প্রধান মন্ত্রী শ্রী নরেন্দ্র মোদীনা মিজোরামগী আইজোলদা লুপা করোর 9000 হেনবগী দিবেলপমেন্ত প্রোজেক্তশিংগী উরেপ উয়ুং তমখ্রে অমসুং শঙ্গাখ্রে। প্রোজেক্তশিং অসিনা রেলৱেজ, রোদৱেজ, ইনর্জী, স্পোর্তস য়াওনা অতোপ্পা সেক্তর কয়াদা কান্নবা ফংহল্লগনি। ভিদিও কনফরেন্সকী খুত্থাংদা মীয়াম তিনখিবা অদুদা ৱা ঙাংলদুনা, প্রধান মন্ত্রীনা ব্লু মাউন্তেন্সকী ফজরবা লমদম অসি য়েংশিনবীরিবা অথোইবা ঈশ্বর পাথিয়নদা ইকায় খুম্নবা উৎখি। মহাক্না নুংঙাইতবা ফোংদোক্লদুনা হায়খি মদুদি মহাক্না মিজোরমগী লেংপুই এয়রপোর্ততা লৈরি অমসুং নোংজু-নুংশাগী ফীভম ফত্তবনা মরম ওইদুনা আইজোলদা মীয়ামগা পুনবা ঙমখিদে। ফীভম অসি ওইজরবসু প্রধান মন্ত্রীনা হায়খি মদুদি মহাক্না মীদিয়ম অসিগী খুত্থাংদা মীয়ামগী মীনুংশিং অমসুং থৌজাল অদু ফাওবা ঙম্মি।
নীংতম ইহৌ ওইগেরা নত্রগা লৈবাক শেমগৎপা ওইগেরা, মিজোরামগী মীয়াম্না মতম পুম্নমক্তা মখোয়গী থৌদাং লৌনবগীদমক মাং থারি হায়না শ্রী মোদীনা ফোংদোকখি। মহাক্না হায়খি মদুদি লালনু রোপুইলিয়ানি অমসুং পাসলতা খুৱাংচেরাগুম্বা মীওইশিংগী ৱাখল্লোনশিংনা লৈবাক অসিদা ইথিল পীরি। শ্রী মোদীনা অকনবা ৱাফম থমখি মদুদি থৌনা অমসুং সেবা, থৌনা অমসুং মীনুংশি অসি মিজো খুন্নাইদা য়াম্না মরুওইবা মগুনশিংনি। প্রধান মন্ত্রীনা হায়খি মদুদি, “ঙসিদি মিজোরামনা ভারতকী চাউখৎ থৌরাংগী খোঙচৎতা মরু ওইবা থৌদাং অমা লৌরি”।
লৈবাক অসিগী, মরু ওইনা মিজোরমগী মীয়ামগীদমক ঙসি অসি পুৱারী ওইরবা নুমিৎ অমনি হায়না পল্লদুনা শ্রী মোদীনা হায়খি, "ঙসিদগী আইজোল অসি ভারতকী রেলৱে মেপ্তা য়াওরগনি।" মমাংগী মতমশিং অদু নীংশিংলদুনা, প্রধান মন্ত্রীনা হায়খি মদুদি চহি খরগী মমাংদা আইজোল রেলৱে লাইনগী উরেপ উয়ুং তম্বগী খুদোংচাবা ফংখি। মহাক্না লৈবাক মীয়ামদা রেলৱে লাইন অসি চাউথোকচবগা লোয়ননা কৎথোকখি। শ্রী মোদীনা হায়খি মদুদি খুদোংচাদবা লমদম য়াওনা অৱাবা কয়া মায়োক্নরবসু, বাইরাবি-সাইরোং রেল লাইন অসি হৌজিক ওইথোকপা ঙম্লে। মহাক্না ইঞ্জিনীয়রশিংগী হৈ-শিংবা অমসুং শিন্মীশিংগী থৌনাগীদমক থাগৎপা ফোংদোকখি। মখোয়না হোৎনবনা মসিগী মাইপাকপা অসি ওইথোকহনখি হায়না মহাক্না ফোংদোকখি।
মীয়ামগী থম্মোয় অমসুং লৈবাক অসি মতম পুম্নমক্তা হকথেংননা শম্নদুনা লৈরি হায়না ফোংদোক্লদুনা প্রধান মন্ত্রীনা হায়খি মদুদি অহানবা ওইনা মিজোরামগী সাইরোং অসি রাজধনী এক্সপ্রেসনা দিল্লীগা হকথেংননা শম্নহল্লগনি। মসি রেলৱেজ কনেক্সন অমা খক্তা নত্তে, মসি ত্রান্সফোর্মেসনগী লাইফলাইন অমনি অমসুং মসিনা মিজোরামগী মীয়ামগী পুন্সি অমসুং হিংনবগী লম্বীদা অহোংবা পুরক্কনি হায়না মহাক্না অকনবা ৱাফম থমখি। শ্রী মোদীনা মিজোরমগী লৌমীশিং অমসুং ললোন-ইতিক তৌরিবশিংনা লৈবাক শিনবা থুংনা কৈথেল কয়া ফংবা ঙম্লগনি হায়খি। মহাক্না হায়খি মদুদি মীয়াম্না এজুকেসন অমসুং হেল্থকেয়রগীদমক অহেনবা ওপ্সনশিং ফংলগনি। প্রধান মন্ত্রীনা মখা তাখি মদুদি চাউখৎ-থৌরাং অসিনা তুরিজম, ত্রান্সপোর্ত অমসুং হোস্পিতেলিতী সেক্তরদা থবক ফংহন্নবগী খুদোংচাবসু পীগনি।
প্রধান মন্ত্রীনা হায়খি মদুদি মতম কয়াগী মমাংদগী লৈবাক অসিদা পোলিতিকেল পার্তী খরনা ভোৎ বেঙ্ক পোলিতিক্স তৌদুনা লাক্লি। মহাক্না হায়খি মদুদি মখোয়গী মীৎয়েং অসি ভোৎ অমসুং সিৎ হেন্না লৈবা মফমশিংদা লৈরি। মসিগী মহৈ ওইনা, মিজোরামগুম্বা রাজ্যশিং য়াওনা অৱাং নোংপোক পুম্নমক অসি অসিগুম্বা মওং মতৌ অসিনা মরম ওইদুনা অৱাবা কয়া মায়োক্নখি। শ্রী মোদীনা অকনবা ৱাফম থমখি মদুদি হৌজিক্কী থৌওং অসি য়াম্না খেন্নরে অমসুং মমাংদা মীৎয়েং চংলমদবশিং হৌজিক মাংজিল থানা চৎলি। মহাক্না মখা তাখি মদুদি শোত্থরম্বা অদু হৌজিক্না মেনস্ত্রিমগী শরুক অমা ওইরে। প্রধান মন্ত্রীনা হায়খি মদুদি হৌখিবা চহি 11 অসিদা সরকারনা অৱাং-নোংপোক্কী চাউখৎ থৌরাংগীদমক লেপ্পা লৈতনা থবক তৌরি। লমদম অসি ভারতকী গ্রোথ ইঞ্জিন ওইরক্লি হায়না মহাক্না ফোংদোকখি।
চহি কয়া অসিদা অৱাং-নোংপোক্কী রাজ্য কয়া অমা ভারতকী রেল মেপ্তা অহানবা ওইনা হাপচিনখ্রে হায়না পল্লদুনা প্রধান মন্ত্রীনা হায়খি মদুদি ভারত সরকারনা কন্নেক্তিবিতীগী মওং পুম্নমক - খুঙ্গংগী লম্বী অমসুং হাইৱেজ, মোবাইল অমসুং ইন্তর্নেৎ কন্নেক্সনশিং, ইলেক্ত্রিসিতী, তেপ ৱাতর অমসুং এল.পি.জি. কন্নেক্সন, অসি মপাঙ্গল কনখৎহন্নবা কন্না হোৎনদুনা লাকখি। মহাক্না মিজোরামসু এয়র ত্রেবেলগীদমক উদান স্কিমদগী কান্নবা ফংগনি হায়না লাউথোকখি অমসুং মফম অসিদা অথুবা মতমদা হেলিকোপ্তর সর্বিসশিং হৌরগনি হায়না পাউদমখি। মসিনা মিজোরামগী মনুং হঞ্জিনবা মফমশিংদা এক্সেস হেনগৎহনগনি হায়না মহাক্না ফোংদোকখি।
প্রধান মন্ত্রীনা হায়খি, "এক্ত ইস্ত পোলিসী অমসুং শেমগৎলক্লিবা নোর্থ ইস্ত ইকনোমিক কোরিদোর অনিমক্তা মিজোরামগী অচৌবা থৌদাং অমা লৌরি"। মহাক্না হায়খি মদুদি কালাদান মল্তি-মোদেল ত্রান্সিৎ ত্রান্সপোর্ত প্রোজেক্ত অমসুং সাইরোং-হমোংবুচুৱাহ রেল লাইনগা লোয়ননা মিজোরাম অসি খা-নোংপোক এসিয়াগী থোংদা বে ওফ বেঙ্গলগা শম্নহল্লগনি। মসিগী কন্নেক্তিবিতী অসিনা অৱাং-নোংপোক ভারত অমসুং খা-নোংপোক এসিয়াগী মফম কয়াদা ললোন-ইতিক অমসুং তুরিজম হেনগৎহনগনি হায়না মহাক্না মখা তানা ফোংদোকখি।
মিজোরম অসি হৈ-শিংলবা নহাশিংনা কয়া লৈরি হায়না পল্লদুনা শ্রী মোদীনা হায়খি মদুদি সরকারগী মিসনদি মখোয়বু শক্তি পীবনি। মহাক্না হায়খি মদুদি মিজোরমদা এক্লাব্য রেসিদেন্সিএল স্কুল 11 হান্ননা লিংখৎখ্রে অমসুং অতোপ্পা স্কুল 6 লিংখৎনবা থবক পায়খৎলি। অৱাং-নোংপোক লমদম অসি স্তার্ত-অপশিংগী মরুওইবা মফম অমা ওইনা শেমগৎলক্লি হায়না প্রধান মন্ত্রীনা ফোংদোকখি। মহাক্না হৌজিক মফম অসিদা স্তার্ত-অপ 4,500 অমসুং ইনক্যুবেতর 25 মথৌ তৌরিবা অসিদা নুংঙাইবা ফোংদোকখি। মহাক্না মিজোরমগী নহাশিংনা খোঙজং অসিদা থৌনা লৈনা শরুক য়াদুনা মখোয় মশা অমসুং অতোপ্পশিংগীদমক অনৌবা খুদোংচাবা কয়া ফংলি হায়না ফোংদোকখি।
ভারত অসি মালেমগী শান্ন-খোৎনবগী মরুওইবা মফম অমা ওইনা খোঙজেল য়াংনা থোরক্লি হায়না পল্লদুনা প্রধান মন্ত্রীনা হায়খি মদুদি মসিগী চাউখৎ-থৌরাং অসিনা লৈবাক অসিদা শান্ন-খোৎনবগী শেন্মিৎলোন অমা থোরকহল্লি। শান্ন-খোৎনবদা মিজোরামগী মঙাল লৈবা চৎনবী অদু মহাক্না ফোংদোকখি। ফুতবোল অমসুং অতোপ্পা হীরমশিংদা চেম্পিয়ন কয়া পুথোকপদা মিজোরামগী থৌদাং অদু মহাক্না পনখি। সরকারগী স্পোর্তসকী পোলিসীশিংনা মিজোরামদসু কান্নবা ফংলি হায়না মহাক্না ফোংদোকখি। খেলো ইন্দিয়া স্কিমগী মখাদা, শ্রী মোদীনা হায়খি মদুদি মোদর্ন স্পোর্তস ইনফ্রাস্ত্রকচর শেমগৎনবা মতেং পীরি। মহাক্না হায়খি মদুদি সরকারনা হন্দক্তা নেস্নেল স্পোর্তস পোলিসী - খেলো ইন্দিয়া খেল নীতি হৌদোকখ্রে। থৌরাং অসিনা মিজোরামগী নহারোলশিংগীদমক্তা অনৌবা খুদোংচাবা কয়া ফংহল্লগনি হায়না মহাক্না অকনবা ৱাফম থমখি।
লৈবাক অসিগী মনুং অমসুং মপান্দা অৱাং-নোংপোক্কী ফজরবা কলচরগী এম্বেসেদর অমা ওইবগী থৌদাং লৌবদা প্রধান মন্ত্রীনা নুংঙাইবা ফোংদোকখি। অৱাং-নোংপোক্কী পোতেন্সিএল উৎলিবা প্লেৎফোর্মশিং পুক্নিং থৌগৎপগী মরুওইবা অদু মহাক্না ফোংদোকখি। থা খরগী মমাংদা দিল্লীদা পাংথোকখিবা অষ্টলক্ষ্মী ফেস্তিবেলদা শরুক য়াখিবা অদু নৌহৌননা নীংশিংলদুনা শ্রী মোদীনা হায়খি মদুদি ফেস্তিবেল অসিনা অৱাং নোংপোক্কী তেক্সতাইলশিং, খুৎশা হৈবগী থবকশিং, GI তেগ তৌরবা পোত্থোকশিং অমসুং তুরিজমগী ওইথোকপা য়াবশিং উৎখি। প্রধান মন্ত্রীনা হায়খি মদুদি রাইজিং নোর্থ ইস্ত সম্মিৎতা মহাক্না ইনভেস্তরশিংবু লমদম অসিগী অচৌবা পোতেন্সিএল অদুদা মীৎয়েং চংনবা পুক্নিং থৌগৎখিম অমমসুং সম্মিৎ অসিনা অচৌবা ইনভেস্তমেন্ত অমসুং প্রোজেক্তশিংগী লম্বী য়াৎলি হায়না ফোংদোকখি। শ্রী মোদীনা মখা তারদুনা হায়খি মদুদি ভোকেল ফোর লোকেল ইনিসিয়েতিব অসিনা অৱাং-নোংপোক্কী আর্তিসানশিং অমসুং লৌমীশিংদা চাউনা কান্নবা পীরি। মিজোরামগী বেম্বু প্রদক্তশিং, ওর্গানিক ওইবা শীং, য়াইঙং অমসুং লফোই অসি মীয়াম্না খঙনৈ।
সরকারনা ইজ ওফ লিভিং অমসুং ইজ ওফ দুইং বিজিনেস হেনগৎহন্নবা লেপ্পা লৈতনা খোংথাং লৌখৎলি হায়না পল্লদুনা প্রধান মন্ত্রীনা হায়খি, "নেক্স-জেনরেসন GSTগী রিফোর্মশিং হন্দক্তা হৌদোকখ্রে অমসুং মসিনা পোৎলম কয়াদা তেক্স হন্থহন্দুনা ইমুং মনুংগী পুন্সিদা লাইথোকহল্লে।" মহাক্না নীংশিংখি মদুদি 2014গী মমাংদা, তুথপেস্ত, সাপোন, অমসুং থাওগুম্বা নুমিৎ খুদিংগী তঙাই ফদবা পোৎলমশিংদসু 27%গী তেক্স লৌরম্মি। ঙসিদি হায়রিবা পোৎলমশিং অসিদা 5% GST খক্তমক লৌরি। শ্রী মোদীনা হায়খি মদুদি ওপোজিসনগী লৈঙাক্কী মতমদা, হিদাক-লাংথকশিং, তেস্ত কিৎশিং অমসুং ইন্সুরেন্স পোলিসীশিংদা তেক্স চাউনা লৌখি। মসিনা হেল্থকেয়র অসি মমল য়াম্বা অমসুং ইন্সুরেন্স অসি মীচম প্রজাগী ইমুংশিংদা ফংবা ঙমদবা ওইহল্লে হায়না মহাক্না ফোংদোকখি। মহাক্না অকনবা ৱাফম থমখি মদুদি ঙসিদি, হায়রিবা সর্ভিসশিং অমসুং পোৎলমশিং অসি শেল চংদনা ফংহল্লে। অনৌবা GST রেৎশিং অসিনা কেন্সরগুম্বা শাথীবা অনাবশিংগী হিদাক-লাংথকশিংসু মমল হন্থহল্লগনি হায়না প্রধান মন্ত্রীনা মখা তাখি। সেপ্তেম্বর 22গী মতুংদা সিমেন্ত অমসুং কন্সত্রক্সন মেতরিএলশিংসু মমল হন্থরগনি হায়না মহাক্না হায়খি। শ্রী মোদীনা হায়খি মদুদি স্কুতর অমসুং কার পুথোক্লিবা কম্পনী কয়ানা মমল হন্থখ্রে। লাক্কদৌরিবা ফেস্তিবেল সিজন অসি লৈবাক শীনবা থুংনা হেন্না থোইদোক হেন্দোক্না নুংঙাইবা ফংগনি হায়না মহাক্না থাজবা থমখি।
প্রধান মন্ত্রীনা হায়খি মদুদি রিফোর্মশিংগী শরুক অমা ওইনা, হোতেল অয়াম্বদা GST অসি 5% খক্তদা হন্থহনখ্রে। মহাক্না হায়খি মদুদি মফম কয়াদা চৎপা, হোতেলদা লৈবা, অমসুং মপান্দা চাবা অসি হৌজিক্তি মমল হোংলগনি। শ্রী মোদীনা হায়খি মদুদি মসিনা লৈবাক অসিগী তোঙান-তোঙানবা মফমশিংদা চৎথোক-চৎশিন তৌনবা অমসুং নুংঙাইবা ফোংদোক্নবগীদমক্তা মীওই কয়া অমা পুক্নিং থৌগৎকনি। অৱাং-নোংপোক লমদমগুম্বা তুরিস্তিক হবশিংনা অহোংবা অসিদগী অখন্ননা কান্নবা ফংগনি হায়না মহাক্না পনখি।
“2025-26কী অহানবা ক্বার্তরদা ভারতকী শেন্মিৎলোনদা চাদা 7.8গী গ্রোথ অমা রেকোর্দ তৌখ্রে। মসিনা তাক্লিবদি ভারত অসি মালেমদা খ্বাইদগী খোংজেল য়াংনা চাউখৎলক্লিবা মরুওইবা ইকনোমী অমা ওইরে হায়বনি”, হায়না শ্রী মোদীনা হায়খি। লৈবাক অসিনা মেক ইন ইন্দিয়া অমসুং এক্সপোর্তশিংদসু মপাঙ্গল কন্না হেনগৎলক্লি হায়না মহাক্না ফোংদোকখি। ওপরেসন সিন্দুরগী মতাংদা পল্লদুনা মহাক্না হায়খি মদুদি ভারতকী লান্মীশিংনা তেরোরিস্তশিংবু মতৌ করম্না পরা তম্বীবগে হায়বদু লৈবাক অসিনা উখি। মহাক্না হায়খি লৈবাক পুম্বনা লান্মীশিংগীদমক্তা চাউথোকচবা পোক্লি। প্রধান মন্ত্রীনা অকনবা ৱাফম থমখি মদুদি ওপরেসন অসিগী মনুংদা লৈবাক অসিবু ঙাক-শেনবদা মেদ-ইন-ইন্দিয়াগী খুৎলাইশিংনা অচৌবা থৌদাং লৌখি। ভারতকী শেন্মিৎলোন অমসুং মেনুফেকচরিং সেক্তরগী খুমাং চাউশিনবা অসি লৈবাক অসিগী ঙাকশেলগীদমক য়াম্না মরু ওই হায়না মহাক্না মখা তাখি।
নাগরিক খুদিংমক্কী, ইমুং খুদিংমক্কী অমসুং লমদম খুদিংমক্কী য়াইফনবা সরকারনা কত্থোকপা অদু প্রধান মন্ত্রীনা অমুক হন্না ফোংদোকখি। মহাক্না হায়খি মদুদি চাউখৎলবা ভারত অসি মীয়ামগী শক্তি লৈহন্দুনা শেমগৎকনি অমসুং মিজোরামগী মীয়াম্না মসিগী খোঙচৎ অসিদা মরুওইবা থৌদাং অমা লৌগনি হায়না থাজবা থমখি। মহাক্না থম্মোয় শেংনা থাগৎপা ফোংদোকখি অমসুং ভারতকী রেলৱে মেপ্তা আইজোলবু তরাম্না ওকখি। মহাক্না অমুক হন্না হায়খি মদুদি মহাক্না নোংজু-নুংশাগী ফীভমনা মরম ওইদুনা আইজোল চৎপা ঙমদ্রবসু, অথুবা মতমদা মখোয়না উনগনি হায়না মহাক্না থাজবা পীখি।
থৌরম অদুদা মিজোরমগী রাজ্যপাল, জেনরেল ভি কে সিংহ, মিজোরমগী মুখ্য মন্ত্রী, শ্রী লালদুহোমা, কেন্দ্রগী মন্ত্রী, শ্রী অশ্বিনী বৈষ্ণব অমসুং অতোপ্পা দিগ্নিতরীশিংসু শরুক য়াখি।
বেকগ্রাউন্দ
মালেমগী থাক্কী ইনফ্রাস্ত্রকচর অমসুং অরোইবা মাইলগী কনেক্তিবিতীগীদমক মহাক্কী অচেৎপা ফিরেপকী মতুং ইন্না, প্রধান মন্ত্রীনা মিজোরমগী কোনুং অসি ইন্দিয়ন রেলৱেজ নেৎৱার্ক্কা অহানবা ওইনা শম্নহন্নবা লুপা করোর 8,070 হেন্না চংবা বাইরাবি-সাইরোং অনৌবা রেল লাইন শঙ্গাখ্রে। শিংননিংঙাই ওইবা চীংগী মফম অমদা শাগৎলিবা রেল লাইন প্রোজেক্ত অসিদা অরুবা জিওলোজিকেল কন্দিসনশিংগী মাইয়োক্নদুনা তনেল 45 শাগৎলি। মসিগী মথক্তা, মসিদা অচৌবা থোং 55 অমসুং অপীকপা থোং 88সু য়াওরি। মিজোরাম অমসুং লৈবাক অসিগী অতৈ মফমশিংগা হকথেংননা রেলদা শম্নবনা লমদম অসিগী মীয়ামদা সেফ, ইফিসিএন্ত অমসুং কোস্ত ইফেক্তিব ওইবা চৎথোক-চৎশিনগী অপাম্বশিং ফংহল্লগনি। মসিনা চেং-হৱাই, হারর অমসুং অতৈ তঙাই ফদবা পোৎলমশিংগী মতম চানা পীগনি অমসুং থাজবা য়াবা সপ্লাইসু লৈহল্লগনি। মসিনা অপুনবা লোজিস্তিক ইফিসেন্সী অমসুং রিজনেল এক্সেসিবিলিতি হেনগৎহল্লগনি।
প্রধান মন্ত্রীনা অনৌবা এক্সপ্রেস ত্রেন অহুম, সাইরোং (আইজৌল) - দিল্লী (অনন্দ বিহার তর্মিনেল) রাজধানী এক্সপ্রেস, সাইরোং-গুৱাহাতি এক্সপ্রেস অমসুং সাইরোং-কোলকতা এক্সপ্রেসসু থৌরম অসিদা লমথাখ্রে। আইজোল অসি হৌজিক রাজধানী এক্সপ্রেসকী খুত্থাংদা দিল্লীগা হকথেংননা শম্নরগনি। সাইরোং-গুৱাহতি এক্সপ্রেসনা মিজোরম অমসুং অসমগী মরক্তা চৎথোক-চৎশিনদা মতেং পাংগনি। সাইরোং-কোলকতা এক্সপ্রেসনা মিজোরমবু কোলকতাগা হকথেংননা শম্নহল্লগনি। হেন্না ফরবা কনেক্তিবিতী অসিনা হোস্পিতালশিং, য়ুনিভর্সিতীশিং, অমসুং কৈথেলশিং চত্থোক চৎশিন তৌবদা হেন্না নুংঙাইহল্লগনি। মসিনা লমদম অসিদা এজুকেস্নেল, কলচরেল অমসুং ইকনোমিক লিঙ্কশিং মপাঙ্গল কনখৎহল্লগনি। মসিনা থবক ফংহন্নবা খুদোংচাবশিংসু পীগনি অমসুং লমদম অসিদা তুরিজম চাউখৎহনগনি।
লম্বীগী ইনফ্রাস্ত্রকচরদা মপাঙ্গল লৈহন্নবগীদমক, প্রধান মন্ত্রীনা লম্বীগী প্রোজেক্ত কয়াগী উরেপ উয়ুংসু তমখ্রে। মসিদা আইজোল বাইপাস রোদ, থেনজোল-সিয়ালসুক রোদ অমসুং খানকান-রোঙ্গুরা রোদ য়াওরি।
প্রধান মন্ত্রীগী দিবেলপমেন্ত ইনিসিএতিব ফোর নোর্থ ইস্ত রিজন (পি.এম.-দিবাইন) স্কিমগী মখাদা লুপা করোর 500 হেনবগী কিলোমিতর 45 শাংবা আইজোল বাইপাস রোদ অসি আইজোল শহরদা মী চিনবা হন্থহন্নবা, লুংলৈ, সিয়াহা, লোংতলাই, লেংপুই এয়রপোর্ত অমসুং সাইরাং রেলৱে স্তেসনগা মরী ফগৎহন্নবা পান্দম থম্লি। মসিনা খা থংবা জিলাশিংদগী আইজোল ফাওবগী খোঙচৎকী মতম পুং 1.5 হন্থহল্লগনি। মসিনা লমদম অসিগী মীয়ামদা কান্নবা ফংহল্লগনি। অৱাং-নোংপোক্কী স্পিসিএল ইনফ্রাস্ত্রকচর দিবেলপমেন্ত স্কিম NESIDS (রোদস) গী মখাদা থেনজাউল সিয়ালসুক রোদনা হোর্টিকলচর ফার্মর, দ্রাগন ফ্রুত থাবশিং, ফৌ থাবশিং অমসুং শিং প্রোসেসর কয়াদা কান্নবা পীগনি। সেরচিপ দিস্ত্রিক্তকী NESIDS (রোদস) গী মখাদা খানকান রোংগুরা রোদনা কৈথেলশিংদা হেন্না ফবা খুদোংচাবা ফংহল্লগনি অমসুং লমদম অসিগী তোঙান তোঙানবা হোর্টিকলচর লৌমীশিং অমসুং অতোপ্পা মীওইশিংদা কান্নবা ফংহল্লগনি।
প্রধান মন্ত্রীনা লোংতলাই সিয়াহা রোদতা লৈবা ছিমতুইপু তুরেলগী থোংগী উরেপ উয়ুংসু তমখ্রে। মসিনা কুম খুদিংমক্তা কনেক্তিবিতী ফংহল্লগনি অমসুং চৎথোক-চৎশিন তৌবগী মতম পুং অনি হন্থহল্লগনি। থোং অসিনা কালাদান মল্তিমোদেল ত্রাঞ্জিৎ ফ্রেমৱার্ককী মখাদা ঙমখৈ লান্না ললোন-ইতিক তৌবদা মতেং পাংগনি।
প্রধান মন্ত্রীনা শান্ন-খোৎনবগী চাউখৎ-থৌরাংগীদমক খেলো ইন্দিয়া মলতিপরপস ইন্দোর হোলগী উরেপ উয়ুংসু তমখ্রে। তুইকুৱালদা লৈরিবা হোল অসিদা মোদর্ন স্পোর্তস ফেসিলিতীশিং য়াওনা মল্তি-পরপস ইন্দোর এরেনা অমা লৈরগনি। মসিনা নেস্নেল অমসুং ইন্তরনেস্নেল কম্পিতিতিবশিংদা মিজোরমগী নহাশিংবু কান্নহল্লগনি।
লমদম অসিদা ইনর্জী ইনফ্রাস্ত্রকচর মপাঙ্গল কনখৎহন্দুনা, প্রধান মন্ত্রীনা আইজোলগী মুলখোংদা TMTPA (চহিদা মেত্রিক তোন লিশিং অমা) LPG বোতল্লিং প্লান্ত 30 গী উরেপ উয়ুং তমখ্রে। মসিনা মিজোরম অমসুং য়ুম্লোন্নরিবা রাজ্যশিংদা LPGগী অতৎ অখম লৈতবা অমসুং থাজবা য়াবা সপ্লাই অমা লৈহন্নবা পান্দম থমগনি। মসিনা লোকেলগী ওইবা থবক পীবগী খুদোংচাবসু পীগনি।
প্রধান মন্ত্রী জন বিকাস কর্মক্রম (PMJVK) স্কিমগী মখাদা কৱর্থাদা রেসিদেন্সিয়েল স্কুলসু প্রধান মন্ত্রীনা শঙ্গাখ্রে। মমিত এস্পিরেস্নেল দিস্ত্রিক্তকী স্কুল অসিদা মোদর্ন ক্লাসরুমশিং, হোস্তেলশিং অমসুং আর্তিফিসিএল ফুতবোল তর্ফ য়াওনা স্পোর্তস ফেসিলিতীশিং ফংহনগনি। মসিনা অঙাং অমসুং নহারোল 10,000 হেনবদা কান্নবা পীগনি, মসিনা মতম শাংনা সোসিএল অমসুং এজুকেসনেল প্রোগ্রেসকী য়ুম্ফম ওইগনি।
পুম্নমক্কীদমক মগুন লৈবা এজুকেসনগী মহাক্কী মঙলান মখা চত্থদুনা, প্রধান মন্ত্রীনা তলাংনুৱামদা এক্লব্যা মোদেল রেসিদেন্সিএল স্কুলসু শঙ্গাখ্রে। স্কুল অসিনা রেজিস্ত্রেসন হেনগৎহল্লগনি, স্কুল থাদোকপগী চাং হন্থহল্লগনি অমসুং ত্রাইবেল নহারোলশিংদা অপুনবা এজুকেসনগী খুদোংচাবা ফংহল্লগনি।
ৱা ঙাংখিবগী মপুংফাবা ৱারোল পানবা মসিদা নম্বীয়ু
A historic day for the nation, particularly for the people of Mizoram.
— PMO India (@PMOIndia) September 13, 2025
From today, Aizawl will be on India’s railway map. pic.twitter.com/OKYnwiVbY4
North East is becoming the growth engine of India. pic.twitter.com/By78Tad4ys
— PMO India (@PMOIndia) September 13, 2025
Mizoram has a major role in both our Act East Policy and the emerging North East Economic Corridor. pic.twitter.com/rWymwuhist
— PMO India (@PMOIndia) September 13, 2025
#NextGenGST means lower taxes on many products, making life easier for families. pic.twitter.com/Nmtw5o7ypq
— PMO India (@PMOIndia) September 13, 2025
Mizoram has a major role in both our Act East Policy and the emerging North East Economic Corridor. pic.twitter.com/3MwXvVbAWX
— PMO India (@PMOIndia) September 13, 2025
India is the fastest growing major economy in the world. pic.twitter.com/Z93IN1qHXo
— PMO India (@PMOIndia) September 13, 2025
