ঙসি প্রধান মন্ত্রী শ্রী নরেন্দ্র মোদীনা গুজরাতকী ভাবনগরদা লুপা করোর ৩৪,০০০ হেনবগী চাউখৎ-থৌরাংগী থবকশিং শঙ্গাখ্রে অমসুং উরেপ-উয়ুং তমখ্রে। ‘সমুদ্র সে সমরিদ্ধী’ থৌরমদা ৱা ঙাংবদা, প্রধান মন্ত্রীনা হায়খি সেপ্তেম্বর ১৭ দা মহাক্কী মপোক নুমিত্ত মহাক্কী মফমদা য়াইফ পাউজেল পীরকখিবা অদু থৌনাগী অচৌবা হৌরকফম অমা ওইরে। লৈবাক অসিনা সেপ্তেম্বর ১৭ দগী ওক্তোবর ২ ফাওবা হায়বদি বিশ্বাকর্মা জয়েন্তিদগী গান্ধী জয়েন্তি ফাওবা সেবা পাখৱারা পাংথোক্লি।
হৌখিবা নুমিৎ ২-৩ অসিদা গুজরাত্ত মীয়ামগী থবক কয়া পাংথোকখ্রে। মীওই লাখ ১ হেন্না ঈ পীদুনা মফম কয়াদা ঈ পীবগী কেম্পশিং পাংথোকখ্রে। মীওই লাখ কয়া থৱায় য়াওনা শরুক য়াদুনা মফম কয়াদা লু-নানবগী থবকশিং পাংথোকখ্রে। রাজ্য শীনবা থুংনা হেল্থ কেম্প ৩০,০০০ হেন্না পাংথোক্তুনা মীয়াম অমসুং মরুওইনা নুপীশিংগী মেদিকেল চেক-অপশিং অমসুং লায়য়েংবা পাংথোকখ্রে। লৈবাক শীনবা থুংনা অসিগুম্বা থবকশিং শরুক য়ারিবা মীওইশিং প্রধান মন্ত্রীনা থাগৎপা ফোঙদোকখি।
কৃষ্ণকুমারসিনহা জিগী মফমদা ইকায়খুম্নবা উৎলদুনা, প্রধান মন্ত্রীনা হায়খি সরদার ভল্লবভাই পতেলগী মীৎয়েংগা পুন্না চৎমিন্নদুনা ভারতকী অপুনবা শক্তম শাগৎপদা কৃষ্ণকুমারসিনহা জিনা অচৌবা থৌদাং অমা লৌখি। মহাকগুম্বা মরৈবাক নিংবা মীওইশিংগী ইথিলদগী, লৈবাক অসিনা মখা তানা অপুনবগী ৱাখল্লোন মপাঙ্গল কনখৎহনগনি। অপুনবা থবকশিং অসিনা এক ভারত, শ্রেস্থা ভারতকী ৱাশক অমুক হন্না মপাঙ্গল কনখৎহল্লে।
শেংলবা নবরাত্রি কুহ্মৈ হৌরমদাইদা মহাক্না ভাবনগরদা থুংলবা অসি পল্লদুনা, প্রধান মন্ত্রীনা হায়খি জি.এস.তি হন্থবদগী, কৈথেলশিং হরাওবা হেনগৎলকপা উরগনি। কুহ্মৈগী মতম অসিদা, লৈবাক অসিনা ‘সমুদ্র সে সমরিদ্ধী’ গী অচৌবা কুহ্মৈ অমা পাংথোক্লি। ২১শুবা চহিচাগী ভারতনা সমুদ্র অসি অচৌবা খুদোংচাবা অমা ওইনা উরি। হিথাংফম্না লমজিংদুনা চাউখৎপা পুরক্নবা লুপা করোর লিশিং কয়াগী প্রোজেকশিং শঙ্গারে অমসুং উরেপ-উয়ুং তম্লে। ক্রুইজ তুরিজম চাউখৎনবা, ঙসি মুম্বাইদা ইন্তরনেসনেল ক্রুইজ তর্মিনেলসু শঙ্গারে। ভাবনগর অমসুং গুজরাতকা মরী লৈনবা চাউখৎ-থৌরাংগী প্রোজেকশিংসু হৌদোক্লে অমসুং গুজরাতকী মীয়ামদা হরাওবা ফোঙদোকচরি।
প্রধান মন্ত্রীনা হায়খি মালেমগী মচিন-মনাও ওইবগী ৱাখল্লোনগা লোয়ননা ভারত মাঙলোমদা চঙশিল্লি অমসুং ঙসিগী মালেমদা ভারতকী অচৌবা য়েক্নবা অমতা লৈতে, অদুবু তশেংনা হায়রবদা, ভারতকী অচৌবা য়েক্নবদি অতোপ্পা লৈবাকশিংগী মখা পোনবনি। মখা পোনবা অসি অপুনবা ওইনা মাইথিবা পীগদবনি। মপানগী কা হেন্না মখা পোনবা অসিনা লৈবাক অসিগী অচৌবা মাইথিবা ওইহল্লি। মালেমগী শান্তি, তুংদু-লৈতাবা অমসুং নুংঙাই য়াইফবা পুরক্নবা, মালেমদা মীশিং খ্বাইদগী য়াম্বা লৈবাক অসি মশাগী ওক্নবা পুথোকচবা ঙমগদবনি। অতোপ্পশিংগী মখা পোনবা অসিনা লৈবাক্কী মিংচৎ থিহল্লি। ভারতমচা করোর ১৪০ গী মরাইবক মপানগী শাফুশিংদা শীন্নবা য়ারোই নত্ত্রগা মপানগী মখা পোন্দুনা লৈবাক চাউখৎনবা ৱারেপ লৌবা য়ারোই। তুংগী মীরোলশিংগী ফিবম খুদোংথিবা মওংদা থম্লোইদবনি। খুদোংচাদবা চা কয়াগী পাম্বৈ অমদি-অত্মানির্ভর ভারত অমা শেমগৎপনি। মসি ফংনবা,ভারতনা শিংনবশিং মায়োক্নগদবনি, মপানগী মখা পোনবা হন্থহনগদবনি অমসুং অশেংবা অত্মনির্ভর উৎকদবনি।
প্রধান মন্ত্রীনা হায়খি কৈদৌঙৈদা ভারতকী থৌনা ৱাৎতে। নিংতম্লবা মতুংদা মতম অদুগী সরকার পায়বা দলনা লৈবাক অসিগী নুঙগী মপাঙ্গল মীরাইখি। মসিগী ফল ওইনা, নিংতম্বা মতুং চহি ৬০-৭০ ফাওবা, ভারতনা তশেংনা ফংফম থোকপা মাইপাকপা ফংখিদে। মসিগী মরুওইবা অচৌবা মরম অনিদি; মতম শাংনা লাইসেন্স-কোতাগী চৎনবী লৈখিবা অমসুং মালেমগী কৈথেলশিংদগী নাইতোম লৈখিবনি। গ্লোবেলাইজেসনগী মতম লাকপদা, মতম অদুগী সরকারশিংনা মপান্দগী পুশিল্লকপা খক্তদা মীৎয়েং থমখি, মসিনা লুপা করোর কয়া লিশিং কয়াগী স্কামশিং থোকহনখি। হায়রিবা থৌশিলশিং অদুনা ভারতকী নহারোলশিং মাঙহনখি অমসুং লৈবাক অসিগী মতিং ফুদোকপা ঙমহনখিদে।
প্রধান মন্ত্রীনা হায়খি অরানবা থৌশিলশিংনা অমাঙবা থোকহনখিবগী অচৌবা খুদম অমদি ভারতকী সিপ্পিং সেক্তর অসিনি। পুৱারিগী ওইনা ভারত সমুদ্রঘী অচৌবা শক্তি অমনি অমসুং মালেমদা খ্বাইদগী চাউবা জহাজ শাবা মফমশিংগী মনুংদা অমনি। ভারতকী সমুদ্র মপানগী রাজ্যশিংদা শাবা জহাজশিংনা মতম অমদা লৈবাক মনুংগী অমসুং মালেমগী ললোন-ইতিক্কী শক্তি পায়খি। চহি ৫০ গী মমাঙদা ফাওবা, ভারতনা জহাজশিং শারমখি, ইম্পোর্ত-এক্সপোর্তকী চাদা ৪০ মখোয়গী খুৎথাংদা পাংথোকখি। মখোয়গী অরানবা থৌশিলশিংনা লৈবাক অসিদা জহাজ শাবা মপাঙ্গল কনখৎহনবগী মহুত্ত, মপান লৈবাক্কী জহাজশিংদা মখোয়না ভারা পীবনা হেন্না পামখি। মসিনা ভারতকী জহাজ শাবগী থবক মরাই চাইথহনখি অমসুং নমদুনা মপান লৈবাক্কী জহাজশিংগী মখা পোনখি। মসিগী ফল ওইনা, ললোন-ইতিক্ত ভারতকী জহাজগী চাকথুং চাদা ৪০ দগী চাদা ৫ দা হন্থরকখি। ঙসিদি ভারতকী ললোন-ইতিক্কী চাদা ৯৫ মপান লৈবাক্কী জহাজশিংগী মখা পোল্লে। মসিনা লৈবাক অসিগী অচৌবা মাঙজবা ওইহল্লে।
মীয়াম মমাঙদা মশিং খর পুথোক্লদুনা, প্রধান মন্ত্রীনা হায়খি জহাজদা পোৎ-চৈ পুবগী ভারা ওইনা মপান লৈবাক্কী সিপ্পিং কম্পেনিশিংদা ভারতনা চহি খুদিংগী লুপা করোর লাখ ৬ রোম পীরি। শেনফম অসি চাউরাক্না ভারতকী হৌজিক ওইরিবা দিফেন্সকী বজেতকা মান্নরে। হৌখিবা চহি ৭০ দা মপান লৈবাকশিংদা ভারা ওইনা শেন কয়া য়াম্না পীখিবগে হায়বা মীয়াম খন্দুনা য়েংউ। চাদিং অসিগী অপীকপা শরুক খর করিগুম্বা মমাঙগী সরকারশিংনা ভারতকী সিপ্পিং ইন্দষ্ট্রিদা থাদরম্লবদি, হৌজিক মালেম্না ভারতকী জহাজশিং শীজিন্নগনি অমসুং সিপ্পিংগী থবকশিংগীদমক ভারতনা লুপা করোর লাখ কয়া তানবা ঙমগনি।
প্রধান মন্ত্রীনা হায়খি করিগুম্বা ভারতনা ২০৪৭ দা চাউখৎলবা লৈবাক অমা ওইরবদি, লৈবাক অসি অত্মনির্ভর ওইগদবনি, অত্মনির্ভর ওইবগী মহুৎশীনবা ঙম্বা অমতা লৈতে অমসুং ৱাশক অসি ঙাক্নবা ভারতমচা করোর ১৪০ না থবক পায়খৎকদবনি, চিপশিং নত্ত্রগা জহাজশিং, ঐখোয়না মখোয় ভারত্ত শাগদবনি। পান্দম অসিগা লোয়ননা হৌজিক ভারতকী মেরিতাইম সেক্তর তুংগী মীরোলশিংগী অহোংবশিংগী মাইকৈদা চঙশিল্লে। ঙসিদি, লৈবাক অসিদা মরুওইবা হিথাংফমশিং চে-চাং কয়ারক পীশিনবা অমসুং থবক মচিৎ-মচিৎ পাংথোকপা লৈররোই। ‘ৱান নেসন, ৱান দোকুমেন্ত’ অমসুং ‘ৱান নেসন, ৱান পোর্ত’ চৎনবনা ললোন-ইতিক্কী থবক লাইহল্লগনি। হন্দক্কী নোংজু মীফমদা লোয়লম লৈঙাক মতমগী অরিবা আইনশিং লৌথোক্লে। মেরিতাইম সেক্তরদা অনৌবা অওনবা কয়া পুরক্লে অমসুং অনৌবা মওং অমদা মেরিতাইম লোল মঙা হৌদোক্লে। আইনশিং অসিনা সিপ্পিং অমসুং হিথাংফমগী থবকশিংদা অচৌবা অহোংবশিং পুরক্লগনি। চহি চা কয়া ভারত অচৌবা জহাজশিং শাবগী অখঙ-অহৈ অমনি। অনৌবা অওনবশিংনা কাউথোকখ্রবা থবকশিং অসি অমুক হিঙ্গৎহনগনি। হৌখিবা চহি ১০ দা, জহাজ অমসুং সবমেরিন ৪০ হেন্না নেভিদা শীন্নরে অমসুং অমা নত্ত্রগা অনি নত্তনা অতৈদি ভারত্ত শাবনি। চাউরবা আই.এন.এস বিক্রান্তসু লৈবাক অসিদা শারে অমসুং মসি শানবা অফবা মখলগী ষ্টিল লৈবাক অসিদা পুথোকখি। ভারতকী তৌবা ঙম্বা অমসুং লৌশিং ৱাৎপা লৈতে। অচৌবা জহাজশিং শানবা রাজনিতিগী অচেৎপা ফিরেপ দরকার ওই।
ভারতকী মেরিতাইম সেক্তর চাউখৎনবা ঙরাং পুৱারি ওইরবা ৱারেপ অমা লৌখিবা অদু পল্লদুনা, প্রধান মন্ত্রীনা হায়খি ভারতকী মেরিতাইম সেক্তর ফগৎনবা পুৱারি ওইরবা ৱারেপ অমা লৌরে, হৌজিক সরকারনা অচৌবা জহাজশিং ইনফ্রাষ্ট্রকচর ওইনা লৌরে। হৌজিক জহাজ শাবা কম্পেনিশিং বেঙ্কশিংদগী লাইনা লোনশিং লৌবা য়ারগনি অমসুং হন্থবা শেন্দোয়গী খুদোংচাবা ফংলগনি। ইনফ্রাষ্ট্রকচরদা শেন থাদবগা মরী লৈনবা খুদোংচাবা খুদিংমক জহাজ শাবা কম্পেনিশিংনা ফংলগনি। ৱারেপ অসিনা ভারতকী জহাজ শাবা কম্পেনিশিংগী শেন-থুমগী পোৎলুম হন্থরগনি অমসুং মালেমগী কৈথেলদা লাম্বা তৌনবদা মখোয়গী মতেং পাংলগনি। ভারত মেরিতাইমগী অচৌবা শক্তি অমা ওইনবা, সরকারনা স্কিম অহুম পায়খৎলে। স্কিমশিং অদুনা জহাজ শাবগী সেক্তরদা শেন্থং পীগনি, সিপয়ার্দশিংনা অনৌবা তেক্নোলোজি শীজিন্নবদা মতেং পাংগনি অমসুং দিজাইন অমসুং মগুন হেনগৎহনবদা মতেং পাংগনি। লাক্লিবা চহিশিংদা স্কিমশিং অসিগী লুপা করোর ৭০,০০০ হেন্না থাদরগনি।
প্রধান মন্ত্রীনা হায়খি মদুদি মহাক্না গুজরাতকী চীফ মিনিষ্টর ওইরিঙৈ মনুং ২০০৭ দা, জহাজ শাবগী খুদোংচাবশিং খঙদোক্নবা অপীকপা সেমিনার অমা গুজরাত্ত পাংথোকখি। মতম অদুদা গুজরাতনা জহাজ শাবগী থবক পায়খৎপদা মতেং পাংখি। লৈবাক শীনবা থুংনা জহাজ শাবগী থবকশিং য়োকখৎনবা হৌজিক ভারতনা অকনবা থবকশিং পায়খৎলে। জহাজ শাবা অসি ইচম চম্বা ইন্দষ্ট্রি অমা নত্তে, মসি মালেম্না “উদ্যোগ খুদিংমক্কী মমানি” হায়না লৌনরি, মরমদি মসিনা মরী লৈনবা সেক্তরশিং চাউখৎহল্লি। ষ্ট্রিল, মেছিন্নরি, ইলেক্ত্রোনিক্স, তেক্সতাইলশিং, পেন্তশিং অমসুং আই.তিগী থবকশিংগুম্বা উদ্যোগশিং সিপ্পিং সেক্তরনা শৌগৎলি। মসিনা এম.এস.এম.ইশিংদা খুদোংচাবা কয়া পীরি। থিজিনবগী মতুংইন্না, জহাজ শাবদা থাদবা লুপা ১ খুদিংগী শেন-থুমগী কান্নবা শরুক অনি ফংই হায়রি। সিপয়ার্দ অমদা থবক অমা পীবা খুদিংগী সপ্লাই চেন্দা অনৌবা থবক ৬-৭ ফংহল্লি, হায়বদি জহাজ শাবগী থবক ১০০ না মরী লৈনবা সেক্তরশিংদা থবক ৬০০ হেন্না পীবা ঙম্মী।
প্রধান মন্ত্রীনা হায়খি জহাজ শাবগী তঙাইফদবা লৌশিং লৈহন্নবা অকনবা থবকশিং পায়খৎলে। থবক অসিদা ভারতকী আই.তি.আইশিংনা মরুওইবা থৌদাং অমা লৌগনি অমসুং মেরিতাইম য়ুনিভর্সিতিগী মতেংনা থবক অসি মখা তানা পাকথোক-চাউথোকহনগনি। সমুদ্র মপানগী লমদমশিংদা নেভি অমসুং এন.সি.সিগী মরক্ত থবক তৌমিন্নদুনা অনৌবা থবকশিং পায়খৎলে। হৌজিক এন.সি.সি কেদেদশিংনা নেভিগী থৌদাংশিং খক্তগী শেম-শাবা খক নত্তনা ললোন-ইতিক্কী মেরিতাইম সেক্তরগী থৌদাংসু লৌরগনি।
প্রধান মন্ত্রীনা হায়খি সোলার সেক্তরদা ভারতনা মসিগী পান্দমশিং চহি মঙা ঙনখৎনা ফংবা ঙম্লে। হিথাংফম্না লমজিংদুনা চাউখৎপা পুরক্নবা চহি ১১ গী মমাঙদা থমখিবা পান্দম অদু মাইপাক্না ফংলে। অচৌবা জহাজ চঙবা য়ানবা হৌজিক লৈবাক শীনবা থুংনা অচৌবা হিথাংফমশিং শেমগৎলে অমসুং সাগরমালাগুম্বা থবকশিংগী খুৎথাংদা চৎথোক-চৎশিন ফগৎহল্লে। হৌখিবা চহি ১১ দা লৈবাক অসিগী হিথাংফমগী থবক তৌবা ঙম্বা শরুক অনি হেনগৎলে। ২০১৪ গী মমাঙদা, চাংচৎ অমদা ভারত্ত জহাজগী তর্ন-এরাউন্দ তাইম নুমিৎ নিনি চঙখি, অদুবু ঙসিদি মসি নোংমা ফাদ্রে। লৈবাক শীনবা থুংনা অনৌবা অমসুং অচৌবা হিথাংফমশিং শারে। হন্দক কেরলাদা ভারতকী অহানবা দিপ-ৱাতর কন্তেন্নর ত্রান্স-সিপমেন্ত পোর্ত থবক হৌখ্রে। মহারাষ্ট্রাদা ভধাবন হিথাংফম লুপা করোর ৭৫,০০০ হেন্না চঙনা শেমগৎলে অমসুং মসি মালেমদা মকোক থোঙবা হিথাংফম ১০ গী মনুং চল্লগনি। হৌজিক মালেমগী মেরিতাইম ত্রেদকী চাদা ১০ ভারত্ত পাংথোক্লি। মসিগী চাকথুং হেনগৎহনবা দরকার ওইরি অমসুং ২০৪৭ ফাওবগী মনুংদা, মালেমগী সমুদ্রগী ললোন-ইতিক্কী থবক্ত ভারতনা শরুক য়াবা শরুক অহুমদা হেনগৎনবা পান্দম থম্লি অমসুং মসি ফংবা ঙমগনি।
প্রধান মন্ত্রীনা হায়খি ঈশিং লম্বীগী ললোন-ইতিক হেনগৎলকপগা লোয়ননা, ভারতকী হিরোয় মশিংসু হেনগৎলক্লি। জহাজদা থবক তৌরিবশিং, ইঞ্জিনশিং অমসুং মেছিনশিং শেন্নরিবশিং, হাপ্পা অমসুং লৌথবগী থবকশিং শেন্নরিবশিং থবক শুবা কনবা মীওইশিংনি। চহি ১০ গী মমাংদা, ভারতকী হিরোয় লাখ ১.২৫ রোম লৈরমখি। ঙসি মশিং লাখ ৩ হেল্লে। মালেমদা হিরোয় মশিং খ্বাইদগী য়াম্না পুথোকপা লৈবাক অহুমগী মনুংদা ভারত য়াওরে অমসুং ভারতকী জহাজ শাবগী উদ্যোগ চাউখৎপনা মালেমগী থবক তৌবা ঙম্বগী শক্তি হেনগৎলে।
প্রধান মন্ত্রীনা হায়খি ভারতকী ইনাকখুল্লবা মেরিতাইম হেরিতেচ অমা লৈবগী খুদম লৈবাক অসিগী ঙামীশিং অমসুং অরিবা হিথাংফম সহরশিংনা ওইরি। ভাবনগর অমসুং সৌরাষ্ট্রা লমদম অসি পুৱারি অসিগী মতিক চাবা খুদমনি। তুংগী মীরোলশিংগীদমক অমসুং মালেমগীদমক হেরিতচ অসি ঙাক-শেনবা অমসুং উৎপা দরকার ওই। ষ্টেচু ওফ য়ুনিতিনা ভারতকী শক্তমগী অনৌবা খুদম অমা ওইবগুম্না, মালেম থাক্কী মেরিতাইম ম্যুজিম অমা ওইনা লোথাল শেমগৎলে। ভারতকী সমুদ্র মপানশিং লৈবাক অসি নুংঙাই য়াইফনবা থোঙ্গালশিং ওইরগনি। গুজরাতকী সমুদ্র মপান্না অমুক হন্না লমদম অসিগী বর অমা ওইরকপদা হরাওবা ফাওই। লৈবাক অসিদা হিথাংফম্না লুচিংবা চাউখৎনবগী অনৌবা থাক অমা শেমগৎনবা হৌজিক লমদম অসি শেম-শারে। সমুদ্র ফাওরগা ভারত্ত লাকপা কার্গোগী চাদা ৪০ গুজরাতকী হিথাংফমশিংদা থুংলি অমসুং হায়রিবা হিথাংফমশিং অসি অথুবা মতমদা দেদিকেতেদ ফ্রেদ কোরিদোরগী কান্নবা ফংলগনি। মসিনা লৈবাক অসিগী অতোপ্পা মফমশিংদা পোৎ-চৈশিং য়াংনা য়ৌহনবা ঙম্লগনি। অলাং সিপ ব্রিক্কিং য়ার্দনা অফবা খুদম অমা ওইনা, লমদম অসিদা জহাজ শিদোকপগী অফবা থবক অমা পায়খৎলি। সেক্তর অসিনা নহারোলশিংদা থবক মরাংকাইনা ফংহল্লে।
প্রধান মন্ত্রীনা হায়খি বিকসিত ভারত অমা শেমগৎনবা, হিরম খুদিংমক্ত য়াংনা চাউখৎপা দরকার ওইরে। বিকসিত ভারত অমগী লম্বী অত্মনির্ভর ফাওদুনা চৎকনি। মীয়াম্না পোৎ-চৈ লৈবা মতমদা লৈবাক অসিদা শাবা পোৎলমশিং নিংশিংগদবনি অমসুং মখোয়না লৈবাক অসিগী পোৎলমশিং লৈগদবনি। দুকান মপুশিংনা মখোয়গী দুকানশিংগী মমাংদা “মসি শ্বাদেসিনি, চাউথোক্না হায়সি” হায়না ইবা পোষ্টরশিং থেৎকদবনি। মসিগী অপুনবা থবক অসিনা কুহ্মৈ খুদিংমক ভারতকী নুংঙাই য়াইফবা ওইগনি অমসুং নবরাত্রিগী থৌরমদা মীয়ামদা য়াইফ পাউজেল পীজরি।
থৌরম অসিদা শরুক য়াখিবা অতোপ্পা শক্নাইরবা মীওইশিংগী মনুংদা গুজরাতকী রাজ্যপাল শ্রী অচার্য়া দেবব্রাত, গুজরাতকী চীফ মিনিষ্টর শ্রী ভুপেন্দ্রভাই পতেল, য়ুনিয়ন মিনিষ্টরশিং, শ্রী সি.আর পতিল, শ্রী সর্বনন্দ সোনোৱাল, দোক্তর মনসুখ মন্দাবিয়া, শ্রী সান্তনু থাকুর, শ্রীমতি নিমুবেন বামভানিয়া য়াওখি।
নুঙগীৱারোল
মেরিতাইম সেক্তর চাউখৎনবা অচৌবা থবক অমদা, প্রধান মন্ত্রীনা মেরিতাইম সেক্তরগা মরী লৈনবা লুপা করোর ৩৪,২০০ হেনবগী প্রোজেকশিং শঙ্গাখি অমসুং উরেপ-উয়ুং তমখি। মহাক্না ইন্দিরা দোক্ত মুম্বাই ইন্তরনেসনেল ক্রুইজ তর্মিনেল শঙ্গাখি। মহাক্না কোলকাতাগী শ্যামা প্রসাদ মুকর্জি পোর্ততা অনৌবা কন্তেন্নর তর্মিনেল অমা অমসুং মরী লৈনবা খুদোংচাবশিং; পারাদিপ হিথাংফমদা অনৌবা কন্তেন্নর বার্দ, কার্গো পুথোক-পুশিনগী খুদোংচাবশিং অমসুং মরী লৈনবা চাউখৎ-থৌরাংগী থবকশিং; কামারাজার হিথাংফম, ইন্নোরদা তুনা তেক্রা মল্তি-কার্গো তর্মিনেল; মৈ কন্নবা খুদোংচাবশিং অমসুং অনৌবা লম্বী; চেন্নাই হিথাংফমদা সমুদ্রগী চেকপলশিং অমসুং রিভেতমেন্তশিং; কার নিকোবর আইলেন্দদা সি-ৱাল শাবা; কন্দলাগী দিনদয়াল হিথাংফমদা মল্তি-পর্পজ কার্গ বার্থ অমসুং গ্রিন বাইও-মিথানোল প্লান্ত; অমসুং পাত্না অমসুং বারানসীদা জহাজ নৌনা শেমজিন্নবা খুদোংচাবশিং উরেপ-উয়ুং তমখি।
প্রধান মন্ত্রীনা গুজরাত্ত তোঙান তোঙানবা হিরমশিংদা লুপা করোর ২৬,৩৫৪ গী কেন্দ্র অমসুং রাজ্য সরকারগী তোঙান তোঙানবা প্রোজেকশিং শঙ্গাখি অমসুং উরেপ-উয়ুং তমখ্রে। মহাক্না ছারা হিথাংফমদা ঐচ.পি.এল.এন.জি রিগ্যাসতিফিকেসন তর্মিনেল, গুজরাত আই.ও.সি.এল রিফাইন্নরিদা এক্রাইলিক্স অমসুং ওক্সো অলকোহোল প্রোজেক, মেগাৱাত ৬০০ গী গ্রিন সু ইনিসিয়েতিপ, লৌমীশিংগী পি.এম-কুসুম মেগাৱাত ৪৭৫ কম্পোনেন্ত সি সোলার ফিদর, মেগাৱাত ৪৫ বাদেলি সোলার পি.ভি প্রোজেক, ধোরদো খুঙ্গং মপুংফানা সোলার ফংহনবগী থবক শঙ্গাখ্রে। মহাক্না এল.এন.জি ইনফ্রাষ্ট্রকচর, অহেনবা রিন্যুএবল ইনর্জি প্রোজেকশিং, কোষ্টেল প্রোতেক্সন থবকশিং, হায়ৱেশিং, জামনগরদা গুরু গোবিন্দ সিংহ গভর্নমেন্ত হোস্পিতাল অমসুং সার তি. জেনেরেল হোস্পিতাল পাকথোকপা য়াওনা অনা-লায়য়েং অমসুং সহরগী ত্রান্সপোর্ত প্রোজেকশিং অমসুং নেসনেল হায়ৱেশিংগী কিমি ৭০ লেন মরি ওনখৎপা য়াওনা প্রোজেক কয়া উরেপ-উয়ুং তমখ্রে।
গ্রিনফিল্দ ইন্দষ্ট্রিয়েল সিতি অমা ওইনা শেমগৎনবা অকোয়বদা উদ্যোগ শেমগৎনবা, স্মার্দ ইনফ্রাষ্ট্রকচর শেমগৎনবা অমসুং মালেমগী ওইনা শেন থাদনবা, প্রধান মন্ত্রীনা ধোলেরা স্পিসিএল ইনভেষ্টমেন রিজন (দি এস আই আর) মথক্তগী য়েংগনি। ভারতকী অরিবা মেরিতাইমগী চৎনবীশিং ঙাক-শেন্নবা অমসুং হরাওবা ফোঙদোক্নবা অমসুং তুরিজম, রিছার্স, ইজুকেসন অমসুং স্কিল দিবলপমেন্তগী মফম অমা ওইহন্নবা, লুপা করোর ৪,৫০০ রোম চঙনা লোথালদা নেসনেল মেরিতাইম হেরিতেচ কমপ্লেক্স (এন ঐচ এম সি) শেমগৎলিবগী মফমদা প্রধান মন্ত্রী চৎকনি অমসুং ফিবম য়েংশিনগনি।
ৱা ঙাংখিবগী মপুংফাবা ৱারোল পানবা মসিদা নম্বীয়ু
For peace, stability and prosperity in the world, India must become self-reliant. pic.twitter.com/aOvcLaxWiQ
— PMO India (@PMOIndia) September 20, 2025
Chips or ships, we must make them in India. pic.twitter.com/pRwQvoqW4P
— PMO India (@PMOIndia) September 20, 2025
A historic decision has been taken to strengthen India's maritime sector… the government now recognises large ships as infrastructure. pic.twitter.com/aVjKwrG2ng
— PMO India (@PMOIndia) September 20, 2025
India's coastlines will become gateways to the nation's prosperity. pic.twitter.com/j7pgdhbzMT
— PMO India (@PMOIndia) September 20, 2025
