হর হর মহাদেব!
থৌরম অসিদা ঐখোয়গী ইরক্তা তোঙান-তোঙানবা রাজ্যশিংগী ইকাই খুম্নরবা মুখ্য মন্ত্রীশিং, উপ মুখ্য মন্ত্রীশিং, কেন্দ্রগী মন্ত্রী মন্দলগী মরুপশিং, তুরিজম ইন্দস্ত্রীদগী মরুপশিং, ভারত অমদি মপালদগী বারানসীদা থুংখিবা লমকোইবশিং, অতোপ্পা দিগনিতরীশিং, নুপী অমদি নুপাশিং।
ঙসি অসি নুংঙাইবনা থল্লবা লোহরীগী কুহ্মৈনি। লাক্কদৌরিবা নুমিৎশিং অসিদা ঐখোয়না উত্তরায়ন, মকর সংক্রান্তি, ভোগী, বিহু, পোঙ্গলগুম্বা কুহ্মৈ কয়াসু ঐখোয়না পাঙথোক্লগনি। ঐহাক্না লৈবাক অসিদা অমদি মালেমদা কুহ্মৈশিং অসি পাঙথোক্লিবা মীওই পুম্নমক্তা নুংঙাইবা ফোঙদোকচরি অমদি য়াইফ পাউজেল পীজরি।
মরুপশিং,
ঐখোয়গী কুহ্মৈশিং, দান-দক্ষিনা, তপস্যা, ঐখোয়গী অনীংবশিং থুংহন্নবগী ঐখোয়গী ফিরেপ, ঐখোয়গী থাজবা অসিমক মশাগী ওইনা মরু ওইজৈ। অমসুং মসিদা ঐখোয়গী তুরেলশিংনসু মরু ওইবা থৌদাং লৌরি। অসিগুম্বা তানফম অসিদা ঐখোয়না তিভর ৱাতরৱেজ শেমগৎপগা মরী লৈনবা অচৌবা থৌরম অমা উবা ফংলি। ঙসি মালেমগী খ্বাইদগী শাংবা রিভর ক্রুজ – গঙ্গা বিলাস ক্রুজ অসি ঐখোয়গী কাশীদগী দিব্রুগর ফাওবা চেনবা হৌখ্রে। মসিনা মরম ওইদুনা নোংপোক থংবা ভারতকী লমকোইফম কয়া মালেমগী তুরিজম মেপ হেন্না ময়েক শেংনা মফম কনবা ঙম্লগনি। কাশীদা গঙ্গাদা নৌনা শাবা ফজরবা তেন্ত সিতী অসিনা লৈবাক শিনবা থুংবদগী অমসুং মালেমগী লমকোইবশিং অমসুং ভক্তাশিংদা মফম অসিদা লাক্তুনা লৈনবগী মরম অমা পীরি। মসিগা লোয়ননা লুপা করোর ১০০০ হেনবগী প্রোজেক্তশিং ওইরিবা ৱেস্ত বেঙ্গোলদা মলতি-মোদেল তর্মিনেলশিং, য়ু.পি. অমসুং বিহারদা ফ্লোতিং জেত্তীশিং অমসুং অসামদা মেরিতাইম স্কিল সেন্তর, শিপ রিপিয়র সেন্তর, তর্মিনেল কন্নেক্তিবিতী প্রোজেক্ত উরেপ উয়ুং তমখি অমসুং শঙ্গাখি। মখোয়না নোংপোক ভারত্তা ললোন ইতিক অমসুং তুরিজমগা মরী লৈনবা ওইথোকপা য়াবশিং অমসুং অনৌবা থবক্কী খুদোংচাবশিং পীরগনি।
মরুপশিং,
গঙ্গা অসি ঐখোয়গীদমক্তদি শুপ্নগী তুরেল খক্তা নত্তে। মসি অরিবা মতমদগী হৌদুনা ভারতকী অথোইবা লমদম অসিগী তপস্যা অমসুং অখাং কনবগী শাখি ওইদুনা লাকখি। ভারতকী ফীভম অসি অমা হেক্তা ওইবা মতমদা ইমা গঙ্গানা ভারত মচা করোর কয়াবু নাওকোনবী অমসুং ইথিল পীখি। মাং থাদুনা চংশিনবগী ৱাখল্লোন অসিবু তুংওইনরম্লগা নীংতম্বা ফংলবা মতুংদসু গঙ্গাগী তোর্বানগী মফমশিং অসি চাউখৎপা ৱাৎনা থমলম্লিবা অসি লাইবক থিবনি। মসিনা মরম ওইদুনা মীওই লাখ কয়ানা গঙ্গাগী তোর্বানদগী মফম হোংদুনা চৎখি। ফীভম অসিদা অহোংবা পুরকপা মথৌ তাই অদুনা ঐখোয়না অনৌবা এপ্রোচ অমগা লোয়ননা থবক তৌনবা ৱারেপ লৌখি। নাকল অমরোমদা ঐখোয়না নমামি গঙ্গেগী খুত্থাংদা গঙ্গা লুনানহন্নবা থবক তৌখি অমরোমদনা ঐখোয়না অর্থ গঙ্গাগী কেম্পেনসু হৌদোকখি। অর্থ গঙ্গাগী ৱাহন্থোক্তি ঐখোয়না গঙ্গাগী অকোইবদা লৈরিবা রাজ্যশিংদা শেন্মীৎলোনগী থবক-থৌরমশিং তৌনবা অনৌবা ফীভম অমা শেমগৎনবা খোঙথাংশিং পাইখৎলি। গঙ্গা বিলাস ক্রুজ অসিনা গঙ্গাগী ৱাহন্থোক্তা মাগী কেম্পেন অসিদা অনৌবা শক্তি পীরগনি। ক্রুজ অসিনা উত্তর প্রদেশ, বিহার, অসাম, ৱেস্ত বেঙ্গোল অমসুং বাংলাদেশতা চৎপা মতমদা মখল পুম্নমক্কী খুদোংচাবশিং পীরগনি।
মরুপশিং,
ঙসি ঐহাক্না ক্রুজ অসিগী খুত্থাংদা মখোয়গী অহানবা খোঙচৎ চৎনবগীদমক শেম শারিবা মীরৈবাক্কী লমকোইবশিংদা অখন্ননা য়াইফ পাউজেল পীজরি। মোদর্ন ক্রুজ অমদা নখোয়না অরিবা সহরগী খুত্থাংদা চৎকদৌরিবনি। ঐহাক্কী মীরৈবাক্কী লমকোইবা মরুপশিংদা ঐহাক্না অখন্ননা হায়জনীংবদি – ভারত্তা পুম্নমক লৈরে। নখোয়না খল্লুবগী ৱাংমদা পুম্নমক লৈরে। ভারত অসি ৱাহৈনা শন্দোক্না তাকপা ঙম্লরোই। ভারত অসি থমোয়দগী ফাওগদবনি। মরমদি ভারতনা লমদম নত্ত্রগা ধর্ম, জাৎ-বিজাৎ নত্ত্রগা লৈবাক্তা য়ুম্ফম ওইদনা মীপুম খুদিংমকপু থমোয় চাউথোক্না তরাম্না ওক্লি অমসুং মালেমগী শরুক পুম্নমক্তগী লাকপদা লমকোইবশিংবু তরাম্না ওক্লি।
মরুপশিং,
ক্রুজকী খোঙচৎ অসিনা পুন্না অনৌবা এক্সপরিয়েন্স কয়া পুরক্লগনি। স্পিরিচুএলিতী থীবা লাকপশিংনা কাশী, বোধ গয়া, বিক্রমশিলা, পতনা সাহিব অমসুং মজুলিগুম্বা লমথুংফমশিং কোনশিনগনি, মলতিনেস্নেল ক্রুজকী এক্সপরিয়েন্স পাম্বা লমকোইবশিংগীনা ধাকাগী খুত্থাংদা বাংলাদেশ চৎপগী খুদোংচাবা ফংগনি অমসুং ভারতকী মহৌশাগী মখল-মথেল য়েংবা পাম্বশিংনা সুন্দরবন্স অমসুং অসামগী উমংশিং ফাওদুনা চৎপা ফংগনি। ক্রুজ অসি ভারতকী রিভর সিস্তেমশিং খঙবা পাম্বা মীওইশিংগীদমক্তা য়াম্না মরু ওই। মরমদি ক্রুজ অসিনা তোঙান-তোঙানবা তুরেলগী ইচেল ২৫ ফাওদুনা চৎকনি। অমসুং ভারতকী মশিং লাকঙমদ্রবা মথেল লুকোইশিং খঙনীংবা মীওইশিংগীদমক অতাংবা খুদোংচাবা অমনি। হায়বদি খোঙচৎ অসিদা ঐখোয়না ভারতকী হেরিতেজকী তোপ-তোপ্পা অপুনবা অমসুং মাগী মোদর্নিতী অদু ক্রুজ অসিদা উবা ফংগনি। ক্রুজ তুরিজমগী অনৌবা তাঙ্কক অসিনা লম অসিদা লৈরিবা ঐখোয়গী নহা ওইরিবা মরুপশিংদা অনৌবা থবক্কী খুদোংচাবা পীরগনি। মসিনা অসিগুম্বা এক্সপরিয়েন্স ফংনবা তোঙান-তোঙানবা লৈবাকশিংদা চৎলিবা মীরৈবাক্কী লমকোইবশিং খক্তা নত্তনা ভারত মচাশিংনসু হৌজিক্তি অৱাং ভারত্তা চৎপা য়ারগনি। ক্রুজ অসিনা ফাওদুনা চৎপা মফম খুদিংমক্তা মসিনা চাউখৎপগী অনৌবা পরিং অমা পুরক্লগনি। ঐখোয়না লৈবাক শিনবা থুংবদা রিভর ৱাতরৱেজতা ক্রুজ তুরিজম শেমগৎলি। মসিগী মথক্তা সহরশিংগী মরক্তা অশাংবা রিভর ক্রুজকী মথক্তা ঐখোয়না অতেনবা ইন্তর-সিতী ক্রুজসু চাউখৎহনগনি। কাশীদা অসিগুম্বা মখলগী থবক অসি পাইখৎলি। বজেৎ লোয়ননা লকজরী এক্সপরিয়েন্স অসি য়েংলগা ক্রুজ তুরিজমদা শাহৌ পীনবা লৈবাক্কী অতোপ্পা ইনলেন্দ ৱাতরৱেজতা মসিগী মান্নবা এক্সপরিয়েন্সশিং ফংহন্নবা শেম-শারি।
মরুপশিং,
ভারত্তা তুরিজমগী চাউখৎলক্লিবা তাঙ্কক অমদা লৈবাক অসিদা ক্রুজ তুরিজম অমসুং হেরিতেজ তুরিজম পুল্লরে। ভারতনা মালেমদা লৌরিবা থৌদাং হেনগৎলকপগা লোয়ননা ভারতপু উনীংবা, খঙনীংবা অসিসু হেনগৎলক্লি। মরম অসিনা হৌখিবা চহি ৮দা লৈবাক অসিদা তুরিজম সেক্তর চাউখৎহন্নবা খোঙথাং কয়ামরুম লৌখৎখি। লাইফমলেনশিং, তীর্থ য়াত্রা অমসুং পুৱারী ওইরবা মফমশিংদা মরু ওইবা মীৎয়েং চংদুনা শেমগৎখি অমসুং অসিগুম্বা খোঙথাংশিং অসিগী কাশীনা অচৌবা খুদম অমা ওইরি। ফেসিলিতীশিং ফগৎহনবা অমসুং কাশী বিশ্বানাথ ধাম নৌনা শেমজিন শাজিনবা অসিগা লোয়ননা কাশীদা ভক্তা লাকপগী মশিংদা চাউনা হেনগৎলকপা উবা ফংখি। মমাং চহিদা কাশীদা তীর্থ য়াত্রা চৎপা মীওইশিং মশিং য়াম্না লাকখিবনা ঐখোয়গী হী থৌরিবা, স্ত্রীৎ ভেন্দর, রিক্সো থৌবা, দুকানদার, হোতেল-গেস্ত হাউসকী মপু পুম্নমক্তা অচৌবা শাহৌ অমা পীখি। মোদর্নিতী, স্পিরিচুএলিতী অমসুং লাইনিং য়াওরবা অনৌবা তেন্ত সিতীনা লমকোইবশিংদা অচৌবা এক্সপরিয়েন্স অমা পীরগনি। মহৈ-মরোংদগী মহাও ফাবদা বনারাসকী মহাও অমদি মচু পুম্নমক তেন্ত সিতী অসিদা উবা ফংলগনি।
মরুপশিং,
ঙসিগী থৌরম অসি লৈবাক অসিদা ২০১৪গী মতুংদা পাইখৎখিবা পোলিসীশিং, ৱারেপশিং অমসুং মাইকৈদা চংশিনগী মমি অমনি। ২১শুবা চহিচাগী দিকেদ অসি ভারত্তা ইনফ্রাস্ত্রকচরদা অওনবা পুরকপা দিকেদ অমনি। ভারতনা চহি খরগী মমাংদা ৱাখলনা লাম্বা ফংবা ইনফ্রাস্ত্রকচরগী থাক অমা য়ৌবা ঙম্লি। য়ুমশিং, তোইলেৎশিং, হোস্পিতালশিং, মৈ, ঈশিং, চাকথোং গ্যাস, এজুকেস্নেল ইন্সতিত্যুতশিংগুম্বা সোসিএল ইনফ্রাস্ত্রকচরদগী দিজিতেল ইনফ্রাস্ত্রকচর, মসিদগী রেলৱেজ, ৱাতরৱেজ, এয়রৱেজ অমসুং লম্বীশিংগুম্বা ফিজিকেল কন্নেক্তিবিতী ইনফ্রাস্ত্রকচর ফাওবা পুম্নমক অসি ভারতকী খোঙজেল য়াংনা খুমাং চাউশিন্নবা, চাউখৎপা ভারত অমা শেমগৎনবা মপাঙ্গল কনবা য়ুম্বীশিং ওইরি। অপাকপা হায়ৱেশিং, খ্বাইদগী নৌবা এয়রপোর্ত, অনৌবা রেলৱে স্তেসন, খ্বাইদগী ৱাংবা অমসুং খ্বাইদগী শাংবা থোং, খ্বাইদগী ৱাংবা অলতিত্যুদতা খ্বাইদগী শাংবা তনেল শাবা অসিনা অনৌবা ভারতকী চাউখৎপগী মমি অসি ঐখোয়না এক্সপরিয়েন্স তৌরি। মসিদা রিভর ৱাতরৱেজনা ভারতকী অনৌবা শক্তি ওইরক্লি।
মরুপশিং,
ঙসি হৌদোকখিবা গঙ্গা বিলাস ক্রুজ অসি অচম্বা থৌরম অমা নত্তে। খুদম ওইনা লৈবাক অসিনা মশাগী ওইনা স্পেসতা সেতলাইৎ ইনস্তোল তৌখিবা মতমদা মসিনা লৈবাক্কী তেক্নিকেলগী হৈশিংবা অদু উৎখি। মতৌ অসুম্না ভারতকী ইনলেন্দ ৱাতরৱেজকী কিমি ৩২০০ হেনবা খোঙচৎ অসিনা চাউখৎপগী শং-শংনা উরিবা খুদম ওইরি। লৈবাক অসিদা চৎথোক-চৎশিনগী পাম্বৈদা মতিক-ময়াই লৈবা পুৱারী লৈজরবসু ২০১৪গী মমাংদা ভারত্তা রিভর ৱাতরেজ শীজিন্নবা হন্থরম্মি। ২০১৪গী মতুংদা ভারতনা মতমগা চুনবা ভারতকী মতিক ময়াইদা অরিবা শক্তি অসি শীজিন্নরি। লৈবাক্কী অচৌবা তুরেলশিংদা ৱাতরৱেজশিং শেমগৎনবগী অনৌবা আইন অমসুং অকুপ্পা ৱারোল য়াওবা এক্সন প্লান লৈরে। ২০১৪দা লৈবাক অসিদা নেস্নেল ৱাতরৱেজ ৫ খক্তা লৈরমখি হৌজিক লৈবাক অসিদা নেস্নেল ৱাতরৱেজ ১১১ লৈরে অমসুং ২৪রোমদি হান্নদগী মথৌ তৌবা হৌখ্রে। মতৌ অসুম্না রিভর ৱাতরৱেজকী খুত্থাংদা চহি নিপালগী মমাংদা কার্গো ত্রান্সপোর্তেসন মেত্রিক তন লাখ ৩০ ওইরম্বদগী শরুক ৩ হেনগৎলকখি। রিভর ৱাতরৱেজ শীজিন্নবা মীওইশিংগী মশিংসু হেনগৎলক্লি। লৈবাক পুম্বগীদমক মোদেল অমা ওইনা গঙ্গাদা নেস্নেল ৱাতরৱঢজসু শেমগৎলি। ঙসি ৱাতরৱেজ অসি চৎথোক-চৎশিন, ললোন ইতিক অমসুং তুরিজমগী মরু ওইবা পাম্বৈ অমা ওইরে।
মরুপশিং,
ঙসিগী থৌরম অসিনা নোংপোক থংবা ভারতপু চাউখৎপা ভারতকী গ্রোথ ইঞ্জিন ওইহনবদা মতেং পাংগনি। মসিনা হলদিয়া মলতিমোদেল তর্মিনেলগা বারানসীগা শম্নহল্লি অমসুং ইন্দিয়া বাংলাদেশ প্রোতোকোল রুৎ অমসুং অৱাং নোংপোক্কসু শম্নহল্লি। মসিনা কোলকাতাগী হীথাংফমগা বাংলাদেশকা শম্নহল্লি। মসিনা উত্তর প্রদেশ, বিহার, ঝারখন্দ অমসুং ৱেস্ত বেঙ্গোলদগী বাংলাদেশতা লালোন ইতিক তৌবা য়াহল্লগনি। মতৌ অসুম্না জেত্তীশিংগী নেৎৱার্ক অমসুং রো-রো ফেরী তর্মিনেলশিংসু শেমগৎলি। মসিগা লোয়ননা চৎপদা মসিনা লাইহল্লগনি, ঙামী অমসুং লৌমীশিংনা খুদোংচাবা ফংলগনি।
মরুপশিং,
ক্রুজ জহাজ নত্ত্রগা কার্গোগী জহাজ ওইরবসু মখোয়না ত্রান্সপোর্ত অমসুং তুরিজমদা শাহৌ পীবা খক্তা নত্তনা মখোয়গী সর্ভিসকা মরী লৈনবা অপুনবা ইন্দস্ত্রীদসু অনৌবা খুদোংচাবশিং পীরগনি। মসিগীদমক স্তাফকী ত্রেনিং অমসুং স্কিল লৈবা ৱার্কফোর্সকী মথৌ তাই। মসিগীদমক গুৱাহাতিদা স্কিল দিবেলপমেন্ত সেন্তর অমা হাংদোকখি অমসুং জহাজ শেমজিন্নবগী গুৱাহাতিদা অনৌবা ফেসিলিতী অমসু শারি।
মরুপশিং,
ৱাতরৱেশিং অসিনা অকোইবগী ফীভমদা কান্নবা পীবতা নত্তনা শেল চংহন্দবদসু মতেং পাংলগনি। পাংথোকখিবা স্তদী অমগী মতুং ইন্না ৱাতরৱেশিং অসি মথৌ পাংথোকপদা চংবা শেনফম অসি রোদৱেশিংদা পাংথোকপদা চংবা শেনফম অদুদগী শরুক অনি তংখাই হন্থৈ অমসুং রেলৱেজদগীনা শরুক অমা তংখাই হন্থৈ। মসিগা লোয়ননা রেলগা চাংদম্নবদা মসিনা শরুক অহুম থোকপগী অমা হন্থৈ। মসিনা থাও অমদি শেল কয়া য়াম্না কনবা ঙমগনি খন্থদুনা য়েংবীয়ু। খোঙজেল য়াংনা শেমগৎলক্লিবা ৱাতরৱেজ অসিনা ভারত্তা শেমখিবা নেস্নেল লোজিস্তিক পোলিসীগী মতেং চাউনা পাংলগনি। অমসুং কিলোমীতর লিশিং কয়াগী ৱাতরৱে নেতৱর্ক অমা শেমগৎপগী ভারতকী শক্তি লৈ। ত্রান্সপোর্ত গুদশিং অমসুং মী পুথোক পুশিনগী শেমগৎপা য়াবা ভারতকী তুরেল অমসুং তুরেলগী খোংলম ১২৫ লৈ অমসুং তুংদা হীথাংফম ওইনা শেমগৎপা য়াবা মফমশিংদসু কান্নবা পীবা য়াগনি। ভারত্তা ৱাতরৱেজ, রেলৱেজ অমসুং হায়ৱেশিংগী মলতি মোদেল নেৎৱর্ক অমা শেমগৎপগী য়াগনি অমসুং অৱাং নোংপোক্তা ঈশিংগী লম্বেলগী মপাঙ্গল কনখৎহন্নবা বাংলাদেশ অমসুং অতোপ্পা লৈবাকশিংগা য়ান্ন-ৱারোলশিং খুৎয়েক পীনখি।
মরুপশিং,
চাউখৎপা ভারত অমা শেমগৎনবা মপাঙ্গল কনবা কন্নেক্তিবিতী অমা তঙাই ফদে। মরম অসিনা ঐখোয়গী কেম্পেন অসি মখা চত্থখিগনি। ভারতকী তুরেলশিং অসিনা লৈবাক অসিগী ৱাতর পাৱর অমসুং ললোল ইতিক অমসুং তুরিজমদা অনৌবা পনখৈ অমা ফংপীবা ওইরসনু অমসুং ক্রুজ পেসেঞ্জরশিংদা নুংঙাইবা খোংচৎ অমা ওইনবা য়াইফ-মঙ্গোল পীজরি। হন্না-হন্না থাগৎচরি।
