হিস মাজেস্তী কিং অব্দুল্লাহ ২ বিন অল হুসেনগী পাউজেলদা প্রধান মন্ত্রী শ্রী নরেন্দ্র মোদী দিসেম্বর ১৫ – ১৬, ২০২৫ দা হসেমাইত কিংদম ওফ জোর্দনদা চৎকদৌরি। খোঙচৎ অদুগী মনুংদা, প্রধান মন্ত্রীনা হিস মাজেস্তী কিং অব্দুল্লাহ ২ বিন অল হুসেনগা উনদুনা ভারত অমসুং জোর্দনগী মরক্তা লৈনরিবা মরী য়েংশিনগনি অমদি রিজনেল ওইবা ৱাফমশিংদা লৈনরিবা মীৎয়েঙশিং তাথোক তাশিন তৌমিন্নগনি। লৈবাক অনিগী মরক্তা দিপ্লোমেতিক ওইবা মরী শেমগৎলকপগী ৭৫ শুবা কুমওনগী ওইনা চৎলিবা খোঙচৎ অসিনা ইন্দিয়া-জোর্দন অনিগী মরী হেন্না চেৎশিলহন্নবা, নাকল অনিমক চাওখৎমিন্ননবা অমদি নুংঙাই য়াইফবা পুরকমিন্ননবা তেংবাংনবা য়াম্বা লম্বীশিং থিজিনমিন্ননবা, অমদি রিজনেলগী ওইবা ইং-তপ্পা, নুংঙাই য়াইফবা, ঙাকশেল অমদি মবুক মরা তপ্পা পুরক্নবা লৌনরিবা খোঙফম চেৎশিলহন্ননবা খুদোংচাবা অমা পীরি।
খোঙচৎ অসিগী অনিশুবা শরুক্তা, ইথিওপিাগী প্রাইম মিনিস্তর ঐচ.ই. দোক্তর অবিয় অহমদ অলিগী পাউজেলদা, প্রধান মন্ত্রীনা ২০২৫ গী দিসেম্বর ১৬ তগী ১৭ ফাওবা ফেদরেল দিমোক্রেতিক রিপব্লিক ওফ ইথিওপিয়াদা লৈবাক্কী থাক্কী খোঙচৎ অমা চৎকনি। খোঙচৎ অসিনা প্রধান মন্ত্রীগী অহানবা ইথিওপিয়া খোঙচৎ ওইগনি। মহাক্না প্রাইম মিনিস্তর দোক্তর অবিয় অহমদ অলিগা ভারত – ইথিওপিয়া নাকল অনিগী মরীগী মীৎয়েঙ পুম্নমক্তা তোঙান তোঙানবা ৱাফমশিংগী মরমদা খন্ন-নৈনগনি। গ্লোবেল সাউথকী খোঙবু অমা ওইনা খোঙচৎ অসিনা মরুপ মপাঙ ওইনা অমদি নাকল অনিগী ওইনা খুৎশম্ননা চৎমিন্নবগী লৈনরিবা নক্নবা মরীবু হেন্না খুমাঙ চাওশিলহন্নবা লৈবাক অনিনা লেপ্লিবা মান্নবা খোঙফম হেন্না চেৎশিলহনগনি।
মহাক্কী খোঙচৎকী অরোয়বা শরুক্তা, ওমনগী হিস মাজেস্তী সুল্তান হাইথম বিন তারিক্কী পাউজেলদা, প্রধান মন্ত্রীনা ২০২৫ গী দিসেম্বর ১৭ তগী ১৮ ফাওবা সুল্তানেত ওফ ওমনদা চৎকনি। মসি প্রধান মন্ত্রী মোদীগী অনিশুবা ওমন খোঙচৎ ওইগদৌরিবনি। ভারত অমসুং ওমনগী মরক্তা চহি চা কয়া লিরবা মরুপ মপাঙ ওইবগী মরী, লল্লোন ইতিক্কী মরী অমদি মীগা মীগগী মরক্তা লৈনরিবা মরীনা য়ুম্ফম ওইবা হীরম পুম্নমক কোনশিনবা স্ত্রেতেজিক পার্ত্নরসিপ অমা লৈরি। খোচৎ অসিনা লৈবাক অনিগী মরক্তা লৈনরিবা দিপ্লোমেতিক ওইবা মরীগী চহি ৭০ ফারকপগা লোয়ননা চৎপা খোঙচৎনি অমদি ওমনগী সুল্তান হিস মাজেস্তীনা ভারত্তা দিসেম্বর ২০২৩ দা লাক্লম্বা খোঙচৎ অদুগী মতুং তারকপনি। খোঙচৎ অসিনা লল্লোন ইতিক, ইনভেস্তমেন্ত, ইনর্জী, দিফেন্স, সিক্যুরিতী, তেক্নোলোজী, লৌউ-শিংউ অমদি নাৎকী লম য়াওনা নাকল অনিগী খোঙবু ওইবগী মরী হন্না মপুং ফানা য়েংশিন্নবা লোয়ননা নাকল অনিগী ইন্তরেস্ততা লৈবা রিজনেল অমদি মালেমগী ওইবা ৱাফমশিংগী মতাঙদা ৱাখল্লোন ফোঙদোক্ননবা তাঞ্জা অমা পীগনি।
