وزیر اعظم جناب نریندر مودی نے آج 77ویں یوم آزادی کے موقع پر لال قلعہ کی فصیل سے خطاب کرتے ہوئے کہا کہ ہندوستان کی برآمدات تیزی سے بڑھ رہی ہیں اور دنیا کہہ رہی ہے کہ ہندوستان اب نہیں رکے گا۔ انہوں نے کہا کہ عالمی ریٹنگ ایجنسیاں ہندوستان کی تعریف کر رہی ہیں اور کورونا کے بعد کے نئے ورلڈ آرڈر میں ہندوستانیوں کی قابلیت کو تسلیم کیا جا رہا ہے۔ انہوں نے کہا کہ ایک ایسے وقت میں جب عالمی سپلائی چین میں خلل پڑا تھا، ہم نے دنیا کو دکھایا کہ انسانی ضروریات پر توجہ دے کر ہی حل تلاش کیے جا سکتے ہیں۔ وزیر اعظم نے کہا کہ آج ہندوستان گلوبل ساؤتھ کی آواز بن گیا ہے اور ہندوستانی معیشت اب عالمی سپلائی چین کا حصہ ہے، جو اسے استحکام فراہم کرتی ہے۔
اسٹارٹ اپس پر بات کرتے ہوئے وزیر اعظم نے کہا کہ ہندوستان کے نوجوانوں نے ملک کو دنیا کے ٹاپ تھری اسٹارٹ اپ ماحولیاتی نظام میں جگہ دلا دی ہے۔ انہوں نے مزید کہا کہ دنیا کے نوجوان اس ترقی پر حیران ہیں، ہندوستان کے نوجوانوں کی صلاحیت کو دیکھ کر حیران ہیں۔ آج کی دنیا ٹکنالوجی سے چلنے والی ہے اور ہندوستان کے پاس ٹکنالوجی میں جو ٹیلنٹ ہے اس کو دیکھتے ہوئے دنیا میں ہمارا ایک اہم رول ہوگا۔ وزیر اعظم نے یہ بھی کہا کہ سب سے ترقی یافتہ ممالک کے عالمی رہنماؤں نے ڈیجیٹل انڈیا کی کامیابی کو تسلیم کیا ہے اور وہ ان اقدامات کے بارے میں مزید جاننا چاہتے ہیں۔
