نمسکار،
آج کے اس روزگار میلے میں جن امیدواروں کو سرکاری خدمات کے لئے تقرری کے خطوط ملے ہیں، ان تمام کو بہت بہت مبارکباد۔ آپ تمام نے شدید مشکلات کے بعد یہ کامیابی حاصل کی ہے۔ آپ کا انتخاب لاکھوں امیدواروں کے درمیان سے کیا گیا ہے۔ اس لئے اس کامیابی کی آپ کی زندگی میں بہت بڑی اہمیت ہے۔
آج ملک بھر میں گنیش اتسو منایا جا رہا ہے۔ اس مبارک وقت پر آپ سبھی کیلئے نئی زندگی کا شری گنیش ہورہا ہے۔ بھگوان گنیش کامیابی کا دیوتا ہیں۔ میری خواہش ہے کہ آپ کی خدمت کا عزم قوم کے مقاصد کی تکمیل کا باعث بنے گا۔
دوستو،
آج ہمارا ملک تاریخی کامیابیوں اور فیصلوں کا مشاہدہ کر رہا ہے۔ ابھی کچھ دن پہلے ہی ملک کی آدھی آبادی کو ناری شکتی وندن ادھینیم کی صورت میں بڑی طاقت ملی ہے۔ خواتین کے ریزرویشن کا معاملہ جو 30 سال سے زیر التوا تھا، اب دونوں ایوانوں سے ریکارڈ ووٹوں سے منظور ہو گیا ہے۔
سوچئے یہ کتنی بڑی کامیابی ہے۔ یہ مطالبہ اس وقت سے ہو رہا تھا جب آپ میں سے اکثر پیدا بھی نہیں ہوئے تھے۔ یہ فیصلہ ملک کی نئی پارلیمنٹ کے پہلے اجلاس میں لیا گیا ہے۔ ایک طرح سے نئی پارلیمنٹ میں ملک کے نئے مستقبل کا آغاز ہو چکا ہے۔
دوستو،
آج اس روزگار میلے میں بھی ہماری بیٹیوں نے بڑی تعداد میں تقرری خطوط حاصل کیے ہیں۔ آج ہندوستان کی بیٹیاں خلا سے لے کر کھیلوں تک کئی نئے ریکارڈ بنا رہی ہیں۔ مجھے ناری شکتی کی اس کامیابی پر بہت فخر محسوس ہوتا ہے۔ حکومت کی پالیسی خواتین کو بااختیار بنانے کے لیے نئے دروازے کھولنا بھی ہے۔ ہماری بیٹیاں اب ملک کی مسلح افواج میں کمیشن لے کر ملک کی خدمت کی راہ پر گامزن ہیں۔ ہم سب کا تجربہ ہے کہ ناری شکتی نے ہمیشہ ہر شعبے میں نئی توانائی کے ساتھ تبدیلیاں لائی ہیں۔ ہماری آدھی آبادی کے لیے حکومت کی بہتر حکمرانی، اس کے لئے آپ کو نئے آئیڈیاز پر کام کرنا چاہیے۔
دوستو،
آج 21ویں صدی کے ہندوستان کی امنگیں بہت زیادہ ہیں، ہمارے سماج اور حکومت سے توقعات بہت زیادہ ہیں۔ آپ خود دیکھ سکتے ہیں کہ آج یہ نیا ہندوستان کیا کمال کر رہا ہے۔ یہ وہی ہندوستان ہے جس نے چند دن پہلے چاند پر ترنگا لہرایا۔ اس نئے ہندوستان کے خواب بہت بلند ہیں۔ ملک نے 2047 تک ترقی یافتہ ہندوستان بننے کا عزم کیا ہے۔
ہم اگلے چند سالوں میں تیسری بڑی معیشت بننے جا رہے ہیں۔ آج جب ملک میں اتنا کچھ ہو رہا ہے تو ہر سرکاری ملازم کا کردار بہت بڑھنے والا ہے۔ آپ کو ہمیشہ سٹیزن فرسٹ کے جذبے سے کام کرنا ہوگا۔ آپ اس نسل کا حصہ ہیں جو ٹیکنالوجی کے ساتھ پروان چڑھی ہے۔ جو گیجٹس آپ کے والدین مشکل سے آپریٹ کرپاتے ہیں، آپ نے کھلونے کی طرح ان کا استعمال کیا ہے۔
اب آپ کو اپنے کام کی جگہ پر ٹیکنالوجی کے ساتھ اس سہولت کو استعمال کرنا ہوگا۔ ہمیں سوچنا ہوگا کہ ہم ٹیکنالوجی کی مدد سے گورننس میں نئی بہتری کیسے لا سکتے ہیں؟ آپ کو یہ دیکھنا ہوگا کہ آپ ٹیکنالوجی کے ذریعے اپنے متعلقہ علاقوں میں کارکردگی کو مزید کیسے بہتر بنا سکتے ہیں؟
دوستو،
آپ نے پچھلے 9 سالوں میں دیکھا ہے کہ کس طرح تکنیکی تبدیلی کی وجہ سے حکمرانی آسان ہو جاتی ہے۔ پہلے بکنگ کاؤنٹر پر ریلوے ٹکٹ حاصل کرنے کے لیے قطاریں لگتی تھیں۔ ٹیکنالوجی نے اس مشکل کو آسان کر دیا ہے۔ آدھار کارڈ، ڈیجیٹل لاکر اور ای-کے وائی سی نے دستاویزات کی پیچیدگی کو ختم کر دیا ہے۔ گیس سلنڈر کی بکنگ سے لے کر بجلی کے بلوں کی ادائیگی تک سب کچھ اب ایپ پر ہو رہا ہے۔ ڈی بی ٹی کے ذریعے سرکاری اسکیموں کا پیسہ براہ راست لوگوں کے کھاتوں میں پہنچ رہا ہے۔ ڈیجی یاترا نے ہمارے سفر کو آسان بنا دیا ہے۔ اس کا مطلب ہے کہ ٹیکنالوجی نے بدعنوانی کو کم کیا ہے، ساکھ میں اضافہ کیا ہے، پیچیدگی کو کم کیا ہے اورآسانی میں اضافہ کیا ہے۔
آپ کو اس سمت میں زیادہ سے زیادہ کام کرنا ہوگا۔ ٹیکنالوجی کے ذریعے غریبوں کی ہر ضرورت، حکومت کا ہر کام کیسے آسان ہو جائے گا، اس کام کے لیے آپ کو نئے طریقے، اختراعی طریقے ڈھونڈنے ہوں گے، اور آگے بھی لے کر جانا ہوگا۔
دوستو،
گزشتہ 9 سالوں میں ہماری پالیسیوں نے اس سے بھی بڑے اہداف کے حصول کی راہ ہموار کی ہے۔ ہماری پالیسیاں نئی ذہنیت ، مستقل نگرانی، مشن موڈ پر عمل درآمد اور بڑے پیمانے پر شرکت پر مبنی ہیں۔ 9 سالوں میں حکومت نے مشن موڈ پر پالیسیاں لاگو کی ہیں۔ چاہے سوچھ بھارت ہو یا جل جیون مشن، ان تمام اسکیموں میں 100 فیصد تکمیل کے ہدف پر کام کیا جا رہا ہے۔ حکومت کی جانب سے ہر سطح پر اسکیموں کی نگرانی کی جارہی ہے۔
میں خود بھی پرگتی پلیٹ فارم کے ذریعے پروجیکٹوں کی پیش رفت پر نظر رکھتا ہوں۔ ان کوششوں کے درمیان مرکزی حکومت کی اسکیموں کو لاگو کرنے کی سب سے بڑی ذمہ داری آپ سبھی نو مقررہ سرکاری ملازمین پر عائد ہوتی ہے۔ جب آپ جیسے لاکھوں نوجوان سرکاری خدمات میں شامل ہوتے ہیں تو پالیسیوں کے نفاذ کی رفتار اور پیمانے بھی بڑھ جاتے ہیں۔ اس سے حکومت کے باہر بھی روزگار کے مواقع پیدا ہوتے ہیں۔ اس کے ساتھ کام کرنے کے نئے انتظامات بھی بنتے ہیں۔
دوستو،
آج، عالمی معیشتوں میں مشکلات کے درمیان، ہندوستان کی جی ڈی پی تیزی سے بڑھ رہی ہے، ہماری پیداوار اور برآمدات دونوں میں زبردست اضافہ ہوا ہے۔ آج ملک اپنے جدید انفراسٹرکچر پر جتنی سرمایہ کاری کر رہا ہے اس سے پہلے کبھی نہیں کی گئی۔ آج ملک میں نئے نئے شعبے کی توسیع ہورہی ہے۔ آج، قابل تجدید توانائی، نامیاتی کاشتکاری، دفاع اور سیاحت سمیت کئی شعبوں میں بے مثال ترقی میں تیزی دیکھی جا رہی ہے۔
موبائل فون سے لے کر ہوائی جہاز تک، کورونا ویکسین سے لے کر فائٹر جیٹس تک، ہندوستان کی خود انحصاری مہم کی طاقت سب کے سامنے ہے۔ خیال کیا جاتا ہے کہ 2025 تک صرف ہندوستان کی خلائی معیشت 60 ہزار کروڑ روپے سے زیادہ ہو جائے گی۔ یعنی آج ملک کے نوجوانوں کے لیے مسلسل نئے مواقع پیدا ہو رہے ہیں، روزگار کے نئے امکانات پیدا ہو رہے ہیں۔
دوستو،
آزادی کے امرت کال میں اگلے 25 سال اتنے ہی اہم ہیں جتنے اگلے 25 سال میں آپ کا کیرئر اہم ہے۔ آپ کو ٹیم ورک کو اولین ترجیح دینی ہوگی۔ آپ نے دیکھا، اس مہینے اس ملک میں جی 20 اجلاسوں کا کامیاب انعقاد مکمل ہو چکا ہے۔ دہلی سمیت ملک کے 60 شہروں میں 200 سے زیادہ میٹنگیں منعقد کی گئیں۔
اس دوران غیر ملکی مہمانوں نے ہمارے ملک کے تنوع کے رنگ دیکھے۔ جی20 ہماری روایت، عزم اور مہمان نوازی کا حصہ بنا ۔ جی 20 سربراہی اجلاس کی کامیابی بھی سرکاری اور نجی شعبے کے مختلف شعبوں کی کامیابی ہے۔ اس تقریب کے لیے سب نے ایک ٹیم کے طور پر کام کیا۔ مجھے خوشی ہے کہ آج آپ بھی سرکاری ملازمین کی ٹیم انڈیا کا حصہ بننے جا رہے ہیں۔
دوستو،
آپ سب کو ملک کی ترقی کے سفر میں حکومت کے ساتھ براہ راست کام کرنے کا موقع ملا ہے۔ میں آپ سے گزارش کرتا ہوں کہ اس سفر میں اپنی سیکھنے کی عادت کو برقرار رکھیں۔ آن لائن لرننگ پورٹل – آئی گوٹ کرم یوگی کے ذریعے آپ اپنی پسند کے کورسز سے جڑ سکتے ہیں۔
میں چاہتا ہوں کہ آپ سب اس سہولت سے فائدہ اٹھائیں۔ ایک بار پھر میں آپ سب کو مبارکباد پیش کرتا ہوں۔ ہندوستان کے عزم کو عملی جامہ پہنانے کے لیے آپ سب کو میری طرف سے نیک خواہشات۔ آپ کے اہل خانہ کو بھی نیک تمنائیں اور بہت بہت مبارکباد۔ آپ خود بھی آگے بڑھیں اور یہ 25 سال آپ کے بھی ہیں اور ملک کے بھی ہیں ۔ ایسا نایاب امتزاج بہت کم ملتا ہے، آپ کو ملا ہے۔
آئیے دوستو عہد کریں اور آگے بڑھیں۔ ملک کے لیے جیو، ملک کے لیے کچھ کرو۔آپ سبھی کو نیک خواہشات۔
بہت بہت شکریہ۔
