কেরলাগী রাজ্যপাল শ্রী অরিফ মোহমদ খান, কেরলাগী চীফ মিনিস্তর শ্রী পিনারায়ি বিজয়ান, ঐগী মিনিস্তর মরুপশিং শ্রী আর.কে সিংহ, শ্রী হরদিপ সিংহ পুরি, অতোপ্পা শক্নাইরবা লেংবীরক্লিবশিং,
মরুপশিং,
নমস্কারম কেরলা! পেত্রোলিয়ম সেক্তরগী মরুওইবা প্রোজেকশিং শঙ্গানবা ঐ নুমিৎ খরনিগী মমাঙদা কেরলাদা লাক্লম্লে। ঙসি ঐখোয় অমুক হন্না উনরে, মসিগীদমক তেক্নোলোজি থাগৎলি। কেরলাগী চাউখৎপগী খোঙচত্তা ঐখোয়না মরুওইবা থবকশিং পায়খৎলে। ঙসিদগী হৌরিবা চাউখৎ-থৌরাংগী থবকশিং কেরলাগী মফম কয়া পাক-শন্না য়ৌরে। মখোয়না সেক্তর কয়া কোনশিল্লে।
মখোয়না ভারতকী চাউখৎপদা চাউনা মতেং পাংলিবা ফজরবা রাজ্য কেরলাগী মীয়াম থৌনা হাপ্লগনি। মেগাৱাত ২০০০গী অনৌবা পুগালুর-থ্রিসুর হায় ভোলতেজ দাইরেক্ত করেন্ত সিস্তেম ঙসি শঙ্গারে। মসি কেরলা অমসুং নেসনেল গ্রিদ শম্নবা অহানবা ঐচ.ভি.দি.সি ইন্তরকন্নেক্সনি। থ্রিসুর কেরলাগী কলচরগী মরুওইবা মফম অমনি। হৌজিক সহর অসি কেরলাগী মৈগী মরুওইবা মফম অমা ওইরগনি। মসিগী সিস্তেম অসিনা রাজ্য অসিগী দরকার ওইবা মৈ পীবা ঙম্নবা য়াম্লবা মৈ পুবা ঙম্লগনি। মসি লৈবাক অসিদা মৈ পুনবা ভি.এস.সি কনভর্তর তেক্নোলোজি শীজিন্নবা অহানবনি। মসি তশেংনা ঐখোয় খুদিংমক্কী চাউথোকচনবা মিকুপ অমনি।
মরুপশিং,
কেরলা মশাগী ওইবা মৈ পুথোকপা অসি মতম মতমগী ওইনা লেপ্পা মরম্না কেরলা অসি নেসনেল গ্রিদতগী মৈ লৌবগী মখা য়াম্না পোল্লি। মসিগী খুদোংচাদবা অসি কোকহনগদবনি। মসি কোকহন্নবা ঐচ.ভি.দি.সি সিস্তেম্না ঐখোয়গী মতেং পাংলে। হৌজিক মৈ নিংথিনা ফংলগনি। য়ুমথোঙশিং অমসুং ইন্দস্ত্রিএল য়ুনিতশিংদা মৈ ফংহন্নবা রাজ্য মনুংগী ত্রান্সমিসন নেতৱার্ক মপাঙ্গল কনখৎহনবা য়াম্না মরুওই। মসিগী প্রোজেক অসি ঐহাক হরাওহনবগী অতোপ্পা মরম অমা লৈরে। প্রোজেক অসিদা শীজিন্নরিবা ঐচ.ভি.দি.সি খুৎলায়শিং ভারত্তা শাবনি অমসুং মসিনা লৈবাক অসিগী অত্মানির্ভর ভারতকী ইহৌ মপাঙ্গল কনখৎহল্লগনি।
মরুপশিং,
ঐখোয়না শুপ্নগী ত্রান্সমিসন প্রোজেক অমা মীয়ামদা কৎথোকপা নত্তে। মৈ পুথোক্নবা প্রোজেক অমসু ঐখোয়গী লৈরি। মেগাৱাত ৫০গী সোলার ইনর্জি পুথোকপা ঙম্বা কাসারাগোদ সোলার প্রোজেক কৎথোকপা অসি নুংঙাইবা অমনি। মসিনা ঐখোয়গী লৈবাক্কী মৈখু চেন্দবা অমসুং মশা নানবা ইনর্জি পুথোক্নবগী মঙলান মঙফাওনবা ঙম্নবা খোঙথাং অমনি। সোলার ইনর্জিদা ভারতনা মরুওইবা মিৎয়েং থম্লি। নুমিৎ মঙালদগী মৈ পুথোক্নবা ঐখোয়না মাইপাক্না পায়খৎলিবা থবকশিং অসিনা অইং-অশাগী খল হোংলকপা থেংনবা ঙমহল্লে। ঐখোয়গী ওন্ত্রেপ্রেনিউয়রশিং চাউখৎলে। ঐখোয়গী অন্নদাতাশিং উর্জদাতাশিং ওইনা শেমগৎনবা থবক কনবা লৌমীশিংগা সোলার সেক্তরগা শম্ননবা থবকশু পায়খৎলি। প্রধান মন্ত্রী-কুসুম য়োজনাগী মখাদা লৌমীশিংদা সোলার পম্প লাখ ২০ হেন্না ফংহনখ্রে। হৌখিবা চহি ৬তা ভারতকী সোলার ইনর্জি পুথোকপা শরুক ১৩ হেনগৎলে। ইন্তরনেসনেল সোলার এল্লাইন্সকী খুৎথাংদা ভারতনা মালেম অসি পুনশিনহল্লে।
মরুপশিং,
ঐখোয়গী সহরশিং চাউখৎপগী ইঞ্জিনশিংনি অমসুং অনৌবা থবক পায়খৎপগী হৌরকফম্নি। ঐখোয়গী সহরশিংদা পুক্নিং থৌগৎনিংঙাই ওইবা অনৌবা থবক অহুম উবা ফংলে: তেক্নোলোজি চাউখৎলকপা, থবক শুবা ঙম্বা মীওই মশিং হেনগৎলকপা অমসুং পোৎ-চৈ শীজিন্নবা হেনগৎলকপা। সেক্তর অসিদা ঐখোয় মখা তানা চাউখৎনবা, ঐখোয়গী স্মার্দ সিতি মিসন লৈরে। স্মার্দ সিতি মিসনগী মখাদা পায়খৎলিবা ইন্তেগ্রেতেদ কমান্দ এন্দ কন্ত্রোল সেন্তর অসিনা সহর নিংথিনা থৌরাং তৌবা অমসুং শেন্নবদা মতেং পাংলি। কমান্দ সেন্তর প্রোজেক ৫৪ মথৌ পাংথোকপা হৌরে হায়না খঙহনবদা ঐ হরাওই। অসিগুম্বা প্রোজেক ৩০ শেমগৎ-শাগৎপগী তোঙান-তোঙানবা তাঙ্ককশিংদা লৈরি। হায়রিবা সেন্তরশিং অসি লাইচৎ মনুংদা য়াম্না কান্নখি। কেরলাদা স্মার্দ সিতি অনি লৈবগী মনুংদা, কোচি স্মার্দ সিতিগী কমান্দ সেন্তর হান্না লিংখৎখ্রে। হৌজিক তিরুবনন্তপুরম স্মার্দ সিতিগী কন্ত্রোল সেন্তর থৌরাং লোইদুনা লৈরে। স্মার্দ সিতি মিসনগী মখাদা, কেরলাগী স্মার্দ সিতি অনি-কোচি অমসুং তিরুবনন্তপুরম ফজনা চাউখৎলে। হৌজিক ফাওবদা স্মার্দ সিতি অনিগী লুপা কোতি ৭৭৩গী প্রোজেক ২৭ লোইশিনখ্রে অমসুং লুপা কোতি ২০০০গী প্রোজেক ৬৮ পায়খৎলি।
মরুপশিং,
সহরগী মচাক-মথুম ফগৎনবা অতোপ্পা মরুওইবা থবক অমদি অমরুতনি। সহরশিং পাকথোক-চাউথোকপা অমসুং মখোয়গী ফত্তবা ঈশিং শেংদোক্নবা মচাকশিং ফগৎনবা অমরুতনা মতেং পাংলি। অমরুতকী মখাদা লুপা কোতি ১১০০ হেনবগী ঈশিং পীনবা প্রোজেক ১৭৪৫দা কেরলাদা পায়খৎলি। অমরুত সহর ৯দা মী খুদিংমক ঈশিং ফংহল্লে।
ঙসি ঐখোয়না অরুভিক্কারাদা নোংমদা লিতর মিল্লিয়ন ৭৫ চুমথোকপা ঙম্বা প্লান্ত শঙ্গারিবা অসি লুপা কোতি ৭০ চঙনা লোইশিনবনি। মসিনা মীওই লাখ ১৩ রোমগী পুন্সি মহিং ফগৎহনগনি। ঐগী মরুপ মিনিস্তরনা হায়বগী মতুংইন্না, প্রোজেক অসিনা তিরুবনন্তপুরমদা মীওই অমদা ফংলিবা ঈশিংগী চাং হেন্না ফংবদা মতেং পাংদুনা মমাঙদা নোংমদা মীওই অমনা লিতর ১০০ ফংলম্বা অদু লিতর ১৫০দা হেনগৎলগনি।
মরুপশিং,
ঙসি ঐখোয়না ছাত্রপতি শিবাজি মহারাজগী মপোক নুমিৎ থৌরম পাংথোক্লি। ছাত্রপতি শিবাজি মহারাজগী পুন্সিনা ভারত শীনবা থুংনা মীওই কয়া ইথিল পীখি। খুন্নাইগী কাংলুপ খুদিংমক চাউখৎপগী মহৈ চাগদবনি হায়বা শ্বারাজ্যদা মহাক্না অকনবা মিৎয়েং থমখি। ছাত্রপতি শিবাজি মহারাজগা ভারতকী সমুদ্র মপানশিংগা অখন্নবা মরী অমা লৈনখি। অতোপ্পা অমদা মহাক্না মপাঙ্গল কনবা নেভি অমা শেমগৎখি। অতোপ্পা অমদা মহাক্না সমুদ্র মপান চাউখৎনবা অমসুং ঙামীশিংগী য়াইফনবা অকনবা থবক পায়খৎখি। মহাক্কী পান্দমশিং ঐখোয়না মখা তানা পাংথোক্লি। ঙাক-শেনগী হিরমদা অত্মনির্ভর ওইনবা লম্বীদা ভারত চঙশিল্লি। ঙাক-শেন অমসুং স্পেসকী থবকশিংদা মশক থোকপা অওনবশিং পুরক্লে। হায়রিবা থবকশিং অসিনা হৈশিংলবা ভারতকী নহারোল কয়া খুদোংচাবা কয়া ফংলগনি। চপ মান্নবা মওংদা, সমুদ্র মপানগী অফবা মচাক-মথুমশিং শেমগৎনবা ঐখোয়গী লৈবাক্না অচৌবা খোঙজং অমা হৌরে। ভারতনা ঐখোয়গী ব্লু ইকোনোমিদা শেন থাদরে। ঐখোয়গী ঙামীশিংগী থবকশিং ঐখোয়না মরুওইনা লৌরি। ঙামীশিংগীদমক ঐখোয়না পায়খৎলিবা থবকশিং অসি শেন্থং হেন্না পীনবা, তেক্নোলোজি শীজিন্নবা হেনগৎনবা, মগুন লৈবা মচাক-মথুমশিং শেমগৎনবা অমসুং অফবা সরকারগী থৌশিলশিং শেম্নবা থবকশিংদা য়ুম্ফম ওইরি। হৌজিক ঙামীশিং কিসান ক্রেদিদ কার্দ ফংলে। জহাজ হোনবদা মতেং পাংনবা খ্বাইদগী নৌবা তেক্নোলোজি শীজিন্ননবা ঐখোয়না পুক্নিং থৌগৎলি। মখোয়না শীজিন্নরিবা হিশিং মতমগা চুনবা মওংদা ওনখৎনবা থবক পায়খৎলি। সরকারগী থৌশিলশিং অসিনা ভারত সমুদ্রদগী ফংবা চীঞ্জাকশিং মপান্দা থাদোক্নবা মফম অমা ওইনা শেমগৎপা ঙমগনি। হন্দক্কী বজেত অসিদা কোচিদা ঙা ফাবগী হিথাংফম অমা শানবা লাউথোকখ্রে।
মরুপশিং,
মমিং লৈরবা মলায়ালম কবি কুমারানসান্না হায়খি: “ঐনা হংদে অদোমগী জাৎ ইচল, ঐনা হংলি ঈশিং, ঐ খৌরাংলে”।চাউখৎপা অমসুং অফবা লৈঙাক্না কাংলুপ, ফুরুপ, জাৎ, নুপা-নুপী, লাইনিং নত্রগা লোল মশক খঙদে। চাউখৎপা হায়বসি মী খুদিংমক্কীনি। মসি সবকা সাথ, সবকা বিকাস, সবকা বিশ্বাসকী থৱায়নি। চাউখৎপা হায়বসি ঐখোয়গী পান্দমনি। চাউখৎপা অসি ঐখোয়গী লাইনিংনি। মাঙলোমদা চঙশিন্নবা অমসুং পুন্না হিংমিন্নবা অমসুং চাউখৎপগী মঙলান মঙফাওনবা ঙম্নবা ঐনা কেরলাগী মীয়ামদগী মতেং নিরি। নন্দি! নমস্কারম!
