প্রধান মন্ত্রী শ্রী নরেন্দ্র মোদীনা কর্নাতকাগী বেঙ্গালুরুদা লুপা করোর ৭,১৬০ রোমগী বেঙ্গালুরু মেত্রোগী য়েলো লাইন শঙ্গাখ্রে অমসুং লুপা করোর ১৫,৬১০ হেনবগী বেঙ্গালুরু মেত্রো ফেজ-৩ প্রোজেক্কী উরেপ-উয়ুং তমখ্রে। মহাক্না বেঙ্গালুরুগী কে.এস.আর রেলৱে ষ্টেসন্দগী বন্দে ভারত এক্সপ্রেস ত্রেন অহুমসু লমথাখি।
থৌরম অদুদা তিনখিবা মীয়ামদা ৱা ঙাংবদা, প্রধান মন্ত্রীনা হায়খি কর্নাতকাদা খোঙদাবদা মহাক মফম অসিগা মরী লৈনবগী ৱাখল অমা ফাওখি। ইনাকখুল্লবা কর্নাতকাগী নাৎ, রাজ্য অসিগী মীয়ামগী নুংশিবা অমসুং কন্নরা লোলগী ফজবা অসিনা থম্মোয়দা অপেনবা পোকখি। প্রধান মন্ত্রীনা বেঙ্গালুরুগী ঈশ্বর অন্নাম্মা তায়িগী খুয়াদা ইকায়খুম্নবা উৎখি। চহি চা কয়াগী মমাঙদা, নাদাপ্রভু কেমপেগৌরানা বেঙ্গালুরু সহরগী উরেপ-উয়ুং তমখিবা অদু নিংশিংলদুনা, প্রধান মন্ত্রীনা হায়খি চাউখৎপগী অনৌবা থাকশিং য়ৌবগা লোয়ননা মমাংঙৈগী চৎনবীদা য়ুম্ফম ওইবা সহর অমা কেমপেগৌরানা পান্দম থমখি। মদুগী ৱাখল্লোন অদুদা মতম পুম্নমক্ত বেঙ্গালুরু লৈরি অমসুং মসি ঙসি ফাওবা ঙাক-শেন্দুনা থম্লি। মদুগী মঙলান খুদিংমক বেঙ্গালুরুনা থবক ওইনা পাংথোক্লে।
প্রধান মন্ত্রীনা হায়খি ঙসিদি, বেঙ্গালুরু অসি অনৌবা ভারত চাউখৎলকপগী খুদম অমা ওইরবা সহর অমা ওইরে। সহর অসিগী থৱায় ফিলোসোফিগী লৌশিংনা য়োমশিল্লবা অমসুং মসিগী থবকশিং তেক্নোলোজিগী হৈথোই-শিংথোইবদা মমি তাবা সহর অমা ওইরে। বেঙ্গালুরু অসি মালেমগী আই.তি মেপ্তা ভারত য়াওহনবা ঙম্বা সহর অমনি। সহর অসিগী মীয়ামগী থবক শুবা কনবা অমসুং হৈথোই-শিংথোইবনা বেঙ্গালুরু মাইপাকপনি।
প্রধান মন্ত্রীনা হায়খি ২১শুবা চহিচাদা, সহরগী থৌরাং শেম্বা অমসুং সহরগী ইনফ্রাষ্ট্রকচর অসি ঐখোয়গী সহরশিংগী য়াম্না দরকার ওইবনি। বেঙ্গালুরুগুম্বা সহরশিং তুংগীদমক শেম-শাগদবনি। হৌখিবা চহি খর অসিদা ভারত সরকারনা বেঙ্গালুরুগীদমক লুপা করোর লিশিং কয়াগী প্রোজেকশিং পায়খৎখ্রে অমসুং ঙসিগী কেম্পেন অসিনা অনৌবা খোঙজেল অমা ফংলে। প্রধান মন্ত্রী মোদীনা বেঙ্গালুরু মেত্রো য়েলো লাইন শঙ্গাখ্রে অমসুং মেত্রো ফেজ-৩ গী উরেপ-উয়ুং তমখ্রে। লৈবাক অসিগী তোঙানবা তোঙানবা মফমশিং শম্নবা অনৌবা বন্দে ভারত ত্রেন অহুমসু মহাক্না লমথাখি। মহাক্না মখা তানা হায়খি মদুদি বেঙ্গালুরু অমসুং বেলগাবিগী মরক্ত বন্দে ভারত চেনবা হৌবা অসিনা বেলাগাবিদা ললোন-ইতিক অমসুং তুরিজম চাউখৎহনগনি। মসিগী মথক্ত, নাগপুর অমসুং পুনেগী মরক্ত অমসুং শ্রী মাতা বৈষ্ণো দেবী কাত্রা অমসুং অমৃতশরগী মরক্ত বন্দ ভারত এক্সপ্রেস ত্রেনশিং চেনবা হৌখ্রে। মসিনা ভক্ত লাখ কয়াদা খুদোচাবা পীগনি অমসুং তুরিজম চাউখৎকনি। প্রোজেকশিং অমসুং অনৌবা বন্দে ভারত ত্রেনশিং অসিগীদমক মহাক্না বেঙ্গালুরু, কর্নাতকা অমসুং লৈবাক শীনবা থুংবগী মীয়ামদা হরাওবা ফোঙদোকখি।
প্রধান মন্ত্রীনা হায়খি হন্দক্কী মহাক্কী বেঙ্গালুরু খোঙচৎ অসি ওপরেসন সিন্দুরগী মতুংদা অহানবনি। ওপরেসন সিন্দুরদা ভারতকী ফোর্সশিংনা মাইপাক্না ঙমখৈ ৱাংমদা তেরোরিষ্টশিংগী লোৎফম থুগাইবা ঙমখ্রে। ভারতকী মপাঙ্গলনা, তেরোরিষ্টশিংগী চঙজফম পীরম্বা পাকিস্তান পুং খরগী মনুংদা ভারত্ত চঙজখি। মালেম শীনবা থুংনা অনৌবা ভারতকী অনৌবা মাইথোং উরে। তেক্নোলোজিগী শক্তি অমসুং দিফেন্স সেক্তরদা মেন ইন ইন্দিয়াগী মপাঙ্গলনা ওপরেসন সিন্দুর মাইপাকখিবনি। মাইপাকপা অসিদা বেঙ্গালুরু অমসুং কর্নাতকাগী নহারোলশিংনা শিংথাবা য়ানা মতেং পাংখি অমসুং মাইপাকপা অসিদা মখোয়গী থৌদাংগীদমক মহাক্না থাগৎপা ফোঙদোকখি।
প্রধান মন্ত্রীনা হায়খি মালেমগী অচৌবা সহরশিংগা লোয়ননা হৌজিক বেঙ্গালুরু মশক খঙলে। ভারতনা মালেমগা চাংদম্নবা খক নত্তনা মকোকসু থোংলে। ঐখোয়গী সহরশিং স্মার্দ ওইরবা, য়াংলবা অমসুং মতিক চারবা মতম খক্তদা চাউখৎকনি। অনৌবা ইনফ্রাষ্ট্রকচর প্রোজেকশিং লোইশিন্নবা সরকারনা অকনবা মীৎয়েং চঙলি। আর.ভি রোদতগী বোম্মাসান্দ্র ফাওবা য়ৌবা বেঙ্গালুরু মেত্রোগী য়েলো লাইন অসিনা বেঙ্গালুরুগী মরুওইবা মফমশিং শম্নগনি। হৌজিক বাসাবনাগুরি অমসুং ইলেক্ত্রোনিক সিতিগী মরক্ত চৎথোক-চৎশিনগী মতম হন্থরগনি। মসিনা মীওই লাখ কয়া হিংবদা অমসুং থবক শুবদা লাইহল্লগনি।
প্রধান মন্ত্রীনা হায়খি বেঙ্গালুরু মোত্রো ফেজ-৩ হায়বদি ওরেঞ্জ লাইনগী উরেপ-উয়ুং তম্লে। ওরেঞ্জ লাইন অসি থবক হেক হৌবগা মসিনা য়েলো লাইনগা শম্নগনি অমসুং নোংমদা পেসেঞ্জর লাখ ২৫ চৎনবগী খুদোংচাবা লৈগনি। মসিনা বেঙ্গালুরুগী চৎথোক-চৎশিন ফগৎহনগনি অমসুং সহর অসি চাউখৎপগী অনৌবা থাকশিং য়ৌহনগনি। বেঙ্গালুরু মেত্রো অসি লৈবাক অসিদা মীয়ামগী ইনফ্রাষ্ট্রকচর চাউখৎনবগী অনৌবা নমুনা অমা ওইরে। মরুওইবা মেত্রো ষ্টেসনশিংদা ইনফোসিস ফাউন্দেসন, বাইওকোন অমসুং দেলতা ইলেক্ত্রোনিক্সগুম্বা কম্পেনিশিংনা ফন্দ শরুক খর থাদরে। সি.এস.আর শীজিন্নবগী অনৌবা থবক অসি ইথিল পীনবা হৌরকফম অমা ওইরে অমসুং মখোয়গী থবক অসিগীদমক কোর্পোরেত সেক্তর থাগৎপা ফোঙদোকচরি।
প্রধান মন্ত্রীনা হায়খি ঙসি, ভারত মালেমদা য়াংনা চাউখৎলক্লিবা অচৌবা ইকোনোমি ওইরে। হৌখিবা চহি ১১ দা, ঐখোয়গী ইকোনোমি অসি ১০ শুবা মফমদগী মঙাশুবা মফমদা হাইগৎলকখি। মকোক থোংবা ইকোনোমি অহুমগী মনুংদা অমা ওইনবা মাইকৈদা ঐখোয় হৌজিক য়াংনা চঙশিল্লি। পুকচেল তিংবা অমসুং পুকচেল শেংবা থবকশিংনা লমজিংদুনা “রিফোর্ম, পর্ফোম অমসুং ত্রান্সফোর্ম”গী ৱাখল্লোন্দা খোঙজেল অসি চঙশিল্লি। ২০১৪ দা শুপ্নগী সহর মঙা খক্তদা মেত্রো লৈরমখি। ঙসিদি সহর ২৪ দা কিমি ১,০০০ হেনবদা মেত্রো নেতৱার্কশিং লৈরে, মালেমদা ভারতনা মেত্রো নেতৱার্ক লৈবা অহুমশুবা খ্বাইদগী চাউবা লৈবাক ওইরে। ২০১৪ গী মমাঙদা রেলৱে রুতশিংগী কিমি ২০,০০০ রোম খক্ত মৈ ফংলমখি। হৌখিবা চহি ১১ অসিদা কিমি ৪০,০০০ হেনবগী রেল লম্বীশিং মৈ ফংলে। ভারতকী মাইপাকপা অসি কংফাল খক্তদা নত্তে অতিয়াদসু মাইপাক্লে। ২০১৪ দা এয়রপোর্ত ৭৪ খক লৈরমখি, অদুবু ঙসিদি ১৬০ হেল্লে। ২০১৪ দা নেসনেল ৱাতরৱেজ অহুম খক থবক তৌরমখি, ঙসিদি মশিং ৩০ য়ৌরে।
হকশেল অমসুং লাইরিক লাইশুগী লমদা ভারতনা পায়খৎলিবা মরুওইবা থবকশিং পল্লদুনা, প্রধান মন্ত্রীনা হায়খি ২০১৪ ফাওবদা লৈবাক অসিদা শুপ্নগী এ.আই.আই.এম.এস ৭ অমসুং মেদিকেল কলেজ ৩৮৭ খক লৈরমখি। ঙসিনা এ.আই.আই.এম.এস ২২ অমসুং মেদিকেল কলেজ ৭০৪ না মীয়ামগী সেবা তৌরে। হৌখিবা চহি ১১ দা, লৈবাক শীনবা থুংনা অনৌবা মেদিকেল সিত লাখ ১ হেন্না হাপচিল্লে। মশিং হেনগৎলকপা অসিদগী হৌজিক মিদল-ক্লাস অঙাংশিং কান্নবা ফংলে। হৌখিবা চহি ১১দা, আই.আই.তি মশিং ১৬ দগী ২৩ দা হেনগৎলে, আই.আই.আই.তি মশিং ৯ দগী ২৫ দা অমসুং আই.আই.এম.এস ১৩ দগী ২১ দা হেনগৎলে। ঙসিদি মহৈরোয়শিং অৱাংবা থাক্কী লাইরিক-লাইশু তম্বগী খুদোংচাবা হেন্না ফংলে।
প্রধান মন্ত্রীনা হায়খি ঙসি লৈবাক অসি য়াংনা চাউখৎলকপগা লোয়ননা, লায়রবশিংগী পুন্সি চপ মান্নবা খোঙজেলদা অহোংবা পুরক্লে। প্রধান মন্ত্রী অৱাস য়োজনাগী মখাদা পাক্কাগী য়ুম করোর ৪ হেন্না শাখ্রে। হৌজিক সরকারনা য়ুম করোর ৩ হেন্না শানবা থৌরাং তৌরে। হৌখিবা চহি ১১দা, লৈবাক শীনবা থুংনা তোইলেত করোর ১২ হেন্না শাখ্রে। মসিনা ইমা অমসুং ইচল করোর কয়াদা ইকায়খুম্নবা, লু-নানবা অমসুং অশোই-অঙাম থোক্তবা ফংহল্লে।
প্রধান মন্ত্রীনা হায়খি ভারতকী শেন-থুমগী ফিবম ফগৎলকপদগী লৈবাক অসিগী চাউখৎপগী খোঙজেল য়াংখৎলকপনি। ২০১৪ গী মমাঙদা অপুনবা মপান্দা থাদোকপা অসি দোল্লর বিল্লিয়ন ৪৬৮ খক ওইরমখি, অদুবু ঙসিদি দোল্লর বিল্লিয়ন ৮২৪ য়ৌরে। মতম অমদা ভারতনা মপান্দগী পুশিল্লকপা মোবাইল ফোনশিং শীজিন্নরমখি, অদুবু ঙসিদি, লৈবাক অসি মোবাইল হেন্দসেত মপান্দা থাদোকপা মকোক থোঙবা লৈবাক মঙাগী মনুংদা ভারত য়াওরে। অওনবা অসি পুরকপদা বেঙ্গালুরুনা মরুওইবা থৌদাং অমা লৌখি। ২০১৪ গী মমাঙদা, ভারতনা ইলেক্ত্রোনিক্সকী পোৎলমশিং মপান্দা থাদোকপা দোল্লর বিল্লিয়ন ৬ রোম ওইখি, ঙসিদি দোল্লর বিল্লিয়ন ৩৮ য়ৌরে। চহি ১১ গী মমাঙদা, ভারতকী ওতোমোবাইল এক্সপোর্ত দোল্লর বিল্লিয়ন ১৬ রোম ওইখি, ঙসিদি শরুক অনি হেনগৎতুনা, ভারত মালেমদা মরিশুবা খ্বাইদগী চাউবা ওতোমোবাইল এক্সপোর্তর ওইরে। মাইপাকপশিং অসিনা অত্মানির্ভর ভারতকী ৱাশক মপাঙ্গল কনখৎহল্লে অমসুং অপুনবনা লৈবাক অসি মাঙলোমদা চঙশিনগনি অমসুং বিকসিত ভারত অমা শেমগৎকনি হায়বগী অচেৎপা থাজবা অমুক হন্না লৈরে।
প্রধান মন্ত্রীনা হায়খি বিকসিত ভারত অমগী খোঙচৎ দিজিতেল ইন্দিয়াগা লোয়ননা খুৎশম্নদুনা মাঙলোমদা চৎখৎকনি। ইন্দিয়া এ.আই মিসনগুম্বা থবকশিংনা মালেমগী এ.আইগী লুচিংবা ওইনবা মাকৈদা ভারত চঙশিল্লি। সেমিকন্দক্তর মিসনসু খুমাঙচাউশিল্লি অমসুং ভারতনা অথুবা মতমদা মশাগী ওইবা মেদ-ইন-ইন্দিয়া চিপ লৈরগনি। ভারত অসি মমল হোংবা, অৱাংবা থাক্কী তেক্নোলোজিগী স্পেস মিসনশিংগী মালেমগী খুদম অমা ওইরে। তুংগী তেক্নোলোজিশিংগী হিরম খুদিংমক্ত ভারত চাউখৎলক্লি অমসুং খুমাঙচাউশিনবা অশিগী মরুওইবা ৱাফমদি লায়রবশিংগী ফিবম ফগৎহনবা অসিনি। লৈবাক অসিগী খুঙ্গং খুদিংমক্ত দিজিতেলগী থবকশিং য়ৌরে। য়ু.পি.আইগী খুৎথাংদা মালেমগী ওইনা খুদক্ত শেন থাদোক-থাজিনগী চাদা ৫০ ভারতনা পাংথোক্লে। সরকার অমসুং মীয়ামগী মরক্ত লৈরিবা অহোবা অসি মেনশিনবদা তেক্নোলোজিনা মতেং পাংলি। ঙসি সরকারগী সর্বিস ২,২০০ হেন্না মোবাইল প্লেতফোর্মশিংদা ফংলে। উমং এপ্পকী খুৎথাংদা মীয়াম্না সরকারগী থবক-থৌরমশিং য়ুমদগী পাংথোকপা য়ারে অমসুং দিজিলোক্কর শীজিন্নবদগী সরকারগী সর্তিফিকেদশিং থম্বগী খুদোংচাদবশিং কোকহল্লে। এ.আই শীজিন্নদুনা কিহল্লকপশিং মশক খঙদোক্নবা তেক্নোলোজিশিংদা হৌজিক ভারতনা শেন থাদরি। মসিগী পান্দমদি দিজিতেলগী অওনবগী কান্নবশিং খুন্নাইগী খ্বাইদগী তোল্লবা মীওইশিংদা ফংহনবনি। লৈবাক্কী থবক অসিদা বেঙ্গালুরুনা মপুংফানা মতেং পাংলি।
প্রধান মন্ত্রীনা হায়খি ঐখোয়গী মথংগী অচৌবা মরুওইবা থবক্তি তেক্নোলোজিদা মশা-মরোমদোম লেপচবনা ওইগনি। ভারতকী তেক কম্পেনিশিংনা মালেম শীনবা থুংবগী সোফৱায়ার অমসুং পোৎথোকশিং পুথোক্লে। হৌজিক ভারত মশাগী দরকার ওইবশিংদা লুম্না লৌবা মতমনি অমসুং হিরম খুদিংমক্ত শীজিন্নবা সোফৱায়র অমসুং এপ্পশিংগুম্বা অনৌবা পোৎথোকশিং পুথোকপা য়াংখৎহনগদবনি। হিরম অসিদা ভারতনা অনৌবা থাকশিং য়ৌবা তঙাইফদে। নৌনা থোক্লকপা হিরমশিংদা মাংজিল থানবা মীৎয়েং চঙগদবনি। মেক ইন ইন্দিয়া অমসুং মেনুফেকচরিং সেক্তরদা বেঙ্গালুরু অমসুং কর্নাতকা শরুক য়াবা হেনগৎহনগদবনি। ভারতকী পোৎথোকশিংদা অশোইবা অমতা লৈহল্লোইদবনি, হায়বদি পোৎথোকশিং অদু অফবা অমসুং মহৌশাগী অকোয়বা ফিবমদা অকায়বা পীদবা ওইগদবনি। কর্নাতকাগী হৈথোই-শিংথোইবনা অত্মানির্ভর ভারতকী পান্দম লমজিংগনি হায়বগী থাজবা থম্লি।
প্রধান মন্ত্রীনা হায়খি কেন্দ্র সরকার নত্ত্রগা রাজ্য সরকার ওইগেরা, পুম্নমক্না মীয়ামগী থবক তৌনবা থাজবা পীরি, মীয়ামগী হিংবগী থাক ৱাংখৎনবা পুন্না থবক পায়খৎমিন্নবা দরকার ওই। মাইকৈ অসিগী মরুওইবা থৌদাংদি অনৌবা অওনবশিং থবক ওইনা পায়খৎপনি। হৌখিবা চহি ১০ দা, কেন্দ্র সরকারনা অওনবা কয়া পুরকখ্রে। লোশিং দিক্রিমিনেলাইজ তৌনবা জন বিশ্বাস বিল পাস তৌখ্রে অমসুং জন বিশ্বাস ২.০ লাউথোক্লে। দরকার লৈতবা ক্রিমিনেল প্রোবিজনশিং য়াওবা আইনশিং রাজ্য সরকারশিংনা মশক খঙদোক্কদবনি অমসুং মখোয় মুৎথৎকদবনি। মিসন কর্মায়োগীনা সরকারগী ইমপ্লোইয়িশিংদা ত্রেনিং পীনবা পান্দম থম্লি। মখোয়গী ওফিসিএলশিংগীদমক রাজ্যশিংনা মসিগী লার্নিং ফ্রেমৱার্ক অসি শীজিন্নবা য়াগনি। এস্পিরেসনেল দিস্ত্রিক প্রোগ্রাম অমসুং এস্পিরেসনেল ব্লোক প্রোগ্রামদা অকনবা মীৎয়েং থম্লে। অখন্নবা মীৎয়েং চঙবা দরকার ওইবা মফমশিং রাজ্যশিং মশক খঙদোক্কদবনি। রাজ্যগী থাক্ত লেপ্তনা অওনবা পুরক্নবা থবকশিং পায়খৎকদবনি। হায়রিবা অপুনবা থবকশিংনা কর্নাতকা চাউখৎপগী অনৌবা থাকশিংদা পুখৎকনি অমসুং ঐখোয়না অপুনবা ওইনা বিকসিত ভারতকী পান্দম ফংহনগদবনি।
থৌরম অদুদা শরুক য়াখিবা অতোপ্পা শক্নাইরবা মীওইশিংগী মনুংদা কর্নাতকাগী রাজ্যপাল শ্রী থাৱারচান্দ খেহলোত, কর্নাতকাগী চীফ মিনিষ্টর শ্রী সিদারামাইয়া, য়ুনিয়ন মিনিষ্টরশিং শ্রী মনোহর লাল, শ্রী ঐচ.দি কুমারশ্বামী, শ্রী অশ্বিনি বৈষ্ণব, শ্রী ভি.সোমান্না, সুশ্রী সোভা করান্দলাজে য়াওখি।
নুঙগীৱারোল
প্রধান মন্ত্রীনা বেঙ্গালুরু মেত্রো ফেজ-২ প্রোজেক্তকী আর.ভি রোদ (রাগীগুদ্দা) দগী বোমসান্দ্রা ফাওবগী লম্বীগী অশাংবা কিমি ১৯ হেনবা অমসুং স্তেসন ১৬ লৈবা লুপা করোর ৭,১৬০ রোম চংনা শাবা য়েল্লো লাইন শঙ্গাখ্রে। মসিগী য়েল্লো লাইন অসি হাংদোকপা মতমদা, বেঙ্গালুরুদা ওপরেস্নেল মেত্রো নেৎৱার্ক অসি কিমি ৯৬ হেন্না হেনগৎতুনা লমদম অসিদা লৈরিবা মীশিং য়াম্লবা মীওইশিংদা মতেং পাংগনি।
প্রধান মন্ত্রীনা লুপা করোর ১৫,৬১০ হেনবগী বেঙ্গালুরু মেত্রো ফেজ-৩গী প্রোজেক্তকী উরেপ উয়ুংসু তমখ্রে। প্রোজেক্ত অসিগী অপুনবা লম্বীগী অশাংবা অসি কিমি ৪৪ হেনগনি অমসুং মসিদা ইলিভেৎ স্তেসন ৩১ লৈগনি। ইনফ্রাস্ত্রকচর প্রোজেক্ত অসিনা শহর অসিগী রেসিদেন্সিএল, ইন্দস্ত্রীএল, কম্মর্সিএল অমসুং এজুকেসনেল এরিয়াশিংদা খুদোংচাবা ফংহন্দুনা ত্রান্সপোর্তকী হেনগৎলক্লিবা মথৌ তাবশিং কোকহল্লগনি।
প্রধান মন্ত্রীনা বেঙ্গালুরুদগী ভন্দে ভারত এক্সপ্রেস ত্রেন অহুম লমথাখ্রে। মসিদা বেঙ্গালুরুদগী বেলাগাভি, অমৃতসরদগী শ্রী মাতা বৈষ্ণো দেবী কত্রা অমসুং নাগপুর (অজনি) দগী পুনে ফাওবগী ত্রেনশিং য়াওরি। হায় স্পীদ ত্রেনশিং অসিনা রিজনেল কন্নেক্তিবিতী য়াম্না হেনগৎহল্লগনি, চৎথোক-চৎশিনগী মতম হন্থহল্লগনি অমসুং পেসেঞ্জরশিংদা মালেমগী থাক্কী চৎথোক-চৎশিনগী এক্সপরিয়েন্স অমা ফংহল্লগনি।
ৱা ঙাংখিবগী মপুংফাবা ৱারোল পানবা মসিদা নম্বীয়ু
The success of Operation Sindoor… the strength to destroy terrorist hideouts deep across the border… and the ability to bring Pakistan, which came to defend the terrorists, to its knees within hours…
— PMO India (@PMOIndia) August 10, 2025
The whole world has witnessed this new face of India: PM @narendramodi pic.twitter.com/XvIqhUDAWk
Today, India is the fastest-growing major economy in the world.
— PMO India (@PMOIndia) August 10, 2025
In the last 11 years, our economy has risen from 10th place to the top five.
We are now moving rapidly towards becoming one of the top three economies: PM @narendramodi pic.twitter.com/r2Vk2v7yVD
The journey to a Viksit Bharat will move forward hand in hand with Digital India. pic.twitter.com/X2A5SvxgmS
— PMO India (@PMOIndia) August 10, 2025
Our next big priority should be becoming self-reliant in tech. pic.twitter.com/vTodl7SVeh
— PMO India (@PMOIndia) August 10, 2025
