ঐহাক্না ভুপেন দা হায়গনি! ময়ামনা অমর রাহে হায়বিয়ু! অমর রাহে! ভুপেন দা, অমর রাহে! অমর রাহে! ভুপেন দা, অমর রেহে! অমর রাহে! ভুপেন দা, অমর রাহে! অমর রাহে! আসামগী গবর্নর লক্ষ্মন প্রসাদ আচার্য়জী, মফমসিগী মীয়ামনা পাম্নরবা মুখ্য মন্ত্রী হিমন্তা বিস্ব শর্মাজী, অরুনাচল প্রদেশকী নহা ওইরিবা মুখ্য মন্ত্রী পেমা খাণ্ডুজী, কেন্দ্রগী মন্ত্রীমন্দলদা ঐহাক্কী মরুপ সরবানন্দ সোনোৱালজী, স্তেজ অসিদা লেংশিনবিরিবা, ভুপেন হজারিকাজীগী মনাওনুপা শ্রী সমর হজারিকাজী, ভুপেন হজারিকাজীগী মচলনুপী শ্রীমতী কবিতা বরুৱা জী, ভুপেন দাগী মচানুপা শ্রী তেজ হজারিকা জী, ঐহাক্না তেজদা হায়গনি, কেম চো! মফম অসিদা লৈরিবা অতৈ দিগ্নিতিবরীশিং অমসুং আসামগী ঐহাক্কী ইচিল-ইনাওশিং!
ঙসি অসি য়াম্না নুংঙাইবা নুমিৎ অমনি অমসুং মসিগী তাঙ্কক অসি মমল য়াম্লবা অমনি। ঐহাক্না মফম অসিদা উখিবা ফিভমশিং, ঐহাক্না উখিবা থৌনা, ঐহাক্না উখিবা নুংশি-চানবা, ভুপেনগী ঈশৈগী তান্থা, করিগুম্বা ঐহাক্না ভুপেন দাগী ৱাহৈদা হায়রবদি, ঐহাক্কী ৱাখলদা হঞ্জিন-হঞ্জিন লাকখি, 'মতম, ও তপ্না চৎলু! মতম, ও তপ্না চৎলু!' ভুপেনগী ঈশৈগী ঈচেল অসি মফম খুদিংমক্তা অসুম্না লেপ্তনা শন্দোক্কদবনি হায়না ঐহাক্না ফাওখি। থৌরম অসিদা শরুক য়াখিবা আর্তিস্ত খুদিংমকপু ঐনা থাগৎচরি। আসাম অসি মহৌশানা অসিগুম্বা থৌরম খুদিংদা অনৌবা রেকোর্দ অমা শেম্মী। ঙসিমকসু অদোমগী পার্ফোমেন্সকীদমক চাউনা শেম-শারিবা অদু উবা ফংলে। ময়াম পুম্নমকপু হন্না-হন্না নুংঙাইবা ফোংদোকচরি, হন্না-হন্না নুংঙাইবা ফোংদোকচরি।
মরুপশিং,
নুমিৎ খরনিগী মমাংদা, সেপ্তেম্বরগী তাং 8দা, ভুপেন হজারিকা জীগী মপোক কুমওন পাংথোকখি। নুমিৎ অদুদা ঐহাক্না ভুপেন দাদা কত্থোকপা আর্তিকল অমদা ঐহাক্কী ৱাখল্লোন ফোঙদোকখি। মহাক্কী মপোক কুমওনগী চহি 100শুবা থৌরম অসিদা শরুক য়াবগী খুদোংচাবা ফংজবা অসিদা ঐহাক য়াম্না নুংঙাইবা ফাওই। হৌজিক হিমন্তনা ঐহাক্না মফমসিদা লাকপগা লোয়ননা কান্নবা খরা ফংলে হায়না হায়রকখি, মদুগী ওন্ন-তৈনবনি! অসিগুম্বা অখন্নবা থৌরম অমদা লাকপা অসি ঐহাক্কী লাইবক ফবা অমনি। ঐখোয় পুম্নমক্না ভুপেন দাবু শুধা কান্থো হায়না নুংশিনা কৌনৈ। মসি ভারতকী ইহুলবু খোঞ্জেল থোকহল্লম্বা, ঈশৈ অসিবু সেন্সিতিভিতীগা লোয়ননা শম্নহল্লম্বা, ঈশৈদা ভারতকী মঙলানশিং থৌগৎলম্বা অমসুং ইমা গঙ্গাগী খুত্থাংদা ইমা ভারতীগী নুংশিবা অদু ফোংদোকলমখিবা শুধা কান্থোগী চহি চামা শুবা চহিনি। গঙ্গানা করিগীদমক চেল্লী, গঙ্গানা করিগীদমক চেল্লী?
মরুপশিং,
ভুপেন দানা অসিগুম্বা অমর ওইবা পোৎলমশিং পুথোকখি মসিনা ভারতপু মহাক্কী খোঞ্জেলগা লোয়ননা শম্নহল্লি, মসিনা ভারতকী মীরোল কয়াবু অওনবা পুরক্লি।
ইচিল-ইনাওশিং!
ভুপেন দা হৌজিক ঐখোয়গী ইরক্তা লৈত্রে। অদুবু মহাক্কী ঈশৈ অমসুং মহাক্কী খোঞ্জেল ভারতকী চাউখৎ থৌরাংগী খোঙচৎ অদু উবা ফংলি অমসুং থৌনা পীরি। ঐখোয়গী সরকারনা ভুপেন দাগী মপোক কুমওনগী চহি 100শুবা কুমওন অসি চাউথোকচবগা লোয়ননা পাংথোক্লি। ঐখোয়না ভুপেন হজারিকা জীগী ঈশৈশিং, মহাক্কী পাউজেল অমসুং মহাক্কী পুন্সিগী খোঙচৎ অসি য়ুমথোং খুদিংদা য়ৌহল্লগনি। ঙসি মফম অসিদা মহাক্কী পুন্সি ৱারীসু ফোংখ্রে। থৌরম অসিদা, ঐহাক্না দা. ভুপেন হাজারিকা জীদা ইকাই খুম্নবা উৎচরি। ভুপেন দাগী মপোক কুমওনগী চহি 100শুবা অসিদা আসামগী ইচিল-ইনাওশিং অমসুং ভারত মচা খুদিংমকপু ঐনা নুংঙাইবা ফোংদোকচরি।
মরুপশিং,
ভুপেন হজারিকা জীনা মহাক্কী পুন্সি চুপ্পা ঈশৈ-নোংমাইগী সেবা তৌখি। ঈশৈ-নোংমাইনা সধন ওইরকপা মতমদা, মসিনা ঐখোয়গী থম্মোয়দা য়ৌই অমসুং ঈশৈ-নোংমাইনা ৱারেপ অমা ওইরকপা মতমদা, মসিনা খুন্নাইদা অনৌবা মায়কৈ অমা উৎনবা মেদিয়ম অমা ওইরকই। মসিনা মরম ওইদুনা ভুপেন দাগী ঈশৈ অসি অখন্নবা ওইখি। মহাক্না ঙাক্তুনা চৎলিবা ৱাখল্লোনশিং, মহাক্না থেংনখিবা খুদোংচাদবশিং, মহাক্না মহাক্কী ঈশৈশিংদা ফোংদোকখি। ভারত ইমাগীদমক ঐখোয়না মহাক্কী ঈশৈশিংদা নুংশিবা য়াম্না উবা ফংই মরমদি মহাক্না এক ভারত, শ্রেস্ত ভারতকী ৱাখল্লোনগী মখাদা হিংলি। মহাক্না অৱাং-নোংপোক্তা পোকখি, ব্রহ্মপুত্রগী অশেংবা ঈথৎশিং অদুনা মহাকপু ঈশৈ তম্বিখি। মতুংদা মহাক্না গ্রেজুয়েসনগীদমক্তা কাশীদা চৎখি। ব্রহ্মপুত্রগী ঈচেলদগী হৌরকখিবা ভুপেন দাগী ম্যুজিকেল সধন অসি গঙ্গাগী ঈচেলদগী সিদ্ধীদা ওন্থোকখি। কাশীগী দাইনামিজম অসিনা মহাক্কী পুন্সিদা লেপ্পা লৈতনা ঈথিল পীখি। মহাক্না ভারত শিনবা থুংনা চৎথোক-চৎশিন তৌদুনা নোমেদিক ত্রেভেলর অমা ওইরকখি। তুংদা মহাক্না পি.ঐচ.দি. তৌনবা অমেরিকা ফাওবা চৎখি! অদুবু, পুন্সিগী তাঙ্কক খুদিংমক্তা, মহাক্না আসামগী লমদমগা অশেংবা মচা অমগুম্না শম্নদুনা লৈখি অমসুং মসিনা মরম ওইদুনা, মহাক্না ভারত্তা হল্লকখি! মফমসিদা লাকপগা লোয়ননা মহাক্না ফিল্মদা মীচম মীয়ামগী খোঞ্জেল ওইরকখি, মখোয়গী পুন্সিগী অৱাবদা খোঞ্জেল পীখি। মহাক্কী ঈশৈ মনুহে মনুহোর ববে, জোদিহে অকোনু নাভাবে, অকোনি হোহানুভুতিরে, ভাবিবো কোনেনু কুৱা? অসি হৌজিক ফাওবা ঐখোয়বু শুমহৎলি। হায়বদি, করিগুম্বা মীওইবনা মীওইবগী নুংঙাইবা, অৱা-অনা, অমসুং অৱা-নুংঙাইগী মরমদা খল্লমদ্রবদি, মালেম অসিদা কনানা অমনা অমগীদমক খল্লমগনি? মসিনা ঐখোয়দা কয়া য়াম্না ইথিল পীবগে হায়বসি খল্লু। ৱাখল্লোন অসিগা লোয়ননা, ঙসিদি ভারতনা খুঙ্গংশিং, লায়রবশিং, দলিতশিং, শোত্থরবা, ত্রাইবেলশিংগী পুন্সি মহিং ফগৎহন্নবা হোৎনরি।
মরুপশিং,
দিকেদ কয়াগী মমাংদা, অৱাং-নোংপোক লমদম অসি মীৎয়েং চংবীদনা, হিংসা অমসুং সেপরেতিজমগী ৱাখল্লোননা শোকহল্লগা লৈরম্বদা, অৱাং-নোংপোক লমদম অসি অৱাবা মতমশিংদসু ভারতকী অমত্তা ওইনবগীদমক ভুপেন দানা ৱা ঙাংখি। মহাক্না অৱাং-নোংপোক লমদমদা চাউখৎপা পুরক্নবা হোৎনখি। মহাক্না মহৌশাগী ফজবা মরক্তা লৈরিবা অৱাং-নোংপোক্কীদমক ঈশৈ শকখি। মহাক্না আসামগীদমক ঈশৈ অমা শকখি - "নানা জতি-উপোজতি, রহোনিয়া কৃষ্ণী, অকুৱালি লোই হোইশিল শ্রীশতি, ঐ মোর অহোম দেশ।" ঈশৈ অসি শকপা মতমদা, ঐখোয়না ঐখোয়গী আসামগী দাইভর্সিতীগীদমক চাউথোকচবা ফাওই। আসামগী মপাঙ্গল অমসুং ওইথোকপা য়াবশিং অসিদা ঐখোয়না চাউথোকচবা ফাওই।
মরুপশিং,
মহাক্না অরুনাচল প্রদেশপু চপ মান্ননা নুংশিখি অমসুং মসিনা মরম ওইদুনা অরুনাচল প্রদেশকী মুখ্য মন্ত্রী ঙসি অখন্ননা লাকখিবনি। ভুপেন দানা ইখি, অরুন কিরন শেশ ভূষন ভুমী সুরমাই সুনদ্রা, অরুনাচল অসি ঐখোয়গীনি, অরুনাচল অসি ঐখোয়গীনি।
মরুপশিং,
অশেংবা পেত্রিওৎ অমগী খোঞ্জেল অসি কৈদৌনুংদা মাংলোই। ঙসিদি ঐখোয়না অৱাং নোংপোক্কীদমক মহাক্কী মঙলানশিং অদু মঙফাওনহন্নবা নুমিৎ চুপ্পা থবক তৌরি। ভুপেন দাদা ভারত রত্ন পীদুনা ঐখোয়গী সরকারনা অৱাং নোংপোক্কী মীৎয়েং অমসুং ইকাই খুম্নবা অদু ইকাই খুম্নবা উৎখি অমসুং অৱাং নোংপোক অসি লৈবাক অসিগী মরুওইবা অমা ওইহনখি। ঐখোয়না লৈবাক অসিগী খ্বাইদগী শাংবা থোং অমা, আসাম অমসুং অরুনাচলগা শম্নহল্লিবা থোং অমা শাবা মতমদা, ঐখোয়না মদুবু ভুপেন হজারিকা থোং হায়না মিংথোনখি। ঙসি আসাম অমসুং অৱাং-নোংপোক্কী মফম পুম্নমক খোঙজেল য়াংনা খুমাং চাউশিল্লি। চাউখৎ-থৌরাংগী হিরম খুদিংমক্তা অনৌবা রেকোর্দশিং শেমগৎলি। চাউখৎ-থৌরাংগী মাইপাকপশিং অসি লৈবাক অসিনা ভুপেন দাদা ইকায় খুম্নবা উৎলি।
মরুপশিং,
ঐখোয়গী আসাম, ঐখোয়গী অৱাং নোংপোক লমদম অসিনা মতম পুম্নমক্তা ভারতকী নাৎকী ওইবা দাইভর্সিতীদা চাউনা কন্ত্রিব্যুৎ তৌরি। মাগী লমদম অসিগী পুৱারী, মাগী কুমহৈশিং, মাগী নুংঙাইবা ফোংদোকপশিং, মাগী কলা, মাগী কলচর, মাগী মহৌশাগী ফজবা, মাগী ঈশ্বরগী মঙাল অমসুং মসিগী পুম্নমক অসিগা লোইননা, মফমসিগী মীয়াম্না ভারত মচাগী ইকাই খুম্নবা অমসুং ঙাক-শেনবগীদমক কত্থোকপশিং অসি য়াওদনা ঐখোয়না ঐখোয়গী চাউরবা ভারত অসি ৱাখলনা শাগৎপা ঙম্লোই। ঐখোয়গী অৱাং নোংপোক অসি অনৌবা মঙালগী লমনি, লৈবাক অসিগী অনৌবা মঙালনি। লৈবাক অসিগী অহানবা অয়ুক অসিসু মফম অসিদা হৌরকই। ভুপেন দানা মহাক্কী ঈশৈদা মসি থৱায় হাপখি, অহোম অমর রুপোহি, গুনোর নাই হেশ, ভরোতোরে পুরবো দিখৌর, হুরজো উথা দেশ!
মরম অদুনা, ঐগী ইচিল-ইনাওশিং,
ঐখোয়না অসমগী পুৱারী অসি পাংথোকপা মতমদা, ভারতকী পুৱারী অসি মপুং ফারকই, ভারতকী নুংঙাইবা অসি মপুং ফারকই অমসুং ঐখোয়না মসিগীদমক চাউথোকচবা ফাওদুনা মাংলোমদা চংশিনবা তাই।
মরুপশিং,
ঐখোয়না কন্নেক্তিবিতীগী মতাংদা ৱা ঙাংবদা, মীয়াম্না রেলৱে-রোদ নৎত্রগা এয়র কন্নেক্তিবিতীগী মরমদা তোয়না খল্লকই। অদুবু অতোপ্পা কন্নেক্তিবিতী অমনা লৈবাক অসিগী অপুনবগীদমক য়াম্না মরু ওই অমসুং মদুদি কলচরেল কন্নেক্তিবিতীনি। হৌখিবা চহি 11 অসিদা লৈবাক অসিনা অৱাং-নোংপোক্কী চাউখৎ-থৌরাংগা লোয়ননা কলচরেল কন্নেক্তিবিতীদা চাউনা মরুওইবা পীরি। মসি লেপ্পা লৈতনা চত্থরিবা কেম্পেন অমনি। ঙসিগী থৌরম অসিদা, ঐখোয়না মসিগী কেম্পেন অসি য়েংলি। মতম খরগী মমাংদা, ঐখোয়না বীর লসিৎ বোর্ফুকনগী 400শুবা মপোক কুমওনসু লৈবাক শীনবা থুংনা পাংথোকখি। নীংতম লানফমদসু, আসাম অমসুং অৱাং নোংপোক্কী লান্মী কয়ানা মমাংদা অমুক্তা ওইখিদ্রিবা মওংদা কত্থোকখি। আজাদী কা অমৃত মহোৎসবকী মনুংদা, ঐখোয়না অৱাং নোংপোক্কী লান্মীশিং, মফম অসিগী পুৱারী অমুক হন্না পুথোরকখি। ঙসিদি লৈবাক পুম্বনা ঐখোয়গী আসামগী পুৱারী অমসুং থৌদাংগা মরমদা খঙলে। মতম খরগী মমাংদা ঐখোয়না দিল্লীদসু অষ্টলক্ষ্মী মহোৎসব পাংথোকখি। থৌরম অসিদা আসামগী শক্তি, আসামগী হৈ-শিংবা অসি উৎখি।
মরুপশিং,
করিগুম্বা ফিভম অমা হেক্তদা, আসামনা মতম পুম্নমক্তা লৈবাক অসিগী মশাগী ইকাই খুম্নবগী ৱা ঙাংদুনা লাক্লি। ভুপেন দাগী ঈশৈশিংদসু ঐখোয়না মান্নবা খোঞ্জেল অদু উবা ফংই। 1962গী লান অদু পাংথোকপা মতমদা, আসামনা লান অদু মশানা উখি, অদুদগী ভুপেন দানা লৈবাক অসিগী অচেৎপা ফিরেপ লৌখি, মহাক্না মতম অদুদা প্রোতি জোবান রক্তৌরে বিন্দু হাহাহাওর অনন্ত হিন্দু, সেই হাহাহাওর দুরজোই লহরে, জাশিলে প্রোতিজ্ঞ জয়রে হায়না ঈশৈ শকখি, অচেৎপা ফিরেপ অদুনা লৈবাক মীয়ামদা অনৌবা থৌনা অমা পোকহনখি।
মরুপশিং,
মসিগী ৱাখল্লোন, মসিগী পুক্নিং থৌগৎপা অসি হৌজিক ফাওবা লৈবাক অসিগী মীওইশিংগী থম্মোয়দা ইহুল অমা ওইনা লৈরি। ঐখোয়না মসিবু ওপরেসন সিন্দুরগী মতমদাসু উখি। লৈবাক অসিনা পাকিস্তানগী তেরোরিস্ত দিজাইনশিংদা অসিগুম্বা পাউখুম অমা পীখি মদুদি ভারতকী শক্তিগী খোন্থাং অসি মালেম পুম্বদা য়ৌখি। ঐখোয়না উৎলি মদুদি ভারতকী য়েক্নবশিং অসি মফম অমত্তদা চেনবা য়ারোই। অনৌবা ভারতনা মাগী সেক্যুরিতী অমসুং মশাগী ইকাই খুম্নবগীদমক করিগুম্বা মওং অমত্তদা য়াশিন্নবা তৌরোই।
মরুপশিং,
আসামগী কলচরগী মওং-মতৌ খুদিংমক অসি অঙকপা, অখন্নবা অমনি। মরম অসিনা ঐহাক্না লৈবাক অসিগী অঙাংশিংনা এ হায়বা অসি আসামনি হায়না পাগদবা নুমিৎ অদু কুইদ্রে হায়না হন্না-হন্না হায়নরি। মফম অসিগী চৎনবী অসি ইকাই খুম্নবা অমসুং ইশা-ইকাই খুম্নবা অমসুং মশীং থীঙমদ্রবা ওইথোকপা য়াবশিংগী হৌরকফম অমনি। আসামগী পোৎ-চৈ, চিঞ্জাক, তুরিজম, মফমসিগী পোত্থোকশিং অসি লৈবাক অসিদা খক্তা নত্তনা মালেম পুম্বদা ঐখোয়না শকখঙহনগদবনি। ময়াম পুম্নমক্না খঙনরবনি, ঐহাক ইশামক্না আসামগী গামোসাবু য়াম্না চাউথোকচবা পোকই। আসামগী পোত্থোক খুদিংমক মালেমগী মফম খুদিংমক্তা য়ৌহনগদবনি।
মরুপশিং,
ভুপেন দাগী পুন্সি অসি লৈবাক অসিগী পান্দমদা কত্থোকখি। ঙসি, ভুপেন দাগী চহি চামা শুবা মপোক কুমওন অসিদা, ঐখোয়না লৈবাক অসিগীদমক্তা আত্মনির্ভর ওইবগী অচেৎপা ফিরেপ লৌগদবনি। আসামগী ঐহাক্কী ইচিল-ইনাওশিংশিংদা ঐহাক্না হায়জরি মদুদি ঐখোয়না ভোকেল ফোর লোকেলগী ব্রান্দ এম্বেসেদর ওইগদবনি। ঐখোয়না লমদমসিগী পোৎলমশিংদা চাউথোকচবা পোক্কদবনি। ঐখোয়না ইন্দিজিনস খক্তমক লৈফম থোকই অমসুং ইন্দিজিনস খক্তমক য়োনগদবনি। ঐখোয়না মসিগী কেম্পেনশিং অসিদা খোঙজেল য়াংনা চংশিল্লিবমখৈ, চাউখৎলবা ভারতকী মঙলান অসি হেন্না থুনা মপুং ফাহল্লগনি।
মরুপশিং,
ভুপেন দানা চহি 13 শুরকপদা ঈশৈ অমা ইরম্মি, অগ্নিজুগোর ফিরিংগোতি মোই, নোতুন ভারত গোধীম, হরবোহারর হরবোশভো পুনোর ফিরায় অয়নম, নোতুন ভারত গোধীম।
মরুপশিং,
ঈশৈ অসিদা, মহাক্না মশামকপু মৈগী মৈরিক অমা ওইনা লৌরম্মি অমসুং অনৌবা ভারত অমা শেমগৎনবা ৱাশক লৌরম্মি। অৱাবা অমসুং তুহৎপীরবা মীওই খুদিংমক্না মখোয়গী হকশিং ফংলিবা অনৌবা ভারত অমা।
ঐহাক্কী ইচিল-ইনাওশিং,
মতম অদুদা ভুপেন দানা উখিবা অনৌবা ভারতকী মঙলান অদু ঙসি লৈবাক অসিগী ৱারেপ ওইরক্লি। ঐখোয়না মসিগী ৱারেপ অসিগা মরী লৈনহনগদবনি। ঙসি অসি মতম ওইরে, ঐখোয়না 2047কী চাউখৎলবা ভারত অমা ওইহনবা হায়বা হোৎনরিবা অমসুং ৱারেপ লৌরিবা খুদিংমক্কী ময়াইদা থমগদবনি। মসিগীদমক্তা ঐখোয়না ভুপেন দাগী ঈশৈশিংদগী, মহাক্কী পুন্সিদগী ইথিল লৌগনি। ঐখোয়গী ৱারেপশিং অসিনা ভুপেন হজারিকাগী মঙলানশিং অদু মঙফাওনহনগনি। ৱাখল্লোন অসিগা লোয়ননা, ঐহাক্না অমুক্কা হন্না লৈবাক মীয়াম পুম্নমকপু ভুপেন দাগী মপোক কুমওনগীদমক্তা হন্না-হন্না নুংঙাইবা ফোংদোকচরি। ঐহাক্না ময়াম পুম্নমক্তা হায়জরি মদুদি, অদোমগী মোবাইল ফোন অদু পুথোকপীয়ু অমসুং ভুপেন দাগী মফমদা ইকায় খুম্নবা উৎতুনা মোবাইল ফোন অদুগী ফ্লাশ লাইৎ অদু থাল্লু। হায়রিবা মঙাল লিশিং কয়া অসিনা ভুপেন দাগী অমর ওইরবা থৱায়বু ইকায় খুম্নবা উৎলি। ঙসিগী জেনরেসন অসিনা মহাক্কী খোঞ্জেল অদু মঙালনা লৈতেংহল্লি। হন্না-হন্না থাগৎচরি।
