অহানবদা ঐহাক্না দিজাস্তর রেজিলিএন্স অমসুং দিজাস্তর মেনেজমেন্তগা মরী লৈনবা মরুপ পুম্নমকপু থাগৎপা ফোঙদোকচরি। মরমদি নখোয়গী থৱায় খুবাক্তা হাপতুনা অতোপ্পা মীওইশিংগী পুন্সি কনবগী শীংথানীংঙাই ওইবা থবক নখোয়না কয়ারক হন্না তৌখি। হন্দক্তা মালেম পুম্বনা তর্কী অমসুং সিয়িয়াদা ভারতকী তীমনা হোৎনখিবশিং অদুবু থাগৎখি অমসুং মসি ভারত মচা খুদিংমক্কীদমক চাউথোকচবা পোক্নবা ৱাফম অমা ওইরি। তেংবাং পীবা অমসুং মী কনবগা মরী লৈনবা ভারতকী হ্যুমেন রিসোর্স অমসুং তেক্নোলোজিকেল কেপাসিতী হেনগৎহল্লিবা মওং অসিনা লৈবাক অসিদসু তোঙান-তোঙানবা খুদোংথিবশিং থোকপা মতমদা মীওই কয়াগী পুন্সি কনবদা মতেং পাংখি। দিজাস্তর মেনেজমেন্তগা মরী লৈনবা সিস্তেম মপাঙ্গল কনখৎহনদবনি, মসিবু পুক্নিং থৌগৎকদবনি, অমসুং লৈবাক শিনবা থুংবদা হেল্দী কম্পিতিসনগী এৎমোস্ফিয়র অমা শেমগৎকদবনি মরম অসিনা থবক অসিগীদমক ঐখোয়না অখন্নবা এৱার্দ অমা পীখি। নেতাজী সুভাস চন্দ্র বোস আপদা প্রবন্ধন পুরস্কার অসি ঙসি মফম অসিদা ইন্সতিত্যুসন অনিদা পীখি। সাইক্লোনদগী হৌদুনা সুনামি য়াওনা তোঙান-তোঙানা খুদোংথিবশিংদা ওরিসা স্তেৎ দিজাস্তর মেনেজমেন্ত ওথোরিতীনা শীংথানীংঙাই ওইবা থবক তৌখি। মতৌ অসুম্না মিজোরামগী লুংলৈ ফায়র স্তেসন্না উমংদা চাকপা মৈ মুৎথৎনবা, অপুনবা মফম অদু কন্নবা অমসুং মৈ চাকপা অদু শন্দোকপা থীংনবা চোকথবা লৈতনা হোৎনখি। ইন্সতিত্যুসনশিং অসিদা থবক তৌরিবা মীওইশিংবু ঐহাক্না থাগৎচরি।
মরুপশিং,
নখোয়না সেসন অসিগী থিম – “বিল্দিং লোকেল রেজিলিএন্স ইন এ চেঞ্জিং ক্লাইমেৎ” হায়না থমখি। ভারতপু হীরম অসিদা মশক তাকপা অসি অরিবা মতমদগীনি মরমদি মসি ঐখোয়গী অরিবা চৎনবীগী মরু ওইবা শরুক অমা ওইদুনা লাকখি। ঙসিসু ঐখোয়গী গুহা, স্তেপৱেল, রিজর্বর, লোকেল আর্কিতেলচর, অরিবা সহরশিংদা য়েংবা মতমদা মসিগী ইলিমেন্ত অসি ময়েক শেংনা উবা ফংখি। ভারতকী দিজাস্তর মেনেজমেন্তগা মরী লৈনবা সিস্তেম অসি মতম চুপ্পদা লোকেল ওই, সোল্যুসনশিং অসি লোকেল ওইখি, লালোংসু লোকেল ওইখি। হৌজিক কচ্ছকী মীয়াম্না লৈরিবা য়ুমশিং অসি ভুঙ্গা কৌই। মসি লৈবাক্কী য়ুমশিংনি। ঐখোয়না খঙই মদুদি কচ্ছ অসি চহিচাগী অহৌবা মতমদা অচৌবা য়ুহার হাবা অমগী ইপিসেন্তর ওইখি। অদুবু ভুঙ্গাগী য়ুমশিং অসিদা অকাইবা অমত্তা থোকখিদে। তশেংবদি অতোপ্পা মফম অমদা অকাই অতোই থোক্লমগনি অমসুং চাউনা খুদোংচাদবা মায়োক্নরমগনি। মসিগী তেক্নোলোজীগা মরী লৈনবা পরা কয়া লৈ। অনৌবা তেক্নোলোজীগী মতুং ইন্না হাউসিং নত্ত্রগা তাউন প্লান্নিংগী মোদেলশিং অসি লোকেল থাক্তা ঐখোয়না শেমদোকপা য়ারোইদ্রা? লোকেল কনস্ত্রক্সন মেতরিএল নত্ত্রগা কনস্ত্রক্সন তেক্নোলোজী ওইরবসু ঙসিগী তেক্নোলোজীগা লোয়ননা ফগৎহনবা হায়বা অসি য়াম্না মথৌ তাই। ঐখোয়না লোকেল রেজিলিএন্সকী খুদমশিংগা লোয়ননা ফ্যুচর তেক্নোলোজীগা কন্নেক্ত তৌরবা মতমদা ঐখোয়না দিজাস্তর রেজিলিএন্সকী মাইকৈদা হেন্না নীংথিনা থবক তৌবা ঙমগনি।
মরুপশিং,
হৌখিবা চহিশিংদা লৈরম্বা পুন্সি মহিং অদু য়াম্না নুংঙাইরমখি অমসুং মসিগী এক্সপরিয়েন্সনা ঐখোয়না লৈকং, ঈচাই অমসুং নোং অতৎ-অখম লৈতনা চুবা অসিগুম্বা মহৌশাগী খুদোংথিবশিং অসি করম্না মায়োক্নগনি হায়না ঐখোয়দা তাকপীখি। মরম অসিনা লৌউ-শিংউ বিভাগতা দিজাস্তর রিলিফ থম্বা অসি মমাং সরকারশিংনা লিঙ্ক তৌখি। য়ুহার হাবা অসিগুম্বা মহৌশাগী খুদোংথিবশিং থোকপা মতমদা মসি লোকেল রিসোর্সশিংগী মতেংগা লোয়ননা লোকেল থাক্তা মসি লাকশিনখি। অদুম ওইনমক ঙসি ঐখোয়গী মালেম অসি য়াম্না পীকই মসিদা অমনা অমগী এক্সপরিয়েন্স অমসুং এক্সপরিমেন্তশিংদগী তমশিনবা হায়বা অসি কাংলোন অমা ওইরকখি। নাকল অমরোমদা মহৌশাগী খুদোংথিবা থোকপগী মশিং অসিসু হেনগৎলকখি। খুঙ্গং অমদা ফিজিসিয়ন অমা খক্তা লৈদুনা মহাক্না মীপুম খুদিংমক লায়েংবগা চাংদম্নরদুনা প্রধান মন্ত্রীনা ঙসিগী মতম অসিদা অনাবা খুদিংমক্কী স্পেসিএলিস্ত দোক্তরশিং লৈরে। মতৌ অসুম্না মহৌশাগী খুদোংথিবশিং লাকশিনবা দাইনামিক সিস্তেম অমা দিবেলপ তৌবগী মথৌ তাই। মমাংগী চহিচাগী মহৌশাগী খুদোংথিবশিং নৈনদুনা মরিক চুম্বা এজুম্পসন অমা তৌবা য়াই অমরোমদা মেতরিএল নত্ত্রগা সিস্তেম ওইরবসু মতম চানা পাম্বৈশিং অসি নৌনা য়েংশিনবদা অকনবা মীৎয়েং চংবা মথৌ তাই।
মরুপশিং,
রিকগনিসন অমসুং রিফোর্ম অসি দিজাস্তর মেনেজমেন্ত মপাঙ্গল কনখৎহন্নবগী মপুং ওইবা মচাক অনি ওইরি। রিকগনিসন্না হায়বা অসি মহৌশাগী খুদোংথিবশিংনা পীরিবা ওইথোকপা য়াবা অকিবশিং অমসুং তুংলমচৎতা করম্বা মতমদা মসি থোক্লকপা য়াবা অদু খঙদোকপনি। অমরোমদা রিফোর্ম অসি সিস্তেম অমনি মসিনা ওইথোকপা য়াবা মহৌশাগী খুদোংথিবশিংগী অকিবশিং হন্থহনবা ঙম্মি। দিজাস্তরগী অকিবা আসি হন্থহন্নবা খ্বাইদগী ফবা পাম্বৈ অসি সিস্তেম ফগৎহনবা হায়বা অসিনি। মতমগা লোয়ননা মসি হেন্না ইফিসিএন্সত ওইহনগদবনি অমসুং মসিগীদমক অশম্বা পাম্বৈগী মহুৎ তুং কোইনা চৎকদবা থৌশিলগী ৱাখল্লোন্দা মীৎয়েং চংগদবনি। হৌজিক ঐখোয়না সাইক্লোনশিংগী মতাংদা ৱারী শাবা মতমদা করিগুম্বা ঐখোয়না সাইক্লোনশিং থোকপা মতমদা ভারতকী ওইখিবা ফীভম অদুদা য়েংলুরবদি ভারত্তা সাইক্লোন অমা শিৎপা মতমদা মীওই লিশিং কয়ানা মনুং মতম চাদনা শীখি। মসি ঐখোয়না নোংচুপ বেঙ্গোল অমসুং ওরিসাগী সনুদ্রা মপালশিংদা কয়ারক হন্না থোকখিবা উবা ফংখি। অদুবু মতম অমদি লালোংশিংদা অহোংবা লাকপগা লোয়ননা ভারতনা হৌজিক সাইক্লোনশিং মায়োক্নবা ঙম্লে অমসুং মসিনা পুন্সি অমসুং লন-থুমদা থোকহনবা অমাংবসু হন্থহনবা ঙমখি। ঐখোয়না মহৌশাগী খুদোংথিবশিং খাম্বা ঙমলোই অদুবু ঐখোয়না হেন্না ফবা লালোংশিং অমসুং সিস্তেমশিং থমদুনা মাগী শাফুশিং শোইদনা হন্থহনবা ঙমগনি। মরম অসিনা রিএক্তিবকী মহুৎ প্রোএক্তিব এপ্রোচ অমা পাইখৎদবনি।
মরুপশিং,
প্রোএক্তিব ওইবগী মতাংদা ঐখোয়গী লৈবাক্তা মমাংঙৈদা করি ফীভমদা লৈরম্বা অমসুং হৌজিকনা করি ফীভমদা লৈবা হায়বগী তাংদা ঐহাক্না খরদং হায়জনীংই। ভারতনা নীংতম্বা ফংলবা মতুং দিকেদ ৫ হৌখ্রে, চহিচা অমগী তঙ্খাই হৌজিনখ্রে অদুবু দিজাস্তর মেনেজমেন্তগা মরী লৈনবা আইন অমত্তা লৈরমখিদে। কচ্ছতা ২০০১দা য়ুহার হাখ্রবা মতুংদা গুজরাত স্তেৎ দিজাস্তর মেনেজমেন্ত এক্ত চৎনহনখিবা অহানবা রাজ্য গুজরাতনা ওইখি। এক্ত অসিদা য়ুম্ফম ওইরগা কেন্দ্র সরকারনা ২০০৫দা দিজাস্তর মেনেজমেন্ত এক্তসু শেমখি। মসিগী মতুংদা খক্তা ভারত্তা নেস্নেল দিজাস্তর মেনেজমেন্ত ওথোরিতী শেমখি।
মরুপশিং,
ঐখোয়গী লোকেল বোদীশিং, অর্বান লোকেল বোদীশিংদা দিজাস্তর মেনেজমেন্ত গভর্নান্স মপাঙ্গল কনখৎহনবা তাই। অর্বান লোকেল বোদীশিংনা দিজাস্তর থোক্লা মতমদা খক্তা রিএক্ত তৌই, মসিগী মতাংদা খন্নবা হায়বা অসি ওইথোক্তে। ঐখোয়না প্লান্নিং অসি ইন্সতিত্যুস্নেলাইজ তৌবা তাই। লোকেল প্লান্নিং হন্না য়েংশনবা তাই। ঐখোয়না বিল্দিংশিং, অনৌবা ইনফ্রাস্ত্রকচর প্রোজেক্তশিং শানবগীদমক দিজাস্তর মেনেজমেন্তগী মতুং ইন্না অনৌবা গাইদলাইনশিং শেমগদবনি। অমরোমদা অপুনবা সিস্তেমগী ওভরহোলিং মথৌ তাই। মসিগীদমক ঐখোয়না থাক অনিদা থবক পাইখৎপা তাই। অহানবদা দিজাস্তর মেনেজমেন্ত এক্সপর্তশিংনা পব্লিক পার্তিসিপেসন্দা হেন্না মীৎয়েং চংগদবনি। ঐখোয় পুম্নমক্না লোকেল পার্তিসিপেসনগা লোয়ননা ভারতনা করম্না অচৌবা পান্দমশিং মাইপাকপা ঙম্বগে উবা ফংলি। মরম অসিনা দিজাস্তর মেনেজমেন্তগী মতাংদসু পব্লিক পার্তিসিপেসন অসি য়াওদ্রবদি ওইথোক্লোই। লোকেল পার্তিসিপেসনগা লোয়ননা লোকেল রেজিলিএন্সকী মন্ত্র তুং ইল্লবা খক্তদা ঐখোয়না মাইপাকপা ঙমগনি। য়ুহার হাবা, সাইক্লোনশিং, মৈহৌ-লাংপোক অমসুং অতোপ্পা খুদোংথিবশিংগী অকিবশিংগী মতাংদা মীয়ামদা ভাপ তাহন্নবা লেপ্পা লৈতবা থৌওং অমা চত্থগদবনি। খুঙ্গং অমসুং য়ুমলোন্নরিবশিংগী থাক্তা ঐখোয়গী নহা ওইরিবা মরুপশিং, য়ুব মন্দলশিং অমসুং সখি মন্দলশিংদা তেংবাং পীবা অমসুং মীকনবগী ত্রেনিং পীগদবনি। আপদা মিত্রা, এন.এস.এস.-এন.সি.সি., আর্মী ভেতরেনশিংগী মেকানিজমশিং মপাঙ্গল হেন্না কনখৎহন্নবা অমসুং ফার্স্ত রেস্পোন্সকীদমক কম্ম্যুনিতী সেন্তরশিংদা ইক্বিপমেন্ত থম্বা মথৌ তাই মরমদি মতম চানা মীকনবগী থবক চত্থবনা পুন্সি কয়া কনবা ঙমগনি। অমসুং ঐহাক্কী এক্সপরিয়েন্সকী মতুং ইন্না করিগুম্বা মতমদা বেতা বেঙ্কনসু মথৌ তৌই। ঐহাক্না গুজরাততা লৈরিঙৈদা খেদা জিলাদা তুরেল অমা লৈরম্মি। চহি ৫-৭তা ঈচাও থোক্লমখি। চহি অমদা ঈচাও মঙারক থোকপা য়াওখ্রে অদুবু মতম অদুদা দিজাস্তরগা মরী লৈননা থবক-থৌরম কয়া পাইখৎখি। খুঙ্গং খুদিংমক্তা মোবাইল ফোনশিং লৈখি। মতম অদুদা লোকেল লোলদা মেসেস থাবগী সিস্তেম লৈরমখিদে অদুনা গুজরাতি অদু ইংলিশতা ইদুনা মেসে থাখি, খুঙ্গংগী মীয়াম্না পুং খরগী মতুংদা ঈশিং চেনশিনলকপা য়াবগী ওইথোকপা লৈ, ফীভম অসি অসুম তৌরি হায়না মেসেস থাখি। অমসুং ঐহাক্না ময়েক শেংনা নীংশিংলি মদুদি ঈচাও ৫ নংখ্রবা মতুংদা ফাওবা মীওই অমত্তা, জিবা অমত্তা শীবা য়াওখিদে। মফম চানা পাও পীবনা মতম চানা শিল-লাংবা ঙমহনখি। করিগুম্বা মতম চানা মী কনবা অমসুং তেংবাং পীবগী থবক হৌরবদি ঐখোয়না পুন্সি মাংগদবদগী কনবা ঙমগনি। অনিশুবদা তেক্নোলোজী শীজিন্নদুনা ঐখোয়না য়ুম খুদিংমক অমসুং লম্বী খুদিংমক্কী রিএল তাইম রেজিস্ত্রেসন অমসুং মোনিতরিং তৌনা সিস্তেম অমা শেম্বা তাই। করম্বা য়ুম চহি কয়া শুরে, করম্বা লম্বীদা নলাগী ফীভম কমদৌরি? ইলেক্ত্রিসিতী, ঈশিংগুম্বা ঐখোয়গী ইনফ্রাস্ত্রকচরগী রেজিলিএন্স অসি কমদৌরি? নুমিৎ খরনিগী মমাংদা ঐহাক্না মীফম অমদা য়াওখি মদুগী হীরম অসি হিৎৱেব ওইখি, মমাংদা ঐখোয়না হোস্পিতালশিংদা মৈহৌ-লাংপোক অনি থোকপা উবা ফংখি। অনাবশিং পাম্বৈ লৈখিদে। হৌজিক হোস্পিতালগী অপুনবা সিস্তেম অসিদা মুন্না য়েংলবদি অচৌবা খুদোংথিবা অসি ঙাকথোকপা ঐখোয়না ঙমগনি। মসিগী মরমদা মরিক চুম্বা ইপাও ঐখোয়দা লৈরবদি ঐখোয়না প্রোএক্তিব ওইবা খোঙথাংশিং লৌখৎপা ঙমগনি।
মরুপশিং,
শাবা হেনগৎলকপগা লোয়ননা মরু ওইনা হৌখিবা চহি খরা অসিদা হোস্পিতাল, ফেক্তরী, হোতেল নত্ত্রগা মলতি-স্তোরী রেসিদেন্সিএল বিল্দিংগুম্বা মী কুংনা তাবা সহরগী মফমশিংদা মৈহৌ-লাংপোক্কী থৌদোকশিং থোকপা হেনগৎলক্লি। মসি লাকশিন্নবা ঐখোয়না হ্যুমেন রিসোর্স দিবেলপমেন্ত, তেক্নোলোজী, রিসোর্সশিং নত্ত্রগা সিস্তেম ওইরবসু ঐখোয়না য়াম্না সিস্তেমেতিক ওইনা থবক তৌবা তাই, ঐখোয়না হোল ওফ দি গভর্নমেন্ত এপ্রোচকা লোয়ননা থবক তৌবা তাই। গারীনা য়ৌশিনবা ঙমদবা মী কুংনা তাবা মফমশিংদা মৈ মুৎথৎনবা মফম অদুদা য়ৌশিন্নবা হোৎনবা অসি য়াম্না অৱাবা থবক অমনি অমসুং মসিগী সোল্যুসন অমা পুথোকপা মথৌ তাই। অৱাংবা বিল্দিংশিংদা মৈ মুৎথৎনবগীদমক ঐখোয়গী ফায়রফাইতরশিংগী স্কিল সেৎ লেপ্পা লৈতনা হেনগৎহন্নবা ৱাফম থমখি অমরোমদা ইন্দস্ত্রিএলগী মফমদা মৈ হৌরকপদা মুৎথৎনবা রিসোর্সশিং মরাং কাইনা থম্বসু মথৌ তাই।
মরুপশিং,
দিজাস্তর মেনেজমেন্তগী খোঙথাংশিংগী মরক্তা লোকেল থাক্তা স্কিলশিং অমসুং তঙাই ফদবা ইক্বিপমেন্ত লেপ্পা লৈতনা মোদর্নাইজেসন তৌবা অসিসু য়াম্না মরু ওই। খুদম ওইনা হৌজিক মতম অসিদা অনৌবা ইক্বিপমেন্তশিং থোরকখি, মসিনা উমংগী অমোৎপা অদু বাইওফ্যুলদা ওন্থোক্লি। ঐখোয়গী নুপীশিং সেল্ফ হেল্প গ্রুপতা য়াওশিন্দুনা মখোয়দা অসিগুম্বা ইক্বিপমেন্ত পীবা য়াগনি, করিগুম্বা মখোয়না তাদুনা লৈরিবা অমোৎ-অকাই খোমজিন্দুনা মখোয় অদুবু প্রোসেস তৌবা য়াগনি অমসুং মদুদগী কান্নবা পোৎ পুথোকপা য়াগনি অমসুং মসিনা উমংদা মৈহৌ লাংপোক থোকহনদবা ঙমগনি। ওইথোকপা য়াবশিং হন্থহনগনি। অমসুং মসিনা মখোয়গী ইনকম হেনগৎহনগনি অমসুং মৈহৌ-লাংপোক্কী থৌদোকশিং হন্থহন্নবা ঙমগনি। মহাক্না গ্যাস লীকশিং ওইবগী চাং য়াম্না ৱাংলিবা ইন্দস্ত্রীশিং অমসুং হোস্পিতালশিংগীদমক স্পেসিএলিস্ত ফোর্স অমা শেম্বা য়াই। মতৌ অসুম্না এ.আই., ৫জি অমসুং ইন্তর্নেৎ ওফ থিংস (আই.ও.তি.)বু হীরম অসিদা শীজিন্নদুনা এম্ব্যুলেন্স নেৎৱার্ক ফ্যুচর রেদী ওইহন্নবা য়াগনি। মসিবু হেন্না রেস্পোন্সি অমসুং ইফেক্তিব করম্না ওইহনবা য়াবগে হায়বা অসিদা কুপ্না খন্নরবা মতুংদা রোদমেপ অমা শেম্বসু য়াগনি। করম্না তেংবাং পীবা অমদি মী কনগী থবক্তা দ্রোন তেক্নোলোজী শীজিন্নবা য়াই? দিজাস্তারগী মরমদা ঐখোয়দা চেকশিনবা পীগদবা অদুগুম্বা গেদজেৎশিংদা ঐখোয়না মীৎয়েং চংবা য়াগদ্রা? অকাই-অতোইগী মখাদা মী ননশিনখিবা অদু থীবদা মতেং পাংনবা পর্সনেল গেদজেৎশিং লৈগদরা? ঐখোয়না অসিগুম্বা মখলগী ইন্নোভেসন্দা মীৎয়েং চংগদবনি। মালেমগী লৈবাক কয়াদা অসিগুম্বা সোসিএল ওর্গনাইজেসনশিং লৈ মখোয়না তেক্নোলোজী শীজিন্নদুনা অনৌবা সিস্তেমশিং শেম্লি। মখোয়গী মওং নৈন্নবা অমসুং খ্বাইসগী ফবা প্রেক্তিস পাইখৎপা তাই।
মরুপশিং,
মালেম শিনবা থুংবদা খুদোংথিবা থোকপদা ভারতনা থুনমক মতেং পীরি অমসুং রেজিলিএন্ত ইনফ্রাস্ত্রকচরগীদমক ইনিসিএতিব পাইখৎলি। ঙসি মালেমগী লৈবাক ১০০ হেনবনা ভারতকী লুচিং মখাদা কোলিজন ফোর দিজাস্তর রেজিলিএন্ত ইনফ্রাস্ত্রকচরদা য়াওশিনখি। ত্রেদিসন অমসুং তেক্নোলোজীনা ঐখোয়গী শক্তি ওইরি। শক্তি অসিগা লোয়ননা ঐখোয়না ভারত খক্তা নত্তনা মালেম পুম্বগীদমক দিজাস্তর রেজিলিএন্সকা মরী লৈনবা খ্বাইদগী ফবা মোদেল অমা ঐখোয়না শেম্বা ঙমগনি। ঙসিগী খন্ন-নৈনবা অসিদগী সজেসন অমসুং সোল্যুসন কয়া পুরকপা ঙমগনি অমসুং তুংলমচৎকীদমক এক্সনেবল পোইন্তশিং শেম্বা ঙমহনগনি হায়না ঐহাক্না থাজৈ। নোংজু থা লাক্ত্রিঙৈ মমাংদা অসিগুম্বা মখলগী শেম শাবা অসি তৌহৌনবা মতাং চারে হায়না ঐহাক্না থাজৈ, রাজ্যশিংদা সিস্তেম অসি পুশিন্নবা হোৎনবা তাই, রাজ্যশিংগী মতুং মেত্রো অমদি সহরশিংদা পুশিনগদবনি। করিগুম্বা ঐখোয়না নোং লাক্ত্রিঙৈদা সিরিজ অমা হৌরবদি ঐখোয়না মথৌ তাবা অপুনবা সিস্তেমগী হীরম কয়াদা সেন্সিতাইজ তৌবা ঙমগনি, ঐখোয়না মদু থুংহনবা ঙমগনি অমসুং চাউনা অমাং অতা থোক্তনা শেম শাবা ঙমগনি। ৱেবিনার অসিগীদমক ঐহাক্না পুম্নমকপু য়াইফ মঙ্গোল পীজরি।
থাগৎচরি।
