ভাৰতে টিকাকৰণ আৰম্ভ হোৱাৰ পৰা মাত্ৰ ৯ মাহত অৰ্থাৎ যোৱা ২১ অক্টোবৰত ১০০ কোটি খোৰাকৰ টিকাকৰণ সম্পূৰ্ণ কৰিলে। ২০২০ চনৰ আৰম্ভণিতে ঘটনাবোৰ যিদৰে সংঘটিত হৈছিল সেয়া যদি আমি সোঁৱৰণ কৰো তেতিয়া দেখিম যে ক’ভিড-১৯-ৰ সৈতে মোকাবিলা কৰাৰ ক্ষেত্ৰত ই যেন এক অদ্ভুত যাত্ৰা আছিল ৷ ১০০ বছৰৰ পিছত মানৱতাই এনে এক মহামাৰীৰ সৈতে মোকাবিলা কৰি আছিল যত সকলোৱে এই ভাইৰাছটোৰ বিষয়ে অজ্ঞাত আছিল। আমাৰ মনত আছে যে পৰিস্থিতি কিমান অপ্ৰত্যাশিত হৈ পৰিছিল, কিয়নো আমি এক অজ্ঞাত আৰু অদৃশ্য শত্ৰুৰ সন্মুখীন হৈছিলো।
উদ্বেগৰ পৰা আশ্বাসলৈ যাত্ৰা আৰম্ভ হৈছে আৰু বিশ্বৰ সৰ্ববৃহৎ টিকাকৰণ অভিযানে আমাৰ দেশক অধিক শক্তিশালী কৰি তুলিছে।
এয়া প্ৰকৃততেই এক অনন্য প্ৰচেষ্টা যত সমাজৰ বিভিন্ন শ্ৰেণীক সামৰি লোৱা হৈছে। পৰিমাপৰ অনুমান কৰিবলৈ, ধৰি লওক যে প্ৰতিটো টিকাকৰণত এজন স্বাস্থ্য কৰ্মীৰ বাবে মাত্ৰ ২ মিনিট সময়ৰ প্ৰয়োজন হয় । এই হাৰত এই মাইলৰ খুঁটিত উপনীত হ'বলৈ প্ৰায় ৪১ লাখ মানৱ দিন বা প্ৰায় ১১,০০০ মানৱ বছৰৰ প্ৰয়োজন হয়।
গতি আৰু পৰিমাপ বৰ্তাই ৰখাৰ যিকোনো প্ৰচেষ্টাৰ বাবে সকলো অংশীদাৰীৰ আত্মবিশ্বাস অতিশয় গুৰুত্বপূৰ্ণ। অভিযানটোৰ সফলতাৰ এটা কাৰণ আছিল যে এই প্ৰতিষেধকৰ প্ৰতি মানুহৰ বিশ্বাস আছিল আৰু অবিশ্বাস আৰু আতংক সৃষ্টি কৰাৰ বিভিন্ন অপপ্ৰচেষ্টা স্বত্বেও প্ৰক্ৰিয়াটো ক্ৰমবৰ্ধমান হৈছিল ৷
আমাৰ মাজত এনে কিছুমান লোক আছে যিয়ে কেৱল দৈনন্দিন প্ৰয়োজনীয়তাৰ বাবেও বিদেশী ব্ৰেণ্ডৰ ওপৰত নিৰ্ভৰ কৰে। কিন্তু কভিড-১৯ৰ প্ৰতিষেধকৰ দৰে গুৰুত্বপূৰ্ণ বিষয়ত ভাৰতৰ জনসাধাৰণে 'মেড ইন ইণ্ডিয়া' প্ৰতিষেধকৰ ওপৰত বিশ্বাস কৰিছিল। এইটো এটা গুৰুত্বপূৰ্ণ দৃষ্টান্তমূলক পৰিৱৰ্তন।
ভাৰতৰ প্ৰতিষেধক অভিযান হৈছে নাগৰিক আৰু চৰকাৰে জনসাধাৰণৰ অংশগ্ৰহণৰ ভাৱনাৰে এক উমৈহতীয়া লক্ষ্যৰ দ্বাৰা ভাৰতে কি অৰ্জন কৰিব পাৰে তাৰে এক উদাহৰণ ৷ যেতিয়া ভাৰতে টিকাকৰণ কাৰ্যসূচী আৰম্ভ কৰিছিল, তেতিয়া বহুতে ১৩০ কোটি ভাৰতীয়ৰ সামৰ্থ্যৰ ওপৰত সন্দেহ কৰিছিল। কিছুমানে কৈছিল যে ভাৰতক ইয়াৰ বাবে ৩-৪ বছৰ সময়ৰ প্ৰয়োজন হব। আন কিছুমানে কৈছিল যে মানুহে টিকাকৰণৰ বাবে আগবাঢ়ি নাহে। কিছুমান মানুহে কৈছিল যে টিকাকৰণ প্ৰক্ৰিয়াত ব্যাপক অব্যৱস্থা আৰু বিশৃংখলতা থাকিব। কিছুমানে আনকি ইয়াকো কৈছিল যে ভাৰতে যোগান শৃংখলাটো পৰিচালনা কৰিবলৈ সক্ষম নহ'ব। কিন্তু জনতা কাৰ্ফিউ আৰু ক্ৰমানুসাৰ লকডাউনৰ সৈতে সহযোগিতা কৰি ভাৰতৰ জনসাধাৰণে দেখুৱাই দিছিল যে যদি তেওঁলোকক বিশ্বাসযোগ্য অংশীদাৰ হিচাপে বিবেচনা কৰা হয় তেন্তে ফলাফল কিমান চমৎকাৰ হ'ব পাৰে।
যেতিয়া সকলোৱে একেলগে আগবাঢ়ে তেতিয়া অসম্ভৱ একো নহয়। আমাৰ স্বাস্থ্য কৰ্মীসকলে জনসাধাৰণক প্ৰতিষেধক প্ৰদান কৰিবলৈ পাহাৰ অতিক্ৰম কৰিছে আৰু বিশাল নদীও পাৰ হৈছে। আমাৰ যুৱসমাজ, সমাজকৰ্মী, স্বাস্থ্য কৰ্মী, সামাজিক তথা ধৰ্মীয় নেতা সকলোৱে এই কথাৰ বাবে কৃতিত্বৰ যোগ্য যে ভাৰতে উন্নত দেশবোৰৰ তুলনাত খুব কমেইহে প্ৰতিষেধক দ্বিধাৰ সন্মুখীন হৈছে।
টিকাকৰণত বিভিন্ন গোটক বিশেষ অগ্ৰাধিকাৰ দিয়াৰ বাবে যথেষ্ট চাপ আহিছিল যদিও চৰকাৰে এয়া নিশ্চিত কৰিছিল যে আমাৰ অন্যান্য আঁচনিৰ দৰে, টিকাকৰণ অভিযানতো কোনো ভিআইপি সংস্কৃতি নাই।
২০২০ চনৰ আৰম্ভণিতে যেতিয়া সমগ্ৰ বিশ্বত কভিড-১৯ৰ প্ৰাদুৰ্ভাৱ আছিল, আমাৰ বাবে এইটো স্পষ্ট হৈ আছিল যে এই মহামাৰীটোৰ বিৰুদ্ধে প্ৰতিষেধকৰ সহায়েৰেহে যুঁজিব লাগিব। আমি সোনকালে প্ৰস্তুতি আৰম্ভ কৰিলো। আমি বিশেষজ্ঞ গোট গঠন কৰিছিলো আৰু এপ্ৰিল ২০২০ ৰ পৰা এটা ৰোডমেপ প্ৰস্তুত কৰিবলৈ আৰম্ভ কৰিছিলো।
যিখন দেশত চৰকাৰক উন্নয়নৰ বাধা হিচাপে জনা গৈছিল সেইখন দেশত আমাৰ চৰকাৰ প্ৰগতিৰ সাধক হৈ আহিছে। চৰকাৰে প্ৰথম দিনৰ পৰাই প্ৰতিষেধক নিৰ্মাতাসকলৰ সৈতে অংশীদাৰীত্ব স্থাপন কৰিছিল আৰু তেওঁলোকক প্ৰতিষ্ঠানগত সমৰ্থন, বৈজ্ঞানিক গৱেষণা, পুঁজি, লগতে ত্বৰান্বিত নিয়ামক প্ৰক্ৰিয়া হিচাপে সমৰ্থন প্ৰদান কৰিছিল। চৰকাৰৰ সকলো মন্ত্ৰালয় প্ৰতিষেধক নিৰ্মাতাসকলৰ সুবিধাৰ বাবে ঐক্যৱদ্ধ হৈছিল আৰু আমাৰ 'সমগ্ৰ চৰকাৰ' দৃষ্টিভংগীৰ ফলস্বৰূপে যিকোনো বাধা আঁতৰ হৈছিল।
ভাৰতৰ দৰে এখন দেশত পৰিমাপক হিচাপত কেৱল উৎপাদন কৰাই যথেষ্ট নহয়। শেষৰজন লোকলৈ ইয়াৰ বিতৰণ আৰু সুদৃঢ় লজিষ্টিকৰ ওপৰতো গুৰুত্ব দিয়া উচিত। বিদ্যমান প্ৰত্যাহ্বানবোৰ বুজিবলৈ, প্ৰতিষেধকৰ এটা বটলৰ যাত্ৰাটো কল্পনা কৰক। বটলটো পুণে বা হায়দৰাবাদৰ প্ৰকল্পৰ পৰা যিকোনো ৰাজ্যৰ কেন্দ্ৰলৈ প্ৰেৰণ কৰা হয় য'ৰ পৰা ইয়াক জিলা কেন্দ্ৰলৈ পৰিবহণ কৰা হয়। তাৰ পৰা ই টিকাকৰণ কেন্দ্ৰত উপস্থিত হয়। এই যাত্ৰাত বিমান আৰু ৰেলৰ হাজাৰ হাজাৰ ভ্ৰমণ অন্তৰ্ভুক্ত আছে। এই সমগ্ৰ যাত্ৰাৰ সময়ত, তাপমাত্ৰা এক নিৰ্দিষ্ট পৰিসৰত বজাই ৰাখিব লাগিব যাক কেন্দ্ৰীয়ভাৱে নিৰীক্ষণ কৰা হয়। এই উদ্দেশ্যৰ বাবে ১ লাখতকৈও অধিক শীতল শৃংখলা সঁজুলি ব্যৱহাৰ কৰা হৈছিল। ৰাজ্যসমূহক প্ৰতিষেধকৰ বিতৰণ কাৰ্যসূচীৰ আগতীয়াকৈ জাননী দিয়া হৈছিল যাতে তেওঁলোকে তেওঁলোকৰ অভিযানটোৰ এক সুন্দৰ পৰিকল্পনা কৰিব পাৰে আৰু প্ৰতিষেধকবোৰ যাতে পূৰ্ব নিৰ্ধাৰিত দিনৰ ভিতৰত তেওঁলোকৰ ওচৰলৈ উপস্থিত হয়। স্বাধীন ভাৰতৰ ইতিহাসত এইটো এক অভূতপূৰ্ব প্ৰচেষ্টা।
এই সমগ্ৰ প্ৰয়াসত কো-উইনৰ এক শক্তিশালী কাৰিকৰী মঞ্চই সহায় কৰিছিল। ই নিশ্চিত কৰিছিল যে প্ৰতিষেধকৰ অভিযানটো ন্যায়সংগত, পৰিমাপযোগ্য, অনুসৰণযোগ্য আৰু স্বচ্ছ হোৱাটো। এইটোৱে নিশ্চিত কৰিছিল যে ইয়াত পক্ষপাতিত্ব বা শাৰীৰ মাজৰ পৰা থপিয়াই অনাৰ কোনো অৱকাশ নাছিল। ই লগতে নিশ্চিত কৰিছিল যে এজন দৰিদ্ৰ শ্ৰমিকে প্ৰয়োজনীয় সময়ৰ ব্যৱধানৰ অন্তত তেওঁৰ গাঁৱত প্ৰথম পালি আৰু তেওঁ কাম কৰা চহৰত একেটা প্ৰতিষেধকৰ দ্বিতীয় পালি যাতে গ্ৰহণ কৰিব পাৰে। স্বচ্ছতা বৃদ্ধি কৰাৰ বাবে বাস্তৱিক-সময়ৰ ডেশ্বব'ৰ্ডৰ উপৰিও, কিউআৰ-কোডযুক্ত প্ৰমাণপত্ৰই প্ৰমাণীকৰণ নিশ্চিত কৰিছে। কেৱল ভাৰততে নহয় বিশ্বতো এনে ধৰণৰ প্ৰচেষ্টাৰ আন কোনো উদাহৰণ নাই।
২০১৫ চনত স্বাধীনতা দিৱসৰ সময়ত মোৰ ভাষণত মই কৈছিলো যে 'টীম ইণ্ডিয়া'ৰ বাবে আমাৰ দেশ আগবাঢ়িব ধৰিছে আৰু এই 'টীম ইণ্ডিয়া' আমাৰ ১৩০ কোটি জনতাৰ এক বৃহৎ দল। জনসাধাৰণৰ অংশগ্ৰহণ হৈছে গণতন্ত্ৰৰ আটাইতকৈ ডাঙৰ শক্তি। যদি আমি ১৩০ কোটি ভাৰতীয়ৰ অংশগ্ৰহণেৰে দেশখন পৰিচালনা কৰো তেন্তে আমাৰ দেশে প্ৰতি মুহূৰ্ততে ১৩০ কোটি খোজ আগুৱাব পাৰিব। আমাৰ টিকাকৰণ অভিযানে আকৌ এবাৰ এই 'টীম ইণ্ডিয়া'ৰ শক্তি প্ৰদৰ্শন কৰিছে। টিকাকৰণ অভিযানত ভাৰতৰ সফলতাই সমগ্ৰ বিশ্বক দেখুৱাইছে যে 'গণতন্ত্ৰই ৰক্ষা কৰিব পাৰে'।
মই আশা কৰোঁ যে বিশ্বৰ সৰ্ববৃহৎ টিকাকৰণ অভিযানত অৰ্জন কৰা সফলতাই আমাৰ যুৱসমাজ, আমাৰ উদ্ভাৱক আৰু সকলো পৰ্যায়ৰ চৰকাৰক লোকসেৱা প্ৰদানৰ নতুন মানদণ্ড নিৰ্ধাৰণ কৰিবলৈ অনুপ্ৰাণিত কৰিব যি কেৱল আমাৰ দেশৰ বাবেই নহয়, বিশ্বৰ বাবেও এক আৰ্হি হ'ব।
