ভারত ইমানা য়াইফরে।
ভারত ইমানা য়াইফরে।
কর্নাতকা-দা, এল্লা, সহোদরা সহোদরী-য়ারিগে, নন্না নমস্কারাগলু!
ইমা ভুবনেশ্বরীবুসু ঐহাক্না খুরুমজরি!
ঐহাক্না আদি চুনচুনাগিরি অমসুং মেলুকোতেগী গুরুশিংবুসু ইকাই খুম্নবা উৎচরি, মখোয়গী থৌজালশিং নীজরি।
হৌখিবা মতম খরা অসিদা ঐহাক্না কর্নাতকাগী তোঙান-তোঙানবা মফমশিংদা জনতা জনার্দন দর্শন তৌবগী খুদোংচাবা ফংজখি। মফম খুদিংমক্তা কর্নাতকাগী মীয়াম্না অমুক্তা ওইখিদ্রিবা থৌজালশিং পীবীরকখি। অমসুং মান্দ্যাগী মীয়াম্না পীবীবা থৌজালশিং অসি মীনুংশিনা থল্লি। মান্দ্যাগী মীনুংশিং অমসুং মীয়োক-মীচান ফবা মতৌ অসিদা ঐহাক্না অপেনবা পোকই। ঐহাক্না পুম্নমকপু ইকোক নোন্না খুরুমজরি।
নখোয়না পীখিবা মীনুংশি অদুগী লমন অদু খোঙজেল য়াংনা চাউখৎপা পুরক্তুনা লমন শীংবা হায়বা অসি দবল ইঞ্জিন সরকারনা লেপ্তনা হোৎনরিবা খোঙথাংনি। ঙসি মফম অসিদা লুপা করোর লিশিং কয়াগী ইনফ্রাস্ত্রকচর প্রোজেক্তশিং উরেপ-উয়ুং তম্বা অমসুং শঙ্গাবা অসি খোঙথাংশিং অসিগী শরুক অমনি।
হৌখিবা নুমিৎ খরনিদা লৈবাক অসিদা বেঙ্গলুরু-মৈসুরু এক্সপ্রেসৱেগী মতাংদা কয়া অমা নৈনরি। এক্সপ্রেসৱে অসিগী মরী লৈনবা মমিশিং সোসিএল মেদিয়াদা ভাইরেল ওইখি। অসিগুম্বা ফজবা, মোদর্ন এক্সপ্রেসৱেশিং ভারতকী মফম খুদিংমক্তা শাবা হায়বা অসি ইরৈবাকচা খুদিংমক অমসুং ঐখোয়গী নহারোলশিংগী মঙলান্নি। ঙসি বেঙ্গলুরু-মৈসুরু এক্সপ্রেসৱে উবদা লৈবাক্কী নহারোলশিংনা চাউথোকচবা পোক্লি। এক্সপ্রেসৱে অসিগী খুত্থাংদা মৈসুরু অমসুং বেঙ্গলুরুগী মরক্তা চৎথোক চৎশিন তৌবগী মতম শরুক তঙ্খাই হন্থহল্লগনি।
ঙসি মৈসুরু-কুশলনগরগী ৪-লেনগী উরেপ-উয়ুংসু তমখি। প্রোজেক্ত পুম্নমক অসিনা ‘সবকা বিকাস’কী ৱাখল্লোন হেন্না হেনগৎহল্লগনি অমসুং চাউখৎপগী থোং হাংলগনি। কর্নাতকাগী মীয়ামবু কন্নেক্তিবিতী প্রোজেক্তশিং অসিগীদমক নুংঙাইবা ফোঙদোকচরি।
ভারতকী ইনফ্রাস্ত্রকচরগী বিজনগা মরী লৈননা খন্ন-নৈনবা খুদিং মাংদা মশক নাইবা মীওই অনিগী মমিং চোংথোরকই। কৃষ্ণরাজা ৱাদিয়র অমসুং সর এম বিস্বেস্বরয়্যা, কর্নাতকাগী অথোইবা মচানুপাশিংনা লৈবাক অসিদা অনৌবা বিজন অমসুং শক্তি পীখি। মশক নাইবা মীওইশিং অসিনা খুদোংথিববু খুদোংচাবদা ওন্থোকখি অমসুং ইনফ্রাস্ত্রকচরগী মরু ওইবা অদু খঙখি অমসুং হৌজিক্কী মীরোলনা মখোয়গী খোঙথাংশিংগী কান্নবশিং ফংলিবা অসি লাইবক ফবনি।
অসিগুম্বা মশক নাইবা মীওইশিংনা ইথিল পীদুনা ঙসি লৈবাক অসিদা এদভান্স ইনফ্রাস্ত্রকচর প্রোজেক্তশিং শেমগৎলি। ঙসি ভারতমালা অমসুং সাগরমালা য়োজনানা ভারত অমসুং কর্নাতকাগী লেন্দস্কেপতা অওনবা পুরক্লি। মালেম পুম্বনা কোরোনা লাইচৎকী চৈথেং নংজরবসু লৈবাক্কী ইনফ্রাস্ত্রকচর বজেৎ অসি শরুক কয়া হেনগৎহনখি। চহি অসিগী বজেৎতা লৈবাক্কী ইনফ্রাস্ত্রকচর শেমগৎনবা লুপা করোর লাখ ১০ হেন্না এল্লোকেৎ তৌখি।
নুংঙাইহনবগী মথক্তা ইনফ্রাস্ত্রকচরনা থবকশিং, ইনভেস্তমেন্ত অমসুং শেল তান্নবা খুদোংচাবশিং পুদুনা লাক্লি। কর্নাতকা খক্তদা সরকারনা হন্দক চহি খরা অসিদা হায়ৱেগা মরী লৈনবা প্রোজেক্তশিংদা লুপা করোর লাখ ১ হেন্না ইনভেস্ত তৌখি।।
বেঙ্গলুরু অমসুং মৈসুরু অনিমক কর্নাতকাগী মরু ওইবা সহরশিংনি। সহর অমনা তেক্নোলোজীগীদমক খঙনৈ অদুগা অমনা ত্রেদিসনগীদমক খঙনৈ। সহর অনি অসিবু মোদর্ন কন্নেক্তিবিতীগা লোয়ননা শম্নহনবা হায়বা অসি তোঙান-তোঙানবা মীৎয়েংদগী মরু ওই।
মতম শাংনা মীয়াম্না সহর অনিগী মরক্তা চৎথোক-চৎশিন তৌবদা ত্রাফিক য়াম্না চিনবগী তোইনা ৱাকৎতুনা লাকখি অমসুং এক্সপ্রেসৱে অসিনা সহর অনিগী মরক্তা চৎথোক চৎশিন তৌবগী মতম অসি পুং অমা মখাই হন্থহল্লগনি। মসিনা মরম ওইদুনা অপুনবা রিজন অসিগী শেন্মীৎলোনগী থবক থৌরমদা ইনোৎ অমা হাপ্লগনি।
বেঙ্গলুরু-মৈসুরু এক্সপ্রেসৱে অসিনা রামনগর অমসুং মান্দ্যাগী হেরিতেজ তাউন ফাওদুনা চৎলি। মফম অসিদা হিস্তোরিকেল হেরিতেজ সাইৎ কয়াসু লৈ। সহরশিং অসিগী তুরিজমগী পোতেন্সিএলদা শাহৌ পীরগনি। মসিনা মৈসুরু য়ৌবদা লায়হনবা খক্তা নত্তনা মা কাবেরিগী পোক্নফম ওইরিবা কোদাগুদা লাকপদা খুদোংচাহল্লগনি। হৌজিক ৱেস্তর্ন ঘাতসতা লৈরিবা বেঙ্গলুরু-মেঙ্গলুরু লম্বী অসি নোংজু থা মনুংদা লৈবাক নীংখাইবনা মরম ওইদুনা তোইনা থীংজিনবা উবা ফংলি। মসিনা রিজন অসিগী পোর্ত কন্নেক্তিবিতীদা অকাইবা পীদুনা লাকখি। মৈসুরু-কুশলনগর হায়ৱে পাকথোক-চাউথোরকপনা সমস্যা অসি কোকহনবা ঙম্লগনি। অফবা কন্নেক্তিবিতীনা মরম ওইদুনা মফম অসিদা লৈরিবা ইন্দস্ত্রীশিংনা খুমাং চাউশিনবা ঙম্লগনি।
২০১৪গী মমাংদা কেন্দ্রদা শক্তি পাইরম্বা কোংগ্রেস সরকার অসি চুংশিন্নবা সরকার অমা ওইরমখি। তোঙান-তোঙানবা মীওইশিংনা শৌগৎপনা মসি শক্তি পাইপা ঙমখি, মখোয়না লায়রবা মীওই অমদি লায়রবা ইমুংশিং মাংহন্নবা হোৎনবদা লম্বী অমত্তা লেম্না থাখিদে। কোংগ্রেস সরকারনা লায়রবশিংগী চাউখৎ থৌরাংগী কাইথখিবা শেনফমশিং লুৎ তৌখি। লায়রবশিংগী অৱাবা কোংগ্রেস সরকারনা উবীখিদে।
২০১৪দা নখোয়দা ঐঙোন্দা ভোৎ পীবীদুনা লৈবাক অসিবু শেবা তৌনবা খুদোংচাবা পীখিবা মতমদা লায়রবা কাংলুপশিংগী অৱাবা খঙবা লায়রবশিংগী সেন্সিতিব গভর্নমেন্ত অমা লাকখি। মসিগী মতুংদা বি.জে.পি.গী কেন্দ্র সরকারনা লায়রবগী শেবা তৌনবা লেপ্তনা হোৎনখি, লায়রবশিংগী পুন্সিদগী অৱাবা কোকহন্নবা হোৎন্দুনা লাকখি।
বি.জে.পি. সরকারনা লায়রবশিংদা পক্কাগী য়ুম, তোতি ঈশিং, উজ্জ্বলা গ্যাস কন্নেক্সন, ইলেক্ত্রিসিতী, লম্বী-থোং, হোস্পিতালশিং অমসুং লায়রবগীদমক অনা লায়েংদা ৱাখল ৱারম্বা অদু হন্থহনবদা খ্বাইদগী মরু ওইবা মীৎয়েং চংখি।
হৌখিবা চহি ৯ অসিদা বি.জে.পি. সরকারগী য়োজনা কয়ানা মরম ওইরগা লায়রবা করোর কয়াগী পুন্সি নুংঙাইহনবা ঙমখি। কোংগ্রেসকী মতমদা লায়রবশিংনা খুদোংচাবশিং ফংনবা হোৎনবদা সরকারগী মতুং ইন্নদুনা লাকখি। হৌজিক বি.জে.পি. সরকারনা লায়রবশিং য়ুমথোংশিংদা চৎতুনা মখোয়গীদমক খুদোংচাবশিং ফংহনখি। বি.জে.পি. সরকারগী য়োজনাশিংগী কান্নবা ফংদনা লৈরিবা শোত্থরবশিংদা য়ৌশিন্নবা কেম্পেনসু চত্থরি।
মতম শাংনা থেংনদুনা লাকখিবা সমস্যাশিংগী মতম চুপ্পগী ৱারোইশিন অমা পীনবা বি.জে.পি. সরকারনা মতম চুপ্পদা মরু ওইবা মীৎয়েং চংদুনা লাকখি। হৌখিবা চহি ৯দা য়ুম করোর ৩ শাখি মসিগী মনুংদা য়ুম লাখ কয়া কর্নাতকাদা শাখি অমসুং অনৌবা য়ুম লাখ ৪০না জল জীবন মিসনগী মখাদা তোতি ঈশিং ফংহনখি।
ঐখোয়গী লৈবাক্তা দিকেদ কয়া পন্দুনা লাকখিবা ইরিগেসন প্রোজেক্তশিং খোঙজেল য়াংনা লোইশিনবা ঙমখি। চহি অসিগী বজেৎতা অপ্পর ভাদ্রা প্রোজেক্তকীদমক লুপা করোর ৫,৩০০ এল্লোকেৎ তৌখি। মসিগী মথক্তা কর্নাতকাগী অচৌবা শরুক্না য়োক্নরিবা ইরিগেসনগী সমস্যাশিং অসিগী মসিগী মতম চুপ্পগী ৱারোইশিন অমা পুরকপা ঙম্লগনি।
লৌমীশিংগী অপীকপা সমস্যাশিং কোকহল্লবা মতুংদা ফাওবা বি.জে.পি. সরকারনা মখোয়গী খুদোংচাদবশিংগী মতম চুপ্পগী ওইবা সোল্যুসন অমা পীরি। কর্নাতকাগী লৌমীশিংনা মায়োক্নরিবা অপীকপা সমস্যাশিংগী সোল্যুসনশিং পীবগী মথক্তা সরকার অসিনা পি.এম. কিসান সম্মান নিধি য়োজনাগী খুত্থাংদা কর্নাতকাগী লৌমীশিংগী বেঙ্ক একাউন্তশিংদা লুপা করোর ১২,০০০ হকথেংননা ত্রান্সফর তৌখি হায়রিবা অসিদা কেন্দ্র সরকারনা মান্দ্যা রিজনদগী লৌমী লাখ ২.৭৫দা লুপা করোর ৬০০ পীখি।
কর্নাতকা সরকারপু ৱাফম অমগীদমক ঐহাক্না থাগৎপা ফোঙদোকচনীংই। কেন্দ্র সরকারনা পি.এম. কিসান সম্মান নিতিগী লুপা ৬০০০কী ইন্সতোলমেন্ত পীখি মসি কর্নাতকা সরকারনা লুপা ৪০০০ হাপচিনখি। হায়বদি দবল-ইঞ্জিন সরকার অসিদা লৌমীশিংনা কান্নবা শরুক অনি হেন্না ফংলি, মখোয়গী সমস্যাশিং কোকচবা ঙম্লে।
মধুর মান্দ্যা, সক্করে নগরগী চু থারিবা লৌমীশিংনা দিকেদ কয়াদগী অতোপ্পা সমস্যা অমা মায়োক্নদুনা লাকখি। করিগুম্বা চুগী পোত্থোক অসি কা হেন্না ৱাংলবদি সমস্যা অমা ওইরমখি, চুগী পোত্থোক কা হেন্না নেম্লবদি মদুসু সমস্যা অমা ওইরমখি। মসিনা মরম ওইদুনা সুগর মিলশিংগী চু থারিবা লৌমীশিংগী শেনফম মতম শাংনা পীথোক্তনা লাকখি।
সমস্যা অসিগী ৱারোইশিন পুরকপা অসি তঙাই ফদবা অমা ওইখি। বি.জে.পি. সরকারনা লৌমীশিংগী য়াইফনবা হোৎনবদা মীৎয়েং চংখি, ইথানোলগী লম্বী অসি খনখি। ঐখোয়না চুদগী ইথানোল পুথোকপা হেনগৎহন্নবা ৱারেপ লৌখি। হায়বদি অহেনবা চুনা ইথানোল পুথোক্লগনি, মসিনা লৌমীশিংদা লেপ্তনা শেন্থোক লৈহনবা ঙম্লগনি।
মমাং চহিদা লৈবাক্কী সুগর মিলশিংনা লুপা করোর লিশিং ২০রোমগী ইথানোল ওইল কম্পনীশিংদা য়োনখি মসিনা চু থারিবা লৌমীশিংদা মতম চানা শেল পীথোকপা ঙমহনখি। ২০১৩-১৪দগী হৌনা লুপা করোর লিশিং ৭০রোমগী ইথানোল সুগর মিলশিংদগী লৈখি অমসুং শেনফম অদু লৌমীশিংদা য়ৌহনখি।
চহি অসিগী বজেৎতসু চু থারিবা লৌমীশিংগীদমক প্রোবিজন কয়া শেমখি, মসিদা সুগর কোওপরেতিবশিংগীদমক লুপা করোর লিশিং ১০গী তেংবাং য়াওখি অমসুং তেক্সকী রিবেৎনা লৌমিশিংদা কান্নবা পীরগনি।
ঐখোয়গী লৈবাক অসি খুদোংচাবনা থনবা লমদম অমনি অমসুং মালেম শিনবা থুংবদগী মীয়াম্না লৈবাক আসিদা মীৎয়েং চংনরি। লাখ ৪ হেনবগী ইনভেস্তমেন্ত ফংদুনা খ্বাইদগী চাউবা বেনিফিসরী ওইখি। কোরোনাগী মতম ওইজরবসু কর্নাতকানা লুপা করোর লাখ ৪গী ইনভেস্তমেন্ত ফংবা ঙমখি। মসিনা দবল-ইঞ্জিন সরকারগী হোৎনবা কনবা মতৌ অদু উৎলি।
আই.তি.গী মথক্তা বাইওতেক্নোলোজী, দিফেন্স মেন্যুফেকচরিং অসিগুম্বা ইন্দস্ত্রীশিং অসি খোঙজেল য়াংনা পাকথোক চাউথোরক্লি অমরোমদা এরোস্পেস অমসুং স্পেস গুম্বা ইন্দস্ত্রীশিংনসু অমুক্তা উখিদ্রিবা মওংদা ইনভেস্তমেন্ত লাকপা উবা ফংলি। হৌজিক কর্নাতকানা ইলেক্ত্রিক ভেহিকল মেন্যুফেকচরিংদা খোঙজেল য়াংনা খুমাং চাউশিল্লি।
দবল ইঞ্জিন সরকারগী খোঙথাংশিং অসিগী চৈরক্ত কোংগ্রেস অমসুং মাগী এলীশংনা করি তৌরি? কোংগ্রেসনা হায় মানা মাগী থবক তৌখ্রে, কোংগ্রেসনা মোদীগী মোংফম তৌবগী মঙলানশিং শাগৎপদা থবক চিল্লি অমরোমদনা মোদীনা বেঙ্গলুরু-মৈসুরু এক্সপ্রেসৱেগী চাউখৎ-থৌরাংগী থবক তৌদুনা অমসুং লায়রবশিংগী পুন্সি নুংঙাইনবা হোৎনবদা থবক চিল্লি।
মোদীগী মোংফম তৌবগী মঙলান শাগৎলিবা কোংগ্রেসকী মীওইশিংনা খঙদে মদুদি মহাক্কী ঙাকলৌ ওইনা ইমা, ইচে-ইচলশিং অমসুং ইচানুপীশিং অমদুং ভারত মীয়ামগী থৌজালশিং লৈরি।
দবল-ইঞ্জিন সরকারনা কর্নাতকাদা খোঙজেল য়াংনা চাউখৎ-থৌরাং পুরকপা হায়বা অসি মরু ওইনা লৌরি। ঐহাক্না অচৌবা থৌরম, মীয়োক মীচান ফবা মতৌ অমসুং নখোয়গী থৌজালশিংগীদমক মান্দ্যাগী মীয়ামদা থমোয় শেংনা তৌবীমল খঙবা উৎচরি। চাউখৎ-থৌরাংগী প্রোজেক্তশিং অসিগীদমক পুম্নমকপু ঐহাক্না হন্না-হন্না থাগৎচরি।
ভারত ইমানা য়াইফরে, ভারত ইমানা য়াইফরে।
ভারত ইমানা য়াইফরে, ভারত ইমানা য়াইফরে।
হন্না-হন্না থাগৎচরি।
