মধ্য প্রদেশগী গভর্নর শ্রীমান মঙ্গু ভাই পতেল, মফমসিগী মীয়াম্না য়াবা মুখ্য মন্ত্রী শিবরাস সিংহ চৌহান, সিন্দিয়া স্কুলগী বোর্দ ওফ দাইরেক্তরগী চেয়রমেন অমদি মন্ত্রী মন্দলগী ঐগী মরূপ শ্রী জ্যোতিরাদিত্য সিন্দিয়া জী, শ্রী নরেন্দ্র সিংহ তোমর, দোক্তর জিতেন্দ্র সিংহ, স্কুল মেনেজমেন্তকী মরূপ অমদি শিন্মী, ওজা পুম্মনমক অমদি লেঙশিনবিরিবা মীয়াম পুম্নমক অমদি ঐগী নুংশিরবা নহা মরূপশিং !
সিন্দিয়া স্কুলগী ১২৫শুবা চহি মপুং ফারকপদা ময়ামগী মফমদা নুংঙাইবা ফোঙদোকচরি। ঙসি অজাদ হিন্দ লৈঙাক লিংখৎখিবা নুমিৎসু তারি। মসিগীদমক ঐনা লৈবাক মীয়াম পুম্বগী মফমদা নুংঙাইবা ফোঙদোকচরি। ঙসিগী চাউথোকচনিংঙাই ওইরবা পুৱারীগা মরী লৈনবা থৌরমসিদা ময়ামগী মরক্তা তিনবা ফংহনবিবগীদমক ঐনা ময়ামগী মফমদা তৌবিমল খঙবা উৎচরি। পুৱারী অসি সিন্দিয়া স্কুলগীসুনি অদুগা পুৱারীগা শাগোন্নরিবা গ্বালিয়র ময়োল্লমগীসুনি। রীসি গ্বালিপা, ঈশৈ নোংমাইগী নিংথৌ তানসেন, শ্রীমন্ত মহাদজী সিন্দিয়া জী, রাজমাতা বিজয়রাজে জী, অতল বিহারী বাজপায়ী জী অমদি উস্তাদ অমজদ অলি খাননচিংবা কয়া গ্বালিয়রগী লৈহাউদা, মীরোল কয়াবু পুক্নিং থৌগৎননবগী মরূ হুল্লম্মি।
মফম অসি নুপীগী মতিক অমদি অথৌবী কয়াগী পোক্নফম্নি। মহারানী গঙ্গাবাইনা মফম অসিদা সনা লিক্কোন কায়থোক্তুনা নীংতম লানগী লান্মীশিং শেম শাখি। মরম অসিনা গ্বালিয়রদা লাকপা হায়বসি মশানা নুংঙাইবা পুংফম অমা ওইজরিবনি। অদুগা মরম অনিদা ঐগা গ্বালিয়রগা মরুওইবা মরীসু লৈ। অমনা ঐ কাসীগী এম.পি.নি অমদি কাসীগী থৌগল তৌবদা, ঐখোয়গী নাৎ চৎনবী য়োকখৎপদা, সিন্দিয়া শাগৈনা অচৌবা থৌদাং লৌদুনা লাক্লি। সিন্দিয়া শাগৈনা গঙ্গা তোর্বান্দা ঘাত কয়ামরুম শাখি, BHU লিংখৎপদা শেলগী তেঙবাঙ পীখি। ঙসি কাসীদা পুরক্লিবা চাওখৎপা অসি উরগা মহারানী বৈজাবাই অমদি মহারাজা বাধব রাউ জীগী থৱায়না লৈরিবা মফমদুদগী, কয়াগী মতিক নুংঙাইবা পোক্লমগনি হায়বা ঐখোয়না ৱাখলনা লাম্বা ফংই।
অদুগা ঐনা মরম অনি হায়খিবদুগী অনিশুবা মরমদুসু থমজগে। গ্বালিয়রগা ঐগা অতোপ্পা মরী অমসু লৈরি। ঐখোয়গী জ্যোতিরাদিত্য জী গুজরাতকী মমাকনুপানি। মরী অসিগী মতাঙদা ঐগা গ্বালিয়রগসু মরী থোক্নরে। অদুগা অতোপ্পা মরী অমসু লৈরি, ঐগী খুঙ্গং গায়কৱারদনি। ঐগী খুলদা খ্বায়দগী অহানবা প্রাইমারী স্কুল লিংখৎখিবসি গায়কৱার শাগৈনা লিংখৎখিবনি। অদুগা প্রাইমারী এজুকেজন লেম্না ফংলকখিবা স্কুল অদু গায়কৱারনা লিংখৎপিরম্বনি।
মরূপশিং,
ঐখোয়না হায়নবা অমা লৈ – মনস্যেঙ্ক বচস্যেঙ্ক কর্মন্যেঙ্ক মহাত্মানাম ।
ৱাহন্থোক্তি, মীওই অমনা মহাক্কী ৱাখলদা খনবা অদুগুম্না ঙাঙথোরকই অমদি তৌথোরকই হায়বনি। মসি মথৌ মশক খঙবা মীওই অমগী মশক্নি। ৱাখল লৈবা মীওই অমনা খুদক্কী কান্ননবখক্কী য়েংলগা থবক তৌদে তুংগী মীরোলগী লম্বী য়াৎলম্নবগী থবক তৌই। হায়নবা ৱাফম অমসু লৈ মদুদি, করিগুম্বা নহাক্না চহি অমগী খল্লগদি মহৈ মরোং থাউ। করিগুম্বা দেকেদ অমগী খল্লগনা উহৈ পাম্বীশিং থাউ। অদুগা করিগুম্বা চহিচা অমগী খল্লগদি, মহৈ মশিংগা মরী লৈনবা ইন্সতিত্যুসনশিং লিংখৎলু।
মহারাজা মাধবরাউ সিন্দিয়া জীনা খল্লম্বা ৱাখলশিং খুদক্কী কান্নবখক্কী নত্তে তুংদা লাক্কদৌরিবা মীরোলগী পুন্সিদা মঙাল পীরম্নবা খল্লম্বনি। সিন্দিয়া স্কুল মহাক্কী মীৎয়েঙ শানবগী মহৈনি, মহাক্না মীওইবা খুন্নাই শেমগৎপগী মরুওইবা খঙলম্বদুগী মহৈনি। মাধব রাউ জীনা হৌদোকপিরম্বা ভারতকী ত্রান্সপোর্ত কম্পেনী হৌজিকসু দিল্লীদা DTC হায়না চেল্লি হায়বা মীওই খরখক্তমক খঙলমগনি। মহাক্না তুংগী মীরোলগীদমক ঈশিং য়োকশিন্দুনা থম্বদসু চপ মান্ননা মীৎয়েঙ থম্লম্মি। মতমদুদা মহাক্না ঈথৈ লৌখোংগীদমক অচৌবা ঈশিংগী ফীভম অমা শেমগৎলমখি। চহি ১৫০গী মতুংদসু হর্সি দাম অসি এসিয়াগী খ্বায়দগী চাউবা লৈবাক্কী দাম ওইরি। দাম অসি ঙসিসু শীজিন্নরি। অসিগুম্বা ৱাখল্লোন অসি মাধবরাউ জীগী মফমদগী তমজনিংঙাইগী মশক্নি। মহৈ মশিংগী লমদা ওইরবসু, শিন্ফম, পুন্সি নৎত্রগা রাজনিতীদা ওইরবসু, লম্বী অশম্বা চৎপনা খুদক্কী কান্নবা খরদি পুরকপা য়াই, অদুবু নহাক্না অশানবা মীৎয়েঙ থমগদবনি। খুন্নাইদা নৎত্রগা রাজনিতীদা খুদক্কী ওইজবা থিদুনা থবক তৌবা মীওই খুদিংমক খুন্নাই অমদি লৈবাক্তা মাঙজবা পুরক্কনি।
মরূপশিং,
লৈবাকসিনা ঐগী ইফমদা ২০১৪দা প্রধান মন্ত্রীগী থৌদাং শিন্নবিরকপা মতমদা, ঐঙোন্দা লম্বী অনি লৈখি। খুদক্কী কান্নবখক্কী য়েংলগা থবক তৌবা, নৎত্রগা অশানবা মীৎয়েঙদা থবক তৌবা অনিসিনি। মতমদুদা ঐনা মীয়ামগীদমক তোঙান তোঙানবা মতমগী পান্দম হায়বদি চহি ২, চহি ৫, চহি ৮, চহি ১০, চহি ১৫, চহি ২০ হায়না খায়দোক্তুনা থবক তৌনবা ফীরেপ লৌখি। ঙসি ঐখোয়গী লৈঙাক অসি অদোম্না চহি ১০ মপুং ফারে হায়না হায়বা য়াই। হৌখিবা চহি ১০সিদা লৈবাক অসিনা অশানবা মীৎয়েঙ থমদুনা লৌখিবা ফিরেপশিং হান্না খন্নরুদবা মওংদনি। ঐখোয়না পন্দুনা লৈরম্বা ফিরেপ কয়াগী পোৎলুমশিং লৈবাক্কী কোকথক্তগী থাংথখ্রে। চহি ৬০ হেন্না জম্মু অমসুং কাস্মিরদগী আর্তিকল ৩৭০ লৌথোক্নবা দিমান্দ তৌদান লাকখি। মসি ঐখোয়গী লৈঙাক্না তৌখি। চহি ৪০ চুপ্না, এক্স-সর্ভিসমেনশিংদা ৱন রেঙ্ক ৱন পেন্সনগী দিমান্দ তান্দুনা লাকখি। মসি ঐখোয়গী লৈঙাক্না থবক ওইনা পাঙথোকখি। GST চৎননবা চহি ৪০ চুপ্না তান্দুনা লাকখি। মসিসু ঐখোয়গী লৈঙাক্না থবক ওইনা পাঙথোকখি।
দেকেদ কয়া মুস্লিম নুপীশিংনা ত্রিপল তলাক্কী মায়োক্তা আইন শেম্নবা তান্দুনা লাকখি। ত্রিপল তলাক্কী মায়োক্তা ঐখোয়গী লৈঙাক্না আইন শেমখি। চয়োল খরগী মমাঙদা, লোক সভা অমদি এসেমব্লীদা নুপীগী রিজর্বেসনগী লো পাস তৌখিবা অদোম খঙবিহৌরমগনি। হায়রিবা থবকশিং অসি দেকেদ কয়া পন্দুনা লাকখিবনি। নারী-শক্তি বন্দন এক্ত অসি ঐখোয়গী লৈঙাক্না চৎনহনখিবনি।
হৌজিক ঐখোয়না তৌখিবা থবক্কী লিস্ত অশাংবা অমা লৈরি মদুশিংদু হায়বদা অহিংসি হৌখিগনি। ঐনা তম্লিবসিদি অচৌবা ফিরেপ খরদুখক্নি মরমদি করিগুম্বা ঐখোয়গী লৈঙাক্না ফিরেপশিং অসি লৌরমদ্রগদি পোৎলুমশিং অসি কনানা পুরমগনি? ঐখোয়না মসি তৌরমদ্রগদি মসি কনাগী মথক্তা নন্দুনা লৈহৌগনি, নখোয়গী মীরোলদা পোৎলুম ওইহৌগদৌরিবনি। ঐনা নখোয়গী মীরোলগী পোৎলম খরা থাংথরম্বখক্নি। অদুগা ঐগী পান্দমদি লৈবাকসিদা ঙসিগী নহারোলশিংগী অফবা মফম অমা শেম্বনি। খুদোংচাবগী অৱাৎপা অমত্তা লৈতবা মফম অমা শেম্বনি। ভারতকী নহাশিংনা অচৌবা মঙলান কয়া মঙদুনা মদুবু মঙফাওনহনগদবা ফীভম অমা শেম্বনি। মঙ চাউনা মঙউ অমদি চাউনা মঙফাওনবা ওইয়ু হায়বা ৱাফমসি ঐনা হায়নিংই মরমদি সিন্দিয়া স্কুলনা চহি ১৫০ মপুং ফশরকপাম তমদা, লৈবাকসিনসু মরুওইবা পন্দোল অমা লোমগদৌরিবনি। হায়রিবা পন্দোল অদুদি ভারতকী নীংতম্বগী ১০০ শুবা চহিগী পন্দোলনি।
ঙসি ঐখোয়না লৈবাক অসিবু লাক্কদৌরিবা চহি ২৫সিদা চাওখৎপা লৈবাক অমা ওইহন্নবা ফিরেপ লৌরি। মসিনি নখোয়না, ভারতকী নহারোলশিংনা তৌগদবা থৌদাং। ঐনা নহাশিংদা থাজবা থম্লি। ঐনা নহাশিংগী মতিংদা থাজবা থম্লি। অদোমসু হায়রিবা মঙলানশিং অসিবু মঙদুনা, থবক পাঙথোক্তুনা মঙলানশিং অসিবু ফিরেপ ওন্থোক্তুনা মঙফাওনদ্রিবা ফাওবা হোৎনবা লেপ্লোয় হায়না ঐনা থাজৈ।
লাক্কদৌরিবা চহি ২৫ অসি ভারতকীদমক্তা য়াম্না মরু ওইবগুম, অদোমগী পুন্সিদসু য়াম্না মরুওইবা মতম্নি। সিন্দিয়া স্কুলগী মহৈরোয় খুদিংমক্না: ঐনা চাওখৎপা ভারত পুরক্কনি – হায়বা ফিরেপ অসি লৌগদবনি। মরূপশিং অদোম তৌগদরা, অদোম্না ফিরেপ অসি লৌগদ্রা? পুম্নমক লৈবাক্না মাঙদা হায়বা ৱাখল্লোন্দা তৌগনি, ঐনা অনৌবা ৱাখল পুথোক্কনি, ঐনা থিজিন হুমজিনগনি, ঐনা প্রোফেস্নেল ৱর্ল্দদা নৎত্রগা মফম অমদা হেক্তা লৈরবসু ঐনা ভারতপু চাওখৎপা লৈবাক ওইহনগনি।
অদুগা মরূপশিং,
ঐনা সিন্দিয়া স্কুলদা অসুক য়াম্না থাজরুরিবা অসি করিগীনো খঙবরা? মসিগী মরমদি নখোয়গী স্কুল অসিগী হান্নগী মহৈরোয় খরা ঐনা য়াম্না মমুৎ তানা খঙই। PMO গী রাজ্য মন্ত্রী, ইনাউ জিতেন্দ্র সিংহ তাঙবলদা লেঙশিন্দুনা লৈরি। মখোয়সি নখোয়না তম্লিবা স্কুল অসিমক্তা তম্লকখিবনি। রেদিওদা মহাক্কী খোঞ্জেল তারগা পুক্নিং শুম্হৎনখিবা অমিন সয়ানী, মফমসিদা ফজরবা পর্ফোর্মেন্স অমা পীবিরম্বা লেফ্তনেন্ত জেনেরেল মোতী দার, মীত ব্রদর্স অমদি হুর-হুর দবং সল্মান খান, অমদি ঐগী মরূপ নিতিন মুকেস মফমসিদা লেঙশিনবিরি। সিন্দিয়া স্কুলগী কেনভস অসি কয়ামুক য়াম্না পাক চাউবগে হায়ববু ঐখোয়না মসিদা মচু মখল খুদিংমক উবা ফংই।
ঐগী নহা মরূপশিং, বিস্নু-পুরানদা ইবিরম্মি,
গায়ন্তি দেবা: কিল জীতকানি, ধন্যাস্তু তে ভারতভুমিভাগে।
ৱাহন্থোক্তি লাইশিংনা ফাওবা ভারতকী লৈহাউদা পোক্লবদি মীওই অদু লাইশিংদগীসু হেন্না লাইবক ফরবনি হায়না শক্ন শোন্নৈ হায়বনি। ঙসিগী ভারতকী মায় পাকপগী পন্দোল অসি অঙকপা মওংদনি। মালেম পুম্বদা ভারতকী মমি তারি। ওগস্ত ২৩দা ভারতনা থা লৈবাক্তা, লৈবাক অমত্তনা ঙসি ফাওবা য়ৌবা ঙমদ্রিবা মফমদা য়ৌবা ঙমখি। হন্দক G-20 দসু কমদৌনা ভারতকী ফিরাল হাইনা হুম্না পাইখিবা অদোম্না উবিরমগনি। ঙসি ভারতনা, মালেমগী খ্বায়দগী খোঙজেল য়াঙনা চেনখৎলক্লিবা অচৌবা শেন্মিৎলোন ওইরক্লি। ঙসি ভারতনা মালেমগী ওইবা ফিনতেক এদোপ্সন রেততা মকোক থংনা লৈরি। ঙসি ভারতনা রিএল তাইম দিজিতেল ত্রাঞ্জেক্সন তৌবদা মালেমগী মকোক্তা লৈরি। ঙসি ভারতনা স্মার্তফোন দেতা কঞ্জ্যুমরগী হীরমদা মকোক্তা লৈরি।
ঙসি ভারতনা, ইন্তরনেত য়ুজর মশিং মালেমদা খ্বায়দগী য়াম্বা অনিশুবা লৈবাক ওইরি। ঙসি ভারতনা, মালেমগী অনিশুবা মোবাইল মেনুফেকচরর ওইরি। ঙসি ভারত্তা মালেমগী অহুমশুবা খ্বায়দগী চাউবা স্তার্তঅপ ইকোসিস্তেম লৈরি। ঙসি ভারতনা মালেমগী খ্বায়দগী চাউবা অহুমশুবা ইনর্জী কঞ্জ্যুমর ওইরি। ঙসি ভারতনা তরহগী লমদা মশাগী ওইবা স্পেস স্তেসন শেম্নবা থৌরাং তৌরি। ঙসি অয়ুকমক্তদা গগনয়ান তেস্ত ফ্লাইত অমদি ক্রু এস্কেপ সিস্তেম মতৌ করম্না মায় পাক্না চাংয়েং তৌখিবগে হায়বা অদোম্না উবিখ্রে। গ্বালিয়রদা এয়রফোর্সকী চাউখ্রবা বেজ অমা লৈদুনা অদোম্না অতিয়াদা তেজস পাইবা উরি। অদোম্না সমুদ্রদা INS বিক্রান্তকী মতৌ উরে… ঙসি ভারতকী মফমদা ওইথোক্তবা হায়বা ৱাফমদু লৈত্রে। ভারতকী হেনগৎলক্লিবা মতিংনা, সেক্তর খুদিংদা অদোমগীদমক্ত অনৌবা খুদোংচাবশিং শেম্লি।
অদোমসু খনবিয়ু, ইং ২০১৪গী মমাঙদা মফমসিদা স্তার্ত অপ চা খরদমক লৈরম্মি। ঙসিদি ভারত্তা স্তার্ত অপগী মশিং লাখ অমগী ময়াদা লৈরে। হৌখিবা চহি খরসিদা ভারত্তা য়ুনিকোর্ন ১০০ হেন্না লিংখৎখ্রে। অদোমসু খঙবিরমগনি য়ুনিকোর্ন হায়বদি য়ামদ্রবদা লুপা করোর লিশিং ৪দগী তাদবা কম্পনী হায়বনি। সিন্দিয়া স্কুলগী মহৈরোয়শিংসু মফমসিদগী থোকখ্রগা য়ুনিকোর্নশিং লিংখৎকদৌরিবনি, নখোয়গী স্কুলগী মিংচৎ লৈবাক মীয়াম মাঙদা থমগদৌরিবনি।
মালেম অসি নখোয়গী ওইস্তরনি!!! অদুগা লৈঙাক্কী শক্তমদা ঐখোয়নসু অদোমগীদমক অনৌ-অনৌবা সেক্তরশিং হাংদোক্লি। হান্নদি সেতলাইত অসি লৈঙাকখক্তনা শারম্বনি নৎত্রগা মপান লৈবাকশিংদগী চেল্লম্বনি। ঐখোয়না স্পেস সেক্তরবু নহাশিংগীদমক হাংদোক্লে। হান্না দিফেন্সকী খুৎলায়শিংসু লৈঙাক্না শারম্বা নৎত্রগা মপান লৈবাকশিংদগী চেল্লম্বনি। ঐখোয়না দিফেন্স সেক্তরবুসু অদোমগীদমক্তা হাংদোক্লে। অসিগুম্বা য়াম্লবা সেক্তর কয়া হৌজিক ভারত্তা অদোমগীদমক শেমগৎলি।
অদোম্না মেক ইন ইন্দিয়াগী ফিরেপ্পু মাঙদা পুখৎকদবনি। অদোম্না আত্মনিরভর ভারতকী ফিরেপ্পু মাঙদা পুখৎকদবনি। ঐগী ৱাফম অমগসু নীংশিংবিয়ু। মতম পুম্বদা আউত ওফ দি বোক্সতা ৱাখল খনবিয়ু। জ্যোতিরাদিত্য জীগী মপাবুং, ঐখোয়গী মাধবরাও সিন্দিয়া জীনা রেল মন্ত্রী ওইরম্বা মতমদা মহাক্না সতাব্দী ত্রেন হৌদোক্লমখি। মদুগী দেকেত অহুমগী মতুংদা ভারত্তা অমুক্কা হন্না মতমগা চুনবা ত্রেন হৌদোকপা ঙম্লি। হৌজিক লৈবাকসিদা বন্দে ভারতকী ইহুলসু লৈরে অদুগা ঙরাংমক্তদা নমো ভারতকী খোঙজেলয়ু অদোম্না উবিখ্রে।
মরূপশিং,
মফমসিদা লাক্ত্রিঙৈদা সিন্দিয়া স্কুলগী তোঙান তোঙানবা হাউসশিংগী মমিং য়েংলম্বনি অদুগা জ্যোতিরাদিত্য জীনা ঐঙোন্দা শন্দোক্না তাক্লম্মি। নীংতম ইহৌগা মরী লৈনবা মমিংশিং অসিনা কয়াগী মতিক অদোমগী মফমদা থৌনা হাপ্লিবা। সিবাজী হাউস… মহাতজী হাউস, রানোজী হাউস, দত্তাজী হাউস, কনখের হাউস, নিমাজী হাউস, মাধব হাউস, হায়রিবশিং অসি মওং অমদা সপ্তরীসিশিংগী থৌনাগুম্না অদোমগী নাক্তা লৈরি। নবরাত্রীগী য়াইফরবা মীৎকুপসিদা ঐনা ময়ামগী মফমতা থবক মাপনখক শিন্নজগে হায়দুনা খল্লম্লিবনি মরমদি স্কুলগী থবক থৌরমশিংদা অদোমগী হোমৱর্ক য়াওদ্রবদি মপুং ফাদে। মরম অদুনা ঐনা ঙসি ময়ামগী মফমদা থবক মাপনখক শিন্নবা পাম্মি, নীংশিংগদ্রা? অদোমগী খোঞ্জেল তপথখ্রে করি তৌরে? নীংশিংগদ্রা, মখোয়শিং অদু নখোয়গী ফিরেপ ওইহনগদ্রা? পুন্সি চুপ্পা মখোয়শিংদুবু মপুং ফাহন্নবা থবক তৌগদ্রা?
অহানবদা – অদোম্না মফমসিদা ঈশিংগী সিক্যুরিতীগী অচৌবা থবক অমা পায়খৎলি। ৱাতর সিক্যুরিতী ২১শুবা চহিচাগী অচৌবা শিংনবা অমনি। মসিগীদমক অদোম্না মীয়ামদা ৱাখল তাহন্নবগীদমক থৌরাং পায়খৎপিয়ু।
অনিশুবদা – সিন্দিয়া স্কুলদা খুঙ্গং য়োকখৎনবগী চৎনবী লৈ। অদোম্না অতোপ্পা খুঙ্গংশিংদসু চৎপিয়ু মফমদুদা দিজিতেল ত্রাঞ্জেক্সনগী মতাঙদা মীয়ামদা খঙহল্লু।
অহুমশুবদা – লু-নানবগী মিসন্নি। মধ্য প্রদেশকী ইন্দোর লু-নানবদা মকোক থোংলি অমদি হায়রিবা ফীভমসি ফংবা ঙম্লিবনিনা গ্বালিয়রদা করিগী ঙম্লোয়? অদোম্না অদোমগী ময়োল্লমবু লু-নানবদা মকোক থোংহন্নবা থবক পায়খৎপিয়ু।
মরিশুবদা – ভোকেল ফোর লোকেল… অদোম্না হেক ঙম্লিবমখৈ লোকেলবু, মফমসিগী পোত্থোকশিংবু য়োকখৎপিয়ু, মেদ ইন ইন্দিয়া পোত্থোকশিং শীজিন্নবিয়ু।
মঙাশুবদা – ত্রাভেল ইন ইন্দিয়া ফর্স্ত… হেক য়ারিবমখৈ অহানবদা নখোয় মশাগী লৈবাকশিং চত্তুনা য়েংবিয়ু, অদোমগী লৈবাক্কীম ফমশিংদা কোয়না চৎপিয়ু, মদুগী মতুংদা মপান লৈবাকশিংদা য়ৌবিয়ু।
তরুকশুবদা – মহৌশাগী লৌউ-পথাপকী মতাঙদা লৌমীশিংদা হেক য়ারিবমখৈ য়াম্না ৱাখল তাহনবিয়ু। মালেম ইমা অসিবু কন্নবগীদমক মসি য়াম্না মরুওইবা থৌরাংনি।
তরেৎশুবদা – চনানবু শ্রী-অন্নবু অদোমগী পুন্সিগী শরুক ওইহল্লু, মসিবু মপুং ফানা শন্দোকপিয়ু। মসি সুপরফুদনি হায়বা অদোমসু খঙবিরিবা নৎত্রা।
নিপানশুবদা – ফিতনেস, য়োগবু ওইরবসু, শান্ন-খোৎনববু ওইরবসু, মদুপু অদোমগী পুন্সিগী থাদোক্নবা য়াদ্রবা শরুক ওইহনবিয়ু। ঙসিমকসু মফমসিদা মল্তিপর্পস স্পোর্তস কমপ্লেক্সকী উরেপ উয়ুং তম্লি। মসিগী কান্নবা অদোম্না মপুং ফানা লৌবিয়ু।
অদুগা মাপনশুবদা – য়ামদ্রবদা লায়রবা ইমুং অমবু খুৎশম্নবিদুনা শোয়দনা লমজিংবিয়ু। লৈবাকসিদা মশাগী গেস কন্নেক্সন লৈতবা, বেঙ্ক একাউন্ত লৈতবা, পক্কাগী য়ুম লৈতবা, অয়ুস্মান কার্দ লৈতবা লায়রবা ইমুং অমা হেক লৈরিবমখৈ ঐখোয় পুক্নিং লৈতানা ফম্লোইদবনি। ভারত্তা লায়রবা মুত্থৎনবগীদমক মসি য়াম্না মরুওইবা ৱাফম্নি। লম্বী অসিদা চত্তুনা চহি মঙাখক্তদা মীওই করোর ১৩ মখায়রোম লায়রবগী পনখৈগী ৱাংমদা লাকখ্রে। হায়রিবা লম্বীসিদা চত্তুনা ভারতনা লায়রববু মুত্থৎকদবনি অমদি চাওখৎপা পুরক্কদবনি।
মরূপশিং,
ঙসি ভারতনা পায়খৎলিবা থবক থৌরমশিং, অচৌবা থাক্তা পায়খৎলি। মরম অসিনা অদোমসু তুংলমচৎকী মরমদা অপীকপা ৱাখল খল্লোইদবনি। অদোমগী মঙলান অমদি ফিরেপ অনিমক চাউহনগদবনি। অদুগা ঐনা ময়ামদা ৱাফম অমগসু হায়জগে, অদোমগী মঙলান্না ঐগী ৱাশক্নি। অদোম্না অদোমগী ৱাখল, অদোমগী ৱাখল্লোন, নমো এপতসু ঐগী ইফমদা শেয়র তৌরকপা য়াই। অদুগা ঐ হৌজিক ৱাত্সএপ্তসু লৈরে, মদুদসু অদোমগা মরী শম্নবা য়াই। অদোম্না পাম্লবদি অদোমগী অরোনবা ৱাফমশিংসু তম্লকপা য়াই। অদুগা ঐনা অদোমদা ৱাশক্লি ঐ কনাদসু অরোনবা ৱাফমশিংদু তমথোক্লোই।
মরূপশিং,
পুন্সি অসি অসুম্না হরাও হরাও হৌহনখিগদবনি। অদোম নুংঙাইনা লৈবিয়ু… শাফনা লৈবিয়ু। ঐনা ময়ামগী মফমদা মপুং ফানা থাজবা থমজরি। অদোম্না নীংশিংবিগদবা ৱাফমদি, সিন্দিয়া স্কুল ইন্সতিত্যুসন অমখক নত্তে পুৱারীগী লন অমনি। মহারাজ মাধবরাও গীগী ৱাশকপু স্কুল অসিনা নীংতমদ্রিঙৈ মমাঙদগী অমদি নীংতম্লবা মতুংদসু লেপ্পা লৈতনা মাঙদা পুখত্তুনা লাক্লি। হৌজিক্তি মসিগী ইৱায় ইনিল অদোমগী নাক্তা নিন্দুনা লৈরবনি। ঙাইহাক্কী মমাঙদা মনা মথুম লান্থোকখিবা নহা মরূপশিংগী মফমদা ঐনা অমুক্কা হন্না নুংঙাইবা ফোঙদোকচরি। অমুক্কা হন্না সিন্দিয়া স্কুলবু অমদি নহা মরুপ পুম্নমকপু হেন্না ফবা তুংলমচৎ অমগীদমক য়াইফরোল পীজরি।
ময়ামবু হন্না হন্না থাগৎচরি। খুরুমজরি।
