প্রধান মন্ত্রী শ্রী নরেন্দ্র মৌদীনা ঙসি য়ুক্রেনগী রাস্ত্রপতি শ্রী ভোলোদিমির জেলেন্সকিগা লোয়ননা তেলিফোন্দা ৱারী শানখ্রে।
য়ুক্রেনগী রাস্ত্রপতিগী মীখলদা মহাক্না মায় পাক্লকপদা প্রধান মন্ত্রীনা রাস্ত্রপতি জেলেন্সকিগী মফমদা নুংঙাইবা ফোংদোকখি অমদি হন্দক্তা পাংথোকখিবা পর্লিয়ামেন্তকী মীখলদা মহাক্কী ‘সর্ভেন্ত ওফ দ পিপল পার্তী’না মায় পাকখিবগীদমকসু নুংঙাইবা ফোংদোকখি।
রাস্ত্রপতি জেলেন্সকিনা প্রধান মন্ত্রীবু মওং তারবা মেনদেতকা লোয়ননা অনিশুবা তর্ম অমগীদমক ওফিস পায়রকপদা নুংঙাইবা ফোংদোকখি।
ভারত অমসুং য়ুক্রেনগী মরক্তা লৈরিবা মরূপ ওইবা অমসুং থম্মোইশেংবা মরীশিং অদু পল্লদুনা প্রধান মন্ত্রীনা লৈবাক অনিগী ওইবা ললোন ইতিক হেঙ্গৎলকপদা অপেনবা ফোংদোকখি। য়ুক্রেনগা লোয়ননা অতোপ্পা লম কয়াদা মতম কয়াদগী ঐখোয়না তেংবাং পীনরিবশিং অদু মহাক্না ফোংদোকখি অমদি য়ুক্রেনগী তোঙান তোঙানবা য়ুনিবর্সিতীশিংদা ভারতকী মশিং য়াম্লবা মরৈরোইশিংনা মহৈ তম্লিবা অসিনা লৈবাক অনিগী মীয়ামগী মরক্তা লৈনরিবা মরী অসি হেন্না চেৎশিলহল্লে হায়না মহাক্না অকনবা ৱাফম থমখি। মমাং চহীদা কীব অমসুং দিল্লীগী মরক্তা দাইরেক্ত এয়র-লিঙ্কনা মরীশিং অসিবু অমদি লমকোইবশিংবু ইনোৎ পীরিবা অদুসু প্রধান মন্ত্রীনা ফোংদোকখি।
লুচিংবা অনিমক্না লৈবাক অনিগী মরী অসি নাকল অনিগী কান্নগদবা মওংদা মখা তানা চেৎশিলহন্নবা পুন্না থবক তৌমিন্ননবা থৌরাং তৌরি হায়না মখোয়গী ওইবা অচেৎপা ৱাফমশিং থমখি।
