জয় শ্বামীনারায়ন!
ঙসি ঐখোয় পুম্নমক য়াম্না অখন্নবা থৌরম অমা উবা ফংলে। ভগবন শ্বামীনারায়নগী শিক্ষাপত্রী চহি ২০০ মপুংফারকপগী অখন্নবা থৌরম শরুক য়াবা অসি ঐখোয় পুম্নমক্কী লাইবক ফবা তাঞ্জা অমনি। শেংলবা মতম অসিদা ঐনা সাধুশিংদা কোক নোঞ্জরি। চহি ২০০ মপুংফারকপগী কুহ্মৈ অসিদা ভগবন শ্বামীনারায়নগী ভক্ত করোর কয়াদা ঐনা য়াইফ পাউজেল পীজরি।
মরুপশিং,
ভারতনা মতম পুম্নমক্ত জ্ঞানযোগগী লম্বীদা কৎথোক্লি। চহি লিশিং কয়া শুরবা বেদাশিংনা ঙসি ফাওবা মখা তানা ইথিল পীরি। মখোয়গী মতমগী দরকার ওইবশিংগী মতুংইন্না, সাধুশিং অমসুং মুনিশিংনা, বেদাদগী মঙাল লৌদুনা থবক কয়া পায়খৎখি। বেদাশিংদগী উপনিষদশিং লাকপনি, উপানিষদশিংদগী পুরানাশিং লাকপনি অমসুং শ্রুতি, ষ্মৃতি, কথাবচন অমসুং ঈশৈ শকপগী খুৎথাংদা, চৎনবী অসি মপাঙ্গল কন্না লৈরি।
মরুপশিং,
তোঙান তোঙানবা যুগশিংদা, মতমগী দরকার ওইবা মতুংইন্না, শক্নাইরবা সাধুশিং, মুনিশিং অমসুং পন্দিৎশিংনা চৎনবী অসিদা অনৌবা পন্দুবশিং হাপচিনখি। ভগবন শ্বামীনারায়ন্না মীয়াম লাইরিক তম্নবা অমসুং মীয়ামগী থবক তৌনবা হোৎনখিবা মহাক্কী পুন্সিগী তাঙ্ককশিং মীওই খুদিংমক্না খঙই। থবক অসি অচম্বা ৱাহৈশিংদা ফোঙদোক্লে অমসুং শিক্ষাপত্রীগী খুৎথাংদা, ভগবন শ্বামীনারায়ন্না পুন্সিগীদমক মমল নাইদ্রবা পাউতাক ঐখোয়দা পীখি।
মরুপশিং,
ঙসি, চহি ২০০ মপুংফারকপগী অখন্নবা থৌরম অসিদা শিক্ষাপত্রীদগী করি অনৌবা পারাশিং তমখিবগে অমসুং কমদৌনা মসিগী অচুম্বা ফিদমশিং নোংমগী পুন্সিদা য়াওবগে হায়বগী চাংয়েং তৌনবা খুদোংচাবা অমা পীরে।
মরুপশিং,
ভগবন শ্বামীনারায়নগী পুন্সি অসি মীয়ামগী থবক অমসুং অধ্যতিক্কী থবক্না য়োম্লগা শাবনি। ঙসি ফাওবা মহাক্কী ভক্তশিংনা খুন্নাইদা, লৈবাক্ত অমসুং মীওইবা খুন্নাইদা কেম্পেন কয়া পাংথোক্লি। লাইরিক-লাইশু, হকশেল, লৌমীশিংগী য়াইফনবা অমসুং ঈশিংগা মরী লৈনবা থবকশিং অসি তশেংনা থাগৎনিঙাইনি। সাধুশিংনা মখা তানা খুন্নাইগী থবক পায়খৎপা উবা অসি তশেংনা পুক্নিং থৌগৎলি।
মরুপশিং,
ঙসি লৈবাক অসিদা শ্বাদেসি অমসুং শ্বাচ্ছতাগুম্বা মীয়ামগী খোঙজংশিংদা খুমাঙচাউশিল্লি। “ভোকেল ফোর লোকেল” গী লাইৱা য়ুমথোঙ খুদিংদা য়ৌরে। অসিগুম্বা থবকশিংগা অসিগুম্বা খোঙজংশিংগা শম্নবা মতমদা, শিক্ষাপত্রীগী চহি ২০০ মপুংফারকপগী থৌরম হেন্না কাউবা ঙম্লোই। লৈবাক অসিনা অরিবা খুৎই লাইরিকশিং ঙাক-শেন্নবা জ্ঞান ভারতম মিসন হৌদোক্লে অমসুং থবক অসিদা মঙাল ফংলবা লুপশিংনা মতেং পাংগদবনি। ভারতকী অরিবা লৌশিং অমসুং মসিগী শক্তম ঙাক-শেনগদবনি অমসুং অসিগুম্বা লুপশিংগী মতেংগা লোয়ননা, জ্ঞান ভারতম মিসনগী মাইপাকপা অনৌবা থাকশিংদা য়ৌবা ঙমগনি।
মরুপশিং,
হৌজিক লৈবাক অসিনা সোমনাথ শ্বাভিমান পর্বগী অচৌবা নাৎকী কুহ্মৈ পাংথোক্লি। অহানবা ওইনা সোমনাথ লাইশঙ থুগায়খিবদগী হৌরগা হৌজিক ফাওবদা, কুহ্মৈ অসিগী খুৎথাংদা চহি লিশিং অমগী খোঙচৎ লৈবাক অসিনা থৌরম পাংথোক্লি। মীয়াম্না থৌরম অসি শরুক য়াগদবনি অমসুং মসিগী পান্দমশিং মীয়ামদা য়ৌহনগদবনি। ভক্তশিংগী থবকশিং অসিগী খুৎথাংদা, ভগবন শ্বামীনারায়নগী থৌজালশিং ফংনবা ভারতকী চাউখৎপগী খোঙচৎ মখা চৎথগনি হায়না ঐনা থাজৈ। অমুক হন্না সাধুশিং, হরি ভক্তশিং অমসুং লাই খুরুম্বা লাকপা মীওইশিংদা ঐগী য়াইফ পাউজেল পীজরি।
জয় শ্বামীনারায়ন!
কয়ারক হন্না থাগৎপা ফোঙদোকচরি।
