খুরুমজরি!
মহারাস্ত্রগী রাজ্যপাল শ্রী ভগত সিংহ কোশিয়ারীজী, মুখ্য মন্ত্রী শ্রী উদ্ধব থাকরেজী, কেন্দ্রগী মন্ত্রী-মন্দলগী ঐহাক্কী মরুপ অশ্বিনী বৈশ্নবজী, সাওসাহব দানবেজী, মহারাস্ত্রগী উপ মুখ্য মন্ত্রী অজীত পৱারজী, মহারাস্ত্রগী হান্নগী মুখ্য মন্ত্রী দেবেন্দ্র ফদনবীসজী, এম.পি. অমদি এম.এল.এ.শিং, ইচিল-ইনাওশিং!
হয়েং অসি ছত্রপতি শিবাজী মহারাজকী মপোক কুমওন তাই। অহানবদা ঐহাক্না লৈবাক অসিগী অথৌবা, লৈবাক অসিগী মমাই, ভারতকী মশক অমসুং নাৎ ঙাকখিবা অসিগী খুয়া খাদা ইকাই খুম্বনবা উৎচরি। শিবাজী মহারাজকী মপোক কুমওনগী নোংমা ৱাৎলিঙৈদা থানে-দিবাগী মরক্তা লৈবা নৌনা শাবা মঙাশুবা অমসুং তরুকশুবা রেলৱে লাইন অসি শঙ্গাবদা মুম্বাইকর খুদিংমক্তা হন্না-হন্না নুংঙাইবা ফোঙদোকচরি।
মসিগী অনৌবা রেল লাইন অসিনা মুম্বাইদা লৈরিবা মীওইশিংগী পুন্সিদা অচৌবা অহোংবা অমা পুরক্লগনি, মখোয়গী ইজ ওফ লিবিং হেনগৎহল্লগনি। মসিগী অনৌবা রেল লাইন অসিনা মুম্বাইগী লোইবা নাইদ্রবা পুন্সিদা অহেনবা শাহৌ পীরগনি। মসিগী লাইন অনি অসি হৌদোকপগা মুম্বাইগী মীয়ামদা কান্নবা মরি হকথেংননা ফংহল্লগনি।
অহানবদা- হৌজিক লোকেল অমসুং এক্সপ্রেস ত্রেনশিংগী তোঙানবা লাইনশিং লৈরগনি।
অনিশুবদা- মুম্বাইদগী অতোপ্পা রাজ্যশিংদা চৎথোক চৎশিন তৌরিবা ত্রেনশিংনা লোকেল ত্রেনশিং লান্থোকপা মখাতানা ঙাইররোই।
অহুমশুবদা- মেল/এক্সপ্রেস ত্রেনশিংনা কল্যান অমসুং কুর্লা সেক্সনদা অপনবা অমত্তা লৈতনা চেনবা ঙম্লগনি।
অমসুং মরিশুবদা- নোংমাইজিং খুদিংগী ব্লোক তৌবনা মরম ওইদুনা কলাৱা অমসুং মুম্ব্রাগী কম্পিনিয়নশিংনা থেংনরিবা অৱাবশিং অদু কোকহল্লগনি।
মরুপশিং,
ঙসিদগী সেন্ত্রেল রেলৱে লাইন্দা অনৌবা লোকেল ৩৬ চেনবা হৌরগনি। মসিগী মনুংদা অয়াম্বনা এ.সি. ত্রেন ঙাক্তনি। মসি কেন্দ্র সরকারগী লোকেলগী খুদোংচাবা হেনগৎনবা, লোকেল মোদর্নাইজ তৌনবা কম্মিৎমেন্তগী শরুক অমনি। হৌখিবা চহি ৭ অসিদা মুম্বাইদা মেত্রোসু চাউথোকখ্রে। মেত্রো নেতৱর্ক অসি মুম্বাইগা থংনবা সবঅর্বান সেন্তরশিংদা লেপ্পা লৈতনা চাউথোরক্লি।
ইচিল ইনাওশিং,
চহি দিকেদ কয়াদগী মুম্বাইগী সেবা তৌদুনা লাক্লবা লোকেল অসি চাউথোক্নবা, মোদর্নাইজ তৌনবা দিমান্দ অসি য়াম্না কুইরে। ২০০৮দা মসিগী ৫শুবা অমসুং ৬শুবা লাইন অসিগী উরেপ উয়ুং তমখি। মসি ২০১৫দা লোইশিনগদবনি অদুবু লাইবক থীবদি ২০১৪ ফাওবা তোঙান তোঙানবা মরমশিংনা মরম ওইরগা প্রোজেক্ত অসি পন্দুনা লৈখি। মদুগী মতুংদা চয়েৎনরিবা অদু কোকহন্দুনা মসিদা ঐখোয়না অথুবদা থবক পাইখৎপা হৌখি।
মসিগী অনৌবা রেলৱে লাইন অসিনা অরিবা অসিগা মফম ৩৪দা শম্নহনগনি হায়না ঐঙোন্দা ফোঙদোকরকখি। খুদোংচাদবা কয়ামরুম মায়োক্নরবসু, ঐখোয়গী শিন্মীশিং, ঐখোয়গী ইঞ্জিনিয়রশিংনা মসিগী প্রোজেক্ত অসি লোইশিনখি। থোং কয়ামরুম শাখি, ফ্লাইওভরশিং, তন্নেলশিংসু শাখি। লৈবাক অসি শেমগৎপদা অসুম্না থৌদাং লৌখিবগীদমক ঐহাক্না ইকাই খুম্নবা উৎচরি, ঐহাক্না থাগৎপা ফোঙদোকচরি।
ইচিল ইনাওশিং,
মুম্বাই মেত্রোপোলিসনা নীংতম্লবা ভারতকী খুমাং চাউশিনবদা শীংথানীংঙাই ওইবা মওংদা শরুক তমখি। অত্মনির্ভর ভারত অমা শেমগৎনবা মুম্বাই মেনিফোল্দগী পোতেন্সিএল হেনগৎহন্নবা থৌরাং কয়ামরুম পাইখৎলে। মরম অদুনা মুম্বাইদা ২১শুবা চহিচাগী ইনফ্রাস্ত্রকচর শেমগৎনবা ঐখোয়না অখন্নবা মীৎয়েং অমা থম্লি। করিগুম্বা ঐখোয়না রেলৱে কন্নেক্তিবিতীগী মতাংদা খন্নরবদি মসিদা লুপা করোর লিশিং কয়া ইনবেস্ত তৌরি। মুম্বাই সবঅর্বান রেল সিস্তেম অসি মতমগা চুনরবা অমসুং খ্বাইদগী ফবা তেক্নোলোজী শিজিন্নরি। মুম্বাই সবঅর্বানগী কেপাসিতী অসি চাউরাক্না কি.মি. ৪০০ চাউথোকহনবা হায়বসি ঐখোয়গী অপাম্বনি। সি.বি.তি.সি.গুম্বা মতমগা চুনরবা সিগনেলিং সিস্তেম অমগা লোয়ননা, স্তেসন ১৯ মোদর্নাইজ তৌনবা প্লানশিংসু লৈরি।
ইচিল ইনাওশিং,
মুম্বাইখক্তদা নত্তনা লৈবাক অসিগী অতোপ্পা রাজ্যশিংগা মুম্বাইগগী রেল কন্নেক্তিবিতী অসি স্পীদ অমসুং মোদর্নিতী মথৌ তাই। মরম অদুনা অহমেদবাদ-মুম্বাই আই-স্পীদ রেল অসি ঙসিদি মুম্বাই অমসুং লৈবাক অসিগী তঙাইফদবনি। মসিনা মুম্বাইগী পোতেন্সিএল, মুম্বাইগী আইদেন্তিতী অসি সিতী ওফ দ্রীমস ওইনা মপাঙ্গল কনখৎহল্লগনি। মসিগী প্রোজেক্ত অসি খোঙজেল য়াংনা লোইশিনবা হায়বসি ঐখোয় পুম্নমক্কী অহানবা পান্দমনি। মসিগা মান্ননা ৱেস্তর্ন দেদিকেতেদ ফ্রৈত কোরিদোর অসিনা মুম্বাইদা অনৌবা শাহৌ অমা পীরগনি।
মরুপশিং,
ইন্দিয়ন রেলৱেজদা চৎথোক চৎশিন তৌরিবা মীয়ামগী মশিং অসি লৈবাক কয়ামরুমগী মীশিংদগী য়াম্না হেল্লি আয়বসি ঐখোয় পুম্নমক্না খংই। ইন্দিয়ন রেলৱেজবু শাফবা, খুদোংচাবা অমসুং মতমগা চুনবা ওইহনবা হায়বসি ঐখোয়গী সরকারগী মরুওইবা মীয়েংশিংগী মরক্তা অমনি। মালেমগী কোরোনা লাইচৎ অসিনসু ঐখোয়গী ফীরেপ অসিদা অপনবা পীবা ঙমখিদে। হৌখিবা চহি অনি অসিদা রেলৱেজনা ফ্রৈত ত্রান্সপোর্তেসন্দা অনৌবা রেকোর্দ থমখ্রে। রেলৱেজ লাইনগী কি.মি. ৮০০০গী ইলেক্ত্রিফিকেসনসু লোইরে। কিকিলোমিতর ৪,৫০০গী অনৌবা লাইনশিং নত্ত্রগা দব্লিংসু লোইশিনখ্রে। কোরোনাগী মনুংদা কিশান রেলশিংগী খুত্থাংদা ঐখোয়না লৌমীশিংগা লৈবাক পুম্বদা লৈরিবা কৈথেলশিং শম্নহল্লি।
মরুপশিং,
রেলৱেজদা অওনবা পুরকপনা ঐখোয়গী লৈবাক্কী লোজিস্তিক্স সেক্তরদা অচৌবা অহোংবা পুরক্কনি হায়বা ঐখোয়না খংই। মরম অদুনা হৌখিবা চহি তরেৎ অসিদা কেন্দ্র সরকার অসিনা রেলৱেজদা অওবা পুরকপা খুদিংমক্তা পুক্নিং থৌগৎলি। হৌখিবা মতমদা, ইনফ্রাস্ত্রকচর প্রোজেক্তশিং অসি লোইশিনবগী থৌরাংগা কোর্দিনেসন লৈতবনা মরম ওইরগা চহি কয়া চত্থদুনা লৈখি। মসিগী থোশিল অসিগা লোয়ননা ২১শুবা চহিচাগী ভারতকী ইনফ্রাস্ত্রকচর শেমগৎপা হায়বসি ওইথোক্লোই।
মরম অদুনা ঐখোয়না পি.এম. গতিশক্তি নেস্নেল মাস্তর প্লান দিবেলপ তৌখি। ইফ্রাস্ত্রকচর প্রোজেক্ত অমহেক্তগা মরী লৈনবা ই-পাউ খুদিংমক স্তেকহোল্দর খুদিংমক্কা এদভান্স ওইনা কেন্দ্রগী সরকারগী দিপার্তমেন্ত খুদিংমক, রাজ্য সরকারশিং, লোকেল বোদিশিং অমসুং প্রাইবেত সেক্তর অসি দিজিতেল প্লেতফোর্ম অমখক্তদা পুরকপা হায়বসি মসিগী পান্দমনি। মসি খক্তদা মীপুম খুদিংমক্না মখোয়গী থবক্কী শরুক অমসুং প্লান অদু মতিক চানা লোইশিনবা ঙমগনি। মুম্বাই অমসুং লৈবাক অসিগী অতোপ্পা রেলৱেজ প্রোজেক্তশিংগী ওইনা ঐখোয়না গতিশক্তিগী থৌনা অদুগা লোয়ননা থবক পাইখৎলগনি।
মরুপশিং,
লাইরবা অমসুং মিদ্দল ক্লাসকী মীওইশিংনা শিজিন্নবা রিসোর্সশিংদা ঐখোয়না ইনবেস্ত তৌরোইদবনি হায়বা ৱাখল্লোন অসি চহি কয়াগী মমাংদগী খন্দুনা লাক্লি। মসিগী ফল ওইনা ভারতকী পব্লিক ত্রান্সপোর্তকী ইমেজ অসি মতম পুম্বদা খুদোংথীবা মায়োক্নরি। অদুবু হৌজিক্তি ভাতনা অরিবা থৌশিল অদু হুন্দোক্লগা মাংলোমদা চংশিল্লি। গান্ধীনগর অমসুং ভোপালদা লৈরিবা মতমগা চুনরবা রেলৱেজ স্তেসনশিং অসি রেলৱেজকী আইদেন্তিতী ওইরক্লি। ঙসিদি রেলৱেজ স্তেসন ৬০০০ হেনবনা ৱাই-ফাই ফেসিলিতীশিংগা শম্নরে। বন্দে ভারত এক্সপ্রেস ত্রেনশিং অসিনা ভারতকী রেলৱেজদা স্পীদ অমসুং মতমগা চুনরবা খুদোংচাবশিং পীরি। লাক্কদৌরিবা চহিশিংদা বন্দে ভারত ত্রেন ৪০০না লৈবাক অসিগী প্রজাশিংগী শেবা তৌবা হৌরগনি।
ইচিল ইনাওশিং,
ঐখোয়গী সরকারনা অতোপ্পা থৌশিল অমসু হোংদোকখ্রে মদুদি মশাগী পোতেন্সিএলদা রেলৱেজগী ত্রস্ত অদুনি। চহি ৭-৮গী মমাংদা লৈবাক অসিদা রেল কোচ ফেক্তরীগী মতাংদা মান্নদবা কয়ামরুম লৈরম্মি। মসিগী ফেক্তরীশিং অসিগী ফীভম অসি উরগা কনাগুম্বা অমনা মসিগী ফেক্তরীশিং অসিনা মতমগা চুনরবা ত্রেনশিং পুথোকপা ঙমগনি হায়বা থাজরুদে। অদুবু ঙসিদি চপ মান্নবা ফেক্তরী অসিদা বন্দে ভারত ত্রেনশিং অমসুং ইন্দিজিনিয়স বিস্তাদোম কোচশিং শারি। ঙসিদি ঐখোয়না ইন্দিজিনিয়স ওইবা সোলুসনশিংগা লোননা ঐখোয়গী সিগনেলিং সিস্তেম মোদর্নাইজ তৌনবা লেপ্পা লৈতনা হোৎনরি। ঐখোয়না ইন্দিজিনিয়স ওইবা সোলুসনশিং পাম্মি অমসুং ঐখোয়না মীরৈবাক্তা মীপান তাংবদগী মনীংতম্বা পাম্মি।
মরুপশিং,
মসিগী ফেসিলিতিশিং অসি দিবেলপ তৌনবা থৌরাংশিং অসিনা মুম্বাই অমসুং মসিগী অকোইবদা লৈরিবা সহরশিংদা চাউনা কান্নবা ফংহল্লগনি। মসিগী অনৌবা ফেসিলিতীশিং অসিনা লাইরবা অমসুং মিদ্দল-ক্লাস ইমুংশিংদা খুদোংচাবা অমসুং শেল তান্নবগী অনৌবা পাম্বৈ অমা পীরগনি। মুম্বাইবু লেপ্পা লৈতনা চাউখৎহন্নবা কম্মিৎমেন্ত অসিগা লোয়ননা ঐহাক্না মুম্বাইদা লৈরিবা মীওই খুদিংমকপু হন্না হন্না থাগৎচরি।
পুম্নমকপু থাগৎচরি!
