মিজোরমগী রাজ্যপাল ভি কে সিংহ জী, মুখ্য মন্ত্রী শ্রী লালদুহোমা জী, কেন্দ্রগী মন্ত্রীমন্দলদা ঐহাক্কী মরুপ শ্রী অশ্বিনী বৈষ্ণব জী, মিজোরম সরকারগী মন্ত্রীশিং, এম.পি.শিং অমসুং অতোপ্পা মীয়ামগী মীহুৎশিং, মিজোরমগী শিংথানীংঙাই ওইরবা মীয়ামদা খুরুমজরি।
ঐহাক্না ব্লু মাউন্তেন্সকী ফজরবা লমদম অসিবু য়েংশিনবীরিবা, ঈশ্বর পথিয়নদা খুরুমজরি। ঐহাক মিজোরমগী লেংপুই এয়রপোর্ত্তা লৈরি। নুংঙাইতবা ৱাফমদি, নোংগী ফীভম ফত্তবনা মরম ওইদুনা ঐহাক আইজোলদা ময়ামগা পুনবা ঙমদবগীদমক নুংঙাইতবা ফোংদোকচরি। অদুম ওইনমক ঐহাক্না অদোমগী মীনুংশি অমসুং থৌজাল অদু মেদিয়ম অসিদগী ফাওবা ঙম্মী।
মরুপশিং,
নীংতম ইহৌ ওইগেরা নত্ত্রগা লৈবাক শেমগৎপা ওইগেরা, মিজোরামগী মীয়াম্না মতম পুম্নমক্তা মখোয়গী থৌদাং লৌনবগীদমক মাং থাদুনা লাকখি। লালনু রোপুইলিয়ানি অমসুং পাসলতা খুৱাংচেরাগুম্বা মীওইশিংগী ৱাখল্লোনশিংনা লৈবাক অসিবু ইথিল পীরি। থৱাই কৎপা অমসুং সেবা তৌবা, থৌনা অমসুং নুংশিবা, হায়রিবা মগুনশিং অসি মিজো খুন্নাইগী ময়াইদা লৈ। ঙসিদি মিজোরামনা ভারতকী চাউখৎ-থৌরাংগী খোঙচৎতা মরু ওইবা থৌদাং অমা লৌরি।
মরুপশিং,
ঙসি অসি লৈবাক অসিগী, মরু ওইনা মিজোরামগী মীয়ামগীদমক পুৱারী ওইরবা নুমিৎ অমনি। ঙসিদগী আইজোল অসি ভারতকী রেলৱে মেপ্তা য়াওরগনি। চহি খরগী মমাংদা ঐহাক্না আইজোল রেলৱে লাইনগীদমক উরেপ উয়ুং তম্বগী খুদোংচাবা ফংখি। অমসুং ঙসি, ঐখোয়না মসি লৈবাক অসিগী মীয়ামদা কৎথোকচরি। খুদোংচাদবা লম য়াওনা অৱাবা কয়া মায়োক্নদুনা, বাইরাবি সাইরাং রেলৱে লাইন অসি তশেং তশেংনা মঙফাওনবা ঙমলে। ঐখোয়গী ইঞ্জিনীয়রশিংগী হৈ-শিংবা অমসুং ঐখোয়গী শিন্মীশিংগী থৌনা অসিনা মসি ওইথোকহনখি।
মরুপশিং,
ঐখোয়গী থম্মোয় অসি মতম পুম্নমক্তা অমগা অমগা হকথেংননা মরী লৈনৈ। হৌজিক, অহানবা ওইনা, মিজোরমগী সাইরোং অসি রাজধনী এক্সপ্রেসনা দিল্লীগা হকথেংননা শম্নহনগনি। মসি রেলৱেজ কন্নেক্সন অমা খক্তা নত্তে, মসি ত্রান্সফোর্মেসনগী লাইফলাইন অমনি। মসিনা মিজোরামগী মীয়ামগী পুন্সি অমসুং হিংনবগী লম্বীদা অহোংবা পুরক্কনি। মিজোরমগী লৌমীশিং অমসুং বিজিনেসশিংনা লৈবাক শীনবা থুংনা কৈথেল কয়া য়ৌহনবা ঙমগনি। মীওইশিংনা এজুকেসন অমসুং হেল্থকেয়রগীদমক অহেনবা ওপ্সনশিং ফংলগনি। মসিনা তুরিজম, ত্রান্সপোর্ত অমসুং হোস্পিতেলিতী সেক্তরশিংদা থবক ফংহন্নবগী খুদোংচাবসু লৈহল্লগনি।
মরুপশিং,
মতম কয়াগী মমাংদগী ঐখোয়গী লৈবাক অসিদা পোলিতিকেল পার্তী খরনা ভোৎ বেঙ্ক পোলিতিক্সতা মীৎয়েং চৎনদুনা লাক্লি। মখোয়গী মীৎয়েং অসি মতম পুম্নমক্তা ভোৎ অমসুং সিৎ হেন্না লৈবা মফমশিংদা ওইরম্মি। মিজোরামগুম্বা রাজ্যশিং য়াওনা অৱাং-নোংপোক পুম্নমক অসি অসিগুম্বা ৱাখল্লোন অসিনা মরম ওইদুনা অৱাবা কয়া মায়োক্নখি। অদুবু ঐখোয়গী থৌওংদি য়াম্না খেন্নৈ। মমাংদা য়েংশিনবীদ্রবা মীওইশিং অদু হৌজিক মাংজিল থানা চৎলি। মতম অমদা শোত্থরম্বা মীওইশিং অদু হৌজিক্তি মেনস্ত্রীম ওইরে! হৌখিবা চহি 11 অসিদা ঐখোয়না অৱাং নোংপোক লমদম চাউখৎহন্নবা হোৎনরি। লমদম অসি ভারতকী গ্রোথ ইঞ্জিন ওইরক্লি।
মরুপশিং,
চহি কয়া অসিদা, অৱাং নোংপোক্কী রাজ্য কয়া অমা ভারতকী রেল মেপ্তা অহানবা ওইনা হাপচিনখ্রে। রুরেল রোদ অমসুং হাইৱেজ, মোবাইল কন্নেক্তিবিতী অমসুং ইন্তর্নেত কন্নেক্তিবিতী, ইলেক্ত্রিসিতী, তেপ ৱাতর অমসুং LPG কন্নেক্সনন, ভারত সরকারনা মখল খুদিংমক্কী কন্নেক্তিবিতী মপাঙ্গল কনখৎহন্নবা কন্না হোৎনরি। মিজোরামসু উরান স্কিমগী মতেংদগী এয়র ত্রেভেলগীদমক কান্নবা ফংগনি। অথুবা মতমদা, মফম অসিদা হেলিকোপ্তর সর্ভিসশিং হৌরগনি। মসিনা মিজোরামগী অরাপ্পা মফমশিংদা চৎনবা এক্সেস হেনগৎহল্লগনি।
মরুপশিং,
ঐখোয়গী এক্ত ইস্ত পোলিসী অমসুং শেমগৎলক্লিবা নোর্থ ইস্ত ইকনোমিক কোরিদোর অনিমক্তা মিজোরামগী অচৌবা থৌদাং লৈ। কালাদান মল্তিমোদেল ত্রান্সিৎ ত্রান্সপোর্ত প্রোজেক্ত অমসুং সাইরোং হমাৱংবুচহুহ রেলৱে লাইনগা লোয়ননা মিজোরামসু খা-নোংপোক এসিয়াগী থোংদা বে ওফ বেঙ্গলগা শম্নরগনি। মসিনা অৱাং নোংপোক ভারত অমসুং খা নোংপোক এসিয়াদা ললোন-ইতিক অমসুং তুরিজম হেনগৎহনগনি।
মরুপশিং,
মিজোরাম অসি হৈ-শিংলবা নহারোলশিংনা মপুং ফাহল্লি। ঐখোয়গী থবক্তি মখোয়বু শক্তি পীবনি। ঐখোয়গী সরকারনা মফম অসিদা একলব্য রেসিদেন্সিএল স্কুল 11 হৌখ্রে। স্কুল 6দা থবক হৌরগনি। ঐখোয়গী অৱাং-নোংপোক অসি স্তার্ত-অপশিংগী মরুওইবা মফম অমা ওইরক্লি। লমদম অসিদা স্তার্ত-অপ 4,500 অমসুং ইনক্যুবেতর 25 মথৌ তৌরি হায়বসি ঐহাক্না নুংঙাইবা ফাওই। মিজোরমগী নহাশিংনা খোঙথাং অসিদা থৌনা লৈনা শরুক য়াদুনা মখোয় মশা অমসুং অতোপ্পশিংগীদমক অনৌবা খুদোংচাবশিং শেমগৎলি।
মরুপশিং,
ভারত অসি মালেমগী শান্ন-খোৎনবগী মরু ওইবা মফম অমা ওইরক্লি। মসিনা লৈবাক অসিদা স্পোর্তসকী শেন্মিৎলোন অমসু শেমগৎলি। মিজোরমদা শান্ন-খোৎনবগী নুংঙাইরবা চৎনবী অমা লৈরি। ফুতবোল অমসুং অতোপ্পা শান্ন-খোৎনবশিংদা চেম্পিয়ন কয়া অমা পুথোকখ্রে। ঐখোয়গী স্পোর্তস পোলিসীশিং অসিনা মিজোরামদসু কান্নবা ফংলি। খেলো ইন্দিয়া স্কিমগী মখাদা ঐখোয়না মোদর্ন স্পোর্তস ইনফ্রাস্ত্রকচর শেমগৎপদা মতেং পাংলি। হৌখিবা মতম খরদা ঐখোয়গী সরকারনা নেস্নেল স্পোর্তস পোলিসী, খেলো ইন্দিয়া খেল নীতি পুথোকখ্রে। মসিনা মিজোরমগী নহারোলশিংগীদমক অনৌবা খুদোংচাবশিংগী থোঙ হাংদোক্লগনি।
মরুপশিং,
ঐখোয়গী লৈবাক অসিদা নৎত্রগা মপাল্লমদা, অৱাং-নোংপোক্কী ফজরবা কলচরগী এম্বেসেদর অমা ওইবগী থৌদাং অসি লৌবদা ঐহাক য়াম্না নুংঙাইবা ফাওই। অৱাং-নোংপোক্কী ওইথোকপা য়াবশিং উৎলিবা প্লেতফোর্মশিং পুক্নিং থৌগৎপা অসি য়াম্না মরু ওই। থা খরগী মমাংদা, ঐহাক্না দিল্লীদা অষ্ট লক্ষ্মী ফেস্তিবেলদা শরুক য়াবগী খুদোংচাবা ফংখি। মসিদা অৱাং নোংপোক্কী তেক্সতাইল, খুৎশা হৈবগী থবকশিং, GI-তেগ তৌরবা পোত্থোকশিং অমসুং তুরিজম পোতেন্সিএল উৎখি। রাইসিং নোর্থ ইস্ত সম্মিৎতা ঐনা ইনভেস্তরশিংদা অৱাং-নোংপোক্কী পোতেন্সিয়েল অদু শিজিন্ননবা পুক্নিং থৌগৎখি। সম্মিৎ অসিনা অচৌবা ইনবেস্তমেন্ত অমসুং প্রোজেক্তশিংগী লম্বী হাংদোক্লি। ঐহাক্না ভোকেল ফোর লোকেল ওইবগী মতাংদা ৱা ঙাংবদা, অৱাং নোংপোক্কী আর্তিসানশিং অমসুং লৌমীশিংদসু য়াম্না কান্নবা ফংই। মিজোরামগী বাম্বুগী পোত্থোকশিং, ওর্গানিক ওইবা শীং, য়াইঙং অমসং লফোইশিং অসি মীয়াম্না খঙনৈ।
মরুপশিং,
ঐখোয়না ইজ ওফ লিভিং অমসুং ইজ ওফ দুইং বিজিনেস হেনগৎহন্নবা লেপ্পা লৈতনা খোংথাংশিং লৌখৎলি। ইকুই কুইদ্রিঙৈদা, নেক্স জেনরেসন GST লাউথোকখি মসিনা পোৎলম কয়াদা তেক্স হন্থহল্লগনি, মসিনা ইমুংশিংগী পুন্সিদা লাইথোকহল্লগনি। 2014গী মমাংদা তুথপেস্ত, সাপোন অমসুং থাওগুম্বা নুমিৎ খুদিংগী তঙাই ফদবা পোৎলমশিং ফাওবা 27%গী তেক্স লৌরম্মি। ঙসিদি, 5%গী GST খক্তা লৌরি। কংগ্রেসকী লৈঙাক মতমদা, হিদাক-লাংথকশিং, তেস্ত কিৎশিং অমসুং ইন্সুরেন্স পোলিসীদা তেক্স চাউনা লৌরমখি। মসিনা মরম ওইদুনা হেল্থকেয়র অসি শেল য়াম্না চঙই অমসুং ইন্সুরেন্স অসি অয়াম্বা ইমুংশিংনা ফংবা ঙমদে। অদুবু ঙসিদি, হায়রিবা পুম্নমক অসি শেল চংদনা ফংহল্লে। GSTগী অনৌবা রেৎশিং অসিনা কেন্সরগুম্বা শাথীবা লায়নাশিংগী হিদাক-লাংথকশিংসু মমল হন্থহল্লগনি। সেপ্তেম্বর 22গী মতুংদা, সিমেন্ত অমসুং কন্সত্রক্সন মেতরিএলশিংসু মমল হন্থরগনি। স্কুতর অমসুং কার পুথোক্লিবা কম্পনী কয়ানা মমল হন্থহনখ্রে। ঐহাক্না থাজবা থম্লি মদুদি কুমহৈগী মতম অসি লৈবাক শীনবা থুংনা হেন্না নুংঙাইনা ওইরগনি।
মরুপশিং,
রিফোর্মশিংগী শরুক অমা ওইনা, হোতেল অয়াম্বদা GST অসি 5%দা খক্তা হন্থহনখ্রে। মফম কয়াদা চৎপা, হোতেলদা লৈবা অমসুং মপান্দা চাক চাবা অসি মমল হন্থরক্কনি। মসিনা ঐখোয়গী লৈবাক অসিগী তোঙান-তোঙানবা মফমশিংদা চৎথোক-চৎশিন তৌবা, এক্সপ্লোর তৌবা অমসুং নুংঙাইবা থিবদা মীওই কয়াদা মতেং পাংগনি। অৱাং-নোংপোক লমদমগুম্বা তুরিস্তকী মফমশিংনা মসিদগী অখন্ননা কান্নবা ফংগনি।
মরুপশিং,
ঐখোয়গী শেন্মিৎলোন অসি 2025-26কী অহানবা ক্বার্তরদা চাদা 7.8গী গ্রোথ অমা উবা ফংলে। মসিনা তাক্লিবদি, ভারত অসি মালেমদা খ্বাইদগী খোংজেল য়াংনা চাউখৎলক্লিবা অচৌবা ইকনোমী অমনি। মেক ইন ইন্দিয়া অমসুং এক্সপোর্তকীসু ঐখোয়না চাউখৎলকপা উবা ফংলি। ওপরেসন সিন্দুরগী মতমদা, ঐখোয়গী লান্মীশিংনা তেরোরিজম স্পোন্সর তৌবশিংদা করম্না পরা তম্বীবগে হায়বদু ময়াম পুম্নমক্না উখি। লৈবাক শীনবা থুংনা ঐখোয়গী আর্মদ ফোর্সেসকী মতাংদা চাউথোকচবা পোক্লি। ওপরেসন অসিদা, মেদ-ইন-ইন্দিয়াগী খুৎলাইশিংনা ঐখোয়গী লৈবাক্কী ঙাক-শেনবদা মরুওইবা থৌদাং অমা লৌখি। ঐখোয়গী ইকনোমী অমসুং মেন্যুফেকচরিং সেক্তরগী গ্রোথ অসি ঐখোয়গী নেস্নেল সেক্যুরিতীগীদমক য়াম্না মরু ওই।
মরুপশিং,
ঐখোয়গী সরকারনা নাগরিক খুদিংমক্কী, ইমুং খুদিংমক্কী অমসুং লমদম খুদিংমক্কী য়াইফনবা হোৎনরি। মীয়াম্বু শক্তি লৈহনবনা চাউখৎলবা ভারত অমা শেমগনি। খোঙচৎ অসিদা মিজোরমগী মীয়ামনা য়াম্না মরু ওইবা থৌদাং অমা লৌগনি হায়না ঐনা থাজবা থম্লি। ঐহাক্না অমুক্কা হন্না ময়াম পুম্নমকপু থম্মোয় শেংনা নুংঙাইবা ফোংদোকচরি অমসুং ভারতকী রেলৱে মেপ্তা আইজোলবু তরাম্না ওকচরি। ঙসি, নোংগী ফীভম ফত্তবনা মরম ওইদুনা ঐহাক্না আইজোলদা লাকপা ঙমখিদে। অদুবু ঐহাক্না থাজৈ মদুদি ঐখোয়না অথুবা মতমদা উনগনি। থাগৎচরি!
