ঙসি মার্চ ১২ অসি য়াম্না পুৱারি ওইরবা নুমিৎ অমনি। ১৯৩০গী মার্চ ১২দা মহাত্মা গান্ধিনা সবরমতি আশ্রমদগী দান্দি য়াত্রা হৌদোকখি। মসিনা ভারতকি নীংতম্বগী খোঙজংদা অহোঙবা অমা ওইখি মরমদি খোঙচৎ অসিনা লৈবাক অসিগী কাচিন-কোয়া খুদিংমকপু পান্দম অমখক্তদা শম্নহনখি: ভারতকি নীংতম্বা। ঙসিদি মসিগী পুৱারি ওইরবা খোঙচৎ অসিগী চাওরাক্না চহি ১০০ শুরবা মতুংদা ঐখোয় ভারত মচাশিংনা অতোপ্পা খোঙচৎ অমদা চৎখ্রে। মসিগী খোঙচৎ অসি চাওখৎলবা ভারত (বিকসিত ভারত)কী খোঙচৎনি। ঐখোয়গী পান্দম অমখক, ঐখোয়গী পন্থুংফম অমখক - চাওখৎলবা ভারত। অদুগা পান্দম অসি ফংবদা অসিগুম্বা সমিৎশিং অসিদা থোকপা মপান অমসুং মখোয়দগী শুংদোরকপা খোয়থুম্লবা মহি অসিনা অচৌবা থৌদাং লৌরি। মথংগী সমিত্তা ঐহাকপু কৌবিবগীদমক ঐহাক্না অদোম পুম্নমকপু থাগৎপা ফোঙদোকচরি। লৈবাক অমসুং মালেমগী মরুপ কয়া মফম অসিদা লাক্লে; খরদি অরিবা খঙনরবা মীওইশিংসুনি। ঐহাক্না ময়াম পুম্নমকপু খুরুমজরি।
মরুপশিং,
২১সুবা চহিচাগী মতম অসি "না ভুতো না ভবিস্যতি" (মমাঙদা থোকখিবা নত্তে, তুংদা থোক্লরোয়)গুম্বনি। মায়কৈ অমরোমদা লানগী অকিবা পোকহনবা, শপ্লাই চেনশিং অমুক হন্না মাংহন তাকহনবা, অমসুং য়ুনাইতেদ নেসন্সকুম্বা মালেমগী ইন্সতিত্যুসনশিংগী মরি লৈনবা ৱাফমশিংদা ৱাহং কয়া লাক্লি। অসিগুম্বা মতম অসিদা ঐখোয়গী ভারত অসি মাংলোমদা চঙশিল্লি, অসিগুম্বা খুদোংচাদবা ফিভমশিং অসিদা ফাওবা। ঙসিদি পুৱারিগী মরুওইবা তাঙ্কক অমদা খ্বাইদগী মমিং চৎপা লৈবাক অসি ভারতনি। হৌজিক ওইরিবা ক্রাইসিস কয়াগী মরকতা, মালেমদা লৈরিবা লুরবা লুচিংবা খুদিংমক অমসুং লৌশিং লৈবা মীওই খুদিংমক্না ভারতকি মতাংদা অচৌবা এক্সপেক্তেসন থম্লি। হন্দক্কী মতম অসিদা ফিনলেন্দগী রাস্ত্রপতি অলেকজেন্দর স্তুব্ব ভারত্তা লাকখি। মহাক্না হায়খি মদুদি গ্লোবেল সাওথনা হৌজিক মালেমগী মায়কৈ অদু লেপথোক্লগনি, অমসুং মায়কৈ অদু লেপথোক্নবা খ্বাইদগী মপাঙ্গল কনবা লৈবাক অদু ভারতনি। মসিগী মমাঙদা কনাদাগী পি.এম. কার্নেনসু হায়খি মদুদি মথংগী চহী কুন্থ্রামুক্তা মালেমগী ইকনোমিক গ্লেভিতীগী মায়কৈরোমদা চংশিনগদৌরিবা মফম অসি ভারতনি। ফ্রাঞ্চকী রাস্ত্রপতি মেক্রোন্নসু থাজৈ মদুদি মালেমগী খ্বাইদগী চাওবা ইসুশিং কোকহনবদা ভারত অসি তঙাইফদবা পার্ত্নর অমা ওইরে। ঙসি করিগুম্বা ঐখোয়না তেক অমসুং ইকোনোমিক ৱারল্দতা মালেমগী লুচিংবশিংদগী ৱাফমশিংগী মরুওইবা অদু লৌথোক্লবদি সেন্তিমেন্ত অমখক্তমক থোরকই। তুংগী শরুক অমা ওইবা পাম্লবদি ভারতকা মরি লৈনহনগদবনি; নখোয় ভারত্তা লৈগদবনি।
মরুপশিং,
হৌজিক হৌজিকমক ভারতনা তি-২০ ৱর্লদ কপতা মায় পাকলে। মীপুম খুদিংমক নুংঙাইবা ফাওই, অমসুং ভারত্তা ক্রিকেতকি ৱাফমদি করিগুম্বা ওফিশ অমদা ক্রোর কয়াগী ৱারি শান্নবা তারবা, অচৌবা প্রজেন্তেসন খরা চত্থবা তারবা, মপান লৈবাকশিংদগী লাকপা মিথুংলেনশিংনা প্রজেন্তেসন অমা পিরবা, মতম অদুদসু মহাক্না স্কোর অসি করিনো হায়বদু য়েংনবগীদমক স্লাইদ অদুদগী মীৎ কুপ্তবমখৈ য়েংদুনা লৈগনি। অদুগা কনাগুম্বা অমনা নত্রগা অতোপ্পা অমনা শোয়দনা হংই—মরুপ, স্কোর অদুদা করি ওইখ্রবগে? ঙসিদি ভারতকি ইকোনোমিদসু চপ মান্নবা ফিভম লৈরি। ঙসিদি মীপুম খুদিংমক্না ইকোনোমিগী চত্থরিবা কমেন্তরি অমা পামলি। হৌখিবা থাদা ভারতকি ইকোনোমিগী ফিভম করি ওইখিবগে? ঙসিগী ফিভম অসি করিনো? লৈবাক মীয়াম্না মসি পুম্নমক অসি খঙনিংবগী ৱাখল লাক্লি। অসিগুম্বা মখলগী ক্যুরিওসিতি অসি মমাঙদা লৈবাক অসিদা লৈরম্লবরা হায়বদু ঐহাক নিংশিংদে। অদুগা করিগুম্বা ওইরম্লবদি করম্বা মতমদনো? মসিনা ঙসি ভারত মচাশিংগী অপাম্বা অমসুং মশানা মশাবু থাজবগী থাক অদু উৎলি। মসিনা মালেম অসিনা ভারত্তা থাজবা থম্বগী খ্বাইদগী চাওবা মরমসু ওইরি।
অদুগা মরুপশিং,
তশেংনমক, অসুক য়াম্নবা এক্সপেক্তেসন কয়া অমা য়াওরকপা মতমদা, মালেমগী মীৎয়েং অদু ঐখোয়গী লৈবাক্তা থম্লবদা, মদুগী মতুংদা ঐখোয় পুম্নমক্কি থৌদাং অসি হেন্না হেনগৎলকই।
মরুপশিং,
ঙসিগী ভারত অসি মাংলোমদা চঙশিনবা খক্তা নত্তে। ভারতনা মশামকপু মথক্কী লেভেলদা পুখৎলি। ঙসি লৈবাক অসিদা নেক্স জেনেরেসন ফিজিকেল ইনফ্রাস্ত্রকচর শেমগৎলি; ঐখোয়না নেক্স জেনেরেসন দিজিতেল ইনফ্রাস্ত্রকচরগী মায়কৈদা চঙশিল্লি। য়ু.পি.আই.না দিজিতেল পেমেন্তশিং মথংগী ফেজদা পুখৎলে। ঙসিদি ভারত অসি মালেমদা খ্বাইদগী য়াংনা রিএল তাইম দিজিতেল পেমেন্ত তৌবা লৈবাক অমা ওইরে ।
মরুপশিং,
ঙসি ভারতনা নেক্স জেনেরেসনগী রিফোর্মশিংসু তৌরি; মসি রিফোর্ম এক্সপ্রেসতা চেল্লি। ভারত্তা মতম অমদা থবক কয়া অমদি ৱারেপ কয়া অমা নেক্স তু ইম্পোসিবল হায়না লৌনরম্মী; ঙসিদি ভারতনা অদুগুম্বা ৱারেপশিং অদুসু লৌরি। মতম অমদা হায়রম্মি মদুদি আর্তিকল ৩৭০ লৌথোকপা অসি ওইথোক্লোয়। অদুবু ঙসিদি জম্মু অমসুং কশ্মিরদা আর্তিকল ৩৭০গী ৱাল শোক্লে। মতম অমদা মীপুম খুদিংমক্কী বেঙ্কিং শিশ্তেমগা শম্নহনবা অসি ওইথোক্লোয় হায়না লৌনরমমি। অদুবু ঙসিদি জন ধন একাওন্ত কোতি ৫০ হেনবনা মসি ওইথোকপা ঙম্লে। মতম অমদা ত্রীপল তলাক লোয়শিনবা অসি ওইথোক্লোয় হায়না লৌনরম্মি। অদুবু ঙসিদি মুস্লীম মরুপশিংনা মসিগী অরানবা অসিদগী নীংতম্বা ফংলে। মতম অমদা লোক সভা অমসুং লেজিস্লেতিব এসেমব্লিশিংদা নুপীশিংগী চাদা ৩৩ রিজর্বেসন তৌবসু য়াদবা ওইরম্মি। অদুবু ঙসিদি মসিগীদমক আইন অমা শেম্লে। মতম অমদা স্পেস অমসুং এদভান্স তেক্নোলোজিদা ভারতকি লিমিৎশিং অদু ফোঙদোকখি। অদুবু ঙসিদি মুন মিসন, সেমিকন্দক্তর মিসন, ক্বান্তম মিসন-মসি পুম্নমক অসিনা ভারতপু তেক্নোলোজিগী নেক্স ফ্রন্তিয়রগী মায়কৈদা লমজিংলি।
মরুপশিং,
ঙসিগী ভারত অসি মংলানগী মং মংবখক্তা নত্তে। ভারতনা মখোয়বু অচুম্বা ওইহল্লি। মরম অসিনা ঙসি মালেম অসিনা হায়রিবসি ভারত অসি সুপ্নতগী প্রোগ্রেশখক্তা নত্তে । ভারতনা নেক্সতা চঙশিল্লি।
মরুপশিং,
লৈবাক অমগী চাওখৎ-থৌরাংগী য়াম্না মরুওইবা য়ুম্ফম অমদি ঐখোয়না শিংনবশিং অসি করম্না থেংনবগে হায়বসিনি। মালেমগী ফিভম খঙহৌদনা হোঙলক্লি হায়বা ঐখোয় পূম্নমক্না খঙই। হৌখিবা চহিশিংদা ঐখোয়না অহানবদা কোরোনাগী খুদোংথিবা উখি, মদুগী মতুংদা রুশিয়া-য়ুক্রেনগী ক্রাইসিস অদু উখি, হৌজিক্তি ঐখোয়গা য়াম্না নক্ননা অতোপ্পা অচৌবা লান অমা চত্থরি। মসিগী লান অসিনা মালেম পুম্ববু য়াম্না চাওবা ইনর্জিগী ক্রাইসিস অমদা পুশিল্লক্লে।
মরুপশিং,
অসিগুম্বা অৱাবা ফিভম অসিদা ঐখোয়না জাতি অমা ওইনা মসিগা করম্না কম্পিতিসন তৌগনি হায়বসি য়াম্না মরুওই। ক্রাইসিসকি মতম অসি, মওং অমদা, জাতি পুম্বগী চাংয়েং অমনি। ঐখোয়না ফিভমশিং অসি শান্তি অমসুং অখাং কনবগা লোয়ননা থেংনগদবনি। মীয়ামগী থাজবা হেনগৎহন্দুনা অমসুং মীয়ামদা খঙহন্দুনা ঐখোয়না মাংলোমদা চঙশিনগদবনি। অমসুং মসিদা মীপুম খুদিংমক্কী থৌদাং লৈ। রাজনিতিগী পার্তী খুদিংমক, মিদিয়া, সোসিএল ইন্সতিত্যুসন, ইন্দস্ত্রী, নহা, খুঙ্গং, সহর – মীপুম খুদিংমক্কী থৌদাং মরু ওই। অমসুং কোরোনাগী মতমদা ঐখোয়না উবা ফংলে মদুদি মীপুম খুদিংমক পুন্না চৎমিন্নরকপা মতমদা লৈবাক অসিনা ক্রাইসিস অসিগা চাংদম্নবগী পোতেন্সিয়েল অসি শরুক কয়া হেনগৎলকই। ঙসি লৈবাক অসিগী মাঙদা অতোপ্পা শিংনবা অমা লৈরি, অমসুং মরম অসিনা ঐখোয়না পুন্না হোৎনমিন্নগদবনি, নেস্নেল ইন্তরেস্ত অসি মরু ওইনা থমদুনা অমসুং ঐখোয়গী থৌদাংশিং মপুং ফাহনগদবনি।
মরুপশিং,
হৌজিক মতম অসিদা এল.পি.জি.গী মতাংদা খন্ন-নৈনবা কয়া চত্থরি। মীওই খরনা মখোয় মশাগী এজেন্দা পুথোক্নবা ৱাখল ৱাবা থোকহন্নবা হোৎনরি। ঐহাক্না মতম অসিদা মখোয়গী মরমদা রাজনিতিগী ওইবা ৱাফম থম্বা পামদে। অদুবু ঐহাক্না শোয়দনা হায়গনি মদুদি মসি তৌবনা মখোয় মশামক মীয়ামগী মাঙদা এক্সপোজ তৌরক্লি অমসুং লৈবাক অসিদা অচৌবা অমাং অতাসু থোকহল্লি।
মরুপশিং,
ঙসিদি লানদগী থোরকপা মালেমগী ক্রাইসিস অসিগী ইম্পেক্তনা লৈবাক অমত্তা শোকহন্দবা লৈতে। য়াম্না হেন্না নত্রগা য়াম্না নেম্না মীপুম খুদিংমক ভিক্তিম ওই। ভারত সরকারনসু মসিগী ক্রাইসিস অসি থেংননবা অউপ্পা উনা অমত্তা লোংথোক্তনা তোক্তে। অমসুং তোঙান তোঙানবা থাকশিংদা ঐখোয়না হোৎনরি । হৌখিবা নুমিৎ খরনি অসিদা ঐহাক্না মসিগী মতাংদা লৈবাক কয়াগী মকোক থোঙবা লুচিংবশিংগা ৱারি শান্নখ্রে। সপ্লাই চেন্দ থোরকপা খুদোংচাদবশিং অদু মায়থিবা পিনবসু হোৎনরি।
মরুপশিং,
ভারতকি খোঙজেল য়াংবা চাওখৎ-থৌরাংদা মতেং পাংনবা, তোঙান-তোঙানবা ইনর্জিগী সোর্সশিং লেপ্তনা য়োকখৎপা অসি তঙাইফদবা ওইরে। অমসুং মসিবু মপাঙ্গল কনখৎহন্নবা ঐখোয়না থাক অনিদা অমগা অমগা থবক তৌমিন্নরে । অহানবদা, লৈবাক অসিদা ইনর্জিগী খুদোংচাবা হেনগৎহনখি, ঐখোয়না ইনফ্রাস্ত্রকচর শেম শাখি।
অমসুং অনিসুবদা ঐখোয়না ইনর্জিগীদমক্তা মপান লৈবাকশিং খক্তদা মখা পোনবগী মথৌ তাদনবা ঐখোয়না ইনর্জি সেক্তরদা মশানা মশাবু থাজবা থম্বদা অকনবা ৱাফম থমখি। হৌজিক ঐহাক্না অদোমদা গ্যাস সেক্তরমক্কী ফিগর খরা পিজরি। ২০১৪ ফাওবদা লৈবাক অসিদা এল.পি.জি.গী কনেক্সন কোতি ১৪ খক্তমক লৈরমমি। হায়বদি লৈবাক অসিগী ইমুং মনুংগী চাওরাক্না শরুক অহুম থোকপগী অমখক্তমক এল.পি.জি. ঙসিদি মশিং অদুগী শরুক অনি হেন্না লৈরে, হায়বদি চাওরাক্না দোমেস্তিক এল.পি.জি. অসি হৌখিবা চহি ১১ অসিদা ঐখোয়গী বোত্তলিং কেপাসিতি অসি শরুক অনি হেনগৎলে। দিস্ত্রিব্যুসন সেন্তরশিংসু ১৩,০০০দগী ২৫,০০০ হেন্না হেনগৎলে। ২০১৪দা লৈবাক অসিদা এল.এন.জি.গী তর্মিনেল ৪ খক্তামক লৈখি; ঙসিদি মখোয়গী মশিংসু শরুক অনি হেনগৎলে। হান্নদি চাওরাক্না কিলোমিতর ৩৫০০ শাংবা গ্যাস পায়পলাইন অসি কিলোমিতর ১০,০০০ হেন্না শাংদোকখ্রে। এল.পি.জি.গী চাওরাক্না চাদা ৬০দি মপান লৈবাকশিংদগী লাকপনা মরম ওইদুনা লৈবাক অসিগী অচৌবা হিথাংফমশিংদসু ইম্পোর্ত তর্মিনেল কেপাসিতি অসি চাওনা পাকথোক চাওথোকহল্লে।
মরুপশিং,
২০১৪গী মমাঙদা লৈবাক অসিগী য়ুম লাখ ২৫-২৬ খক্তানা পায়পকি খুৎথাংদা সেন্দোং লৈবা গ্যাস, হায়বদি পি.এন.জি. ঙসিসু মসিগী মশিং অসি কোতি ১.২৫ হেন্না য়ৌরে। ২০১৪দা লৈবাক অসিদা সি.এন.জি.দা চেল্লিবা গাড়ীশিংসু লাখ ১০দগী হেল্লমদে। ঙসিদি মসিগী মশিং অসি লাখ ৭০ হেল্লে। অমসুং মসি ওইথোকপা ঙম্লিবসি হৌখিবা চহি তরাগী খুজিং কয়াদা লৈবাক অসিগী জিলা ৬০০ হেনবদা সিতি গ্যাস দিস্ত্রিব্যুসন নেতৱর্কশিং লিংখৎপদগী খক্তনি।
মরুপশিং,
মালেমগী ক্রাইসিস অসিনা অমুক হন্না উৎলে মদুদি করিগীদমক্তা লৈবাক অমত্তনা মশা মরোমদোম লেপচবা ঙম্বা অসি অসুক য়াম্না মথৌ তারিবনো। মরম অসিনা হৌখিবা চহিশিংদা ঐখোয়না ইনর্জি সেক্তারশিংদ ভারত মশানা মরোমদোম লেপচবা ঙম্নবা হোলিস্তিক ওইবা মওংদা থবক তৌখি।
মরুপশিং,
পেত্রোলিয়মদা মখা পোনবা হন্থহননবা ঐখোয়না ইথানোল অমসুং বাইওফ্যুএলদা অকনবা ৱাফম থমখি। ২০১৪গী মমাঙদা লৈবাক অসিদা ইথানোল ব্লেন্দিং কেপাসিতি চাদা অমদগী অমা মখায় খক্তামক লৈরমমি। ঙসি ঐখোয়না পেত্রোলদা চাদা ২০গী মনাক্তা ইথানোল ব্লেন্দা তৌবা ঙম্লে। করিগুম্বা থবক অসি তৌরমদ্রবদি হৌখিবা চহি ১১দা ঐখোয়না মপান লমদগী অহেনবা ওইল বেরেল কোতি ১৮ রোম লৌবা তারমগনি। ঙসিগী ফিভম অসি য়েংলুরগদি ইথানোলনা মরম ওইদুনা চহি অমদা চাওরাক্না বেরেল কোতি ৪.৫ হন্থনা থাও ইম্পোর্ত তৌবা তারি। হায়বদি মসি খক্তদগী লৈবাক অসিনা চাওরাক্না লুপা কোতি লাখ ১.৫ কনবা ঙম্লে।
মরুপশিং,
ভারত্তা পেত্রোলিয়মগী য়াম্না চাওবা কঞ্জুমর অসি ঐখোয়গী রেলৱেজনি। ঐখোয়গী লৈবাক অসিদা রেলৱে লায়নশিংদা ইলেক্ত্রিফিকেসন তৌবা অসি চহি ৬০গী মমাঙদা হৌখিবনি। মসি ওইরবসু, ২০১৪ ফাওবদা রেলৱে রুৎকি চাদা ২০ খক্তমক ইলেক্ত্রিফিকেসন তৌবা ঙমখি। লেমহৌরিবা রেলৱে রুৎশিংদা দিজল ইঞ্জিন লিশিং কয়া চৎলম্মি। ঙসিদি ভারত্তা ব্রোদ-গেজ নেতৱার্ক্কী চাওরাক্না চাদা ১০০ ইলেক্ত্রিফিকেসন লোয়শিনখ্রে। মসিনা মরম ওইদুনা চহি ২০২৪-২৫ খক্তদা ভারতকি রেলৱেজনা চাওরাক্না দিজল লিতর কোতি ১৮০ কনবা ঙম্লে। করিগুম্বা ইলেক্ত্রিফিকেসন থোকখিদ্রবদি, অসিগুম্বা মখলগী দিজল পুথোক্নবা চহি খুদিংগী অহেনবা ক্রুদ ওইল মপান্দগী পুশিল্লকপগী মথৌ তাগনি। মতৌ অসুম্না ঐখোয়না মেত্রো নেতৱর্ক হেঙ্গৎহনখি অমসুং ইলেক্ত্রিক মোবিলিতিদা মীৎয়েং থমখি।
মতৌ অসুম্না রিন্যুএবল ইনর্জিগী মতাংদসু ঐখোয়না অতোপ্পা য়াম্না চাওবা থবক অমা তৌখ্রে। ঙসিদি ঐখোয়গী অপুনবা ইন্সতোল তৌরবা পাৱর জেনেরেসন কেপাসিতিগী শরুক অহুম থোকপগী অমদি রিন্যুএবল সোর্সতগী লাকই। ঐখোয়গী অপুনবা রিন্যুএবল কেপাসিতি অসি ঙসিদি পুৱারি ওইরবা ফিগর ২৫০ গীগাৱাত অসি লান্থোকখ্রে। খন্থবিয়ু: ২০১৪দা ভারতকি সোলার পাৱর কেপাসিতি অসি সুপ্নতগী গীগাৱাত ২ খক্তমক ওইখি; ঙসিদি মসি চাওরাক্না শরুক ৪০ হেনগত্তুনা গীগাৱাত ১৩০ ওইরে। য়ুমদা শিজিন্ননবগীদমক গ্যাসকি মথক্তা মৈ শিজিন্নবা হেনগৎহন্নবা পি.এম.সুর্য ঘর মুফ বিজলি য়োজনা পায়খৎখি। হৌজিক ফাওবদা চাওরাক্না ইমুং লাখ ৩০না স্কিম অসিগী মখাদা য়ুমথক্তা সোলর ইন্সতো তৌখ্রে।
মরুপশিং,
মসিগী মথক্তা ঐখোয়না গোবর্ধন স্কিমদসু থবক তৌখি। মসিগী মখাদা কম্প্রেশ বাইওগ্যাস শাবগী থবক পায়খৎখি। হৌজিক ফাওবদা লৈবাক অসিদা প্লান্ত ১০০ হেন্না হৌদোকখ্রে অমসুং থবক ৬০০ হেন্না চত্থরি।
মরুপশিং,
পেত্রোল-দিজলগী লমদসু ঐখোয়না কেপাসিতি বিল্দিংগী মায়কৈদা পাক শন্না হোৎনখ্রে। ২০১৪গী মমাঙদা ভারত্তা চাওরাক্না স্ত্রেতেজিক পেত্রোলিয়ম রিজরভ অমত্তা লৈরমদে- হায়বদি ক্রাইসিসকি মতমগীদমক ক্রুদা ওইল স্তোর তৌবগী কেপাসিতি লৈরমদে। ঙসি ঐখোয়গী স্ত্রেতেজিক পেত্রোলিয়ম রিজর্ব তন লাখ ৫০ হেন্না লৈরে । অমসুং মসিদগী হেন্না কেপাসিতিগীদমক থবক চত্থরি। হৌখিবা চহি তরা অসিদা ঐখোয়গী রিফাইনিং কেপাসিতিসু চহি খুদিংগী তন মিলিয়ন ৪০ হেন্না হেনগৎহনখ্রে। মতম অদুদখক্তদা ভারত অসি ঙসি মালেমগী খ্বাইদগী চাওবা রিফাইনিং হব অমা ওইরে। হায়বদি ভারতপু মশানা-মরোমদোম লেপচবা ঙম্নবা ঐখোয়না কয়াদা চাওনা অমসুং করমবা অচৌবা মায়কৈদা থবক তৌরিবগে হায়বদু অদোম্না খঙবা ঙমগনি। লানদগী থোক্লকপা ক্রাইসিস অসিগা ঐখোয়না শোয়দনা চাংদম্নবা ঙমগনি। লৈবাক মচা কোতি ১৪০দা ঐহাক্না মপূঙ ফানা থাজবা থম্লি। ঐখোয়না পুন্না ওর্গানাইজ তৌদুনা লৈবাক অসিবু কোরোনাগী ক্রাইসিসতগী নান্থোকহনখিবগুম, মতৌ অদুম্না ঐখোয়না মালেমগী ক্রাইসিস অসিসু মায়থিবা পিগনি। অদুগা ঐহাক্না অমুক হন্না হায়জনিংই, সরকারগী মতাংদা হায়রগদি ঐখোয়না মখল অমত্তগী হোৎনবা নত্রগা হোৎনবদা অৱাৎপা অমত্তা লৈহন্দবা য়ারোয়। ৱারেপ খুদিংমক্তা মীয়ামগী ইন্তরেস্ত অসি মরু ওইনা লৈগনি।
মরুপশিং,
য়ুক্রেনগী লানদগী হৌরগা ঙসি ফাওবদা মসিগী ইম্পেক্ত অসি মালেমগী কৈথেলদগী মালেমগী নাগরিকশিংদা মতৌ করম্না মখা তানা হন্থরকপগে হায়বদু ঐখোয়না উবা ফংলে। অদুবু লান্না থোকহল্লিবা ফিভমশিংগী পোৎলুম অসি ভারতকি নাগরিকশিংদা শোন্থহন্দনবা মতম পুম্নমক্তা ভারত সরকারগী ওইথোকপা য়াবা হোৎনবা খুদিংমক ওইদুনা লাক্লি। খুদম ওইনা, রুশিয়া-য়ুক্রেনগী ক্রাইসিস অসি হেনগৎলকপা মতমদা হারগী মমল য়াম্না ৱাংখৎলকখি। মসি ওইরবসু, ইন্তর্নেস্নেল মার্কেত্তা লুপা ৩০০০দা ফংলম্বা য়ুরিয়াগী বেগ অদু ঐখোয়না ঐখোয়গী লৌমীশিংদা লুপা ৩০০ খক্তদা পিখি। মালেমদা লুপা ৩০০০ লৈনরম্বা অদুগী মহুত্তা ঐখোয়গীদা ৩০০দা পিরম্মি; হন্দক্কী মতম অসিদসু ঐখোয়গী ওইথোকপা য়াবা হোৎনবা খুদিংমক লান অসিনা লৈবাক অসিগী লৌমীশিং অমসুং লৈবাক অসিগী নাগরিকশিংগী পুন্সিদা খ্বাইদগী নেম্বা শাফু পিবনি।
মরুপশিং,
ঙসিগী তাঙ্কক অসিদগী ঙসিগী মরুওইবা মতম অসিদা রাজ্য সরকারশিংদা হায়জবা অমসু লৈরি। ব্লেক-মার্কেতিং থোকহল্লোইদবনি অমসুং ৱাফম অসি শন্দোকলোইদবনি; মরম অদুনা ফিভম অসি য়াম্না লুনা য়েংশিনবা মথৌ তাই। ব্লেক মার্কেতিং তৌরিবা মীওইশিংগী মতাংদসু অকনবা এক্সন লৌখৎপা মথৌ তাই।
মরুপশিং,
হৌখিবা চহি তরাগী খুজিং কয়া অসি মশানা মশাবু থাজজবগা লোয়ননা সেন্সিতিব ওইবা লৈঙাক অমা ওইখি। ঐখোয়গী লৈবাক্কী অচৌবা শরুক অমা, মফম অদুদা লৈরিবা মীয়াম অসি দিল্লীদা ফমদুনা লৈরিবা কংগ্রেশকি সরকারশিংগী ৱাখল্লোনদগী য়াম্না লাপনা লৈখি। অদুবু ঐখোয়গী সরকারনা চাওখৎ-থৌরাংগী লমজেল অসিদা তুংদা থমখিবা মীয়ামবু গবর্নান্সকি প্রাইওরিতিশিংগা শম্নহনখি। ঙসিদি মফমশিং অসিদা হাওজিং, লম্বি, মহৈলোয়শঙশিং-হোসপিতালশিংগুম্বা ইনফ্রাস্ত্রকচরশিং শেমগৎনবগীদমক্তা এস্পিরেস্নেল দিস্ত্রিক্ত স্কিম, এসপিরেস্নেল ব্লোক স্কিম, অমসুং পি.এম. জনমান অসি চত্থরি।
মরুপশিং,
কংগ্রেশকি সরকারশিংগী য়াম্না চাওবা পাপ অমসু ওইখি মদুদি মখোয়না লৈবাক অসিগী অচৌবা শরুক অমা মাওইস্তকি তেরোরিজমগী মৈশাদা মৈ চাকহনখি। লৈবাক অসিগী চাওরাক্না অচৌবা রাজ্য খুদিংমক্কী য়াম্না চাওবা শরুক অমা মাওইস্তকি তেরোরিজমগী মখাদা লৈরম্মি। অদুবু ইচিল-ইনাওশিং, হৌখিবা চহিশিংদা লৈবাক অসিনা ফিভম অসি হোংদোক্নবা ৱারেপ অমা লৌখি। ঐখোয়না অৱাংবা মোরেলগা লোয়ননা মাংলোমদা চঙশিনখি। অদুগা লৈবাক অসিনা মসিগী মহৈ ঙসি উবা ফংলি। চহি ২০১৩দা জিলা ১৮০ হেন্না – জিলা ১৮০ হেন্না – মাওইস্তকি তেরোরিজম্না শোকহনখি। ঙসি মাওইস্ত তেরোরিজমনা শোকহল্লবা জিলাশিংগী মশিং অসি সিঙ্গল দিজিৎ য়ৌরে।
মরুপশিং,
হৌখিবা চহি খক্তদা নক্সল ২১০০ হেন্না শরেন্দর তৌখ্রে, মীওই ৯০০ হেন্না ফাখি, অমসুং খুৎলায় থাদোক্নবা শেম শাদবা মীওইশিং, সেক্যুরিতি ফোর্সশিংনা অসিগুম্বা হার্দকোর নক্সল ৩০০ হেন্না হাৎখ্রে। মসিগী মহৈদি মতম অমদা অকিবগী ঈচেল মখাদা হিংনবা হোৎনরম্বা মফমশিংদা ঙসি চাওখৎপগী অনৌবা ইনর্জিগী ঈচেল অমা চেল্লে।
মরুপশিং,
ঙসি ভারতনা মাংলোমদা চঙশিল্লিবা খোঙজেল অসিনা মসিগী প্রোগ্রেশকি খোঙজেল অসি থিংবা ঙমদ্রে। ভারত মচা ক্রোর ১৪০গী অপাম্বা অদু ঙসি মথংগী থাক অদুদা লৈরে। মংলান অমখক মপূঙ ফারকপা মতমদা অনৌবা মংলান, অনৌবা মংলান পোকই হায়বা ঐ খঙই। মসিবু ঐহাক্না পোৎলুম অমা ওইনা লৌদে, মদুগী মহুত্তা মিয়ামগী থাজবগী কেপিতেল ওইনা লৌই। হোয়... ঐহাক্কী লৈবাক অসিদা অসিগুম্বা য়াইফ-পাওজেল খরা লৈরি, মখোয়না খল্লি মদুদি এসপিরেসনগী পোৎলুম মখাদা মোদি অসি করিগুম্বা মতমদা শোকহল্লগনি, করিগুম্বা মতমদা থুগাইগনি; অদুবু মখোয়গী অপাম্বা অদু অসুক য়াম্না ফজৈ মদুদি মখোয়গী এক্সপেক্তেসন অদু কৈদৌঙৈদসু মপুং ফাদে, অমসুং লৈবাক মীয়ামগী থৌজাল অদু লৈরিবমখৈ মখোয়সু মপূঙ ফারোয়। হৌজিক্তি ভারত মচা কোতি ১৪০গী আশা অমসুং অপাম্বা খক্তমক মপুং ফারগনি। সেক্তর খুদিংমক্তা ভারত মশা মরোমদোম লেপচবা ঙম্লগনি; কন্দিসন খুদিংমক্তা ভারত দিবেলপ তৌরগনি।
মসিগী সেন্তিমেন্ত অসিগা লোয়ননা ঐহাক্না ঐহাক্কী ৱারোল লোয়শিনজরি।
অদোম পুম্নমকপু অমুক হন্না থাগৎপা ফোঙদোকচরি।
থাগৎচরি!
