ভারত মাতা কী জয়।
ভারত মাতা কী জয়।
রাজস্থানগী রাজ্যপাল হরিভাউ বাগরে জি, চীফ মিনিষ্টর শ্রী ভঞ্জনলাল শর্মা, য়ুনিয়ন মিনিষ্টর হরদিপ সিংহ পুরি, দিপুতি চীফ মিনিষ্টর দিয়া কুমারি, প্রেমচান্দ বাইরৱা, রাজস্থান সরকারগী মিনিষ্টরশিং, এম.পিশিং অমসুং এম.এল.এশিং অমসুং ঐগী নুংশিরবা ইনাওশিং অমসুং ইচলশিং।
ঙসি রাজস্থানগী মফম লিশিং ১০ দগী লিশিং ১২ ফাওবদা মীওই করোর কয়া তিল্লে হায়বা ঐ খঙলে অমসুং হৌজিক ঐ স্কৃন্দা উরে অমসুং ঐনা য়েংলুবা মফম খুদিমক মী ঙাক্ত ঙাইরে। ঐগী রাজস্থানগী ইনাওশিং অমসুং ইচলশিং অমসুং তেক্নোলোজিগী খুৎথাংদা রাজস্থানগী মফম খুদিংমক্ত থৌরম শরুক য়ারিবশিং ঐনা ইকায়খুম্নবা উৎচরি।
মরুপশিং,
কালেনগী শারবা নুংশা মরক্ত মশিং য়াম্লবা মীওইশিং ঐখোয়দা থৌজাল পীনবা পুনবা অসিনা তাক্লে মদুদি বি.জে.পি সরকারগী থবকশিংদা অদোম্না কয়া য়াম্না থাজবগে হায়বা। মীয়াম্না শৌগৎপা অমসুং মীনুংশিগীদমক রাজস্থানগী মফমদা ঐনা লমন তোশিঞ্জরে।
ইনাওশিং অমসুং ইচলশিং,
লমদম অসিদা মশিং থিঙমদ্রবা অথৌবা কয়া পোকখ্রে। ইকায়খুম্নবনা মাঙদা থম্নবা লানফম খুদিংমক্না, লমদম অসিগী লৈবাক-লৈহাওনা ঐখোয়দা তম্বীরে। লৈবাক অসি অত্মনির্ভর ওইরবা, অতোপ্পশিংগী মখা পোন্দবা মতমদা লনাই মীওই নত্ত্রগা লৈবাক অদুগী ইকায়খুম্নবা ৱাংনা লৈগনি। ঙসি রাজস্থানগী লৈহাওদগী, চাউখৎনবা অমসুং অত্মনির্ভর ওইনবা অচৌবা খোঙথাং অমা ভারতনা থাংলে। ঙসি লৈবাক মীয়ামদা রিফাইনরি কৎথোক্লে। রিফাইনরি অসিনা মীওই লিশিং কয়া থবক পীগনি। রিফাইনরি অসিগীদমক রাজস্থানগী নহারোলশিংদা ঐনা হরাওবা ফোঙদোকচরি।
মরুপশিং,
বি.জে.পি সরকারনা প্রোজেকশিং উরেপ-উয়ুং তম্বা খক নত্তনা, প্রোজেকশিং অদু লোইশিন্নবা ঐখোয়না অহিং-নুংথিল থবক তৌরি হায়বা ঙসি খঙলে। থা অনিগী মমাংদা মফম অসিদা খুদোংথিবা থৌদোক অমা থোকখ্রবা মতুংদা প্রোজেক অসি লোইশিন্নবা থবক য়াংনা শুখিবা অদু থবক কন্না শুবগী খুদম অমনি। শিংনবা অদু কয়া য়াম্না চাউবগে হায়বা থিদনা, অনৌবা ভারতনা মসিগী ৱাশক ঙাক্তনা তোক্তে, নত্ত্রগা মদু তপথহন্দে হায়বা অদোম উরে।
ইনাওশিং অমসুং ইচলশিং,
ঙসি রাজস্থান্দা প্রোজেক কয়া হৌদোক্লে। ঙসি জোধপুরদা অনৌবা এয়রপোর্ত তর্মিনেল শঙ্গারে। অনৌবা তর্মিনেল অসিগী মনুংগী আর্কিতেকচর সোসিএল মেদিয়াদা ঐ উরে। তর্মিনেল অসিগী মফম খুদিংমক রাজস্থান মাল্লে।
মরুপশিং,
মসিনা মারৱারদা তুরিজম, ললোন-ইতিক অমসুং থবক ফংবদা অনৌবা কান্নবশিং পীরগনি। জোধপুরদা থৌরম অসি শরুক য়ারিবশিং ঐনা তরাম্না ওকচরি। জোধপুরদগী ফ্লাইত স্কিমগী অনৌবা তাঙ্কক অমা হৌরে। স্কিম অসিগী মখাদা, অপীকপা তাউনশিং অমসুং মনুং হুঞ্জিনবা মফমশিং মথক্ত চৎথোক-চৎশিন য়ারগনি। লোয়ননা, জোধপুরদা হৌজিক মেত্রোশু য়ৌরগনি।
ইনাওশিং অমসুং ইচলশিং,
হৌজিক সেখাৱাতিদা ঈশিং ফংদবগী অৱাবা কোক্লগনি। প্রোজেকশিং অসিগীদমক ঐনা রাজস্থানগী ইনাওশিং অমসুং ইচলশিং হরাওবা ফোঙদোকচরি।
মরুপশিং,
ঙসি রাজস্থানগী নহারোল লিশিং ৫৪ রোম সরকারগী থবকশিংগী এপোইন্তমেন্ত লেত্তরশিং ফংলে। এপোইন্তমেন্ত লেত্তর ফংলবা নহারোলশিং মখোয়গী তুংগী পুন্সি অফবা ওইনবা ঐনা য়াইফ পাউজেল পীজরি অমসুং মখোয়গী নহা ওইরিবা ৱাখলশিংনা মখা তানা রাজস্থানগী তুংগী ফিবম ফগৎহনগনি, মখোয় খুদিংমক থবক ফজনা পাংথোক্নবা ঐনা য়াইফ পাউজেল পীজরি।
মরুপশিং,
ঙসি, রাজস্থানগী ঐনা লৈবাক অসিগী অতোপ্পা মপাঙ্গল অমা খন্নগনি। নোংচুপ এসিয়াগী লালদা মালেম শীনবা থুংনা অমসুং লৈবাক অসিগী মফম খুদিংমক অৱাবা নঙহনবা অদোম উরে। লাল অসিনা ২১শুবা চহিচাদা খ্বাইদগী চাউবা ইনর্জি ফংদবগী অৱাবা মায়োক্নহনখি। অচৌবা লৈবাকশিং ঙসি ফাওবা থাউ ফংদবগী অৱাবা মায়োক্নরি।
মরুপশিং,
২১শুবা চহিচাগী ইনর্জিগী খ্বাইদগী চাউবা অৱাবা মরক্ত, ২১শুবা চহিচাদা অনৌবা ভারতকী খাংবা কনবা অমসুং থবকশিং উবা ফংলে। থাক খুদিংমক্ত ভারতনা অচুম্বা ৱারেপশিং লৌখি, মতম চানা অৱাবশিং য়েংশিনখি, লাল্লোংশিং ফজনা শেমখি, লন-থুমশিং চাং চানা শীজিন্নখি অমসুং লৈবাক অসিগী কুতনিতিগী শক্তি ফজনা শীজিন্নখি। মসিনা কমদৌনা ভারতনা অৱাবা মায়োক্নখিবগে হায়বা।
মরুপশিং,
মীওই খর মীয়ামদা তোকঙা অমসুং অকিবা শন্দোকপদা মথৌ চিনখি, অহিং-নুংথিল কন্না হোৎনখি। খাংবা কনবা, থবক, থৌশিল অমসুং কুতনিতিগী থাক্ত পায়খৎপা অকনবা থবকশিং – মখোয় নোংমদি পুৱারিদা লৈহৌরগনি। ঐ খুদম অমা পীগে: এল.পি.জি নত্ত্রগা চাক থোঙনবা গ্যাস। ঐখোয়গী দরকার ওইবা এল.পি.জিগী চাদা ৬০ রোম মপান্দগী পুশিল্লকই হায়বা ঐখোয় খঙল অমসুং গ্যাস চাদা ৯০ রোম ষ্ট্রেত ওফ হোর্মুজ ফাওরগা গল্ফ লৈবাকশিংদগী পুরকপনি। খঙহৌদনা লাল লাকপদগী সপ্লাইশিং লেপখি। ঐখোয়গী লৈবাক্ত চরাংনবা থোক্লগনি হায়না অদোম খল্লমগনি। অদুবু শিংনবশিং মায়োক্ননবা রাজস্থানগী লৈবাক-লৈহাওনা ঐখোয়দা তম্বীরে। লাল হেক হৌরকপগা, রিফাইনরিশিংগী থবক হেনগৎহন্নবা ঐখোয়না মীৎয়েং চঙখি। উদ্যোগকী শীজিন্ননবা পুথোকপা গ্যাস এল.পি.জি পুথোকপদা শীজিন্নখি। নুমিৎ ৭ গী মনুংদা, এল.পি.জি পুথোকপা হেনগৎখি- হান্না মেত্রিক তন ৩৫,০০০ পুথোক্লম্বদগী লাল মনুংদা মেত্রিক তন ৫৪,০০০ পুথোকখি। মসিগী মমাংদা রিফাইনরিশিং কৈদৌঙৈদা এল.পি.জি পুথোক্তে।
মরুপশিং,
দরকার ওইবা খুদিংমক এ.পি.জিদা তাইন্দনবা, সরকারনা পি.এন.জি কন্নেক্সনশিং হেনগৎহনখি- চাকশঙশিংদা পাইপ নেচরেল গ্যাস য়ৌহনখি। অতেনবা মতম অমদা, ভারতনা য়ুমথোঙ লাখ ১১ হেনবদা পি.এন.জি কন্নেক্সন পীখি।
ইনাওশিং অমসুং ইচলশিং,
অমরোমদা ঐখোয়না লেপ্তনা ফংহনখি। অমরোমদা, ঐখোয়না লৈবাক অসিগী কঞ্জুমরশিংদা পোৎলুম ওইহনখিদে। গ্যাস সিলিন্দর অমগী মমল লুপা ২০০০ ফাওবা য়ৌখিগনি হায়না অচৌবা কৈথেলশিংগী অখঙ-অহৈশিংনা পানখি। অদুবু হৌজিক ফাওবা ইমুং-মনুংগী এল.পি.জি সিলিন্দরশিংগী মমল লুপা ৯৫০ গী মখাদা লৈরি। লায়রবশিংগীদমক, উজৱালা সিলিন্দরশিংগী মমল লুপা ৬৫০ গী মখাদা লৈরি। নুমিৎ নিনিগী মমাংদা, সরকারনা কম্মর্সিএল গ্যাসকী মমল য়াম্না চাউনা হন্থরে। ঐখোয়গী সরকারনা কমদৌনা মীয়ামগী খন্দুনা থবক তৌবগে হায়বা মসিনা তাক্লে।
মরুপশিং,
লালনা দিজল অমসুং পেত্রোলগী অচৌবা অৱাবা অমসু ওইহনখি। ঐখোয়গী লৈবাক্কী অচৌবা থাউগী গুৱাশিং লৈতে। লাল কনশিল্লকপা মতমদা, শুংদোক্ত্রিবা থাউ বেরল অমগী মমল দোল্লার ৭০ দগী দোল্লার ১২০ দা হেনগৎলকখি। থাউ পুশিল্লক্নবা লম্বীশিং থিংখি। লৈবাক কয়াদা, পেত্রোল অমসুং দিজলগী মমল চাদা ৪০ দগী চাদা ৫০ ফাওবা হেনগৎখি। তোকঙা শন্দোকখি, মীয়াম কিহনখি, রাজনিতি শানখি, অদুবু অরানবা ৱাখল্লোন চেনবশিং মাইপাকখিদে। এপ্রিল অমসুং জুন থা খক্তদা, থাউগী কম্পেনিশিংনা দিজল অমসুং পেত্রোলদা লুপা করোর ৭৫,০০০ হেন্না মাঙখি। শেনফম অসি অনৌবা রিফাইনরি অমা শাবগী মমলগা মান্নখি। মসিগী পোৎলুম সরকারগী পুক্কৈনা পুখি। ঐখোয়না লিতর অমদা লুপা ১০ গী এক্সাইজ দ্যুতি হন্থহনখি, মীয়ামদা মমল হেনগৎপগী অৱাবা পুহনখিদে।
মরুপশিং,
লাল মনুংদা, ভারতকা মরুপ ওইবা অতোপ্পা লৈবাকশিংগী মতেং মমল নাইদে হায়বা খঙখি। লাল মমাঙদা, ভারতনা লৈবাক ২৫-২৬ রোমদগী থাউ অমসুং ইনর্জি পুশিল্লকখি। অদুবু লাল মনুংদা, ভারতকী কুতনিতি ফগৎলকখি। অতোপ্পা লৈবাকশিংগা ঐখোয়গা লৈনবা অফবা মরীশিংনা ঐখোয়দা চাউনা মতেং ওইখি। ভারতনা লৈবাক ৪০ হেনবদগী থাউ পুশিল্লকখি। ভারতনা মালেমদা ময়েক শেংলবা পাউজেল অমা পীখি: ঐখোয়গী ওইনা, লৈবাক্কী য়াইফনবা অমসুং ঐখোয়গী মীয়াম য়াইফনবা অসিনা হেন্না মরুওই। নাগরি দেবো ভাবা- মসি ঐখোয়গী লাইৱানি।
মরুপশিং,
অসিগুম্বা খঙহৌদনা লাকপা খুদোংচাদবা অসি তাঞ্জ চাবদগী লৈবাক অসিনা লাকশিনবা নত্তে। মসিগী মতুংদা লৈরিবা চহি কয়া হোৎনদুনা লাকপা তুংগী উবা থৌশিলশিংনা মাইপাকহনবনি। ঙসি ঐখোয়না রাজস্থান রিফাইনরি শঙ্গারে। মসিগীদমক ঐখোয়না ২০১৭ দা এম.ও.য়ু খুৎয়েক পীনখ্রে। অদুবু ২০১৮ দগী ২০২৩ ফাওবা, রাজস্থানদা কংগ্রেস সরকার লৈখি। মখোয়না মতেং পীদবদগী, থবক পন্দুনা লৈখি। অদুবু দবল ইঞ্জিন সরকার হেক লাকপদগী, থবক য়াংশিনখি অমসুং ঙসিদি মসি ঐখোয়না মীয়ামদা খুৎশীন্নরে। ঐখোয়গী থবক শুবগী মওং অদোম খঙলে- ঐখোয়না প্রোজেকশিং উরেপ-উয়ুং তমখি, ঐখোয়না শঙ্গাখি। মওং অসিদা, ভারতনা মখা তানা মসিগী রিফাইনরিগী কেপাসিতি হেনগৎহল্লে। হৌখিবা চহি ৫০ দা য়ু.এস.এদা অনৌবা রিফাইনরি অমতা শাদ্রি। য়ুরোপকী রিফাইনরি কেপাসিতি হন্থরক্লে। চৈরক অসিদা, ভারতনা মালেমদা রিফাইনরি য়াম্না লৈবা মরিশুবা লৈবাক ওইরে। ঐখোয় লেপ্লোই- লাক্লিবা চহিশিংদা মখা তানা কেপাসিতি হেনগৎহনগনি। থবকশিং অসিনা লৈবাক অসিগী খ্বাইদগী চাউবা ইনর্জিগী অৱাবা ভারতনা লান্থেংনগনি অমসুং মাইপাক্কনি।
মরুপশিং,
মালেম শীনবা থুংবগী লালশিংনা ঐখোয়গী লৌমীশিংদা খুদোংচাদবশিং থোকহনখি। হৌজিক থোক্লিবা নোংচুপ এসিয়াগী লাল, গল্ফ লাল অমসুং হান্নগী য়ুক্রেনগী লালনা মালেমগী ওইনা হার ফংদবগী অৱাবা লৈহনখি। য়ুক্রেন লালগী মতুংদা, য়ুরিয়া বেগ অমগী মমল লুপা ৩০০০ য়ৌখি। অদুবু ঐখোয়না মখা তানা ঐখোয়গী লৌমীশিংদা বেগ অমদা লুপা ৩০০ দা ফংহনখি। মসিগীদমক সরকারনা লুপা করোর লিশিং কয়া পুথোকখি, সবসিদিশিং ফংহনখি। সপ্লাই চেনশিং অপনবা থোকখি, অদুবু ভারতনা পাম্বৈশিং পুথোকখি। সরকারনা অতোপ্পা লম্বীশিং থিখি। হার লৈনবা লৈবাক কয়াদা লৈরিবা ঐখোয়গী এম্বেসিশিংদা অখন্নবা থৌদাং শীন্নখি। মপান্দগী পুশিল্লকপগা লোয়ননা, ঐখোয়গী লৈবাক মনুংদা পুথোকপসু হেনগৎহনখি। ঐখোয়না মহৌশাগী ওইবা লৌউ-শিংউগী থবকশিংসু য়োকখৎখি। ঐখোয়না পৈশীন্দুনা থম্বা অমসুং নারোন্দা য়োনবগী মায়োক্ত অকনবা থবক পায়খৎখি।
মরুপশিং,
শেন চঙবা হেনগৎলকপগী অৱাবা মায়োক্নরিবা ঐখোয়গী উদ্যোগশিং অমসুং এম.এস.এম.ইশিংগীসু ঐখোয়না থবক পায়খৎলে। মরম অদুনা, ঐখোয়না ইমর্জেন্সি ক্রেদিৎ লাইন গরেন্তি স্কিমগী অনৌবা তাঙ্ক অমা হৌদোক্লে। স্কিম অসিগী মখাদা, বেঙ্কশিংনা এম.এস.এম.ইশিংদা চাদা ২০ গী অহেনবা লোনশিং পীরে অমসুং হায়রিবা লোনশিং অসিগী চাদা ১০০ গী গরেন্তি সরকারনা পীরে- মসি মোদীগী গরেন্তিনি। গরেন্তি অসিনা অপীকপা উদ্যোগশিং অমসুং য়ুমগী উদ্যোগশিংদা চাউনবা কান্নবশিং পীরে। ৱারেপশিং অসিগী ফলশিং ওইনা, ঙসি ঐখোয়গী অপীকপা অমসুং অচৌবা উদ্যোগশিং শাফরে হায়না খল্লে।
মরুপশিং,
ঐখোয়না ভারতকী মপাঙ্গলদা থাজবা লৈবদগী ঐখোয়গী সরকারনা মখা তানা ৱারেপশিং লৌরে। ঐখোয়গী মীয়ামগী তৌবা ঙম্বশিং অমসুং লৌশিংদা ঐখোয়না মপুংফানা থাজবা থম্লি। ঙসি ঐনা ভারতমচা বিল্লিয়ন ১.৪ দা ঐগী তৌবীমল খঙবা উৎচরি। অৱাবা মতমদা তোকঙাশিং, অকিবা অমসুং চমম্নবা নাথৈদুনা খোঙফম চেৎনা লেপ্পগীদমক লৈবাক অসিগী মীয়ামদা ঐনা কোক নোঞ্জরি। থাজবা অসিনা লৈবাক অসি চাউখৎহনবনি। ভারতনা মাইথিবা উবা পাম্বা মীওইশিং, মাইথিগনি হায়না মাংজৌননা হায়খিবা মীওইশিং, ঙসিদি নিংবা কায়রে।
মরুপশিং,
প্রোজেকশিং শঙ্গাবা অমসুং উরেপ-উয়ুং তমখিবগা লোয়ননা, ঐনা ইমাগী মিংদা খেজরি পাম্বী অমসু থারে। রাজস্থান্দা খেজরি কয়া য়াম্না মরুওইবগে হায়বা ঐ খঙই। লৈকংলা শন্দোরকপা থিংবদা পাম্বী অসিনা মরুওইবা থৌদাং অমা লৌরি। উ পাম্বী অসি থাবা অসি ঐখোয়গী চৎনবীগী খুদম অমসু ওইরি। ঐখোয়গী মহৌশাগী অকোয়বগী ফিবম ঙাক-শেনবগা লোয়ননা ঐখোয়গী চাউখৎপগী অনৌবা থাকশিংসু য়ৌগদবনি। পান্দম অসিগা লোয়ননা, ইনর্জি ফংনবা অতোপ্পা পাম্বৈশিংদা ঐখোয়গী সরকারনা থবক পায়খৎলি। রাজস্থান্দা মালেম থাক্কী সোলার পার্কশিং শেমগৎলে। পি.এম সুর্জ ঘর ফ্রি ইলেক্ত্রিসিত স্কিমগী মখাদা, রাজস্থান্দা য়ুম ১৫০,০০০ হেন্না সোলার পৱার ফংহনখ্রে। পি.এম কুসুম স্কিমগী মখাদা, রাজস্থান্দা লৌমীশিংদা সোলার পম্প ৬৫,০০০ হেন্না ফংহনখ্রে।
মরুপশিং,
থবকশিংগী তুংদা খল্লিবা ৱাখল্লোন অদু নাখৈ শেংলবদি খ্বাইদগী কনবা ৱারেপশিং ফাওবা থবক ওইনা পাংথোকপা ঙমগনি। মসিনি বি.জে.পি অমসুং কংগ্রেসকী মরক্ত লৈরিবা অচৌবা খেন্নবা।
মরুপশিং,
রাজস্থানগী ঈশিংগী অৱাবা কোকহনবা অসি অতোপ্পা অচৌবা খুদম অমনি। রাজস্থানগী ঈশিংগী অৱাবশিং কোকহন্নবা কংগ্রেসনা কৈদৌঙৈদা থবক পায়খৎখিদে হায়বা মীয়াম্না খঙলে। অদুবু বি.জে.পিনা ফত্তবা রাজনিতি তৌদে। লৈবাক্কী থবক্না হান্না হায়বা ৱাখল্লোন্দা বি.জে.পিনা থবক তৌরি। ঐখোয়না গুজরাত্ত ঈশিংগী থবক পায়খৎপা মতমদা রাজস্থান্দা ঈশিং পীনবসু খন্নখি। ভারত শীনবা থুংনা রাজ্য কয়ানা চহি কয়া ঈশিংগীদমক খৎনবা অদু ঐ নিংশিংলি। গুজরাতনা নরমাদা তুরেলগী ঈশিং পীগনি হায়বা খঙবদা রাজস্থান্দা মীয়াম অঙকপা পোক্নখি। রাজস্থান অমসুং গুজরাত অনিমক্ত বি.জে.পি সরকার লৈবা অসি ঐখোয়গী লাইবক ফবনি। মতম অদুদা ঐনা গুজরাত্ত চীফ মিনিষ্টর ওইখি অমসুং ইচল বসুন্ধারা জিনা মফম অসিগী চীফ মিনিষ্টর ওইখি। মুক্নবা, য়ানদবা অমসুং খোঙজং অমতা য়াওদনা, ঐখোয়না রাজস্থান্দা নরমাদাগী ঈশিং পীখি। ঙসিদি রাজস্থানগী খুঙ্গং কয়া ইমা নরমাদাগী ঈশিং ফংলে। মাইপাকপা অসিগী মতাংদা হৌজিক ঙাইহাক্কী মমাংদা ভঞ্জনলাল জিনা ৱা ঙাংখ্রে।
ইনাওশিং অমসুং ইচলশিং,
হৌজিক রাজস্থান অমসুং হরিয়ানা অনিমক্ত বি.জে.পি সরকারশিং লৈবদগী, অহানবা ওইনা নাকল অনিমক য়াদুনা ৱারোইশিন পুরক্লে। রাজস্থান অমসুং হরিয়ানানা পুন্না সেখাৱাতিগী ঈশিং য়েন্নগনি। হন্দক এগ্রিমেন্ত অমা খুৎয়েক পীনখ্রে। মসিগী মখাদা, লৈনুংদা পাইপশিং পুদুনা হাথনিকুন্দ বরাজদগী রাজস্থান ফাওবা ঈশিং পুরক্কনি। মসিনা সিকার, চুরু, ঝুনঝুনু অমসুং অপুনবা সেখাৱাতি লমদমগী মীওই লাখ কয়াদা কান্নবা পীগনি। প্রোজেক অসিদা লুপা করোর ৩৪,০০০ রোম চাদিং তৌগনি।
মরুপশিং,
তুংদা, অপ্পর যমুনা বেসিন্দা রেনুকা, লাখৱার অমসুং কিসাউ দামশিং শাবা লোইশিল্লকপদা, রাজস্থান মখা তানা কান্নবা ফংগনি। খুঙ্গংশিংদা তোতি ঈশিং পীনবা থবকশিং য়াংনা পায়খৎলি। রামজাল সেতু প্রোজেক পান্দম অসিগী ফল অমনি। মসিগা লোয়ননা, “জল সঞ্চয়, জন ভাগিদারি” কেম্পেন্দা রাজস্থান্না মরুওইবা থৌদাং অমা লৌরি। মসিগী মখাদা, লৈবাক শীনবা থুংনা শোক পিত মিল্লিয়ন ২.৫ রোম তৌখ্রে। রাজস্থান খক্তদা শোক পিত ১২৫,০০০ হেন্না শেমগৎখ্রে। মসিনা ঈশিং তুংশিল্লে অমসুং লৈনুংগী ঈশিংগী ইমায় হেনগৎহল্লে। থবকশিং অসিগীদমক কেন্দ্র অমসুং রাজ্যদা লৈরিবা বি.জে.পি সরকারশিং ঐনা থাগৎপা ফোঙদোকচরি।
মরুপশিং,
ঙসি, লৈবাক অসিনা ৱারেপ অমা লৌবা মতমদা, রাজস্থান্না মদুগী ময়োন্দা থম্লে। রাজ্য অসিদা য়াম্না য়াংনা অনৌবা ইনফ্রাষ্ট্রকচরশিং শেমগৎলে। ঙসি জয়পুর মেত্রো ফেজ-২গী উরেপ-উয়ুং তম্লে অমসুং জোধপুর এয়রপোর্তকী অনৌবা তর্মিনেল শঙ্গাবা অসিনা রাজস্থানগী চাউখৎপা য়াংখৎহনগনি অমসুং রাজ্য অসিগী অনৌবা মশাশিং পাল্লগনি। জয়পুর মেত্রো ফেজ-২ লোইবগা, জয়পুরগী অপুনবা মেত্রো নেতৱার্ক কিমি ৫০ হেল্লগনি। নোংপোক-নোংচুপ অমসুং অৱাং-খা মেত্রো নেতৱার্কশিং অমগা অমগা শম্নরগনি। মসিনা মফম অসিগী মীয়ামগী পুন্সি হেন্না লাইহনবা খক নত্তনা লমকোয়বা লাকপা মীওইশিং হেন্না নুংঙাইহল্লগনি।
মরুপশিং,
লাক্লিবা চহিশিংদা, ঐখোয় চাউখৎপগী অনৌবা শক্তম য়ৌবা ঙম্লগনি। মওং অসিদা দবল ইঞ্জিন সরকার অসি অদোম্না মখা তানা থৌজাল পীগনি হায়না ঐনা থাজৈ। অমতা ওইনা, ঐখোয়না রাজস্থানগী অনৌবা তুংলমচৎ অমা শেমগৎকনি। থাজবা অসিগা লোয়ননা, রিফাইনরি অমসুং অতোপ্পা চাউখৎ-থৌরাংগী থবকশিংগীদমক রাজস্থানগী মীয়াম অমসুং লৈবাক অসিগী মীয়াম ঐনা অমুক হন্না থাগৎপা ফোঙদোকচির। ঐগা লোয়ননা হায়মিন্নসি-
ভারত মাতা কী জয়।
রাজস্থানগী মপাঙ্গল উৎনবা খুৎ অনিমক ৱাংনা থাগৎপীয়ু-
ভারত মাতা কী জয়।
ভারত মাতা কী জয়।
ভারত মাতা কী জয়।
অদোম থাগৎচরি।
