মীয়াম পুম্নমক্কী মফমদা, হরি ঔম, জয় উমিয়া মা, জয় লক্ষমীনরায়ন!
মসি ঐগী কুছ পতেল খক্তগী নত্তনা ভারত পুম্নমক্কী চাউথোকবনি। মরমদি ঐনা ভারতকী মফম খুদিংদা চৎপদা, সোসাইতি অসিগী মীওইশিং মফম অদুদা উবা ফংই।
সার্দা পীথকী জগৎগুরু সঙ্করচার্য়া শ্বামী সাদানন্দ সরস্বাতি জি, গুজরাতকী চীফ মিনিস্তর ভুপেন্দ্র পতেল, কেন্দ্রগী মন্ত্রীমন্দলগী ঐগী মরুপ পুরুসোত্তম ভাই রুপালা, ওল ইন্দিয়া কুছ পতিদার সমাজগী প্রসিদেন্ত অবজি ভাই বিশ্রাম ভাই কানানি, থৌরম অসিদা শরুক য়ারিবা ওফিসকী থৌপুবা খুদিংমক। লৈবাক মনুংগী অমসুং মপান লৈবাকশিংদা লৈরিবা ঐগী ইচিন-ইনাওশিং!
নুংঙাইরবা সনাতান সতাব্দি মহোৎসব থৌরম অমগীদমক ময়াম পুম্নমক য়াইফ-পাউজেল পীজরি। সঙ্করচার্য়াগী ফম পায়রবা মতুংদা, জগৎগুরু সঙ্করচার্য়া শ্বামী সাদানন্দ সরস্বাতি জি শরুক য়াবা থৌরম অমদা ঐনা শরুক য়াবগী খুদোংচাবা ফংবা অসি মসিগী থৌরম অসিনা অহানবনি। মতম পুম্নমক্তা ঐঙোন্দা মহাক্কী মীনুংশিং উৎখি। ঙসি মহাক ইকায়খুম্নবা উৎনবগী খুদোংচাবা অমা ঐনা ফংলে।
মরুপশিং,
করৱা পতিদার সমাজনা খুন্নাইগী থবক তৌরকপা চহি ১০০ শুরকপা, য়ুথ ৱিংগী চহি ৫০শুরকপা অমসুং ৱুমেন ৱিং চহি ২৫ মপুংফারকপা, অহুম অসিগী অপুনবা ত্রিবেনি শঙ্গম অদোম্না শেম্বা অসিদা য়াম্না হরাওই। পোকই। মাইপাকপা অমসুং নুংঙাই-য়াইফবা হায়বসি খুন্নাইগী নহারোল অমসুং নুপীশিংনা মখোয়গী থৌদাং পাংথোক্লবা মতমদা ঙমগনি। সনাতন অসি শুপ্নগী ৱাহৈ অমা খক নত্তে, মসি মতম পুম্নমক্তা নৌদুনতা লৈ, হোংদুনতা লৈ। মসি হৌখিবা মতমদগী হেন্না ফগৎনিংবগী অপাম্বা লৈ অমসুং মরম অদুনা লোম্বা নাইদে, শিদে।
মরুপশিং,
লৈবাক অমগী খোঙচৎ অদু লৈবাক অদুগী খুন্নাইগী খোঙচৎতা মমি তাই। চহি ১০০শুরবা পতিদার সমাজ অমসুং চহি চা কয়া শুরবা শ্রী অখিল ভারতিয়া কুছ করৱা সমাজগী খোঙচৎ অমসুং মসিগী পান্দম অসি ভারত অমসুং গুজরাত মশক খঙনবা পাম্বৈ অমনি। চহি চা কয়া মপান লৈবাকশিংদগী লান্দারকপশিংনা ভারতকী খুন্নাই ওৎ-নৈখি অমসুং লৈবাক অসিগী ইপা-ইপুশিংনা মখোয়গী শক্তম মুৎথৎপা য়াখিদে অমসুং মখোয়গী থাজবদা মচেৎ-মকাই তাবা য়াখিদে। চহিচা কয়া কৎথোকপগী কান্নবা হৌজিক্কী মীরোলনা ফংবা অদু ঐখোয়না উরে। ঙসি কুছ করৱা পতিদার সোসাইতিগী মীয়াম্না মখোয়গী মাইপাকপগী ফিরাল লৈবাক অসিদা অমসুং মপান লৈবাকশিংদা হাইরি। মখোয়না লৈরুবা মফম খুদিংমক্তা, মখোয়গী হোৎনবা কনবা অমসুং মপাঙ্গলগী খুদোংচাবা মখোয়না ফংলি। কুছ করৱা পতিদার কাংলুপ অসি তিম্বর, প্লাইৱুদ, হার্দৱায়ার, মার্বল, য়ুম শানবা মচাকশিংদা য়াম্না মাঙজিল থাবা কাংলুপ অমনি। মসিগা লোয়ন্না অদোম্না চহি চহিগী মতুংদা মীরোলশিংগী মতুংদা মীরোল কয়া অদোমগী চৎনবীশিং ইকায়খুম্নরি।
মরুপশিং,
ঐ মতম শাংনা রাজনিতিগী পুন্সিদা অদোমগা লোয়নদুনা লাক্লে, অদোম ময়ামদগী কয়া অমা তম্লে। গুজরাতকী চীফ মিনিস্তর ওইরিঙৈদা হিরম কয়াদা অদোমগা থবক তৌমিন্নবগী খুদোংচাবা ঐনা ফংখ্রে। গুজরাতকী চীফ মিনিস্তর ওইরিঙৈদা হিরম কয়াদা করৱা পতিদার সমাজগা থবক তৌমিন্নখি। কুছ লমদম অসি লৈবাক অসিদা খ্বাইদগী শোৎথবা জিলা অমা ওইনা লৌনখি অমসুং ঈশিং ফংদবা, চারা হেনবা, শা-ষনশিং শিবা, য়ুম হোংবা অমসুং অৱা-অনাগী থৌদোকশিংনা জিলা অসি মশক তাকখি। অদু চহি কয়া অপুনবা ওইনা ঐখোয়না কুছ অমুক হন্না শেমগৎলে। কুছগী ঈশিংগী অৱাবা কোক্নবা থবক পায়খৎপদগী মফম অসি মালেমদা খ্বাইদগী চাউবা লমকোয়ফম অমা ওইরে অমসুং ঙসিদি লৈবাক অসিদা কুছ অসি য়াংনা চাউখৎলক্লিবা জিলাশিংগী মনুংদা অমা ওইরে। লমদম অসি লম্বী-থোং, অচৌবা উদোগ অমসুং লৌউ-শিংউগী পোৎথোকশিং মপান্দা থাদোকপদা মমিং চৎলে।
ইচিন-ইনাওশিং অমসুং ইচল-ইচেশিং,
ঐ নরয়ান রামজি লিম্বানিনা য়াম্না চাউনা ইথিল পীখি। শ্রী অখিল ভারতীয় কুছ করৱা পতিদার সমাজ শৌগৎপা মীওই কয়াগা ঐগা নক্নবা মরী লৈনরি। মরম অদুনা, মতম মতমগী ওইনা সোসাইতি অসিনা পাংথোকপা থবকশিংগী পাউ ঐসু ফংলি। কোরোনা মনুংদা ময়াম্না শিংথানিঙাই ওইরবা থবক পাংথোকখ্রে। হন্দক্কী সনাতন সেন্তিনরি থৌরম অসিগা লোয়ন্না , মথং চহি ২৫গী অদোমগী পান্দম অমসুং ৱারেপশিং অদোম্না শেম্লে। লৈবাক অসিনা নিংতম্বা চহি ১০০ শুরকপগী হরাওবা ফোঙদোকপা মতমদা অদোমগী চহি ২৫গী ৱাশকশিং থবক ওইনা পাংথোকপা ঙমগনি। খুন্নাই নুংশিন্নবা, অকোয়বগী শক্তম অমসুং মহৌশাগী লৌউ-পথাপ পুম্নমক লৈবাক অসিগী অমৃত মহোৎসবকা শম্নরে। মাইকৈ অসিদা শ্রী অখিল ভারতিয়া কুছ করৱা সমাজনা লৈবাক্কী ৱারেপশিংগী থৌনা হাপকনি অমসুং মাইপাক্না মখোয় লমজিংগনি। মসিগী ৱাখল্লোন অসিগা লোয়ন্না, ঐনা ময়াম পুম্নমক অমুক হন্না থাগৎচরি।
অদোম থাগৎচরি!
