ভারত মাতা কী জয়! ভারত মাতা কী জয়! ভারত মাতা কী জয়!
নর্মদা মৈয়া কী জয়! নর্মদা মৈয়া কী জয়!
মধ্য প্রদেশকী গবর্নর মঙ্গুবাই পতেল, মফমসিগী মীয়াম্না য়ারবা মুখ্যমন্ত্রী শ্রীমান মোহন য়াদবজী, কেন্দ্র অসিদগী ঐহাক্কী খোংবুরোয় ইচন সাবিত্রী থাকুরজী, লৈবাক অসিগী কাচিন-কোয়াদগী থৌরম অসিগী শরুক ওইমিন্নরিবা কেন্দ্র মন্ত্রী খুদিংমক, রাজ্যশিংগী গবর্নরশিং, রাজ্যশিংগী মুখ্যমন্ত্রীশিং, ফম্বাকথং অসিদা নুংশিজরবা ইচিল-ইনাওশিং অমসুং ইচল-ইচেশিং!
ঐহাক্না লৌশিংগী লাইরেম্বী অমসুং ধার ভোজশালাগী ইমা ৱাগদেবীগী খুয়াখাদা খুরুমজরি। ঙসি হৈথোই-শিংথোইবা অমসুং শেম-শাবগী লাই বিশ্বকর্মগী মপোক নুমীৎনি। ঐহাক্না বিশ্বকর্ম ইবুংঙোবু খুরুমজরি। মহাক্কী হৈথোই-শিংথোইবনা লম অসি শেম-শাবদা য়াওবিরিবা ইচিল-ইনাও, ইচল-ইচে করোরশিংগী মফমদসু ঙসি বিশ্বকর্ম জয়েন্তীগী য়াইফরবা থৌরম অসিদা নোলুক্না খুরুমজরি।
মরুপশিং,
ধারগী লম অসিদ মতম পুম্নমক্তগী অথোইবা থবকশিংগী লম ওইদুনা লাক্লি, ইনোৎ হাপ্পগী লম ওইদুনা লাক্লি। মহারাজ ভোজগী মতিক-মঙাল অসি ঐখোয় মফম অদুদা তাদবা নত্রগা উনদবা ওই। অদোম্না ফনা য়াম্না থাপ্না লৈরবসু অদোমগী থম্মোয়গী ৱা অদু ঐদি খঙই। মফম অসিদা তেক্নিসিয়ন লৈরমগনি, করিগুম্বা মখোয়না মতেং করিসু পাংদবা তারগসু পাংবিয়ু, অদু নত্তবা তারগদি মখোয় অসি মধ্য প্রদেশকী মীশিংনি, য়াম্না দিসিপ্লিন লৈবা। খুদোংচাদবা লৈবা তারগসু খাংবা কনবা মধ্য প্রদেশনি, অদুগা মফম অসিদা ঐনসু উবা ফংলি।
মরুপশিং,
মহারাজ ভোজগী মতিক-মঙাল অসিনা ঐখোয়দা লৈবাক্কী মতিক-ময়ায় অদু ঙাক-শেন্নবা লেংদনা লেপ্পগা লৈনবা তাক্লি। মহার্শি দধীচিগী কত্থোকপনা ঐখোয়দা মীওিবগী থৌগল তৌনবগী ৱাশকহল্লি। মসিগী মৈহৌরোলগী চৎনবী অসিনা ইথীল পীদুনা ঙসি লৈবাক অসিনা ইমা ভারতীবু ঙাক-শেনবনা খ্বাইদগী লৌরি। পাকিস্তান্দগী লাকপা লালহৌবশিংনা ঐখোয়গী ইচে-ইচলশিংগী শিন্দুর মুত্থৎপীখি, ঐখোয়না ওপরেসন সিন্দুর তৌদুনা লালহৌবশিংগী লৈফম মরু ফংনা মাংহনখ্রে। ঐখোয়গী থৌনা লৈরবা জৱাশিংনা মীৎনা কুপ্পদা পাকিস্তানগী মশোং হায়দৎখ্রে। হৌজিক ঙরাংমক্তদা লৈবাক অমসুং মালেম অসিনা পাকিস্তানগী লালহৌবনা কপ-কপ্তুনা মখোয়গী ফীভম হায়থ্রে।
মরুপশিং,
মসি অনৌবা ভারতনি, করিগুম্বা মখল অমত্তগী এতোম বোমগী কিহল্লকপশিংদা কিরোইদবনি, মসি অনৌবা ভারতনি, য়ুমদা চংশিল্লক্তুনা হাৎলি।
মরুপশিং,
ঙসি দিসেম্বর 17 অসি পুৱারীগী নুমীৎ অমসুনি। ঙসিগী নুমীৎ অসিদা লৈবাক অসিনা সরদার পতেলগী হনবা লৈতবা থৌনাগী খুদম অদু উবা ফংখি। ভারতকী লান্মীনা হাইদরাবাদপু মখল কয়াগী মীওৎ-মীনৈদগী নান্থোকহল্লক্তুনা মখোয়গী হকশিং হাক-শেনবীদুনা ভারতকী মীংচৎ অমুক হন্না লৈহনখি। লৈবাক অসিগী চাওরবা মায় পাকপা অসিবু, অমদি মসিগী মায় পাকপা অদু লান্মীগী অসুক য়াম্লবা মতিক-মঙাল অসি চহী কয়া অমা হৌখ্রবা অসিবু নিংশিংবিনবা কনাসু লৈরমদে অদুবু অদোম্না ঙসি ঐঙোন্দা তাজ্ঞা অসি পীবিরে, ঐখোয়গী সরকারনা দিসেম্বর 17, সরদার পতেলগী থৌদোক, হাইদরাবাদকী থৌদোক অসিবু অমর ওইহল্লে। ঐখোয়না ভারতকী অপুনবা শক্তম অসি নুমীৎ অসিদা হাইদরাবাদ লিবরেসন দে হায়না পাংথোকপা হৌরে। অদুগা ঙসি হাইদরাবাদতা য়াম্না লেমজনিংঙাই ওইনা লিবরেসন দেগী থৌরম পাংথোক্লি। হাইদরাবাদ লিবরেসন দেনা ঐখোয়দা ইনোৎ হাপ্পীরি, ইমা ভারতীগী মতিক-মঙালদগী হেন্না চাওবা করিসু লৈতে, ঐখোয়না হিংলিবসি লৈবাক্কীদমক্তনি, ঐখোয়গী মীৎকুপ খুদিংমক ইরৈবাক্কীদমক্তা কত্থোক্কদবনি।
মরুপশিং,
লৈবাক্কীদমক্তা থৱায় থানবগী ৱাশক শক্তুনা ঐখোয়গী নিংতম লান্মীশিংনা মখোয়গী লৈজবা পুম্বা লৈবাক্কী মিংদা কত্থোক্লম্মী। মখোয় পুম্নমক্তুগী মংলান্দি ‘চাওখৎপা ভারত’ ওইহনবনি, মখোয়না পাম্লম্বদি মীনাই-নাইথাংগী য়োৎল্হিংদুবু থদত্তুনা ভারত অসি খোংজেল য়াংনা চাওখৎহনবনি। ঙসি মসিগী ইনোৎ অসিনা ভারতকী ঐখোয় করোর 140 অসিনা চাউখৎপা ভারত ওইহন্নবা ৱাশক্লি। অদুগা চাউখৎপা ভারতকী খোংচৎ অসিগী খ্বাইদগী মরুওইবা য়ুম্বীদি- ভারতকী নুপীগী থৌনা, নহাশিংগী থৌনা, লাইরবা অমসুং লৌমীনি। ঙসি মফমসিগী থৌরমসিদা চাওখৎপা ভারতকী য়ুম্বী মখোং মরি অসি নৌনা পাঙ্গল হাপ্পিরি। মফমসিদা মশিং য়াম্লবা ইমাশিং, ইচে-ইচলশিং লাকপিরীষ ঙসিগী থৌরমসিদা নুপীগী শক্তিগী মতাংদা য়াম্না মীৎয়েং থমখি। থৌরম অসি ধারদা পাংথোক্লি অদুবু মসিগী থৌরম অসি লৈবাকপুম্বগী লাংথোক্লিবনি, লৈবাক পুম্বদা পাংথোক্লিবনি, লৈবাক পুম্বগী ইমা-ইচে-ইচলশিংগীদমক্তা পাংথোক্লিবনি। মফম অসিগী ‘হকচাং ফবা নুপী পাঙ্গল লৈবা ইমুং’ হায়বা অচৌবা কেম্পেন অমা হৌদোক্লি। দেবী ৱাগদেবীগী থৌজালনা মসিদগী হেনবা করম্বা অচৌবা থবক অমা লৈগদগে।
মরুপশিং,
লৈবাকপুম্বদা তোঙান-তোঙানবা খোংথাংদা ‘আদি সেবা পর্ব’ গী খোজ্ঞেল হান্নদগী হৌনা তানরি। ঙসি মদুগী মধ্য প্রদেশ ইদিসনসু হৌদোক্লবনি। মসিগী কেম্পেন অসি ধার য়াওনা এম.পি.গী ঐখোয়গী ত্রাইবেল কাংলুপশিংগী মখল-মখা কয়াগী প্রোজেক্তশিংগা চুমদ্রিংনা শম্নবগী থোং শারগনি।
মরুপশিং,
বিশ্বকর্ম জয়েন্তীগী নুমীৎ অসিদা ঙসি অচৌবা ইন্দস্ত্রী অমসু হৌদোক্লগনি। লৈবাক অসিগী খ্বাইদগী চাওরবা ইন্তিগ্রেতেদ তেক্সতাইল পার্ক্কী উরেপ-উয়ুং মফম অসিদা হুল্লে। মসিগী পার্ক অসিনা ভারতকী তেক্সতাইল ইন্দস্ত্রীদা অনৌবা ইনর্জী ফংলগনি। লৌমীনা মশাগী পোত্থোক অদুগী মতিক চাবা মমল ফংলগনি, অমসুং ঐহাক্না নুংঙাইজরিবদি শুপ্নতগী ধারদা খক্তা নত্তনা লৈবাক অসিগী লৌমী পুম্নমক্না ঙসিগী থৌরম অসিগা শম্নরি।
মরুপশিং,
মসিগী পি.এম. মিত্র পার্ক অসিদগী খ্বাইদগী য়াম্না খুদোংচাবা ফংগদবা অসি ঐখোয়গী নহাশিং, নুপীমচা মশিং কয়া থবক ফংলগনি। হায়রিবা প্রোজেক্তশিং অমসুং কেম্পেনশিং অসিগীদমক্তা লৈবাক অসিগী মীওই খুদিংমকপু য়াইপ পাওজেল পীজরি। মধ্য প্রদেশপু থোইদোক্না য়াইফ পাওজেল পীজরি।
মরুপশিং,
ঐখোয়গী ইমাশিং, ইচল-ইচেশিং, ঐখোয়গী নুপীশিংগী শক্তি অসি লৈবাক অসিগী চাওখৎনবগী মরুওইবা য়ুম্ফম্নি। ঐখোয় পুম্নমক্না উরে মদুদি করিগুম্বা য়ুমদা ইমানা ফজনা লৈরবদি য়ুম পুম্নমক ফজনা লৈ।
অদুবু মরুপশিং,
করিগুম্বা ইমানা মশা ঙমদবা তারবদি ইমুংগী ফীভম কোইচাই চাই। মরম অসিনা ‘মশা ফবা নুপীগী শক্তিগী ইমুং’গী কেম্পেন অসি ইমা, ইচে-ইচলশিংদা কত্থোকচরি, মখোয়গী য়াইফরবা তুংলমচৎকীদমক্তা। ঐখোয়গী পান্দমদি – নুপী অমফাওবা ই-পাও নত্রগা রিসোর্সশিং ৱাৎপনা শাথিনা নাহন্দবনি। অসিগুম্বা তুমিন্না নারকপা, খংদবনা মরম ওইদুনা তপ্না-তপ্না লুশিনখিবা, হিংবা-চংবগী লিলা হৌরকপা অনাবা কয়া কয়া অমা লৈরি। নুপীশিংদা খ্বাইদগী হেন্না খুদোংথিনিংঙাই ওইরবা অসিগুম্বা অনাবশিং অসি হৌরকপদা খংদোকপগী য়াম্না মথৌ তাই। মরম অসিনা কেম্পেন অসিদগী বি.পি. ওইরো, দায়বিতিজ ওইরো, এনিমিয়া ওইরো নত্রগা কেন্সর ওইরো অসিগুম্বা শাথিবা লায়নাশিং নারকপা য়াবদগীনচিংবা পুম্নমক অসিগী চেক অপ তৌগনি। অমসুং ঐহাক্কী ইমাশিং, ইচল-ইচেশিং, লৈবাকপুম্বগী ইমাশিং, ইচল-ইচেশিংনা মতম পুম্নমক্তা ঐঙোন্দা পোৎশক কয়া অমা পীবিরি। অদোমগী য়াইপ-থৌজালনা ঐহাক্কী খ্বাইদগী চাওবা ঙাক-শেনবিনবা কবচনি। লৈবাক অসিগী ইমাশিং, ইচল-ইচে করোর-করোরনা ঐঙোন্দা থোইদোক হেন্দোক্না য়াইফ-থৌজাল পীবিদুনা লাক্লি। অদুবু ইমাশিং, ইচল-ইচেশিং, ঙসি সেপ্তেম্বর 17, বিশ্বকর্ম জয়েন্তী অসিদা ঐহাক্না অদোমদগী করিগুম্বা খরা নিজগে। ইমাশিং, ইচল-ইচেশিংনা ঐঙোন্দা হায়বিয়ু? অদোম্না পীবিগদৌরিব্রা নত্রগা পীবিরোইদৌরিবরা? খুৎ থঙ্গৎলগা হায়বিয়ু, ৱাহ মী খুদিংমক্না খুৎ থাঙ্গৎপীরে। ঐহাক্না অদোমদা করিগুম্বা অমত্তা চিংনদনা কেম্পশিংদা চৎলগা শোয়দনা চেক তৌবিনবা নিজরি। নচানুপা অমা ওইনা, নবুং-নৌপ্বা অমা ওইনা ঐহাক্না অদোমদগী সিমখক্তংদি নিজবা য়াইদনা? ঐহাক্না অদোমদা হায়জরিবদি অসিগুম্বা হেল্থ কেম্পশিংদা, অসিগুম্বা চেক-অপশিংগীদমক্তা অতাংবা চেক অপ ওইজরগসু অদোম্না শেল অমত্তা পীগদবা নত্তে। ফী অমত্তা পীগদবা নত্তে। চেক-অপখক্তা লেম্না তৌগদবা নত্তে হীদাকশিংসু লেম্না পীগদৌরিবনি। অদোম্না খ্বাইদগী হেন্না হকচাং ফবনা সরকারগী শেঙ্গাদগী হেনবা নত্তে, মসিগী শেঙ্গাও অসি অদোমগীদমক্তনি, ইমাশিং, ইচল-ইচেশিংগীদমক্তনি। অদুগা মখা তাবা লায়েংবদনা আয়ুষমান কার্দকী ঙাক-শেনবগী কবচনা অদোমদা কান্নবা য়াম্না পীগনি।
মসিগী কেম্পেন অসি ঙসিদগী হৌরগা ওক্তোবর 2 বিজয়াদশমীফাওবা মায় পাক্নবগীদমক্তা ৱাশকপগা লোয়ননা চয়োল 2 ফাওবা চত্থগনি। ঐহাক্না অমুক্কা হন্না লৈবাকসিগী ইমাশিং, ইচল-ইচেশিং ইচাশিংদা এপীল তৌজরি, অদোম ইমুং-মনুংগীদমক্তা মতমপুম্বদা খল্লি। মতম খরদং ওইরসু অদোমগী ইশা ফনবগী মতম কায়থোকপীয়ু। অদোম য়াম্না য়াম্না কেম্পশিংদা চৎপীয়ু, কেম্প লাখ কয়া তৌগদৌরিবনি। ঙসিসু মীওই কয়া-কয়া মাংজৌননা কেম্প মনুংদা মশা চেক-অপ তৌবা হৌনখ্রে। অদোমগী মফমদুগী অতৈ নুপীশিংদসু অদোম্না পাও অসি শোয়দনা হায়বিয়ু। অদুগা ইমাশিং, ইচল-ইচেশিং খুদিংমক্তা অদোমগী মৌদিজী ধারদা লাক্লম্মী, অদোমগী নচানুপা ধারদা লাক্লম্মী, অদোমগী ইবুং ধারদা লাক্লম্মী হায়না অদুগা মহাক্না লাক্লগা ঐখোয়দা চেক-অপ তৌনবা হায়রম্মী হায়না। ময়াম লোয়নমক্তা শোয়দনা হায়বিয়ু। ইমা অমত্তা চিত্থদনবা, ইচানুপী অমত্তা চিত্থদনবা ৱাশক্কদবনি।
মরুপশিং,
ইমাশিং, ইচল-ইচেশিংগী হকচাং ফবনা ঐখোয়গী খ্বাইদগী মরুওইবা থবক্নি। মীরোনবী নুপীশিং অমসুং ইচানুপীশিং মতিক চানা মচি ওইহন্নবগীদমক্তসু ঐখোয়গী সরকারনা মিশন মোদতা থবক তৌরি। ঙসিদগী ঐখোয়না তরানিপালশুবা নেস্নেল ন্যুত্রিসন মন্থ হৌদোক্লগনি। চাওখৎলবা ভারত্তা ঐখোয়না মমাগী শিবগী চাং অমসুং অঙাংশিংগী শিবগী চাংসু হন্থবা য়াবা হন্থহনগনি। মসিগী পান্দম অসিদা ঐখোয়না 2017 দা প্রধানমন্ত্রী মাতৃ বন্দনা য়োজনা হৌদোকখি। মসিগী য়োজনা অসিদা অহানবা ইচা ফংবদা লুপা লিশিং মঙা অদুগা অনিশুবা ইচানুপী ফংবদনা লুপা লিশিং তরুক বেঙ্ক একাওন্তা হাপ্তুনা পীরি। হৌজিক ফাওবদা মীরোনবী করোর মরি মখায়রোমদা মাতৃ বন্দনা য়োজনাগী কান্নবা ফংহনখ্রে। অদুগা করোর লিশিং 19 রোমদগী হেন্না, মীওই খরদি মসিগী ফিগর অসি করিনো হায়বা খংলমদবা য়াই। করোর লিশিং 19 দগী হেনবা শেনফম অসি ঐহাক্কী ইমাশিং, ইচল-ইচেশিংগী বেঙ্ক একাওন্তা য়ৌখ্রে। ঙসিসু ক্লিক অমখক নম্বদা মীরোনবী মমাদা হৌজিক ঐহাক্না ক্লিক অমখক নম্বদা লুপা লাখ 15 দগী হেনবদা থাখ্রবনি। লুপা করোর 450 দগী হেন্না ঙসি ধারগী লম অসিদগী মখোয়গী একাউন্তা দিপোজিৎ তৌখ্রবনি।
মরুপশিং,
ঙসি, ঐহাক্না মধ্য প্রদেশকী লমদম অসিদগী অতোপ্পা কেম্পেন অমা নৈনবা পাম্মি। ময়াম্না খঙনরে, সিক্কল সেল এনেমিয়া অসি ঐখোয়গী ত্রাইবেলগী মফমশিংদা অচৌবা খুদোংচাদবা অমা ওইরি। ঐখোয়গী সরকারনা ঐখোয়গী ত্রাইবেলগী ইচিল-ইনাওশিংবু লাইচৎ অসিদগী ঙাকথোক্নবা নেস্নেল মিসন অমা পায়খৎলি। ঐখোয়না মিসন অসি 2023দা মধ্য প্রদেশকী শাহদোলদগী হৌদোকখি। ঐখোয়না অহানবা সিক্কল সেল স্ক্রিনিং কার্দ অসি শাহদোলদা য়েন্থোকখি। অমসুং ঙসি, সিক্কল সেল স্ক্রিনিং কার্দ মিলিয়ন 10শুবা (করোর 1) অসি মধ্য প্রদেশতা য়েন্থোকখ্রে। হৌজিক্তি স্তেজতা লাকখিবা মচানুপী অদুদা পীখিবা কার্দ অসি মিলিয়ন 10শুবা কার্দনি, অমসুং ঐহাক্না মধ্য প্রদেশকী মরমদা ঙাংলি। হৌজিক ফাওবদা, কেম্পেন অসিগী মখাদা লৈবাক শিনবা থুংনা মীওই করোর 5 হেন্না স্ক্রিনিং তৌখ্রে। সিক্কল সেল স্ক্রিনিংনা ঐখোয়গী ত্রাইবেল কম্ম্যুনিতীশিংদা মীওই মিলিয়ন কয়াগী পুন্সি কনবা ঙমখ্রে, অমসুং মসিগী মতাংদা ময়ামনা মসি খঙলমদবসু য়াই।
মরুপশিং,
ঐখোয়না চত্থরিবা থবক অসিনা লাক্কদৌরিবা মীরোনগীদমক অচৌবা থৌজাল অমা ওইগনি। ঙসিদি ঐখোয়না পোক্ত্রিবা মীওইশিংগীদমক থবক তৌরি, মরমদি ঙসিগী জেনরেসন অসি হকচাং ফনা লৈরবদি, তুংগী অঙাংশিংগী হকচাং ফনা লৈবা ঙমহনগনি। ঐহাক্না মরু ওইনা ঐখোয়গী ত্রাইবেলগী মমাশিং অমসুং ইচে-ইচলশিংদা সিক্কল সেল এনেমিয়াগীদমক মখোয় মশাবু তেস্ত তৌথোক্নবা হায়জরি।
মরুপশিং,
ঐহাক্না ইমাশিং অমসুং ইচে-ইচলশিংগী পুন্সিদা হেন্না লাইথোকহন্নবা অমসুং মখোয়গী অৱাবা হন্থহন্নবা লেপ্পা লৈতনা হোৎনরি। স্বচ্ছ ভারত অভিয়ানগী মখাদা শঙ্গাখিবা তোইলেৎ মিলিয়ন কয়া, উজ্জ্বলা য়োজনাগী খুত্থাংদা লেম্না পীখিবা গ্যাস কনেক্সন মিলিয়ন কয়া, য়ুমথোং খুদিংদা ঈশিং ফংহন্নবা জল জীবন মিসন, অমসুং লুপা লাখ 5 ফাওবগী লেম্না লায়েংনবা আয়ুশ্মান য়োজনা অসিনা ইমাশিং অমসুং ইচে-ইচলশিংগী পুন্সিদা থেংনরিবা খুদোংচাদবশিং কোকহল্লি অমসুং মখোয়গী হকশেল ফগৎহল্লি। অদোমগী ইমুং-মনুংদসু ইমাশিং, ইচে-ইচলশিং অমসুং ইচানুপীশিং লৈরি। ঐহাক্না ইচিল-ইনাওশিংদসু ঐহাকপু মতেং পাংনবা অমসুং অদোমগী ইমাশিং, ইচে-ইচলশিং অমসুং ইচানুপীশিংগী হকশেল য়েংশিন্নবা হায়জনীংই।
মরুপশিং,
পি.এম. গরীব কল্যান অন্ন য়োজনাগী মশিং অদু মালেম পুম্বগী মীওইশিংনা তাবা মতমদা, মশিং অদু অদুক্কী মতিক ৱাংবনা অঙাকপা পোকই। মরুপশিং, কোরোনাগী অৱাবা মতমসিদা লায়রবা মমা অমগী য়ুমদা লেম্না রেশন পীনবগী স্কিম অসিনা লৈরং মৈ মুৎহনখিদে। স্কিম অসিগী মখাদা ঙসিসু লেম্না চেং-হৱাই পীরি। পি.এম. আৱাস য়োজনাগী মখাদা পীরিবা য়ুম করোর কয়া অসিদা অয়াম্বদি নুপীশিংগী মিংদা লৈরি।
মরুপশিং,
ঐখোয়গী সরকারনা ঐখোয়গী ইচে-ইচল অমসুং ইচানুপীশিংবু শেন্মিৎলোনগী লমদা মপাঙ্গল কনখৎহনবদা অকনবা মীৎয়েং থম্লি। ঐখোয়গী ইচিল-ইনাও করোর কয়া মুদ্রা য়োজনাগী খুত্থাংদা লোন লৌদুনা অনৌবা ললোন-ইতিক অমসুং অনৌবা ইন্দস্ত্রীশিং লিংখৎলি।
মরুপশিং,
ঐখোয়গী সরকারনা খুঙ্গংগী ইচে-ইচল, ইমা অমসুং ইচানুপী করোর অহুম, ইচে-ইচল করোর অহুম, লাখপতি দিদি ওইহন্নবা কেম্পেন অমা চংশিল্লি। অমসুং ঐহাক্না চাউথোকচবা পোকচৈ মদুদি মসিগী কেম্পেন অসিনা মাইপাকখিবনা মরম ওইদুনা, অতেনবা মতমগী মনুংদা, ইচে-ইচল করোর অনি লাখপতি দিদী ওইখ্রে। ঐখোয়না নুপীশিংবু বেঙ্ক সখী অমসুং দ্রোন দিদি ওইহন্দুনা খুঙ্গংগী শেন্মিৎলোনগী ময়াইদা পুশিল্লি। নুপীশিংনা সেল্ফ-হেল্প গ্রুপকী খুত্থাংদা অনৌবা রিভোলুসন অমা পুরক্লি।
ইচিল-ইনাওশিং,
হৌখিবা চহি 11 অসিদা, লায়রবশিংগী য়াইফনবা, লায়রবশিংদা মতেং পাংনবা, অমসুং মখোয়গী পুন্সি মহিং ফগৎহনবা অসি ঐখোয়গী সরকারগী খ্বাইদগী মরুওইবা থবকশিংনি। ঐখোয়না থাজৈ মদুদি লৈবাক অসিগী লায়রবশিংনা লায়রবদগী থোরকপা অমসুং খোঙজেল য়াংনা মাংলোমদা চংশিল্লকপা মতমদা লৈবাক অসিনা চাউখৎপা ঙমগনি। অমসুং লায়রবশিংদা মতেং পাংবা অসি লেম্না মাংদে হায়বা ঐখোয়না উখি। করিগুম্বা লায়রবা মীওই অমনা মতেং খরা ফংলবদি, তেংবাং খরা ফংলবদি, মহাক্না মহাক্কী কন্না হোৎনদুনা সমুদ্র লান্থোক্নবগী থৌনা লৈ। ঐহাক্না লায়রবশিংগী ইথিল অমসুং ৱাখল্লোনশিং অসি ইশানা থেংনখি। মরম অদুনা, লায়রবশিংগী অৱা-অনা অসি ঐহাক্কী ইশাগী অৱা-অনা ওইনা লৌই। লায়রবশিংদা মতেং পাংবা অসি ঐহাক্কী পুন্সিগী খ্বাইদগী চাউবা পান্দমনি। মরম অদুনা, ঐখোয়গী সরকারনা লেপ্পা লৈতনা লায়রবশিংবু মরুওইনা লৌদুনা থৌরাংশিং শেম্লি অমসুং পায়খৎলি।
মরুপশিং,
থবক অসি লেপ্পা লৈতনা, থাজবা অমসুং অশেংবা থম্মোয়গা লোয়ননা পাংথোক্তুনা, ঐখোয়গী পোলিসীশিংগী মহৈশিং ঙসি মালেমদা উহনবা ঙম্লে। হৌখিবা চহি 11 অসিদা লেপ্পা লৈতনা হোৎনখিবশিং অমসুং কন্না হোৎনখিবশিংগী মতুং ইন্না ঙসি লৈবাক অসিগী মীওই করোর 25না লায়রবদগী থোরকপা ঙমহনখিবা অসিদা মফম অসিদা লৈরিবা মীওই খুদিংমক চাউথোকচবা পোক্কনি। ঐখোয়গী খুন্নাই পুম্নমক্না অনৌবা থাজবা অমা ফংলে।
মরুপশিং,
ঐখোয়গী সরকারগী হোৎনরিবশিং অসি স্কিমশিং খক্তা নত্তে, মখোয় অসি লায়রবশিংগী মমাশিং, ইচে-ইচলশিং অমসুং ইচানুপীশিংগী পুন্সিদা অহোংবা পুরক্নবা মোদীগী গেরেন্তীনি। লায়রবশিংগী মায়কৈদা হরাওবা পীনবা, মমা অমসুং ইচে-ইচলশিংগী ইকাই খুম্নবা ঙাক্নবা, মসি ঐগী অচেৎপা ৱারেপনি।
মরুপশিং,
মধ্য প্রদেশতা মহেশ্বরী তেক্সতাইলগী অরিবা চৎনবী লৈ। দেবী অহিল্যাবাই হোলকরনা মহেশ্বরী শারীদা অনৌবা মায়োল অমা পীখি। অথুবা মতমদা, ঐখোয়না অহিল্যাবাই হোলকরগী 300শুবা মপোক কুমওন পাংথোকখি। হৌজিক ধারদা পি.এম. মিত্র পার্ক্কী খুত্থাংদা ঐখোয়না দেবী অহিল্যাবাইগী লেগেসী অসি মখা তানা চৎথরি। পি.এম. মিত্র পার্ক অসিনা কতন অমসুং সিল্ককুম্বা ৱিভিং মেতরিএলশিং অসি খুদক্তা ফংহনগনি। ক্বালিতী চেকশিং অসি হেন্না লায়থোকহল্লগনি। কৈথেল ফংবা হেনগৎলগনি। স্পিনিং অসি মফম অসিদা পাংথোক্কনি, দিজাইন অসি মফম অসিদা পাংথোক্কনি, প্রোসেসিং অসি মফম অসিদা পাংথোক্কনি, অমসুং এক্সপোর্ত অসি মফম অসিদগী পাংথোক্কনি। মসিনা তাক্লিবদি মালেমগী কৈথেলদা ঐহাক্কী মায় পাকপা অসিসু মঙাল ফংলগনি। মসিনা তাক্লিবদি হৌজিক্তি তেক্সতাইল ইন্দস্ত্রীগী ভেল্যু চেন পুম্নমক মফম অমখক্তদা ফংলগনি। ঐখোয়গী সরকারনা তেক্সতাইল ইন্দস্ত্রীগীদমক্তা থবক পায়খৎলিবা 5F ভিজন, 5F, অহানবদা ফার্ম, অনিশুবদা ফাইবর, অহুমশুবদা ফেক্তরী, মরিশুবদা ফেশন, অমসুং মসিনা মরম ওইদুনা ফার্মদগী ফাইবর, ফাইবরদগী ফেক্তরী, ফেক্তরীদগী ফেশন, অমসুং ফেশনদগী ফোরেন ফাওবগী খোঙচৎ অসি য়াম্না থুনা অমসুং লায়বা ওইহল্লগনি।
মরুপশিং,
ঐহাক্না তাই মদুদি চাউরাক্না একর 1,300গী লম অসি ধারগী পি.এম. মিত্র পার্ক অসিদা য়ুনিৎ 80 হেনবদা এলোৎ তৌখ্রে। মসিনা তাক্লিবদি দরকার ওইবা ইনফ্রাস্ত্রকচর অমসুং ফেক্তরী শাবগী থবক অনিমক অমগা অমগা চৎমিন্নগনি। মসিগী পার্ক অসিদা অনৌবা থবক লাখ 3গী খুদোংচাবা পীগনি। অমসুং মসিনা লোজিতিক্সকী মমলদা অচৌবা শাফু অমা পীগনি। পি.এম. মিত্র পার্ক অসিনা পোৎলমশিং পুথোক পুশিন তৌবগী মমল হন্থহল্লগনি, পোৎথোক পুথোক পুথোকপগী মমল হন্থহল্লগনি অমসুং ঐখোয়গী পোৎথোকশিং অসি মালেমগী থাক্তা হেন্না চাংদম্নবা ঙমহল্লগনি। মরম অদুনা, ঐহাক্না এম.পি.গী মীয়াম, মরু ওইনা ঐহাক্কী লৌমী ইচিল-ইনাওশিং অমসুং ঐহাক্কী নহা ওইরিবা নুপাশিং অমসুং নুপীশিংবু পি.এম. মিত্র পার্ক্কীদমক থাগৎপা ফোংদোকচরি। ঐখোয়গী সরকারনা লৈবাক অসিদা অসিগুম্বা পি.এম. মিত্র পার্ক 6 হেন্না শেমগৎকনি।
মরুপশিং,
ঙসি লৈবাক শিনবা থুংনা বিশ্বকর্মা পুজা পাংথোক্লি। মসি পি.এম. বিশ্বকর্মা য়োজনাগী মায়পাকপগী থৌরম অমসুনি। ঐহাক্না লৈবাক শিনবা থুংবদগী ঐহাক্কী বিশ্বকর্মাগী ইচিল-ইনাওশিং, উ শুবা মীওইশিং, য়োৎ শুবা মীওইশিং, সনা শাবশিং, চফু শাবশিং, উ শুবা মীওইশিং, চেক শুবশিং, কোরি অমদি শেঞ্জেংগী পোৎ শাবশিং অমসুং মখোয়গী খুৎ-শাগী হৈ-শিংবশিংনা অঙকপা পোৎ পুথোক্লিবা মীওইশিং য়াওনা অসিগুম্বা মীওই কয়াবু অখন্ননা থাগৎপা ফোংদোকচরি। মেক ইন ইন্দিয়াগী খ্বাইদগী চাউবা মপাঙ্গলদি অদোমনি। খুঙ্গং অমা ওইরো নত্রগা শহর অমা ওইরো, নুমিৎ খুদিংগী মথৌ তাবশিং অসি অদোমগী পোৎথোকশিং অমসুং অদোমগী আর্তকী খুত্থাংদা মপুং ফাহনরি। পি.এম. বিশ্বকর্মা য়োজনা অসিনা অতেনবা মতমগী মনুংদা আর্তিসান অমসুং ক্রেফমেন লাখ 30 হেনবদা মতেং পাংলিবা অসিদা ঐহাক নুংঙাইবা ফাওই। স্কিম অসিগী খুত্থাংদা মখোয়না স্কিল ত্রেনিং ফংখি অমসুং দিজিতেল মার্কেতিং অমসুং মোদর্ন তুলশিংগা শম্নখি। বিশ্বকর্মা মরুপশিংদগী লাখ 6 হেনবদা অনৌবা খুৎলায়শিং পীরক্লে। হৌজিক ফাওবদা, লুপা করোর লিশিং মরি হেনবগী লোনশিং বিশ্বকর্মাগী ইচিল-ইনাওশিংদা ফংহনখ্রে।
মরুপশিং,
পি.এম. বিশ্বকর্মা য়োজনা অসিনা খুন্নাইগী মীওই কাংলুপ অমবু কান্নবা ফংহনখ্রে। ঐখোয়গী লায়রব বিশ্বকর্মাগী ইচিল-ইনাওশিং অসি স্কিল লৈরম্মি, অদুবু মমাংগী সরকারশিংনা মখোয়গী স্কিলশিংবু চাউখৎহন্নবা, মখোয়গী পুন্সি মহিং ফগৎহন্নবা থৌরাং অমত্তা পায়খৎখিদে। ঐখোয়না মখোয়গী তেলেন্তশিংবু মখোয়গী প্রোগ্রেসকীদমক শীজিন্ননবগী লম্বীশিং হাংদোকখি। মরম অসিনা ঐনা হায়রি - শোত্থরদবা মীওইশিং অসি ঐখোয়গী প্রাইওরিতীনি।
মরুপশিং,
ঐখোয়গী ধার অসি ইকাই খুম্নরবা কুশভাউ থাকরেগী পোক্নফমসু ওইরি। মহাক্না মহাক্কী পুন্সি অসি লৈবাক অসিগী ৱাখল্লোনগা লোয়ননা খুন্নাইগীদমক কৎথোকখি। ঙসি ঐহাক্না মহাকপু ইকায়খুম্নবা উৎচরি। নেসন ফার্স্ত হায়বগী ৱাখল্লোন অসিনা লৈবাক অসিবু অনৌবা অৱাংবা থাক্তা পুখৎনবগী ইথিল পীরি।
মরুপশিং,
মসি কুমহৈগী মতমনি, অমসুং মসিগী মতমসিদা অদোম্না স্বদেশীগী মন্ত্র অসি লেপ্তনা হঞ্জিন-হঞ্জিন পাংথোক্কদবনি, অদোম্না মসিবু অদোমগী পুন্সিদা য়াওহনগদবনি। ময়াম পুম্নমক্তা ঐহাক্না হায়জরি, লৈবাক অসিগী মীওই করোর 140দা ঐহাক্না হায়জরি, অদোম্না করিগুম্বা পোৎশক অমা লৈরবদি মদু লৈবাক অসিদা শাবা ওইগদবনি। নহাক্না করিগুম্বা অমা লৈরবদি মদুদা ভারত মচাগী হুমাং মমল য়াওগদবনি। অদোম্না করিগুম্বা অমত্তা লৈরবসু, মদুদা ঐগী ভারতকী লৈহাউগী লৈনম চেনগদবনি। অমসুং ঙসি ঐহাক্না ঐহাক্কী ললোন-ইতিক তৌরিবা ইচিল-ইনাওশিংদা হায়জবা পাম্মি মদুদি, লৈবাক অসিগীদমক্তা ঐহাকপু মতেং পাংবীয়ু, লৈবাক অসিগীদমক্তা ঐহাকপু মতেং পাংবীয়ু, অমসুং লৈবাক অসিগীদমক্তা অদোমগী মতেং ঐহাক্না পাম্মি, মরমদি ঐহাক্না 2047 ফাওবদা ভারতপু চাউখৎপা ওইহন্নবা হোৎনগনি। অমসুং মদুগী লম্বীদি মশা-মরোমদোম লেপচবা ভারতকী খুত্থাংদা ওইগনি। মরম অদুনা, ঐহাক্কী স্মোল অমসুং মীদিয়ম ইন্দস্ত্রীগী ইচিল-ইনাওশিং, অদোম্না য়োল্লিবা পোৎলম খুদিংমক ঐখোয়গী লৈবাক অসিদা শাজবা ওইগদবনি। মহাত্মা গান্ধীনা স্বদেশীবু নীংতম্বগী মেদিয়ম অমা ওইহনখি। হৌজিক ঐখোয়না স্বদেশীবু চাউখৎলবা ভারতকী য়ুম্ফম ওইহনগদবনি। অমসুং মসি করম্না ওইগদৌরিবনো? ঐখোয়গী লৈবাক অসিদা শেম্বা পুম্নমকপু ঐখোয়না চাউথোকচবা পোক্লবা মতমদা ওইথোক্কনি। ঐখোয়না লৈরিবা খ্বাইদগী পীকপা পোৎশক - অঙাংশিংগীদমক্তা শান্নপোৎশিং, দিৱালীগী মীতমশিং, ঐখোয়গী য়ুম লৈতেংনবা পোৎশকশিং, নৎত্রগা মোবাইল ফোন, তি.ভি. নৎত্রগা ফ্রীজগুম্বা অচৌবা পোৎশক অমা হেক্তা ঐখোয়না অহানবদা মদু ঐখোয়গী লৈবাক অসিদা শাব্রা হায়বা অদু য়েংবা তাই। মসিদা ঐগী লৈবাক্কী মীওইশিংগী হুমাং মমল য়াওব্রা? মরমদি, ঐখোয়না স্বদেশী লৈরবা মতমদা, ঐখোয়গী শেল অসি লৈবাক অসিদা লৈগনি। ঐখোয়গী শেল অসি মপাল লমদা চৎপদগী কনবা ঙম্লে। শেল অসি লৈবাক অসিগী চাউখৎ থৌরাংগীদমক অমুক্কা হন্না শিজিন্নরি। শেনফম অসিদগী লম্বী-থোং শাবা, খুঙ্গংগী স্কুলশিং শাবা, লাইরবশিংগী মমাশিংবু মতেং পাংবা, প্রাইমরী হেল্থ সেন্তরশিং শাবা, শেনফম অসিমক লায়রবশিংগী য়াইফনবা স্কিমশিংদা শীজিন্নৈ অমসুং অদোমদা য়ৌরকই। ঐহাক্কী মিদল ক্লাসকী ইচিল-ইনাওশিং, ঐহাক্কী মিদল ক্লাসকী নহারোলশিংগী মঙলানশিং অদু মঙফাওনহন্নবা শেল য়াম্না চংই। অমসুং ঐখোয়না মসি অপীকপা থবকশিং অসি তৌদুনা পাংথোকপা ঙম্মী। ঐখোয়না মথৌ তারিবা পোৎলমশিং অসি লৈবাক অসিদা পুথোকপা মতমদা, মসিদগী ফংলিবা থবকশিং অসিনা ঐখোয়গী লৈবাক্কী মীয়ামদা কান্নহল্লি।
মরম অদুনা, হৌজিক্তি নভরাত্রীগী অহানবা নুমিৎ, সেপ্তেম্বর 22দগী জি.এস.তি.গী মমল হন্থরকপা অসি থবক ওইনা পাংথোকপা হৌরগনি। ঐখোয়না মসিগী খুদোংচাবা লৌদুনা লমদমসিগী পোত্থোকশিং খক্তমক য়োনবা তাই। ঐখোয়না মন্ত্র অমা নীংশিংগদবনি, অমসুং মসি দুকান খুদিংমক্তা ইবা পাম্মি, রাজ্য সরকারদা কেম্পেন অমা চত্থনবা ঐহাক্না হায়গনি। দুকান খুদিংমক্তা বোর্দ অমা থেৎকদবনি, চাউথোকচবা ফাওদুনা হায়গদবনি “মসি স্বদেশীনি! ময়াম পুম্নমক্না ঐগা লোয়ননা হায়গদ্রা? ময়াম পুম্নমক্না ঐগা লোয়ননা হায়গদ্রা? ঐনা হায়গনি, " চাউথোকচবা লোয়ননা হায়বিয়ু", ময়াম্না হায়গনি, "য়েহ স্বদেশী হে।" চাউথোকচবা লোয়ননা হায়বিয়ু, "য়েহ স্বদেশী হে।" চাউথোকচবা লোয়ননা হায়বিয়ু, "য়েহ স্বদেশী হে।" চাউথোকচবা লোয়ননা হায়বিয়ু, "য়েহ স্বদেশী হে।" চাউথোকচবা লোয়ননা হায়বিয়ু, "য়েহ স্বদেশী হে।" চাউথোকচবা লোয়ননা হায়বিয়ু, "য়েহ স্বদেশী হে।"
মরুপশিং,
ৱাফম অসিগা লোয়ননা ঐহাক্না ময়ামগী মফমদা য়াইফ-পাউজেল পীজরি। অমসুং মসিদা ঐহাক্কী ৱারোল পীবা অসি লোইশিনজরি। হায়বীয়ু:
ভারত মাতা কী জয়।
ভারত মাতা কী জয়।
ভারত মাতা কী জয়।
হন্না-হন্না থাগৎচরি।
