থৌরম অসিদা শরুক য়ারিবা কাউন্সিল ওফ মিনিস্তরগী ঐহাক্কী মরুপ শ্রীমতি স্মৃতী ইরানীজী, দাক্তর মহেন্দ্র ভাই, ওফিসিএল, হয়েংগী ভারতকী চারোন-শুরোনগী মমা-মপাশিং অমসুং ঐহাক্কী নুংশিরবা মরুপশিং!
অদোমগা ৱারী শাবসি ঐহাক্না য়াম্না নুংঙাইজৈ। অদোম্না থেংনখিবশিংগী মতাংদা খঙবগী খুদোংচাবসু ফংলে। কলা সংস্কৃতীদগী হৌদুনা থৌনা লৈবা, মহৈ-মশিং, ইন্নোভেসন, খুন্নাইগী তেংবাংবা অমসুং শান্ন-খোৎনবগুম্বা তোঙান-তোঙানবা হীরমশিংদা মীয়ামগা মান্নদবা থৌওং পাংথোকপগীদমক্তা অদোমগী মফমদা মনা পীরি। মসিগী মনা অসি অচৌবা চাংয়েংনবগী থৌওংগী মতুংদা অদোম্না ফংলিবনি। লৈবাক্কী কাচিন কোয়া খুদিংগী অঙাংশিংনা মাঙ থানা থোক্লক্লি। মসিদা অদোমগী নম্বর য়াওরক্লিবনি। মসিনা হায়বদি, মনা ফংবা মীশিংনা য়ামদ্রবসু, অদোমগুম্বা অফবা অমসুং পুকচেল শেংবা অঙাংগী মশিং অসি লৈবাক অসিদা মশিং য়াম্না লৈ হায়বনি। ঐহাক্না অদোম খুদিংবু মনা অসিগীদমক্তা অমুক্কা হন্না থাগৎলি। ঙসি অসি লৈবাক্কী নুপীমচশিংগী নুমিৎসু ওইরি। ঐহাক্না লৈবাক্কী ইচানুপী খুদিংবু নুমিৎ অসিদা থাগৎপা ফোংদোক্লি। য়াইফ পাউজেলসু পীজরি।
মরুপশিং
ঐহাক্না অদোমগা লোয়ননা অদোমগী ইমা-ইপা অমসুং ওজাশিংবু অখন্ননা থাগৎচরি। অদোম্না ঙসি য়ৌরিবা থাক অসি মখোয়গী হোৎনজমন্দগীনি। মরম অদুনা, অদোমগী মায় পাকপা খুদিং অসি মখোয়গীসু মায় পাকপনি। মসিদা অদোমগী নুংশিবীবশিংগী হোৎনজমন অমসুং থৌজাল য়াওরি।
ঐহাক্কী নহা ওইরিবা মরুপশিং,
অদোম্না ঙসি ফংলিবা মনা অসি তোঙানবা মরম অমদা য়াম্না মরু ওই। মরম অদুদি, মনা ফংবগী মতম অসিনি। লৈবাক্না হৌজিক্কী মতমসিদা নীংতম্বগী চহি ৭৫ ফারকপগী নুংঙাইবা ফোংদোক্লি। অদোম্না অসিগুম্বা পুৱারী ওইরবা মতমসিদা মনা ফংলিবনি। ঐখোয়গী লৈবাক্না নীংতম্বগী চহি ৭৫ ফারকপগী অমৃত মহোৎসব পাংথোক্লিঙৈদা ঐহাক্না মনা অসি ফংখিবনি হায়না পুন্সি চুপ্পদা চাউথোকচনা হায়গদৌরিবনি। মনা অসিগা লোয়ননা অদোমগী চাউরবা থৌদাং অমসু ফংলবনি। হৌজিক্তি, মরুপ, ইমুং-মনুং, খুন্নাই অমসুং মীওই খুদিংনা অদোমদা থাজবা থম্বা হেল্লবনি। মসিনা অদোম্বু ৱাহনগদবা নত্তে, মসিনা অদোমদা ইথিল পীহনগদবনি।
ঐহাক্কী নহা ওইরিবা মরুপশিং, ঐখোয়গী লৈবাক্কী অপীকপা অঙাং, ইচানুপা-নুপীশিংনা য়ুগ খুদিংদা পুৱারী শেমখিবনি। ঐখোয়গী নীংতম লান্দা বির্বলা কনকলতা বরুৱা, খুদিরাম বোস, রানী গাইদিনল্যুগুম্বী অদুগুম্বা পুৱারী কয়া লৈ, মখোয়না ঐখোয়বু চাউথোকহল্লি। মখোয়গুম্বা নীংতম লান্মীশিংনা লৈবাক্কী নীংতম্ববু মশাগী মিসন্নি হায়না নৌরিবা চহিদা খনখ্রবনি। মশাবু মসিগীদমক্তা কত্থোকখিবনি।
পদোম্না তিভি য়েংলমগনি, ঐহাক্না মমাংগী দিৱালীদা জম্মু কাশ্মিরগী নৌশেরা সেক্তরদা চৎলুই। ঐহাক্না মফমদুদা বলদেব সিংহ অমসুং শ্রীমান বসন্তা সিংহ কৌবা থৌনা লৈবশিংগা উন্নখি, মখোয়না নীংতম্বা ফংলবা তুংদা কাশ্মিরদা শোক্নখিবা লান্দা, হৌজিক্তি মখোয়গী চহি য়াম্লে অদুবু মতমদুদা মখোয় চহি য়াম্না নৌরি, মখোয়না অঙাং লান্মী ওইনা শরুক য়াখি। ঐখোয়না লান্মীনা মখোয়বু অঙাং-লান্মী ওইনা অহানবা ওইনা শকখঙখি। মখোয়না মশাগী মপুন্সিগী খন্দনা অদুক য়াম্না নৌরিবা চহিদুদা ঐখোয়গী লান্মীগী তেংবাংখি।
মতৌ অসুম্না, ঐখোয়গী ভারতকী অতোপ্পা খুদম অমসু লৈ – গুরু গোবিন্দ সিংহজী মচানুপাগী মথৌনা অমসুং কত্থোকপগী! সাহিবজাদানা থোইদোক-হেন্দোকপা মথৌনাগা লোয়ননা, মোং হাদনা অমসুং মথৌনাগা লোয়ননা মপুন্সি কত্থোকখিবা মতমদা মহাক্কী চহি য়াম্না নৌখিবনি। ভারতকী সিভিলাইজেসন, সংস্কৃতীদা থাজবা অমসুং ধর্মগীদমক্তা মহাক্কী কত্থোকখিবদুগী মমল নাইদে। মহাক্না কত্থোকখিবদুবু ইকায় খুম্নবা ওইনা লৈবাক্না দিসেম্বর ২৬পু ‘বীর বাল দিবস’ হায়না পাংথোকপা হৌখ্রে। ঐহাক্না অদোম অমসুং লৈবাক্কী মীওই খুদিংনা নহা ওইরিবা বীর সাহিবজাদাগী মতাংদা শোইদনা পাহন্নীংই।
ঙরাং, দিল্লীদা, ইন্দিয়া গেৎকী মনাক্তা নেতাজী সুভাস চন্দ্র বোসকী দিজিতেল মীতম অমা থমখিবদু অদোম খুদিংনা শোইদনমক্কী উরম্লগনি। ঐখোয়না নেতাজীদগী ইথিল ফংই – ইশাগী থৌদাংগী, লৈবাক্না খ্বাইদগী হেল্লি খনবগী। ঐখোয়না নেতাজীদগী ইথিল লৌদুনা, মরু ওইনা নহারোলশিংনা, লৈবাক্কীদমক্তা ইশাগী থৌদাং পাংথোকপগী লম্বীদা মাং থানা চৎকদবনি।
মরুপশিং,
ঐখোয়গী নীংতম্বগী চহি ৭৫না মরু ওইরিবগী মরমদি, হৌজিক অসি ঐখোয়গী মমাংগী মতমগীদমক্তা চাউথোকচদুনা মসিদগী ইথিল লৈবগী মতম্নি। মসিগী মতম অসি তুংগী ৱারেপশিংবু মপুং ফাহনবগী মতম্নি। মসিগী মতমসিদা তুংগীদমক্তা অনৌবা মঙলান কয়া মঙবগী মতম্নি, অনৌবা পান্দম থমদুনা মদুবু ফংনবা হোৎনবগী মতম্নি। পান্দমশিং অসিদি লৈবাক্না নীংতম্বগী চহি ১০০ মপুং ফাগদবা মথংগী চহি ২৫গীনি।
অদোম্না অমুক্তা য়েংবীয়ু, অদোম অসি য়ামদ্রবদা চহি ১০দগী ২০ ফাওবগী মনুংদা লৈবা ঙাক্তা ওইরমগনি। নীংতম্বগী চহি ১০০ শুরকপা মতমদা অদোমগী পুন্সিনা লৈবাক অসিনা নুংঙাই য়াইফরবা, মশেক মঙালনা থল্লবা অমসুং তংদু লৈতাবা থাক অদুদা লৈগদৌরিবনি। মসিনা হায়বদি, মসিগী পান্দম অসিদি ঐখোয়গী নহারোলশিংনা থমগদবনি, অদোমগী চারোন-শুরোন অমসুং ইশাগীনি। মথংগী চহি ২৫সিদা লৈবাক্কী লৈগদৌরিবা থাক অদুদা লৈবাক্কী খুদোংচাবসু হেনগৎলক্কনি, মদুগী খ্বাইদগী চাউবা থৌদাংদি ঐখোয়গী নহারোলশিংগীনি।
মরুপশিং,
ঐখোয়গী ইপা-ইপুশিংনা হোৎনরমখিবা, মখোয়না কত্থোকখিবা খুদিংগী মহৈ ঐখোয়না ফংলি। অদুবু অদোমদি, অদোম্না লৈরিবা মতম, লৈবাক অসিনা য়ৌরিবা থাক অসিদদি অদোম্না হোৎনবা খুদিংগী মহৈসু অদোম্না ফংবা য়াগদবা অদুগুম্বা চারোন শুরোন অমনি। অসিগুম্বা অহোংবা অসি য়াম্না থুনা লাক্লগদবনি। মরম অদুনা, অদোম্না উরমগনি, ঙসি লৈবাকসিদা শেমিবা আইন কয়া, হোৎনরিবা অদুগুম্বা হীরমশিংগী মনুংদা অদোম নহারোলশিং য়াওরিবনি।
অদোম্না মাংদা সেক্তর অমা হেক্ত থম্বীয়ু, ঙসিদি লৈবাক্কী মাংদা স্তার্ত-অপ ইন্দিয়াগুম্বা মিসন কয়া লৈরি, স্তেন্দ-অপ ইন্দিয়াগুম্বা প্রোগ্রাম কয়া চত্থরি, ঐখোয়গী মাংদা দিজিতেল ইন্দিয়াগী চাউরবা খোঙথাং অমা লৈরি, মেক ইন ইন্দিয়াবু খুমাং চাউশিনহল্লি, মীয়াম পুন্না শরুক য়ামিন্নগদবা আত্মানির্ভর ভারত হৌদোক্লে, লৈবাক্কী মফম খুদিংদা মতমগা চুনবা ইনফ্রাস্ত্রকচর কয়া শঙ্গারি, হাইৱে কয়া শারি, হাই-স্পীদ এক্সপ্রেসৱে শারি, অসিগুম্বা চাউখৎ-থৌরাংগী খোঙজেল অসিগা করিগা মান্নবগে? মসিগী অহোংবা অসিগা ইশাগা মরী লৈনহন্দুনা য়েংলিবা অসি অদোমখক্তনি, মসিগীদমক্তা নুংঙাইবা ফাওরিবসু অদোম্নি। অদোমগী জেনেরেসন্না ভারত খক্তদা নত্তনা ভারতকী মপানগী মফমদসু অনৌবা য়ুগ অসিবু লুচিংলিবনি।
মালেমগী অচৌবা কম্পেনী কয়াগী সি.ই.ও.গী মতাংদা মীয়াম্না ৱা ঙাংনরিবা অসি অদোম খুদিংনা উরমগনি। সি.ই.ও.শিং কনানো? ঐখোয়গী লৈবাক্কী মচানি। মালেম পুম্বদা ঙাল্লিবা লৈবাক অসিগী নহারোলনি। ভারতকী নহাশিংনা মালেমগী স্তার্ত-অপকী জগত্তা মশাগী শক্তাকপু ময়েক শেংনা তাকপা ঙম্লিবসি উবদা ঐখোয় খুদিংনা চাউথোকচবা ফাওই। ভারতকী নহাশিংনা অনৌবা থৌওং পুথোক্তুনা লৈবাকপু তুংলমচৎকীদমক্তা মাঙ থানা পুবসিদা ঐখোয়না নুংঙাইবা ফাওরি। ঙসিদগী মতম খরগী মতুংদা, ইশাগী হোৎনজমন অমসুং পাঙ্গলনা, ভারত মচাশিংবু অহানবা ওইনা স্পেস্তা থাগদৌরি। মসিগী গগনয়ান মিসন অসিবু লুচিংলিবসি ঐখোয়গী নহারোলনি। মসিগী মিসন অসিগীদমক্তা খনগৎখ্রবা নহারোলশিংনা মসিগীদমক্তা য়াম্না কন্না হোৎনরি।
মরুপশিং,
অদোম্না ঙসি ফংলিবা মনা অসিনা ঐখোয়গী অনৌবা চারোন-শুরোনগী মথৌনা অমসুং তৌবা ঙম্বগী মতিকপু নুংঙাইবা ফোংদোক্লি। মসিগী তৌবা ঙম্বগী মতিক অমসুং মথৌনা অসিনা ভারতকী শক্তাক্নি। কোরোনাগী মাইয়োক্তা ঐখোয়গী লৈবাক্না থেংনখিবগী শক্তম ঐখোয়না উখ্রে, ঐখোয়গী সাইন্তিস্ত, ভেক্সিন শাবশিংনা মালেমগী খ্বাইদগী মকোক থোংবা ওইদুনা লৈবাক্কী মফমদা অহানবা ওইনা ভেক্সিন খুৎশিন্নখি। লৈবাক মীয়ামগী লেপ্পা লৈতনা সেবা তৌখি, ঐখোয়গী নর্সশিংনা খুঙ্গং খুদিংদা চত্তুনা, য়ৌশিনবা ৱাবা মনুং হঞ্জিনবা অমসুং খুদোং চাদবা মফমশিংদা চত্তুনা মীয়ামদা ভেক্সিন কাপখি অমসুং কাপ্লি। মসিদি লৈবাক্কী অমা ওইবগী মওংদা থৌনা ফবগী চাউরবা খুদম অমনি।
মতৌ অসুম্না, ঙমখৈদা লৈরিবা ঐখোয়গী লান্মীগী মথৌনা য়েংশি। লৈবাক ঙাক শেন্নবগীদমক্তা মখোয়না মথৌনা ফরিবা অসিনা ঐখোয়গী শক্তাক ওইরিবনি। ঐখোয়গী শান্নরোইশিংনসু লৈবাক্না পাংথোকপদা মতম অমদা ওইথোক্লোইদবা কয়া হৌজিক্তি ফংবে ঙম্লে, থাক অদুদা য়ৌবা ঙম্লে। মতৌ অসুম্না, ঐখোয়গী ইচানুপীশিংদা শরুক য়াবগী অয়াবা পীরমদা সেক্তরশিংদা মখোয়না মশক থোকপা থবক কয়া পাংথোক্লি। মসিনি অনৌবা ভারত হায়বসি, অনৌবা পাংথোকপদা তুং হন্দবা, মখোয়গী মথৌনা অমসুং খোঙফম চেৎপনা ভারতকী শক্তাক্নি।
মরুপশিং,
ঙসিদি, ভারতনা মশাগী হ্যেং অমসুং হৌরক্কদৌরিবা চারোন শুরোনগী মরাইবক লৈহন্নবগীদমক্তা খোঙথাং কয়া লেপ্তনা পায়খৎলি। লৈবাক্কী অনৌবা এজুকেসন পোলিসীনা মফম-মফমগী লোলশিংদা মহৈ তম্বীবগী মতাংদা অহেনবা মিৎয়েং চঙলি। মসিদগী অদোমদা মহৈ তম্বদা হান্নদগী হেন্না লায়রগনি। অদোম্না ইশাগী অপাম্বা সবজেক্ত তম্বা য়ানবগীদমক্তা এজুকেসন পোলিসী অসিদা অখন্নবা থৌওং কয়া পায়খৎখি। লৈবাক্কী স্কুল লিশিং কয়াদা শাগৎলিবা অতল তিঙ্করিং লেবনা মহৈ তম্বগী অহৌবা মতমদগী হৌনা অঙাংশিংদা ইন্নোভেসন তৌবদা পুক্নিং থৌগৎলি।
মরুপশিং,
ভারতকী অঙাংশিং, হৌরক্লিবা নহারোলশিংনা ২১শুবা চহি-চা অসিদা ভারতপু অনৌবা থাক্তা য়ৌহনবা মতিক লৈরে হায়বসি মতম পুম্বদা উত্তুনা লাক্লিবনি। ঐহাক্না নীংশিংবদা, চন্দ্রয়ানগী মতমদা, ঐহাক্না লৈবাক শিনবা থুংবগী অঙাংশিংবু কৌখি। মখোয়গী থৱাই য়াওবা, নুংঙাইবগী মতৌবু ঐহাক্না কৈদৌনুংদা কাওরোই। ভারতকী অঙাংশিংনা ভেক্সিন কাপ্পগী থৌরমদসু মশাগী ওইবা মতমগা চুনবা অমসুং সাইন্তিফিক ওইবা ৱাখল্লোন কয়া উৎখি। জনুৱারী ৩গী মতুংদা শুপ্নগী নুমিৎ ২০নিগী মনুংদা করোর ৪দগী হেনবা অঙাং মশিংনা ভেক্সিন কাপ্নখি। মসিনা ঐখোয়গী অঙাংশিংনা কয়া য়াম্না খঙই হায়বা উৎলি। মখোয়না মশাগী থৌদাংগী মতাংদা নীংথিজনা খঙই।
মরুপশিং,
ঐহাক্না স্বচ্ছ ভারত কেম্পেন্না মায় পাকপগী অচৌবা শরুক অমদি ঐখোয়গী অঙাংশিংগী থৌদাংদা পীনিংই। অদোম্না য়ুম্থোং খুদিংদা অঙাং লান্মী ওইদুনা, স্বচছগরহি ওইদুনা, ইশাগী ইমুং মনুংবু লু-নানবগী খোঙথাংগী মতাংদা পাউদমখি, ইথিল পীখি। য়ুম মনুংবু লু-নান্না থম্বা, য়ুমগী ফত্ত-হৌদীবু মপান্দা য়ৌহন্দবগী থৌদাংবু অঙাংশিংনা লৌখি। ঐখোয়না লৈবাক্কী অঙাংশিংদা হীরম অমগী মতাংদা তেংবাং নিজরি। মসিদা অঙাংশিংনা ঐহাক্কী মতেং পাংবীরবদি ইমুং খুদিংদা অহোংবা লাক্কনি। ঐহাক্কী পীক্লবা মরুপশিংনা ঐহাক্কী থবক অসিদা শোইদনা তেংবাংগনি হায়বগী থাজবা থম্মি।
অদোম্না লু-নানবগী খোঙজংগীদমক্তা মাং থানা থোক্লকখিবগুম্না, ভোকেল লোর লোকেল খোংথাংদসু মাং থানা থোকপীরকউ। অদোম্না য়ুমদা লৈদুনা, ইচিল ইনাওশিংগা পুন্দুনা লিস্ত অমা শেম্বীয়ু, মশিং থীবিয়ু, চেদা ইদুনা য়েংবীয়ু, অয়ুক্তগী নুমিদাং ফাওবা করি পোৎলম শিজিন্নৈ, য়ুমদা লৈরিবা পোত্থোকশিংদুগী মরক্তা ভারত্তা শাবশিংনা করম্বনো, মীরমদগী লাকপনা করম্বনো হায়বা য়েংথোকপীয়ু। অদুগা তুংদা অসিগুম্বা পোত্থোক অমা লৈবা মতমদা ভারত্তা শাবা, ভারতকী লৈহাওগী মনম চেনবা ওইনা লৈসি হায়না অহল লমনশিংদা তাকপীয়ু। অদোম্না ভারত্তা শাবা পোৎলমশিং লৈবা হৌরকপা মতমদা করি ওইরক্কনি? ঐখোয়গী পোত্থোক পুথোকপা হেনগৎলক্কনি। হীরম খুদিংদা পোত্থোক শাবা হেনগৎলক্কনি। পোত্থোক শাবা হেনগৎপা মতমদা, লৈবাক অসিদা অহেনবা থবক ফংবগী খুদোংচাবা কয়া লৈরক্কনি। থবক ফংবা হেনগৎলক্লবদি, ইশানা মরোমদোম লেপ্পসু ঙম্লক্লগনি। মরম অদুনা, আত্মানির্ভর ভারতকী খোঙজং অসিদা ঐখোয়গী নহারোলশিংগসু মরী লৈনরবনি।
মরুপশিং,
ঙসিদগী নুমিৎ নিনিগী মতুংদা লৈবাক্না গনতন্ত্রা নুমিৎ পাংথোক্কনি। ঐখোয়না নুমিৎ অসিদা অনৌবা ৱারেপ খরা লৌগদবনি। ঐখোয়গী ৱারেপ অসি খুন্নাই, লৈবাক অমসুং মালেম শিনবা থুংবগী কান্নবগীদমক্তা ওইবা য়াই। অকোয়বগী ফিভমগী মতাংগী হীরম্না ঐখোয়গী মাংদা খুদম ওইনা লৈরি। ভারতনা হীরম অসিগী মাইকৈদা ঙসি থবক কয়া পাংথোক্লি। মসিনা মালেম খুদিংনা কান্নবা ফংগনি। ঐহাক্না ভারতকী শক্তাক্কা মরী লৈনবা, ভারতপু মতমগা চুনবা অমসুং চাউখৎপগী ৱারেপকী মতাংদা খন্থহন্নীংই। অদোমগী মঙলান অমসুং ৱারেপনা লৈবাক্কী ৱারেপকা মরী লৈনগনি অমসুং লাক্কদৌরিবা মতমশিংদা অদোম্না লৈবাক্কীদমক্তা মশিং থীঙমদবা থৌদাং কয়া পায়খৎকনি হায়বগী ঐহাক্না থাজবা থম্মি।
মসিগী থাজবা অসিগা লোয়ননা ঐহাক্না অদোম খ্বাই খিবীক্তা হন্না হন্না থাগৎচরি।
ঐহাক্কী অঙাং মরুপশিংবু ঐহাক্না নুংশীবা অমসুং য়াইফ পাউজেল পীবগা লোয়ননা অমুক্কা হন্না থাগৎচরি।
PM reviews key projects in Mines, Railways, and Water Resources; calling for time-bound execution
