প্রধান মন্ত্রী, শ্রী নরেন্দ্র মোদীনা জোহানেসবর্গতা ওগস্ত 24, 2023দা পাংথোকপা BRICS-অফ্রিকা আউতরীচ অমসুং BRICS প্লস দাইলোগতা শরুক য়াখ্রে।
মীফম অসিদা অফ্রিকা, এসিয়া অমসুং লেতিন অমেরিকাগী মীথুংলেন লৈবাকশিংগা লোয়ননা BRICS লৈবাক্কী লুচিংবশিংনা শরুক য়াখি।
প্রধান মন্ত্রীনা মীফম অসিদা ৱা ঙাঙবদা, BRICSনা গ্লোবেল সাউথকী খোঞ্জেল ওইসি হায়বা ৱাফম থমখি। মহাক্না অফ্রিকাগা ভারতকা লৈনরিবা তেংবাংনবগী নক্নবা মরীদা মিৎয়েং চঙখি অমসুং এজেন্দা 2063গী মখাদা চাউখৎ-থৌরাংগী থবক কয়া অফ্রিকানা পাংথোক্কদৌরিবা অসিদা ভারতনা তেংবাংগনি হায়বগী ৱাফম মহাক্না অমুক্কা হন্না থমখি।
প্রধান মন্ত্রীনা মলতি-পোলার ৱর্ল্দগী মপাঙ্গল হেন্না কনখৎহন্নবা মখা তানা তেংবাংনসি হায়খি অমসুং মালেমগী ইন্সতিত্যুসনশিংবু মতমগা চুনবা অমসুং তসেংনা মীহুৎ শিনবা ঙম্বগী মতিক লেংদনা লৈহন্নবগীদমক্তা রিফোর্ম তৌবগী তঙাই ফদবা লৈ হায়না ফোংদোকখি। তেরোরিজমগা মাইয়োক্নবা, অকোয়বগী ফিভম ঙাক-শেনবা, ক্লাইমেত এক্সন, সাইবরসেক্যুরিতী, ফুদ অমসুং হেল্থ সেক্যুরিতী অমসুং নিংহন্নবা লৈতবা সপ্লাই চেনগী লমদা তেংবাংনসি হায়না মহাক্না লুচিংবশিংগী মফমদা হায়খি। প্রধান মন্ত্রীনা লৈবাকশিংনা ইন্তর্নেস্নেল সোলর এল্লাইএন্স, ৱান সন ৱান ৱর্ল্দ ৱান গ্রিদ, কোলিএসন ফোর দিজাজতর রেজিলিএন্ত ইনফ্রাস্ত্রকচর, ৱান আর্থ ৱান হেল্থ, বিগ কেত এল্লাইএন্স অমসুং গ্লোবেল সেন্তর ফোর ত্রেদিস্নেল মেদিসিনগুম্বা মালেমগী খোঙথাংশিং অসিগী শরুক ওইসি হায়বা ৱাফম থমখি। মহাক্না ভারতকী দিজিতেল পব্লিক ইনফ্রাস্ত্রকচর স্তেক অসিবু মালেমগা লান্নবা পাম্মি হায়নসু ফোংদোকখি।
