প্রধান মন্ত্রী শ্রী নরেন্দ্র মোদীনা চেপাউ পীরকপদগী, সরকারগী খোঙচৎ অমদা ফেব্রুৱারি ২৭ দগী মার্চ ২, ২০২৬ ফাওবা, কনাদাগী প্রধান মন্ত্রী মার্ক কারনি ভারত্ত লাক্কনি। মসি প্রধান মন্ত্রী কারনিগী অহানবা সরকারগী খোঙচৎনি।
ফেব্রুৱারি ২৭ দা, প্রধান মন্ত্রী কারনি মুম্বাইদা থুংগনি। মথং নুমিৎদা মহাক্না তোঙান তোঙানবা ললোন-ইতিক্কী মীফমশিং শরুক য়াগনি, ভারত অমসুং কনাদাগী সি.ই.ওশিং, উদ্যোগ অমসুং শেন-থুমগী অখঙ-অহৈশিং, ইন্নোবেতরশিং, ইজুকেতরশিং অমসুং ভারত্ত লৈবা কনাদিয়ান পেন্সন ফন্দসগা উনগনি।
মার্চ ১ দা প্রধান মন্ত্রী কারনি ন্যু দিল্লিদা থুংলগনি। মার্চ ২ দা হায়দ্রবাদ হাওসতা প্রধান মন্ত্রী অনি মীহুৎ কাংবুগী থাক্ত মীফম পাংথোক্কনি। ইন্দিয়া-কনাদা ষ্ট্রাতেজিক পার্তনরশিপকী তোঙান তোঙানবা হিরমশিং, কনানাস্কিস(জুন ২০২৫) অমসুং জোহান্সবার্গ (নবেম্বর ২০২৫) দা মখোয় মীফম পাংথোকপদা য়ানখিবা ৱাফমশিং হৌজিক ফাওবদা থবক ওইনা পাংথোকখ্রবশিংগী মতাংদা লুচিংবা অনিমক্না হন্না খন্নগনি। ললোন-ইতিক অমসুং শেন থাদবা; ইনর্জি; ক্রিতিকেল মিনরেলশিং; লৌউ-শিংউ; লাইরিক-লাইশু, থিজিনবা অমসুং ইন্নোবেসনশিং অমসুং মীগা-মীগা লৈনবা মরীশিং য়াওনা মরুওইবা হিরমশিংদা হৌজিক মতেং পাংনরিবা অসিগী ফিবম মখোয়ন খন্নগনি। লুচিংবা অনিমক্না লমদম লমদমগী অমসুং মালেমগী হৌজিক ওইরিক্লিবা থৌদোক-ৱাথোকশিংগী মতাংদসু খন্নগনি।
তুংদা প্রধান মন্ত্রী মোদী অমসুং প্রধান মন্ত্রী কারনি ইন্দিয়া-কনাদা সি.ই.ওস ফোরম শরুক য়াগনি।
ভারত-কনাদাগী লৈবাক অনিগী মরীশিং ফিবম ফগৎনবা খোঙচৎ অসি য়াম্না মরুওইবা অমনি। লৈবাক অমনা লৈবাক অসিগী মরুওইবা অমসুং তঙাইফদবশিং ইকায়খুম্নবা, মীগা-মীগা লৈনবা অচেৎপা মরীশিং অমসুং অমনা অমগী শেন-থুমগী মতেং পাংনবা চাউখৎলক্লিবা অসিদা য়ুম্ফম ওইরিবা অফবা মরী অমা শেমগৎপা হায়না প্রধান মন্ত্রীশিং হান্না য়ানখ্রে। লুচিংবা অনিগী মরক্ত পাংথোক্কদৌরিবা মীফম অসিনা তুংগী মরী অমা শেমগৎনবা থাজবা থম্লিবা ভারত অমসুং কনাদাগী মান্নবা পান্দম অমসুং অফবা খোঙজেল মখা তানা ফগৎনবা খুদোংচাবা পীগনি।
