نئیدہلی 02 اگست ۔وزیراعظم جناب نریندر مودی نے آج یوکرین کے صدر عزت مآب وولودی میر زیلینسکی سے ٹیلی فون پر بات چیت کی
وزیر اعظم نے صدرزیلینسکی کویوکرین کےصدارتی انتخابات میں کامیابی پرمبارکباد پیش کی اور حال ہی میں ہونے والے پارلیمانی انتخابات میں ان کی ’ سروینٹ آف دی پیپل پارٹی ‘ کی کامیابی پر بھی مبارکباد دی ۔
صدرزیلینسکی نے دوسری مدت کے لئے انتخابات میں شاندار کامیابی حاصل کرنے پر وزیراعظم کو مبارکباد پیش کی ۔ ہندوستان اور یوکرین کے درمیان دوستانہ اور قریبی تعلقات کا ذکر کرتے ہوئے وزیر اعظم نے دوطرفہ تجارتی تعلقات میں فروغ کی رفتار پراطمینان کا اظہار کیا۔ انہوں نے یوکرین کےساتھ ہندوستان کے کئی دیگر شعبوں میں طویل مدتی تعاون کا بھی ذکر کیا اور اس بات پر زور دیا کہ یوکرین کی کئی یونیورسٹیوں میں ہندوستانی طلبا کی بڑی تعداد کی موجودگی سے دونوں ملکوں کے عوام کے باہمی رابطوں میں مزید استحکام آئے گا۔ وزیراعظم نےکہا کہ گزشتہ سال کیو اوردلی کے درمیان براہ راست فضائی رابطے سے دونوں ملکوں کے درمیان تعلقات اور سیاحت کو فروغ ملے گا۔
دونوں لیڈروں نے باہمی طورپر مفید دوطرفہ تعلقات کو مزید مستحکم بنانے کے لئے کام کرنے پر اپنی آمادگی کااعادہ کیا ۔
