মন্ত্রীমন্দলগী ঐগী মরুপ, অমিত সাহ, নেসনেল কোওপরেতিপ য়ুনিয়নগী প্রসিদেন্ত দিলিপ সঙহানি, দোক্তর চন্দ্রপাল যাদব, লৈবাক্কী মফম কয়াগী কোওপরেতিপ য়ুনিয়নশিংগী মেম্বর পুম্নমক, লৌমী ইচিন-ইনাওশিং অমসুং ইচন-ইচেশিং, অতোপ্পা শক্নাইরবশিং, ইবুংঙো অমসুং ইবেম্মাশিং, ময়াম পুম্নমক ১৭শুবা ইন্দিয়ান কোওপরেতিপ কংগ্রেসতা তরাম্না ওকচরি। মীফম অসিদা শরুক য়ারিবা খুদিংমক ঐনা তরাম্না ওকচরি।
মরুপশিং,
ঙসি ঐখোয়গী লৈবাক অসি চাউখৎলবা অমসুং মশা মরোমদোম লেপচবা ঙম্বা ভারত অমগী পান্দম ফংনবা মাইকৈদা চঙশিল্লি। ঐখোয়গী পান্দম খুদিংমক ফংনবা মীওই খুদিংমক্কী হোৎনবা দরকার ওই হায়না ঐনা লাল কিলাদগী হায়খ্রে। ঙসি, করিগুম্বা ঐখোয়না মালেমদা শঙ্গোম পুথোকপদা মকোক্তা লৈরিবদি,দাইরি কোওপরেতিপশিংনা য়াম্না চাউনা মতেং পাংলি। করিগুম্বা ভারতনা মালেমদা চিনি খ্বাইদগী য়াম্না পুথোকপা লৈবাক ওইরবদি, মসিদসু কোওপরেতিপনা অচৌবা থৌদাং লৌরি। লৈবাক অসিগী অয়াম্বা শরুক্তা লায়রবা লৌমীশিং শৌগৎপদা কো-ওপরেতিপশিংনা অচৌবা থৌদাং লৌরি। কোওপরেতিপ সেক্তরদা শঙ্গোম পুথোকপগী থবক অসি চাদা ৬০ ঐখোয়গী ইমাশিং অমসুং ইচনশিংনা পাংথোক্লি। চাউখৎলবা ভারত অমগী পান্দম ফংনবা হোৎনবা মতমদা, কোওপরেতিপ চাউখৎহন্নবা ঐখোয়না ৱারেপ লৌরে। অহানবা ওইনা ঐখোয়না কোওপরেসনগী তোখাইবা মিনিস্ত্রি অমা শেম্লে অমসুং তোখাইবা বজেত অমা লৈরে। ঙসিদি কোর্পোরেত সেক্তরগুম্না কোওপরেতিপ সোসাইতিশিংনা চপ মান্নবা খুদোংচাবশিং অমসুং চপ মান্নবা মফমশিং পীরে। মখোয়গী থৌনা হাপ্নবা কোওপরেতিপ সোসাইতিশিংগী তেক্স রেতশু হন্থরে। চহি কয়া পন্দুনা লাকপা কোওপরেতিপ সেক্তরগা মরী লৈনবা ৱাফমশিং য়াংনা লোইশিল্লে। ঐখোয়গী সরকারনা কোওপরেতিপ বেঙ্কশিংসু মপাঙ্গল কনখৎহল্লে। অনৌবা মশাশিং হাংদোক্নবা, মীয়ামগী য়ুমথোংশিং য়ৌনবা অমসুং বেঙ্কগী থবকশিংগী খুদোংচাবা ফংনবা কোওপরেতিপ বেঙ্কশিং হাংদোক্নবা নিয়মশিং লাইথোকহল্লে।
মরুপশিং,
মশিং য়াম্লবা ঐখোয়গী লৌমী ইচিন-ইনাওশিং অমসুং ইচন-ইচেশিং থৌরম অসিদা শরুক য়ারি। হৌখিবা চহি ৯দা, থৌশিলশিং হোংলে, ৱারেপশিং লৌরে, মখোয়না করি অহোংবা পুরকপগে হায়বা, অদোম খঙলে। ২০১৪গী মমাঙদা লৌমীশিংনা য়াম্না তোইনা করি পীয়ু হায়না তকশিনখিবগে হায়বা অদোম খঙলবরা? মখোয়না সরকারদগী মতেং খর খক ফংখি হায়না ফোঙদোকখি। মখোয়না ফংখিবা মতেং খর অদুসু, মিদলমেনগী একাউন্তদা চঙখি। লৈবাক অসিগী অপীকপা অমসুং লায়রবা লৌমীশিং সরকারগী স্কিমশিংগী কান্নবা ফংখিদে। হৌখিবা চহি ৯ অসিদা মসিগী ফিবম অসি মপুংফানা হোঙলে। ঙসিদি লৌমী করোর কয়া পি.এম কিষান সম্মান নিধিগী কান্নবা ফংলে। মিদলমেন লৈত্রে, শাশিন্নবা বেনিফিসরিশিং লৈত্রে। লৌমীশিংগী বেঙ্ক একাউন্তশিংদা লুপা করোর লাখ ২.৫ হাপখ্রে। মসি কয়া য়াম্লবা শেনফমনো, অদোম খন্দুনা য়েংউ। ২০১৪গী মমাঙদা চহি ৫গী লৌউ-শিংউগী অপুনবা বজেত অসি লুপা করোর লিশিং ৯০গী মখাদা লৈখি। লৈবাক অসিদা লৌউ-শিংউগী চাদিং তৌখিবা শেনফমগী শরুক অহুমলোম, ঐখোয়না পি.এম কিষান সম্মান নিধি কৌবা স্কিম অমা খক্তদা চাদিং তৌরে।
মরুপশিং,
মালেমদা লেপ্তনা মমল হেনগৎলক্লিবা হার অমসুং কেমিকেলশিংগীদমক লৌমীশিংনা ৱারোইদবনি, মসি থাজবা অমনি অমসুং মসি মোদীনা পীবা থাজবনি, কেন্দ্রগী বি.জে.পি সরকারনা অদোমদা পীবা থাজবনি। ঙসিদি লৌমীশিংনা য়ুরিয়া বেগ অমদা লুপা ২৭০গী মখাদা ফংলে। হায়রিবা বেগ অসি বাংলাদেসতা লুপা ৭২০, পাকিস্তান্দা লুপা ৮০০ অমসুং চাইনাদা লুপা ২১০০ দা ফংলি। চাউখৎলবা লৈবাক অমেরিকাগুম্বদা, লৌমীশিং য়ুরিয়া বেগ অমদা লুপা লিশিং ৩ হেনবদা ফংলি। লৌমীশিংগী পুন্সিদা অহোংবা পুরক্নবা কয়া য়াম্না কন্না হোৎনবগে হায়বা মসিনা তাক্লে। করিগুম্বা অদোম্না হৌখিবা চহি ৯দা লৈখিবা হারগী সবসিদি অদু খঙলবদি, ঐনা ফোঙদোক্লিবা ৱাফম অসি হারগী সবসিদি খক্তগীনি। বি.জে.পি সরকারনা লুপা করোর লাখ ১০ হেন্না চাদিং তৌরে। মসিদগী হেন্না চাউবা করম্বা গরেন্তি লৈরিবগে?
মরুপশিং,
হেক মকোক্তগী হৌনা, লৌমীশিংনা মখোয়গী মহৈ-মরোংশিংগী চুনবা মমল ফংনবা ঐখোয়গী সরকারনা য়াম্না কন্না হোৎনদুনা লাক্লি। হৌখিবা চহি ৯দা, এম.এস.পি হেনগত্তুনা, এম.এস.পিদা লৈদুনা লুপা করোর লাখ ১৫ হেন্না চাদিং তৌখ্রে। অতোপ্পা ৱাহৈদা, চহি খুদিংগী, কেন্দ্র সরকারনা লৌউ-শিংউ অমসুং লৌমীশিংগীদমক লুপা করোর লাখ ৬.৫ হেন্না চাদিং তৌখি। সরকারনা চাউরাক্না চহি খুদিংগী লৌমী অমদা লুপা লিশিং ৫০ পীখি হায়বনি। লৌমীশিংনা চহি খুদিংগী তোঙান-তোঙানবা মওংদা লুপা লিশিং ৫০ ফংনবা লৌমীশিংদা বি.জে.পি সরকারনা থাজবা পীরে। মসিগী মোদীগী থাজবনি। ঐনা থবক ওইনা পাংথোকখিবা অদু ঐনা হায়বনি, মসি ৱাশক নত্তে।
মরুপশিং,
নুমিৎ খরগী মমাঙদা লৌমীশিংগী য়াইফনবা অতোপ্পা মরুওইবা ৱারেপ অমা লৌরে। লৌমীশিংগী লুপা করোর লাখ ৩.৭০গী পেকেজ অমা কেন্দ্র সরকারনা লাউথোক্লে। মসি খক নত্তনা, চু থাবা লৌমীশিংগী চুগী মমল কুইন্তল অমদা লুপা ৩১৫দা হেনগৎলে। মসিনা চু থাবা লৌমী অমসুং চিনিগী মিলশিংদা থবক তৌরিবা শিন্মী করোর ৫ হেন্না হকথেংননা কান্নবা ফংলগনি।
মরুপশিং,
লৈবাক অসিগী খু্ঙ্গংশিং অমসুং লৌমীশিংগী শক্তি হেনগৎহন্নবা, অমৃত কালগী মতমদা লৈবাক অসিগী কোওপরেতিপ সেক্তরনা অচৌবা থৌদাং লৌগদবনি। চাউখৎলবা ভারত, মশা মরোমদোম লেপচবা ঙম্লবা ভারত শেমগৎনবা ৱারেপ্তা সরকার অমসুং কোওপরেসন্না মপাঙ্গল শরুক অনি হেনগৎহনগদবনি। দিজিতেল ইন্দিয়াদা অরোন-অথুপ লৈতনা সরকারনা থবক তৌবা হেনগৎলকপা অদোম্না উরে, বেনিফিসরি খুদিংমক্তা হকথেংননা কান্নবা ফংহল্লে। অৱাংবা থাক্তা শেঞ্জা-থুমজা অমসুং মীচং মীখাই নাইবা লৈত্রে হায়বা ঙসিদা লৈবাক অসিগী খ্বাইদগী য়ারবা মীওই ফাওবনা থাজরে। হৌজিক কোওপরেসন অসি অসুক্কী মতিক চাউখৎহনবদা, মীচম মীয়াম, ঐখোয়গী লৌমীশিং, ঐখোয়গী শা-ষন লোইরিবশিং মখোয়গী নোংমগী পুন্সিদা হায়রিবা থবকশিং অসি থেংনগনি। কোওপরেতিপ সেক্তর অসি অরোন-অথুপ লৈতবা অমসুং শেঞ্জা-থুমজা লৈতবা লৈঙাক্কী নমুনা অমা ওইহনবা তঙাইফদে। লৈবাক অসিগী মীয়াম্না কোওপরেতিপশিংদা থাজবা হেনগৎহনগদবনি। দিজিতেলগী থবকশিংনা কোওপরেসন য়োকখৎলে। ঐখোয়না কেস ত্রান্সসেক্সনগী মখা পোনবা তোকহনগদবনি। মসিগীদমক ঐনা অচৌবা থবক অমা অদোমগীদমক পায়খৎলে, মিনিস্ত্রি লিংখৎলে। হৌজিক অদোম্না অচৌবা থবক অমা পাংথোক্লে, দিজিতেল ওইরে, কেস শীজিন্নদ্রে, অরোন-অথুপ লৈত্রে। করিগুম্বা ঐখোয়না পুন্না থবক তৌমিন্নরবদি, ঐখোয় শোইদনা য়াংনা মাইপাক্কনি। ঙসিদি লৈবাক অসিগী দিজিতেল ত্রান্সসেক্সনশিংগীদমক মালেমদা ভারত মমিং চৎলে। অসিগুম্বা ফিবম অসিদা, কোওপরেতিপ সোসাইতিশিং, কোওপরেতিপ বেঙ্কশিংসু মসিদা মাংজিল থাগদবনি। মসিনা কৈথেলদা অদোমগী থবক পাংথোকপা ঙম্বা হেনগৎহনগনি অমসুং অরোন-অথুপ লৈতবা অমসুং হেন্না চাংদম্নবশু ঙমগনি।
মরুপশিং,
প্রাইমারি থাক্তা খ্বাইদগী মরুওইবা কোওপরেতিপ সোসাইতি, পেক্স অসি হৌজিক অরোন-অথুপ লৈতবা অমসুং অনৌবা থবক্কী নমুনা অমা ওইরে। হৌজিক ফাওবদা পেক্স লিশিং ৬০ হন্না কম্পুতরাইজ তৌরে হায়বা ঐ খঙলে অমসুং মসিগীদমক ঐনা অদোম থাগৎচরি। তেক্নোলোজি শীজিন্নদুনা কোওপরেতিপশিং মখোয়গী থবক ফজনা পাংথোকপা য়াম্না মরুওই। কোওপরেতিপশিংনা কোর বেঙ্কিংগুম্বা থবক অমা পায়খৎপা মতমদা, মেম্বরশিংনা ওনলাইন ত্রান্সসেক্সনশিং চাদা ১০০ পাংথোক্কনি, মসিনা লৈবাক অসিদা য়াম্না চাউনা কানবা পীগনি।
মরুপশিং,
ভারতনা মপান্দা থাদোকপা মখা তানা অনৌবা রেকোর্দশিং থম্বা ঙসি অদোমসু উরে। ঙসিদি মালেম শীনবা থুংনা মেক ইন ইন্দিয়াগী মরমদা ৱারি শানরে। অসিগুম্বা ফিবম অমদা, হিরম অসিদা মসিনা থবক তৌবা হেনগৎনবা সরকারনা হোৎনরি। ঐখোয়না মেনুফেকচরিংগা মরী লৈনবা কোওপরেতিপ সোসাইতিশিং পুক্নিং থৌগৎলি। মখোয়গী তেক্সশিং য়াম্না হন্থরে। মপান্দা থাদোকপা হেনগৎহনবদা কোওপরেতিপ সেক্তরসু অচৌবা থৌদাং অমা লৌরি। দাইরি সেক্তরদা লৈরিবা ঐখোয়গী কোওপরেতিপশিংনা অচৌবা থবক কয়া পাংথোক্লে। ঙসিদা য়াম্লবা শঙ্গোম মপং, মখন অমসুং ঘি মপান্দা থাদোক্লে। হৌজিক খোইহিশু মপান্দা থাদোক্লে। ভারতকী মিল্লেতশিং মালেম্না শকখঙবা হৌরকপা অদোম খঙলে। শ্রী অন্নগী মরমদা ৱারি শানবা হেনগৎলক্লে। মসিগীদমক, মালেমদা অনৌবা কৈথেল অমা থৌরাং তৌরে। ঐনা হন্দক অমেরিকাদা চৎলুবদা, রাস্ত্রপতিগী চাক্লেন্দা শ্রী অন্নগী মথেল কয়া য়াওরমখি। ভারত সরকারনা হোৎনবদগী, চৎলিবা চহি অসি মালেম শীনবা থুংনা মালেমগী মিল্লতশিংগী চহি হায়না থৌরম পাংথোক্লি। লৈবাক অসিগী চীঞ্জাক মালেমগী কৈথেলদা য়ৌহন্নবা অদোম হোৎনরোইদ্রা? মসিনা লায়রবা লৌমীশিংগী অচৌবা শেন্থোক লম্বী অমা পীগনি। মসিনা মচি ওইবা চীঞ্জাক্কী অনৌবা চৎনবী অমা হৌরগনি। মাইকৈ অসিদা অদোম হোৎনগদবনি অমসুং সরকারগী থবকশিং চাউখৎহনগদবনি।
মরুপশিং,
চুগী কোওপরেতিপশিংগী মরমদা অদোমগী মফমদা ঐনা ৱাফম খর ফোঙদোক্কনি। লৌমীশিংগী চুগী মমল তানা ফংবা মতম অমা লৈম্মী অমসুং চহি কয়া শেন পীথোক্তনা লৈখি। করিগুম্বা চুগী পোৎথোক হেনগৎলবসু, লৌমীশিং অৱাবা মায়োক্নখি অমসুং করিগুম্বা চুগী পোৎথোক হন্থরবসু, লৌমীশিংগী অৱাবা হেনগৎলকখি। অসিগুম্বা ফিবম অসিদা, চু থাবা লৌমীশিংনা কোওপরেতিপশিংদা লৈরম্বা থাজবা মাঙখি। মসিগী অৱাবা অসি মতম চুপ্পগী ওইনা কোকহন্নবা ঐখোয়না মীৎয়েং চঙখি। চু থাবা লৌমীশিং পীথোক্তনা লৈরিবা শেনফমশিং পীথোক্নবা চিনিগী মিলশিংদা ঐখোয়না লুপা করোর লিশিং ২০গী পেকেজ অমা পীখি। চুদগী ইথানোল শুংনবা অমসুং পেত্রোদা ইথানোল য়াশিন্নবা ঐখোয়না থবক পায়খৎলে। হৌখিবা চহি ৯দা, চিনিগী মিলশিংদগী লুপা করোর লিশিং ৭০ রোমগী ইথানোল লৈরে। মসিনা চিনিগী মিলশিংনা চু থাবা লৌমীশিংদা মতম চানা শেন পীথোকপা মতেং পাংলে। চুগী মমলদা তেক্স লৌরম্বা অদু ঐখোয়গী সরকারনা লৌদ্রে। ঐখোয়না চহি কয়া শুরবা তেক্সকা মরী লৈনবা ৱাথোকশিং য়াশিন্নবা পুরক্লে। অরিবা শেনফমশিং পীথোক্নবা কোওপরেতিপ সুগর মিলশিংদা সরকারনা লুপা করোর লিশিং ১০গী অখন্নবা মতেং অমা পীরে। হায়রিবা থবকশিং অসিনা চুগী থবকশিংদা তুংকোইনা চৎনবা য়ারবা অহোংবা পুরক্লে, সেক্তর অসিদা কোওপরেতিপশিং মপাঙ্গল কনখৎলক্লে।
মরুপশিং,
অমরোমদা ঐখোয়না মপান্দা থাদোকপা হেনগৎহনগদবনি, অমরোমদা ঐখোয়না মপান্দগী পুশিল্লকপগী মখা পোনবা ঐখোয়না হন্থহনগদবনি। ভারতনা মহৈ-মরোংশিং মশাগী ওক্নবা পুথোক্লে হায়না ঐখোয়না তোইনা হায়রি। অদুবু অশেংবদি, ওক্নবা পুথোক্লিবা অসি গেহু অমসুং ফৌ খক্তনি, চিনি ওক্নবা পুথোকপা ঙমদ্রি। চীঞ্জাক ৱাৎহন্দনবা ঐখোয়না ৱারি শাবা মতমদা, মসি য়াম অমসুং চেং খক্তা নত্তে। অচা থাউ পুশিল্লকপা, হৱায়শিং পুশিল্লকপা, ঙাগী মচীঞ্জাক পুশিল্লকপা, শেম-শারবা চীঞ্জাকশিং পুশিল্লকপা, ঐখোয় চহি খুদিংগী ফিবম শোক্কনি, ঐগী লৌমী ইচিন-ইনাওশিং মিকপ থোকপীয়ু, চহি খুদিংগী লুপা করোর লাখ ২.৫ ঐখোয়না মপান লৈবাকশিংদা থাদোক্লি। চীঞ্জাক মরাংকাইনা ফংলিবা ভারতগুম্বা লৈবাক অমদা মসি অচুম্বরা? অচৌবা থাজবা য়ারবা কোওপরেতিপ সেক্তর অমগী লুচিংবশিং ঐগী মাঙদা ফম্লি, মরম অদুনা মাইকৈ অসিদা অওনবা অমা পুরক্কনি হায়না ঐনা অদোমগী মফমদা থাজবা থম্লি। মসিগী শেনফম অসি করিগী ভারতকী লৌমীশিংগী ফুরিৎখাউদা চঙহল্লোইদৌরিবনো? করিগী মপান্দা চৎহলখিদৌরিবনো?
মরুপশিং,
ঐখোয়গী অচৌবা থাউগী গুহাশিং লৈতে হায়বা ঐখোয় খঙলে, ঐখোয় মপান্দগী পেত্রো অমসুং দিজল লৈরি, মসি ঐখোয় তঙাইফনা তৌদবা য়াদবনি। অদুবু, চীঞ্জাক মশাগী ওক্নবা পুথোকপা ঙমগনি। মসিগীদমক মিসনগী মওংদা সরকারনা থবক পায়খৎলে, প্লাম ওইল মিসন অমা হৌদোক্লে। পালমোলিন থাদুনা, মসিদগী পালমোলিন থাউ শুংলে। মসিগা লোয়ননা, থাউ থোকপা মরুশিং য়োকখৎনবা অচৌবা থবক কয়া পায়খৎলে। করিগুম্বা লৈবাক অসিগী কোওপরেতিপ ওর্গনাইজেসনশিংনা মিসন অসি পায়রবদি, ঐখোয়না কমদৌনা অচাথাউদা নিংতম্বা ফংবগে হায়বা অথুবা মতমদা ঐখোয়না উবা ফংগনি। অদোম্না পাম্বী থাবা, তেক্নোলোজি অমসুং লৈবগী মতাংদা লৌমীশিংদা ই-পাউ খুদিংমক পীবা ঙমগনি।
মরুপশিং,
কেন্দ্র সরকারনা ঙা য়োকপগী লমদা অতোপ্পা অনৌবা অচৌবা স্কিম অমা হৌদোক্লে। ঙসি পি.এম মতস্যা সম্পদা য়োজননা ঙা পুথোকপা হেনগৎহল্লে। লৈবাক অসিগী অপীকপা তুরেলশিং অমসুং অপীকপা পুখ্রিশিং ওইগেরা, খুঞ্জাশিং অমসুং লৌমীশিং স্কিম অসিদগী অহেনবা শেনফম ফংবা ঙম্লে। ঙাগী মচিঞ্জাক পুথোকপদসু মতেং পাংলে। ঙসিদি ঙা য়োকপগী লমদা কোওপরেতিপ সোসাইতি লিশিং ২৫ হেন্না থবক তৌরি। হায়রিবা থবকশিং অসিনা মরম ওইদুনা ঙসিদি ঙা য়োকপা, ঙা শেম-শাবা, ঙা ফাবা, ঙা লিদুনা থম্বা, কৌতা ঙা শেম্বা, ঙা পুথোক-পুশিন তৌবগী থবক হেনগৎলে। মসিনা ঙামীশিংগী পুন্সি মহিং ফগৎলে অমসুং থবক ফংহল্লে। হৌখিবা চহি ৯দা ইনলেন্দ ফিসরিগী থবকশু শরুক অনি হেনগৎলে। ঐখোয়গী কো-ওপরেসনগী তোখাইবা মিনিস্ত্রি লৈরে অমসুং মসিনা অনৌবা থবক কয়া পায়খৎলে। মসিগা চপ মান্ননা ফিসরিগী তোখাইবা মিনিস্ত্রি অমা শেম্নবা মতম কয়াগী মমাঙদগী তকশিন্দুনা লাক্লি। ঐখোয়না মিনিস্ত্রি লিংখৎলে, মসিগী তোখাইবা বজেত শেম্লে অমসুং হিরম অসিদা মহৈ চাবা উবা ফংলে। কোওপরেতিপ সেক্তরনা মসিগী হান্নগী থবক মওংদগী তোঙানবা খর তৌগদবনি। মসিগী শরুক অসিগীদমক সরকারনা থবক পায়খৎলি। ঙা য়োকপা য়াওনা অনৌবা হিরম কয়াদা হৌজিক পি.এ.সি.এসকী থৌদাং হেনগৎলক্লি। লৈবাক শীনবা থুংনা অনৌবা মলতিপর্পজ সোসাইতি লাখ ২ শেম্নবা পান্দমদা ঐখোয় থবক তৌরি।
মরুপশিং,
চহি কয়া, ফারমর্স প্রদুসরস য়ুনিয়ন নত্ত্রগা এফ.পি.ওশিং শেম্নবা ঐখোয়না অখন্নবা থবক পায়খৎতুনা লাক্লি। লৈবাক শীনবা থুংনা হৌজিক অনৌবা এফ.পি.ও ১০,০০০ শেমগৎলি অমসুং এফ.পি.ও ৫,০০০ হান্না শেমখ্রে। হায়রিবা এফ.পি.ওশিং অসি লায়রবা লৌমীশিংগী অচৌবা মতেং কয়া পাংলি। হায়রিবা এফ.পি.ওশিং অসিনা অপীকপা লৌমীশিং কৈথেলদা অচৌবা শক্তি অমা ওইরি। মরুদগী হৌরগা কৈথেল ফাওবদা, অপীকপা লৌমীনা থবক খুদিংমক মহাক্কী য়াইফনবা পাংথোকপা ঙমহল্লে। পি.এ.সি.একী খুৎথাংদা এফ.পি.ও শেম্নবা সরকারনা ৱারেপ লৌরে। মরম অদুনা সেক্তর অসিদা কোওপরেতিপশিংগী অচৌবা খুদোংচাবা লৈরে।
মরুপশিং,
লৌমীশিংগী শেন্থোক হেনগৎহন্নবা অতোপ্পা পাম্বৈশিং থিনবা সরকারগী থবকশিং কো-ওপরেতিপ সেক্তরনা মপাঙ্গল হাপকনি। খোইহি পুথোকপা, ওর্গনিক চীঞ্জাক, লৌবুক্তা সোলার পেনেলশিং শীজিন্নদুনা মৈ পুথোকপা, লৈবাক-লৈহাও চাংয়েং তৌবা, কোওপরেতিপ সেক্তরদা মতেং পীনবা অসি দরকার ওই।
মরুপশিং,
ঙসি, কেমিকেল য়াওদবা লৌউ-শিংউ, মহৌশাগী লৌউ-পথাপ অসি সরকারনা মরুওইনা লৌরে। মহাক হাৎপীগনু হায়না মালেম ইমা কপ্লি। থিয়েতরগী পাম্বৈনা ঐখোয় মিকপ থোকহন্নবা মহাক্না হোৎনখি। মওং অসিদা মীয়াম মিকপ থোকহন্নবা খুঙ্গং খুদিংমক্তা উৎনবা অসিগুম্বা মখলগী কাংবু অমা কোওপরেতিপ ওর্গনাইজেসন খুদিংমক্না থৌরাং তৌবা ঐনা পাম্মী। হন্দক পি.এম-প্রনাম কৌবা অচৌবা স্কিম অমা অয়াবা পীরে। স্কিম অসিগী পান্দমদি লৌমী কয়া কেমিকেল য়াওদবা লৌউ-শিংউগী থবক পায়খৎহনবনি। স্কিম অসিগী মখাদা, অতোপ্পা হারশিং অমসুং ওর্গনিক হারশিং পুথোকপদা মীৎয়েং চঙগনি। মসি লৈবাক লৈহাও কনগনি অমসুং লৌমীশিংনা লৌ উবদা চঙবা শেনফম হন্থহনগনি। মসিগী থবক অসিদা কোওপরেতিপ সোসাইতিশিংগী থৌদাং য়াম্না মরুওই। মসিগী খোঙজং অসিদা কোওপরেতিপ সোসাইতিশিং অঙম্বা থাক্তা শরুক য়ানবা ঐনা হায়জরি। অদোমগী জিলাদা খু্ঙ্গং ৫ কেমিকেল য়াওনা লৌউ-শিংউ পাংথোক্নবা অমসুং খুঙ্গং ৫ কেমিকেল গ্রাম ১ ফাওবা শীজিন্নদনবা অদোম্না ৱারেপ লৌগদবনি। মসিনা জিলা শীনবা থুংনা ৱাখল তাহনগনি অমসুং মীওই খুদিংমক্কী থৌদাং হেনগৎহনগনি।
মরুপশিং,
অতোপ্পা মিসন অমনা কেমিকেল য়াওদনা লৌউ-শিংউ পাংথোকপা অমসুং অহেনবা শেন্থোক লৈহনবনি। মিসন অসিগী মমিং গোবর্ধন য়োজনা কৌই। য়োজনা অসিগী মখাদা, লৈবাক শীনবা থুংনা অমোৎ-অকায়দগী শেন ওন্থোক্নবা থবক পায়খৎলে। মসি ষন্থিদগী মৈ পুথোক্নবা অমসুং বাইও ফর্তিলাইজর পুথোক্নবা অচৌবা পাম্বৈ অমা ওইরে। ঙসিদি অসিগুম্বা প্লান্তশিংগী অচৌবা নেতৱার্ক অমা সরকারনা শেম্লে। লৈবাক অসিদা অচৌবা কম্পেনিশিংনা বাইও-গ্যাস প্লান্ত ৫০ হেন্না লিংখৎলে। গোবর্ধন প্লান্তশিং লিংখৎনবা কোওপরেতিপ সোসাইতিশিং থোরকপা দরকার ওইরে। মসিনা শা-ষন লোইরিবশিং খক কান্নবা নত্তনা, লম্বী-লমজাউদা লৈরিবা শা-ষনশিংসু ফজনা শীজিন্নরগনি।
মরুপশিং,
অদোম শঙ্গোম পুথোকপা অমসুং শা-ষন লোইবগী লমদসু নিংথিনা থবক পায়খৎলি। কোওপরেতিপকী খোঙজংদা মশিং য়াম্লবা শা-ষন লোইবা মীওই কয়াশু শরুক য়ারে। শা-ষনগী লায়ননা লৌমীশিংদা কয়া য়াম্না অৱাবা তাহনবগে হায়বা অদোম খঙলে। ফুত অমসুং মাউথ দিজিজ অসিনা ঐখোয়গী শা-ষনশিংদা অচৌবা অমাংবা কয়া থোকহল্লি। লায়না অসিনা মরম ওইদুনা, চহি খুদিংগী শা-ষন লোইবদা লুপা কারোর কয়া মাঙহল্লি। মরম অদুনা অহানবা ওইনা লৈবাক শীনবা থুংনা কেন্দ্র সরকারনা লেম্না তিকা থাবগী খোঙজং অমা হৌদোক্লে। শা-ষনশিং লেম্না তিকা থানবা খোঙজং অমা চৎথরি। মসিগী মখাদা শা-ষন করোর ২৪ তিকা থাখ্রে। অদুবু ঐখোয়না এফ.এম.দি মুৎথৎপা ঙমদ্রি। তিকা থাবা নত্ত্রগা শা-ষনশিং মশিং থিবদা কোওপরেতিপশিং শরুক য়াগদবনি। দাইরি সেক্তরদা শা-ষন লোইবা লৌমীশিং খক্তা মরী লৈনবশিং নত্তে, ঐখোয়গী শা-ষনশিংসু মরী লৈনবশিং হায়বা ঐখোয়না নিংশিংগদবনি। মসি ঐখোয়গী থৌদাংনি অমসুং মতেং পাংগদবনি হায়না ঐখোয়না খনগদবনি।
মরুপশিং,
সরকারগী পান্দম ফংনবা হোৎনবদা কোওপরেতিপশিংগী শক্তিদা ঐ চিংনবা অমতা লৈতে। ঐগী রাজ্যদা, ঐ কোওপরেতিপশিংগী থৌনা উরে। নিংতম ইহৌদা কো-ওপরেসনসু মরুওইবা থৌদাং অমা লৌখি। নিংতম্বা চহি ৭৫ মপুংফারকপদা জিলা খুদিংমক্তা অমৃত সরোভর ৭৫ শেমগৎনবা ঐনা খঙহনখ্রে। চহি অমা ফাদনা, লৈবাক শীনবা থুংনা অমৃত সরোভর ৬০,০০০ রোম শেমগৎলে। হৌখিবা চহি ৯দা, ইথৈ পীনবা, থক্নবা ঈশিং ফংহন্নবা সরকারনা পায়ৎলিবা থবকশিংগী শরুক অমনি। মসি ঈশিং ফংফম হেনগৎহন্নবা লম্বী অমনি। থবক অসিদগী লৌমীশিং, শা-ষনশিং ঈশিং ৱাৎত্রে। মরম অদুনা মসিগী অফবা খোঙজং অসিদা কোওপরেতিপ সেক্তরগী মরুপশিং শরুক য়াগদবনি। অদোমগী তৌবা ঙম্বগী মতুংইন্না, অদোম্না পুখ্রি কয়া তৌবা ঙমগনি হায়বদু অদোম্না লেপকনি। ঈশিং ফংনবা মাইকৈদা ঐখোয়দা থবক তৌরসি। করিগুম্বা খুঙ্গংশিংদা অমৃত সরোভরশিং শেমগৎলবদি, তুংগী মীরোলশিংনা ঐখোয় নিংশিংদুনা লৈহৌরগনি। ঙসি ঐখোয়না শীজিন্নরিবা ঈশিং অসি ঐখোয়গী ইপা-ইপুশিংনা পায়খৎলম্বা থবক অদুগী মহৈনি। ঐখোয়না ঐখোয়গী অঙাংশিংগীসু করিগুম্বা খর থম্বীরমগদবনি। ঐখোয়গী লৌমীশিংনা কমদৌনা ইথৈ ফজনা শীজিন্নগনি হায়বগী মতাংদা ৱাখল তাহনগদবনি। ঈশিং য়াম্না শীজিন্নরগা পোৎথোক য়াম্না পুথোক্কদবা নত্তে। খু্ঙ্গংদগী খুঙ্গংদা মাইক্রো-ইরিগেসন পাকথোক-চাউথোকহনবদা কোওপরেতিপ সোসাইতিশিংনা মখোয়গী থৌদাং পাকথোক-চাউথোকহনগদবনি। মসিগীদমক কেন্দ্র সরকারনা মতেং কয়া পাংলি অমসুং পুক্নিং থৌগৎলি।
মরুপশিং,
মহৈ-মরোং থমফম অসি অচৌবা ৱাফম অমনি। মহৈ-মরোং থমফম কৈ মরাং কাইনা লৈতবা অসিনা ঐখোয়গী চীঞ্জাক ৱাৎহন্দনবা হোৎনবদা অচৌবা খুদোংচাদবা মায়োক্নরি। ঙসি ঐখোয়না ভারত্তা পুথোক্লিবা চানবা মহৈ-মরোংগী পোৎথোক্কী চাদা ৫০গী মখা ঐখোয়না লিদুনা থম্বা ঙম্লি। ঐখোয়গী তন লাখ ১৪০০ হেন্না লিদুনা থম্বা ঙম্বগী শক্তি লৈরি। মসি মথং চহি ৫ দা চাদা ৫০ হেনগৎহনবা হায়বদি তন লাখ ৭০০গী লিদুনা থম্নবা শক্তি হেনগৎহনবা হায়বসি ঐখোয়গী ৱাশক্নি। মসি তশেংনা অচৌবা থবক অমনি, মসিনা লৈবাক অসিদা লৌমীশিংগী শক্তি হেনগৎহনগনি, খুঙ্গংশিংদা অনৌবা থবক কয়া ফংহনগনি। খুঙ্গংশিংদা লৌউ-শিংউগা মরী লৈনবা মচাক-মথুমশিং শেমগৎনবা ঐখোয়গী সরকারনা অহানবা ওইনা লুপা করোর লাখ ১গী অখন্নবা ফন্দ অমা শেম্লে। ফন্দ অসিগী মখাদা হৌখিবা চহি ৩দা লুপা করোর লিশিং ৪০ থাদখ্রে। কো-ওপরেতিপ সোসাইতিশিং, পি.এ.সি.এসনা কোল্দ স্তোরেজশিং য়াওনা লৌউ-শিংউগী মচাকশিং শেমগৎপদা শরুক য়াগদবনি।
মরুপশিং,
অনৌবা ভারত্তা কো-ওপরেসন্না লৈবাক্কী শেন-থুম চাউখৎনবা অকনবা পাম্বৈ অমা ওইগনি হায়না ঐনা থাজৈ। কোওপরেতিপকী নামুনা ইন্দুনা মশা মরোমদোম লেপচবা ঙম্বা খুঙ্গংশিং শেমগৎনবা মাইকৈদা ঐখোয় চঙশিনগদবনি। মসিগী অওনবা অসি পুরক্নবা অদোম্না খন্ন-নৈনবা অদু মমল নাইদ্রবা কান্নবা ওইগনি। কোওপরেতিপশিং কমদৌনা হেন্না ফজনা মতেং পাংনগনি হায়না অদোম্না খন্নগদবনি। কোওপরেতিপশিংনা খুন্নাইগী থৌশিল অমসুং লৈবাক্কী থৌশিল থবক ওইনা পাংথোক্কদবনি। অদোমগী পাউতাকশিংনা মখা তানা লৈবাক অসিদা কো-ওপরেতিপ খোঙজং মপাঙ্গল কনখৎহনগনি অমসুং চাউখৎলবা ভারত অমগী মঙলান মঙফাওনবদা মতেং পাংগনি। ময়াম পুম্নমক্কা অমুক উনবা অসি য়াম্না নুংঙাই। ময়াম পুম্নমক ঐগী মাইকৈদগী অমুক হন্না য়াইফ-পাউজেল পীজরি।
অদোম থাগৎচরি।
