অতল বিহারি বাজপেয়ী সিৱরী-নহাবা শেবা অতল শেতু শঙ্গাখ্রে
ইস্তর্ন ফ্রীৱেজকী ওরেঞ্জ গেৎকা মেরিন দ্রাইব শম্নহল্লিবা অন্দরগ্রাউন্দ রোদ তনেল উরেপ-উয়ুং তমখ্রেSEEPZ SEZদা ‘ভারত রত্নম’ অমসুং ন্যু এন্তর্প্রাইজেস এন্দ সর্ভিসেস তাৱর (NEST) 01 শঙ্গাখ্রেরেল অমসুং দ্রিঙ্কিং ৱাতরগা মরী লৈনবা প্রোজেক্ত কয়ামরুম জাতিদা কত্থোকখ্রেউরান রেলৱে স্তেসনদগী খারকোপার ফাওবগী EMU ত্রেনগী অহানবা খোঙচৎ লমথাখ্রেনমো মহিলা শাশক্তিকরন অভিয়ান হৌদোকখ্রেজাপান সরকারদা থাগৎখ্রে অমসুং শিঞ্জো অবেবু নীংশিংখ্রে“অতল সেতু শঙ্গাবা অসিনা ভারতকী ইনফ্রাস্ত্রকচরগী হৈ-শীংবা উৎখি অমসুং ‘ভিকসিৎ ভারত’ অমগী মাইকৈদা লৈবাক্কী ত্রাজেক্তরী অদু উৎখি”“ঐখোয়গীদমক প্রোজেক্ত খুদিংমক অসি অনৌবা ভারত অমা শেমগৎনবগী মেদিয়ম ওইরি”“অতল সেতুনা ভিকসিৎ ভারতকী শক্তম উৎলি”“মমাংদা মলতি মিলিয়ন করোর স্কেমশিং অসি খন্ন-নৈনবগী শরুক অমা ওইরমখি, ঙসিদি খন্ন-নৈনবা অসি লুপা করোর লিশিং কয়ারোম ওইবা প্রোজেক্তশিং লোইশিনবগী মতাংদা ওইরি”“মোদীগী গরেন্তীনা অতৈদগী থাজবা মাংলকপা মতমদা হৌরি”“রাজ্য অমা হেক্তদা দবল ইঞ্জিন সরকার অমা হেক্“চাউখৎ থৌরাংগী প্রোজেক্তশিং অসি মুম্বাইদা পাইখৎচরবসু লৈবাক পুম্বনা মসিদা মীৎয়েং থম্মি” হায়না শ্রী মোদীনা ফোঙদোকখি।ঙসিগী থৌরমসিদা মশিং য়াম্না শরুক য়ারিবা মুম্বাই অমসুং মুম্বাইগী সব-অর্বকী মীয়াম্বু তরাম্না ওকচরি, নমস্কার!
ঙসিগী নুমিৎ অসিদি মুম্বাই অমসুং মহারাস্ত্রগীদমক্তা নত্তনা বিকশিৎ ভারতকী মঙলানগী ওইনা য়াম্না পুৱারী ওইরবা নুমিৎ অমনি। ঙসিগী চাউখৎ থৌরাংগী থৌরম অসি মুম্বাইদা পাংথোকচরবসু, মসিদা লৈবাক শিনবা থুংবগী মিৎয়েং চঙলি। ঙসিদি মালেমগী খ্বাইদগী শাংবা সমুদ্রগী থোং অমা, অতল সেতু হায়বা অমা লৈবাক অসিনা ফংজরে। ঐখোয়না ভারতপু চাউখৎহন্নবা সমুদ্র ফাওবা লেম্না থারোই হায়বগী খুদম অমা ঙসিগী মায় পাকপা অসিনা ওইরে, ঈশিংগী ইরৈবু ঐখোয়না ঙসি মায়থীবা পীরে। ঙসিগী থৌরম অসি হোৎনরবদি মায় পাকই হায়বগী খুদম অমা ওইরে।
মুম্বাই ত্রান্স হার্বর লিঙ্ক অতল সেতুগী উরেপ উয়ুং তম্নবগীদমক্তা দিসেম্বর 24, 2016দা মফমসিদা লাকখিবা নুমিৎ ঐহাক্না কৈদৌনুংদা কাওবা ঙম্লোই। মতমদুদা ঐহাক্না ছত্রপতি শিবাজীবু ইকায় খুম্নদুনা অসুম্না হায়খিবনি, “অদোম্না ইশিন্দুনা থম্বীয়ু, লৈবাক অসিদা অহোংবা লাক্কনি, চাউখৎলক্কনি”। লৈঙাকপগী পথাপ্তা থবক থৌর কয়া চহি কয়া পন্দুনা লৈবগী চৎনবী লৈখ্রবদি, থাজবগী মঙাল অদুম মাঙলকপনি। মীয়াম্না মখোয়না হিংলিঙৈদা অচৌবা প্রোজেক্ত কয়া মায় পাক্না লোইশিনবা উবা পাম্মি, মসি য়াম্না লুবা থবক অমদি ওইরিবনি। অদুনা ঐহাক্না অসুম্না হায়খিবনি, “ইদুনা থমজিনবীয়ু, অহোংবা অমা শোইদনা লাক্কনি”। ৱাফম অসি মতম অদুদা হায়খিবা মোদীগী গেরেন্তীনি। ঙসিদি, ঐহাক্না ছত্রপতি শিবাজীবু ইকায় খুম্নজদুনা, মুম্ব্রা দেবীবু ইকায় খুম্নজদুনা, সিধিবিনায়কজীগী মফমদা কোক নোঞ্জদুনা, মসিগী অতল সেতু অসিবু লৈবাক মীয়ামগী মফমদা খুৎশিন্নজরি।
কোরোনাগী লাইচৎ লৈজরবসু, মুম্বাই ত্রান্স হার্বর লিঙ্ককী থবক লোইশিন্নবা য়াম্না কন্না হোৎনখিবনি। ঐখোয়গী ওইনদি উরেপ উয়ুং তম্বা, শঙ্গাবা, ভুমিপুজন অমসুং মীয়ামদা খুৎশিন্নবগী নুমিৎ অসি শুপ্নগী নোংমগী থবক অমা নত্তে। মীদিয়াদা লাক্নবা নত্ত্রগা মীয়াম্বু পেলহন্নবগীখক তৌবা থবক নত্তে। ঐখোয়গী ওইনদি প্রোজেক্ত খুদিংমক অসি অনৌবা চাউখৎপা অমা পুরকপগী পাম্বৈনি। চেক অমমমদগী অচৌবা য়ুম অমা শাবগুনা, প্রোজেক্ত অমমমনা ভারতকী অচৌবা য়ুম অমা শাগদৌরিবনি।
মরুপশিং,
ঙসিদি, মুম্বাই অমসুং মহারাস্ত্রগী চাউখৎ থৌরাংগা মরী লৈনবা লুপা করোর লিশিং 33গী প্রোজেক্ত কয়াগী উরেপ উয়ুং তম্বগা লোয়ননা শঙ্গাবগী থৌরম অমা লৈবাক অসিগীদমক্তা পাংথোক্লি। প্রোজেক্তশিং অসি রেল, রোদ, মেত্রো অমসুং ঈশিংগী খুদোংচাবগা মরী লৈনবা প্রোজেক্ত ঙাক্তনি। ঙসিদি, কারবারগী মালেম্বু হেন্না মপাঙ্গল লৈহন্নবা ‘ভারত রত্নম’ অমসুং ‘নেস্ত ৱান’ হায়বা বিলদিংসু মুম্বাইনা ফংলি। মহারাস্ত্রদা অহানবা ওইনা দবল ইঞ্জিন সরকার লাকপা মতমদা অয়াম্বা প্রোজেক্তশিং অসি হৌখিবনি। মরম অদুনা, মহারাস্ত্রদা দেবেন্দ্রজীদগী হৌরগা একনাথ শিন্দেহী, অজিৎ পাৱারজী ফাওবগী অপুনবা তীমগী হোৎনজমনগী মহৈনি ঙসি ফংলিবা মায় পাকপশিং অসি। ঐহাক্না পুম্নমকপু থাগৎচরি।
ঐহাক্না মহারাস্ত্রগী ইচে-ইচলশিংবু থাগৎচবা পাম্মি। ঐহাকপু থৌজাল পীনবগীদমক্তা অদোম্না মশিং য়াম্না লাকপীবা অসিদগী হেন্না লাইবক ফববু করি লৈরিবগে খল্লি। লৈবাক্কী ইমা-ইবেল অমসুং ইচে-ইচলশিংবু মপাঙ্গল হাপ্নবা গেরেন্তী অমা ঐহাক্না পীরিবা অদুবু মহারাস্ত্র সরকারনসু হেন্না খুমাং চাউশিনহল্লি। মুখ্য মন্ত্রী মহিলা শশক্তিকরন অভিয়ান, নারিশক্তী এপ্লিকেসন অমসুং লেক লাদকী য়োজনাগুম্বা কয়াগী মতাংদা থবক পায়খৎলি। ঙসিসু, ঐখোয়বু থৌজালবীনবা ঐখোয়গী ইমা-ইবেল, ইচেল-ইচল কয়ানা মশিং য়াম্না লাকপীরি। বিকশিৎ ভারত অমা পুরক্নবগীদমক্তা নারিশক্তীনা মাঙ থানা থোক্লকপা অসি অদুক্কী য়াম্না তঙাই ফদবনি।
ইমা-ইবেল, ইচে-ইচলশিংগী লম্বীদা লাকপা শিংনবা খুদিংমক লৌথোকপা অমসুং মখোয়গী পুন্সিবু হেন্না নুংঙাইহন্নবা ঐখোয়গী সরকারনা লেপ্তনা হোৎনদুনা লাক্লিবনি। উজ্বালাগী গ্যাস সিলিন্দর ওইরো, অয়ুশমান য়োজনাগী মখাদা লুপা লাক্ষ 5 ফাওবগী লেম্না লাইয়েংবা ওইরো, জন ধন বেঙ্ক একাউন্ত ওইরো, পি.এম. অৱসকী পক্কা য়ুম ওইরো, য়ুমশিং অসিগী মপুবু নুপীশিংগী মিংদা থম্বা ওইরো, মীরোনবী নুপীশিংগী বেঙ্ক একাউন্ততা লুপা লিশিং 6 পীথবা ওইরো, থবক তৌবী নুপীশিংগী চাজেনবগী চয়োল 26কী ছুতি পীবা ওইরো, সুকনয়া স্মৃধী একাউন্তকী খুত্থাংদা শেন্থং য়াম্না থাদবা ওইরো, ঐখোয়গী সরকারনা নুপীশিংগী শিংনবা খুদিংমক লৌথোকখি। রাজ্য অমা হেক্তদা দবল ইঞ্জিন সরকারবু লৈরবদি, নুপীশিংগী য়াইফ য়ুম্বাল হায়বসিনা ঐখোয়গী খ্বাইদগী চাউবা গেরেন্তীনি। ঙসি হৌরিবা স্কিমশিং অসিদি মাইকৈ অসিদা থাংজিনবা খোঙথাং ওইরিবনি।
ঐহাক্কী ইমুংগী মীওইশিং,
মমাংগী নুমিৎ খরনিদগী মুম্বাই ত্রান্স হার্বর লিঙ্ক – অতল সেতুগী মতাংদা মীয়াম্না ৱারী শান্নরি। ঙসি অতল সেতুবু য়েংলিবা, মসিগী ফোতো য়েংলিবা মীওইশিংনা চাউথোকচবগা লোয়ননা মশাগী কোক ৱাংনা থাংগত্তুনা চৎলি। মসিগী পাক চাউবা অমসুং সমুদ্রদগী হৌদুনা শারিবা থোং অসি উবদা মীয়াম্না অঙকপা পোক্নরি। মসিগী ইঞ্জিনিয়রিং অসিদগী মীওই খরনা ইথিল লৌরি। মসিদা চঙলিবা ৱাইয়রশিং অসি তিংথোক্লবদি, পৃথিবীবু অনিরক হন্না কোইবা য়াগনি। প্রোজেক্ত অসিদা শিজিন্নরিবা য়োৎশিং অসিনা হৌরা ব্রিজ 4 অমসুং স্তেচ্যু ওফ লিবর্তী 6 শাবা য়াগনি। মুম্বাই অমসুং রাইগরগী অথাপ্পা য়াম্না নকশিন্নরে হায়না মীওই খরনা নুংঙাইবা ফাওনরি। পুং কয়া চঙলম্বা খোঙচৎশিংবু থোং অসিনা শুপ্নগী মিনিৎ খরদা পুরগনি। মসিনা নবি মুম্বাইখক্তা নত্তনা পুনে অমসুং গোৱাবুসু মুম্বাইগা হেন্না নক্নহল্লগনি। থোং অসি শাবদা জাপান্দগী মতেং লৌখি, অসিগীদমক্তা ঐহাক্না জাপানগী সরকারবু থাগৎচরি। ঙসিদি ঐখোয়গী লাইওইখ্রবা মন্ত্রী, শিঞ্জো অবেবু ঐহাক্না নীংশিংজরি। থোং অসি য়ারিবমখৈ থুনা লোইশিন্নবা ঐখোয় অনিনা ৱারেপ লৌমিন্নখিবনি।
অদুবু মরুপশিং, অতল সেতুবু ঐখোয়না অকক্নবা মিৎয়েংদগী য়েংবা য়ারোই। অতল সেতু হায়বসিদি ভারতকী অপাম্বগী ময়েক শেংবা খোল্লাও অমনি, ইং 2014দা লৈবাক শিনবা থুংবনা অপুনবা ওইনা লাওখিবা খোল্লাওনি। ঐহাক্কী ইফমদা মীখলগী থৌদাং শিন্নখিবা মতমদা, ঐহাক্না 2014গী মীখলগীদমক্তা রাইগর লানবন্দা চৎখি। ঐহাক্না ছত্রপতি শিবাজী মহারাজকী সমাধীগী মমাংদা মতম খরা ফমদুনা লেনখি। ৱারেপ কয়াবু মায় পাক্না ওইথোকহনবা, মীয়ামগী পাঙ্গল শিজিন্নদুনা লৈবাক্কী পাঙ্গল ওইহনবা মহাক্কী মসিগুম্বা মিৎয়েংশিং অসি ঐগী মাঙদা শঙ-শঙ লাওনা উজখি, মদুমক ঐহাক্না থৌজাল অমনি হায়না খনখি। থৌদোক অসি ঙসিদি চহি 10 শুরক্লে। হায়রিবা চহি 10 অসিগী মনুংদা, লৈবাক অসিনা মশাগী মঙলান কয়ানা মঙফাওনরকপগী মতৌ উবা ফংখ্রে। অতল সেতু অসিদি মদুগুম্বা মায় পাকপগী মমি অমনি।
থোং অসিনা নহা ওইবা মরুপশিংগী মফমদা অনৌবা থাজবা অমা পুদুনা লাক্লি। মখোয়গী অফবা তুংগী মতম্না অতল সেতুগুম্বা মতমগা চুনবা ইনফ্রাস্ত্রকচর ফাওদুনা চৎকনি। অতল সেতু অসিদি চাউখৎপা ভারত অমগী মমিনি। বিকশিৎ ভারত হায়বদু মতৌ করম্না ওইগনি হায়বগী মসিনা খুদম অমা ওইরগনি। বিকশিৎ ভারত্তা পুম্নমক্কী খুদোংচাবা ফংগনি। বিকশিৎ ভারত্তা অথাপ্পা কয়া নকশিন্নরক্কনি, লৈবাক্কী কাচিন কোয়া খুদিংমক অমত্তা ওইনা পুল্লগনি। পুন্সি নত্ত্রগা কারবার ওইরো, পুম্নমক অয়েৎপা অমত্তা য়াওদনা চৎলগনি। মসিমক অতল সেতুগী পাউজেলনি।
ঐহাক্কী ইমুংগী মীওইশিং,
হৌখিবা চহি 10দা ভারত্তা অহোংবা লাকখ্রে, মসিগী মতাংদা মীয়াম্নসু য়াম্না ঙাঙনখ্রবনি। চহি 10গী মমাংগী ভারত নীংশিংলুবা মতমদা অহোংবা কয়া য়াম্না লাকখ্রবগে হায়বসি ময়েক শেংনা খঙবা ঙমগনি। চহি 10গী মমাংদা লুপা করোর লিশিং কয়াগী অচৌবা ৱাথোক কয়াগী মতাংদা ঙাঙনরম্মি। ঙসিদি লুপা করোর কয়াগী অচৌবা প্রোজেক্তশিংগী মতাংদা ৱারী শান্নরি। লৈঙাকগী পান্দম অসি লৈবাক পুম্বনা য়েংনরি।
লৈবাক অসিনা অৱাং নোংপোক লমদমদা ভুপেন হজারিকা সেতু অমসুং বোগোবিল ব্রিজকুম্বা মেগা প্রোজেক্ত কয়া মপুং ফানা লোইশিনবগী মতৌ উরে। ঙসিদি অতল তন্নেল অমসুং চিনাব ব্রিজকী মতাংদা ৱারী শানরি। এক্সপ্রেসৱে অমগী মতুংদা অমগী মতাংদা ৱারী শান্নরি। ভারত্তা মতমগা চুনবা রেলৱে স্তেসন কয়া শাবগী মমি ঐখোয়না ঙসি উরি। ইস্তর্ন অমসুং ৱেস্তর্ন ফ্রৈত কোরিদোরনা রেলৱেগী শক্তম্বু হোংদোক্কদৌরে। বন্দে ভারত, নমো ভারত, অমৃত ভারত ত্রেনশিংনা মীচম মীয়ামগী চত্থোক চৎশিনা তৌবগী মতৌবু হেন্না লাইথোকহল্লি অমসুং মতমগা চুনহল্লি। ঙসিদি, লৈবাক অসিদা চয়োল খুদিংগী অনৌবা এয়রপোর্ত অমা শঙ্গারে।
মরুপশিং,
মুম্বাইদা, মহারাস্ত্রদা হৌখিবা চহি খরসিদা মেগা প্রোজেক্ত কয়া অমা মপুংফানা লোইশিনখ্রে অমসুং কয়া অমসু অথুবা মতমদা লোইশিল্লগনি। মমাংগী চহিমক্তদা বালা সাহেব থাকুর স্মৃধী মহামার্গপু মীয়ামদা খুৎশিন্নখি। নবি মুম্বাই এয়রপর্ত অমসুং কোস্তেল রোদ প্রোজেক্ত অসিদসু খোঙজেল য়াঙনা থবক পায়খৎলি। কোস্তেল রোদ প্রোজেক্ত অসিনা মুম্বাই মহানগরগী কন্নেক্তিবিতীবু মপুং ফানা হোংদোক্লগনি। ওরেঞ্জ গেত, ইস্তর্ন ফ্রীৱে অমসুং মরিন দ্রাইবকী অন্দর্গ্রাউন্দ তন্নেলনা মুম্বাইদা চত্থোক চৎশিনবা তৌবা য়াম্না হেন্না নুংঙাইহল্লগনি।
মথংগী চহি খরগী মতুংদা, মুম্বাইদা খ্বাইদগী অহানবা বুল্লেত ত্রেন চেল্লগনি। দিল্লী মুম্বাই ইকোনোমিক কোরিদোরনা মহারাস্ত্রবু সেন্ত্রেল অমসুং নোর্থ ইন্দিয়াগা শম্নগনি। মহারাস্ত্রবু তেলঙ্গানা, ছতিসগর অমসুং অতোপ্পা য়ুম্লোন্নবা রাজ্যশিংগা শম্নহন্নবা ত্রান্সমিসন লাইন নেতৱর্ক থারি। মসিদা নত্তনা, ওইল অমসুং গ্যাস পাইপ্লাইন ওইরো, ঔরঙ্গাবাদ ইন্দস্ত্রীএল সিতী ওইরো, নবি মুম্বাই এয়রপোর্ত ওইরো, শেন্দ্র বিরকিন ইন্দস্ত্রীএল পার্ক ওইরো, মসিগুম্বা অচৌবা প্রোজেক্তশিংনা মহারাস্ত্রগী শেন্মিৎলোন্দা অচৌবা শাফু অমা পীগদৌরিবনি।
ঐহাক্কী ইমুংগী মীওইশিং,
তেক্সপেয়রশিংগী শেল কয়া অসি লৈবাক্কী চাউখৎ থৌরাংগীদমক্তা মতৌ করম্না শিজিন্নরি হায়বা ঙসিদি লৈবাক পুম্বনা উন্নরে। অদুবু, লৈবাক অসিদা দিকেদ কয়াদগী শক্তি পায়রম্বশিংনা লৈবাক্কী মতম অমসুং তেক্সপেয়রশিংগী শেল অনিমক্কী করিমত্তা খন্দনা লৈথোক্লমখি। মরম অদুনা, হায়রিবা মতমশিং অসিদা প্রোজেক্ত অমত্তা পায়খত্তে, লোইশিন্দে। পায়খৎপা হৌরবসু দিকেদ কয়া অদুম পন্দুনা লৈবা ঙাক্তনি। মহারাস্ত্রদা প্রোজেক্ত কয়া অমনা মসিগী খুদম ওইরিবনি। নলিৱান্দে দামগী থবক অসি দিকেদ মঙাগী মমাংদা হৌখিবনি। মসিবু ঐখোয়গী সরকারনা লোইশিনখি। উরান-খারকোপর রেল লাইন অসিসু চাউরাক্না দিকেদ অহুমগী মমাংদা হৌখিবনি। মসিসু দবল ইঞ্জিন সরকারনা লোইশিনখিবনি। নবি মুম্বাইগী মেত্রো প্রোজেক্তসু মতম শাংনা পন্দুনা লৈখি। মফমসিদা দবল ইঞ্জিন সরকার লাক্লবা মতুংদা ঐখোয়না থবক অসিগী খোঙজেল য়াঙখৎহন্দুনা অহানবা ফেজ লোইশিনবা ঙমখ্রে।
ঐখোয়না ঙসি ফংলিবা অতল সেতু অসিগী প্লান্নিংসু চহি কয়াদগী চত্থদুনা লাকখিবনি। মসিনা মুম্বাইদা পীগদবা কান্নবা অসি শাংলবা মতমদগী খন্নদুনা লাকখিবনি, অদুগা মসিবু মপুং ফাহনবগী থৌদাংদি ঐখোয়গী সরকারনা ফংজখি। অদোম্না অমুক্তা নীংশিংবীয়ু, বেন্দ্রা-ৱর্লী সী লিঙ্ক প্রোজেক্ত অসি অতল সেতুদগী চাউরাক্না শরুক মঙামুক তাথৈ। মসি শাবদা মমাংগী সরকারনা চহি 10 হেন্না চঙহনখি অমসুং বজেৎসু শরুক 4-5 হেন্না চঙখি। মসিদি মতমদুদা সরকার পায়রম্বা মীওইশিংগী থবক তৌবগী মওং-মতৌনি।
মরুপশিং,
অতল সেতুগুম্বা ইনফ্রাস্ত্রকচর প্রোজেক্তনা মীয়ামদা খুদোংচাবা পীবা খক্তা নত্তনা থবক পীবগী অচৌবা পাম্বৈ অমসু ওইখি। মসি শাবদা ঐহাক্কী মরুপ শিন্মী চাউরাকপা লিশিং 17, ইঞ্জিনিয়র 1500না থবক ফংখি। মসিদা নত্তনা, ত্রান্সপোর্তকা মরী লৈনবা কারবার। শেম-শাবগা মরী লৈনবা কারবার কয়ানা থবক ফংখি। মসিনা হৌজিক্তি, কারবারবুসু চাউখৎহল্লগনি, পুন্সি মহিংসু হেন্না নুংঙাইহল্লগনি।
ঐহাক্কী ইমুংগী মীওইশিং,
ভারতকী চাউখৎ থৌরাং অসি ঙসিদি ত্রেক অনিদা অমত্তা ওইনা পাংথোক্লি। নাকল অমদনা, লাইরবশিংগী পুন্সি নুংঙাইহন্নবা অচৌবা খোঙথাং কয়া পায়খৎলি, অদুগা অতোপ্পা নাকল অমদনা, লৈবাক্কী কাচিন কোয়া খুদিংদা অচৌবা স্কিম কয়া পায়খৎলি। ঐখোয়না অতল পেন্সন য়োজনাসু চলায়রি, অতল সেতুসু শারি। ঐখোয়না অয়ুশমান ভারত য়োজনাসু চলায়রি অদুগা বন্দে ভারত – অমৃত ভারত ত্রেনসু শারি। ঐখোয়না পি.এম. কিসান সম্মান নিধীসু পীরি অদুগা পি.এম. গতিশক্তীসু শারি। ঙসিগী ভারতনা হায়রিবা থবকশিং অসি মতম অমত্তদা করম্না পাংথোকপা ঙম্লিবনো? মসিগী পাউখুমদি – পাংথোক্কে খনবা অমসুং থম্মোই শেংবা অসিনি। ঐখোয়গী সরকারগী অপাম্বা অসি ময়েক য়াম্না শেংই। ঙসিদি সরকারনা মীয়ামখক্কীদমক্তা লুনা খল্লি। মসিগুম্বা অপাম্বা অমসুং থম্মোই শেংবগী মতৌনা থবকশিংসু মথন্নতা অদুমা লোইশিনবা ঙমহল্লে।
মমাংদা মতম কুইনা পাল্লম্বা সরকারনা মসিগুম্বা ৱাখল্লোন লৈতবনা চাউখৎ থৌরাংদগী নাথৈদুনা মতম শাংনা লাকখিবনি। মখোয়না বিকশিৎ ভারতকী মতাংদা খনখিদে, ইনফ্রাস্ত্রকচর শেমগৎপগী ৱাকহলসু লৈখিদে। ইং 2014গী মমাংগী চহি 10দা ইনফ্রাস্ত্রকচরগীদমক্তা শুপ্নগী লুপা করোর লাক্ষ 12 খক কাইথোকখি। অদুবু, ঐখোয়গী সরকারনা চহি 10গী মনুংদা লুপা করোর লাক্ষ 44গী ইনফ্রাস্ত্রকচরগী বজেৎ শেমখি। মসিনা মরম ওইরগা, লৈবাক অসিদা ঙসি ইনফ্রাস্ত্রকচরগী অচৌবা প্রোজেক্ত কয়া পায়খৎলিবনি। মহারাস্ত্রদা কেন্দ্র সরকারনা লুপা করোর লাক্ষ 8কী ইনফ্রাস্ত্রকচর প্রোজেক্ত কয়া মপুং ফানা লোইশিনখ্রে, অদুগা থবক পায়খৎলিবা প্রোজেক্ত কয়া অমসু য়াওরি। শেনফমশিং অসিনা সেক্তর কয়াদা থবক্কী খুদোংচাবা কয়াসু শেম্লি।
মরুপশিং,
ঐখোয়না ঙসি ইমুং খুদিংদা বেসিক ফেসিলিতী ফংহনবগী পান্দমদা থবক পায়খৎলি। বিকাস ভারত সঙ্কল্প য়াত্রাগী মখাদা, ঙসিদি মোদীগী গেরেন্তীগী গারীনা লৈবাক্কী কাচিন কোয়া খুদিংদা য়ৌশিল্লি। অতোপ্পদগী থাজবা থম্বা লোইশিল্লকপা মতমদা মোদীগী গেরেন্তী হৌই। ঐখোয়গী ইচে-ইচলশিংনা মসি য়াম্না নীংথিনা খঙখ্রবনি। খুঙ্গং নত্ত্রগা শহর অইরো, লু-নানবা নত্ত্রগা এজুকেসন ওইরো, হিদাক লাংথক নত্ত্রগা শেল তানবা ওইরো, ঐখোয়গী ইমাশিংনা স্কিমশিং অসিদগী খ্বাইদগী য়াম্বা কানবা ফংনখিবনি। জন ঔশধী কেন্দ্রশিংদা চাদা মরিফুগী দিস্কাউন্ত পীদুনা হিদাক লাংথকশিং অহোঙবা মমলদা ফংহল্লি।
মোদীগী গেরেন্তী অসিদি লাইরবা ইমুংশিংগী ইচে-ইচলশিংদা পক্কা য়ুম পীবনি। মমাংদা কনামত্তনা করি অৱাৎ অপা লৈবগে হংবীদবা অদু মোদীনা হংখি, বেঙ্কশিংদগী মতেং পীখি। পি.এম. স্বনিধী য়োজনানা মুম্বাইগী স্ত্রীত ভেন্দর কয়াদা খুদোংচাবা ফংহনখি। ঐখোয়গী সরকারনা নুপীশিংগী সেল্ফ হেল্প গ্রুপশিংদা মতেং পীরি। হৌখিবা চহি খরসিদা, ঐখোয়না নুপী কয়া অমবু লাক্ষপতি দিদি ওইহনখি। মথংগী চহিশিংদা নুপী করোর 2 বু লাক্ষপতি দিদি ওইহনবা হায়বসি ঐখোয়গী পান্দম্নি।
মহারাস্ত্রগী NDA সরকারনা চলায়বা অনৌবা খোঙথাং অসিনা নুপীশিংগী মপাঙ্গল হাপ্পগী মতাংদা অচৌবা থৌদাং কয়া য়াগনি। মুখ্য মন্ত্রী মহিলা শক্ষমীকরন অভিয়ান অমসুং নারি শক্তীদুত অভিয়ান্না চাউখৎ থৌরাংদা অনৌবা খোঙজেল হাপকনি। দবল ইঞ্জিন সরকারনা মহারাস্ত্রগী চাউখৎ থৌরাংগীদমক্তা মসিগুম্বা ৱাখল্লোনগা লোয়ননা থবক তৌগনি হায়না ঐহাক্না পুম্নমক্কী মফমদা থাজবা পীজরি। মহারাস্ত্রনা বিকশিৎ ভারতকী অচৌবা য়ুম্বী অমা ওইহন্নবগীদমক্তা ঐখোয়না থবক অমত্তা চিত্থদনা পাংথোক্কনি।
ঐহাক্না মীয়াম পুম্নমকপু অনৌবা প্রোজেক্তশিং অসিগীদমক্তা থাগৎচরি। ঐহাক্না ইমা-ইবেল অমসুং ইচে-ইচলশিংবু অখন্ননা কোক নোঞ্জরি। অদোম্না মশিং য়াম্না লাকপীদুনা থৌজাল পীবিবা অসিবু ঐহাক্না তসেংনা থাগৎচরি।
পুম্নমকপু অমুক্কা হন্না থাগৎচরি।
