প্রধান মন্ত্রী শ্রী নরেন্দ্র মোদীনা এপ্রিল ২৮-২৯দা উত্তর প্রদেশতা চৎকনি। এপ্রিল ২৮গী নুমিদাংৱাইরম পুং ৫ রোম তাবদা প্রধান মন্ত্রীনা মাহিলা সম্মেলনদা শরুক য়াগনি। মফম অসিদা মহাক্না বারানসীদা চাউরাক্না লুপা করোর ৬,৩৫০গী চাউখৎ-থৌরাংগী প্রোজেক্ত কয়া শঙ্গাগনি অমসুং উরেপ-উয়ুং তমগনি। মহাক্না থৌরম অদুদা মীয়ামগী মীতিন অমদা ৱা ঙাংগনি।
এপ্রিল ২৯, অয়ুক পুং ৮.৩০ রোম তাবদা প্রধান মন্ত্রীনা বারানসীগী শ্রী কাশী বিশ্বনাথ লাইশঙদা দর্শন অমসুং পুজা পাংথোক্কনি। মসিগী মতুংদা প্রধান মন্ত্রী হারদোইদা চৎকনি অমসুং অয়ুক্কী পুং ১১.৩০ রোম তাবদা প্রধান মন্ত্রীনা গঙ্গা এক্সপ্রেসৱে লমথাগনি। মহাক্না থৌরম অদুদা মীয়ামগী মীতিন অমদসু ৱা ঙাংগনি।
বারানসীদা পি.এম.
প্রধান মন্ত্রীনা মহিমা সম্মেলনদা শরুক য়াগনি, লমদম কয়াদগী মশিং য়াম্লবা নুপীশিংনা শরুক য়াবা উবা ফংগনি। প্রধান মন্ত্রীনা লুপা করোর ১০৫০ হেনবগী শেনফম ওইবা লোইশিনখ্রবা প্রোজেক্ত ৪৮ লৈবাক মীয়ামদা কত্থোক্কনি। মরুওইবা ইনফ্রাস্ত্রকচর প্রোজেক্তশিংগী মনুংদা বারানসী-আজমগর লম্বী পাকথোকহনবগী থবক লোইশিনবা, কাজ্জকপুরা অমসুং কাদিপুরদা মরুওইবা রেল ওভর ব্রিজশিং হাংদোকপা, অমসুং ভগৱানপুরদা এম.এল.দি. ৫৫গী কেপাসিতি ওইবা সিৱেজ ত্রিৎমেন্ত প্লান্ত (এস.তি.পি.) অমা শঙ্গাবা অমদি অতোপ্পা কয়া য়াওরি।
প্রধান মন্ত্রীনা কম্ম্যুনিতীদা মীৎয়েং থম্লিবা তোঙান তোঙানবা প্রোজেক্ত কয়া অমসু হৌদোক্কনি। মসিগী মনুংদা জল জীবন মিসনগী মখাদা খুঙ্গংগী থক্নবা ঈশিংগী স্কিম ৩০, চন্দ্রাবতী ঘাতকী নৌনা শেমগৎ-শাগৎপা, সরনাথকী মনাক্তা লৈবা সরঙ্গনাথ লাইশঙগী তুরিজম দিবেলপমেন্ত, অমসুং নাগৱাগী সন্ত রবিদাস পার্কপু ফজহন্নবা অমসুং নৌনা শেমগৎপগী থবকশিং য়াওরি। পব্লিক সর্ভিসশিং অমসুং স্পোর্তসকী ফগৎলকপা অসিসু মশক থোক্না উবা ফংই, য়ু.পি. কোলেজদা সিন্থেতিক হোকী তর্ফ অমা, রামনগরদা ফমুং ১০০ লৈবা ওল্দ এজ হোম অমা, অমসুং বেলুপুর ৱাতর ত্রিৎমেন্ত প্লান্তদা মেগাৱাৎ ১গী সোলার পৱার প্লান্ত অমা য়াওরি। প্রধান মন্ত্রীনা সেন্ত্রেল য়ুনিভর্সিতী ওফ তিবেতন স্তদিজদা লৈবা সোৱা রিগপা ভবন অমসুং হোস্পিতাল শঙ্গাগনি। মসিনা ত্রেদিস্নেল মেদিসিনগা মোদর্ন হেল্থকেয়র সিস্তেমশিংগা পুনশিন্নবগী অচেৎপা ফিরেপ অদু উৎলি।
প্রধান মন্ত্রীনা চাউরাক্না লুপা করোর ৫,৩০০গী প্রোজেক্ত ১১২গী উরেপ উয়ুং তমগনি। মসিগী মনুংদা অম্রুত ২.০গী মখাদা সিৱেরেজ অমসুং ঈশিং সপ্লাই স্কিম ১৩, শ্রী শিব প্রসাদ গুপ্তা দিভিজনেল দিস্ত্রিক্ত হোস্পিতালদা ফমুং ৫০০ লৈবা মল্তি-সুপর-স্পিসিএলিতি হোস্পিতাল, ভোগুভির অমসুং সিগ্রাদা মার্কেত কমপ্লেক্স অমসুং ওফিস স্পেস শেমগৎপা, পুখ্রিশিং নৌহৌননা শেমগৎপা অমসুং হিংগৎহনবা, ফমুং ১৯৮ লৈবা হোস্পিতাল অমা নৌহৌননা শেমগৎপা, ফমুং ১০০ লৈবা ক্রিতিকেল কেয়র ব্লোক অমা শেমগৎপা অমসুং অসী ঘাত, দশেশ্বমেধ ঘা অমসুং নমো ঘাট য়াওনা মতরুওইবা ঘাতশিংদা তুরিজম ফেসিলিতীশিং শেমগৎপা য়াওরি। গভর্নান্স অমসুং সোসিএল ৱেলফেয়র ইনফ্রাস্ত্রকচর মপাঙ্গল কনখৎহন্নবা, প্রধান মন্ত্রীনা ইন্তিগ্রেতেদ দিভিজনেল ওফিস, নগর নিগম ওফিস বিল্দিং অমসুং রামনগরদা গভর্নমেন্ত চাইল্দ সেলতর হোম অমসুং জুবেনাইল জস্তিস বোর্দকী উরেপ উয়ুংসু তমগনি। প্রধান মন্ত্রীনা বনাস দাইরীগা মরী লৈনবা উত্তর প্রদেশকী শঙ্গোম সপ্লাইয়রশিংদা বোনাস ওইনা লুপা করোর ১০৫গী শেনফমসু ত্রান্সফর তৌগনি।
প্রধান মন্ত্রীনা গঙ্গা তুরেলগী মথক্তা রেল অমদি লম্বীগী থোং অমা শাগৎপা য়াওনা বারানসী জঙ্কসন, পন্দিৎ দীন দয়াল উপাধ্যায় জঙ্কসন অহুমশুবা অমসুং মরিশুবা রেলৱে লাইন প্রোজেক্তকী উরেপ উয়ুংসু তমগনি। প্রোজেক্ত অসিনা বারানসী অমসুং চান্দৌলি দিস্ত্রিক্তশিংদা রেলগী কঞ্জেসন হন্থহন্দুনা, লোজিস্তিক্কী ইফিসিএন্সী হেনগৎহন্দুনা, মল্তি-মোদেল কনেক্তিবিতী মপাঙ্গল কনখৎহন্দুনা অমসুং ত্রাফিক্কী খোঙজেল য়াংনা লৈহন্দুনা কান্নবা ফংহল্লগনি। মসিনা কাশী বিশ্বনাথ ধাম, রামনগর এরিয়া অমসুং নেস্নেল হায়ৱে-১৯ ফাওবগী খুদোংচাবসু ফগৎহল্লগনি। মসিনা নোংপোক থংবা উত্তর প্রদেশ অমসুং বিহারগা রেলগী কনেক্তিবিতীসু হেন্না মপাঙ্গল কনখৎহল্লগনি।
প্রধান মন্ত্রীনা অনৌবা অমৃত ভারত এক্সপ্রেস ত্রেন অনিসু লমথাগনি। মখোয় অদুদি বানারস-পুনে (হাদপসর) অমসুং আয়োধ্য-মুম্বাই (লোকমান্য তিলক তর্মিনস) নি। ত্রেনশিং অসিনা মমল হোংবা অমসুং মোদর্ন ওইবা চৎথোক-চৎশিনগী অপাম্বশিং ফংহল্লগনি অমসুং উত্তর প্রদেশ, মধ্য প্রদেশ অমসুং মহারাস্ত্রাগী মরক্তা কনেক্তিবিতী হেনগৎহল্লগনি। বানারস-পুনে সর্বিসনা কাশী বিশ্বনাথ ধামদা হেন্না লায়না চঙবা ঙম্লগনি। অদুগা আয়োধ্য-মুম্বাই সর্বিসনা শ্রী রাম মন্দির তীর্থ ক্ষেত্রাগা শম্নবা হেনগৎহল্লগনি। মসিনা মরুওইবা ধর্মগী মফমশিংগী মরক্তা মরী হেন্না চেৎশিলহল্লগনি।
হারদোইদা পি.এম.
প্রধান মন্ত্রীনা লৈবাক অসিদা মালেমগী থাক্কী ইনফ্রাস্ত্রকচর শেমগৎপদা মরুওইবা মাইলস্তোন অমা ওইরিবা হারদোই জিলাদা গঙ্গা এক্সপ্রেসৱেগী উরেপ-উয়ুং তমগনি। গঙ্গা এক্সপ্রেসৱে অসি কিলোমীতর ৫৯৪ শাংবা, লেন ৬ (লেন ৮ ফাওবা শাংদোকপা য়াবা), এক্সেস-কন্ত্রোল গ্রীনফিল্দ হাই-স্পিদ কোরিদোর অমনি। মসি চাউরাক্না লুপা করোর ৩৬,২৩০ চংনা শাখি। এক্সপ্রেসৱে অসিনা জিলা ১২ - মীরুত, বুলন্দশাহর, হাপুর, অমরোহা, সম্মবল, বাদাউন, শাহজাহানপুর, হারদোই, উন্নাও, রাইবরেলি, প্রতাপগর অমসুং প্রয়াগরাজ - অসিদা চেল্লি। মসিনা উত্তর প্রদেশকী নোংচুপ থংবা, ময়াই থংবা অমসুং নোংপোক থংবা মফমশিং অসি অমত্তা ওইবা অপনবা লৈতবা হায়-স্পীদ কোরিদোর অমগী খুত্থাংদা শম্নহল্লি।
প্রোজেক্ত অসিনা মীরুত অমসুং প্রয়াগরাজগী মরক্তা চৎথোক-চৎশিন তৌবগী মতম হৌজিক্কী পুং ১০-১২দগী পুং ৬ ফাওবা হন্থহল্লগনি হায়না পানরি। মসিনা চৎথোক-চৎশিন তৌবদা হেন্না লায়থোকহল্লগনি অমসুং ত্রান্সপোর্তেসনদা হেন্না ইফিসিএন্সী লৈহল্লগনি।
প্রোজেক্ত অসিগী মরুওইবা হাইলাইৎ অমা হায়রগদি শাহজাহানপুর দিস্ত্রিক্তা কিলোমিতর ৩.৫ শাংবা ইমর্জেন্সী লেন্দিং ফেসিলিতী (এয়রস্ত্রিপ) অমা শেমগৎপনি। অনিথোক্না শীজিন্নবা য়াবা ইনফ্রাস্ত্রকচর অসিনা নেস্নেল সেক্যুরিতীগী শেম-শারিবা অদু হেনগৎহল্লি অমসুং ইকোনোমিক বেনিফিৎকী মথক্তা স্ত্রেতেজিক ভেল্যু হাপচিল্লী।
গঙ্গা এক্সপ্রেসৱে অসি মরু ওইবা ইকোনোমিক কোরিদোর অমা ওইনবা পান্দম থম্লি। মসিদা ইন্তিগ্রেতেদ মেন্যুফেকচরিং অমসুং লোজিতিক কোরিদোরশিং চাউরাক্না হেক্তর ২,৬৩৫দা দিস্ত্রিক্ত ১২ শিনবা থুংনা শেমগৎকনি। এক্সপ্রেসৱে অসিনা লোজিস্তিক্কী মমল হন্থহল্লগনি, সপ্লাই চেনগী ইফিসেন্সী হেনগৎহল্লগনি অমসুং মেন্যুফেকচরিংগী কম্পিতিতিবনেস হেনগৎহল্লগনি।
হেন্না ফবা কনেক্তিবিতীনা লৌমীশিংদা অর্বান অমসুং এক্সপোর্ত মার্কেৎশিংদা হকথেংননা চঙবা ঙমহল্লগনি। মসিনা হেন্না ফবা মমল ফংহনবদা মতেং পাংলগনি অমসুং খুঙ্গংগী ইনকম মপাঙ্গল কনখৎহল্লগনি। প্রোজেক্ত অসিনা তুরিজম হেনগৎহনগনি, অনৌবা শেন্মিৎলোনগী খুদোংচাবশিং ফংহল্লগনি অমসুং লমদম অসিদা হকথেংননা অমসুং নাকোইননা থবক ফংহল্লগনি হায়নসু পান্দম থম্লি।
গঙ্গা এক্সপ্রেসৱে অসিনা রাজ্য অসিদা এক্সপ্রেসৱে নেৎৱার্ক অমা হেন্না পাকথোক চাউথোকহন্নবগীদমক মপাঙ্গল কনবা অমা ওইনা মথৌ তৌগনি। মসিদা আগ্রা-লখনৌ এক্সপ্রেসৱে, জেৱার লিঙ্ক এক্সপ্রেসৱে, ফারুকহবাদ লিঙ্ক এক্সপ্রেসৱে অমসুং মীরুত্তগী হরিদ্বার ফাওবা শাংদোক্নবা থৌরাং তৌরিবা অসি য়াওনা লিঙ্ক কোরিদোর কয়া অমা মথৌ তৌনবা নত্ত্রগা থৌরাং তৌনবা লৈ। অনৌবা এক্সপ্রেসৱে গ্রিদ অসিনা নোংপোক থংবা অমসুং নোংচুপ থংবা অমসুং অৱাং থংবা ফাওবদা উত্তর প্রদেশ শিনবা থুংনা হাই-স্পিদ রোদ কনেক্তিবিতী পাকথোক চাউথোকহল্লগনি। মসিনা রিজনেল দিবেলপমেন্তকীদমক মতেং পাংগনি।
গঙ্গা এক্সপ্রেসৱে অসি ত্রান্সপোর্তেসন প্রোজেক্ত অমা খক্তা নত্তে, মসি ত্রান্সফোর্মেতিব ইনিসিয়েতিব অমনি। মসিনা লোজিস্তিক্কী মমল হন্থহল্লগনি, ইন্দস্ত্রীএল ইনভেস্তমেন্ত লাকহল্লগনি, লৌউ-শিংউ অমসুং খুঙ্গংগী ইনকম হেনগৎহল্লগনি, থবক ফংহল্লগনি অমসুং রাজ্য অসিদা অপুনবা শেন্মিৎলোনগী গ্রোথ পুরক্কনি।
