প্রধান মন্ত্রী মোরিসন,
ওস্ত্রেলিয়া অমসুং ভারতকী ত্রেদ মন্ত্রীশিং,
অমসুং ঐখোয়গী ইরক্তা তিল্লিবা লৈবাক অনিগী মরুপ পুম্নমক,
খুরুমজরি!
থা অমগী মনুংদা ঙসি অসিনা ঐহাক্কী মরুপ স্কোতকা লোয়ননা মাই-মাই উনদুনা অহুমরক শুবা ওইনা ৱারী শাবনি। ঐখোয়না মমাংগী চয়োলদা পাঙথোকখিবা ভর্চুএল সম্মিত্তা য়াম্না কান্নরবা খন্ন-নৈনবা অমা পাঙথোকখি। মতম অদুদা ঐখোয়না ঐখোয়গী তীমশিংদা অথুবদা ইকনোমিক কোওপরেসন অমসুং ত্রেদ এগ্রীমেন্তশিংদা নেগোসিএসনশিং তৌদুনা ৱারোইশিন পুরক্নবা পাউতাক পীখি। অমসুং ঙসি মরু ওইরবা এগ্রীমেন্ত অসি খুৎয়েক পীবদা ঐহাক্না য়াম্না নুংঙাইবা পোকই। মসিগী শীংথানীংঙাই ওইরবা মাইপাক অসিগীদমক ঐহাক্না লৈবাক অনিমক্কী ত্রেদ মন্ত্রীশিং অমসুং মখোয়গী ওফিসিএলশিংদা থমোয় শেংনা থাগৎপা ফোঙদোকচরি।
ঐহাক্না মরু ওইনা ওস্ত্রেলিয়াগী হান্নগী প্রধান মন্ত্রী অমসুং প্রধান মন্ত্রী মোরিসনগী হৌজিক ত্রেদ এনভোই ওইরিবা, মিস্তর তোনী এবোতবধ থাগৎপা ফোঙদোকচনীংই। থৌওং অসি খুমাং চাউশিনহনবদা মহাক্না হোৎনখিবশিং অদুনা শরুক তমখি।
মরুপশিং,
অতেনবা মতমগী মনুংদা অসিগুম্বা মরু ওইবা এগ্রীমেন্ত অমগী ৱারোইশিন পুরকপা ঙমবা অসিনা লৈবাক অনিগী মরক্তা অমনা অমবু থাজনবগী চাং অদু উৎলি। মসি ঐখোয়গী বাইলেতরেলগী ওইবা মরী অসিগীদমক পুৱারী ওইরবা মীকুপ অমনি। ঐখোয়গী ইকনোমীশিংদা অমনা অমগী মথৌ তাবশিং থুংহন্নবা হোৎনবদা চাউনা তৌবা ঙম্বা লৈ। এগ্রীমেন্ত অসিগী খুত্থাংদা ঐহাক্না লৈবাক অনিনা মখোয়গী খুদোংচাবশিং মপুং ফানা শীজিন্নবা ঙমহল্লগনি হায়না থাজবা থম্লি।
এগ্রীমেন্ত অসিনা ঐখোয়গী মরক্তা মহৈরোয়শিং, প্রোফেস্নেলশিং, অমসুং তুরিস্তশিং একচেঞ্জ তৌনবদা লায়থোকহল্লগনি, মখা তানা মরীশিং মপাঙ্গল কনখৎহল্লগনি। ঐহাক্না ইন্দিয়া-ওস্ত্রেলিয়া ইকনোমিক কোওপরেসন এন্দ ত্রেদ এগ্রীমেন্ত (“ইন্দওস ই.সি.তি.এ.”) অসি নীংথিনা অমসুং মাইপাক্না নেগোসিএসন তৌখিবগীদমক লৈবাক অনিমক্কী তীমশিংদা ঐহাক্না অমুক্কা হন্না থাগৎপা ফোঙদোকচরি।
ঐহাক্না ঙসিগী থৌরম অসিদা শরুক য়াবীবগীদমক প্রধান মন্ত্রী মোরিসনবু থমোয় শেংনা থাগৎচরি, অমসুং ওস্ত্রেলিয়াদা পাঙথোক্কদৌরিবা মীখলশিং অসি মাইপাক্না পাঙথোকপা ওইয়ু হায়না য়াইফ-মঙ্গোল পীজরি। অমসুং হয়েং শান্নগদৌরিবা ৱর্ল্দ কপ ফাইনেল অসিগীগী ওস্ত্রেলিয়াগী নুপী ক্রিকেৎ তীমদা য়াইফ-মঙ্গোলসু পীজরি।
খুরুমজরি!
