খুরুমজরি,
রাজস্থান লমদম অমসুং ভারতকী খ্বাইদগী চাউবা পঞ্চায়ত লোকসভাগী ঙাক-শেল্লিবশিং, ঐখোয়গী ইকায় খুম্নরবা স্পীকর শ্রী ওম বির্লাজী, রাজস্থানগী মুখ্য মন্ত্রী, শ্রী অশোক গেহলোৎজী, কেন্দ্রগী হকশেল মন্ত্রী, শ্রী মনশুখ মন্দাবিয়াজী, কেন্দ্রগী মন্ত্রী-মন্দলগী ঐহাক্কী মরুপ্লোই, শ্রী গজেন্দ্র সিংহ সেখাৱৎজী, শ্রী ভুপেন্দ্র য়াদবজী, শ্রী অর্জুন রাম মেঘ্বালজী, শ্রী কৈলাশ চৌধরীজী, দাক্তর ভারতী পাৱরজী, ভগ্বন্ত খুবাজী, রাজস্থানগী হান্নগী মুখ্য মন্ত্রী, ইচল বসুন্ধরা রাজেজী, ওপোজিসনগী লুচিংবা গুলাব চন্দ কতারিয়াজী, রাজস্থান সরকারগী অতোপ্পা মন্ত্রীশিং, এম.পি., এম.এল.এ.শিং, থৌরম অসিদা শরুক য়ারিবা অতোপ্পা মীথুংলেন অমসুং ঐহাক্কী নুংশিজরবা রাজস্থানগী ইচিল-ইনাওশিং!!!
চহি ১০০দা থোকপা খ্বাইদগী চাউবা লাইচৎ অসিনা মালেমগী হেল্থ সেক্তরদা খুদোংচাদবা কয়া থোকহন্দুনা অচৌবা পরা অমা তম্বীরে অমসুং কয়া অমসু হৌজিক তম্লি। লৈবাক খুদিংনা মখোই-মখোইগী খোংথাং পায়খত্তুনা থেংননবা হোৎনরি। মসিগী মরকসিদা ভারতনা মশাগী তৌবা ঙম্বা অমসুং আত্মানির্ভর্তা হেনগৎনবা হোৎনরি। রাজস্থান্দা মেদিকেল কোলেজ ৪ শাব হৌখিবা অমসুং ইন্সতিত্যুৎ ওফ পেত্রোকেমিকেল্স তেক্নোলোজী শঙ্গারিবা অসি মাইকৈ অসিদা চঙশিনবা খোংথাং অমনি। ঐহাক্না রাজস্থানগী মীয়াম পুম্নমকপু থাগৎপা ফোংদোক্লি। ঙসিদি রাজ্যসিগী মরু ওইবা থৌরম অমা ঐহাক্না ভর্চুএলগী খুত্থাংদা য়াওবা ফংজরি। অদুনা ঐহাক্না ওলিম্পিক্সতা ভারতকী ফিরাল পায়হনবদা তেংবাংখিবা রাজস্থানগী ইচাশিংবুসু ইকায় খুম্নবা উৎনীংই। ঙসিগী থৌরম পাংথোক্লিঙৈ মরকসিদা জয়পুর য়াওনা লৈবাক্কী মফম কয়াদা এস.আই.পি.ই.তি. সেন্তরশিংদা প্লাস্তিক অমসুং মসিগা মরী লৈনবা ফত্ত-হৌদি শেন্নবগী কাংলোনগী মতাংদা মীয়ামদা খঙহনবগী থৌরম পাংথোক্লি। খোংথাং অসিগীদমক্তা ঐহাক্না লৈবাক্কী মরী লৈনবা মীওইশিংদা য়াইফ পাউজেল পীনিংই।
ইচিল ইনাওশিং,
ইং ২০১৪গী মতুংদা রাজস্থান্দা অনৌবা মেদিকেল কোলেজ ২৩ শাবগী কেন্দ্র সরকারনা অয়াবা পীখ্রে। মসিগী মনুংদগী কোলেজ ৭ শাবগী থবক হৌখ্রে। অদুগা ঙসি, বনস্বারা, সিরোহী, হনুমান-নগর অমসুং দোসাদা অনৌবা মেদিকেল কোলেজ শাবগী থবক হৌরে। ঐনা মফমসিগী মীওইশিংদা থাগৎপা ফোংদোকচরি। ঙসি লাক্লিবা মীয়ামগী মীহুৎশিং, ঐখোয়গী এম.পি., এম.এল.এ.শিংনা ঐহাক্না উন্নবা মতমদা লমদমসিদা মেদিকেল কোলেজ হাংবদা কান্নবা য়াম্না লাক্লগনি হায়বা ৱাফম থম্নরকখি। ঐহাক্কী মরুপ ‘কনক-মল’ কতারীজী ওইরো, ঐহাক্কী সেনিয়র এম.পি. ইচে, জস্কোর মীনাজী ওইরো, ঐহাক্কী য়াম্না লুনা তিন্নবা মরুপ, নিহালচান্দ ভাই চৌহানজী ওইরো নত্ত্রগা ঐহাক্কী গুজরাতী তংখায়, রাজস্থানী তংখাই, ভাইদেবজী পতেল ওইরো, অদোম খুদিংনা মেদিকেল ইনফ্রাগী মতাংদা য়াম্না নুংঙাইবা ফাওরি। রাজ্য সরকারগী মতেংগা লোয়ননা হায়রিবা অনৌবা মেদিকেল কোলেজশিং অসি য়াম্না থুনা শাবা লোইগনি হায়বগী ঐহাক্না থাজবা থম্মি।
মরুপশিং,
দিকেদ অমগী মমাংদা মেদিকেলগী ফেসিলিতীশিংগী করি ফিভম ওইরম্মি হায়বা অদোম খুদিংনা খঙলে। ঙসিদগী চহি ২০গী মমাং, ইং ২০০১দা গুজরাতনা ঐহাক্কী মুখ্য মন্ত্রী ওইনবা খনবীখিবা মতমদা, হেল্থ সেক্তরগী ফিভম অসি শিংনবা কয়ানা থনবা ওইখি। মেদিকেল ইনফ্রাস্ত্রকচর ওইরো, মেদিকেল এজুকেসন ওইরো, নত্ত্রগা লাইয়েংবগী খুদোংচাবা ওইরো, হীরম খুদিংদা খোঙজেল য়াঙনা থবক তৌবগী তঙাই ফদবা লৈরম্মি। ঐখোয়না শিংনবশিংবু থেংনদুনা অমসুং অমত্তা ওইনা পুন্দুনা অহোংবা পুরক্নবা হোৎনখি। মতম অদুদা গুজরাত্তা, মুখ্য মন্ত্রী অমৃতম য়োজনাগী মখাদা লাইরবা ইমুংশিংদা লুপা লাখ ২ ফাওবগী লেম্না লাইয়েংবগী খুদোংচাবা পীবা হৌখি। মীরোনবীশিংনা হোস্পিতালদা অঙাং উন্ননবগীদমক্তা চিরঞ্জিবী য়োজনাগী খুত্থাংদা তেংবাংখি অমসুং মীরোনবী মমা অমসুং অঙাংশিংগী থৱাই কনবদা মতেং য়াম্না ওইখি। মেদিকেল এজুকেসনগী মতাংদা হৌখিবা দিকেদ ২দগী হোৎনরকখিবা অদুদগী গুজরাৎকী মেদিকেল সিত মশিং চাউরাক্না শরুক ৬ হেনগৎখি।
মরুপশিং,
ঐহাক্না মুখ্য মন্ত্রী অমা ওইনা লৈবাক্কী হেল্থ সেক্তরদা লৈবা অৱাৎপা কয়া খঙখিবা অদুনা, হৌখিবা চহি ৬-৭তা মখোয়শিংদুবু লৈহন্দনবা লেপ্তনা হোৎনদুনা লাক্লি। ঐখোয়গী সংবিধানগী মখা পোন্না লৈরিবা ফেদেরেল মওংগী লৈঙাক্কী মতুং ইন্না, হকশেল অসি রাজ্যগী সমস্যানি, মখোয়গী থৌদাংনি। ঐহাক্না রাজ্যগী মুখ্য মন্ত্রী ওইনা মতম কুইনা লৈরকই। মসিদা থেংনবা খুদোংচাদবা কয়া ঐহাক্না খঙই। অদুদগী ঐহাক্না ভারত সরকারগী শরুক ওইরবা মতমদা, হায়রিবশিং অসি রাজ্যগী থৌদাং ওইরবসু, সরকারনা মসিগীদমক্তা হোৎনফম থোকই খন্দুনা হীরম অসিদা ঐখোয়না শেমদোক্নবা থবক পায়খৎপা হৌখি। লৈবাক্কী হকশেলগী পথাপ অসি মচেৎ-মচেৎ য়াম্না থোক্লম্বা অসিদসু ঐখোয়না খুদোংচাদবা কয়া থেংনৈ। তোঙান-তোঙানবা রাজ্যশিংগী মেদিকেল সীস্তেমশিংবু লৈবাক্কী থাক্তা পুন্সিন্নবগী তঙাই ফদবা লৈ। ভারতকুম্বা লৈবাক্তা হেন্না ফবা হকশেলগী খুদোংচাবশিং অসি রাজ্যগী কোনুং নত্ত্রগা মেত্রো শহরশিংদতা ওইনা লৈবগী মওং তৌই। মসিদা রাজ্যগী কাচিন-কোয়াদা লৈবা মফমশিংদা হকশেলগী খুদোংচাবশিং ফংবদা ৱাই। মতৌ অসিদগী প্রাইমরী হেল্থকেয়র অমসুং হোস্পিতালশিংগগী মরক্তা অহাঙবা অমা লৈ। ঐখোয়গী নাৎকী লাইয়েং অমসুং মতমগা চান্নবা লাইয়েংগগী মরক্তা তান অমা ইচা চাদবগুম তৌরি। লৈঙাক্না মসিগী খেন্নবা অসিবু লৈহন্দনবা হোৎনবগী মথৌ য়াম্না তারি। লৈবাক্কী হেল্থ সেক্তরদা অহোংবা পুরক্নবগীদমক্তা, ঐখোয়না নেস্নেল এপ্রোচ, নেস্নেল হেল্থ পোলিসী অমগীদমক্তা থবক পায়খৎলি। স্বচ্ছ ভারত অভিয়ান্দগী হৌদুনা অয়ুশমান ভারত, অদুগা হৌজিক্কী অয়ুশমান ভারত দিজিতেল মিসন ফাওবশিংসি, হোৎনরিবা কয়াসিগী শরুক অমনি। অয়ুশমান ভার্ত স্কিমগী মখাদা হৌজিক ফাওবদা রাজস্থানগী মীওই চাউরাকপা লাখ ৩.৫না লেম্না লাইয়েংবগী খুদোংচাবা ফংখ্রে। খুঙ্গংগী মফমশিংগী হকশেলগী খুদোংচাবশিংগী মপাঙ্গল হাপ্লিবা হেল্থ অমসুং ৱেলনেস সেন্তর চাউরাকপা ২৫০০না হৌজিক রাজস্থান্দা থবক তৌবা হৌরে। সরকারনা প্রিভেন্তিব হেল্থকেয়রদা হৌজিক মিৎয়েং চঙলি। ঐখোয়না অনৌবা অয়ুশ মন্ত্রালয় অমদি শেম্লে, অয়ুর্বেদ অমসুং য়োগদসু হৌজিকহেনবা মিৎয়েং চঙলি।
ইচিল ইনাওশিং,
মেদিকেল ইনফ্রাস্ত্রকচর চাউখৎপগী খোঙজেল তপ্লিবা অসিদা ঐখয়না খুদোংচাবা অমসু থেংনরি। এমস ওইরো, মেদিকেল কোলেজ ওইরো, নত্ত্রগা এমসকুম্বা সুপর স্পিসিএলিতী হোস্পিতাল ওইরো, মখোয়গী নেৎৱর্কশিং অসি লৈবাক্কী কাচিন-কোয়া খুদিংদা য়ৌবগী তঙাই ফদবা লৈ। এমস ৬তগী হেন্দোক্তুনা ঙসিদি ভারত্তা ২২দগী হেনবা এমসকী মপাঙ্গল লৈবা নেৎৱর্ক অমা লৈবগী মাইকৈদা ঐখোয়না চঙশিনবা হৌরে হায়না চাউথোকচবা য়ারে। চহি ৬-৭ অসিদা ১৭০দগী হেনবা মেদিকেল কোলেজ লৈরে অমসুং ১০০দগী হেনবা মেদিকেল কোলেজ লিংখৎপগী থবক চত্থরি। ইং ২০১৪দা লৈবাক্কী মেদিকেলগী গ্রেজুএৎ অমসুং অন্দর গ্রেজুএৎকী অপুনবা সিত মশিংসি চাউরাকপা লিশিং ৮২ নি। ঙসিদি, মসিগী মশিং অসি লাখ ১গা লিশিং ৪০ য়ৌরে। মসিনা হায়বদি, নহা মশিং হেনবনা দাক্তর ওইবগী খুদোংচাবা ফংলে হায়বনি অদুগা হান্নগা য়েংনবদা, নহা মশিং য়াম্বনা হৌজিক দাক্তর ওইনরে। মেদিকেল এজুকেসন চাউখৎলকপা অসিদা রাজস্থান্না কান্নবা য়াম্না ফংলে। হৌজিক্কী মতমদা, রাজস্থানগী মেদিকেল সিত মশিং অসি হান্নদগী শরুক অনিদগী হেন্না হেনগৎলে। অন্দর গ্রেজুএৎকী শিত মশিংনা লিশিং ২দগী হেনগত্তুনা লিশিং ৪ য়ৌরে। হান্নদি রাজস্থানগী পি.জি. সিত অসি লিশিংদগী তানা লৈরম্বনি, অদুবু হৌজিক্তি ২১০০ য়ৌরে।
মরুপশিং,
হান্নগী হকশেলগী পথাপ্না হৌজিক্কী মতমগী তঙাই ফদবগী মতুং ইন্না হোংলকপগী মথৌ তাই। মেদিকেল এজুকেসন অমসুং হেল্থ সর্ভিস পীবগী খেন্নবা লৈহন্দনবা লেপ্তনা হোৎনরি। সরকারগী নত্ত্রগা লন্নাইগী ওইরো, অচৌবা হোস্পিতালনা অনৌবা দাক্তর, পেরামেদিক্স মশিং হেন্না পুথোকপা ঙম্নবা মখোয়গী লৈজবা রিসোর্সশিং শিজিন্নবদা মিৎয়েং চঙনবা সরকারনা অকনবা ৱাফম থম্লি। নুমিৎ মরি-মঙানিগী মমাংদা হৌদোকখিবা অয়ুশমান ভারত দিজিতেল মিসন্না লৈবাক্কী কাচিন কোয়া খুদিংদা মেদিকেলগী সেবাশিং য়ৌহনবদা তেংবাংগনি। অফবা হোস্পিতাল, তেস্তিং লেব, ফার্মাসী, দাক্তর উন্নবগী মতম লৌবা –পুম্নমক অসি ক্লিক অমদা ওইথোক্লগনি। মসিদা অনাবশিংনা মখোয়গী হকশেলগী রেকোর্দ চেকশিন্না থম্বগী খুদোংচাবসু ফংলগনি।
ইচিল ইনাওশিং,
হেল্থ সর্ভিসকা মরী লৈনবা স্কিল লৈবা মেনপাৱরগা অফবা হকশেলগী সেবা ফংহনবগা হকথেংননা মরী লৈনৈ। হন্দক্কী কোরোনাগী মতম অসিদা ঐখোয়না মসিগী মতাংদা খঙবা হেল্লে। কেন্দ্র সরকারগী লেম্না ভেক্সিন পীবগী খোঙথাংনা মাই পাকপা ঙম্লিবসি, মসিগী মহৈননি। ঙসিদি, ভারত্তা কোরোনা ভেক্সিন করোর ৮৮ হেন্না কাপখ্রে। রাজস্থান্দসু মীওই করোর ৫ হেনবনা ভেক্সিন কাপ্নখ্রে। সেন্তর লিশিং কয়া অমদা ঐখোয়গী দাক্তর, নর্স, মেদিকেল স্তাফশিংনা তীকা থাবগী থবক্তা থৱাই য়াওনা হোৎনরি। মেদিকেলগী লমদা ঐখোয়গী তৌবা ঙম্বগী মতিক হেনগৎহনবগী মথৌ য়াম্না তারি। খুঙ্গং অমসুং লাইরবা ইমুংদগী লাকপা অঙাংশিংদা মেদিকেলগী এজুকেসনবু ইংলিশ লোল খক্তদা তম্বীবদা খুদোংচাদবা কয়া অমা লাক্কদৌরি। অনৌবা এজুকেসন পোলিসীনা হিন্দি অমসুং অতোপ্পা লোলশিংদা মেদিকেল এজুকেসন পীনবা ৱাফমসু পল্লি। রাজস্থানগী খুঙ্গং, লাইরবা ইমুংশিংনা মখোয়গী মচাশিংগীদমক্তা মঙজরিবা মঙলানশিং হৌজিক য়াম্না লায়না অইথোক্লগনি। ইংলিশ মেদিয়ম স্কুলদা তম্বগী খুদোংচাবা ফংহৌদ্রবা লাইরবগী মচা-মশুশিংসু দাক্তর ওইদুনা মীওইবা খুন্নাইগী তেংবাংবা ঙম্লগনি। মেদিকেল এজুকেসনগী খুদোংচাবশিং অসি খুন্নাইগী মীওই খুদিংমক্তা ফংহনবগী মথৌ তাবসু য়াম্না লৈ। ও.বি.সি. অমসুং শোত্থরবা কাংলুপশিংদা মেদিকেল এজুকেসন ফংহন্নবা অহেনবা খুদোংচাবা পীবগী মরমসু মসিনি।
মরুপশিং,
নীংতম্বা মতুংগী য়াইফরবা মতম অসিদা, স্কিল ৱাংবনা ভারতকী মপাঙ্গল হেনগৎহনবদা তেংবাংবতা নত্তনা মরোমদোম লেপচবা ঙম্বা ভারত অমা ওইহনবদসু য়াম্না তেংবাংগনি। খ্বাইদগী খোঙজেল য়াঙনা চাউখৎলিবা, পেত্রো কেমিকেল ইন্দস্ত্রীনা ঙসিদি স্কিল লৈবা মেনপাৱরগী য়াম্না মথৌ তারে। রাজস্থানগী অনৌবা ইন্সতিত্যুৎ ওফ পেত্রোকেমিকেল্স তেক্নোলোজীনা সেক্তর অসিদা নহা কয়া অমদা চহি খুদিংগী খুদোংচাবা কয়া পীরগনি। হৌজিক্কান্দি পেত্রোকেমিকেল্স অসি লৌউ-শিংউবা, হেল্থেকেয়র অমসুং ওতোমোবিল ইন্দস্ত্রীদগী হৌদুনা পুন্সিগী হীরম খুদিংগী শরুক ওইবা হেনগৎলক্লি। মরম অদুনা, স্কিল লৈবা নহাশিংগী ওইনদি, লাক্কদৌরিবা মতমশিংদা থবক্কী খুদোংচাবা য়াম্না লৈরগনি।
মরুপশিং,
ঙসিদি, ঐখোয়না পেত্রোকেমিকেল্সকী লুপ অমা শঙ্গাবা অসিদা চহি ১৩-১৪ মমাংগী মতম নীংশিংলক্লে। ঐহাক্না গুজরাতকী মুখ্য মন্ত্রী ওইরিঙৈদা, পেত্রোলিয়ম য়ুনিভর্সিতীগী ৱাখল্লোন অমদা ঐখোয়না থবক পাংথোকপা হৌখি। মতমদুদা, মীওই খরনা ঐখোয়গী ৱাখল্লোন্দা নোকখি, মসিগী করি মথৌ তারিবনো হংখি। মসিনা করি কান্নগনি, কনানা মসিদা তম্বা লাক্কনি হায়না হংনখি। অদুবু ঐখোয়না মসিগী ৱাখল্লোন অসি লেপখিদে। গান্ধীনগরদা লম থিবা হৌখি অমসুং পন্দিৎ দীনদয়াল পেত্রোলীয়ম য়ুনিভর্সিতী – পি.দি.পি.য়ু. হৌদোকখি। তেল্লবা মতমদা পি.দি.পি.য়ু.না মসিগী কান্নবা করিনো হায়বা তাকখি। লৈবাক শিনবা থুংবগী মহৈরোই কয়ানা য়ুনিভর্সিতী অসিদা মহৈ তম্না চাংয়েংনখি। হৌজিক্তি য়ুনিভর্সিতী অসিগী মিৎয়েং হান্নদগী হেন্না শাল্লে। হৌজিক্তি মসিবু দীন দয়াল ইনর্জী য়ুনিভর্সিতী – পি.দি.ই.য়ু. হায়না খঙনরে। মসিগুম্বা মখলগী লুপ অসিনা ভারতকী নহাশিংদা ক্লিন ইনর্জীগীদমক্তা অনৌবা ৱারোইশিন থিনবা লম্বী য়াৎপীরে অমসুং মখোয়গী হৈ-শিংবসু হেনগৎহল্লে।
মরুপশিং,
বারমেরগী রাজস্থান রিফাইনরী প্রোজেক্ততসু থবক য়াঙনা চত্থরি। প্রোজেক্ত অসিদা লুপা করোর ৭০,০০০দগী হেন্না থাদরি। ইন্সতিত্যুৎ ওফ পেত্রোকেমিকেল্স তেক্নোলোজীদগী তমদুনা থোক্লকপা প্রোফেস্নেলশিংগীদমক্তা হায়রিবা প্রোজেক্ত অসি খুদোংচাবা অমা ওইরগনি। রাজস্থান্দা সিতী গ্যাস দিস্ত্রিব্যুসনগী থবক চত্থরিবা অসিদা নহাশিং অসিগী খুদোংচাবা য়াম্না লৈগনি। ইং ২০১৪ ফাওবদা রাজস্থানগী শহর অমখক্তদা সিতী গ্যাস দিস্ত্রিব্যুসনগী অয়াবা পীরম্বনি। হৌজিক্তি, রাজস্থানগী জিলা ১৭তা মসিগী নেতৱর্ক লৈনবা অয়াবা পীখ্রে। লাক্কদৌবা মতমশিংদদি, রাজ্য অসিগী জিলা খুদিংদা পাইপকী খুত্থাংদা গ্যাস ফংবগী খুদোংচাবা লৈরগনি।
ইচিল ইনাওশিং,
রাজস্থানগী চাউরবা শরুক অমদি মরুভুমীনি, লৈবাক্কী ঙমখৈসুনি। নাতৈ চাদবা লম্মিৎ-তুম্মিৎকী মফম ওইবনা ঐখোয়গী ইমা, ইচে-ইচলশিংনা খুদোংচাদবা কয়া মাইয়োক্নরি। ঐহাক্না রাজস্থানগী মফম কয়াদা চহি কয়াদগী চত্থোক-চৎশিন্তৌদুনা লাক্লি। মৈ-ঈশিং, অমাংশঙ অমসুং গ্যাস কন্নেক্সনগী মতাংদা মখোয়না অৱাবা কয়াম্না থেংনরমগনি। ঙসিদি, খ্বাইদগী লাইরবা ইমুং ফাওবদা লৈ-ঈশিং, গ্যাস অমসুং অমাংশঙ লৈদুনা পুন্সি মহিংদা য়াম্না নুংঙাইবা ওইরে। থক্নবা ঈশিংনা রাজস্থানগী নুপীশিংগী অখাঙ-কনবগী চাংবু মতম পুম্বদা চাংয়েংদুনা লাক্লি। ঙসিদি, জল জীবন মিসনগী মখাদা রাজস্থানগী ইমুং লাখ ২১ হেনবদা থক্নবা ঈশিং য়ৌবা হৌরে। হর ঘর জল খোংথাংনা রাজস্থানগী নুপীশিংগী অশোকপদা মোলোম তৌবগী য়াম্না পুকচেল শেংনা হোৎনজবা থৌওং অমা ওইরে।
মরুপশিং,
রাজস্থান চাউখৎপনা ভারত চাউখৎপদসু তেংবাংই। রাজস্থানগী মীওইশিংগী পুন্সি মহিং ফগৎলকপা ঐহাক্নসু নুংঙাইবা ফাওই। হৌখিবা চহি ৬-৭তগী কেন্দ্রগী অৱাস য়োজনাগী মখাদা রাজস্থানগী লাইরবা ইমুং লাখ ১৩ হেনবগী পক্কা য়ুম শাখ্রে। পি.এম. সম্মান নিধীগী মখাদা রাজস্থানগী লাখ ৭৪ হেনবা লৌমীগী বেঙ্ক একাউন্তশিংদা হকথেংননা শেলগী তেংবাং য়ৌখ্রে। প্রধান মন্ত্রী ফসল বিমা য়োজনাগী মখাদা লৌমীশিংদা লুপা করোর লিশিং ১৫ হেনবগী ক্লেমসু পীথোকখ্রে।
মরুপশিং,
ঙমখৈ রাজ্য ওইবনা, কন্নেক্তিবিতী অমসুং বোর্দর এরিয়া দিভেলপমেন্তকী কান্নবসু রাজস্থান্না ফংলি। নেস্নেল হাইৱে শাবা, রেলৱে লাইনগী থবক তৌবা, সিতী গ্যাস দিস্ত্রিব্যুসন্নচিংবা প্রোজেক্ত কয়াদা থবক পায়খৎলি। লৈবাক্কী অহোংবা পুরক্কদবা দেদিকেতেদ ফ্রৈৎ কোরিদোরনা রাজস্থান ফাওদুনা চৎলি। থবকশিং অসিনা অহেনবা থবক পীবা ঙম্বগী মতিকসু চাউনা লৈরিবনি।
ইচিল ইনাওশিং,
রাজস্থানগী তৌবা ঙম্বগী মতিক্না লৈবাক পুম্বদা ইথিল পীরি। ঐখোয়না রাজস্থানগী মপাঙ্গলবুসু হেনগৎহনগদবনি অমসুং অনৌবা থাক্তসু পুগদবনি। ঐখোয়না হোৎনবা মতমদা মঙলান অসি ওইথোক্কনি। ভারতকী নীংতম্বগী ৭৫শুবা চহিগী মতম অসিদা রাজস্থান চাউখৎপা ওইসনু। ঐহাক্না হৌজিক রাজস্থানগী মুখ্য মন্ত্রীগী ৱারোল তারে, মহাক্না থবক থৌরম কয়াগী শাংলবা পরিং অমা পল্লি। মহাক্না ঐঙোন্দা অসুক্কী মতিক থাজবা থম্বগীদমক্তা ঐহাক্না মহাকপু থাগৎচরি। মসিনি গনতন্ত্রগী অশেংবা মপাঙ্গল। মহাক্কী ৱাখল্লোন, পার্তীগা ঐহাক্কীগা মান্নদে, অদুবু অশোকজীনা ঐহাক্কী মফমদা থাজবনিনা মহাক্না ৱাফমশিং অসি ফোংনা হায়রিবনি। মসিগী থাজবা অসিগী মপাঙ্গল য়াম্না চাউনা লৈ। ঐহাক্না রাজস্থানগী মীয়াম্বু অমুক্কা হন্না থাগৎচরি।
পুম্নমকপু থাগৎচরি!
