গুজরাতকী পাম্নরবা মুখ্য মন্ত্রী, শ্রী ভুপেন্দ্র ভাই পতেল, কেন্দ্রগী মন্ত্রী-মন্দলগী ঐহাক্কী মরুপশিং, সর্বানন্দ সোনোৱলজী, সি.আর. পতিল, মনসুখ ভাই মন্দাবিয়া, শান্তনু থাকুর, নিমুবেন বভানিয়া, লৈবাক অসিগী মফম ৪০ হেনবদগী, মরু ওইবা হীথাংফম পুম্নমক্ত, থৌরম অসিদা শরুক য়ারিবশিং, তোঙান-তোঙানবা রাজ্যশিংদগী মন্ত্রীশিং, মকোক থোংবা ওফিসিএলশিং, অতোপ্পা দিগ্নিতরীশিং, অমসুং ঐগী নুংশিরবা ইচিল-ইনাওশিং, পুম্নমকপু খুরুমজরি।
ঐখোয়গী ভাবনগরনা সেন্সসন অমা থোকহল্লে, হোয়, ইলেক্ত্রিসিতী লাকপদা ঙাইরি। ঐহাক্না পন্দলগী মপান্দা মীওই কয়া অমা উবা ফংই। ঐখোয়বু য়াইফ-মঙ্গোল পীনবা মশিং য়াম্না লাকপীরিবা পুম্নমকপু ঐহাক্না থাগৎচরি।
মরুপশিং,
থৌরম অসি ভাবনগরদা পাংথোক্লি, অদুবু মসি লৈবাক পুম্বগী প্রোগ্রাম অমনি। ঙসি, ভাবনগর অসি থৌরম অদুনি, অমসুং ভাবনগর অসি ভারত পুম্বদা সমুদ্রদগী চাউখৎপা পুরক্নবা ঐখোয়গী লম্বী অসিবু উৎনবগীদমক মরুওইবা প্রোগ্রাম অসিগী সেন্তর ওইনা খনখ্রে। গুজরাতকী মীয়াম অমসুং ভাবনগরগী মীয়ামদা হরাও-তয়াম্বা ফোংদোকচরি।
মরুপশিং,
হন্দক্তা সেপ্তেম্বর ১৭দা, ময়াম পুম্নমক্না ময়ামগী নরেন্দ্র ভাইদা য়াইফ-মঙ্গোল পীরিবসি, লৈবাক অসিদগী অমসুং মালেমগী মফমশিংদগী ঐহাক্না ফংলকপা য়াইফ-মঙ্গোলশিং অসিগীদমক ঐহাক্না মীপুম খুদিংমক্তা থাগৎপা ফোংদোকপা ঙমদ্রে অদুবু ভারত অমসুং মালেমগী মফম খুদিংমক্তগী ঐহাক্না ফংলকপা নুংশিবা, য়াইফ-পাউজেলশিং অসি, মসি ঐহাক্কী খ্বাইদগী চাউবা এসেৎনি, মসি ঐহাক্কী খ্বাইদগী চাউবা পাঙ্গলনি অমসুং মরম অসিনা ঙসি লৈবাক অসিগী অমসুং মালেমগী অথোইবা মীওই পুম্নমক্তা ঐহাক্না মীয়ামদা থাগৎপা ফোংদোকচরি। মফম অসিদা ইচানুপী অমনা ফোতো অমা পুরক্লি, মফম অসিদা ইচানুপী অমনা ফোতো অমা পুরক্লি, অদোম্না মদু লৌশিনবিয়ু, ঐহাক্না অঙাংশিং অসিদা নুংঙাইবা ফোংদোকচরি। মসি পুরক্লিবা মীওইশিংদা ঐহাক্না থাগৎচরি। অদোমগী নুংশিবা অদুগীদমক ঐহাক্না ময়ামগী মফমদা থাগৎপা ফোংদোকচরি। ময়াম্না য়াম্না কন্না হোৎনখি। থাগৎচরি সর, থাগৎচরি মচা, থাগৎচরি মরুপ।
মরুপশিং,
বিশ্বকর্মা জয়ন্তীদগী হৌরগা গান্ধী জয়ন্তী ফাওবা, হায়বদি সেপ্তেম্বর ১৭দগী ওক্তোবর ২ ফাওবা, লৈবাক শীনবা থুংনা মীওই মিলিয়ন কয়ানা সেবা পখৱারা পাংথোক্লি। গুজরাতসু হৌজিক নুমিৎ ১৫নিগী সেবা পখৱারা পাংথোক্লি হায়না ঐনা খঙলে। অদুম ওইনমক, হৌখিবা নুমিৎ নিনি নৎত্রগা হুমনি অসিদা, সেবা পখৱারাগী থৌরম কয়া অমা পাংথোকখি। মফম চাম্মরোমদা ব্লদ দোনেসন কেম্পশিং পাংথোকখ্রে অমসুং হৌজিক ফাওবদা মীওই লাখ অমা হেন্না ব্লদ দোনেসন তৌখ্রে। ঐহাক্না গুজরাতকী মরমদা ফংলকপা পাউ খক্তমক শেয়র তৌরি। শহর কয়াদা ক্লিনলিনেস দ্রাইবশিং পাংথোকখি অমসুং মীওই লাখ কয়ানা মসিগী ক্লিনলিনেস দ্রাইবশিংদা শরুক য়াখি। রাজ্য অসিগী মফম ৩০,০০০ হেনবদা হেল্থ কেম্পশিং লিংখৎখ্রে। মসি য়াম্না চাউবা মশীং অমনি। মফম অসিদা নুপীশিংগী হকশেলদা মরুওইবা মীৎয়েং থমদুনা, তেস্তিং অমসুং লাইয়েংবদা মীওইশিংদা মতেং পাংলি। লৈবাক শিনবা থুংনা সেবাগী থবকশিং অসিদা শরুক য়ারিবা মীওই খুদিংমক্তা ঐনা নুংঙাইবা ফোংদোকচরি অমসুং ঐনা থাগৎপা ফোংদোকচরি।
মরুপশিং,
ঙসি, থৌরম অসিদা, ঐহাক্না কৃষ্ণ কুমার সিংহজীবু ইকাই খুম্নবা উৎচরি। সরদার সাহেবকী মিসনদা য়াওদুনা, মহাক্না ভারতকী অপুনবগীদমক্তা অচৌবা থৌদাং অমা লৌখি। ঙসিদি, অসিগুম্বা অচৌবা লৈবাক নীংবশিং অসিদগী ইথিল লৌদুনা, ঐখোয়না ভারতকী অমত্তা ওইববু মপাঙ্গল কনখৎহল্লি অমসুং "এক ভারত শেস্ত্র ভারত"কী ৱাখল্লোন অসিবু মপাঙ্গল কনখৎহল্লি।
মরুপশিং,
ঙসি, ঐহাক ভাবনগরদা লাক্লি, নবরত্রিগী অশেংবা কুমহৈ হৌগদৌরিবা অসিদা অসিগুম্বা থৌরম অসিদা, জি.এস.তি.দা হন্থরকপনা মরম ওইদুনা, কৈথেলশিং অসি হেন্না মরাং কায়না লৈরগনি, অমসুং থৌরম অসিগী ফিবম অসিদা, ঐখোয়না সমুদ্রদগী লাকপা চাউখৎপগী অচৌবা থৌরম অসি পাংথোক্লি। ভাবনগরগী ইচিল-ইনাওশিং, লৈবাক শিনবা থুংবদগী মীওইশিং শরুক য়াদুনা লাক্লিবা অসিদা হিন্দীদা ঙাংবগীদমক ঐহাকপু ঙাকপীয়ু। লৈবাক শীনবা থুংনা মীওই মিলিয়ন কয়া প্রোগ্রাম অসিদা শরুক য়াবা মতমদা, ঐহাক্না হিন্দীদা ৱা ঙাংবগীদমক ঙাকপীয়ু।
মরুপশিং,
২১শুবা চহি চাগী ভারতনা সমুদ্রবু অচৌবা খুদোংচাবা অমা ওইনা উরি। ঙল্লিঙৈ মতম খরা অসিদা, হীথাংফমশিংনা লমজিংবা চাউখৎ-থৌরাংগী খোংজেল য়াংশিলহন্নবা লুপা করোর লিশিং কয়াগী প্রোজেক্তশিং উরেপ উয়ুং তমখ্রে অমসুং শঙ্গাখ্রে। লৈবাক অসিদা ক্রুইজ তুরিজম প্রমোৎ তৌনবা মুম্বাইদা ইন্তর্নেস্নেল ক্রুইজ তর্মিনেলসু ঙসি হৌদোকখ্রে। ভাবনগর অমসুং গুজরাতকী চাউখৎ-থৌরাংগা মরী লৈনবা প্রোজেক্ত কয়া অমসু হৌদোকখ্রে। ঐহাক্না ঐহাক্কী লৈবাক মীয়াম অমসুং গুজরাতকী মীয়ামদা নুংঙাইবা ফোংদোকচরি।
মরুপশিং,
ঙসিদি, ভারতনা মালেমগী ওইবা ৱাখল্লোনগা লোয়ননা মাংলোমদা চংশিল্লি। মালেম অসিদা ঐখোয়গী অচৌবা য়েক্নবশিং লৈতে। করিগুম্বা ঐখোয়গী অশেংবা য়েক্নবা অমা লৈরবদি, মদুদি অতোপ্পা লৈবাকশিংগী মখা পোনবনি। মসি ঐখোয়গী খ্বাইদগী চাউবা য়েক্নবনি। অমসুং পুন্না, ঐখোয়না ভারতকী য়েক্নবশিং, মখা পোনবগী য়েক্নবশিং অসি মাইথিবা পীনবা তাই। ঐখোয়না মতম পুম্নমক্তা অমুক হন্না হায়গদবনি: মপান লমদা মখা পোনবা হেনগৎলক্লিবমখৈ, লৈবাক অমগী মাইথিবা হেনগৎলকই। মালেমগী শান্তি, তংদু লৈতাবা অমসুং চাউখৎপা ফংনবগীদমক্তা, মালেমগী খ্বাইদগী মীশিং য়াম্বা লৈবাক অসিনা মশা মরোমদোম লেপচগদবনি। করিগুম্বা ঐখোয়না অতোপ্পদা মখা পোল্লবদি, ঐখোয়গী ইশাগী ইকাই খুম্নবা অদু হন্থরক্কনি। ঐখোয়না লৈবাক অসিগী মীওই বিল্লিয়ন ১.৪গী তুংলমচৎপু অতোপ্পশিংগী খুৎতা থাদোকপা য়ারোই। ঐখোয়না লৈবাক অসিগী চাউখৎ-থৌরাংগী ৱারেপ অসি অতোপ্পদা মখা পোল্লি থম্বা য়ারোই। ঐখোয়না তুংগী মীরোনগী তুংলমচৎপু খুদোংথীবা নংহল্লোইদবনি।
অমসুং মরম অসিনা ইচিল-ইনাওশিং,
গুজরাতিদা ঐখোয়না হায়নবা অমা লৈ, "সমস্যা চামাগীদমক কোকহন্নবা উপাই অমা খক্তমক লৈ।" খুদোংচাদবা চাম্মগী কোকহন্নবা পাম্বৈ অমা খক্তমক লৈ, অমসুং মদুদি মশা মরোমদোম লেপচবা ঙম্বা ভারত অমনি। অদুবু মসি ফংনবগীদমক্তা ঐখোয়না অৱাবা কয়া মায়োক্নগদবনি অমসুং অতোপ্পা লৈবাকশিংদগী মখা পোনবা অসি লেপ্তনা হন্থহনগদবনি। অমসুং হৌজিক, ভারত অসি মশা-মরোমদোম লেপচগদবনি অমসুং মালেমগী মমাংদা মপাঙ্গল কন্না লেপকদবনি।
ইচিল-ইনাওশিং,
ভারতকী ওইথোকপা য়াবা কয়া লৈরি। অদুবু নীংতম্লবা মতুংদা, কংগ্রেস পার্তীনা ভারতকী মপাঙ্গল খুদিংমক নাথৈদুনা থমখি। মরম অদুনা, নীংতম্বা ফংলবা মতুং চহি তরাগী খুজিং তরুক ফাওবা লৈরবসু, ভারতনা মাগী ফংফম থোকপা মায়পাকপা অদু ফংবা ঙমখিদে। মসিগী মরুওইবা মরম অনি লৈরম্মি: মতম শাংনা, কংগ্রেস সরকারনা লৈবাক অসিবু মালেমগী কৈথেলদগী তোখাইনা থমদুনা লাইসেন্স-কোতা রাজকী মনুংদা লৈহল্লম্মি। অমসুং মদুদগী, গ্লোবেলাইজেসনগী মতম য়ৌরকপা মতমদা, ইম্পোর্তকী অমত্তা ঙাইরবা লম্বী অদু লৌখৎখি। অমসুং মদুগী মনুংদা, লুপা করোর লিশিং কয়া অমসুং লাখ কয়াগী স্কেমশিং চত্থখি। কংগ্রেস সরকারশিংগী থৌশিল-থৌরাংশিং অসিনা লৈবাক অসিগী নহারোলশিংদা অৱাবা কয়া থোকহনখি। অসিগুম্বা পোলিসীশিং অসিনা ভারতকী অশেংবা শক্তি অদু ফোংদোকপা ঙমখিদে।
মরুপশিং,
ঐখোয়গী শিপ্পিং সেক্তর অসি লৈবাক অসিনা মায়োক্নখিবা অমাংবশিংগী অচৌবা অচৌবা খুদম অমনি। ভারত অসি চহি চা কয়াগী মমাংদগী মরু ওইবা সমুদ্রগী শক্তি অমা ওইদুনা লাক্লি, অমসুং ঐখোয়না মালেমগী খ্বাইদগী চাউবা শিপ বিল্দিং সেন্তর অমা ওইরম্মি। ইন্দিয়াগী কোস্তেল স্তেৎশিংদা শাবা জহাজশিংনা নেস্নেল অমসুং গ্লোবেল ত্রেদতা মতেং পাংখি। চহি ৫০গী মমাং ফাওবদা ঐখোয়না ভারত্তা শাবা জহাজশিং শীজিন্নখি। মতম অদুদা, ভারতকী ইম্পোর্ত অমসুং এক্সপোর্তকী চাদা ৪০ হেনবনা লৈবাক অসিদা শাবা জহাজশিংনা পাংথোকখি। অদুবু, লৈবাক অসিগী শিপ্পিং সেক্তর অসিসু কংগ্রেস পার্তীগী ফত্তবা লালোংশিংগী ভিক্তিম ওইখি। ভারত্তা শিপ বিল্দিংদা মীৎয়েং চংবগী মহুত্তা, কংগ্রেসনা মপানগী জহাজশিংদা চার্তর পীবদা হেন্না পামখি। মসিনা ভারতকী শিপ বিল্দিংগী ইকোসিস্তেমবু মপাঙ্গল শোন্থহনখি, অমসুং মপানগী জহাজশিংদা মখা পোনবা অসি তঙাইফদবা অমা ওইখি। মসিনা মরম ওইদুনা চহি ৫০গী মমাংদা, ললোন-ইতিক্কী চাদা ৪০দি ভারতকী জহাজশিংনা পুথোক পুশিন তৌরম্মি, অদুগা মসিগী শরুক অসি চাদা মঙাদা খক্তদা হন্থরে। মসিনা তাকপদি ঐখোয়না ঐখোয়গী ললোন-ইতিক্কী চাদা ৯৫দি মপানগী জহাজশিংদা মখা পোল্লি হায়বনি। মপানগী জহাজশিংদা মখা পোল্লিবা অসিনা মরম ওইদুনা ঐখোয়না অচৌবা মাংজবা কয়া মায়োক্নখি।
মরুপশিং,
ঙসি ঐনা লৈবাক অসিগীদমক্তা স্তেতিস্তিক্স খরা উৎচরি। ভারতনা চহি খুদিংগী চাউরাক্না দোল্লর বিল্লিয়ন ৭৫, নৎত্রগা চাউরাক্না লুপা করোর লাখ তরুক, মপান লৈবাক্কী শিপ্পিং কম্পনীশিংদা শিপ্পিং সর্ভিসকীদমক্তা শেল থাদৈ হায়বসি খঙবদা লৈবাক্কী মীওইশিংদি য়াম্না থম্মোয় শোক্লগনি। হায়রিবা শেনফম অসি ভারতকী ঙাকশেলগী বজেৎ অদুগা চাউরাক্না মান্নৈ। ঐখোয়না অতোপ্পা লৈবাকশিংদা চহি তরাগী খুজিং তরেৎ অসিদা ফ্রেৎতা শেল কয়া পীখ্রে হায়বসি খল্লু। ঐখোয়গী শেনফম অসিনা মপান লৈবাক্তা থবক মিলিয়ন কয়া শেমগৎলে। করিগুম্বা মমাংগী সরকারশিংনা মসিগী শেনফম অসিগী অপীকপা শরুক অমা ফাওবা মখোয়গী শিপ্পিং ইন্দস্ত্রীদা শেল থাদরম্বা তারবদি, মালেম অসিনা ঙসি ঐখোয়গী জহাজশিং শীজিন্নরমগনি, ঐখোয়না শিপ্পিং সর্ভিসশিংদা লুপা করোর কয়া ফংলমগনি, অমসুং ঐখোয়না শেনফম অসি য়াম্না কনবা ঙম্লমগনি।
মরুপশিং,
ভারতনা ২০৪৭ ফাওবদা চাউখৎপা পাম্লবদি, মদুদি ভারতকী নীংতম্বা চহি ১০০নি, মদুদি মশা-মরোমদোম লেপচবা ঙমগদবনি। ভারতনা মশা-মরোমদোম লেপচবা নত্তনা অতোপ্পা পাম্বৈ অমত্তা লৈতে। নাগরিক বিলিয়ন ১.৪না অমত্তা ঙাইরবা ৱারেপ লৌগদবনি: মসি চিপশিং ওইরো নত্রগা জহাজশিং ওইরো, ঐখোয়না মখোয়শিং অসি ভারত্তা শাজগদবনি। মসিগী ৱাখল্লোন অসিগা লোয়ননা, ভারতকী মেরিতাইম সেক্তরনা নেক্স জেনরেসনগী রিফোর্মশিং পায়খৎলি। ঙসিদগী হৌরগা, লৈবাক অসিগী মরুওইবা পোর্ত খুদিংমক তোঙান-তোঙানবা দোক্যুমেন্তশিং অমসুং তোঙান-তোঙানবা প্রোসেসশিংদগী ফ্রী ওইরগনি। ৱান নেসন, ৱান দোক্যুমেন্ত অমসুং ৱান নেসন, ৱান পোর্ত অমা হায়রিবা থৌওংশিং অসিনা ত্রেদ অমসুং বিজিনেস হেন্না লাইথোকহল্লগনি। হন্দক্তা, ঐখোয়গী মন্ত্রী সর্বানন্দ সোনোৱালনা হায়খিবগুম্না, পার্লিয়ামেন্তকী নোংজু মীফম মনুংদা, ঐখোয়না ব্রিতিশকী মতমদগী চৎনরক্লবা চৎনদ্রবা আইন কয়া অমা শেমদোকখি। ঐখোয়না মেরিতাইম সেক্তরদা রিফোর্ম কয়া অমা হৌদোক্লে। ঐখোয়গী সরকারনা অনৌবা মওংদা লৈবাক অসিদা মেরিতাইম লো মঙা পুথোকখ্রে। হায়রিবা আইনশিং অসি অমসুং মসিগী আইনশিং অসি হৌদোকপা অসিনা শিপ্পিং সেক্তর অমসুং পোর্ত গবর্নান্সতা অচৌবা অহোংবা অমা পুরক্লগনি
মরুপশিং,
ভারত অসি চহি চা কয়াদগী অচৌবা জহাজশিং শাবদা হৈথোই-শিংথোইবা ওইদুনা লাক্লি। নেক্স জেনরেসনগী রিফোর্মশিংনা অসিগুম্বা কাউথোকলুরবা মতিক ময়াই অদু অমুক হন্না শেমগৎপদা মতেং পাংগনি। হৌখিবা চহি তরা অসিদা, ঐখোয়না নেভীদা জহাজ অমসুং সবমেরিন ৪০ হেন্না য়াওহনখ্রে। অমা নৎত্রগা অনি খক্তা নত্তনা মখোয় পুম্নমক অসি ভারত্তা শাবনি। আই.এন.এস. বিক্রান্ত, ভারত্তসু শাখিবা অচৌবা আই.এন.এস. বিক্রান্তগী মরমদা নখোয়না খঙলমগনি। মসিবু শাবদা শীজিন্নরিবা অৱাংবা থাক্কী স্তীল অসিসু ভারত্তা পুথোকপনি। মসিগী ৱাহন্থোক্তি ঐখোয়গী তৌবা ঙম্বশিং লৈরে, ঐখোয়গী হৈশিংবশিংগী অৱাৎপা লৈতে। ঙসি, ঐহাক্না ঐহাক্কী লৈবাক মীয়ামদা অচৌবা জহাজশিং শাবদা মথৌ তাবা পোলিতিকেল ৱিল লৈরে হায়না থাজবা পীজরি।
মরুপশিং,
লৈবাক অসিগী মেরিতাইম সেক্তর মপাঙ্গল কনখৎহন্নবা ঙরাং পুৱারী ওইরবা ৱারেপ অমা লৌখি। ঐখোয়না নেস্নেল পোলিসীদা অচৌবা অহোংবা অমা পুরক্লে। সরকারনা হৌজিক অচৌবা জহাজশিংবু ইনফ্রাস্ত্রকচর ওইনা মশক খঙলে। সেক্তর অমবু ইনফ্রাস্ত্রকচর অমা ওইনা শকখঙবা মতমদা, মসিনা য়াম্না কান্নবা ফংই। হৌজিক্তি, অচৌবা শিপ বিল্দিং কম্পনীশিংনা বেঙ্কতগী লোন লৌবদা হেন্না লায়না ফংলগনি, মখোয়না শেন্দোইগী চাং হন্থহল্লগনি, অমসুং ইনফ্রাস্ত্রকচর ফাইনান্সিংগী অতোপ্পা কান্নবা পুম্নমকসু শিপ বিল্দিং কম্পনীশিং অসিদা ফংলগনি। সরকারগী ৱারেপ অসিনা ভারতকী শিপ্পিং কম্পনীশিংদা অৱাবা হন্থহল্লগনি অমসুং মালেমগী অথোই-অহেন তান্নবা অসিদা মখোয়বু মতেং পাংগনি।
মরুপশিং,
ভারতপু মালেমগী মরুওইবা সমুদ্রগী শক্তি ওইহন্নবা, ভারত সরকারনা মরুওইবা স্কিম অহুমদা থবক পায়খৎলি। স্কিম অহুম অসিনা শিপ বিল্দিং সেক্তরদা শেলগী তেংবাং পীনবা, ঐখোয়গী শিপয়ার্দশিংদা মোদর্ন তেক্নোলোজী শীজিন্নবদা মতেং পাংগনি, অমসুং দিজাইন অমসুং ক্বালিতী য়াম্না ফগৎহনগনি। লাক্কদৌরিবা চহিশিংদা স্কিমশিং অসিদা লুপা করোর লিশিং তরেৎ হেন্না চাদিং তৌরগনি।
মরুপশিং,
ঐহাক্না নীংশিংলি মদুদি ২০০৭দা, ঐহাক্না মুখ্য মন্ত্রী ওইনা অদোমগী সেবা তৌরিঙৈদা, গুজরাতনা শিপ বিল্দিংগী খুদোংচাবশিংগী মতাংদা অচৌবা সেমিনার অমা পাংথোকখি। মতম অদুদা, ঐখোয়না গুজরাতকী শিপ বিল্দিং ইকোসিস্তেমদা মতেং পাংখি। হৌজিক্তি, লৈবাক শিনবা থুংনা শিপ বিল্দিং প্রমোৎ তৌনবা ঐখোয়না পাক শন্না থবক পায়খৎলি। মফমসিদা লৈরিবা এক্সপর্তশিংনা খঙই মদুদি শিপ বিল্দিং অসি মহৌশাগা মান্নবা ইন্দস্ত্রী নত্তে। শিপ বিল্দিং ইন্দস্ত্রী অসি ইন্দস্ত্রী পুম্নমক্কী মমা, ইন্দস্ত্রী পুম্নমক্কী মমা হায়না মালেম শিনবা থুংনা খঙনৈ। মসিনা জহাজ শাবা খক্তদগী হেন্না চংই মরমদি, মসিগা মরী লৈনবা ইন্দস্ত্রীশিং অসি পাকথোক চাউথোক্লি। স্তীল, মেছিনরী, ইলেক্ত্রোনিক্স, তেক্সতাইল, পেন্ত, আই.তি. সিস্তেমশিং অসিগুম্বা ইন্দস্ত্রীশিং অসি শিপ্পিং ইন্দস্ত্রীনা মতেং পাংলি। মসিনা অপীকপা অমসুং মাইক্রো-স্কেল ইন্দস্ত্রীশিং, এম.এস.এম.ই.শিংদা কান্নবা ফংহল্লি। রিসর্চনা উৎলি মদুদি শিপ বিল্ দিংদা শেল থাদবা রুপি খুদিংমক্না শেন্মিৎলোনদা শেল থাদবা অদু শরুক অনি হেনগৎহল্লি। অমসুং শিপয়ার্দ অমদা শেম্লিবা থবক খুদিংমক্না সপ্লাই চেনগী মনুংদা অনৌবা থবক তরুক নৎত্রগা তরেৎ শেম্মি। মসিনা তাক্লিবদি, শিপ বিল্দিং ইন্দস্ত্রীদা থবক ১০০ শেম্লবদি, মসিগা মরী লৈনবা সেক্তরশিংদা থবক ৬০০ হেন্না শেম্মী। মসিনি শিপ বিল্দিংগী অচৌবা মলতিপ্লাইয়র ইফেক্ত।
মরুপশিং,
ঐখোয়না শিপ বিল্দিংগীদমক মথৌ তাবা স্কিল সেৎতা মীৎয়েং থম্লি। মসিগী মতাংদা ঐখোয়গী আই.তি.আই.শিং অসি কান্নবা ওইগনি, অমসুং মেরিতাইম য়ুনিভর্সিতীশিংগী থৌদাং অসি পাকথোক চাউথোক্লগনি। হৌখিবা চহিশিংদা, ঐখোয়না নেভী অমসুং এন.সি.সি.গী মরক্তা কোওর্দিনেসন তৌদুনা কোস্তেল এরিয়াশিংদা অনৌবা সিস্তেমশিং লিংখৎলে। হায়রিবা এন.সি.সি. কেদেৎশিং অসি নেভী অমসুং কম্মর্সিএল সেক্তর অনিমক্তা থৌদাং লৌনবগীদমক শেম-শারগনি।
মরুপশিং,
ঙসিগী ভারত অসি তোঙানবা ৱাখল্লোন অমগা লোয়ননা মাংলোমদা চংশিল্লি। ঐখোয়না হৌজিক ঐখোয়গী পান্দমশিং অদু মতমগী মাংওইননা ফংলি হায়বা উৎলি। সোলর সেক্তরদা, ভারতনা মাংজৌননা লেপখিবা মতমদগী চহি মরিদগী মঙা ফাওবগী মনুংদা মাংজৌননা পান্দমশিং ফংলি। ভারতনা পোর্ত-লেদ দিবেলপমেন্তকীদমক ঐখোয়না চহি ১১গী মমাংদা থমখিবা পান্দমশিং অদুদা চাউনা মাই পাক্লি। ঐখোয়না অচৌবা জহাজশিংগীদমক লৈবাক শিনবা থুংনা অচৌবা পোর্তশিং শেমগৎলি অমসুং সাগরমালাগুম্বা স্কিমশিংগী খুত্থাংদা পোর্ত কনেক্তিবিতী হেনগৎহল্লি।
মরুপশিং,
হৌখিবা চহি ১১দা ভারতনা পোর্ত কেপাসিতী শরুক অনি হেনগৎহনখ্রে। ২০১৪গী মমাংদা, ভারত্তা শিপ তর্ন-এরাউন্দ তৌবগী চাংচৎকী মতম অসি নুমিৎ অনি ওইরম্মি। ঙসিদি, ভারত্তা শিপ তর্ন-এরাউন্দ তৌবগী মতম অসি নুমিৎ অমদগী হন্থরে। ঐখোয়না লৈবাক অসিদা অনৌবা অমসুং হেন্না চাউবা পোর্তশিংসু শেমগৎলি। লৈবাক অসিগী অহানবা দীপ-ৱাতর কন্তেনর ত্রান্সশিপমেন্ত পোর্ত অসি কেরলাদা হৌদোকখ্রে। ভাধবন পোর্ত অসি মহারাস্ত্রাদা লুপা করোর ৭৫,০০০ হেন্না চাদিং তৌদুনা শেমগৎলি। মসি মালেমগী খ্বাইদগী ফবা পোর্ত ১০গী মনুংদা অমা ওইগনি।
মরুপশিং,
ঙসিদি সমুদ্রগী ললোন-ইতিক্তা ভারতকী শরুক অসি ১০% খক্তনি। ঐখোয়না মসিবু মখা তানা হেনগৎহনগদবনি। ঐখোয়না ২০৪৭ ফাওবদা মালেমগী মেরিতাইম ত্রেদতা ঐখোয়গী শরুক অসি শরুক অহুম্লক হেনগৎহনবা পাম্মি। অমসুং ঐখোয়না মসি পাংথোক্কনি।
মরুপশিং,
ঐখোয়গী সমুদ্রগী ললোন-ইতিক হেনগৎলকপগা লোয়ননা ঐখোয়গী সমুদ্রগী মীওইশিংগী মশিংসু হেনগৎলক্লি। মখোয়শিং অসি সমুদ্রদা জহাজ ওপরেৎ তৌবা, ইঞ্জিনশিং অমসুং মেকানিজমশিং মেনেজ তৌবা, অমসুং লোদিং অমসুং অনলোদিং তৌবদা য়েংশিনবা কন্না হোৎনজবা প্রোফেস্নেলশিংনি। চহি তরাগী মমাংদা, ঐখোয়না সমুদ্রগী মীওই ১২৫,০০০গী মখাদা লৈরম্মি। অদুবু ঙসিদি, মখোয়গী মশিং অসি ৩০০,০০০ হেনখ্রে। ঙসিদি ভারত অসি মালেমগী খ্বাইদগী মশিং য়াম্বা সমুদ্র চৎপা মীওইশিং পুথোক্লিবা লৈবাক অহুমগী মনুংদা লৈরে অমসুং মসিনা ভারতকী নহারোলশিংদা থবক ফংহন্নবগী খুদোংচাবশিং হেনগৎহল্লি। মসিনা তাকপদি ভারতকী চাউখৎলক্লিবা শিপ্পিং ইন্দস্ত্রীনা মালেমগী থাক্তা মসিগী শক্তি অসিসু হেনগৎহল্লি।
মরুপশিং,
ভারতকী ইনাক খুল্লবা মেরিতাইল হেরিতেজ অমা লৈজৈ। ঐখোয়গী ঙামীশিং অমসুং ঐখোয়গী অরিবা পোর্ত সিতীশিং অসি হেরিতেজ অসিগী খুদম্নি। ঐখোয়গী ভাবনগর, সৌরাস্ত্রা অসি মসিগী অচৌবা খুদম অমনি। ঐখোয়না মসিগী হেরিতেজ অসি তুংগী মীরোনশিংদা পীরমগদবনি অমসুং মালেমদা ঐখোয়গী পাঙ্গল উৎকদবনি। মরম অদুনা ঐখোয়না লোথালদা য়াম্না ফজবা মেরিতাইম ম্যুজিয়ম অমা শাগৎলি। মসি মালেমগী খ্বাইদগী চাউবা মেরিতাইম ম্যুজিয়ম ওইগনি। স্তেচু ওফ য়ুনিতীগুম্না, মসি ভারতকী অনৌবা মশক অমা ওইগনি। ঐহাক্না ঙসি মফম অদুদা চৎকনি।
মরুপশিং,
ভারতকী কোস্তলাইন অসি ভারতকী চাউখৎপগী লম্বী ওইগনি। অমসুং ঐহাক্না চাউথোকচবা পোকচৈ, অমসুং ঐহাক্না ভারতকী কোস্তলাইন অসি ভারতকী চাউখৎপগী থোঙজং ওইরগনি হায়না মাংজৌননা উবা ফংলি। গুজরাতকী কোস্তলাইন অসি লমদম অসিগীদমক্তা অমুক্কা হন্না খুদোংচাবা অমা ওইরক্লিবা অসিদা ঐহাক নুংঙাইবা ফাওই। ঙসিদি, লমদম অসিনা লৈবাক অসিদা পোর্ত-লেদ দিবেলপমেন্তকী অনৌবা লম্বী অমা উৎলি। ঙসিদি, গুজরাতকী পোর্তশিংনা সমুদ্রগী লম্বীদা লৈবাক অসিদা লাকপা কার্গোগী চাদা ৪০বু পায়খৎলি। হৌজিক্তি হায়রিবা পোর্তশিং অসিদসু দেদিকেতেদ ফ্রাইৎ কোরিদোরগী কান্নবা ফংলগনি। মসিনা লৈবাক অসিগী অতোপ্পা মফমশিংদা পোৎলমশিং থুনা পুথোক-পুশিন তৌবা হেন্না লায়থোকহল্লগনি। মসিনা পোর্তশিংগী ইফিসেন্সী হেনগৎহনগনি।
মরুপশিং,
মফম অসিদা অচৌবা শিপ ব্রেকিং ইকোসিস্তেম অমসু শেমগৎলি। অলং শিপ ব্রেকিং য়ার্দ অসি মসিগী মরুওইবা খুদম অমনি, মসিনা নহা কয়া অমা থবক পীরি।
মরুপশিং,
চাউখৎলবা ভারত অমগীদমক ঐখোয়না লম খুদিংমক্তা, সেক্তর খুদিংমক্তা খোঙজেল য়াংনা থবক তৌগদবনি। অমসুং ঐখোয়না পুম্নমক্না খঙই মদুদি চাউখৎলবা ভারত অমগী লম্বী অসি মশা-মরোমদোম লেপচবা ভারত অমগী খুত্থাংদা ওইগনি। মরম অদুনা, ঐখোয়না লৈরিবা পোৎলম খুদিংমক লমদমসিগী ওইগদবনি হায়বসি ঐখোয়না নীংশিংগদবনি। ঐখোয়না য়োল্লিবা খুদিংমক লমদমসিগী ওইগদবনি। ঐনা ঐখোয়গী দুকান মপু পুম্নমকপু মখোয়গী দুকানশিংদা, "মসি লমদমসিগীনি হায়না চাউথোক্না হায়বিয়ু" হায়না ইবা পোস্তর অমা থেৎনবা হায়জবা পাম্মি। মসিগী হোৎনবা অসিনা কুমহৈ খুদিংমকপু ভারতকী চাউখৎপগী কুমহৈ অমা ওইহল্লগনি। মসিগী ৱাখল্লোন অসিগা লোয়ননা, ঐহাক্না অমুক্কা হন্না নখোয় পুম্নমকপু নুঙাই য়াইফরবা নবরত্রি অমগী য়াইফ-পাউজেল পীজরি! অপিকপা ইচানুপা অমনা ফোতো অমা পুরক্লি। মহাক্না মফম অদুদা মতম শাংনা লেপ্লি, মহাক্কী খুৎনা নারম্লগনি। কনাগুম্বা অমনা মদু লোইশিনবিয়ু। মহাক অসি অঙাং অমনি। য়াম্না ফৈ, ইচানুপা। য়াম্না ফৈ, ইচানুপা, ঐহাক্না অদোমগী ফোতো অদু ফংলে। নুংঙাইতবা তৌরনু, ইচানুপা, ঐহাক্না মসি ফংলে, ঐহাক্না অদোমগী ফোতো ফংলে। অদোমগী এদ্রেস অদু মদুদা ইখ্রবদি, ঐহাক্না অদোমদা শোইদনা চিথী ইরক্কনি।
মরুপশিং,
পুন্সিদা অসিগুম্বা অঙাংশিংগী নুংশিবা অসিদগী হেন্না চাউবা পোৎলম করি লৈবগে? ঙসি ঐহাকপু তরাম্না ওকপগী অমসুং ইকায় খুম্নবা উৎপা অসিগীদমক ঐহাক্না অমুক্কা হন্না ময়ামগী মফমদা থাগৎপা ফোংদোকচরি। অমসুং ঐহাক্না খঙই মদুদি ওপরেসন সিন্দুর পাংথোকপা মতমদা, ভাভনগর পুম্নমক ফিল্দদা লৈখি। ঐহাক্না নখোয়গী তেম্পরমেন্ত অদু খঙই, অমসুং মসিগীদমক্তা ঐহাক্না ময়ামদা থাগৎপা ফোংদোকচরি। ভাবনগরগী ইচিল-ইনাওশিং, নবরত্রিগী মান্দবীদা মীৎয়েং চংবিয়ু, মদুনা মশা-মরোমদোম লেপচবা ভারতকী পাউজেল অসি লৈবাক অসিগী মীপুম খুদিংমক্তা নখোয়গী মান্দবীগী খুত্থাংদা য়ৌহল্লু। ময়ামবু হন্না-হন্না থাগৎচরি, ইচিল-ইনাওশিং!
