কেন্দ্র মন্ত্রী মন্দলদা লৈরিবা ঐহাক্কী সেনিয়র মরুপ, লৈবাক্কী ঙাক-শেল মন্ত্রী শ্রীমান রাজনাথ সিংহজী, দি.জি. এন.সি.সি., একাদমিসিয়ন, মীথুংলেন, ঐহাক্কী মিনিস্তর কাউন্সিলগী অতোপ্পা মরুপ, অতোপ্পা মীথুংলেন, গনতন্ত্রা দিবস পেরেদতা শরুক য়াগদৌরিবা তোঙানবা আর্তিস্ত, এন.সি.সি. অমসুং এন.এস.এস.কী ঐহাক্কী নহা মরুপশিং!
নেতাজীগী ফিজোল শেত্তুনা প্রধান মন্ত্রীগী লৈফমদা অদোম্না মশিং য়াম্না লাকপগী মতৌসি ঐহাক্না য়েংলম্লিবনি। ঐহাক্না অদোম্বু খ্বাইদগী অহানবা ওইনা সলাম তৌজরি। জয় হিন্দগী মন্ত্রনা ঐখোয়দা মতম পুম্বদা ইথিল পীবিরি।
মরুপশিং,
ঐহাক্না মমাংগী চয়োল খরসিদা ঐহাক্কী নহা ওইরিবা মরুপশিংগা উন্নবগী খুদোংচাবা কয়া ফংজখি। ঐখোয়না থা অমগী মমাংদা ‘বীর বাল দিবস” পাংথোক্লে, ঐখোয়না বীর সাহেবজাদেগী মথৌনা অমসুং কত্থোকপগী ইকায় খুম্নবগী তাঞ্জা ফংজখি। মসিগী মথংদা, কর্নাতকাদা “নেস্নেল য়ুথ ফেস্তিবেল”দা শরুক য়াবা অমুক ফংজখি। মদুগী নুমিৎ নিনিগী হেক মতুংদা লৈবাক্কী নহা ওইরিবা অগ্নিবীরশিংগা ৱারী অমুক শাখি। মথংদা, য়ু.পি.দা পাংথোকপা শান্ন খোৎনবগী মহাকুম্ভগী থৌরম অমদা নহা ওইরিবা শান্নরোইশিংগা উন্নখি। মসিগী মথংদা, ঙসি সন্সদ অমসুং প্রধান মন্ত্রী নিৱাস্তা অদোমগী লুচিংবা শকখঙসি থৌরমদা শরুক য়ারিবা লৈবাক শিনবা থুংবগী মহৈরোইশিংগা উন্নবগী খুদোংচাবা অমা অমুক ফংলে। ঙরাংমক্তদসু, বাল পুরস্কার ফংলবা লৈবাক্কী থম্মোই শেংলবা অঙাংশিংগা উন্নখ্রে। ঙসিনা অদোমগা মসিগুম্বা অখন্নবা থৌরমসিদা অমুক উন্নরে। নুমিৎ খরনিগী মতুংদা “পরিক্ষা পে চর্চা”গী খুত্থাংদা লৈবাক পুম্বগী মহৈরোই লাখ কয়াগা ৱারী অমুক শান্নগদৌরি। চহি খুদিংগী পাংথোকপগুম্না, হন্দকী চহিসিদসু এন.সি.সি.গী থৌরমসিদা শরুক য়াবগী খুদোংচাবা অমুক্কা ফংজরে।
মরুপশিং,
নহাশিংগা ৱারী শাবগী থৌওং অসি ঐহাক্কী ওইনা মরম অনিগীদমক্তা অখন্নবা ওই। অমা, নহাশিংদা খোইরাংবা, শক্তি, থৱাই য়াওবা অমসুং অনৌবা মতৌ চেল্লি। অদোমগী মসিগুম্বা পোজিতিবিতীনা ঐহাকপু মতম পুম্বদা ইথিলনা থনহল্লি, অহিং-নিংথিল খায়দনা থবক শুনিংনবা পুক্নিং থৌগৎলি। অনিশুবা, লৈবাক্কী অমৃত কাল অসিদা লৈবাক্কী অপাম্বা, মঙলানশিং মঙফাওনহন্নবা পাম্বৈ অদোম্না ওইরি। চাউখৎপা ভারতকী খ্বাইদগী কান্নবসু অদোম্না ফংগদৌরিবনি, অদুনা মসিবু ওইথোকহনবা হায়বসি অদোমগী খুত্তা লৈরবনি। তোঙানবা থৌরমশিংদা নহারোলগী থৌদাং হেনগৎলক্লিবা মওং অসিমক্না পান্দম অসিবু ফংহনবদা হেন্না তেংবাংগনি। পরাক্রম দিবস অসিদা অচৌবা পাউজেলগা লোয়ননা পাংথোকপা কম্পিতিসনশিংদা অদোমগুম্বা অঙাংশিংনা শরুক য়াবনা ঐহাক্কী ৱাফম অসিগী খুদম্নি। মসিগুম্বা থৌরম , অমৃত মহোৎসবকা মরী লৈনবা কম্পিতিসন কয়া লৈবাক অসিদা লেপ্তনা পাংথোক্লি। নহা লাখ করোরনা মসিদা শরুক য়ারি। মসিদি, নহা ওইরিবা লৈবাক অসিনা অচৌবা মঙলান মঙবগী মতৌনি। লৈবাক্কী নহা ওইরিবা চারোন-শুরোনশিংনা লৈবাক্কী থৌদাং য়ানবা শেম শাদুনা লৈরে অমসুং ইশাগী থৌদাং পাংথোক্নবা লাংতক্নদুনা লৈরে হায়বগী খুদম অমসু মসিনা ওইরি। ঐহাক্না শৈরেং, লাই য়েকপা, ফিজোল শেৎপা অমসুং এসে ইবগুম্বা কম্পিতিসনশিংদা মায় পাক্লবা অদোম নহাশিংবু ঐহাক্না থাগৎলি। মতম পুম্বদা পাংথোক্তুনা লাকখিবগুম্না, হন্দক্কী রিপব্লিক দে পেরেদ অসিদসু এন.সি.সি. অমসুং এন.এস.এস. কেদেত, তোঙানবা আর্তিস্তশিংনা শরুক য়াগদৌরি। অদোম্বুসু ঐহাক্না য়াইফ পাউজেল পীজরি।
মরুপশিং,
এন.সি.সি. অমসুং এন.এস.এস. হায়বসিদি লৈবাক্কী নহাশিংবু লৈবাক্কী পান্দম, সরকারগা মরী লৈনহনবা লুপ্নি। এন.সি.সি. অমসুং এন.এস.এস. ভলন্তিয়রশিংনা কোরোনা মনুংদা লৈবাক্কী তৌবা ঙম্বগী মতিক করম্না হেনগৎহনখি হায়বা লৈবাক্না উদুনা খঙখ্রবনি। মরম অদুনা, লুপশিং অসিবু মতম পুম্বদা পুক্নিং থৌগৎনবা, মখোয়বু হেন্না চাউখৎহন্নবা লৈবাক্না লেপ্তনা হোৎনদুনা লাক্লি। ঐখোয়গী ঙমখৈ অমসুং সমুদ্র তোর্বানগী লমদমশিংগী জিলাশিংনা মখল কয়াগী শিংনবা থেংনৈ। মসিগা মাইয়োক্নবা ঙম্নবগীদমক্তা লৈবাক্না অদোমগুম্বা নহাশিং শেম শারি। লৈবাক্কী অসিগুম্বা মফম কয়া অমদা এন.সি.সি.গী অখন্নবা থৌরাং পায়খৎলি। আর্মী, নেভী অমসুং এয়রফোর্সকী খুত্থাংদগী তোঙানবা ত্রেনিং কয়া পীরি। মসিনা নহাশিংবু তুংগী মতমগীদমক্তা শেম-শাদুনা থম্লি অদুগা তঙাই ফদবা মতমদা, মখোয়না ফর্স্ত রেস্পোন্দরগী থৌদাংসু পাংথোক্কনি। ঐখোয়না হৌজিক ভাইব্রেন্ত বোর্দর এরিয়া প্রোগ্রামদসু থবক পায়খৎলি। মসিগী মতেংদগী ঙমখৈগী খুঙ্গংশিংবু চাউখৎহল্লি, তোঙানবা খুদোংচাবা কয়া মফমশিং অসিদা ফংহল্লি। ঙমখৈগী মফমশিংগী নহাশিংগী স্কিল হেনগৎহন্নবা, ইমুংশিংনা মশাগী খুঙ্গংদা অদুম লৈনিংনবা, মহৈ মশিং অমসুং থবক্কী খুদোংচাবা লৈহন্নবা ঐখোয়না হোৎনরি।
মরুপশিং,
সরকারগী হোৎনজমন কয়াসিনা অদোমগী পুন্সিদা করিগুম্বা হীরম অমদি য়াম্না কান্নৈ হায়না অদোম্না খঙবা ঙমগনি। অদোম্না পুন্সিদা মশক থোকপা থৌদাং পাংথোকপা ঙম্লবা, মায় পাকপা ফংবা ঙম্লকপা মতমদা অদোমগা লোয়ননা অদোমগী ইমা-ইপা, অদোমগীইমুংগী অচৌবা থৌদাং শোইদনা য়াওগনি। মসিদা অদোমগী ওজা, স্কুল অমসুং অদোমগী মরুপশিংগী থৌদাংসু য়াওগনি। হায়বদি, অদোমগী মফমদা তেংবাং ফংবা মতমদা অদোম্না চাউখৎপা ঙমগনি হায়বনি। অদোমগী তৌবা ঙম্বগী মতিক্তা মখোয়না থাজবা শোইদনা থম্লমগনি। অদোম্না হোৎনবদা মখোয়নসু তেংবাংলমগনি। অদুগা অদোম্না রিপব্লিক দে পেরেদতা শরুক য়াবসিদসু, অদোমগী ইমুং, স্কুল-কোলেজ অমসুং লৈকাইগী মমায়সু হেনগৎলিবনি। মসিনা হায়বদি, অদোমগী মায় পাকপা অসি অদোমখক্কী হোৎনজমন নত্তে হায়বনি। অদুগা ঐখোয়না মায় পাক্লিবসি ঐখোয়খক্কী নত্তে। ৱাফম অসি ঐখোয়না লৈবাক অমসুং খুন্নাইগসু মরী লৈনহন্দুনা চৎকদবনি। অদোম্না থৱাই তাবা হীরমদা অদোম্না চঙশিনগদবনি। অদুবু, পান্দম ফংনবগীদমক্তদি অদোম্না অতোপ্পা মীওই কয়াবুসু অদোমগা লোয়নদুনা চৎমিন্নবা তাগনি। অদোম্না তীম স্পিরিতকা লোয়ননা থবক তৌবা তাগনি। মরম অদুনা, অদোম্না ইশাগী পান্দম্বু লৈবাক্কী পান্দমগা মরী লৈহন্দুনা চৎপা মতমদা, অদোমগী মায় পাকপগী মিৎয়েংসু চাউথোক্লক্কনি। অদোমগী মায় পাকপবু মালেম্না ভারতকী মায় পাকপা ওইনা উরক্কনি। দাক্তর এ.পি.জে. কলাম, হোমী জহাঙ্গির ভাভা অমসুং দাঃ সি.ভি. রমনগুম্বা সাইন্তিস্ত ওইরো, নত্ত্রগা মেজর ধ্যাঞ্চান্দদগী হৌরগা মমিং লৈবা শান্নরোই কয়া ফাওবা, মখোয়না মশাগী পুন্সিদা পাংথোকখিবা খুদিং, মায় পাকখিবা খুদিং, মালেম শিনবা থুংবনা ভারতকী মায় পাকপা ওইনা উরিবনি। অদুগা, মসিদগী হেন্দোক্তুনা, মালেম্না ভারতকী মসিগুম্বা মায় পাকপশিংবু মখোয়না অনৌবা তুংগী মতম অমনি হায়না য়েংনরিবনি। হায়বদি, মীওইবা খুন্নাইগী চাউখৎপগী কৈরাক ওইবা মায় পাকপশিংবু পুৱারী ওইবা মায় পাকপনি হায়না খন্নৈ। সবকা প্রয়াসকী ৱাখল্লোনগী তসেংবা পাঙ্গল অদু মসিনি।
মরুপশিং,
অদোম্না হৌজিক হিংলিবা মতম অসিগী অখন্নবা ৱাফম লৈ। ঙসিদি, লৈবাক্কী নহাশিংগী মফমদা অনৌবা খুদোংচাবনা থল্লে। মশিং থীঙমদনসু লৈরে। লৈবাক্না ঙসিদি স্তার্তঅপ, মেক ইন ইন্দিয়া অমসুং আত্মানির্ভর ভারতকুম্বা খোঙথাং কয়া পায়খৎলি। স্পেস সেক্তরদগী হৌরগা ইনভাইরনমেন্ত অমসুং ক্লাইমেত চেঞ্জ অমসুং মসিগা মরী লৈনবা শিংনবা খুদিংমক্কী মতাংদা ভারতনা মালেমগী তুংগী মতমগীদমক্তা থবক তৌরি। আর্তিফিসিএল ইন্তেল্লিজেন্স, মেছিন লর্নিং অমসুং ভর্চুএল রিএলিতীগুম্বা হীরমশিংদা মাঙজিল থানা চৎলি। স্পোর্ত অমসুং ক্রিএতিবিতীগী লমদসু অফবা ইকোসীস্তেম অমা শেমগৎলি। অদোম্না মসিগী শরুক ওইগদবনি। অদোম্না মিৎনা উদবা খুদোংচাবশিং থীদোক্কদবনি, খঙদ্রিবা হীরমশিং খঙদোক্নবা থিজিনগদবনি অদুগা ৱাখলনা লাম্বা ফংদ্রিবা ৱারোইশিন কয়া পুথোক্কদবনি।
মরুপশিং,
তুংগী মতমগীদমক্তা অচৌবা পান্দম থম্বা হায়বসি ঐখোয়গী ওইনা য়াম্না মরু ওইবা অমা ওইরে। লোয়ননা, হৌজিক্কী মতমগী ওইবা অথুবা মিৎয়েং চঙফম থোকপা হীরমশিংবুসু মরু ওইনা লৌগদবনি। মরম অদুনা, অদোম পুম্নমক্না লৈবাক অসিদা লাক্লিবা অহোংবশিংবু খঙনা লৈবীয়ু হায়না ঐহাক্না হায়জনিংই। লৈবাক অসিদা পায়খৎলিবা অনৌবা খোংথাংশিংদা শরুক য়াবীয়ু। ঐখোয়গী মাঙদা “স্বছ ভারত অভিয়ান”গী খুদম লৈরে। অদোম নহাশিংনা মসিবু অদোমগী পুন্সিগী মিসন ওইহনগদবনি। অদোমগী নাক্তা ক্রিএতিবিতী অমসুং লাংতক্নবা অনিমক লৈ। ঐখোয়গী লৈকায়, খুঙ্গং-শহরবু তরু-তনান্না থম্নবা লেপ্তনা হোৎননবা অদোম্না মরুপশিংগা তীম শেমদুনা থবক তৌবা য়াই। অদোম্না নহাশিংনা স্বছতাগীদমক্তা থবক তৌরকপা মতমদা, অহল লমনশিংগী পুক্নিং হেন্না চিংশিনবা ঙমগনি। মতৌ অসুম্না, অমৃত মহোৎসবকী মতমসিদা অদোম্না নিংতম ইহৌগা মরী লৈনবা নিংতম লান্মী য়ামদ্রবদা অমগী মতাংদা থোকপা লাইরিক অমা পানবা শোইদনা হোৎনবীয়ু। অদোমগী মরক্তা নহা কয়া অমনা শৈরেং নত্ত্রগা এসে ইরমগনি, ভ্লোগিং তৌরমগনি। নিংতম লান্মীশিংগী পুন্সিগা মরী লৈনবা ক্রিএতিব থবক অমা তৌবীয়ু। ইশাগী স্কুলদসু মসিগা মরী লৈনবা কম্পিতিসন পাংথোক্নবা হায়বা য়াই। অদোম খুদিংগী জিলাশিংদা অমৃত সরোবর ৭৫ শেম্লি। অদোম্না ইশাগী মরুপশিংগা লোয়নদুনা, অদোমগী অনকপদা লৈবা অমৃত সরোবরগীদমক্তা তেংবাংবা য়াই। খুদম ওইনা হায়রবদা, অমৃত সরোবরগী মনাক্তা উ থাবা য়াই। মদুবু ঙাক শেন্দুনা থম্নবগীদমক্তা মীয়ামদা এৱিয়র্নেস পীনবা রেলী পাংথোকপা য়াই। লৈবাক অসিদা চত্থরিবা ফিত ইন্দিয়া মুবমেন্তকী মতাংদা অদোম্না শোইদনা তারম্লগনি। মসিদি নহাশিংবু পুক্নিং থৌগৎকদবা খোঙথাং অমনি। অদোমসু মসিদা শরুক য়াবীয়ু, অদুগা ইমুংগী মীওইশিংবুসু শোইদনা য়াওহল্লু। অদোমগী ইমুংদা নুমিৎ খুদিংগী ওইনা অয়ুক অঙনবদা য়োগ তৌবীয়ু, ইশাগী লিচৎ শাজৎ অসিদি য়ুমদগী হৌবনিকো। ঐখোয়গী লৈবাক্না জি.২০ লুচিংলি হায়বা অদোম্না তারম্লগনি। মসিদি ভারতকী অচৌবা খুদোংচাবা অমনি। মসিগী মতাংদসু অদোম্না শোইদনা পাবীয়ু। স্কুল কোলেজশিংদা মসিগী মতাংদা খন্ন-নৈনবীয়ু।
মরুপশিং,
হৌজিক্কান অসিদি, “ইশাগী হেরিতেজকীদমক্তা চাউথোকচবা” অমসুং “মীখা পোনবগী ৱাখল্লোন থাদোকপা” হায়বা পান্দমগা লোয়ননা লৈবাক্না তুংলমচত্তা চঙশিল্লি। পান্দম অসি লৈবাক্কী নহাশিংগী ওইনদি থৌদাং অমনি। ঐখোয়গী হেরিতেজপু তুংগী মতমগীদমক্তা ঙাক-শেন্দুনা থম্বগী থৌদাংদি অদোমগীনি। অদোম্না ইশাগী হেরিতেজ খঙলবা মতমদা থৌদাং অসি পাংথোকপা ঙমগনি। ঐহাক্না হায়জনিংবদি, অদোম্না কোয়বা চৎপা মতমদা, হেরিতেজ সাইতশিংদসু শোইদনা চৎপীয়ু। মখোয়বু য়েংউ, মখোয়গী মরমদা খঙউ। অদোম নহা ওইরি, তুংগী মতমগী অনৌবা মিৎয়েং অমা শেম্বগী মতম্নি। অদোমদি অনৌবা ৱাখল্লোন, পেরামীতর পুথোক্কদবা মীওইশিংনি। অনৌবা ভারতকী অনৌবা লম্বী শেমগদবা মীওই ঙাক্তনি। অদোম্না মতম পুম্বদা পাংথোক্তুনা লাকপগুম্না, অদোম্না লৈবাক্কী অপাম্বা অমসুং মঙলান মঙফাওনহন্নবা শোইদনা থবক তৌগনি হায়না ঐহাক্না থাজবা থম্লি। অদোম পুম্নমকপু ঐহাক্না অমুক্কা হন্না য়াইফ পাউজেল পীজরি।
থাগৎচরি!!!
