খুরুমজরি।
মরুপশিং,
ঐখোয়গী হেল্থকেয়রগী মতাংদা নৈনবা মতমদা মসি কোবিদ লাইচৎকী মমাং অমদি মতুংগী সিস্তেমশিংদা মীৎয়েং থমগদবনি। কোরোনানা মালেম পুম্বদা অচৌবা খুদোংথিবা অমা থোকপা মতমদা চাউখৎলবা লৈবাকশিং ফাওবা চেংথৈ ফংখি হায়না উৎখি অমসুং তাকখি। লাইচৎনা মমাংদগী হেন্না মালেমগী মীৎয়েং অসি হকশেলদা থমহনখি, অদুবু ভারতী এপ্রোচ অসি হেল্থকেয়র খক্তদা লোইশিনখিদে অদুবু ভারতনা খোঙকাপ অমা ময়ামদগী হেনগৎনা থাংদুনা হকচাং ফনা থম্বদা মীৎয়েং চংখি। মরম অসিনা ঐখোয়না মালেমগী মাংদা বিজন অমা মাংদা পুখৎখি – ৱান আর্থ ৱান হেল্থ। মসিদা জিবা পানবা পুম্নমক – মীওইবা, শা-ঙা নত্ত্রগা পাম্বীশিংগীদমক হোলিস্তিক হেল্থকেয়র য়াওরি। কোরোনাগী মালেমগী লাইচৎনা সপ্লাই চেন অসি কয়াম মরু ওইবগে ঐখোয়দা তাকপীখি। হীদাক-লাংথক, ভেক্সিনশিং অমসুং মেদিকেল দিভাইসশিংগুম্বা পুন্সি কন্নবা ইক্বিমেন্তশিং অসি লাইচৎ কন্না শন্দোরকপা মতমদা লৈবাক খরগী ওইনা মসিবু খুৎলাই ওইনা শীজিন্নখিবা অসি লাইবকথিবনি। মমাং চহিগী বজেৎতা ভারতনা হীরম পুম্নমক অসিদা চাউনা মীৎয়েং চংখি। সরকারনা মীরৈবাকশিংদা ভারতনা মীপাল তাংলিবা অসি হন্থহন্নবা লেপ্পা লৈতনা হোৎনখি অমসুং মসিদা স্তেকহোল্দর পুম্নমক্কী থৌদাং য়াম্না চাউই।
মরুপশিং,
নীংতম্বা ফংলবা মতুং দিকেদ কয়া হেল্থকীদমক ইন্তিগ্রেতেদ লোং-তর্ম বিজন অমা লৈরমখিদে। ঐখোয়না হকশেলগী হীরম অসি শুপ্নগী হকশেল মন্ত্রালয় খক্তগী ওইহনবগী মহুৎ হোল-ওফ-দি-গভর্নমেন্ত এপ্রোচতা হৌজিক চংশিল্লি। অনা লায়েংদা শেল চংহনদবা হায়বা অসিদা ঐখোয়গী সরকারনা খ্বাইদগী মরু ওইবা মীৎয়েং চংখি। আয়ুশ্মান ভারতকী মখাদা লুপা লাখ ৫ ফাওবগী লেম্না লায়েংবগী খুদোংচাবা পীবা হায়বা অসি ঐখোয়গী ৱাখলদা লৈখি। মসিগী মখাদা লায়রবা অনাবশিংনা স্কিম অসিগী মখাদা লেম্না লায়েংবা ফংজদুনা লুপা করোর লিশিং ৮০ তুংশিনবা ঙমখি। হয়েং হায়বদি মার্চ ৭ অসি জন ঔশধি দিবস হায়না লৈবাক্না পালন তৌগনি। ঙসি লৈবাক অসিদা জন ঔশধি কেন্দ্র ৯০০০ লৈ। কেন্দ্রশিং অসিদা কৈথেলদা ফংবা মমলদগী হেন্না হোংনা হীদাক-লাংথকশিং ফংহল্লি। মসিগী মথক্তা অহোংবা মমলদা হীদাক-লাংথকশিং লৈবা ফংদুনা লায়রবা অমদি মিদল ক্লাসকী মীওইশিংগী লুপা করোর লিশিং ২০ রোম তুংশিনহনবা ঙমখি। হায়বদি শুপ্নগী স্কিম অনি খক্তনা প্রজাশিংগী লুপা করোর লাখ অমা তুংশিনবা ঙমহনখি হায়বনি।
মরুপশিং,
অরুবা অনাবশিং লায়েংনবা লৈবাক অসিদা মপাঙ্গল কনবা হেল্থ ইনফ্রাস্ত্রকচর থম্বা মরু ওই। মীয়াম্না মখোয়গী য়ুমশিংগী মনাক্তা তেস্তিং সেন্তরশিং অমসুং ফার্স্ত এদ ফংহন্নবগীদমক সরকারনা মরু ওইবা মীৎয়েং চংখি। মসিগীদমক লৈবাক শিনবা থুংবদা হেল্থ এন্দ ৱেলনেস সেন্তর লাখ ১.৫ হেন্না শাগৎলি। সেন্তরশিং অসিদা দিবেতিস, কেন্সর অমসুং থমোয় লৈনাগা মরী লৈনবা অরুবা অনাবশিং স্ক্রিনিং তৌনবগীদমক ফেসিলিতীশিং অসিসু থম্লি। ক্রিতিকেল হেল্থ ইনফ্রাস্ত্রকচর অসি পি.এম.-আয়ুশ্মান ভারত হেল্থ ইনফ্রাস্ত্রকচর মিসনগী মখাদা অপীকপা সহর অমদি খুঙ্গংশিংদা ফংহল্লি মসিনা অনৌবা হোস্পিতালশিং শাগৎহনবা খক নত্তনা অনৌবা অমদি মপুং ফাবা হেল্থ ইকোসিস্তেম অমা ফংহল্লি। মরম অসিনা হেল্থ ওন্তপ্রিনোরশিং, ইনভেস্তরশিং অমসুং প্রোফেস্নেলশিংগীদমক খুদোংচাবা কয়া ফংহনখি।
মরুপশিং,
হেল্থ ইনফ্রাগা লোয়ননা সরকারনা হ্যুমেন রিসোর্সতা মরু ওইবা মীৎয়েং চংখি। হৌখিবা চহি খরা অসিদা অনৌবা মেদিকেল কোলেজ ২৬০ হেন্না হাংদোকখি। মসিনা মরম ওইদুনা ২০১৪গা চাংদম্নবদা হায়বদি ঐখোয়না শক্তি পাইরবা মতুংদা গ্রেজুএৎ অমসুং পোস্তগ্রেজুএৎ মেদিকেল কোর্সশিংগী মেদিকেল সীৎশিং শরুক অনি হেনগৎহনখি। নখোয়নসু খঙদি মাইপাক্লবা দোক্তর অমগীদমক মাইপাক্লবা তেক্নিসিয়ন অমা য়াম্না মরু ওই। মরম অসিনা চহি অসিগী বজেৎতা নর্সিং ফিল্দদা মীৎয়েং থমখি। মেদিকেল কোলেজশিংগী মনাক নকপদা নর্সিং কোলেজ ১৫৭ হাংদোকপা অসি মেদিকেল হ্যুমেন রিসোর্সশিংগী মাইকৈদা থাংজিনবা অচৌবা খোঙথাং অমনি। মসিনা দোমেস্তিক্কী মথৌ তাবা খক নত্তনা গ্লোবেল দিমান্দ থুংহনবদা কান্নরগনি।
মরুপশিং,
হেল্থকেয়র এক্সেসিবল অমসুং এফোর্দেবল ওইহনবদা তেক্নোলোজীনা লৌরিবা থৌদাং অসি লেপ্তনা হেনগৎলক্লি। মরম অসিদা হেল্থ সেক্তরদা তেক্নোলোজী ইমপ্লিমেন্ত তৌনবা সরকারনা মীৎয়েং চংলি হায়খি। দিজিতেল হেল্থ আই.দি.গী খুদোংচাবগী খুত্থাংদা প্রজাশিংদা মতম চানা হেল্থ কেয়র ফংহনবা ঐখোয়না পাম্মি। ই-সঞ্জীবানিগুম্বা স্কিমশিংগী খুত্থাংদা তেলিকনসল্তেসননা মীওই করোর ১০দা কান্নবা ফংহনখি। হৌজিক ৫জি তেক্নোলোজীনা মরম ওইদুনা স্তার্তঅপশিংগীদমক সেক্তর অসিদা অনৌবা খুদোংচাবশিং পীরি। দ্রোনশিংনা মেদিসিন দেলিভরী অমসুং তেস্তিং সর্ভিসশিংদা অচৌবা অহোংবশিং পুরক্লি। মসিনা য়ুনিভর্সেল হেল্থকেয়রগীদমক ঐখোয়গী খোঙথাংশিংদা শাহৌ অমা পীরগনি। মসি ঐখোয়গী ওন্তপ্রিনোরশিংগীদমক অচৌবা খুদোংচাবা অমনি। ঐখোয়গী ওন্তপ্রিনোরশিংনা হৌজিক তেক্নোলোজী অমা হেক্তদা ইম্পোর্ত তৌবা তৌরোইদবনি, ঐখোয়না মরোমদোম লেপচবা ঙম্নবা হোৎনগদবনি। ফার্মা অমসুং মেদিকেল দিভাইস সেক্তরদা লৈরিবা পোতেন্সিএল অসি য়েংলগা মসিগীদমক তঙাই ফদবা ইন্সতিত্যুস্নেল রিফোর্মশিং ঐখোয়না পুরক্লি।
হৌখিবা চহি খরা অসিদা অনৌবা স্কিম কয়া হৌদোকখি। বল্ক দ্রগ পার্কশিংগী ৱাফম ওইরবসু, মেদিকেল দিভাইস পার্কশিংগী সিস্তেম দিবেলপ তৌবগী ৱাফম ওইরবসু, পি.এল.আই.গুম্বা স্কিমশিংদা করোর লিশিং ৩০ হেন্না ইনভেস্ত তৌখি। চহি খরা অসিদা মেদিকেল দিভাইস সেক্তরদা গ্রোথ চাদা ১২-১৪ উবা ফংখি। মার্কেৎ অসি লাক্কদৌরিবা চহি ২-৩দা লুপা করোর লাখ ৪ য়ৌরগনি। ভারতনা তুংলমচৎকী মেদিকেল তেক্নোলোজী অমসুং হায়-এন্দ মেন্যুফেকচরিং এন্দ রিসর্চকীদমক স্কিল্দ মেনপাৱর পুথোক্নবা থবক তৌখি। মেদিকেল ইক্বিপমেন্তগী মেন্যুফেকচরিংদা ত্রেনিং পীনবগীদমক আই.আই.তি. অমসুং অতোপ্পা ইন্সতিত্যুসনশিংদা বাইওমেদিকেল ইঞ্জিনীয়রিংগুম্বা কোর্সশিং হাংলি। মসিদসু প্রাইবেৎ সেক্তরনা করম্না হেন্না শরুক য়াগনি, করম্না ইন্দস্ত্রী, একাদেমিয়া অমসুং সরকারগী মরক্তা চাউনা কোওর্দিনেসন পীনগনি হায়বা অসিদা ঐখোয়না পুন্না থবক তৌগদবনি।
মরুপশিং,
করিগুম্বা মতমদা খুদোংথিবশিংনা মশাবু উৎথোকচনবা খুদোংচাবা অমা পুরকই। মসি কোবিদকী মতম মনুংদা ফার্মা সেক্তরনা উৎখি। ভারতকী ফার্মা সেক্তরদা মালেম্না থাজবা থম্বা হেনগৎলক্লিবা অসি কেপিতেলাইজ তৌবা অমসুং মসিগী মীংচৎ অসি ঙাক্নবা মাইকৈদা থবক তৌবগী মথৌ তাই। সেন্তর ওফ এক্সিলেন্সকী খুত্থাংদা ফার্মা সেক্তরদা রিসর্চ অমসুং ইন্নোভেসন শাহৌ পীনবা অনৌবা প্রোগ্রাম অমা লোঞ্চ তৌখি, মসিনা শেন্মীৎলোন মপাঙ্গল কনখৎহনবগা লোয়ননা থবক্কী অনৌবা খুদোংচাবশিং পীরগনি। ভারতকী ফার্মা সেক্তরগী মার্কেৎ সাইজ অসি ঙসি করোর লাখ ৪ ওইরে। প্রাইবেৎ সেক্তর অমসুং একাদেমিয়াগী মরক্তা কোওর্দিনেসন তৌরবদি মার্কেৎ সাইজ অসি করোর লাখ ১০ হেনহনবগী পোতেন্সিএল লৈ। ফার্মা সেক্তরশিংনা ইনভেস্তমেন্তগীদমক মরু ওইবা লমশিং মশক খঙদোক্নবা অমসুং মখোয়দা ইনভেস্ত তৌনবা অপাম্বা ফোঙদোকচরি। সেক্তর অসিদা রিসর্চ হেনগৎহন্নবা সরকারনা খোঙথাং কয়ামরুম লৌখৎলি। রিসর্চ ইন্দস্ত্রীগীদমক আই.সি.এম.আর.না অনৌবা লেব কয়া হাংদোকখি। ঐখোয়না মসিদা হাংদোকপা য়াবা অতোপ্পা মান্নবা ইনফ্রাস্ত্রকচরশিং করি লৈবগে য়েংবীয়ু।
মরুপশিং,
প্রিভেন্তিব হেল্থকেয়রদা লৌখৎলিবা সরকারগী খোঙথাংশিংনা চাউনা কান্নবা পীখি। অমোৎ অকাইদগী শন্দোরকপা লাইনাশিংদগী ঙাকথোক্নবা স্বচ্ছ ভারত অভিয়ান, মৈখুগা মরী লৈনবা লাইনাশিংদগী কন্নবা উজ্জ্বলা স্কিম, ফত্তবা ঈশিংনা থোকহনবা লাইনাশিং লাকশিন্নবা জল জীবন মিসন অসিগুম্বা থৌশিলশিংনা ঙসি লৈবাক অসিদা অফবা ফলশিং পুরকপা ঙমখি। মতৌ অদুম্না ঐখোয়গী লৈবাক্কীদমক মালন্যুত্রিসন অমসুং এনেমিয়া অসি মরু ওইবা সমস্যা অমনি। মরম অসিনা ঐখোয়না নেস্নেল পোশন মিসন হৌদোকখি। অমসুং হৌজিক সুপর ফুদ ওইরিবা মিল্লেৎ হায়বদি শ্রী অন্ন অসিনা মচি ওইবা চীঞ্জাক্কীদমক মরু ওইবা চীঞ্জাল অমা ওইরবা অসি নুংঙাইরবা ৱাফম অমনি। অমসুং লৈবাক্কী ইমুং খুদিংমক্না মসিগী মরমদা খঙনরি। হায়বদি শ্রী অন্নদা চাউনা মীৎয়েং থম্নরি। ভারতকী খোঙথাংশিংনা মরম ওইদুনা য়ুনাইতেদ নেসন্সনা ইন্তর্নেস্নেল ইয়র ওফ মিল্লেৎস হায়না চহি অসিদা পাঙথোক্লি। মতৌ অসুম্না পি.এম. মত্রু বন্দনা য়োজনা, মিসন ইন্দ্রধনুশ, য়োগ, ফিৎ ইন্দিয়া মুফমেন্ত, অমসুং আয়ুর্বেদনা লাইনাশিংদগী মীওই কয়া ঙাকথোক্লি। ভারতকী আয়ুর্বেদকা মরী লৈনবা প্রদক্তশিংগী দিমান্দ অসি মালেম শিনবা থুংবদা হেনগৎলক্লি। ভারতখি খোঙথাংশিংগা লোয়ননা ভারত্তা দবল্যু.ঐচ.ও.গী লমজিং মখাদা গ্লোবেল সেন্তর ফোর ত্রেদিস্নেল মেদিসিন লিংখৎখি। মরম অসিনা ঐহাক্না হেল্থ সেক্তর অমসুং মরু ওইনা আয়ুর্বেদকী মরুপশিংদা হায়জনীংবদি ঐখোয়না ইভিদেন্স-বেজ রিসর্চ চাউনা হেনগৎহনবা তাই। ফলগী মতাংদা ঙাংনা খক্তনা য়ারোই। ইভিদেন্স হায়বা অসি চপ মান্না মরু ওই। মসিগীদমক আয়ুর্বেদকী লমদা থবক তৌরিবা ওন্তপ্রিনোরশিং, রিসর্চকী মরুপশিংনা মসিদা য়াওশিনসি, মসিবু মাংদা পুখৎলসি।
মরুপশিং,
মোদর্ন মেদিকেল ইনফ্রাস্ত্রকচরদগী মেদিকেল হ্যুমেন রিসোর্সশিংদা লৈবাক অসিনা খোঙথাংশিং লৌখৎলি। মখোয়না লৈবাক অসিদা শেমগৎলিবা অনৌবা ফেসিলিতীশিং, অনৌবা তৌবা ঙম্বশিং, মখোয়গী কান্নবশিং অসি মাগী প্রজাশিংগী শুপ্নগী হেল্থ ফেসিলিতীশিংদা লোইশিল্লোইদবনি। হৌজিক মালেম অসি অমগা অমগা কন্নেক্তেদ ওইরে। মসি ভারতপু মালেমগী খ্বাইদগী পুক্নিং চীংশিন্নীংঙাই ওইবা মেদিকেল তুরিজম দেস্তিনেসন অমা ওইহন্নবা অচৌবা খুদোংচাবা অমনি। মেদিকেল তুরিজম অসি ভারতকী য়াম্না চাউবা সেক্তর অমনি অমসুং লৈবাক অসিগী থবক পীনবা অচৌবা মিদিয়ম অমা ওইরক্লি।
মরুপশিং,
পুম্নমক্কী খোঙথাংশিংগা লোয়ননা ঐখোয়না চাউখৎপা ভারত অসিদা অফবা হেল্থ অমসুং ৱেলনেস ইকোসিস্তেম অমা শেমগৎপা ঙমগনি। ঐহাক্না ৱেবিনার অসিদা শরুক য়াবীরিবা পুম্নমক্তা মখোয়গী সজেসনশিং পীনবা হায়জরি। ঐখোয়না অকক্নবা রোদমেপ অমগা লোয়ননা ৱারেপ লৌখিবা পান্দমশিংগীদমক অকক্নবা মতমগী মনুংদা বজেৎ প্রোবিজনশিং ইমপ্লিমেন্ত তৌবা ঙমগনি। স্তেকহোল্দর পুম্নমক্কা লোয়ননা মথংগী বজেৎকী মমাংদা মঙলানশিং অসি মঙফাওনবা ঙমহনবদা নখোয়গী এক্সপরিয়েন্সকী কান্নবা অদু মথৌ তাগনি। ঐহাক্না থাজৈ মদুদি নখোয়গী এক্সপরিয়েন্স, লৈবাক্কী ফিরেপকা লোয়ননা নখোয়গী পর্সনেল দিবেলপমেন্তগী ফিরেপ অসি পুনশিল্লবা মতমদা ঐখোয়না অপুনবা খোঙথাংগা লোয়ননা শোইদনা মাইপাকপা ঙমগনি, ঐহাক্না পুম্নমকপু য়াইফ মঙ্গোল পীজরি।
থাগৎচরি।
