ਪ੍ਰਧਾਨ ਮੰਤਰੀ ਸ਼੍ਰੀ ਨਰੇਂਦਰ ਮੋਦੀ 28-29 ਅਪ੍ਰੈਲ ਨੂੰ ਉੱਤਰ ਪ੍ਰਦੇਸ਼ ਦਾ ਦੌਰਾ ਕਰਨਗੇ। 28 ਅਪ੍ਰੈਲ ਨੂੰ ਸ਼ਾਮ 5 ਵਜੇ ਦੇ ਕਰੀਬ, ਪ੍ਰਧਾਨ ਮੰਤਰੀ ਵਾਰਾਣਸੀ ਵਿੱਚ ਮਹਿਲਾ ਸੰਮੇਲਨ ਵਿੱਚ ਹਿੱਸਾ ਲੈਣਗੇ, ਜਿੱਥੇ ਉਹ ਲਗਭਗ ₹6,350 ਕਰੋੜ ਦੇ ਵੱਖ-ਵੱਖ ਵਿਕਾਸ ਪ੍ਰੋਜੈਕਟਾਂ ਦਾ ਉਦਘਾਟਨ ਕਰਨਗੇ ਅਤੇ ਨੀਂਹ ਪੱਥਰ ਰੱਖਣਗੇ। ਉਹ ਇਸ ਮੌਕੇ ਇਕੱਠ ਨੂੰ ਸੰਬੋਧਨ ਵੀ ਕਰਨਗੇ।
29 ਅਪ੍ਰੈਲ ਨੂੰ, ਲਗਭਗ 8:30 ਵਜੇ, ਪ੍ਰਧਾਨ ਮੰਤਰੀ ਵਾਰਾਣਸੀ ਵਿੱਚ ਸ਼੍ਰੀ ਕਾਸ਼ੀ ਵਿਸ਼ਵਨਾਥ ਮੰਦਰ ਵਿੱਚ ਦਰਸ਼ਨ ਅਤੇ ਪੂਜਾ-ਅਰਚਨਾ ਕਰਨਗੇ। ਇਸ ਤੋਂ ਬਾਅਦ, ਪ੍ਰਧਾਨ ਮੰਤਰੀ ਹਰਦੋਈ ਜਾਣਗੇ ਅਤੇ ਲਗਭਗ 11:30 ਵਜੇ, ਪ੍ਰਧਾਨ ਮੰਤਰੀ ਗੰਗਾ ਐਕਸਪ੍ਰੈਸਵੇਅ ਦਾ ਉਦਘਾਟਨ ਕਰਨਗੇ। ਉਹ ਇਸ ਮੌਕੇ ਇਕੱਠ ਨੂੰ ਵੀ ਸੰਬੋਧਨ ਕਰਨਗੇ।
ਵਾਰਾਣਸੀ ਵਿੱਚ ਪ੍ਰਧਾਨ ਮੰਤਰੀ
ਪ੍ਰਧਾਨ ਮੰਤਰੀ ਮਹਿਲਾ ਸੰਮੇਲਨ ਵਿੱਚ ਹਿੱਸਾ ਲੈਣਗੇ, ਜਿਸ ਵਿੱਚ ਖੇਤਰ ਭਰ ਤੋਂ ਵੱਡੀ ਗਿਣਤੀ ਵਿੱਚ ਮਹਿਲਾਵਾਂ ਦੀ ਮੌਜੂਦਗੀ ਦੇਖਣ ਨੂੰ ਮਿਲੇਗੀ। ਪ੍ਰਧਾਨ ਮੰਤਰੀ ₹1,050 ਕਰੋੜ ਤੋਂ ਵੱਧ ਦੇ 48 ਤੋਂ ਵੱਧ ਮੁਕੰਮਲ ਪ੍ਰੋਜੈਕਟ ਰਾਸ਼ਟਰ ਨੂੰ ਸਮਰਪਿਤ ਕਰਨਗੇ। ਮੁੱਖ ਬੁਨਿਆਦੀ ਢਾਂਚੇ ਦੇ ਪ੍ਰੋਜੈਕਟਾਂ ਵਿੱਚ ਵਾਰਾਣਸੀ-ਆਜ਼ਮਗੜ੍ਹ ਸੜਕ ਨੂੰ ਚੌੜਾ ਕਰਨ ਦਾ ਕੰਮ ਮੁਕੰਮਲ ਕਰਨਾ, ਕਜ਼ਾਕਪੁਰਾ ਅਤੇ ਕਾਦੀਪੁਰ ਵਿਖੇ ਮਹੱਤਵਪੂਰਨ ਰੇਲ ਓਵਰ ਬ੍ਰਿਜਾਂ ਦਾ ਉਦਘਾਟਨ ਅਤੇ ਭਗਵਾਨਪੁਰ ਵਿੱਚ 55 ਐੱਮਐੱਲਡੀ ਦੀ ਸਮਰੱਥਾ ਵਾਲੇ ਸੀਵਰੇਜ ਟ੍ਰੀਟਮੈਂਟ ਪਲਾਂਟ (ਐੱਸਟੀਪੀ) ਦਾ ਉਦਘਾਟਨ ਸ਼ਾਮਲ ਹਨ।
ਪ੍ਰਧਾਨ ਮੰਤਰੀ ਵੱਖ-ਵੱਖ ਭਾਈਚਾਰਕ-ਕੇਂਦ੍ਰਿਤ ਪ੍ਰੋਜੈਕਟਾਂ ਦਾ ਉਦਘਾਟਨ ਕਰਨਗੇ। ਇਨ੍ਹਾਂ ਵਿੱਚ ਜਲ ਜੀਵਨ ਮਿਸ਼ਨ ਅਧੀਨ 30 ਪੇਂਡੂ ਪੀਣ ਵਾਲੇ ਪਾਣੀ ਦੀਆਂ ਯੋਜਨਾਵਾਂ, ਚੰਦਰਵਤੀ ਘਾਟ ਦਾ ਪੁਨਰ ਵਿਕਾਸ, ਸਾਰਨਾਥ ਦੇ ਨੇੜੇ ਸਾਰੰਗਨਾਥ ਮੰਦਰ ਦਾ ਸੈਰ-ਸਪਾਟਾ ਵਿਕਾਸ ਅਤੇ ਨਾਗਵਾ ਦੇ ਸੰਤ ਰਵਿਦਾਸ ਪਾਰਕ ਦੇ ਸੁੰਦਰੀਕਰਨ ਅਤੇ ਨਵੀਨੀਕਰਨ ਦੇ ਕੰਮ ਸ਼ਾਮਲ ਹਨ। ਜਨਤਕ ਸੇਵਾਵਾਂ ਅਤੇ ਖੇਡਾਂ ਵਿੱਚ ਸੁਧਾਰ ਵੀ ਪ੍ਰਮੁੱਖ ਹਨ, ਜਿਨ੍ਹਾਂ ਵਿੱਚ ਯੂਪੀ ਕਾਲਜ ਵਿਖੇ ਇੱਕ ਸਿੰਥੈਟਿਕ ਹਾਕੀ ਟਰਫ, ਰਾਮਨਗਰ ਵਿੱਚ 100 ਬਿਸਤਰਿਆਂ ਵਾਲਾ ਬਿਰਧ ਆਸ਼ਰਮ ਅਤੇ ਭੇਲੂਪੁਰ ਵਾਟਰ ਟ੍ਰੀਟਮੈਂਟ ਪਲਾਂਟ ਵਿਖੇ 1 ਮੈਗਾਵਾਟ ਦਾ ਸੌਰ ਊਰਜਾ ਪਲਾਂਟ ਸ਼ਾਮਲ ਹਨ। ਪ੍ਰਧਾਨ ਮੰਤਰੀ ਸੈਂਟਰਲ ਯੂਨੀਵਰਸਿਟੀ ਆਫ਼ ਤਿੱਬਤੀਅਨ ਸਟੱਡੀਜ਼ ਵਿਖੇ ਸੋਵਾ ਰਿਗਪਾ ਭਵਨ ਅਤੇ ਹਸਪਤਾਲ ਦਾ ਉਦਘਾਟਨ ਕਰਨਗੇ, ਜੋ ਕਿ ਰਵਾਇਤੀ ਦਵਾਈ ਨੂੰ ਆਧੁਨਿਕ ਸਿਹਤ ਸੰਭਾਲ ਪ੍ਰਣਾਲੀਆਂ ਨਾਲ ਜੋੜਨ ਦੀ ਵਚਨਬੱਧਤਾ ਨੂੰ ਦਰਸਾਉਂਦਾ ਹੈ।
ਪ੍ਰਧਾਨ ਮੰਤਰੀ ਲਗਭਗ ₹5,300 ਕਰੋੜ ਦੇ 112 ਤੋਂ ਵੱਧ ਪ੍ਰੋਜੈਕਟਾਂ ਦਾ ਨੀਂਹ ਪੱਥਰ ਰੱਖਣਗੇ। ਇਨ੍ਹਾਂ ਵਿੱਚ ਅਮਰੁਤ 2.0 ਅਧੀਨ 13 ਸੀਵਰੇਜ ਅਤੇ ਜਲ ਸਪਲਾਈ ਯੋਜਨਾਵਾਂ, ਸ਼੍ਰੀ ਸ਼ਿਵ ਪ੍ਰਸਾਦ ਗੁਪਤਾ ਡਿਵੀਜ਼ਨਲ ਜ਼ਿਲ੍ਹਾ ਹਸਪਤਾਲ ਵਿਖੇ 500 ਬਿਸਤਰਿਆਂ ਵਾਲਾ ਮਲਟੀ-ਸੁਪਰ-ਸਪੈਸ਼ਲਿਟੀ ਹਸਪਤਾਲ, ਭੋਜੂਵੀਰ ਅਤੇ ਸਿਗਰਾ ਵਿਖੇ ਮਾਰਕਿਟ ਕੰਪਲੈਕਸਾਂ ਅਤੇ ਦਫਤਰੀ ਸਥਾਨਾਂ ਦੀ ਉਸਾਰੀ, ਤਲਾਬਾਂ ਦਾ ਨਵੀਨੀਕਰਨ ਅਤੇ ਮੁੜ ਸੁਰਜੀਤੀ, 198 ਬਿਸਤਰਿਆਂ ਵਾਲੇ ਹਸਪਤਾਲ ਦਾ ਪੁਨਰ ਵਿਕਾਸ, 100 ਬਿਸਤਰਿਆਂ ਵਾਲੇ ਕ੍ਰਿਟੀਕਲ ਕੇਅਰ ਬਲਾਕ ਦਾ ਨਿਰਮਾਣ ਅਤੇ ਅੱਸੀ ਘਾਟ, ਦਸ਼ਾਸ਼ਵਮੇਧ ਘਾਟ ਅਤੇ ਨਮੋ ਘਾਟ ਸਮੇਤ ਮੁੱਖ ਘਾਟਾਂ 'ਤੇ ਸੈਰ-ਸਪਾਟਾ ਸਹੂਲਤਾਂ ਦਾ ਵਿਕਾਸ ਸ਼ਾਮਲ ਹਨ। ਸ਼ਾਸਨ ਅਤੇ ਸਮਾਜ ਭਲਾਈ ਬੁਨਿਆਦੀ ਢਾਂਚੇ ਨੂੰ ਮਜ਼ਬੂਤ ਕਰਨ ਲਈ, ਪ੍ਰਧਾਨ ਮੰਤਰੀ ਰਾਮਨਗਰ ਵਿੱਚ ਏਕੀਕ੍ਰਿਤ ਡਿਵੀਜ਼ਨਲ ਦਫ਼ਤਰ, ਨਗਰ ਨਿਗਮ ਦਫ਼ਤਰ ਦੀ ਇਮਾਰਤ ਅਤੇ ਇੱਕ ਸਰਕਾਰੀ ਬਾਲ ਆਸਰਾ ਘਰ ਅਤੇ ਨਾਬਾਲਗ ਨਿਆਂ ਬੋਰਡ ਦਾ ਨੀਂਹ ਪੱਥਰ ਵੀ ਰੱਖਣਗੇ। ਪ੍ਰਧਾਨ ਮੰਤਰੀ ਬਾਨਸ ਡੇਅਰੀ ਨਾਲ ਜੁੜੇ ਉੱਤਰ ਪ੍ਰਦੇਸ਼ ਦੇ ਦੁੱਧ ਸਪਲਾਇਰਾਂ ਨੂੰ ਬੋਨਸ ਵਜੋਂ ₹105 ਕਰੋੜ ਤੋਂ ਵੱਧ ਦੀ ਰਕਮ ਵੀ ਟ੍ਰਾਂਸਫਰ ਕਰਨਗੇ।
ਪ੍ਰਧਾਨ ਮੰਤਰੀ ਵਾਰਾਣਸੀ ਜੰਕਸ਼ਨ-ਪੰਡਿਤ ਦੀਨ ਦਿਆਲ ਉਪਾਧਿਆਏ ਜੰਕਸ਼ਨ ਤੀਜੇ ਅਤੇ ਚੌਥੇ ਰੇਲਵੇ ਲਾਈਨ ਪ੍ਰੋਜੈਕਟ ਦਾ ਨੀਂਹ ਪੱਥਰ ਰੱਖਣਗੇ, ਜਿਸ ਵਿੱਚ ਗੰਗਾ ਨਦੀ 'ਤੇ ਇੱਕ ਰੇਲ-ਕਮ-ਸੜਕ ਪੁਲ ਦਾ ਨਿਰਮਾਣ ਸ਼ਾਮਲ ਹੈ। ਇਹ ਪ੍ਰੋਜੈਕਟ ਵਾਰਾਣਸੀ ਅਤੇ ਚੰਦੌਲੀ ਜ਼ਿਲ੍ਹਿਆਂ ਨੂੰ ਰੇਲ ਟ੍ਰੈਫਿਕ ਨੂੰ ਘਟਾ ਕੇ, ਲੌਜਿਸਟਿਕਸ ਕੁਸ਼ਲਤਾ ਨੂੰ ਵਧਾ ਕੇ, ਮਲਟੀ-ਮਾਡਲ ਕਨੈਕਟੀਵਿਟੀ ਨੂੰ ਮਜ਼ਬੂਤ ਕਰਕੇ ਅਤੇ ਸੁਚਾਰੂ ਆਵਾਜਾਈ ਨੂੰ ਯਕੀਨੀ ਬਣਾ ਕੇ ਲਾਭ ਪਹੁੰਚਾਏਗਾ। ਇਹ ਕਾਸ਼ੀ ਵਿਸ਼ਵਨਾਥ ਧਾਮ, ਰਾਮਨਗਰ ਖੇਤਰ ਅਤੇ ਰਾਸ਼ਟਰੀ ਰਾਜਮਾਰਗ-19 ਤੱਕ ਪਹੁੰਚ ਵਿੱਚ ਵੀ ਸੁਧਾਰ ਕਰੇਗਾ, ਜਦਕਿ ਪੂਰਬੀ ਉੱਤਰ ਪ੍ਰਦੇਸ਼ ਅਤੇ ਬਿਹਾਰ ਨਾਲ ਰੇਲ ਸੰਪਰਕ ਨੂੰ ਮਜ਼ਬੂਤ ਕਰੇਗਾ।
ਪ੍ਰਧਾਨ ਮੰਤਰੀ ਦੋ ਨਵੀਆਂ ਅੰਮ੍ਰਿਤ ਭਾਰਤ ਐਕਸਪ੍ਰੈਸ ਰੇਲਾਂ: ਬਨਾਰਸ-ਪੁਣੇ (ਹੜਪਸਰ) ਅਤੇ ਅਯੁੱਧਿਆ-ਮੁੰਬਈ (ਲੋਕਮਾਨਯ ਤਿਲਕ ਟਰਮੀਨਸ) ਨੂੰ ਵੀ ਹਰੀ ਝੰਡੀ ਦਿਖਾਉਣਗੇ। ਇਹ ਰੇਲਾਂ ਕਿਫਾਇਤੀ ਅਤੇ ਆਧੁਨਿਕ ਯਾਤਰਾ ਬਦਲ ਪ੍ਰਦਾਨ ਕਰਨਗੀਆਂ ਅਤੇ ਉੱਤਰ ਪ੍ਰਦੇਸ਼, ਮੱਧ ਪ੍ਰਦੇਸ਼ ਅਤੇ ਮਹਾਰਾਸ਼ਟਰ ਦਰਮਿਆਨ ਸੰਪਰਕ ਨੂੰ ਵਧਾਉਣਗੀਆਂ। ਬਨਾਰਸ-ਪੁਣੇ ਸੇਵਾ ਕਾਸ਼ੀ ਵਿਸ਼ਵਨਾਥ ਧਾਮ ਤੱਕ ਆਸਾਨ ਪਹੁੰਚ ਦੀ ਸਹੂਲਤ ਦੇਵੇਗੀ, ਜਦਕਿ ਅਯੁੱਧਿਆ-ਮੁੰਬਈ ਸੇਵਾ ਸ਼੍ਰੀ ਰਾਮ ਮੰਦਰ ਤੀਰਥ ਖੇਤਰ ਤੱਕ ਸੰਪਰਕ ਨੂੰ ਬਿਹਤਰ ਬਣਾਏਗੀ ਅਤੇ ਮੁੱਖ ਧਾਰਮਿਕ ਸਥਾਨਾਂ ਦਰਮਿਆਨ ਸੰਪਰਕ ਨੂੰ ਮਜ਼ਬੂਤ ਕਰੇਗੀ।
ਹਰਦੋਈ ਵਿੱਚ ਪ੍ਰਧਾਨ ਮੰਤਰੀ
ਪ੍ਰਧਾਨ ਮੰਤਰੀ ਹਰਦੋਈ ਜ਼ਿਲ੍ਹੇ ਵਿੱਚ ਗੰਗਾ ਐਕਸਪ੍ਰੈਸਵੇਅ ਦਾ ਉਦਘਾਟਨ ਕਰਨਗੇ, ਜੋ ਦੇਸ਼ ਵਿੱਚ ਵਿਸ਼ਵ ਪੱਧਰੀ ਬੁਨਿਆਦੀ ਢਾਂਚੇ ਦੇ ਵਿਕਾਸ ਵਿੱਚ ਇੱਕ ਮਹੱਤਵਪੂਰਨ ਮੀਲ ਪੱਥਰ ਹੈ। ਗੰਗਾ ਐਕਸਪ੍ਰੈਸਵੇਅ ਇੱਕ 594 ਕਿਲੋਮੀਟਰ ਲੰਬਾ, 6-ਮਾਰਗੀ (8 ਮਾਰਗ ਤੱਕ ਫੈਲਣਯੋਗ), ਪਹੁੰਚ-ਨਿਯੰਤਰਿਤ ਗ੍ਰੀਨਫੀਲਡ ਹਾਈ-ਸਪੀਡ ਕੌਰੀਡੋਰ ਹੈ, ਜੋ ਲਗਭਗ ₹36,230 ਕਰੋੜ ਦੀ ਕੁੱਲ ਲਾਗਤ ਨਾਲ ਬਣਾਇਆ ਗਿਆ ਹੈ। ਇਹ ਐਕਸਪ੍ਰੈਸਵੇਅ 12 ਜ਼ਿਲ੍ਹਿਆਂ - ਮੇਰਠ, ਬੁਲੰਦਸ਼ਹਿਰ, ਹਾਪੁੜ, ਅਮਰੋਹਾ, ਸੰਭਲ, ਬਦਾਉਂ, ਸ਼ਾਹਜਹਾਂਪੁਰ, ਹਰਦੋਈ, ਉਨਾਓ, ਰਾਏਬਰੇਲੀ, ਪ੍ਰਤਾਪਗੜ੍ਹ ਅਤੇ ਪ੍ਰਯਾਗਰਾਜ - ਵਿੱਚੋਂ ਲੰਘਦਾ ਹੈ - ਇਸ ਤਰ੍ਹਾਂ ਉੱਤਰ ਪ੍ਰਦੇਸ਼ ਦੇ ਪੱਛਮੀ, ਮੱਧ ਅਤੇ ਪੂਰਬੀ ਖੇਤਰਾਂ ਨੂੰ ਇੱਕ ਸਿੰਗਲ ਸਹਿਜ ਹਾਈ-ਸਪੀਡ ਕੌਰੀਡੋਰ ਰਾਹੀਂ ਜੋੜਦਾ ਹੈ।
ਇਸ ਪ੍ਰੋਜੈਕਟ ਨਾਲ ਮੇਰਠ ਅਤੇ ਪ੍ਰਯਾਗਰਾਜ ਦਰਮਿਆਨ ਯਾਤਰਾ ਦਾ ਸਮਾਂ ਮੌਜੂਦਾ 10-12 ਘੰਟਿਆਂ ਤੋਂ ਘਟ ਕੇ ਲਗਭਗ 6 ਘੰਟੇ ਹੋਣ ਦੀ ਉਮੀਦ ਹੈ, ਜਿਸ ਨਾਲ ਆਵਾਜਾਈ ਵਿੱਚ ਆਸਾਨੀ ਅਤੇ ਆਵਾਜਾਈ ਵਿੱਚ ਕੁਸ਼ਲਤਾ ਵਧੇਗੀ।
ਇਸ ਪ੍ਰੋਜੈਕਟ ਦਾ ਇੱਕ ਮੁੱਖ ਆਕਰਸ਼ਣ ਸ਼ਾਹਜਹਾਂਪੁਰ ਜ਼ਿਲ੍ਹੇ ਵਿੱਚ 3.5 ਕਿਲੋਮੀਟਰ ਲੰਬੀ ਐਮਰਜੈਂਸੀ ਲੈਂਡਿੰਗ ਸਹੂਲਤ (ਹਵਾਈ ਪੱਟੀ) ਦੀ ਵਿਵਸਥਾ ਹੈ। ਇਹ ਦੋਹਰਾ-ਵਰਤੋਂ ਵਾਲਾ ਬੁਨਿਆਦੀ ਢਾਂਚਾ ਰਾਸ਼ਟਰੀ ਸੁਰੱਖਿਆ ਤਿਆਰੀ ਨੂੰ ਵਧਾਉਂਦਾ ਹੈ ਅਤੇ ਆਰਥਿਕ ਲਾਭਾਂ ਤੋਂ ਇਲਾਵਾ ਰਣਨੀਤਕ ਮੁੱਲ ਜੋੜਦਾ ਹੈ।
ਗੰਗਾ ਐਕਸਪ੍ਰੈਸਵੇਅ ਦੀ ਇੱਕ ਪ੍ਰਮੁੱਖ ਆਰਥਿਕ ਗਲਿਆਰੇ ਵਜੋਂ ਕਲਪਨਾ ਕੀਤੀ ਗਈ ਹੈ, ਜਿਸ ਦੇ ਤਹਿਤ ਇਸਦੇ ਮਾਰਗ 'ਤੇ ਸਥਿਤ 12 ਜ਼ਿਲ੍ਹਿਆਂ ਵਿੱਚ ਲਗਭਗ 2,635 ਹੈਕਟੇਅਰ ਦੇ ਖੇਤਰ ਵਿੱਚ ਏਕੀਕ੍ਰਿਤ ਨਿਰਮਾਣ ਅਤੇ ਲੌਜਿਸਟਿਕ ਗਲਿਆਰੇ ਵਿਕਸਤ ਕੀਤੇ ਜਾਣਗੇ। ਐਕਸਪ੍ਰੈਸਵੇਅ ਲੌਜਿਸਟਿਕਸ ਲਾਗਤਾਂ ਨੂੰ ਘਟਾਏਗਾ, ਸਪਲਾਈ ਲੜੀ ਦੀ ਕੁਸ਼ਲਤਾ ਵਿੱਚ ਸੁਧਾਰ ਕਰੇਗਾ ਅਤੇ ਨਿਰਮਾਣ ਮੁਕਾਬਲੇਬਾਜ਼ੀ ਨੂੰ ਵਧਾਏਗਾ।
ਬਿਹਤਰ ਸੰਪਰਕ ਕਿਸਾਨਾਂ ਨੂੰ ਸ਼ਹਿਰੀ ਅਤੇ ਨਿਰਯਾਤ ਬਜ਼ਾਰਾਂ ਤੱਕ ਸਿੱਧੀ ਪਹੁੰਚ ਪ੍ਰਦਾਨ ਕਰੇਗਾ, ਬਿਹਤਰ ਕੀਮਤ ਪ੍ਰਾਪਤੀ ਨੂੰ ਸੁਵਿਧਾਜਨਕ ਬਣਾਏਗਾ ਅਤੇ ਪੇਂਡੂ ਆਮਦਨ ਨੂੰ ਮਜ਼ਬੂਤ ਕਰੇਗਾ। ਇਸ ਪ੍ਰੋਜੈਕਟ ਨਾਲ ਸੈਰ-ਸਪਾਟੇ ਨੂੰ ਹੁਲਾਰਾ ਮਿਲਣ, ਨਵੇਂ ਆਰਥਿਕ ਮੌਕੇ ਖੁੱਲ੍ਹਣ ਅਤੇ ਸਮੁੱਚੇ ਖੇਤਰ ਵਿੱਚ ਸਿੱਧੇ ਅਤੇ ਅਸਿੱਧੇ ਰੁਜ਼ਗਾਰ ਦੇ ਮੌਕੇ ਪੈਦਾ ਹੋਣ ਦੀ ਵੀ ਉਮੀਦ ਹੈ।
ਗੰਗਾ ਐਕਸਪ੍ਰੈਸਵੇਅ ਰਾਜ ਵਿੱਚ ਇੱਕ ਵਿਸ਼ਾਲ ਐਕਸਪ੍ਰੈਸਵੇਅ ਨੈੱਟਵਰਕ ਲਈ ਰੀੜ੍ਹ ਦੀ ਹੱਡੀ ਵਜੋਂ ਵੀ ਕੰਮ ਕਰੇਗਾ, ਜਿਸ ਵਿੱਚ ਕਈ ਲਿੰਕ ਗਲਿਆਰੇ ਜਾਂ ਤਾਂ ਕਾਰਜਸ਼ੀਲ ਜਾਂ ਯੋਜਨਾਬੱਧ ਹਨ, ਜਿਨ੍ਹਾਂ ਵਿੱਚ ਆਗਰਾ-ਲਖਨਊ ਐਕਸਪ੍ਰੈਸਵੇਅ, ਜੇਵਰ ਲਿੰਕ ਐਕਸਪ੍ਰੈਸਵੇਅ, ਫਰੂਖਾਬਾਦ ਲਿੰਕ ਐਕਸਪ੍ਰੈਸਵੇਅ, ਅਤੇ ਮੇਰਠ ਤੋਂ ਹਰਿਦੁਆਰ ਤੱਕ ਪ੍ਰਸਤਾਵਿਤ ਵਿਸਥਾਰ ਸ਼ਾਮਲ ਹਨ। ਇਹ ਉੱਭਰਦਾ ਐਕਸਪ੍ਰੈਸਵੇਅ ਗਰਿੱਡ ਉੱਤਰ ਪ੍ਰਦੇਸ਼ ਵਿੱਚ ਪੂਰਬ ਤੋਂ ਪੱਛਮ ਅਤੇ ਉੱਤਰ ਤੋਂ ਦੱਖਣ ਤੱਕ ਹਾਈ-ਸਪੀਡ ਸੜਕ ਸੰਪਰਕ ਦਾ ਵਿਸਤਾਰ ਕਰੇਗਾ, ਜਿਸ ਨਾਲ ਸੰਤੁਲਿਤ ਖੇਤਰੀ ਵਿਕਾਸ ਸੰਭਵ ਹੋਵੇਗਾ।
ਗੰਗਾ ਐਕਸਪ੍ਰੈਸਵੇਅ ਸਿਰਫ਼ ਇੱਕ ਆਵਾਜਾਈ ਪ੍ਰੋਜੈਕਟ ਨਹੀਂ ਹੈ ਬਲਕਿ ਇੱਕ ਪਰਿਵਰਤਨਸ਼ੀਲ ਪਹਿਲਕਦਮੀ ਹੈ ਜੋ ਲੌਜਿਸਟਿਕਸ ਲਾਗਤਾਂ ਨੂੰ ਘਟਾਏਗੀ, ਉਦਯੋਗਿਕ ਨਿਵੇਸ਼ ਨੂੰ ਆਕਰਸ਼ਿਤ ਕਰੇਗੀ, ਖੇਤੀਬਾੜੀ ਅਤੇ ਪੇਂਡੂ ਆਮਦਨ ਨੂੰ ਵਧਾਏਗੀ, ਰੁਜ਼ਗਾਰ ਪੈਦਾ ਕਰੇਗੀ, ਅਤੇ ਸੂਬੇ ਭਰ ਵਿੱਚ ਸੰਪੂਰਨ ਆਰਥਿਕ ਵਿਕਾਸ ਨੂੰ ਵਧਾਏਗੀ।
