য়ু.পি.গী মুখ্য মন্ত্রী য়োগী অদিত্যনাথজী, গোরাখপুর এম.পি. রভি কিশন শুকলাজী, নহা ওইরিবা শান্নরোয়শিং, কোচশিং, মমা-মপাশিং অমসুং মরুপশিং!
অহৌবদা ঐহাক্না মহায়োগী গুরু গোরাখনাথকী শেংলবা লমদম অসিদা ইকোক নোন্না খুরুমজরি। ‘সান্সদ খেল’গী কম্পিতিসন্দা শরুক য়ারিবা শান্নরোয় পুম্নমক্তা ঐহাক্না থাগৎপা ফোঙদোকচরি অমসুং য়াইফ-মঙ্গোল পীজরি। নখোয় পুম্নমক্না য়াম্না কন্না হোৎনখি। শান্নরোয় খরনা কম্পিতিসন অসিদা থোইরমগনি অমরোমদা খরনা মাইথিবা নংলমগনি। শান্নবুং নত্ত্রগা পুন্সিদা মাই পাকপা অমদি মাইথিবা হায়বসি শরুক অমা ওইদুনা লৈরবনি। ঐহাক্না শান্নরোয়শিংদা করিগুম্বা মখোয়না মসি য়ৌনা চংশিনবা ঙম্লবদি মখোয় মাইথিরবা মীশক অমা ওইদ্রে হায়না হায়জনীংই। নখোয়না কয়া অমা তমশিনখ্রে, লৌশিং ফংখ্রে অমসুং এক্সপরিয়েন্স থেংনখ্রে অমসুং মসি মাইপাক্নবগী খ্বাইদগী চাউবা কেপিতেলনি। নখোয়না খঙলক্কনি মদুদি শান্ন-খোৎনবগী ইথিলনা করম্না তুংলমচত্তা শান্নরোয় পুম্নমক্কী থোঙ হাংদুনা থমগনি।
ঐগী নহা ওইরিবা মরুপশিং,
রেস্তলিং, কাবদ্দি, হোক্কী অসিগুম্বা স্পোর্তস ইভেন্তশিংগা লোয়ননা কম্পিতিসন অসিদা লাই য়েকপা, নাৎকী ঈশৈ, নাৎকী জগোই, তব্লা, বাসিদা আর্তিস্তশিংনা শরুক য়াখি। মসি য়াম্না ফজৈ, শীংথানীংঙাই ওই অমসুং ইথিল পীগদবা থৌশিলনি। শান্ন-খোৎনবগী নৎত্রগা কলা-ঈশৈগী হৈ-শিংবা ওইরবসু মদুগী ইথিল অমদি মতিংদি চপ মান্নৈ। ভারতকী চৎনবী অমদি নাৎকী, কলাগী মওং মতৌশিং মাঙদা পুদুনা চঙশিনবগী থৌদাংগী অসি ঐখোয়না লৌগদবনি। শ্রী রবী কিসন সুক্লা মহাক মশামক আর্তিস্ত অমা ওইনা অমদি থৌরম অসি শিনবদা লৌরিবা থৌদাংগীদমক ঐহাক্না থাগৎলি।
মরুপশিং,
হৌখিবা চয়োল খরসিদা ঐহাক্না অহুমলক শুবা ওইনা সান্সদ খেল মহাকুম্ভদা শরুক য়াবনি। ভারতনা মালেমগী শান্না-খোৎনবগী লমদা মতিক ময়াই ফুদোক্কে হায়রবদি অনৌবা লম্বী অমদি থৌওং শেমগৎপা মথৌ তাই হায়না ঐহাক্না থাজৈ। মসিগী সান্সদ খেল মহাকুম্ভ অসি অসিগুম্বা লম্বী অমদি সিস্তেম অমনি। হৈ-শিংবশিং য়োকখৎনবা লোকেলগী থাক্তা শান্ন-খোৎনবগী অথোই অহেন তান্নবগী মরুওই। রিজনেলগী থাক্তা অথোই অহেন তান্নবনা লোকেল তেলেন্তশিং হেনগৎহনবতা নত্তনা লমদম পুম্বদুগী শান্নরোয়শিংগী পুক্নিংসু থৌগৎলি। গোরখপুরদা খেল মহাকুম্ভ পাঙথোকপা মতমদা শান্নরোয় ১৮,০০০-২০,০০০ হেনবনা শরুক য়াখি। হন্দক্তি মশিং অসি ২৪,০০০-২৫,০০০রোমদা হেনগৎখি। হৌরক্লিবা শান্নরোয়শিং অসিদা নুপী ৯০০০ য়াওরি। খেল মহাকুম্ভ অসিদা শরুক য়ারিবা নহা লিশিং কয়াদি অপীকপা ময়োল্লমশিং অমদি খুঙ্গংদগী হৌরকপনি। সান্সদ খেল মহাকুম্ভ অসি নহা ওইরিবা শান্নরোয়শিংদা খুদোংচাবা কয়া পীরিবা ফম্পাক অমা ওইরক্লি।
মরুপশিং,
ঐখোয়না অঙাংশিংনা মখোয়গী অৱাবা হেনগৎহন্নবা মখোয়গী ইনখৎলকপা মতমদা করিগুম্বা অৱাবা নত্ত্রগা উগী মশা পাইদুনা য়ানবা তোইনা উবা ফংই। হায়বদি চহিগী খেন্নবা থমদনা, মীপুম খুদিংনা মশা মউ ফনা লৈনিংবগী অপাম্বা লৈ। শান্ন-খোৎনবনা খুঙ্গংদা পাঙথোকপা মেলাশিংগী শরুক ওইদুনা আখরাদা মশান্না কয়া পাঙথোক্নরম্মি। অসিগুম্বা চৎনবীশিং অসি মাঙখিদুনা ইকুই কুইদ্রিবা মতমসিদা হোংলক্লি। স্কুলগী পি.তি. পেরিয় অসিবু মতম লেন্নবগী পেরিয়দ ওইনা লৌনরকপা ফীভম অমা লাকখি। মসিনা লৈবাক অসিনা শান্ন-খোৎনবগী লমদা মীরোল অহুম-মরি মাঙথরকপগী ফীভম ওইহনখি। মসিনা মরম ওইদুনা ভারত্তা স্পোর্তস ফেসিলিতী চাউখৎখিদে অমদি অনৌবা স্পোর্তস সিস্তেমশিং লৈখিদে। তি.ভি.দা শন্দোকপা তেলেন্ত হন্ত প্রোগ্রামশিংদা অপীকপা ময়োল্লমশিংদগী অঙাং কয়ানা শরুক য়াবা উবা ফংই। মতৌ অসুম্না ভারত্তা হৈ-শিংবা য়াম্না লৈ অমদি সান্সদ খেল মহাকুম্ভনা শান্ন-খোৎনবগী লমদা লৈবাক অসিগী লৈরিবা মতিং ফুদোক্নবগীদমক অচৌবা থৌদাং লৌগনি। ঙসি বি.জে.পি.গী এম.পি. চা কয়ানা লৈবাক অসিদা স্পোর্তিং ইভেন্তশিং পাঙথোক্লদুনা নহা ওইরিবা শান্নরোয় কয়ানা মাঙদা চঙশিন্নবগী খুদোংচাবা ফংলি। শান্নরোয় কয়ানা স্তেত অমদি নেস্নেলগী থাক্তা শান্নরক্কনি অমদি ওলিম্পিক্সনচিংবা মালেমগী থাক্কী থৌরমশিংদা লৈবাকসিগীদমক মেদলশিংসু ফংলক্কনি। শান্ন-খোৎনবগী তুংলমচৎকী ওইবা অচৌবা ইনফ্রাস্ত্রকচর অমগী চাউরবা য়ুম্ফম সানসদ খেল মহাকুম্ভনা থোল্লি।
মরুপশিং,
খেল মহাকুম্ভগুম্বা ইভেন্তশিংগা লোয়ননা লৈবাক অসিনা অপীকপা ময়োল্লমশিংদা লোকেলগী থাক্তা শান্ন-খোৎনবগী ফেসিলিতীশিং শেমগৎপদা মীৎয়েং চংলি। গোরাখপুরগী রিজনেল স্পোর্তস স্তেদিয়ম অসি মসিগী অচৌবা খুদম অমনি। গোরখপুরগী খুঙ্গংগী লমদা লৈরিবা নহাশিংগীদমক শান্নবুং ১০০ হেন্না শেমগৎখ্রে অমদি চৌরী চৌরাদা মিনি স্তেদিয়ম অমসু শেমগৎলি। খেলো ইন্দিয়া মুফমেন্তগী মখাদা অতোপ্পা স্পোর্তস ফেসিলিতীশিংগা লোয়ননা শান্নরোয়শিং ত্রেনিং তৌবদা মীৎয়েং চংলি। হৌজিক্তি লৈবাক অসিনা মায়কৈ শুবা মঙলান অমগা লোয়ননা মাঙদা চঙশিল্লি। চহি অসিগী বজেৎতা শান্ন-খোৎনবগী মন্ত্রালয়গী বজেৎকী চাকথুং ২০১৪গা চাংদম্নবদা শরুক ৩লোম হেনগৎখি। লৈবাকসিদা মতমগা চুনরবা স্তেদিয়ম কয়া শেমগৎলি অমদি শান্নরোয়শিংদা ত্রেনিংগীদমক লুপা লাখ কয়াগী ওইগদবা তোপ্সকুম্বা স্কিমশিংগী তেংবাংশিং পীরি। খেলো ইন্দিয়া, ফিৎ ইন্দিয়া অমদি য়োগনচিংবা কেম্পেনসিংনা খোঙজেল য়াংনা মাংদা চংশিল্লি। অফবা মচি ওইবা চিঞ্জাক্কীদমক মিল্লেৎশিং হায়বদি কোর্স গ্রেনশিংদা মীৎয়েং চংলি। জোৱার অমদি বজ্রানচিংবা মহৈ মরোংশিং সুপরফুদকী মনুংদা চল্লি মরম অসিনা লৈবাক অসিনা মিল্লেৎশিংবু শ্রী অন্ন হায়না মিংথোল্লি। নহাশিংগী মফমদা কেম্পেন অসিদা শরুক য়াশিন্নবা অমদি লৈবাক্কী মিসন অসিবু লমজিংনবা ৱাফম থমজরি। ঙসি, ওলিম্পিক্সতগী হৌরগা অতৈ অচৌবা তুর্নামেন্তশিংদা, মেদল লৌরকপগী পরিং অসি অদোমগুম্বা নহা ওইরিবা শান্নরোয়শিংখক্তনা মাঙদা পুদুনা চৎকদৌরিবনি।
নহাশিংনা তরং তরং মখা তানা ঙানখিগনি অমদি মখোয়গী মায় পাকপগী মশেক মঙালগা লোয়ননা লৈবাকসিগী মিংচৎ পুরকখিগনি হায়না ঐহাক্না থাজবা থম্মি। মসিগা লোয়ননা ঐহাক্না পুম্নমক্তা য়াইফ-মঙ্গোল পীজরি অমসুং হন্না-হন্না থাগৎচরি!
খঙহঞ্জবা: মসি পি.এম.গী ৱারোলগী চাউরাকপা ৱাহন্থোক্নি। তশেংবা ৱারোলদি হিন্দীদা পীখি।
