ইকায়খুম্নরবা অতিথিশিং, শক্নাইরবা দেলিগেদশিং, ওজাশিং, মেন্তরশিং অমসুং ঐগী নুংশিরবা হৈথোই-শিংথোইরবা নহারোল মরুপশিং, খুরুমজরি!
লৈবাক ৬৪ দগী শরুক য়ারিবা অরংবা থৱান্মিচাক ৩০০ হেনবগা উনবদা হরাওই। এষ্ট্রোনোমি অমসুং এষ্ট্রোফিজিক্সকী ১৮শুবা ইন্তরনেসনেল ওলেম্পিয়াদতা ঐনা অদোম ভারত্ত তরাম্না ওকচরি। ভারত্ত, চৎনবীগা অনৌবগা পুল্লি, অধ্যতিক্কা সাইন্সকা উনরি অমসুং খৌরাংবগা অনৌবা থবকশিংগা থেংনরি; চহি চা কয়া, ভারতমচাশিংনা অতিয়া য়েংদুনা লাক্লি অমসুং মরুওইবা ৱাহং কয়া হংলি। খুদম ওইনা, অর্য়াভত্তনা ৫শুবা চহিচাদা জিরো পুথোকখি অমসুং অহানবা ওইনা পৃথিবীনা মশাগী পুংজৈদা উংই হায়না মহাক্না ফোঙদোকখি। মহাক জিরোদগী হৌরকখি অমসুং পুৱারি শেমখি!
ঙসি, ঐখোয়না মালেমদা খ্বাইদগী ৱাংবা এষ্ট্রোনোমিকেল ওবজার্বেতোরিশিংগী মনুংদা অমা, সমুদ্র ইমায়দগী মিতর ৪,৫০০ গী মথক্ত লাদাখতা লৈরি। মসি মসি থৱান্মিচাকশিংগা খুৎ শোক্নবা য়াগদবা ফিবমদা নকশিন্নরে! পুনেদা জেন্ত মিতরৱেভ রেদিও তেলিস্কোপ লৈরি, মসি মালেমদা খ্বাইদগী মগুন লৈবা রেদিও তেলিস্কোপশিংগী মনুংদা অমনি, মসিনা পুলসারশিং, ক্বাসারশিং অমসুং গেলেক্সিশিংগী অঙকপশিং খঙদোকপদা মতেং পাংলি।
ইসক্বার কিলোমিতর এরে অমসুং লিগো-ইন্দিয়াগুম্বা মালেমগী অচৌবা সাইন্স প্রোজেকশিংদা ভারতনা চাউথোক্না মতেং পাংলি। মাইপাক্না থাগী খা মেরু ময়াদা তাবা অহানবা মিসন ওইনা চহি অনিগী মমাংদা চন্দ্রয়ান-৩ না পুৱারি শেমখ্রে। অদিত্য-এল ১ সোলার ওজার্বেতোরিনা ভারতনা নুমিৎকী মরমদা থিজিনবা হৌরে অমসুং মসিনা সোলার ফ্লেয়ারশিং, ষ্ট্রোমশিং অমসুং নুমিৎকী হোংদোক-হোংজিন তৌরিবশিং য়েংশিল্লি। হৌখিবা থাদা, গ্রুপ কেপ্তেন সুভান্সু সুক্লানা মহাক্না পুৱারি ওইরবা ইন্তরসনেল স্পেস ষ্টেসনগী মিসন লোইশিনখ্রে, মসি ভারতমচা খুদিংমক্কী চাউথোকচবা অমনি অমসুং অনৌবা মফমশিং থিজিনবা পাম্বা অদোমগুম্বা নহারোলশিংগী ইথিল অমনি।
মরুপশিং,
সাইন্তিফিক ওইবা থবকশিংগী ইখৌ লাংবা য়োকখৎনবা অমসুং নহারোলশিংগী ৱাখল ফগৎনবা ভারতনা অকনবা থবকশিং পায়খৎলে। অতল তিনকরিং লেবশিংদা চাংয়েংশিং পাংথোক্তুনা মফম অদুদা তম্বা অমসুং অনৌবা থবক পায়খৎনবগী চৎনবী অমা শেমগৎতুনা মহৈরোয় মিল্লিয়ন ১০ হেন্না এস.তি.ই.এমগী ৱাখল্লোনশিং খঙলে। মীওই খুদিংমক লৌশিং তানবা ঙম্নবা, ‘ৱান নেসন ৱান সবস্ক্রিপসন’ স্কিম হৌদোক্লে। মসিনা মহৈরোয় অমসুং থিজিল্লোয় মিল্লিয়ন কয়াদা লেম্না মালেমগী মমিং লৈরবা চেফোঙশিং ফংহনগনি। এস.তি.ই.এমগী হিরমশিংদা নুপীশিং শরুক য়াবদা ভারত মাঙজিল থাবা লৈবাক অমনি হায়বা খঙবদা অদোম হরাওগনি। তোঙান তোঙানবা থবকশিংগী মখাদা, থিজিনবগী থবকশিংগীদমক দোল্লর বিল্লিয়ন কয়া থাদরে। মালেম শীনবা থুংবগী নহারোলশিং ভারত্ত লাইরিক তম্নবা, থিজিন্নবা অমসুং পুন্না থবক তৌমিন্ননবা ঐখোয়না হায়জরি। মথংগী অচৌবা সাইন্সকী অনৌবা পুথোকপা অমা অসিগুম্বা পুন্না থবক তৌমিন্নবা অসিগী থোক্লকপা য়াবা অদু কনানা খঙগনি!
মরুপশিং,
অদোমগী থবকশিংদা, কমদৌনা ঐখোয়না মীওইবা খুন্নাইগী কান্নবা থবক পাংথোক্কনি হায়না অদোম্না ৱাখল খন্নবা ঐনা পুক্নিং থৌগৎলি। ঐখোয়না তাইবংপাল অসি হেন্না নিংথিনা খঙনবা থিজিনবগা লোয়ননা, কমদৌনা স্পেস সাইন্সনা পৃথিবী অসিগী মীয়ামগী পুন্সি মখা তানা ফগৎহনগনি হায়বগী মতাংদা ঐখোয়না ৱাহং হংগদবনি। কমদৌনা লৌমীশিংদা হেন্না চুম্বা নোং-চিংগী পাউশিং মাংজৌননা পীগনি? ঐখোয়না মহৌশাগী ওইবা অমাং-অতাশিং মাংজৌননা লাউথোকপা ঙমগদরা? ঐখোয়না লান্মৈ চাকপা অমসুং গ্লেসিয়ারশিং শৌদোরকপা য়েংশিনবা য়াগদরা? ঐখোয়না অথাপ্পা মফমশিংগা হেন্না ফজনা পাউ-ফাওনবা ঙমগদরা? সাইন্সকী তুংগী ফিবম নহারোলশিংগী খুৎতা লৈরে অমসুং ৱাখলনা শাগৎতুনা অমসুং মীওইবগী অৱাবা খঙদুনা মালেমগী অসিগী অশেংবা অৱাবশিং কোহনগদবনি। “মফম অসিগী ৱাংমদা করি লৈরিবগে?” হায়না হংগদবনি। মসিনা পৃথিবী অসিদা লৈরিবা মীয়ামগী পুন্সি হেন্না ফগৎহনবদা কমদৌনা মতেং পাংগনি হায়বগী মমি তারে।
মরুপশিং,
মালেমগী লৈবাকশিং পুন্না থবক তৌমিন্নবগী শক্তিদা ভারতনা থাজৈ। মদুগী ৱাখল্লোন অদু ওলেম্পিয়াদ অসিদা মমি তারে। হন্দক্কী ওলেম্পিয়াদ অসিগী ইদিসন অসি হৌজিক ফাওবদা খ্বাইদগী চাউবনি হায়বা ঐ খঙলে। থবক অসি পাংথোকপগীদমক প্রধান মন্ত্রীনা হোমি ভাভা সেন্তর ফোর সাইন্স ইজুকেসন অমসুং তাতা ইন্সতিতুৎ ওফ ফন্দামেন্তেল রিছার্স ঐনা থাগৎপা ফোঙদোক্লি। অচৌবা মঙলান মঙনবা অমসুং পান্দমশিং ৱাংনা থম্নবা প্রধান মন্ত্রীনা থৌরম শরুক য়াখিবশিংগী পুক্নিং থৌগৎখি। লোইশিল্লকপদা প্রধান মন্ত্রীনা হায়খি, নিংশিংউ, ভারত্ত, অতিয়ানা পনখৈ নত্তে, মসি অহৌবনি!
অদোম থাগৎপা ফোঙদোকচরি।
