খুরুমজরি, শেল-থুম মন্ত্রী শ্রীমত নির্মলা সিতারমনজী, রিজর্ব বেঙ্ককী গভর্নর শ্রী শক্তিকান্ত দাসজী, থৌরম অসিদা শরুক য়ারিবা অতোপ্পা দিগ্নিতরীশিং, তিল্লিবা মীওই পুম্নমক!শেল-থুম মন্ত্রালয়, আর.বি.আই. অমসুং অতোপ্পা ফাইনান্সিএল ইন্সতি্যুসনশিংনা কোরোনাগী ৱারবা মতমগী মনুংদা য়াম্না শীংথানীংঙাই ওইবা থবক অমা তৌখি। অমৃত মহোৎসবকী মতম অসি, ২১শুবা চহিচাগী দিকেদ অসি লৈবাক্কী চাউখৎ-থৌরাংগী ওইনা য়াম্না মরু ওই। মরম অসিনা আর.বি.আই.না য়াম্না চাউবা অমসুং মরু ওইবা থৌদাং লৌরি। লৈবাক অসিগী অনীংবা-অপাম্বশিং অদু তীম আর.বি.আই.না থুংহনগনি হায়না ঐহাক্না চেৎনা থাজৈ।
মরুপশিং,
হৌখিবা চহি ৬-৭তা কেন্দ্র সরকারনা মীচম প্রজাগী কান্ননবা মীৎয়েং চংলি। রিগ্যুলেতর অমা ওইনা আর.বি.আই.না অতোপ্পা ফাইনান্সিএল ইন্সতিত্যুসনশিংগা লোয়ননা লেপ্তনা পাও ফাওনরি। মীচম প্রজাশিংগী খুদোংচাব হেনগৎহন্নবা খোঙথাং কয়া লৌখৎলিবা অসিদা ঐহাক্না নুংঙাইবা পোকই। ঙসি অতোপ্পা খোঙথাং অমসু মসিদা হাপচিল্লরে। ঙসি হৌদোকখিবা স্কীম অনি অসিনা লৈবাক্কী ইনভেস্তমেন্তগী হীরম পাকথোক-চাউথোকহল্লগনি অমদি কেপিতেল মার্কেতশিংদা লায়না, হেন্না শাফবা মওংদা ইনভেস্তরশিংনা এক্সেস তৌবা ফংহল্লগনি। রিতেল দাইরেক্ত স্কীমনা লৈবাক্কী অপীকপা ইনভেস্তরশিংদা সরকারগী সেক্যুরিতীশিংদা লায়না অমসুং শাফনা ইনভেস্তমেন্ত তৌনবা পাম্বৈ অমা পীরি। মসিগা চপ মান্নবা মওংদা, ৱন নেসন, ৱন ওম্বদমেন সিস্তেম অসি ঙসি ইন্তিগ্রেতেদ ওম্বদসমেন স্কীমগা লোয়ননা বেঙ্কিং সেক্তরদা অনৌবা শক্লোন লৌরি। মসিনা ৱাকৎ খুদিংমক অমসুং বেঙ্ককী কস্তমরশিংগী সমস্য মতম চানা অমসুং অপনবা অমত্তা লৈহনদনা কোকহনবদা মতেং ওইরগনি। ঐহাক্কী ৱাখল্লোন্দা দেমোক্রেসীগী খ্বাইদগী কনবা মপাঙ্গল অসি গ্রিভান্স রিদ্রেসেল সিস্তেম মপাঙ্গল কনবা, সেন্সিতিব ওইবা অমসুং প্রোজেক্তিব ওইবা অসিনি। মসিনা দেমোক্রেসীগী খ্বাইদগী চাউবা চাংয়েং অমনি।
মরুপশিং,
রিতেল দাইরেক্ত স্কীমনা শেন্মীৎলোন্দা মীপুম খুদিংমক শরুক য়াহন্নবা ৱাখল্লোন অদুবু অনৌবা পনখৈ তম্না পুরু। মীয়াম্না লৈবাক্কী চাউখৎ-থৌরাং পুরকপদা গভর্নমেন্ত সেক্যুরিতিজ মার্কেতকী মরু ওইবা থৌদাং অদুগী মরমদা খঙই। লৈবাক অমনা অমুক্তা তৌখিদ্রিবা মওংদা ইনভেস্তমেন্তশিং তৌবগী খুত্থাংদা মাগী ফিজিকেল অমসুং দিজিতেল ইনফ্রাস্ত্রকচরবু মতমগা চুনবা ওইহন্নবা হোৎনরিঙৈ তানফমদা অপীক-অপীকপা ইনভেস্তরশিংনা কোওপরেসন অমসুং পার্তিসিপেসন তৌবনা চাউনা মতেং পীগনি। হৌজিক ফাওবদা ঐখোয়গী মিদল ক্লাস, কর্মচারীশিং, অপিকপা ললোন-ইতিক তৌবা মীওইশিং অমসুং সিনিয়র সিতিজেনশিং হায়বদি মখোয়গী অপীকপা সেভিংশিং লৈজবা মীওইশিং অদুনা সরকারগী সেক্যুরিতীশিংদা ইনভেস্ত তৌনবা বেঙ্কশিং, ইন্সুরেন্স নত্ত্রগা ম্যুচ্যুএল ফন্দশিংগুম্বা ইনদাইরেক্ত এভেন্যুশুংদা চৎলি। হৌজিক্তি মখোয়না শাফবা মওংদা ইনভেস্ত তৌনবা অতোপ্পা অফবা লম্বী অমা ফংলে। হৌজিক্তি লৈবাক অসিগী চাউরবা শরুক অদুনা সরকারগী সেক্যুরিতীশিংদা লায়না ইনভেস্ত তৌবা ঙমহল্লগনি অমসুং লৈবাক অসিগী লন তুংশিনবদা হকথেংননা শরুক য়াবা ঙম্লগনি। অদোম্না খঙলম্লগনি মদুদি ভারত্তা লৈরিবা সরকারগী সেক্যুরিতীশিং অসিগী গরেন্তীদ স্তেলমেন্তগী প্রোভিজন অমা লৈ। মতাং অসিদা অপীকপা ইনভেস্তরশিংনা খুদোংথিনীংঙাই ওইদে হায়বগী থাজবা অমা ফংই। অপীকপা ইনভেস্তরশিংদা শাফবা মওংদা ইনভেস্তমেন্ত তৌবদা রিতর্নশিং চাউনা লাক্কনি হায়না থাজবা পীরি অমসুং সরকারনা লৈবাক অসিগী মীচম প্রজাগী অনীংবা অপাম্বশিং অদুগী মতুং ইন্না অনৌবা ভারত অমগীদমক ইনফ্রাস্ত্রকচর অমসুং অতোপ্পা থবক-থৌরমশিং চাউখৎনবা মথৌ তাবা রিসোর্সশিং ফংলগনি। মসি আত্মনির্ভর ভারত অমা ওইহন্নবা প্রজাশিং অমসুং সরকারগী অপুনবা শক্তিনি।
মরুপশিং,
মহৌশানা ফাইনান্সকী হীরমশিং অসি খরা খজিক তেক্নিকেল ওই অমদুং হেদকাইন পারবা মতুংদা মীচমনা মদু তোকথোকই। ঐহাক্কী ৱাখল্লোন্দা ৱাফমশিং অসি মীচমদা হেন্না ফবা মওং অমদা খঙহনবা মথৌ তারে। ঐখোয়না ফাইনান্সিএল ইনক্লুজনগী মতাংদা ৱারী শাবা মতমদা ঐখোয়না লৈবাক অসিগী মীপুম খুদিংমক থৌওং অসিগী মনুং চলহনবা পাম্মি। এক্সপর্ত ওইরিবা নখোয়নসু ৱাফমশিং অসি হেন্না খঙবীরম্লগনি, অদুবু মসি লৈবাক অসিগী মীচমদা খঙহল্লবদি হেন্না কান্নবা ওইগনি। স্কীম অসিগী মখাদা ফন্দ মেনেজরশিংগী মথৌ তাদে অমসুং “রিতেল দাইরেক্ত গিল্ত (আর.দি.জি.) একাউন্ত” অসি মখা মশানা ওপরেত তৌজবা য়াই হায়বা অসি মখোয়দা খঙহনবা তাই। একাউন্ত অসি ওনলাইন্দা হাংবা য়াই অমসুং মীয়াম্না সেক্যুরিতীশিং ওনলাইন্দা ত্রেদ তৌবা য়াগনি। মসি তোলোপ চাবা অমসুং পেন্সন চাবা মীওইশিংগী ওইনদি খ্বাইদগী শাফবা ইনভেস্তমেন্ত তৌনবগী ওপ্সন অমা ওইরি। মফম অমত্তদা চৎপগী মথৌ তাররোই। অদোম্না ইন্তর্নেত কন্নেক্তিবিতী য়াওবা অদোমগী মোবাইল ফোনশিং অদুগী খুত্থাংদা ত্রেদ তৌবা য়ারগনি। মসিগী আর.দি.জি. একাউন্ত অসি ইনভেস্তরগী সেভিং একাউন্তশিংগী লিঙ্কসু তৌগনি অদুনা লৈবা অমসুং য়োনবা অসি ওতোমেতিক ওইহনবা য়াই। অদোম্না মসিদা মীয়ামদা কয়াম খুদোংচাহনগদগে হাববা খন্থদুনা য়েংবীয়ু।
মরুপশিং,
ইনভেস্তমেন্ত অমসুং বেঙ্কিং সেক্তরদা খুদোংচাহন্নবা মীচম প্রজাশিংগী থাজবা অমসুং নুংঙাইবা অসি মরু ওইবা অদুগুম্না ফাইনান্সিএল ইনক্লুজন অমসুং ইজ ওফ এক্সেস অসি মরু ওইরি। মপাঙ্গল কনবা শেন্মীৎলোন অমা ওইহনবদা মপাঙ্গল কনবা বেঙ্কিং সিস্তেম অমা য়াম্না মরু ওই। ২০১৪দা লৈবাক অসিগী বেঙ্কিং সিস্তেমদা থোকখিবা অমাংবশিং অদু মীপুম খুদিংমক্না খঙলমগনি। মতম অদুদা করি ফীভম ওইরমখি? চহি ৭তা ত্রান্সপরেন্সীগা লোয়ননা এন.পি.এ.শিং মশক খঙদোকখি, রিজোলুসন অমসুং রিকভরীদা মীৎয়েং চংখি, পব্লিক সেক্তর বেঙ্কশিং অমুক হন্না কেপিতেলাইজ তৌখি, ফাইনান্সিএল সিস্তেম অমসুং পব্লিক সেক্তর বেঙ্কশিংদা রিফোর্ম মথং-মথং পুরকখি। মমাংদা সিস্তেম অসিদগী কান্নবা লৌথোক্লম্বা দিফোল্তরশিং অদুনা হৌজিক্তি মার্কেত্তগী ফন্দশিং খোমগৎপা য়াররোই। পব্লিক সেক্তর বেঙ্কশিংগী গভর্নান্স ফগৎহনবা, ৱারেপশিং লৌবা, ত্রান্সফর অমসুং পোস্তিংশিংগা মরী লৈনবা মনীং-মখা তম্বা, অপীকপা বেঙ্কশিং মর্জ তৌদুনা অচৌবা বেঙ্কশিং শেম্বা নত্ত্রগা নেস্নেল এসেত রিকনস্ত্রক্সন কম্পনী লিমিতেদ লিংখৎপা ওইরবসু লৌখৎখিবা খোঙথাং কয়া অসিগা লোয়ননা বেঙ্কিং সেক্তরদা অনৌবা থাজবা অমসুং থৌনা হাপ্লি।
মরুপশিং,
বেঙ্কিং সেক্তর মপাঙ্গল কনখৎহন্নবা কোওপরেতিব বেঙ্কশিং অসি আর.বি.আই.গী মীৎয়েং মখাদা থমখি। মসিনা মরম ওইরগা বেঙ্কশিংগী গভর্নান্স ফগৎলক্লি অমসুং দিপোজিতরশিংগী মরক্তা সিস্তেম অসিদা থাজবা থম্বা হেন্না হেনগৎলক্লি। হৌখিবা মতম খরা অসিদা দিপোজিতরশিংগী য়েংলগা ৱারেপ কয়া লৌখি। ৱান নেসন, ৱান ওম্বদসমেন সিস্তেম অসিনা দিপোজিতর অমসুং ইনভেস্তরশিংদা পীখিবা থাজবা অদু চেৎশিনহনখি। ঙসি হৌদোকখিবা স্কীম অসিনা বেঙ্কশিং, এন.বি.এফ.সি.শিং অমসুং প্রি-পেদ ইনস্ত্রুমেন্তশিংদা লৈরিবা লোন একাউন্ত হোল্দর করোর ৪৪দা অমসুং দিপোজিত একাউন্ত করোর ২২০দা হকথেংননা মতেং পীরগনি। হৌজিক্তি একাউন্ত হোল্দরশিংগী গ্রিভান্সশিং রেজিস্তর, ত্রেক অমসুং মোনিতর তৌনবা আর.বি.আই.না রিগ্যুলেত তৌবা এন্তিতী পুম্নমক্তা সিঙ্গল প্লেতফোর্ম অমা পীরগনি। অতোপ্পা ৱাহৈদা হায়রগা, একাউন্ত হোল্দরনা হৌজিক্তি গ্রিভান্স রিদ্রেসেল লায়না ফংলগনি। খুদম ওইনা, মমাংদা কনাগুম্বা অমনা লখনৌদা বেঙ্ক একাউন্ত লৈরবা অমসুং মহাক্না দিল্লীদা থবক তৌরবদি মহাক্না লখনৌগী ওম্বদসমেনদা খক্তা ৱাকৎ থাংগৎপা য়ারম্মি। অদুবু হৌজিক্তি মহাক্না ভারতকী মফম অমা হেক্তদগী মহাক্কী ৱাকৎ অদু রেজিস্তর তৌনবা খুদোংচাবা ফংলে।
মরুপশিং,
হৌখিবা চহি খরা অসিদা লৈবাক অসিগী বেঙ্কিং সেক্তরদা ফাইনান্সিএল সেক্তরদা ইনক্লুজনদগী তেক্নোলোজীকেল ইন্তিগ্রেসন অমসুং অতোপ্পা রিফোর্মশিং পুরকখি। ঐখোয়না মখোয়গী মপাঙ্গল অদু কোবিদকী অৱাবা মতমদা উবা ফংখি। আর.বি.আই.গী ৱারেপশিংনসু নৌনা সরকারনা লৌখিবা অচৌবা ৱারেপশিংগী শাফু হেনগৎহনবদা মতেং ওইখি। ঐহাক্না আর.বি.আই.গী গভর্নর অমসুং মহাক্কী অপুনবা তীমবু খুদোংথিবা নংলিঙৈ মনুংদা লৌখিবা অচৌবা ৱারেপশিং অদুগীদমক মীয়াম মাংদা থাগৎপা ফোঙদোকচরি। সরকারনা লাউথোকখিবা ক্রেদিত গরেন্তী স্কীম অদুগীদমক লুপা করোর লাখ ২.৯০ হেনবগী লোন সেঙ্কসন তৌখি। মসিনা বেনিফিসতী করোর ১.২৫ হেন্না, অচৌবা এম.এস.এম.ই.শিং অমসুং ঐখোয়গী মিদল ক্লাস স্মোল ওন্তপ্রিনোরশিংদা মখোয়গী এন্তর্প্রাইজ মপাঙ্গল কনখৎহনবদা মতেং ওইখি।
মরুপশিং,
কোবিদকী মতম অদুগী মনুংমক্তদা অপীকপা লৌমীশিংদা কিসান ক্রেদিত কার্দশিং পীনবা সরকারনা অখন্নবা কেম্পেন অমা হৌদোকখি। মসিগী মখাদা লৌমী করোর ২.৫ হেনবনা কে.সি.সি. কার্দশিং ফংখি অমসুং মখোয়না লুপা করোর লাখ ২.৭৫গী লৌউ-শিংউগী লোনশিংসু ফংখি। থেংলাদা পোৎচৈ অমসুং মনা-মশিং য়োনবা স্ত্রী ভেন্দর লাখ ২৬রোমনা পি.এম. স্বনিধি স্কীমগী মখাদা লোনশিং ফংখি। কোবিদকী ৱারবা মতম অসিগী মনুংদা স্ত্রীত ভেন্দর লাখ ২৬তা অসিগুম্বা শেলগী মতেং ফংবা অসিনা কয়াম মতেং ওইরমগনি খন্থদুনা য়েংবীয়ধ। স্কীম অসিনা মখোয়বু বেঙ্কিং সিস্তেমগসু লিঙ্ক তৌখি। অসিগুম্বা থৌরাং কয়ানা খুঙ্গং অমদি সহরশিংদা শেন্মীৎলোনগী থবক-থৌরমশিং অমুক হৌহনবদা য়াম্না মরুওইবা থৌদাং অমা লৌখি।
মরুপশিং,
চহি ৬-৭ ফাওবগী মমাংদা বেঙ্কিং, পেন্সন অমসুং ইন্সুরেন্স অসি ভারত্তা অখন্নবা ক্লব অমা ওইনা তৌরম্মি। খুদোংচাবা পুম্নমক লৈবাক অসিগী মীচম প্রজা, লায়রবা ইমুং, লৌমী, অপীকপা ললোন-ইতিক তৌবা মীওইশিং, নুপী-অঙাং, দলিত – খুদোংচাবা ফংদ্রবা – শোত্থরবা অসিনচিংবদা ফংহল্লমখিদে। খুদোংচাবশিং অসি লায়রবদা য়ৌহন্নবা থৌদাং লৌরিবা মীওইশিংনা মসিদা মীৎয়েং অমত্তা চংলমখিদে। মসিগী মহুৎ অহোংবা পুরক্তবগী তোঙান-তোঙানবা মরমশিং পীখি। বেঙ্ক ব্রাঞ্চ অমত্তা লৈতে, স্তাফ লৈতে, ইন্তর্নেত লৈতে, এৱেরনেস লৈতে। করিনো খঙদবা মরম কয়া অমা পীরমখি? কান্নবা ফংদনা সেভিং তৌবা অমসুং নীয়ম চুম্না শেল পুদবা অসিনা মরম ওইগা মীচম প্রজাশিংগী ফীভম হেন্না-হেন্না শোকচিল্লকখি অমসুং লৈবাক অসিগী চাউখৎ-থৌরাংদা মখোয়না য়াওবা ঙমখিদে। পেন্সন অমসুং ইন্সুরেন্স অসি নুংঙাই য়াইফবা ইমুংশিংগীনি হায়না খন্নরমখি। অদুবু হৌজিক্তি ফীভম অসিদা অহোংবা পুরক্লে। ঙসিদি ফাইনান্সিএল ইনক্লুজন খক্তা নত্তনা এজ ওফ এক্সেস অসিনা বেঙ্কিং অমসুং ফাইনান্সিএল সেক্তরদা ভারতকী মশক তাক্লি। ঙসি খুন্নাই অসিগী মীপুম খুদিংমক্না চহি ৬০গী মতুংদা পেন্সন স্কীম য়াওবা য়ারে। মীওই করোর ৩৮রোমনা পি.এম, জীবন জ্যোতি বিমা য়োজনা অমসুং পি.এম. সুক্ষা বিমা য়োজনাগী মখাদা অমমনা লুপা লাখ ২গী কবর ফংহল্লি। লৈবাক অসিগী খুঙ্গং খুদিংমক্তা কিমি ৫গী অরাপ্পগী মনুংদা বেঙ্ক ব্রাঞ্চ নত্ত্রগা বেঙ্কিং কোরেস্পোন্দেন্ত লৈরে। ঙসি লৈবাক অসিদা বেঙ্কিং তচ পোইন্ত লাখ ৮.৫ লৈরে। জন ধন য়োজনাগী মখাদা জেরো বেলেন্স বেঙ্ক একাউন্ত করোর ৪২ হেন্না হাংবা ঙমখ্রে মসিদা ঙসি লুপা করোর লিশিং কয়া হাপখ্রে। মুদ্র স্কীমগী মখাদা নুপী, দলিত-শোত্থরবা-ত্রাইবেলশিংগী মরক্তগী ললোন-ইতিক তৌবা অনৌবা মীরোলশিং থোরক্লে অমসুং স্বনিধি স্কীমগী খুত্থাংদা স্ত্রী ভেন্দরশিংনা ইন্সতিত্যুস্নেল লেন্দিংদা শরুক য়াবা ঙম্লে।
মরুপশিং,
লাস্ত-মাইল ফাইনান্সিএল ইনক্লুজনগা লোয়ননা দিজিতেল এম্পাৱর্মেন্ত তৌবা অসিনা লৈবাক অসিগী মীয়ামদা অনৌবা থৌনা পীরি। লৈবাক অসিগী কাচিন-কোয়াদা রুপে কার্দ করোর ৩১ হেনবনা অমসুং পি.ও.এস/এম-প.ও.এস. মেছিন লাখ ৫০রোমনা দিজিতেল ত্রাঞ্জেক্সনশিং তৌরি। য়ু.পি.আই.না ভারতপু তেল্লবা মতম অসিগী মনুংদা দিজিতেল ত্রাঞ্জেক্সনশিং তৌবদা মালেমগী মাংজিল থারিবা লৈবাক ওইহনখি। শুপ্নগী চহি ৭ অসিদা ভারতনা দিজিতেল ত্রাঞ্জেক্সনশিংগী ওইনা শরুক ১৯ হেনগৎখি। ঙসি ঐখোয়গী বেঙ্কিং সিস্তেম অসি পুং ২৪, নুমিৎ ৭নি অমসুং থা ১২ চুপ্না মতম অমা হেক্তদা, লৈবাক অসিগী মফম অমা হেক্তদা মথৌ তৌরি। ঐখোয়না মসিগী কান্নবা অসি কোরোনাগী মতমদা উবা ফংখ্রে।
মরুপশিং,
আর.বি.আই.না সেন্সিতিব রিগ্যুলেতর অমা ওইরবা অমসুং মশাবু হোংলক্লিবা ফীভমশিং অসিগীদমক শেম-শাদুনা লৈবা ঙম্লবা মতমদা লৈবাক অসিগী অচৌনা পাঙ্গল ওইগনি। হৌজিক মতম অসিদা ঐখোয়গী ভারতকী স্তার্তঅপশিং অসিনা ফিনতেক্তা গ্লোবেল চেম্পিয়নশিং করম্না ওইরকপগে হায়বা নখোয়না উবা ফংলি। লম অসিদা তেক্নোলোজীনা লেপ্পা লৈতনা হোংলক্লি। ঐখোয়গী লৈবাক অসিগী নহারোলশিংনা ভারতপু ইন্নোভেসনশিংগী গ্লোবেল পাৱর হাউস অমা ওইহল্লি। অসিগুম্বা ফীভম অসিদা হোংলক্লিবা অসি ঐখোয়গী রিগ্যুলেতিং সিস্তেমনা খঙনবা মীৎবা শিংনা লৈবা অমসুং ঐখোয়গী ফাইনান্সিএল ইস্তেমশিং অসি মালেমগী থাক্তা পুখৎনবা চুনবা অমসুং ইকোসিস্তেম এম্পাৱর তৌবা মথৌ তাই।
মরুপশিং,
ঐখোয়না লৈবাক অসিগী প্রজাশিংগী মথৌ তাবশিং অদু থুংহনবা হায়বা অসিদা মীৎয়েং থম্বা অমসুং ইনভেস্তরশিংগী থাজবা হেনগৎনবা হোৎনবা তাই। আর.বি.আই.না ভারতপু সেন্সিতিব ওইবা অমসুং ইনভেস্তর ফ্রেন্দলী দেস্তিনেসন অমা ওইনবগী অনৌবা মশক অসি মখা তানা চেৎশিনহনগনি হায়না ঐহাক্না থাজবা থম্লি। অমুক্কা হন্না ঐহাক্না থৌশিলশিং অসিগীদমক অমসুং অচৌবা রিফোর্শিং অসি পুরক্লিবা তেক্নোলোজীগী ওইবা ইন্নোভেসনশিংগীদমক স্তেকহোল্দর পুম্নমক্তা য়াইফ মঙ্গোল পীজরি।
হন্না-হন্না থাগৎচরি!
