প্রধান মন্ত্রী শ্রী নরেন্দ্র মোদীনা ঙসি দাদরা অমসুং নগর হভেলি অমদি দমন অমসুং দিয়ুগী য়ুনিয়ন তেরিতোরীগী সিলভাস্সাদা লুপা করোর 2580 হেনবগী তোঙান তোঙানবা চাউখৎ-থৌরাংগী থৌশিল কয়া হৌদোকখ্রে। থৌরম অদুগী মমাংদা মহাক্না সিলভাস্সাদা নমো হোস্পিতালসু শঙ্গাখি। মীয়াম তিনখিবা অদুদা ৱা ঙাংলদুনা, প্রধান মন্ত্রীনা দাদরা অমসুং নগর হভেলি অমদি দমন অমসুং দিয়ুগী য়ুনিয়ন তেরিতোরীগী কত্থোক্লবা শিন্মীশিংদা লমদম অসিগা মরী থম্নবা অমসুং থবক তৌমিন্ননবা খুদোংচাবা পীবগীদমক থাগৎপা ফোংদোকখি। মহাক্না মীয়ামগা লোয়ননা লৈনরিবা অফবা অমসুং মতম শাংনা লৈনরক্লবা মরী অদুগীদমক থাগৎপা ফোংদোক্লদুনা মহাক্না লমদম অসিগা লোয়ননা মহাক্কী মরী অসি চহি কয়াগী মমাংদগী লৈরকপনি হায়না হায়খি। মহাক্না 2014দা মহাক্কী সরকারনা লৈঙাক পায়রকপদগী লমদম অসিনা খুমাং চাউশিন্দুনা দাদরা অমসুং নগর হাভেলি, দমন অমসুং দিয়ুগী পোতেন্সিএলবু মোদর্ন অমসুং প্রোগ্রেসিব আইদেন্তিতী অমদা ওন্থোকপগী মতাংদা পনখি।
“সিলভাস্সগী মহৌশাগী ফজবা অমসুং মসিগী মীয়ামগী নুংশিবা, লোয়ননা দাদরা অমসুং নগর হাভেলী, দমন অমসুং দিয়ু, নখোয় পুম্নমক্না ঐহাক্কী নখোয়গা লৈনরিবা মরী অসি মতম কয়াগী মমাংদগী লৈরক্লবগে হায়বা খঙই। চহি কয়াদগী লৈরক্লবা মরী অসি, মফম অসিদা লাকপা মতমদা ঐহাক্না ফংলিবা নুংঙাইবা অসি, অদোম অমসুং ঐহাক খক্তনা খঙই," হায়না শ্রী মোদীনা মখা তাখি। প্রধান মন্ত্রীনা হায়খি মদুদি মহাক্না অহানবা ওইনা লাকখিবা মতমদা, লমদম অসি য়াম্না খেন্নরম্মি, অপীকপা সমুদ্র মপালগী লমদম অমদগী করি তৌরক্কনি হায়না মীয়াম্না ৱাহং হংখি। অদুম ওইনমক, মফম অসিগী মীয়াম অমসুং মখোয়গী তৌবা ঙম্বশিংদা মহাক্না মতম পুম্নমক্তা থাজবা থম্লি। প্রধান মন্ত্রীনা পনখি মদুদি মহাক্কী সরকারগী লুচিং মখাদা, থাজবা অসি চাউখৎপা অমা ওইরক্লি, সিলভাস্সানা মীয়াম পুম্নমক্কীদমক অনৌবা খুদোংচাবশিংগা লোয়ননা চাউখৎলক্লিবা কোস্মোপোলিতেন শহর অমা ওইরক্লি।
শ্রী মোদীনা সিঙ্গাপুরগী খুদমসু পীখি, মদুদি ঙল্লিঙৈ মতমদা অপীকপা ঙা ফাবগী খুঙ্গং অমা ওইরম্মি। মহাক্না অকনবা ৱাফম থমখি মদুদি সিঙ্গাপুরগী অহোংবা অসি মাগী মীয়ামগী মপাঙ্গল কনবা ৱারেপকী মতুং ইন্না লাকপনি। প্রধান মন্ত্রীনা য়ুনিয়ন তেরিতোরীগী প্রজাশিংবু চাউখৎ-থৌরাংগীদমক্তা মান্নবা ৱারেপ লৌনবা পুক্নিং থৌগৎখি, মহাক্না মখোয়দা মতেং পাংগনি হায়না থাজবা পীখি, অদুবু মখোয়নসু মাংলোমদা চংশিন্নবা থৌরাং লৌগদবনি।
“দাদরা অমসুং নগর হভেলি, দমন অমসুং দিয়ু অসি য়ুনিয়ন তেরিতোরী অমা খক্তা নত্তে, মসি চাউথোকচনীংঙাই ওইবা অমসুং হেরিতেজগী সোর্স অমনি। মসিনা মরম ওইদুনা ঐখোয়না লমদম অসিবু মপুং ফানা চাউখৎপগীদমক খঙনরবা মোদেল স্তেৎ অমদা ওন্থোক্লি," হায়না শ্রী মোদীনা ফোংদোকখি। প্রধান মন্ত্রীনা হায়-তেক ইনফ্রাস্ত্রকচর, মোদর্ন হেল্থকেয়র সর্ভিসশিং, মালেমগী থাক্কী এজুকেসন ইন্সতিত্যুৎশিং, তুরিজম, ব্লু ইকনোমী, ইন্দস্ত্রীএল প্রোগ্রেস, নহারোলশিংগীদমক অনৌবা খুদোংচাবশিং, অমসুং চাউখৎ থৌরাংদা নুপীশিংগী শরুক য়াবগীদমক লমদম অসি শকখঙনবা মহাক্না পান্দম থম্লি হায়না ফোংদোকখি।
শ্রী মোদীনা হায়খি মদুদি শ্রী প্রফুল পতেলগী লুচিং মখাদা অমসুং কেন্দ্র সরকারগী মতেংগা লোয়ননা লমদম অসিনা হায়রিবা পান্দমশিং অসি ফংনবা খোঙজেল য়াংনা চংশিল্লি। হৌখিবা চহি 10 অসিদা, চাউখৎ-থৌরাংগী লমদা চাউনা খুমাং চাউশিল্লক্লি। লমদম অসি হৌজিক চাউখৎ-থৌরাংগী মতাংদা তোঙানবা মশক অমা লৈদুনা নেস্নেল মেপতা থোরক্লি। ৱান নেসন ৱান রেসন কার্দ, জলজীবন মিসন, ভারতনেত, পি.এম. জনধন য়োজনা, পি.এম. জিবন জ্যোতি বিমা, অমসুং পি.এম. সুরক্ষা বিমাগুম্বা সরকারগী তোঙান তোঙানবা স্কিমশিংনা মীয়ামদা, মরুওইনা শোত্থরবা অমসুং ত্রাইবেল কম্ম্যুনিতীশিংদা কান্নবা কয়া ফংহনখ্রে।
প্রধান মন্ত্রীনা হায়খি মদুদি মথংগী পান্দমদি স্মার্ত সিতীজ মিসন, সমগ্র শিক্ষা অমসুং পি.এম. মুদ্রা য়োজনাগুম্বা থৌরাংশিংদা 100% সেচুরেসন ফংহনবা হায়বসিনি। মহাক্না হায়খি মদুদি অহানবা ওইনা, সরকারনা মীয়ামদা য়াইফ-থৌরাংগী স্কিমশিং অসিগা লোয়ননা হকথেংননা য়ৌশিন্দুনা, প্রজা খুদিংমক্না সরকারগী থৌরাংশিংগী কান্নবা ফংহল্লি।
প্রধান মন্ত্রীনা দাদরা অমসুং নগর হভেলি, দমন অমসুং দিয়ুদা ইনফ্রাস্ত্রকচর, এজুকেসন, থবক পীবা অমসুং ইন্দস্ত্রীএল দিবেলপমেন্তকী লমদা অহোংবা লাকপগী মতাংদা পনখি। মহাক্না হায়খি মদুদি মমাংদা, লমদম অসিগী নহারোলশিংনা অৱাংবা থাক্কী মহৈ তম্বগীদমক মপান্দা চৎলম্মি, অদুবু ঙসিদি লমদম অসিদা নেস্নেল লেবেলগী ইন্সতিত্যুৎ তরুক লৈরে। মসিগী মনুংদা নমো মেদিকেল কোলেজ, গুজরাত নেস্নেল লো য়ুনিভর্সিতী, IIIT দিয়ু, নেস্নেল ইন্সতিত্যুৎ ওফ ফেসন তেক্নোলোজী, ইন্সতিত্যুৎ ওফ হোতেল মেনেজমেন্ত অমসুং কেতরিং তেক্নোলোজী, অমসুং দমন ইঞ্জিনীয়রিং কোলেজ য়াওরি। ইন্সতিত্যুসনশিং অসিনা সিলভাস্সা অমসুং লমদম অসিবু অনৌবা এজুকেসন হব অমা ওইহল্লে। “নহাশিংবু হেন্না কান্নহন্নবা, ইন্সতিত্যুৎশিং অসিদা মখোয়গীদমক সিৎশিং রিজর্ব তৌখ্রে। মমাংদা, মফম অসিদা হিন্দী, ইংলিস, গুজরাতি অমসুং মরাথীগী তোঙান তোঙানবা মিদিয়ম মরিদা এজুকেসন পীরিবা অসি উবদা ঐহাক নুংঙাইবা ফাওখি। হৌজিক্তি, ঐহাক্না হায়বদা চাউথোকচবা ফাওই মদুদি মফম অসিগী প্রাইমরী অমসুং জুনিয়র স্কুলশিংদা লৈরিবা অঙাংশিংনা স্মার্ত ক্লাসরুমশিংদা মহৈ তম্বা ফংলি," হায়না শ্রী মোদীনা মখা তাখি।
শ্রী মোদীনা হায়খি মদুদি হৌখিবা চহিশিংদা, লমদম অসিদা মোদর্ন হেল্থকেয়র সর্ভিসশিং অসি য়াম্না চাউনা পাকথোক চাউথোক্লে। “2023দা, ঐহাক্না মফম অসিদা নমো মেদিকেল কোলেজ শঙ্গাবগী খুদোংচাবা ফংখি। মসিগা লোয়ননা, ফমুং 450গী কেপাসিতি লৈবা অনৌবা হোস্পিতাল অমা হাপচিনখ্রে, মসিসু ঙসি শঙ্গাখ্রে। সিলভাস্সাদা লৈরিবা হেল্থকেয়র ফেসিলিতীশিং অসিনা লমদম অসিদা লৈরিবা ত্রাইবেল কম্ম্যুনিতীদা চাউনা কান্নবা ফংহল্লগনি," হায়না শ্রী মোদীনা ফোংদোকখি।
প্রধান মন্ত্রীনা ঙসিগী হেল্থকেয়র প্রোজেক্তশিং অসিগী মরুওইবা অদু পনখি, মরমদি মসি জন ঔশাধি দিবসকা পুন্না তামিন্নরি। জন ঔশাধিনা মমল হোংবা লাইয়েং ফংহল্লি মহাক্না অকনবা ৱাফম থমখি। খোঙথাং অসিগী মখাদা সরকারনা ক্বালিতী লৈবা হোস্পিতালশিং, আয়ুশ্মান ভারতকী মখাদা লেম্না লায়েংনবা অমসুং জন ঔশাধি সেন্তরশিংগী খুত্থাংদা মমল হোংবা হিদাকশিং ফংহল্লি। লৈবাক শিনবা থুংনা জন ঔশাধি সেন্তর 15,000 হেনবনা চাদা 80 ফাওবা হন্থবা মমলদা হিদাক-লাংথকশিং পীরি। জন ঔশাধি সেন্তর 40 রোম্না দাদরা অমসুং নগর হভেলি, দমন অমসুং দিয়ুগী মীয়ামদা কান্নবা পীরি। সরকারনা লৈবাক শীনবা থুংনা জন ঔশাধি সেন্তর 25,000 হাংদোক্নবা পান্দম থম্লি। “মসিগী খোঙথাং অসি হৌদোকখিবদগী লুপা করোর 6,500গী মমল য়াম্লবা হিদাক-লাংথকশিং মথৌ তারিবা মীওইশিংদা ফংহনখ্রে। মসিনা লায়রবশিং অমসুং মিদল ক্লাসকী মীওইশিংগীদমক লুপা করোর 30,000 কনবা ঙমখ্রে। মসিগী খোঙথাং অসিনা অরুবা লায়না কয়াগী লাইয়েং অসি হেন্না মমল হোংনা ফংহল্লে। মসিনা সরকারনা মীচম প্রজাগী মথৌ তাবশিং অদুগী মতাংদা সেন্সিতিভিতী ওই উৎলি," হায়না শ্রী মোদীনা ফোংদোকখি।
প্রধান মন্ত্রীনা লাইফস্তাইল দিজিজশিং, মরুওইনা হকশেলদা অচৌবা খুদোংথীবা অমা ওইরক্লিবা ওবেসিতীগী মতাংদা হেনগৎলক্লিবা নুংনাংবগী মতাংদা পনখি। মহাক্না হৌজিক্কী রিপোর্ত অমদা, 2050 ফাওবদা ভারত মচা মিলিয়ন 440 হেনবনা লায়না অসি নাগনি হায়না মাংজৌননা পানখিবা অদু পনখি। শ্রী মোদীনা হায়খি, "মসিগী অকিবা পোকহল্লিবা মশীং অসিনা তাক্লি মদুদি মীওই অহুমগী মনুংদা অমনা লায়না অসিনা মরম ওইদুনা হকশেলগী ওইবা অৱাবা কয়া মায়োক্নরকপা য়াই, মসিনা পুন্সিদা খুদোংথীবা ওইরকপা য়াই।"
মসিগী মায়োক্তা লান্থেংননবা, প্রধান মন্ত্রীনা মীপুম খুদিংমক্তা ওবেসিতী হন্থহন্নবা প্রোএক্তিব ওইবা খোঙথাংশিং লৌখৎনবা তকশিনখি। মহাক্না থা খুদিংগী অচাথাও শীজিন্নবা চাদা 10 হন্থহনবগী মরুওইবা অদু পনখি। মহাক্না মীপুম খুদিংমক্তা মখোয়গী নোংমগী চাক থোংবদা চাদা 10 হন্থনা অচাথাও শীজিন্ননবা অচেৎপা ৱাফম থমখি। মহাক্না হকচাং ফনা হিংনবগী মওং অমা লেংদনা থম্নবা অমসুং লায়না অসিদগী ঙাকথোক্নবগীদমক নোংমদা কিলোমীতর খরা চৎপা অসিনচিংবা চাং নাইনা হকচাং শাজেল তৌনবা পুক্নিং থৌগৎখি। “ভারতনা চাউখৎলবা লৈবাক অমা ওইবগী মঙলান অদু ফংবা ঙম্নবা হোৎনরি। হকচাং ফনা লৈবা লৈবাক অমখক্তনা অসিগুম্বা পান্দম অসি ফংবা ঙম্মি”, হায়না শ্রী মোদীনা অকনবা ৱাফম থমখি।
শ্রী মোদীনা হৌখিবা চহি তরা অসিদা দাদরা অমসুং নগর হভেলি, দমন অমসুং দিয়ুদা ইন্দস্ত্রীএলগী লমদা খোঙজেল য়াংনা চাউখৎলকপগী মতাংদা পনখি। হন্দক্কী বজেৎতা মিসন মেনুফেকচরিং ইনিসিএতিব হৌদোকখিবগা লোয়ননা, লমদম অসিনা চাউনা কান্নবা ফংগনি। অনৌবা ইন্দস্ত্রী চা কয়া হৌখ্রে, অমসুং হৌজিক লৈরিবা ইন্দস্ত্রী কয়ামরুমসু পাকথোক চাউথোকহনখ্রে, মসিনা লুপা করোর লিশিং কয়াগী ইনভেস্তমেন্ত লাকহনখ্রে। হায়রিবা ইন্দস্ত্রীশিং অসিনা মরু ওইনা ত্রাইবেল কম্ম্যুনিতী, নুপীশিং অমসুং শোত্থরবা কাংলুপশিংগীদমক অচৌবা থবক ফংহন্নবা খুদোংচাবা কয়া পীরি। শ্রী মোদীনা হায়খি, "গির আদর্শ জীভিকা য়োজনা অসি SC, ST, OBC অমসুং নুপীশিংদা শক্তি পীনবা থবক পায়খৎলি, অদুগা অপীকপা দাইরী ফার্মশিং লিংখৎতুনা সেল্ফ-ইমপ্লোইমেন্তকী অনৌবা খুদোংচাবশিং ফংহল্লি," হায়না শ্রী মোদীনা মখা তাখি।
প্রধান মন্ত্রীনা হায়খি মদুদি তুরিজম অসিসু থবক পীবগী মরুওইবা সোর্স অমা ওইরক্লি। লমদমসিগী সমুদ্র মপালশিং অমসুং ইনাক খুল্লবা হেরিতেজনা ভারত অমসুং মপান্দগী লাকপা তুরিস্তশিংবু পুক্নিং চিংশিল্লি। রাম সেতু, নমো পাথ, দমনদা লৈরিবা তেন্ত সিতী, অমসুং মমিং চৎলবা নাইৎ মার্কেত অসিগুম্বা চাউখৎ থৌরাংশিংনা লমদম অসিগী অপীল হেনগৎহল্লি। শ্রী মোদীনা হায়খি মদুদি অচৌবা বর্দ সেঙ্কচুরী অমা লিংখৎলে, অমসুং দুধানিদা ইকো-রিজোর্ৎ অমগী থৌরাংসু পায়খৎলি। দিয়ুদা কোস্তেল প্রোমনেদ অমসুং সমুদ্র মপাল শেমগৎপগী থবক পায়খৎলি। 2024দা পাংথোক্কদৌরিবা দিয়ু বিচ গেমসনা সমুদ্র মপালদা শান্নবা শান্ন-খোৎনবশিংদা পুক্নিং থৌগৎখি অমসুং ব্লু ফ্লেগ সর্তিফিকেসন ফংখিবনা দিয়ুদা লৈবা ঘোগলা বিচ অসি মীয়াম্না পাম্নবা তুরিস্ত দেস্তিনেসন অমা ওইহনখি। মসিগী মথক্তা, দিয়ুদা কেবল কার প্রোজেক্ত অমা শেমগৎলি, মসিনা অরাবিয়ন সীগী অঙকপা ফংনা ফজরবা শক্তম অমা উবা ফংহল্লগনি। মসিনা লমদম অসিবু ভারতকী মরুওইবা তুরিস্ত দেস্তিনেসন অমা ওইহল্লগনি," হায়না শ্রী মোদীনা মখা তাখি।
দাদরা অমসুং নগর হভেলি, দমন অমসুং দিয়ুদা কন্নেক্তিবিতী ফগৎলকপগী মতাংদা পল্লদুনা প্রধান মন্ত্রী শ্রী নরেন্দ্র মোদীনা হায়খি মদুদি দাদরাগী মনাক্তা বুলেৎ ত্রেন স্তেসন অমা শেমগৎলি, অমসুং মুম্বাই-দিল্লি এক্সপ্রেসৱেনা সিলভাস্সা ফাওদুনা চৎলি। হৌখিবা চহি খরা অসিদা, কিলোমিতর কয়াগী অনৌবা লম্বীশিং শেমগৎখ্রে। হৌজিক্তি কিলোমিতর 500গী মথক্তা লম্বী শেমগৎপগী থবক পায়খৎলি, মসিদা লুপা করোর লিশিং কয়াগী শেনফম থাদরি। “লমদম অসিনা উরান স্কিমদগীসু কান্নবা ফংলি অমসুং লোকেল এয়রপোর্ত অসি কন্নেক্তিবিতী হেনগৎহন্নবা অপগ্রেদ তৌরি। সরকার অসিনা লমদম অসিদা কম্প্রিহেন্সিব দিবেলপমেন্ত লৈহন্নবা অমসুং ইনফ্রাস্ত্রকচর ফগৎহন্নবা হোৎনরি," হায়না শ্রী মোদীনা মখা তাখি।
প্রধান মন্ত্রীনা দাদরা অমসুং নগর হভেলি, দমন অমসুং দিয়ু অসি চাউখৎপা, অফবা লৈঙাক অমসুং পুন্সি মহিং লায়থোকহন্নবগী মোদেল অমা ওইরকপদা নুংঙাইবা ফোংদোকখি। মহাক্না হায়খি মদুদি মমাংদা, মীয়াম্না মখোয়গী সমস্যাশিং কোকহন্নবগীদমক সরকারগী ওফিসশিংদা হন্না হন্না চৎলম্মি, অদুবু হৌজিক্তি সরকারগা মরী লৈনবা থবক অয়াম্বদি মখোয়গী মোবাইল ফোনশিংদা ক্লিক অমখক্তনা লোইশিনবা ঙম্লে। অনৌবা থৌওং অসিনা দিকেদ কয়াগী মমাংদগী মীৎয়েং চংদনা লৈরকখিবা ত্রাইবেলগী লমশিং অসিদা চাউনা কান্নবা ফংহল্লে। খুঙ্গংশিংদা অখন্নবা কেম্পশিং লিংখৎতুনা মীয়ামগী সমস্যাশিং তাদুনা মফম অদুদা লোইশিন্নবা হোৎনরি। প্রধান মন্ত্রীনা শ্রী প্রফুল পতেল অমসুং মহাক্কী তীমবু মখোয়গী হোৎনরিবশিং অসিগীদমক থাগৎপা ফোংদোকখি অমসুং লমদম অসিগী চাউখৎ থৌরাংগী মায়কৈদা সরকারনা মখা তানা থবক তৌগনি হায়না মীয়ামদা থাজবা পীখি। “ঙসি মায় পাক্না হৌদোকখিবা চাউখৎ-থৌরাংগী প্রোজেক্তশিংগীদমক ঐনা দাদরা অমসুং নগর হভেলি, দমন অমসুং দিয়ুগী মীয়ামদা নুংঙাইবা ফোংদোকচরি। ঐহাক্না য়ুনিয়ন তেরিতোরী অসিগী প্রজাশিংনা তরাম্না ওকখিবা, উৎখিবা নুংশিবা, অমসুং ইকায় খুম্নবা অসিগীদমক থাগৎপা ফোংদোকচরি," হায়না ফোংদোক্লদুনা প্রধান মন্ত্রীনা ৱা ঙাংবা লোইশিনখি।
বেকগ্রাউন্দ
লৈবাক অসিগী মফম খুদিংমক্তা হেল্থকেয়র ফেসিলিতীশিং হেনগৎহনবা অসি প্রধান মন্ত্রীগী মরুওইবা মীৎয়েং অমনি। মসিগী মতুং ইন্না মহাক্না সিলভাস্সাদা নমো হোস্পিতাল (ফেস I) শঙ্গাখ্রে। বেদ 450 লৈবা হায়রিবা হোস্পিতাল অসি লুপা করোর 460 হেন্না চংদুনা শাখি, মসিনা য়ুনিয়ন তেরিতোরী অসিদা হেল্থকেয়র সর্ভিসশিং মপাঙ্গল কনখৎহল্লগনি। মসিনা লমদম অসিগী মীয়াম, মরু ওইনা ত্রাইবেল কম্ম্যুনিতীশিংদা স্তেৎ-ওফ-দি-আর্ত মেদিকেল কেয়র ফংহল্লগনি।
প্রধান মন্ত্রীনা সিলভাস্সাদা লুপা করোর 2580 হেনবগী য়ু.তি. অসিগী চাউখৎ-থৌরাংগী প্রোজেক্ত কয়া শঙ্গাখ্রে অমসুং উরেপ উয়ুংসু তমখ্রে। মসিগী মনুংদা তোঙান তোঙানবা খুঙ্গংগী লম্বীশিং অমসুং অতোপ্পা লম্বীগী ইনফ্রাস্ত্রকচর, স্কুলশিং, হেল্থ অমসুং ৱেলনেস সেন্তরশিং, পঞ্চায়ত অমসুং এদমিনিস্ত্রেতিব বিল্দিংশিং, অঙ্গনৱাদি সেন্তরশিং, ঈশিং সপ্লাই অমসুং সিৱেজ ইনফ্রাস্ত্রকচর য়াওরি। প্রোজেক্তশিং অসিনা কন্নেক্তিবিতী ফগৎহনবা, ইন্দস্ত্রীগী গ্রোথ প্রমোৎ তৌবা, তুরিজম পুক্নিং থৌগৎপা, থবক ফংহন্নবা খুদোংচাবশিং শেমগৎপা অমসুং লমদম অসিদা মীয়ামগী য়াইফনবা থৌরাংশিং হেনগৎহন্নবা পান্দম থম্লি।
গির আদর্শ অজীবিকা য়োজনাগী পান্দমদি লমদম অসিদা লৈরিবা সেদ্যুল্দ কাস্তশিং (SC), সেদ্যুল্দ ত্রাইবশিং (ST), অদর বেকৱার্দ ক্লাসশিং (OBC), মাইনোরিতী অমসুং দিব্যাঙ্গনগী নুপীশিংদা অপীকপা দাইরী ফার্মশিং লিংখৎতুনা মখোয়গী পুন্সিদা খুন্নাইগী অমসুং শেন্মিৎলোনগী অহোংবশিং পুরকপগা লোয়ননা মখোয়গী শেন্মিৎলোনগী মপাঙ্গল কনখৎহনবনি। সিলভান দিদি স্কিম অসি নুপী স্ত্রীৎ ভেন্দরশিংবু পি.এম. স্বানিধি স্কিমদগী কো-ফন্দিং তৌদুনা মখোয়দা এস্থেতিক ওইবা মওংদা দিজাইন তৌরবা কার্তশিং পীনবা খোঙথাং অমনি।
ৱা ঙাংখিবগী মপুংফাবা ৱারোল পানবা মসিদা নম্বীয়ু
दादरा और नगर हवेली, दमण और दीव… ये प्रदेश हमारा गर्व है… हमारी विरासत है। pic.twitter.com/CN1ZjijEOH
— PMO India (@PMOIndia) March 7, 2025
दादरा और नगर हवेली, दमण और दीव... ये कई योजनाओं में सैचुरेशन की स्थिति में पहुंच गए हैं: PM @narendramodi pic.twitter.com/xRjJqsmScw
— PMO India (@PMOIndia) March 7, 2025
जनऔषधि यानी- सस्ते इलाज की गारंटी!
— PMO India (@PMOIndia) March 7, 2025
जनऔषधि का मंत्र है- दाम कम, दवाई में दम! pic.twitter.com/4GscUrLDb9
हम सभी को अपने खाने के तेल में 10% की कटौती करनी चाहिए।
— PMO India (@PMOIndia) March 7, 2025
हमें हर महीने 10% कम तेल में काम चलाने का प्रयास करना है।
मोटापा कम करने की दिशा में ये एक बहुत बड़ा कदम होगा: PM @narendramodi pic.twitter.com/61lgZ4XAFc
