પુડુચેરીના મુખ્યમંત્રી, શ્રી એન. રંગાસામી, મારા કેન્દ્રીય કેબિનેટ સાથી, શ્રી મનસુખ માંડવિયા, પુડુચેરીના લેફ્ટનન્ટ ગવર્નર, શ્રી કે. કૈલાશનાથન, સ્પીકર, શ્રી આર. સેલ્વમ, ગૃહ મંત્રી, શ્રી એ. નમસ્સીવાયમ, અન્ય નેતાઓ, પુડુચેરીના મારા વહાલા બહેનો અને ભાઈઓ, વણક્કમ!
મિત્રો, પુડુચેરીમાં અહીં હોવું એ એક સન્માનની વાત છે. આ સિદ્ધો, સંતો, કવિઓ અને સ્વતંત્રતા સેનાનીઓની ભૂમિ છે. આ તે સ્થાન છે જ્યાં મહાકવિ સુબ્રમણ્ય ભારતીએ રાષ્ટ્રવાદની જ્યોત પ્રગટાવી હતી. અહીંથી જ શ્રી અરવિંદ અને ધ મધરે સમગ્ર વિશ્વને નવું આધ્યાત્મિક વિઝન આપ્યું હતું.
મિત્રો, જ્યારે હું અગાઉ અહીં આવ્યો હતો, ત્યારે મેં BEST પુડુચેરીનો મંત્ર આપ્યો હતો. BEST એટલે બિઝનેસ (Business), એજ્યુકેશન (Education), સ્પિરિચ્યુઆલિટી (Spirituality) અને ટુરીઝમ (Tourism). છેલ્લા સાડા ચાર વર્ષમાં આ વિઝન ફળ આપી રહ્યું છે. પુડુચેરી સુશાસન અને વિકાસનું સાક્ષી બન્યું છે. જ્યારે કેન્દ્ર અને કેન્દ્રશાસિત પ્રદેશ સમાન વિઝન અને સમર્પણ સાથે કામ કરે છે, ત્યારે પરિણામો ઝડપી અને વધુ સારા મળે છે. પુડુચેરીએ માથાદીઠ આવકમાં પ્રભાવશાળી વધારો દર્શાવ્યો છે. તેણે દેશમાં સર્વોચ્ચ સોશિયલ પ્રોગ્રેસ ઇન્ડેક્સ સ્કોર પણ હાંસલ કર્યો છે. હવે, ડબલ-એન્જિન NDA સરકાર પુડુચેરીના વિકાસમાં વધુ વેગ આપશે. આજે, બે હજાર સાતસો કરોડ રૂપિયાથી વધુના પ્રોજેક્ટ્સનું ઉદ્ઘાટન કરવામાં આવી રહ્યું છે અને શિલાન્યાસ કરવામાં આવી રહ્યો છે. આ પ્રોજેક્ટ્સ લોકોના જીવનમાં પરિવર્તન લાવશે.
મિત્રો, સમગ્ર ભારતમાં ઉચ્ચ ગુણવત્તાયુક્ત ઇન્ફ્રાસ્ટ્રક્ચર બનાવવા પર ઘણો ભાર મૂકવામાં આવી રહ્યો છે. આ વર્ષના બજેટમાં અમે ઇન્ફ્રાસ્ટ્રક્ચર બનાવવા માટે રેકોર્ડ બાર લાખ કરોડ રૂપિયા અલગ રાખ્યા છે. આનો લાભ પુડુચેરીના લોકોને પણ મળશે. અમે પુડુચેરીનો 'સ્ટેટ્સ ફોર કેપિટલ ઇન્વેસ્ટમેન્ટ સ્કીમ માટે વિશેષ સહાય' હેઠળ સમાવેશ કર્યો છે, જે અગાઉ માત્ર રાજ્યો માટે જ ખુલ્લી હતી. ઇન્ફ્રાસ્ટ્રક્ચર માટે વધુ ભંડોળનો અર્થ છે વધુ સારા રસ્તાઓ, પાણી પુરવઠો, દરિયાકાંઠાનું ઇન્ફ્રાસ્ટ્રક્ચર, શાળાઓ, હોસ્પિટલો અને આવા અનેક પ્રોજેક્ટ્સ. આ સુવિધાઓ પ્રત્યક્ષ રીતે લોકોના જીવનને વધુ સારું બનાવે છે.
મિત્રો, મજબૂત અને સશક્ત યુવા એ આપણા વિકાસનો પાયો છે. અમે તેમના સપનાઓને ટેકો આપવા માટે કામ કરી રહ્યા છીએ. NIT કરાઈકલ ખાતે, ડૉ. APJ અબ્દુલ કલામ એન્જિનિયરિંગ બ્લોક અને આધુનિક હોસ્ટેલ સુવિધાઓ ઘણા વિદ્યાર્થીઓ માટે ટેકનિકલ શિક્ષણને મજબૂત બનાવશે. પુડુચેરી યુનિવર્સિટીમાં ઇન્ફ્રાસ્ટ્રક્ચર અપગ્રેડ કરવામાં આવ્યું છે. તેના નવા લેક્ચર હોલ, ગર્લ્સ હોસ્ટેલ અને અન્ય ઇન્ફ્રાસ્ટ્રક્ચર વિદ્યાર્થીઓને મદદ કરશે. મને જણાવવામાં આવ્યું છે કે પુડુચેરી સરકારના વિવિધ વિભાગોમાં હજારો ખાલી જગ્યાઓ ભરવામાં આવી છે. આમાંની ઘણી જગ્યાઓ માટે દાયકાઓથી સીધી ભરતી પરીક્ષાઓ લેવામાં આવી ન હતી. પરંતુ ડબલ એન્જિન સરકારે તે કરી બતાવ્યું. જે તમામ યુવાનો લોકોની સેવા કરવા માટે જોડાયા છે તેમને હું અભિનંદન પાઠવું છું.
મિત્રો, આજે વિશ્વ એવી ગતિશીલતા પર ધ્યાન કેન્દ્રિત કરી રહ્યું છે જે સ્વચ્છ અને ગ્રીન હોય. ઇલેક્ટ્રિક વાહનો આપણા જીવનનો એક મહત્વપૂર્ણ ભાગ બની ગયા છે. પુડુચેરી જેવા પ્રવાસન કેન્દ્રમાં, ઇલેક્ટ્રિક બસો પ્રદૂષણ ઘટાડવામાં ગેમચેન્જર બની શકે છે. PM ઇ-બસ સેવા હેઠળ આજે ઇલેક્ટ્રિક બસો પૂરી પાડવામાં આવી રહી છે. આજના અમારા કાર્યક્રમ સાથે સંબંધિત હાઉસિંગ પ્રોજેક્ટ્સ પરિવારોને સ્થિરતા અને ગૌરવ આપશે. પુડુચેરી, કરાઈકલ, માહે અને યાનમમાં સેંકડો કરોડના પ્રોજેક્ટ્સ છે જે લોકોને મદદ કરશે. વોટર ડીસેલિનેશન પ્લાન્ટ્સ પીવાનું શુદ્ધ પાણી સુનિશ્ચિત કરશે. નવા સુએજ ટ્રીટમેન્ટ પ્લાન્ટ્સ કચરાના વ્યવસ્થાપનમાં સુધારો કરશે. સરકાર ચોમાસા દરમિયાન પૂર અને જળબંબાકાર ઘટાડવા માટે પણ કામ કરી રહી છે. અમારા તમામ પ્રયાસો પુડુચેરીના લોકો માટે ઇઝ ઓફ લિવિંગ (Ease of Living) પ્રદાન કરવા તરફ છે. અહીં કેટલાક બાળકો સરસ ચિત્રો jબનાવીને લાવ્યા છે. હું SPG ના લોકોને કહીશ કે તેઓ તેને એકત્રિત કરી લે. આભાર મારા મિત્રો, તમારો ખૂબ ખૂબ આભાર. મહેરબાની કરીને બધી ભેટો એકત્રિત કરો.
મિત્રો, કોઈપણ રાષ્ટ્ર ત્યારે જ પ્રગતિ કરી શકે છે જ્યારે તેનું માનવ સંસાધન સ્વસ્થ હોય. એટલા માટે આરોગ્યસંભાળ અમારી સર્વોચ્ચ અગ્રતા છે. અમે માનીએ છીએ કે આરોગ્યસંભાળ દરેક માટે સુલભ, ઉપલબ્ધ અને સસ્તી હોવી જોઈએ. આયુષ્માન ભારત યોજના ભારતભરના કરોડો પરિવારો માટે આ વિઝન પહેલેથી જ પૂર્ણ કરી રહી છે. પુડુચેરીના કોઈ પણ નાગરિકને સારવાર માટે દૂર સુધી મુસાફરી કરવાની ફરજ ન પાડવી જોઈએ. તેના બદલે, અમે ઈચ્છીએ છીએ કે અન્ય પ્રદેશોના લોકો અહીં સાજા થવા આવે. હું દ્રઢપણે માનું છું કે પુડુચેરી મેડિકલ ટુરીઝમ હબ બની શકે છે. પુડુચેરીમાં પહેલેથી જ નવ મેડિકલ કોલેજો છે. JIPMER ખાતે પ્રાદેશિક કેન્સર સેન્ટરનું આધુનિકીકરણ આરોગ્યસંભાળ ક્ષમતામાં વધુ વધારો કરશે. આજે, PM-ABHIM હેઠળ ગંભીર રીતે બીમાર દર્દીઓ માટે ત્રણ ક્રિટિકલ કેર બ્લોક્સનો શિલાન્યાસ કરવામાં આવ્યો છે. પુડુચેરી અને કરાઈકલમાં આ નવા ક્રિટિકલ કેર બ્લોક્સ કટોકટીની ક્ષમતામાં નોંધપાત્ર વધારો કરશે. પુડુચેરી સિદ્ધ દવા અને સર્વગ્રાહી સ્વાસ્થ્ય માટે જાણીતું છે. કરાઈકલમાં નવી ઇન્ટિગ્રેટેડ આયુષ હોસ્પિટલ લોકોની સેવા કરશે.
મિત્રો, કનેક્ટિવિટી એ પ્રગતિની કરોડરજ્જુ છે. અમે ગ્રામીણ અને શહેરી બંને ઇન્ફ્રાસ્ટ્રક્ચર પર ધ્યાન કેન્દ્રિત કરી રહ્યા છીએ. એક તરફ સેંકડો કિલોમીટરના ગ્રામીણ રસ્તાઓ બનાવવામાં આવી રહ્યા છે. તેઓ વિદ્યાર્થીઓ, ખેડૂતો, કામદારો અને નાના વ્યવસાયો માટે કનેક્ટિવિટી સુધારી રહ્યા છે. સાથે સાથે અમે પુડુચેરીમાં ટ્રાફિકની ભીડ ઓછી થાય તે માટે પણ કામ કરી રહ્યા છીએ. અમે પુડુચેરી ટાઉનમાં એક હજાર કરોડ રૂપિયાથી વધુના પ્રોજેક્ટ્સની જાહેરાત કરી છે. આમાં ચારસો ચાલીસ કરોડ રૂપિયાનો ફ્લાયઓવર સામેલ છે.
મિત્રો, ઈસ્ટ કોસ્ટ રોડ અને ગ્રાન્ડ સધર્ન ટ્રંક રોડમાં અપગ્રેડ દ્વારા ચેન્નાઈ સાથેની કનેક્ટિવિટીમાં સુધારો કરવામાં આવી રહ્યો છે. પુડુચેરી અને ચેન્નાઈ વચ્ચે મુસાફરીનો સમય ઘટીને આશરે 1.5-2 કલાક થઈ જશે. પુડુચેરીથી કુડ્ડલોર નેશનલ હાઈવે પહેલેથી જ પૂર્ણ થઈ ગયો છે અને કરાઈકલ નેશનલ હાઈવેને અપગ્રેડ કરવામાં આવી રહ્યો છે. અમે કન્યાકુમારી સુધીના ઈસ્ટ કોસ્ટ કોરિડોરમાં રોડ પ્રોજેક્ટ્સમાં ત્રીસ હજાર કરોડ રૂપિયાથી વધુનું રોકાણ કરી રહ્યા છીએ. આ પ્રોજેક્ટ્સ પુડુચેરીના ભાગોને ચેન્નાઈ, બેંગલુરુ અને કોઈમ્બતુર જેવા મુખ્ય આર્થિક કેન્દ્રો સાથે જોડે છે. આવી કનેક્ટિવિટી પ્રવાસન, વેપાર અને ઉદ્યોગને નોંધપાત્ર પ્રોત્સાહન આપશે.
મિત્રો, પ્રવાસન એ પુડુચેરીની સૌથી મોટી શક્તિઓમાંની એક છે. વીકએન્ડ ડેસ્ટિનેશન તરીકે તે પહેલેથી જ હજારો લોકોને આકર્ષે છે. ટ્રેનો અને ફ્લાઈટ્સ હંમેશા ભરેલી હોય છે. પુડુચેરીના લોકોની ઉષ્માને કારણે જ આવું થઈ રહ્યું છે. આધ્યાત્મિક પ્રવાસન, ઇકો-ટૂરિઝમ અને હેલ્થ ટૂરિઝમમાં રોકાણ સાથે અમે આને નવી ઊંચાઈઓ પર લઈ જઈ રહ્યા છીએ. પ્રસાદ (PRASHAD) યોજના હેઠળ વિવિધ મંદિરોમાં તીર્થયાત્રાની સુવિધાઓનો વિકાસ કરવામાં આવી રહ્યો છે. શ્રી અરવિંદ અને ધ મધરે ઓરોવિલેને 'યુનિવર્સલ સિટી ઓફ કોન્શિયસનેસ' તરીકે જોયું હતું. મને જાણીને આનંદ થયો કે આજે ઓરોવિલેમાં ગ્લોબલ સ્પિરિચ્યુઅલ મહોત્સવ શરૂ થઈ રહ્યો છે. આવા મેળાવડા વિવિધ પ્રદેશો અને ધર્મોના લોકોને એક કરે છે.
મિત્રો, ડબલ એન્જિન સરકાર દ્વારા કરવામાં આવી રહેલા સારા કામની ઉજવણી કરવી મહત્વપૂર્ણ છે. પરંતુ અગાઉ વસ્તુઓ કેવી હતી તે યાદ રાખવું પણ મહત્વપૂર્ણ છે. કોંગ્રેસ-ડીએમકે શાસન દરમિયાન પુડુચેરીના લોકોએ ઘણું સહન કર્યું છે. તે વર્ષો રાજકીય અસ્થિરતા, ભ્રષ્ટાચાર, ગુનાખોરી અને ગરીબોની પીડા દ્વારા ચિહ્નિત થયેલ હતા. રેશનની દુકાનોમાં ચોખા નહોતા. પગારમાં વિલંબ થતો હતો. ગુંડાઓ અને ડ્રગ માફિયાઓ રસ્તાઓ પર રાજ કરતા હતા.
મિત્રો, કોંગ્રેસે પુડુચેરીને દિલ્હીમાં બેઠેલા એક પરિવાર માટે ATM બનાવી દીધું હતું. જ્યારે ડીએમકેની વાત આવે છે, ત્યારે તમે તમિલનાડુમાં પણ થઈ રહેલા કૌભાંડોની લાંબી યાદી જોઈ રહ્યા છો. કોંગ્રેસ અને ડીએમકે પુડુચેરીની વિકાસ યાત્રામાં સ્પીડ બ્રેકર બની ગયા હતા. હવે એ જ શક્તિઓ ફરી સત્તા માટે ભૂખી છે. શું પુડુચેરીએ ફરી ભ્રષ્ટાચાર અને ગુનાખોરીના એ યુગમાં પાછા જવું જોઈએ? મને ખાતરી છે કે પુડુચેરીના લોકો તે ઈચ્છતા નથી.
મિત્રો, પુડુચેરી આપણા સ્વાતંત્ર્ય સંગ્રામનો એક મહત્વપૂર્ણ ભાગ રહ્યો છે. અહીં ઘણા નેતાઓ જન્મ્યા હતા. તેમાંથી કેટલાક અહીં આવ્યા અને અહીંથી કામ કર્યું. 1947 માં ભારતને આઝાદી અપાવવામાં આ ભૂમિ નિર્ણાયક રહી છે. હવે, 2047 સુધીમાં આપણે વિકસિત પુડુચેરી અને વિકસિત ભારત બનાવવું જ પડશે. પુડુચેરીની ડબલ એન્જિન સરકાર આ મિશનમાં તમારી સાથે છે. અમે BEST પુડુચેરી માટે કામ કરવાનું ચાલુ રાખીશું.
નણ્ડ્રી!
