খুরুমজরি!
ভারতমচা করোর ১৪০গী মহুৎশীন্দুনা, জি-২০ পর্লিয়ামেন্তরি স্পিকরস সম্মিৎতা শরুক য়ারিবা শক্নাইরবশিং ঐনা তরাম্না ওকচরি। মীফম অসি, মালেম শীনবা থুংবগী সংসদকী থবকশিংগী ‘মহা কুম্ভ’ অমনি। দেলিগেদ খুদিংমক তোঙান-তোঙানবা সংসদকী থবক-থৌরমশিং খঙলবা ঙাক্তনি। গনতন্ত্রগী থবক কয়া মরাং কাইনা পাংথোক্লিবা ভারত্তা অদোম লাকপা অসি ঐখোয় খুদিংমক য়াম্না হরাওই।
মরুপশিং,
হৌজিক ভারত্তা কুহ্মৈগী মতম য়ৌরক্লে। নুমিৎ কয়ানি ভারত শীনবা থুংনা কুহ্মৈ কয়া পাংথোক্কনি। ভারতনা প্রসিদেন্ত ওইবা অসিদা জি-২০গা মরী লৈনবা থৌরমশিং সহর কয়াদা পাংথোক্তুনা জি-২০গী থৌরমশিংনা চহি চুপ্পা কুহ্মৈগী ফিবমদা লৈহল্লে। হায়রিবা কুহ্মৈশিং অসি থাদা চন্দ্রয়ান তাখিবা, মাইপাক্না জি-২০ মীফম অমসুং পি-২০ মীফম পাংথোকপা অসিনা হেন্না মপুংফাহল্লে। লৈবাক অমগী খ্বাইদগী চাউবা মপাঙ্গলদি লৈবাক অদুগী মীয়াম অমসুং মখোয়গী খাংবা কনবগী থৌনা অদুনি অমসুং মদু হরাওবা ফোঙদোক্নবগী পাম্বৈ অমা মীফম অসিনা ওইরে।
মরুপশিং,
গনতন্ত্রগী মমা ওইনা খঙনবা খক নত্তনা মালেমদা খ্বাইদগী চাউবা গনতন্ত্র চৎপা লৈবাক অমদা পি-২০ মীফম পাংথোক্লি। মালেমগী তোঙান-তোঙানবা সংসদশিংগী মীহুৎশিং ওইনা, অদোম্না সংসদশিং, মরৈ য়েৎনবা অমসুং খন্ন-নৈনবগী মরুওইবা খঙলে। ঐখোয়গী চহি লিশিং কয়াগী মরৈ য়েৎনবা অমসুং খন্ন-নৈনবগী চপ চারবা খুদমশিং লৈরি। মরৈ য়েৎনবা অমসুং খন্ন-নৈনবগী মরুওইবশিং অদু খুদম ওইনা পুৱারিদা ফংলি। চহি লিশিং ৫ হেল্লবা অরিবা বেদাশিং অমসুং ভারতকী অরিবা লাইরিকশিংদা খুন্নাইগী য়াইফনবা অপুনবগী ৱারেপশিং লৌনবা এশেমব্লিশিং অমসুং কম্মিতিশিংগী ৱাফম পল্লম্বা থেংনৈ। ভারতকী খ্বাইদগী অরিবা লাইরিক রিগবেদাদা হায়খি “সংগশ্চ-ধ্বম সম্বাদ-ধ্বম সাম, ভো মানানসি জানাম”- মসিনা হায়রি ‘ঐখোয় পুন্না চৎমিন্নগদবনি, পুন্না ৱা ঙাংমিন্নগদবনি অমসুং ঐখোয়গী ৱাখল চুংশিন্নগদবনি’। মেগাস্থিনিস
খুঙ্গংগী থাক্তা গ্রাম সভাশিংদা ৱাথোকশিং মরৈ য়েৎনদুনা ৱারোইশিন পুরকপগী ঐখোয়গী চৎনবী লৈরি। মসি উবদা গ্রিক এম্বেসেদর মেগাস্থিনিস অঙকপা পোকখি অমসুং মসিগী মরমদা য়াম্না কুপ্না ইখি। খুঙ্গংগী আইনশিং নিয়মশিং অমসুং চৎন-কাংলোনশিং তমিল নাদুগী ১৯শুবা চহিচাগী অরিবা লাইরিকশিংদা ইরম্বা থেংনৈ। চহি ১২০০ শুরবা অরিবা লাইরিক্তা মেম্বর অমা দিসক্বালিফিকেসন তৌনবগী নিয়মশিংসু ইরমখি। ১২শুবা চহিচাদগী হৌরগা মাগ্না কার্তা লৈত্রিঙৈ চহি কয়াগী মমাঙদা লৈরম্বা অনুভাব মন্তাপ্পা চৎনবীগী মতাংদা প্রধান মন্ত্রীনা হায়খি খন্ন-নৈনবনা কাংলুপ, ফুরুপ অমসুং লাইনিং খুদিংমক্কী মীওইশিং মখোয়গী অনিংবশিং মনিংতম্না ফোঙদোকপা ঙমহল্লি। জগৎগুরু বাসেশ্বরনা হৌদোক্লম্বা অনুভাব মন্তাপ্পানা ঙসি ভারত চাউথোকচবা ফাওহল্লে। চহি ৫০০০ শুরবা অরিবা লাইরিকশিংদগী হৌরগা ঙসি ফাওবগী ভারতকী খোঙচৎ অসি ভারত খক্তগী নত্তনা মালেম শীনবা থুংবগী সংসদকী চৎনবীশিংগী লনগৈ অমনি।
মরুপশিং,
মতমগী মতুংইন্না ভারতকী সংসদকী চৎনবীশিং মপাঙ্গল কনখৎলক্লি। নিংতম্বা ফংবদগী ভারত্তা সাধরন মীখল ১৭ অমসুং রাজ্য বিধান সভাগী মীখল ৩০০ হেন্না পাংথোকখ্রে। খ্বাইদগী চাউবা মীখলগী থবক অসিদা মীয়াম শরুক য়াবা লেপ্তনা হেনগৎলক্লি। ২০১৯গী সাধরন মীখল অসিদা ভোত্তর মিল্লিয়ন ৬০০ হেন্না শরুক য়াদুনা মীওইবগী পুৱারিদা খ্বাইদগী চাউবা মীখল ওইদুনা মহাক্কী দলদা শক্তি শীন্নরকখি। মতম অদুদা, অপুনবা য়ুরোপকী মীশিংদগী হেন্না ভোত্তর মিল্লিয়ন ৯০ রেজিস্তার তৌখি। য়াম্লবা ভোত্তরশিংগী চাদা ৭০ ভোৎ থাদবা থোরকখিবা অদুনা ভারতমচাশিংনা মখোয়গী সংসদকী থবকশিংদা থম্লিবা অচেৎপা থাজবা অদু উৎলে। ২০১৯গী মীখলদা রেকোর্দ ওইনা নুপীশিং শরুক য়াখি। হৌজিবা সাধরন মীখলদা রাজনিতি দল ৬০০ হেন্না শরুক য়াখি অমসুং মীখল পাংথোক্নবা সরকারগী ইমপ্লোয়ি মিল্লিয়ন ১০ থবক তৌখি অমসুং ভোৎ থাদনবা পোল্লিং স্তেসন মিল্লিয়ন ১ থমখি।
মরুপশিং,
মীখলগী থবকশিং মতমগা চুনবা মওংদা পাংথোক্লে। হৌখিবা চহি ২৫দা ই.ভি.এম শীজিন্নবা অসিনা মীখলগী থবকশিংদা অরোন-অথুপ লৈহন্দ্রে অমসুং মশিং থিবা হৌবা পুং খরগী মনুংদা মীখলগী ফলশিং ফংহল্লে। হৌজিক ঐনা অদোমগী মফমদা অতোপ্পা মশিং অমা পীরি। মথং চহিদা ভারত্তা সাধরন মীখল পাংথোক্লগনি হায়বা অদোম খঙলে। মথং চহিগী সাধরন মীখলদা মীওই বিল্লিয়ন অমা শরুক য়াগনি। পি-২০ মীফমদা শরুক য়ারিবশিং মথং চহিগী সাধরন মীখল য়েংনবা অদোমগী মফমদা হায়জরি। অদোম অমুক হন্না তরাম্না ওকপদা ভারত হরাওগনি।
মরুপশিং,
নুমিৎ খরগী মমাঙদা ভারতকী সংসদনা য়াম্না অচৌবা ৱারেপ অমা লৌখ্রে হায়না অদোমগী মফমদা খঙহনবা ঐ পাম্মী। সংসদ অমসুং রাজ্য বিধান সভাশিংদা নুপীশিংগী সিত চাদা ৩৩ খাক্নবা হন্দক ৱারেপ লৌখ্রে। লোকেল গভর্নমেন্তশিংগী মীখলদগী কারকপা মীয়ামগী মীহুৎ মিল্লিয়ন ৩ হেনবগী মনুংদা চাদা ৫০ রোমদি নুপীশিংনি। ঙসিগী ভারতনা হিরম খুদিংমক্তা নুপীশিং শরুক য়াবা পুক্নিং থৌগৎলে। ঐখোয়গী সংসদনা হন্দক লৌখিবা ৱারেপ অদুনা মখা তানা ঐখোয়গী সংসদকী চৎনবী মপাঙ্গল কনখৎহল্লগনি।
মরুপশিং,
ভারতকী সংসদকী চৎনবীশিংদা মীয়াম্না অচেৎপা থাজবা থম্লি অমসুং মসি খেন্নবা কয়া অসিনা ওইহনবনি। লাইনিং খুদিংমক্কী মীওইশিং লৈবাক অসিদা লৈরি। চীঞ্জাক মখল চা কয়া, পুন্সি মহিং কয়া, লোল কয়া লৈরি। মীয়ামদা পাউ পীনবা ভারত্তা লোল ২৮দা তি.ভি চেন্নেল ৯০০ হেন্না লৈরি, লোল ২০০ হেনবদা তোঙান-তোঙানবা পাউ-চে লিশিং ৩৩ রোম ফোঙলি, সোসিএল মেদিয়া শীজিন্নবা বিল্লিয়ন ৩ রোম লৈরি। ২১শুবা চহিচা অসিদা, মসি ভারতকী থৌনানি, খেন্নবশিংগী মরক্তা অপুনবগী শক্তম্নি, মসি ঐখোয়গী খ্বাইদগী চাউবা থৌনানি। মসিনা ঐখোয়দা শিংনবা খুদিংমক থেংননবা ইথিল পীরি অমসুং খুদোংচাদবা খুদিংমক পুন্না থেংননবা থৌনা হাপ্লি।
মরুপশিং,
ঙসি মালেমগী তোঙান-তোঙানবা মফমশিংদা থোক্লিবা থৌদোক-ৱাথোকশিংদগী কনা অমতা নান্থোকপা ঙম্লোই। ঙসিগী মালেম অসিনা মুক্নবা অমসুং খৎনবা কয়া মায়োক্নরি। মুক্নবনা থল্লবা মালেম অমা কনা অমতনা পাম্নদে। তোখায় তারবা মালেম্না মীওইবা খুন্নাইনা থেংনরিবা অচৌবা অৱাবশিং কোকহন্নবা পাম্বৈশিং পুথোকপা ঙম্লোই। মতম অসি শান্তি অমসুং মরুপ-মপাং ওইবা, পুন্না চৎমিন্নবগী মতম অমনি। হৌজিক অসি মীওই খুদিংমক চাউখৎপা অমসুং নুংঙাইবগী মতম্নি। ঐখোয়না মালেমগী থাজনবা ৱাৎপগী অৱাবা লাকশিনগদবনি অমসুং মীওইবগী খনবা ৱাখল্লোন্দা মাঙলোমদা চঙশিনগদবনি। মালেম অমা, ইমুং অমা, তুংলমচৎ অমা হায়বা ৱাখল্লোন অসিদা ঐখোয়না মালেমদা য়েংগদবনি। মালেমগী ৱারেপ লৌবগী থবকশিংদা হেন্না শরুক য়াবগী মরুওইবা অদু খঙদুনা জি-২০দা অফ্রিকান য়ুনিয়ন য়াওহন্নবা পুখৎলকপা ৱাফম মেম্বরশিংনা য়ানখ্রে। পি-২০ ফোরমদা পান অফ্রিকা শরুক য়াবদা ঐ হরাওই।
মরুপশিং,
ঙসি নুমিদাংৱাইরম লোক সভাগী স্পিকরনা অনৌবা সংসদ দেলিগেদশিংদা য়েংহনগনি। অদোম্না মহাত্মা গান্ধীগী মফমদসু ইকায়খুম্নবা উৎকনি। চহি কয়া ভারতনা ঙমখৈ ৱাংমদগী তেরোরিজম মায়োক্নদুনা লাকখিবা অমসুং মীচম মীয়াম লিশিং কয়া হাৎখিবা অদু অদোম খঙলে। অনৌবা সংসদ বিল্দিং ময়াদা অদোম্না ভারতকী অরিবা সংসদ বিল্দিং উবা ফংগনি। চহি ২০গী মমাঙদা মীফম পাংথোক্লিঙৈদা তেরোরিস্তশিংনা ভারতকী সংসদতা লান্দারকখি অমসুং তেরোরিস্তশিংনা এম.পিশিং ফাজিন্দুনা থম্না থৌরাং তৌখি অমসুং তেরোরিস্তশিং অদু হাৎখি। অসিগুম্বা তেরোরিস্তশিংগী থৌদোক কয়া থেংনরবা মতুংদা ঙসি ভারত ফিবম অসিদা য়ৌরকখিবনি। মালেমদা তেরোরিজমগী অচৌবা শিংনবা থেংনরিবা অসি মালেমশু খঙলে। তেরোরিজমগী থৌওংশিং, মরমশিং, মখলশিং পুম্নমক মীওইবা খুন্নাইগী মায়োক্তনি। অসিগুম্বা ফিবম অসি থেংননবা শন্তাইনবা অমতা তৌরোইদবনি। তেরোরিজমগী দিফিনিসন ফংনবা মালেমগী ওইনা য়ানবা অমতা পুরকপা ঙমদ্রি। তেরোরিজম থেংননবা মালেমগী মীফম্না য়ুনাইতেদ নেসন্সতা য়ানবা অমা পুরক্নবা ঙসি ফাওবা ঙাইদুনা লৈরি। মালেমগী মওং অসিদা মীওইবা খুন্নাইগী য়েক্নবশিংনা খুদোংচাবা লৌদুনা লৈরে অমসুং তেরোরিজম থেংননবা পুন্না থবক তৌমিন্ননবা লম্বীশিং পুথোক্নবা মালেমগী সংসদশিং অমসুং মীহুৎশিংনা থবক পায়খৎকদবনি।
মরুপশিং,
মালেমগী অৱাবশিং কোকহন্নবা মীয়াম শরুক য়াবদগী হেন্না ফবা পাম্বৈ অমতা লৈতে। মেজোরিতিনা সরকারশিং শেম্বনি হায়বা ঐনা মতম পুম্নমক্তা থাজৈ,অদুবু লৈবাক হিংবা হায়বসি য়ানবা পুরক্লবা মতমদা ঙমগনি। মসিগী ৱাখল্লোন অসি ঐখোয়গী পর্লিয়ামেন্তরিয়ানশিং অমসুং পি-২০ ফোরম্না হেন্না মপাঙ্গল কনখৎহনগদবনি। মরৈ য়েৎনবা অমসুং খন্ন-নৈনবগী খুৎথাংদা মালেম অসি চাউখৎহন্নবা ঐখোয়গী থবকশিং শোইদনা মাইপাক্কনি। ঐদোম ভারত্তা নুংঙাইনা লৈগনি হায়না ঐনা থাজৈ। মাইপাকপা মীফম অমা ওইনবা অমসুং ভারতকী নুংঙাইবা খোঙচৎ অমা ওইনবা ঐনা অমুক হন্না অদোমগী মফমদা য়াইফ-পাউজেল পীজরি।
অদোম থাগৎচরি।
