نئی دہلی،08 ؍ مارچ،وزیراعظم جناب نریندر مودی کل یعنی 9 مارچ 2019 کو اترپردیش کے گریٹر نوئیڈا کا دورہ کریں گے۔ وہ گریٹر نوئیڈا میں پنڈت دین دیال اپادھیائے انسٹی ٹیوٹ آف آرکیالوجی میں متعدد ترقیاتی پروجیکٹوں کا آ غاز کریں گے۔
وزیراعظم پنڈت دین دیال اپادھیائے انسٹی ٹیوٹ آف آرکیالوجی کے افتتاح کے موقع پر تختی کی نقاب کشائی کریں گے۔ وہ احاطے میں پنڈت دین دیال اپادھیائے کے مجسمے کی نقاب کشائی کریں گے۔ پنڈت دین دیال اپادھیائے انسٹی ٹیوٹ آف آرکیالوجی، آرکیالوجیکل سروے آف انڈیا (اے ایس آئی) کے تحت آتا ہے اور یہ گریٹر نوئیڈا کے نالج پارک -2 میں واقع ہے۔
وزیراعظم میٹرو کے نوئیڈا سٹی سینٹر – نوئیڈا الیکٹرانک سٹی سیکشن کا افتتاح کریں گے۔ اس نئے سیکشن سے نوئیڈا کے باشندوں کو آسان اور تیز رفتار ٹرانسپورٹ سہولت فراہم ہوگی۔ یہ سڑکوں پر بھیڑ بھاڑ کو بھی کم کرے گا اور ماحولیات دوست ذریعہ حمل ونقل فراہم کرے گا۔ 6.6 کلو میٹر طویل میٹرو کا یہ سیکشن دہلی میٹرو کی بلیو لائن کا توسیعی مرحلہ ہے۔
وزیراعظم دو تھرمل پاور پلانٹوں کا سنگ بنیاد بھی رکھیں گے۔ ان میں سے ایک تھرمل پاور پلانٹ ، اترپردیش کے ضلع بلند شہر کے خورجہ میں 1320 ایم ڈبلیو سپر تھرمل پاور پروجیکٹ ہے۔ خورجہ سپرتھرمل پاور پروجیکٹ سپر کریٹکل ٹیکنالوجی پر مبنی ہوگا جس کی دو اکائیاں ہوں گی اور ان میں سے ہر ایک اکائی کی صلاحیت 660 میگاواٹ ہوگی۔ ماحولیات کے تحفظ کے لئے تازہ ترین اخراج پر قابو پانے والی ٹیکنالوجی سے لیس ہوگا اور بجلی پیدا کرنے کے لئے کم ایندھن کا استعمال ہوگا۔ خورجہ پاور پلانٹ شمالی خطے بالخصوص اترپردیش میں بجلی کی کمی کی صورت حال کو بدل دے گا اور اتراکھنڈ ، راجستھان ، ہماچل پردیش اور دہلی جیسی ریاستیں اس سے مستفید ہوں گی ۔ توقع ہے کہ اس پروجیکٹ سے بڑے پیمانے پر براہ راست اور بالواسطہ طور پر ملازمت کے مواقع پید ا ہوں گے اور اس سے ضلع بلند شہر اور مغربی اترپردیش کے قریبی اضلاع کی ہمہ جہت ترقی ہوگی۔
دوسرا تھرمل پاور پلانٹ بہار کے بکسر میں 1320 میگاواٹ تھرمل پاور پلانٹ ہے۔ بکسر تھرمل پاور پلانٹ کا آغاز ویڈیو لنک کے ذریعے کیا جائے گا۔ بکسر تھرمل پاور پلانٹ سپر کریٹکل ٹیکنالوجی پر مبنی ہوگا جس کی دو اکائیاں ہوں گی اور ان میں سے ہر ایک اکائی کی صلاحیت 660 میگاواٹ ہوگی۔ ماحولیات کے تحفظ کے لئے تازہ ترین اخراج پر قابو پانے والی ٹیکنالوجی سے لیس ہوگا ۔ بکسر پاور پلانٹ سے بہار اور مشرقی خطے میں بجلی کی کمی کی صورت حال میں تبدیلی آئے گی۔
وزیراعظم بعد میں ایک اجتماع سے خطاب کریں گے۔
