খুরুমজরি!
‘ইন্দিয়ন সাইন্স কংগ্রেস’ হৌদোকপগীদমক পুম্নমকপু ঐহাক্না থাগৎচরি। মথংগী চহি ২৫ অসিদা ভারতনা পনদোম লোম্বা ঙম্বা মতমদা ভারতকী সাইন্তিফিক পাৱরগী থৌদাং য়াম্না মরু ওইগনি। লৈবাক্কী শেবা তৌবগী অচেৎপা ফিরেপকা লোয়ননা সাইন্সতা পুক্নিং চংবগা পুনশিন্নবা মতমদা অমুক্তা উখিদ্রিবা ফলশিং ফংবা ঙমগনি। লৈবাক্কী সাইন্তিফিক কম্ম্যুনিতীনা ২১শুবা চহিচাদা মাগী ফংফম থোকপা মফম অদু ফংহনবা হোৎনবদা মতেং পাংগনি হায়না ঐহাক্না থাজৈ। মসিগী থাজবা অসিগী মরম অদুসু ঐহাক্না ময়ামদা ফোঙদোকপা পামজৈ। ময়াম্না খঙই মদুদি ওবজর্বেসন হায়বা অসি সাইন্সকী মরু ওইবা য়ুম্ফম ওইরিবনি। বিজ্ঞানিকশিংনা ওবজর্বেসনগী খুত্থাংদা পেত্তর্নশিংগী তুং ইল্লি অমসুং পেত্তর্নশিং অসি এনালাইজ তৌরবা মতুংদা ফল অমা ফংবা ঙম্মি।
বিজ্ঞানিক অমনা খোঙথাং খুদিংদা দেতা খোমজিনবা অমসুং এনালাইজ তৌবা হায়বা অসি য়াম্না মরু ওই। ঙসিগী ২১শুবা চহিচাগী ভারত্তা ৱাফম অনি মরাং কাইনা লৈ। অহানবদা – দেতা অমসুং অনিশুবদা – তেক্নোলোজী। মখোয় অনিমক্তা ভারতপু অনৌবা পনখৈ তম্না পুখৎনবা শক্তি লৈ। দেতা এনালাইসিসকী লম অসি খোঙজেল য়াংনা খুমাং চাউশিল্লি। মসিনা ই-পাউ অদুবু লৌশিংদা অমসুং এনালাইসিসনা থবক ওইনা ওন্থোকপা য়াবা লৌশিংদা ওন্থোকপদা মতেং পাংই। ত্রেদিস্নেল নোলেজ নত্ত্রগা মোদর্ন তেক্নোলোজী ওইরবসু মখোয় অনিমক্না সাইন্তিফিক দিস্কোভরীদা মতেং ওইগনি। মরম অসিনা ঐখোয়গী সাইন্তিফিক প্রোসেস মপাঙ্গল কলহন্নবা তোঙান-তোঙানবা তেক্নিকশিংদা ইনভেস্তিগেতিব এত্তিত্যুদ লৈহনবা তাই।
মরুপশিং,
ঙসিগী ভারতনা মাংদা চংশিল্লিবা অসিগা লোয়ননা সাইন্তিফিক এপ্রোচকী ফলশিং ঐখোয়না উবা ফংলি। ভারতনা সাইন্সকী লমদা মালেমগী মকোক থোংবা লৈবাকশিংগী মনুংদা অমা থুনমক ওইবা ঙম্লক্লি। লৈবাক ১৩০গী মনুংদা ঐখোয়না ২০১৫ ফাওবদা গ্লোবেল ইন্নোভেতিব ইন্দেক্সতা মশিং ৮১দা লৈ। অদুবু ২০২২দা ৪০শুবদা হাইগৎলকপা ঙমখি। ঙসি ভারতনা পি.ঐচদি.শিংগী মশিংদা য়েংবদা মালেমগী মকোক থোংবা লৈবাক অহুমগী মনুংদা চনবা ঙম্লি। ঙসি ভারতনা স্তার্তঅপ ইকোসিস্তেমগী মশিংদা মালেমগী ওইনা মকোক থোংবা লৈবাক অহুমগী মনুংদা চনবা ঙম্লি।
মরুপশিং,
ইন্দিয়ন সাইন্স কংগ্রেসকী থিম অসি হন্দক্তি মালেমদা খ্বাইদগী খন্ন-নৈনরিবা হীরম অমা ওইবা অসিদা ঐহাক্না নুংঙাইবা পোকই। মালেমগী তুংলমচৎ অসি সস্তেনেবল দিবেলপমেন্ত খক্তনা মরা চেৎশিনহনবা ঙমগনি। নখোয়না নুপীদা শক্তি পীবগা সস্তেনেবল দিবেলপমেন্তগী হীরমদা মরী লৈনহনখি। হীরম অনি অসি প্রেক্তিকেল ওইনা অমগা অমগা মরী লৈনৈ হায়না ঐহাক্না থাজৈ। ঙসি লৈবাক অসিনা সাইন্স খক্তগী খুত্থাংদা নুপীদা শক্তি পীবগী মতাংদা খনবা তৌদে। মসিগী মহুৎ ঐখোয়গী পান্দম অসি ঐখোয়না নুপীশিংবু শরুক য়াহন্দুনা অমদি সাইন্স অমসুং রিসর্চতা অনৌবা ইনোৎ হাপ্পগা লোয়ননা সাইন্সপু শক্তি পীবা অসিনি। হন্দক্তা ভারতনা জি-২০ গ্রুপ চিয়র তৌবগী থৌদাং ফংজখি। নুপীনা লুচিংবা চাউখৎ খোঙচৎ অসিনা জি-২০গী মরু ওইবা হীরমশিংগী মনুংদা মরু ওইবা লম অমসু ওই। হৌখিবা চহি নিপাল অসিদা ভারতনা গভর্নান্সতগী খুন্নাই অমসুং শেন্মীৎলোন ফাওবদা থোইদোক হেন্দোকপা অসিগুম্বা কয়া মাইপাকপা ঙমখি। মুদ্রা য়োজনাগী খুত্থাংদা অপীকপা ইন্দস্ত্রীশিং অমসুং বিজিনেসশিংদা শরুক য়াবা নত্ত্রগা স্তার্ত-অপকী লমদা লুচিংবা ওইবা ওইরবসু নুপীশিংনা ভারতকী মফম খুদিংমক্তা মখোয়গী শক্তি অদু উৎলি। এক্সত্রাম্যুরেল রিসর্চ অমসুং চাউখৎ খোঙচৎতা নুপীশিংনা শরুক য়াবা অসি হৌখিবা চহি নিপাল অসিদা শরুক অনি হেনগৎলকখি। নুপীশিংনা শরুক য়াবা হেনগৎলকপা অসিনা লৈবাক অসিদা খুন্নাই লোয়ননা সাইন্স অসি খুমাং চাউশিল্লি তাক্লি।
মরুপশিং,
বিজ্ঞানিক অমা হেক্তগী তশেংবা শীংনবা অসি মহাক্কী লৌশিংবু মালেমগী মতেং পাংবা ঙমগদবা এপ্লিকেসনশিংদা ওন্থোকপা অসিনি। বিজ্ঞানিক অমনা মাগী এক্সপরিমেন্তশিং তৌবা মতমদা মহাক্কী ৱাখলদা মসিনা মীয়ামগী পুন্সিদা কান্নবা পীগদ্রা নত্ত্রগা মহাক্না পুথোক্লিবা অদুনা মালেমগী মথৌ তাবশিং থুংহনবা ঙমগদ্রা হায়না মহাক্না মতম চুপ্পদা ৱাহং হংজৈ। সাইন্তিফিক ওইবা খোঙথাংশিং অসিনা লেবতগী গ্রাউন্দা য়ৌরকপা মতমদা, মখোয়গী কান্নবা অসি গ্লোবেলদগী গ্রাসরুত য়ৌরবা মতমদা, মখোয়না জর্নেলশিংদগী তাইবংদা শীজিন্নবা ঙম্লবা মতমদা অমসুং রিসর্চতগী ফংবা ইন্নোভেসনশিংনা তশেংবা পুন্সিদা মমি তারবা মতমদা খক্তা অচৌবা মাইপাকপশিংদা ওন্থোকপা ঙমগনি।
মরুপশিং,
সাইন্সকী খুমাং চাউশিনবগী অচৌবা মাইপাকপশিংনা এক্সপরিমেন্তশিংদগী মীয়ামদা এক্সপরিয়েন্স তৌবা ফংহনবা মতমদা মরু ওইবা পাউজেল অমা পী। মসিনা নহারোলশিংদা চাউনা ইথিল পী। মখোয়না খল্লি মদুদি সাইন্সকী খুত্থাংদা মখোয়না মালেম পুম্বদা ইথিল পীবা ঙমগনি। ইন্সতিত্যুস্নেল ফ্রেমৱার্কনা নহারোলশিংবু থৌনা হাপ্পিদুনা মখোয়গী অনীংবা অপাম্বশিংবু হেনগৎহন্নবা হোৎনবা অমসুং মখোয়নদা অনৌবা খুদোংচাবশিং পীবা মথৌ তাই। ঐহাক্না মফম অসিদা তিনবীরিবা বিজ্ঞানিকশিংদা নহা ওইরিবা তেলেন্তশিংগী পুক্নিং চীংশিনগদবা ইন্সতিত্যুস্নেল ফ্রেমৱার্ক শেম্বীনবা অমসুং মখোয়দা খুমাং চাউশিন্নবা খুদোংচাবা পীবীনবা হায়জরি। খুদম ওইনা সাইন্তিফিকেল্লী মাইন্দেদ চিলদ্রেন খন্দোক্নবা তেলেন্ত হন্ত অমসুং হেকাথোন ইভেন্তশিং শিনবা য়াই। মদু ওইরবদি অসিগুম্বা অঙাংশিং অসিবু অচুম্বা রোদমেপ অমগী খুত্থাংদা মখোঙ শোম্বীবা য়াগনি। মকোক থোংবা বিজ্ঞানিকশিংনা হীরম অসিদা মখোয়বু মতেং পাংবীবা য়াগনি। ঙসি ভারতনা শান্ন-খোৎনবদা অনৌবা পনখৈশিং য়ৌবা ঙম্লে। মসিগী মরুমদা মরু ওইবা মরম অনি লৈ। অহানবদা স্পোর্তস তেলেন্ত য়োকখৎনবা লৈবাক অসিদা ইন্সতিত্যুস্নেল ফ্রেমৱার্ক মপাঙ্গল কনখৎহনখি। অনিশুবদা শান্ন-খোৎনবদা লৈরিবা ‘গুরু-শিশ্যা’গী চৎনবী অসিগী ইথিল অদু য়োকখৎতুনা অনৌবা তেলেন্তশিং শকখঙখি অমসুং মখোঙ শোমখি অমসুং গুরুনা মাগী মহৈরোয়শিংগী মাইপাকপদা মহাক্কী মাইপাকপা উবা ফংখি। মসিগী চৎনবী অসি সাইন্সকী লমদা মাইপাক্নবা মন্ত্র ওইবা য়াগনি।
মরুপশিং,
ঙসি ঐহাক্না নখোয়গী মাংদা সমস্যা খরা পুথোকপা পাম্মি মসিনা ভারত্তা সাইন্সকী মাইকৈ লেপ্পদা মতেং পাংগনি। ঐখোয়গী সাইন্তিফিক কম্ম্যুনিতীগী মরু ওইবা ইথিল অসি লৈবাক্কী মথৌ তাবশিং থুংহন্নবা ভারত্তা সাইন্স চাউখৎহনবা অসিনা ওইগদবনি। ভারত্তা লৈরিবা সাইন্স অসি ভারতপু মরোমদোম লেপচবা ঙম্বা ওইহনগদবনি। ঐখোয়না খঙগদবদি ঙসি মালেমদা লৈরিবা মীওইবগী মীশিংগী চাদা ১৭-১৮দি ভারত্তা লৈরি। সাইন্তফিক্কী থবকশিং অসিনা ভারতকী মথৌ তাবশিং থংহনগদবনি অমসুং মসিনা মালেমগী মীওইবা খুন্নাইগী চাদা ১৭-১৮দা ইনোৎ হাপকদবনি। অমসুং মসিগী কান্নবা অসি অপুনবা মীওইবা খুন্নাইদা ফংহনদগনি। মরম অসিনা ঐখোয়না অপুনবা মীওইবা খুন্নাইগীদমক মরু ওইবা অসিগুম্বা সমস্যাশিংদা থবক তৌগদবনি। খুদম ওইনা করিগুম্বা ঐখোয়না ইনর্জীগী সমস্যা অসি য়েংলসি। ভারতকী ইনর্জীগী মথৌ তাবা অসি লেপ্পা লৈতনা হেনগৎলক্লি। অসিগুম্বা ফীভম অমদা করিগুম্বা ভারতকী সাইন্তিফিক কম্ম্যুনিতীনা ইনর্জীগী মথৌ তাবশিং অসিগা মরী লৈনবা ইন্নোভেসনশিং পুথোক্লবদি মসিনা লৈবাক অসিদা চাউনা কান্নবা পীগনি। মরু ওইনা লৈবাক অসিনা হাইদ্রোজেন ইনর্জীদা চাউনা ওইথোকপা য়াবশিংগীদমক নেস্নেল হাইদ্রোজেন মিসন্দা থবক পাইখৎলি। মসিবু মাইপাকহন্নবা লৈবাক অসিদা ইলেক্ত্রোলাইজরশিংগুম্বা তোঙান-তোঙানবা মরু ওইবা কম্পোনেন্তশিং শাজবা তঙাই ফদে। করিগুম্বা মাইকৈ অসিদা অনৌবা ওপ্সনশিংগীদমক লম লৈরবদি মাইকৈ অদুদসু রিসর্চকী থবক চত্থবা হৌবা য়াই। ঐখোয়গী বিজ্ঞানিকশিং অমসুং ইন্দস্ত্রীনা হীরম অসিদা পুন্না থবক তৌবা তাই।
মরুপশিং,
ঙসি ঐখোয়না মীওই খুন্নাইনা অনৌবা লাইনাশিংগী অকিবা মায়োক্নরিবা চহিচা অমদা হিংলি। ঈশিং ইচাও নত্ত্রগা য়ুহার হাবা অসিগুম্বা খুদোংথিবশিং লাকশিন্নবা ঐখোয়না মাংজৌননা শেম শাবা অদুগুম্না অনৌবা ভেক্সিন পুথোক্নবা ঐখোয়না রিসর্চ অমসুং দিবেলপমেন্ত প্রমোৎ তৌবা তাই। মতৌ অসুম্না ঐখোয়না ইন্তিগ্রেতেদ দিজিজ সর্ভিলেন্সকী খুত্থাংদা মতম চানা লাইনশিং মশক খঙদোক্কদবনি অমসুং মখোয়বু লাকশিন্নবা খোঙথাংশিং লৌখৎকদবনি। পান্দম অসি ফংহনবা তোঙান-তোঙানবা মন্ত্রালয়শিংনা পুন্না থবক তৌগদবনি। মরুপ ময়াম্না লাইফ হায়বদি লাইফস্তাইল ফোর এনভাইর্নমেন্তগী মতাংদা নীংথিনা খঙলমগনি। ঐখোয়গী সাইন্তিফিক কম্ম্যুনিতীনা মাইকৈ অসিদা চাউনা মতেং পাংবা ঙমগনি।
মরুপশিং,
য়ুনাইতেদ নেসন্সনা চহি অসিবু হায়বদি ২০২৩ অসি ভারতকী অপাম্বগী মতুং ইন্না ইন্তর্নেস্নেল ইয়র ওফ মিল্লেৎস হায়না লাউথোকখি। মসি ভারত মচা খুদিংমক্কীদমক্তা য়াম্না চাউথোকচনীংঙাই ওইবা ৱাফম অমনি। ভারতকী মিল্লেৎশিং অমসুং মখোয়গী শীজিন্নফম হেনগৎহন্নবা থবক তৌখি। বাইওতেক্নোলোজীগী মতেংগা লোয়ননা পোস্ত-হর্ভেস্তকী অমাংবশিং হন্থহন্নবা সাইন্তিফিক কম্ম্যুনিতীনা মতিক চাবা খোঙথাংশিং লৌখৎপা য়াগনি।
মরুপশিং,
ঙসি ৱেস্ত মেনেজমেন্ত সেক্তরদসু সাইন্তিফিক রিসর্চকী অচৌবা ওইথোকপা য়াবশিং লৈ। ম্যুনিসিপাল সোলিদ ৱেস্ত, ইলেক্ত্রোনিক ৱেস্ত, বাইও-মেদিকেল ৱেস্ত, এগ্রিকলচরেল ৱেস্ত অসিগুম্বা লমশিং অসি লেপ্পা লৈতনা পাকথোক-চাউথোকহল্লি। মসিনা মরম ওইদুনা মমাং চহিগী বজেৎতা সর্ক্যুলর ইকনোমীদা সরকার অসিনা চাউনা মীৎয়েং চংখি। ঐখোয়না মিসন সর্ক্যুলর ইকনোমী মখা তানা মপাঙ্গল কনখৎহন্নবা হোৎনবা তাই। মসিগীদমক ঐখোয়না মেতল অমসুং প্লাস্তিক স্ক্রেপ নীংথিনা শিজিন্নবা য়ানবা অসিগুম্বা ইন্নোভেসনশিংদা থবক তৌবা তাই। ঐখোয়না পোলুসন লাকশিন্নবা অমসুং স্ক্রেপ নীংথিনা শীজিন্ননবা পুন্না হোৎনবা তাই।
মরুপশিং,
ঙসি ভারতনা স্পেস সেক্তরদা অনৌবা পনখৈশিং য়ৌবসু ঙম্লক্লি। লো-কোস্ত সেতলাইৎ লোঞ্চ ভেহিকলনা মরম ওইরগা ঐখোয়গী কেপাসিতী অসি হেনগৎহনগনি অমসুং মালেম্না ঐখোয়গী সর্ভিসশিং শীজিন্ননবা মাংদা চংশিনগনি। খুদোংচাবশিং অসি প্রাইবেৎ কম্পনীশিং অমসুং স্তার্ত-অপশিংনা লৌহৌগদবনি। স্তার্ত-অপশিংনা আর এন্দ দি লেবশিং অমসুং একাদেমিক ইন্সতিত্যুসনশিংগা লোয়ননা মরী লৈনদুনা লম্বী পুথোকপা য়াগনি। মতৌ অসুম্না ক্বান্তম কম্প্যুতিং অসি অসিগুম্বা অতোপ্পা সমস্যা অমনি। ঙসি ভারতনা ক্বান্তম ফ্রন্তিয়র ওইনা মালেমদা মাগী মফম কনবা ঙম্লি। ভারতনা ক্বান্তম কম্প্যুতরশিং, ক্বান্তম কেমেস্ত্রী, ক্বান্তম কম্ম্যুনিকেসন, ক্বান্তম সেন্সরশিং, ক্বান্তম ক্রপ্তোগ্রাফী অমসুং অনৌবা মেতরিএলশিংগী মাইকৈদা খোঙজেল য়াংনা চংশিল্লি। ঐহাক্না নহা ওইরিবা রিসর্চরশিং অমসুং বিজ্ঞানিকশিংনা ক্বান্তমগী লমদা মখোয়না এক্সপর্তিস ফংনবা অমসুং লম অসিদা মাংদা চংশিনবা পাম্মি।
মরুপশিং,
মাংদা চংশিন্নবগী অপম্বা লৈরবদি সাইন্সতা মাং থাগনি হায়বা ঐখোয়না খঙই। মরম অসিনা ঐখোয়না মালেমদা করি থোক্লি হায়বা খক্তা নত্তনা মফম অমত্তদা পাইখৎত্রিবা থবক অমসুং ফ্যুচরিস্তিক আইদিয়াশিংদা মীৎয়েং থম্বা তাই। ঙসি এ.আই., এ.আর অমসুং ভি.আর.গী মতাংদা মালেমদা খন্ন-নৈনরি। ঐখোয়গী মরু ওইবশিংদা মসিগী সমস্যাশিং অসি য়াওহনবা তাই। লৈবাক অসিনা সেমিকন্দক্তর চিপশিংগী মাইকৈদা মরু ওইবা খোঙথাংশিং থাংজিল্লি। মতমগা ইরোইননা সেমিকন্দক্তর চিপশিংদা অনৌবা ইন্নোভেসনশিংসু পুথোকপা মথৌ তাই। হৌজিক্তগী হৌনা লৈবাক্কী সেমিকন্দক্তর ফ্যুচর রেদী ওইহন্নবা মাইকৈদা চংশিন্নবা খনবা য়ারোইদ্রা? লৈবাক অসিনা লমশিং অসিদা থৌরাং পাইখৎপা হৌরবা মতমদা খক্তা ঐখোয়না ইন্দস্ত্রী ৪.০দা মাংজিল থাবা ঙমগনি।
মরুপশিং,
ইন্দিয়ন সাইন্স কংগ্রেসকী সেসন অসিদা তোঙান-তোঙানবা কনস্ত্রক্তিব পোইন্তশিংদা তুংলমচৎকীদমক ময়েক শেংবা রোদমেপ অমা শেমগনি হায়না ঐহাক্না থাজৈ। ঐখোয়না ভারতপু ‘অমৃত কাল’দা মোদর্ন সাইন্সকী খ্বাইদগী এদভান্স ওইবা লেবোরেতোরী ওইহনবা তাই। ৱাখল্লোন অসিগা লোয়ননা ঐহাক্না পুম্নমকপু হন্না-হন্না থাগৎচরি অমসুং সম্মিৎ অসিগীদমক ঐহাক্না য়াইফ মঙ্গোল পীজরি। খুরুমজরি!
