জয় সোমনাথ!
জয় সোমনাথ!
গুজরাতকী চীফ মিনিষ্টর শ্রী ভুপেন্দ্র ভাই পতেল, দিপুতি চীফ মিনিষ্টর হর্স সঙ্গভি জি, গুজরাত সরকারগী মিনিষ্টরশিং, জিতু ভাই ভাঘনি, অর্জুন ভাই মোধাৱাদিয়া, দোক্তর প্রাদয়ুমান বাজা, কাউসি ভাই বেকারিয়া, সংসদকী মেম্বর রাজেস ভাই, অতোপ্পা শক্নাইরবশিং, ইবুংঙোশিং অমসুং ইবেম্মাশিং। ঙসি লৈবাক অসিগী মফম শীনবা থুংবগী মীওই লাখ কয়া পুল্লে, মখোয়দা ঐনা হায়জরি, জয় সোমনাথ!
মরুপশিং,
তাঞ্জা অসি অঙকপনি, ফিবম অসি অঙকপনি, কুহ্মৈ অসি অঙকপনি। নাকল অমদা ভগবন মহাদেব মশামক লৈরে, নাকল অমদা, সমুদ্রগী পাক্লবা ইথকশিং লৈরি, নুমিৎকী মঙালশিং লৈরি, মন্ত্রীশিংগী খোন্থাংশিংনা নিল্লে, মসি লাইনিংগী ইতিনফমনি অমসুং মসি ঈশ্বরগী ওইবা ফিবম অমনি, ভগবন সোমনাথকী ভক্তশিং শরুক য়াবা অসিনা থৌরম অসি অশেংবা অমসুং ফজবা ওইহল্লে। সোমনাথ তেম্পল বোর্দকী চিয়ার্মেন ওইনা সোমনাথ শ্বাভিমান পর্বগী থবক তৌনবগী খুদোংচাবা ফংবা অসি ঐগী ওইনা লাইবক ফবনি হায়না ঐনা খল্লি। মনিংদা অতোপ্পা খোঞ্জেল খর তারি, চানবীদুনা মসি লেপ্পীয়ু। পুং ৭২ লেপ্তনা ওমকার শোন্দুনা লাক্লি অমসুং দ্রোন লিশিং অমগা লোয়ননা বেদিক গুরুকুলশিংগী মহৈরোয় লিশিং অমা শরুক য়াবা ঙরাং নুমিদাংৱাইরমদা ঐনা উখ্রে, চহি লিশিং অমগী সোমনাথকী পুৱারি উৎখি অমসুং ঙসিনা শগোল ১০৮ গা লোয়ননা লাইশঙ ফাওবা ফরবা খোঙচৎ অমা পাংথোক্লে, অঙকপা লাইৱাশিং অমসুং লাইশোনশিং অসিনা মীওই খুদিংমক অঙকপা ফাওহল্লে। পুক্নিংদা ফাওরিবা অসি ৱাহৈশিংনা ফোঙদোকপা ঙম্লোই; মতম খক্তনা মসি খঙগনি। থৌরম অসিদা চাউথোকচবা, ইকায়খুম্নবা, মাইপাকপা অমসুং চিংলেম্বগী লৌশিং য়াওরি। মসি অধ্যতিক্কী থবকনি। পুম্নমক্কী মথক্ত ভগবন মহাদেবকী থৌজালশিংনি। ঐগা লোয়ননা হায়মিন্নসি, নমাহ পর্বতি পাতায়ে… হর হর মহাদেব!
মরুপশিং,
ঙসি ঐনা অদোমদা ৱা ঙাংবদা, ঐগী ৱাখলদা ৱাহং হংখি, অদোম্না ফম্লিবা মফম অসিদা চহি লিশিং অমগী মমাঙদা করি ফিবম ওইরগনি হায়না? অদোমগী ইপা-ইপুশিং, ঐখোয়গী ইপা-ইপুশিং, মখোয়গী পুন্সিশিং খুদোংথিবা মায়োক্নখি। মখোয়গী লাইনিং, মখোয়গী থাজবা, মখোয়গী মহাদেব, মখোয়না খুদিংমক কৎথোকখি। চহি লিশিং অমগী মমাংদা, ফত্তবা মীওইশিং অদুনা মখোয়না ঐখোয় মাইথিবা পীগনি হায়না মখোয়না খনখি। অদুবু ঙসি, চহি লিশিং অমগী মতুংদা, সোমনাথ মহাদেব লাইশঙগী মথক্ত ফিরাল পাইদুনা তাইবংপাল শীনবা থুংনা ভারতকী থৌনা অমসুং মপাঙ্গল উৎলে। প্রভাস পাতন লাইশঙগী লৈবাক-লৈহাওদা থৌনা ফবগী খুদম উবা ফংলি। সোমনাথকী মওং অসিগীদমক, মশিং থিঙমদ্রবা সিব ভক্তশিং, নাৎ অসি ইরাৎলিবশিং অমসুং নাৎকী ফিরাল পায়খিবা মীওই কয়াগী থৱায়শিং কৎখি। ঙসি, সোমনাথ শ্বাভিমান পর্বদা, সোমনাথ ঙাক-শেনখিবা, লাইশঙ অমুক হন্না শেমগৎপনা মখোয়গী পুন্সিগী পান্দম ওইখিবা অমসুং লৈজবা খুদিংমক ভগবন মহাদেবদা কৎথোকখিবা থৌনা ফরবা নুপাশিং অমসুং নুপীশিংগী মফমদা ঐনা ইকায়খুম্নবা উৎচরি।
মরুপশিং,
প্রভাস পাতন লমদম অসি ভগবন সিবগী লৈফম ওইবা খক নত্তনা, মসি ভগবন কৃষ্ণগসু মরী লৈনৈ। মহাভারতকী মতমদা, লাইফম অসিদা পন্দবশিংসু লৈখি। মরম অদুনা, থৌরম অসি ভারতকী মশিং থিঙমদ্রবা শক্তমশিংদা ইকায়খুম্নবা উৎনবা খুদোংচাবা অমনি। ঙসি সোমনাথ লাইশঙগী শ্বাভিমান যাত্রাগী চহি ১০০০ শুবা কুমওন থৌরমগা মপা চানবা অসিসু য়াম্না হরাওই, থৌরম অসিদা লাইশঙ অসি ১৯৫১দা অমুক হন্না শেমজিনখিবগী চহি ৭৫ মপুংফারকপগী থৌরমসু থোক্লে। সোমনাথ শ্বাভিমান পর্ব লাকপদা মালেম শীনবা থুংনা লৈরিবা ভক্ত লাখ কয়াদা ঐনা ঐগী য়াইফ পাউজেল পীজরি।
মরুপশিং,
সোমনাথ শ্বাভিমান পর্ব অসি চহি ১০০০ গী মমাঙদা থোকখিবা মাংহন-তাকহনবা অদুগী থৌরম অমা খক নত্তনা; মসি চহি লিশিং অমগী খোঙচৎকী থৌরম অমসুনি। মসি ঐখোয়গী ভারত লৈবগী অমসুং চাউথোকচবগী থৌরম অমসুনি। মরমদি, খোঙথাং খুদিং, থবক খুদিংমক্ত, ঐখোয়না সোমনাথ অমসুং ভারতকী মরক্ত অঙকপা মান্নবা কয়া উবা ফংলি। সোমনাথ মাঙহন্নবা অমুক খক নত্তনা কয়ারক হোৎনখি, ভারত মাঙহন্নবগীদমক মপান লৈবাক্কী মীওইশিংনা চহি চা কয়া হোৎনখি। অদুবু সোমনাথ অমসুং ভারত অনিমক মাঙহনবা ঙমখিদে। মরমদি, ভারত অমসুং ভারতকী লাইনিংগী মরুওইবা মফমশিং অমতা ওইনা পুনখি।
মরুপশিং,
পুৱারি অদু খন্দুনা য়েংসি: চহি লিশিং অমগী মমাঙদা, ১০২৬ দা, অহানবা ওইনা ঘজনিনা সোমনাথ লাইশঙ থুগায়খি, মসি মহাক্না মাঙহল্লে হায়না থাজখি। অদুবু, চহি খরগী মনুংদা, সোমনাথ অমুক হন্না শেমগৎখি। ১২শুবা চহিচাদা, নিংথৌ কুমারপালানা লাইশঙ অসি অমুক হন্না ফজনা শেমগৎখি। অদুবু, ১৩শুবা চহিচা লোইরকপদা, অলাউদিন খিলজিনা সোমনাথ অমুক হন্না মাঙহন্নবা হোৎনখি। জালোরগী রাৱালনা থৌনা ফনা খিলজিগী লান্মীশিং থেংনখি। মসিগী তুংদা, ১৪শুবা চহিগী অঙনবা শরুক্ত মুজফার খান্না অমুক হন্না সোমনাথদা লান্দারকখি অমসুং মাইপাকখিদে। ১৫শুবা চহিচাদা, মহাক্কী মশুনুপা, সুলতান মহমুদ বেগাদানা সোমনাথ থুগায়খি অমসুং মসি মোস্ক অমা ওন্থোক্নবা হোৎনখি। অদুবু মহাদেবকী ভক্তশিংনা হোৎনবদগী লাইশঙ অসি অমুক শেমগৎখি। ১৭শুবা চহিচা অমসুং ১৮শুবা চহিচাদা ঔরাঙ্গজেবনা পানখি। মহাক্না সোমনাথ লাইশঙ মাঙহনখি অমসুং মসি মোস্ক অমা ওন্থোক্নবা হোৎনখি। মদুগী তুংদা, অনৌবা লাইশঙ অমা শেমগৎতুনা অহিলয়াবাই হোলকারনা সোমনাথ অমুক হন্না শেমজিনখি। অতোপ্পা ৱাহৈশিংদা, সোমনাথকী পুৱারি অসি মাঙহনবা অমসুং মাইথিবা খক নত্তে। মসি মাইপাকপা অমসুং অমুক হেন্না শেমজিনবগী পুৱারি অমনি। মসি ঐখোয়গী ইপা-ইপুশিংগী থৌনা ফবা, মখোয়গী কৎথোকপগী পুৱারি অমনি। মপান্দগী লান্দারকখি, ধর্মদা নৌনা লান্দারকখি, অদুবু যুগ খুদিংদা সোমনাথ অমুক হন্না শেমগৎখি। মসিগী লাল অসি চহিচা কয়া চৎথখি, অসিগুম্বা মতম শাংনা লান্থেংনখিবা, অসিগুম্বা খাংবা কনবা, অসিগুম্বা থৌনা অমসুং পাঙ্গল অসিনা ঐখোয়গী চৎনবীদা শেম-শাবা, অমুক হন্না শেমগৎপা, লাইনিং অমসুং থাজবা লৈহনখি, অসিগুম্বা খুদম অমা মালেমগী পুৱারিদা থিবদা ৱাগনি। ঐখোয়গী ইপা-ইপুশিংগী থৌনা অদু ঐখোয়না নিংশিংগদরা নত্ত্রগা নিংশিংলোইদরা? ঐখোয়গী ইপা-ইপুশিংগী থৌনা ফবগী থবকশিং অদুদগী ঐখোয় ইথিল ফংগদরা নত্ত্রগা ফংলোইদরা? মহাক্কী মপা-মপুশিং মাঙহনখিবা অদু কাউথোকপা ঙম্বা মচাশিং লৈগরা?
মরুপশিং,
ঘজনিদগী হৌরগা ঔরাঙ্গজেব ফাওবা, মশিং থিঙমদ্রবা মপান লৈবাক্কী মীওইশিংনা সোমনাথ থুগায়খি। মখোয়গী থাংশিংনা সোমনাথ মাইথিবা পীগনি হায়না মখোয়না খনখি। সোমনাথ হায়রিবা মমিং অসিদা য়াওরবা সোম হায়বসি শিবা নাইদ্রবা শিদা হিদাক্নি হায়বা অঙাওবশিং অদুনা খঙখিদে। হু থক্লবসু শিবা নাইদবগী ৱাখল্লোন অমা মসিদা য়াওরি। মসিদা শেম্বীবা মপু অমসুং “প্রচান্দ তান্দাবাহ সিবা”দা শক্তিগী হৌরকফম ওইরিবা সদাসিব মহাদেবগী শক্তি লৈরি।
মরুপশিং,
সোমনাথতা লৈরিবা মহাদেব অসি অশিবা মাইথিবা পীবা ঙম্বা মৃত্যুঞ্জয় হায়নসু খঙনৈ। য়তো জয়াতে পালয়াতে য়েনা ভিসবাম, তামিসাম ভাজে লিয়াতে যাত্রা বিসবাম! মসিনা হায়রি মদুদি তাইবংপাল অসি মহাক্তগী পোকখিবনি, মহাক্না হিংহনবনি অমসুং মহাক্ত তিনখিবনি। ঐখোয়না থাজৈ:
ভমেকো জগৎ ব্যপকো বিশ্ব রুপ!
মসিনা হায়রি, মালেম শীনবা থুংনা সিব লৈ।
মরম অদুনা পোৎশক খুদিংমক্ত, নুঙ খুদিংমক্ত ঐখোয়না সঙ্কর উরিবনি। মতম অদুনা কমদৌনা কনাগুম্বা অমনা মশিং থিঙমদ্রবা সঙ্করগী মওংশিং মাঙহনবা ঙমগনি? থৱায় পানবা ওইনা সিব উবা ঐখোয়নি। ঐখোয়গী থাজবা অসি কননা মাঙহনবা ঙমগনি?
মরুপশিং,
মতমগী খোঙচত্ত, সোমনাথ মাঙহন্নবা ৱাখল্লোন অমগা লোয়ননা লাকখিবা লাইনিংদা হকচিনবা মীওইশিং ঙসিদি পুৱারিগী চেনা খরদা য়াওরে। অদুবু, সোমনাথ লাইশঙ হৌজিক পাক্লবা সমুদ্রগী খোবালদা ৱাংনা লেপ্লি, মতোন্দা ধর্মগী ফিরাল পাইরি। সোমনাথকী মতোন্না হায়রি: চন্দ্রসেখারম অশ্রায়ে মমা কিম করিসয়াতি ভাই য়ামহ!- “ঐ চন্দ্রসেখর সিব মনুংদা লৈরি; মতম ফাওবনা ঐঙোন্দা করি অমতা তৌবা ঙম্লোই”
মরুপশিং,
সোমনাথ শ্বাভিমান পর্ব অসি পুৱারিগী মাইপাকপা হরাওবা ফোঙদোকপা খক নত্তনা, মসি তুংগীদমক লোম্বা নাইদ্রবা খোঙচৎ অমগী পাম্বৈ অমসুনি। ঐখোয়গী শক্তম অমসুং হিংবা মপাঙ্গল কনখৎনবা ঐখোয়না থৌরম অসি শীজিন্নগদবনি। অদোম য়েংউ, করিগুম্বা লৈবাক অমনা চহি চা খরগী হেরিতেচ অমা লৈরবদি, মসি মখোয়গী শক্তমনি হায়না হেরিতেচ অদু মালেমদা মশক তাক্লি। অদুবু ভারতকী ওইনা চহি লিশিং কয়াগী সোমনাথগুম্বা মফমশিং লৈরি। হায়রিবা মফমশিং অসি ঐখোয়গী থৌনা, খাংবা কনবা অমসুং চৎনবীগী খুদমশিংনি। লাইবক থিবদি, নিংতম্লবা মতুংদা, মীনাই ওইবগী ৱাখল চেনবা মীওইশিংনা মখোয় মশামক হেরিতেচ অসিদগী লাপ্না লৈখি। মসিগী পুৱারি অসি মাঙহন্নবা কয়ারক হোৎনখি। সোমনাথ ঙাক-শেন্নবা কমদৌনা লৈবাক অসিনা কৎথোকখিবগে হায়বা ঐখোয় খঙলে। রৱাল কনহাদদেবগুম্বা নিংথৌগী থবকশিং, বীর হামিরজি গোহিলগী থৌনা, ভেগদা ভিলগী থৌনা- অথৌবা কয়াগা সোমনাথ লাইশঙগী পুৱারিগা শম্নরি। লাইবক থিবদি, মখোয় কৈদৌঙৈদা ইকায়খুম্নবা উৎখিদে। মদুগী মহুত্ত, পুৱাইরি ইবা অমসুং রাজনিতিৱালা খরনা লান্দারকখিবগী পুৱারি অদু কুপশিন্নবা হোৎনখি। লাইনিংগী অঙাও-অফৈগী থবকশিং অদু ইচম চম্বা য়ৈখায়-থিনগাইবা ওইনা উনবা লাইরিকশিং ইখি। অদুবু সোমনাথ অমুক খক লান্দারকখিবা নত্তে- মসি হঞ্জিন-হঞ্জিন লান্দারকখি। করিগুম্বা লান্দারকপা অদু লন-থুম হুরান্নবা খক ওইরবদি, চহি লিশিং অমগী মমাংদা অহানবা ওইনা লান্দারক্লবা মতুংদা মখোয় লেপখিগনি। অদুবু মদু ওইখিদে। সোমনাথকী শেংলবা মীতম মাঙহনখি, কয়ারক হন্না লাইশঙ থুগায়খি। লন-থুম হুরান্নবগীদমক সোমনাথ থুগায়খিবনি হায়না ঐখোয়না লাইরিক্ত তমখি। নমথবা, নৈহৎপীবা অমসুং অকিবগী তমথিরবা পুৱারি অদু ঐখোয়দগী লোৎশিনখি।
মরুপশিং,
মখোয়গী ধর্মদা শেংনা থাজবা মীওই অমতনা অসিগুম্বা অঙাও-অফৈগী থবকশিং শৌগৎলোই। অদুবু কাংলুপ অমা য়ানবা চৎনবা মীওইশিংনা ৱাখল্লোন অসিদা চঙজখি। ভারতনা নিংতম্বা ফংলবা মতুংদা, সোমনাথ অমুক হন্না শেমগৎনবা সরদার পতেলনা ৱাশকপা মতমদা, মহাক থিংনবা কয়ারক হোৎনখি। ১৯৫১ দা, রাষ্ট্রপতি দোক্তর রাজেন্দ্র প্রসাদ মফম অসিদা লাকপা ফাওবদা অথিংবশিং লাকখি। মতম অদুদা, সৌরাষ্ট্রাগী মমিং লৈরিবা নিংথৌ, ঐখোয়গী জাম সাহেব মহারাজ দিগবিজয় সিংহ জি চোঙথোরকখি। লম লৌশিনবগী হৌরগা সেকুরিতিগী থবকশিং ফাওবা, মহাক্না লৈবাক অসিগী চাউথোকচবা অসি থবক অতৈগী মমাঙদা থমখি। মতম অদুদা, জাম সাহেবনা সোমনাথ লাইশঙগীদমক লুপা লাখ ১ কৎখি অমসুং ত্রষ্টকী অহানবা প্রসিদেন্ত ওইনা অচৌবা থৌদাং লৌখি।
মরুপশিং,
লাইবক থিবদি, ঙসি ফাওবা, সোমনাথ অমুক হন্না শেমগৎপদা অথিংবা ফোর্সশিং ঐখোয়গী লৈবাক্ত লৈরি। ঙসিদি, থাংশাংশিংগী মহুত্ত, অতোপ্পা তমথিরবা মওংশিংদা ভারতকী মায়োক্ত লৌতুনবগী থবকশিং চৎথরি। মরম অদুনা, ঐখোয় মীকুপ-নাহুম শিংগদবনি, ঐখোয়না ঐখোয় হেন্না মপাঙ্গল কনহনগদবনি। ঐখোয় অমতা ওইগদবনি, ঐখোয় পুন্না লেপমিন্নগদবনি অমসুং ঐখোয় তোখায় তানবা হোৎনরকপা ফোর্স খুদিংমক মাইথিবা পীগদবনি।
মরুপশিং,
ঐখোয়না ঐখোয়গী ধর্মগা শম্নরবা, ঐখোয়গী হৌরফমগা শম্নরবা, ঐখোয়না ঐখোয়গী চৎনবী চাউথোকচনা ঙাক-শেল্লবা, মতম অদুদা ঐখোয়গী সভ্যতাগী হৌরকফমশিং হেন্না মপাঙ্গল কনগনি। মরম অদুনা চহি লিশিংগী খোঙচৎ অসিনা মথং চহি লিশিং কয়াগী শেম-শানবা ঐখোয়দা ইথিল পীরিবনি।
মরুপশিং,
রাম মন্দির শঙ্গাবা থৌরমদা, ঐনা ভারতকী মমাঙদা মথং চহি লিশিং কয়াগী অচৌবা মঙলান অমা থমখি। ঙসি, মীওই লাখ কয়াদা ভারতকী নাৎ অমসুং চৎনবী অমুক হিঙ্গৎলকপগী অনৌবা থাজবা অমা লৈরে। ঙসি ভারতমচা খুদিংমক্না বিকসিত ভারত অমগী থাজবা লৈরে। ঙসি, ভারতমচা করোর ১৪০ না তুংগী পান্দমশিংগীদমক ৱারেপ লৌরে। ভারতনা মসিগী মাইপাকপশিং অনৌবা থাকশিংদা পুখৎকনি। লায়রবা কোক্নবা ঐখোয়না শোক্নরিবা লাল ঐখোয়না মাইপাক্কনি। ঐখোয়না চাউখৎপগী অনৌবা থাকশিং য়ৌবা ঙমগনি। অহানবদা, মালেমগী অহুমশুবা খ্বাইদগী চাউবা ইকোনোমি ওইনবগী পান্দমনি, অমসুং লম্বী অসি হৌজিক থৌরাং তৌরে। সোমনাথ লাইশঙগী শক্তিনা হায়রিবা ৱারেপশিং অসিদা থৌজাল পীগনি।
মরুপশিং,
হেরিতেচগী চাউখৎপা ফাওবগী ইথিলগা লোয়ননা ঙসি ভারত মাঙলোমদা চঙশিল্লি। সোমনাথতা, চাউখৎপা অমসুং হেরিতেচ অনিমক পুন্না থবক ওইনা পাংথোক্লে। অমরোমদা, সোমনাথ লাইশঙ পাকথোক-চাউথোকপা, সোমনাথ সংস্কৃত য়ুনিভর্সিতি লিংখৎপা, মধবপুর মেলগী ফজবসিং অসিনা ঐখোয়না হেরিতেচ ফগৎহল্লে। গিরগী নোংশাশিং ঙাক-শেনবা অসিনা মফম অসিগী মহৌশাগী ফজবশিং হেনগৎহল্লে। প্রভাস পাতান্দা চাউখৎপগী অনৌবা থবকশিং পায়খৎলে। কেসোদ এয়রপোর্ত ফগৎহনবা অসিনা লৈবাক শীনবা থুংবা অমসুং মপান লৈবাকশিংদগী ভক্তশিং সোমনাথতা হকথেংননা লাকপা য়ারগনি। অহমেদবাদ-বেরাবাল বন্দে ভারত ত্রেন্না লাই খুরুম্বা লাকপা অমসুং লমকোয়বা লাকপা মীওইশিংগী চৎথোক-চৎশিনগী মতম হন্থহল্লগনি। লমদম অসিগী পিলগ্রিমেজ সর্কুইত শেমগৎলি। ঙসি ভারতনা ধর্ম নিংশিংবা খক নত্তনা, ইনফ্রাষ্ট্রকচর, লম্বী-থোঙ অমসুং তেক্নোলোজিগী খুৎথাংদা তুংগীদমক মসি ফগৎহল্লে।
মরুপশিং,
ঐখোয়গী সভ্যতগী পাউজেলদি অতোপ্পশিং মাইথিবা পীবা নত্তে, পুন্সি খল চানা থম্বনি। ঐখোয়গী চৎনবীদা, লাইনিং লম্বী অসি ফত্তবা থবক পাংথোকপা নত্তে। শেমগৎ-শাগৎপগী লম্বী অসি য়াম্না শাংই, অদুবু মসি লেংদবনি, লোম্বা নাইদে হায়বা সোমনাথনা ঐখোয়দা তম্বীরে। থাঙ অমগী মতোন্না কৈদৌঙৈদা থম্মোয়শিং জয় তৌবা ঙম্লোই। অতোপ্পশিং মাঙহল্লগা চাউখৎনবা হোৎনবা সভ্যতশিং মখোয় মশামক মতমগী ইরোন্নুংদা লুপখি। মরম অদুনা অতোপ্পশিং মাইথিবা পীরগা কমদৌনা মালেম অসি লৌশিনগনি হায়না ভারতনা তম্বীদ্রিবনি, কমদৌনা থম্মোয়শিং জয় তৌগনি হায়না তম্বীরিবনি। মসিগী ৱাখল্লোন অসি ঙসিগী মালেম্না দরকার ওইরে। চহি লিশিং কয়াগী সোমনাথগী ৱারিনা মীওইবা খুন্নাইদা মসিগী পারা অসি তম্বীরে।
চাউখৎপগী মাইকৈদা চঙশিন্নবা, পুন্না চৎমিন্ননবা, ঐখোয়গী হৌখ্রবা পুৱারি অমসুং ঐখোয়গী চৎনবীগা শম্ননবা ঐখোয় ৱাশক লৌরসি। ঐখোয়গী অচুম্বা ৱাখল্লোন ঙাক-শেনবগা লোয়ননা ঐখোয় অনৌবা মতমগী থবকশিং পায়খৎলসি। সোমনাথ শ্বাভিমান পর্বগুম্বা কুহ্মৈশিংদগী ঐখোয় ইথিল লৌরসি অমসুং চাউখৎপগী লম্বীদা য়াংনা চঙশিল্লসি। ঐখোয় খুদোংচাদবা খুদিংমক কোকহল্লসি অমসুং ঐখোয়গী পান্দমশিং য়ৌরসি। ঙসি থৌরম অসি হৌদোকপগা লোয়ননা, চহি লিশিং অমগী খোঙচৎ অসি ঐখোয়না লৈবাক শীনবা থুংনা পাংথোক্কদবনি, মালেমদা ঐখোয়গী হেরিতেচ মশক তাক্কদবনি, চহি ৭৫ গী অনৌবা মাইপাকপা অসি হরাওবা ফোঙদোক্কদবনি অমসুং মে ২০২৭ ফাওবা থৌরম অসি মখা তানা পাংথোক্কদবনি। ঐখোয়না মীওই খুদিংমক মিকপ থোকহল্লসি অমসুং লৈবাক অসিগী মঙলানশিং মঙফাওনবা ঙম্নবা মিকপ থোক্লবা লৈবাক অমা মাংলোমদা চঙশিল্লসি। মসিগী পাউজেল অসিগা লোয়ননা, ঐনা অমুক হন্না মীয়াম থাগৎপা ফোঙদোকচরি।
হর হর মহাদেব।
জয় সোমনাথ!
জয় সোমনাথ!
জয় সোমনাথ!
