুপী মীহুৎ কয়ানা মখোয়গী ওইবা ৱাখল্লোন অমসুং তুংদা থোক্লক্কদবা কয়া খন্নদুনা সংবিধান অসিগী মপাঙ্গল কনখৎহনখি।
ঐহাক্না ইং ২০১০ বু হন্না নীংশিংজবা মতমদা, ভারতকী সংবিধান্না চহি ৬০ মপুং ফাখিবা অসি চহি অসিমক্তদনি। লাইবক থিবদি, থৌরম অসি জাতিগী থাক্তা খঙহনগদবা মওং অদুমক উবা ফংখিদে। অদুমওইনমক, ঐখোয়না সংবিধানগী মফমদা তৌবীমল খঙবা উৎচনবা অমসুং ঐখোয়গী অচেৎপা ফিরেপ উৎনবগীদমক ঐখোয়না গুজরাত্তা 'সংবিধান গৌরব যাত্রা' অমা পাংথোকখি। ঐখোয়গী সংবিধানবু শামুথক্তা থাংগৎতুনা ঐহাক্না পুন্সিগী তোঙান-তোঙানবা শিনফম পায়রিবা মীওই কয়াগা লোয়ননা খোঙচৎ অদুদা শরুক য়াবগী খুদোংচাবা ফংজখি।
সংবিধান্না চহি ৭৫ মপুং ফারকপা মতমদা, ভারতকী মীয়ামগীদমক্তা অখন্নবা মায় পাকপগী পন্দুপ অমা ওইহনগনি হায়না ঐখোয়না ৱারেপ লৌখি। ঐখোয়না পার্লিয়ামেন্তকী অখন্নবা মীফম অমা পাংথোক্নবা অমসুং পুৱারী ওইহৌরগদবা থৌরম অসিবু নীংশিংনবগীদমক লৈবাক শীনবা থুংনা থৌরম কয়া পাঙথোকপগী খুদোংচাবা ফংখি। থৌরমশিং অসিদা মীয়াম হুপ্না শরুক য়াবগী চাং অদুক্কী মতীক ৱাংবা উখি।
চহি অসিগী সংবিধান নুমিৎ অসিসু অখন্নবা নুমিৎ অমনি হায়নবগী মরম কয়া অমা লৈ।
মসিনা শক্নাইরবা মীওই অনি মিং ওইনা পল্লবদা সর্দার বল্লবভাই পতেল অমসুং ভগৱান বীরসা মুন্দাগী ১৫০শুবা মপোক কুমওনগা ফাংনরি। মখোয় অনিমক্না ঐখোয়গী লৈবাক অসিগীদমক চাউনা শরুক তম্বীরম্মি। সর্দার পতেলগী তুংলমচৎ নীংথিনা নৈনরবা লুচিংনা ভারতকী রাজনিতীদা অপুনবগী মশক অমা শাগৎপীরমখি। আর্টিকল ৩৭০ অমসুং ৩৫ (এ) গী মায়োক্তা থবক পায়খৎপা ঙমখিবসু মহাক্কী ইথিল অমসুং থাজবগী থৌনা অসিনা লমজিংখি। হৌজিক্তি জম্মু অমসুং কাশ্মীরদা ভারতকী সংবিধান মপুং ফানা চৎনরে। মসিনা মীয়াম, মরুওইনা নুপী অমসুং শোত্থরবা খুনাইগী কাংলুপশিংনা ফংফম থোকপা সংবিধানগী হক পুম্নমক ফংহল্লে। ভগবান বীরসা মুন্দাগী পুন্সিনা ঐখোয়গী ত্রাইবেল খুন্নাইদা অচুম্বা ৱায়েল, হিংবগী থাক অমসুং শক্তি ফংহন্নবা ভারতনা লেপ্লিবা ফিরেপ অসিদা লেপ্পা লৈতনা ইথিল পীবীরি।
চহি অসিদা, ঐখোয়না চহি লিশাং শিৎনা ভারত মচা কয়াগী অপুনবা ফিরেপ্পু পুদুনা পাউজেল পীরিবা বন্দে মাতরমগী ১৫০শুবা মপোক কুমওনসু পাংথোক্লি। মতম অসিমক্তদা ঐখোয়না শ্রী গুরু তেগ বাহাদুরজীগী ৩৫০শুবা শহিদ ওইখিবগী কুমওন পালন তৌরি। মহাক্কী পুন্সি অমসুং কত্থোকপনা ঐখোয়দা থৌনা, নুংশিবা অমসুং শক্তি লেপ্পা লৈতনা পীবীরি।
অসিগুম্বা মিংচৎ উরোং খিল্লম্লবা মীওইশিং অমসুং মায় পাকপগী ৱারী কয়ানা ঐখোয়গী ইথৌদাংগী মরুওইবা অদু নীংশিংহল্লি। মসিমক সংবিধান্না আর্টিকল ৫১ (এ) দা ফন্দামেন্তেল দ্যুতীশিংগী মতাংদা অখন্নবা চেপ্তর অমা হাপতুনা মরুওইবদু খঙহনবীরি। অসিগুম্বা থৌদাংশিং অসিনা ঐখোয়বু খুন্নাইগী অমসুং শেন্মিৎলোনগী চাউখৎপা পুরক্নবা পুন্না হোৎনমিন্নবদা লমজিং-লমতাক পীবীরি। মহাত্মা গান্ধীনা মতম পুম্নমক্তা নাগরিক অমগী থৌদাংদা মরুওইবা থমখি। মহাক্না থাজৈ মদুদি ইথৌদাং মপুং ফানা পাংথোকপা হায়বসিনা মান্নবা হক অমা শেম্মি অমসুং অদুগুম্বা হক অসি ইথৌদাং পাঙথোক্লিবদুমক্কী ফলনি।
চহিচা অসিনা হৌরকপদগী চহী ২৫ চুপ্না ফাখ্রে। ঙসিদগী চহি কুনলোম অসিদা ঐখোয়না লোইলম লৈঙাক্তদগী নীংখা তম্বগী চহি ১০০ মপুং ফারগনি। ২০৪৯দা, সংবিধান অসি চৎনরকপা চহি ১০০ মপুং ফারগনি। ঐখোয়না শেম্লিবা পোলিসীশিং, ঙসি ঐখোয়না লৌরিবা ৱারেপশিং অমসুং ঐখোয়গী অপুনবা থবক থৌরমশিং অসিনা লাক্কদৌরিবা চারোন-শুরোনশিংগী পুন্সিগী মশক লেপকনি।
মসিনা পুক্নিং ইথিল ওইরদুনা, ঐখোয়না বিক্সিত ভারতকী মঙলান মংফাওনহন্নবা মাংলোমদা চংশিল্লকপা মতমদা ঐখোয়না ঐখোয়গী লৈবাক্কীদমক পাঙথোক্কদবা ইশাগী ইথৌদাংশিংনা মতম পুম্নমক্তা মাঙ থানা থমগদবনি।
ঐখোয়গী লৈবাক অসিনা ঐখোয়গীদমক কয়াগী মতীক পীবীরি অমসুং মসিনা নুংদগী শেংলবা তৌবীমল খঙবগী ৱাখল্লোন অদু পোকহনবী। ঐখোয়না ৱাখল্লোন অসিগা লোয়ননা ঐখোয়গী ইথৌদাং মপুং ফাহনবা হায়বসি ঐখোয়গী নোংমগী পুন্সিগী শরুক অমা ওইরকই। মসিনা ঐখোয়গী তৌবা ঙম্বশিং অমসুং থবক খুদিংদা কত্থোকপগী থৌনা তেংনা শীজিন্নবগী ইনোৎ ফাওহল্লি। ঐখোয়গী থবক খুদিংমক্না সংবিধানবু মপাঙ্গল কনখৎহনগদবনি অমসুং লৈবাক অসিগী পান্দমশিং অমসুং অপাম্বশিং হেন্না পাকথোক চাউথোকহনগদবনি। ঐখোয়গী সংবিধান শেম্লম্বশিংনা মঙজখিবা মঙলানশিং অদু মংফাওনহনবা হায়বসি ঐখোয়গী ইথৌদাংনি। ঐখোয়না ইথৌদাং মশক খঙজবগা লোইননা থবক তৌরবদি, ঐখোয়গী লৈবাক্কী খুন্নাই অমসুং শেন্মিৎলোন খুমাং চাউশিনবা হেন্না ঙমহনগনি।
ঐখোয়গী সংবিধান্না ঐখোয়দা ভোৎ থাদনবগী হক পীরি। ঈরৈচা অমা ওইনা ঐখোয়গী মিং লৈরিবা জাতিগী, রাজ্যগী অমসুং লোকেলগী মীখলশিংদা ভোত থাদনবগী তাঞ্জা কৈদৌনুংদা মাংহন্দবা হায়বসি ঐখোয়গী থৌদাং অমনি। অতোপ্পশিংবুসু ইনোৎ পীননবগীদমক, ঐখোয়না নবেম্বর ২৬ খুদিংগী মহৈলোইশঙ অমসুং কোলেজশিংদা চহি ১৮ শুরক্লবা নহাশিংবু হরাওবা ফোংদোক্নবগীদমক অখন্নবা থৌরমশিং পাঙথোক্কদবনি। অসুম্না মহৈরোই অমা ওইবতা নত্তনা মখোয়দা লৈবাক শেম্বগী থৌওংদা চাউনা শরুক য়ারি হায়বদু অহানবা ভোত থাদগদবা ঐখোয়গী নহাশিংদা ফাওহল্লি।
ঐখোয়না নহাশিংবু ইথৌদাং মশক খঙবগী ৱাখল্লোন অমগা লোইননা ইনোৎ হাপ্পা মতমদা মখোয়গী পুন্সিদা গনতন্ত্রগী মগুনশিং ঙাক্না চৎকে হায়বগী ফিরেপ লৈজরক্কনি। মপাঙ্গল লৈবা জাতি অমগী য়ুম্বী হায়বদু অসিগুম্বা ফিরেপ অসিনি।
ঙসিগী সংবিধানগী নুমিৎ অসিদা ঐখোয়না অসিগুম্বা মপাঙ্গল লৈরবা লৈবাক অসিগী ঈরৈচা অমা ওইনা ইশাগী ইথৌদাং পাঙথোকপা ঙম্নবগী ৱাশক অদু অমুক নৌহৌননা নীংশিংমিন্নসি। ৱাশক অসিগা লোইননা বিকশিত ভারত অমা হায়বদি চাউখৎলবা অমসুং শক্তি লৈরবা লৈবাক অমা শেমগৎনবগী থৌদাং অসিদা ৱাহন্থোক লৈনা ঐখোয়না শরুক তম্বা ঙমগনি।
অদোমগী,
নরেন্দ্র মোদী
