প্রধান মন্ত্রী, শ্রী নরেন্দ্র মোদীনা ঙসি ভিদিও কনফরেন্সকী থোংদা উত্তর প্রদেশকী বহরাইচদা লৈবা চিত্তৌরা লেক্তা মহারাজা সুহেলদেব মেমোরিএল অমসুং চাউখৎ-থৌরাংগী থবক্কী উরেপ উয়ুং তমখ্রে। প্রধান মন্ত্রীনা মহারাজা সুহেলদেবকী মমিং লৌদুনা থোনবা মেদিকেল কোলেজ বিল্দিংসু শঙ্গাখ্রে। থৌরম অদুদা উত্তর প্রদেশকী গভর্নর অমসুং মুখ্য মন্ত্রী শরুক য়াখ্রে।
থৌরম অসুদা ৱা ঙাংলদুনা প্রধান মন্ত্রীনা হায় ভারতকী ইতিহাস অসি কোলোনিএলগী শক্তি পাইবশিংনা নত্ত্রগা কোলোনিএলগী ৱাখল্লোন চেনবশিংনা ইরম্বা ইতিহাস অদু খক্তা নত্তে। ভারতকী ইতিহাস অসিদি মীচম প্রজাশিংনা মখোয়গী ফুরুপকী ওইবা ৱারীদা য়োকখৎতুনা থম্বা অমদি মখোয়গী চারোন-শুরোন্না মখা চত্থরিবা অদুনি। মহাক্না ভারতকীদমক্তা অমসুং ভারতকী ওইবা ৱাখল্লোন চেনবা অসিগীদমক থৱায় থাখ্রবা মীওইশিংদা মতিক চাবা ইকাই খুম্নবা অদু পীবিদে। অসিগুম্বা ভারতকী ইতিশা শেম্লম্বশিংদা ভারতকী ইতিহাস ইরিবশিংনা চত্থরম্বা মওং মরিল তাদবা অমদি অরানবা অসি ঐখোয়না নীংখা তমখিবা চহি ৭৫শুরকপা অসিদা হৌজিক্তি চুমথোক্লে অমসুং মখোয়বু নীংশিংবা হায়বা অসি হেন্না মরু ওইরক্লি হায়না প্রধান মন্ত্রীনা ফোঙদোকখ্রে।
প্রধান মন্ত্রীনা নেতাজি সুভাস চন্দ্র বোসনা লালকিলাদগী অন্দমান নিকোবর ফাওবা, সরদার পতেলনা স্তেচ্যু ওফ য়ুনিতীদা অমসুং বাবা সাহেব অম্বেদকরনা পাঞ্চ তীর্থগী খুত্থাংদা শরুক তমখিবশিং অদুবু পাল্লন তৌবগী খুদমশিং পীখ্রে। “তোঙান তোঙানবা মরমশিংদগী মশক খঙনখিদ্রবা মীওই মশিং কয়া লৈ। ঐখোয়না চৌরি চৌরাদা থৌনা ফাবশিংদা করি থোকখি হায়বা কাউবা ঙম্বরা?” হায়না প্রধান মন্ত্রীনা হংখ্রে।
প্রধান মন্ত্রীনা হায় মহারাজা সুহেলদেবনা ভারতকী ওইবা ৱাখল্লোন অসি ঙাক শেন্নবা তৌরমখিবা অদুসু চপ মান্নানাথেদুনা থমখি। তেক্সবুকশিংদা য়াওদ্রবসু অৱাধ, তরাই অমসুং পুর্ভনচলগী ফুঙ্গা ৱারীনা মীয়ামগী থম্মোইদা মহারাজা সুহেলদেববু হিংহনদুনা থমখি। প্রধান মন্ত্রীনা মহাক্না তৌরমখিবা অদু ৱাখল লৈবা অমদি চাউখৎ-থৌরাংগী খনবা লৈবাক ঙাকপা অমনি হায়না নীংশিংখ্রে। প্রধান মন্ত্রীনা মহারাজা সুহেলদেবকী মেমোরিএল অসিনা তুংদা লাক্কদবা চারোন-শুরোনদা ইথিল পীরগনি অমসুং মেদিকেল কোলেজ লিংখৎপা অমসুং হেল্থ ফেসিলিতীশিং চাউথোরকপা অসিনা এস্পিরেস্নেল দিস্ত্রিক্ত অসিদা অমদি মনাক নকপা মফমশিংদা লৈরিবা মীয়ামগী পুন্সি ফগৎহল্লগনি। প্রধান মন্ত্রীনা মহারাজা সুহেলদেবকী নীংশিং স্তাম্প অমা চহি অনিগী মাংদা ফোঙখি।
শ্রী মোদীনা মীয়ামবু বসন্ত পঞ্চমীগা ইরোইননা য়াইফ পাউজেল পীখি অমসুং মহাক্না বসন্ত অসিনা লাইচৎ অসিগী অৱাবা-নুংঙাইদবা অদু তুংঙোইনরম্লগা ভারত্তা অনৌবা আশাগী ময়োল চোংলকপা ওইরসনু হায়না ফোঙদোকখ্রে। ভারতকী লৌশিং অমসুং সাইন্স অমদি রিসর্চ অমসুং ইন্নোবেসনগী খুত্থাংদা লৈবাক শেমগৎপদা য়াওরিবা লৈবাক মচা খুদিংমক ইমা সরস্বতিনা থৌজানবিবা ওইরসনু হায়না ফোঙদোকখ্রে।
হৌখিবা চহি খরা অসিদা শাখিবা ইতিহাস, লাইনিং লাইশোনগা মরী লৈনবা মোন্যুমেন্তশিং অসিগী খ্বাইদগী চাউবা পান্দমদি তুরিজম প্রমোৎ তৌবনি। মহাক্না হায় উত্তর প্রদেশ অসি তুরিজম অমসুং পিলগ্রিমেজ অনিমক য়াম্না চাউখৎলি অমসুং মসিগী খুদোংচাবশিং চাউনা লৈ। উত্তর প্রদেশধা তুরিজম চাউখৎহন্নবা অয়োধ্যা, চিত্রাকোৎ, মথুরা, ব্রিন্দাবন, গোভর্ধন, কুশিনগর, শ্রাবস্তি অসিনচিংবদা লোর্দ রামা, শ্রী কৃষ্ণ অমসুং বুদ্ধাগী পুন্সিগা মরী লৈননা রামায়না সর্কিৎশিং, স্পিরিচ্যুএল সর্কিৎশিং, বুদ্ধিস্ত সর্কিৎশিং শেমগৎলি। মহাক্না হায় হোৎনরিবশিং অসিগী ফলশিং ফংবা হোরক্লে অমসুং হৌজিক উত্তর প্রদেশনা অতোপ্পা রাজ্যশিংদগী লমকোইবা মশিং খ্বাইদগী য়াম্না লাকপা ওইরি। য়ু.পি. অসি লৈবাক অসিদা মীরৈবাক্কী লমকোইবা খ্বাইদগী লাকপা মকোক থংবা রাজ্য অহুমদা চল্লি।
প্রধান মন্ত্রীনা হায় উত্তর প্রদেশতা লমকোইবশিংগী মথৌ তাবা ফেসিলিতীশিং অদুগা লোইননা মোদর্ন কন্নেক্তিবিতীসু ফগৎহন্নবা হোৎনরি। মহাক্না হায় তুংলমচৎতা দোমেস্তিক অমসুং ফোরেন অনিমক্কীওইনা অয়োধ্যা এয়রপোর্ত অমসুং কুশিনগর ইন্তরনেস্নেল এয়রোর্ত অসি লমকোইবশিংদা য়াম্না কান্নবা ওইরগনি। উত্তর প্রদেশদা অপীকপা অমসুং অচৌবা এয়রপোর্ত মশিং কয়া শাগৎপগী থবক চত্থরি মসিদা অয়াম্বদি পর্ভনচলদা ওইরি।
প্রধান মন্ত্রীনা হায় পুর্ভনচল এক্সপ্রেসৱে, বুন্দেলখান্দ এক্সপ্রেসৱে, গঙ্গা এক্সপ্রেসৱে, গোরাখপুর লিঙ্ক এক্সপ্রেসৱে, বাল্লিয়া লিঙ্ক এক্সপ্রেসৱে অসিগুম্বা মতমগা চুনবা অমসুং অচৌবা লম্বীশিং উত্তর প্রদেশ শিনবা থুংনা শারি অমসুং মসি মোদর্ন য়ু.পি.গী মোদর্ন ইনফ্রাস্ত্রকচরগী অহৌবনি। মহাক্না হায় উত্তর প্রদেশ অসি অচৌবা দেদিকেতেদ ফ্রৈৎ কোরোদোর অনিগী জঙ্কসন ওইরি। উত্তর প্রদেশতা মোদর্ন ইনফ্রাস্ত্রকচর শেমগৎপা অসিনা ইনবেস্তরশিংনা উত্তর প্রদেশতা ইন্দস্ত্রীশিং লিংখৎহন্নবা থৌগৎলি। মসিগা লোইননা ইন্দস্ত্রীশিং অমসুং নহারোল অনিমক্কী ইনা হেন্নবা ফবা খুদোংচাবশিং পীরি।
প্রধান মন্ত্রীনা উত্তর প্রদেশ সরকারনা কোরোনা লাকশিনবা অসিদা থাগৎপা ফোঙদোকখ্রে। মহাক্না রাজ্য সরকার অসিনা ময়ুমদা হল্লকখিবা শিন্মীশিংদা থবক পীখিবা অদুগীসু থাগৎখি। মহাক্না হায়, হৌখিবা চহি ৩-৪ অসিদা য়ু.পি.না হোৎনখিবশিং অদুনা কোরোনাগী লাঞ্জংদা মতেং য়াম্না ওইখ্রে। রাজ্য সরকারনা হোৎনবদগী পুর্ভনচলদা মেনিংজাইতিসকী সমস্যা অসি চাউনা হন্থহনবা ঙমখ্রে। প্রধান মন্ত্রীনা হায় হৌখিবা চহি তরুক অসিদা উত্তর প্রদেশকী মেদিকেল কোলেজশিংগী মশিং অসি ১৪দগী ২৪ শুহনবা ঙমখ্রে। লোইননা এম্সকী থবক গোরাখপুর অমসুং বরেলীদা চত্থরি। মসিগী মথক্তা অনৌবা মেদিকেল কোলেজ ২২ শারি। বারানসীদা লৈরিবা মোদর্ন কেন্সর হোস্পিতালশিংগী খুদোংচাবা অদি পুর্ভনচলদসু ফংহল্লি। য়ু.পি.গী জল জীবন মিসন অসিনা য়ুমথোং খুদিংদা ঈশিং পীবদা শীংথানিংঙাই ওইবা থবক তৌরি। য়ুমশিংদা অফবা থক্নবা ঈশিং য়োরবা মতমদা লাইনা কয়া হন্থহবা ঙমগনি হায়না প্রধান মন্ত্রীনা ফোঙদোকখ্রে।
প্রধান মন্ত্রীনা হায় উত্তর প্রদেশতা খুঙ্গংশিং. লায়রবশিং অমসুং লৌমীশিং হেন্না ফগৎহল্লবা মৈ, ঈশিং, লম্বী-থোং অমসুং হেল্থ ফেসিলিতীশিংনা হকথেংননা কান্নবা ফংহল্লি। মহাক্না মখা তারদুনা হায় পি.এম. কিসান সম্মান নিধিগী খুত্থাংদা মতম অমদা হার ভোরা অমা লৈবদা অতোপ্পদগী শেল পুরম্বা মীওইশিং ওইরিবা উত্তর প্রদেশকী লৌমীগী ইমুং করোর ২.৫রোমদা মখোয়গী বেঙ্ক একাউন্তশিংদা হকথেংননা শেল দিপোজিৎ তৌখি। মহাক্না হায় মফম অসিদা লৌমীশিংনা অহিং হৌগৎতুনা ঈথৈ-লৌখোংগীদমক মৈ শিজিন্নখি অদুবু মহাক্কী সরকারনা অসিগুম্বা সমস্যা অসি পাৱর সপ্লাই ফগৎহনদুনা কোকহনখ্রে।
প্রধান মন্ত্রীনা হায় ফার্মর প্রদ্যুসর ওর্গনাইজেসনশিং (এফ.পি.ও.শিং) আসি লৌবুকশিং কনসোলিদেৎ তৌবদা য়াম্না মরু ওই অমসুং মসিনা লৌমী অমদা থুংলিবা লৌ উনবা লম পীকশিনবগী সমস্যা অসি কোকহল্লি। মহাক্না মখা তারদুনা হায় লৌমীগী ইমুং ৫০০না বিগা ১-২ লৈবা অদু ওর্গনাইজ তৌরবদি মখোয়না বিগা ৫০০-১০০০ লৈবা লৌমীশিংদগী হেন্না শক্তি লৈগনি। মসিগা চপ মান্না মনা-মশিং, উহৈ, শঙ্গোম, ঙা অমসুং অসিগুম্বগী বিজিনেস তৌবা অপীকপা লৌমীশিং অসি হৌজিক্তি কিসান রেলগী খুত্থাংদা অচৌবা কৈথেলশিংগা মরী থম্বা ঙম্লে। মহাক্না হায় অনৌবা এগ্রিকলচরেল রিফোর্মশিং হন্দক্তা চৎনহনখিবা অসিনা অপীকপা অমসুং শোত্থরবা লৌমীশিংদা কান্নবা পীরগনি অমসুং ফার্ম লোশিং অসিগী মতাংদা লৈবাক শিনবা থুংবদগী অফবা ফীদবেক লাক্লি।
প্রধান মন্ত্রীনা হায় এগ্রিকলচরেল লোশিংগী মতাংদা অরানবা মখলগী পাউশিং শন্দোকখি। মহাক্না হায় লৈবাক অসিদা মপাল লৈবাক্কী কম্পনীশিং কৌনবা লো শেমখিবশিংনা লৌমীশিংবু ভারতকী কম্পনীশিংদগী অকিবা পোকহল্লি। মসিগা অরানবা অমসুং প্রোপেগেন্দা অসি ফোঙদোকখ্রে। অনৌবা লৌশিং অসি চৎনখিবা মতুংদা হৌখিবা চহিগা চাংদম্নবদা উত্তর প্রদেশতা ফৌ লৈশিনবা অসি শরুক অনি হেনগৎখ্রে। য়োগী সরকারনা চু থারিবা লৌমীশিংদা মমাংদা লুপা করোর লাখ ১ কাইথখ্রে। কেন্দ্র সরকারনা রাজ্য সরকারদা সুগর মিলশিংনা লৌমীশিংদা শেল পীবা ঙম্নবা লুপা করোর কয়া পীথখ্রে। উত্তর প্রদেশ সরকারনা চু থারিবা লৌমীশিংদা মতম চানা শেল পীথোক্নবা মখা তানা হোৎনখিগনি।
প্রধান মন্ত্রীনা সরকার অসিনা খুঙ্গং অমসুং লৌমীগী পুন্সি ফগৎহন্নবা অঙম্বা থাক্তা হোৎনরি হায়না থাজবা পীখ্রে। মহাক্না হায় স্বামিৎৱা স্কীম অসিনা খুঞ্জা অমগী য়ুমদা আইনা য়াদনা লৈশিনবা অদু ঙাকথোকপা ঙমহল্লগনি। স্কীম অসিগী মখাদা হৌজিক য়ু.পি.গী জিলা ৫দা দ্রোনশিং শিজিন্নদুনা সর্ভেশিং পাঙথোক্লি। হৌজিক ফাওবদা দ্রোন সর্ভে অসি খুঙ্গং লিশিং ১২দা লোইশিনখ্রে অমসুং ইমুং লাখ ২ হেনবনা প্রোপর্তী কার্দ ফংখ্রে অমসুং হায়রিবা ইমুংশিং অসি হৌজিক মখল অমতগী অকি-তুজুংবা লৈত্রে হায়না প্রধান মন্ত্রীনা ফোঙদোকখ্রে।
প্রধান মন্ত্রীনা হায় মরম অসিনা লৌমীশিংগী লমগী মতাংদা এগ্রিকলচরেল রিফোর্ম লোশিং অসিগী থোরক্লিবা তোকঙা অসি কনানা করম্না থাজগনি। ঐখোয়গী পান্দমদি প্রজা খুদিংমক শক্তি পীবনি, ঐখোয়গী ৱাশক্তি লৈবাক অসি আত্মানির্ভর ওইহনবনি অমসুং থবক অসিগীদমক ঐখোয়না কত্থোক্লি। প্রধান মন্ত্রীনা গোস্বামি তুলসিদাকী রামচরিতমানস, অফবা ৱাখল্লোনগা অমসুং লোর্দ রাম থম্মোইদা লাৎচদুনা পাঙথোকপা থবক্তি শোইদনা মাই পাক্কনি হায়বা চৌপাই হায়রম্লগা ৱা ঙাংবা লোইশিনখি।
