ପ୍ରଧାନମନ୍ତ୍ରୀ ମୋରିସନ୍, ଭାରତ ଓ ଅଷ୍ଟ୍ରେଲିଆର ବାଣିଜ୍ୟ ମନ୍ତ୍ରୀଦ୍ୱୟ ତଥା ଦୁଇଦେଶର ସମସ୍ତ ବନ୍ଧୁ, ଯେଉଁମାନେ ଆଜିର ଏହି ଆଭାସୀ କାର୍ଯ୍ୟକ୍ରମରେ ସାମିଲ ହୋଇଛନ୍ତି, ସମସ୍ତଙ୍କୁ ନମସ୍କାର !
ଆଜି ମାସକରୁ କମ୍ ସମୟ ମଧ୍ୟରେ ଏହା ମୋର ବନ୍ଧୁ ସ୍କଟ୍ଙ୍କ ସହିତ ତୃତୀୟ ପ୍ରତ୍ୟକ୍ଷ ଆଲୋଚନା । ଗତ ସପ୍ତାହରେ ଆୟୋଜିତ ଆଭାସୀ ଶିଖର ବୈଠକରେ ଆମ ଦୁଇଜଣଙ୍କ ମଧ୍ୟରେ ବେଶ୍ ଫଳପ୍ରଦ ଆଲୋଚନା ହୋଇଥିଲା । ସେହି ସମୟରେ ଆମେ ଉଭୟ ଆମର ଟିମ୍କୁ ଅର୍ଥନୀତିକ ସହଯୋଗ ଓ ବାଣିଜ୍ୟ ଚୁକ୍ତି ଘେନି ଚାଲିଥିବା କଥାବାର୍ତ୍ତାକୁ ଶୀଘ୍ର ଶେଷ କରିବାକୁ ନିର୍ଦ୍ଦେଶ ଦେଇଥିଲୁ । ଆଜି ସେହି ଗୁରୁତ୍ୱପୂର୍ଣ୍ଣ ଚୁକ୍ତି ସ୍ୱାକ୍ଷରିତ ହେଉଥିବାରୁ ମୁଁ ବିଶେଷ ଆନନ୍ଦିତ । ଏହି ଅସାଧାରଣ ଉପଲବ୍ଧି ପାଇଁ ମୁଁ ଉଭୟ ଦେଶର ବାଣିଜ୍ୟମନ୍ତ୍ରୀ ଏବଂ ସେମାନଙ୍କ ଅଧିକାରୀମାନଙ୍କୁ ହାର୍ଦ୍ଦିକ ଅଭିନନ୍ଦନ ଜଣାଉଛି ।
ଏହି ଅବସରରେ ମୁଁ ମଧ୍ୟ ନିର୍ଦ୍ଦିଷ୍ଟଭାବେ ଅଷ୍ଟ୍ରେଲିଆର ପୂର୍ବତନ ପ୍ରଧାନମନ୍ତ୍ରୀ ତଥା ବର୍ତ୍ତମାନର ପ୍ରଧାନମନ୍ତ୍ରୀ ମୋରିସନଙ୍କ ବାଣିଜ୍ୟ ଦୂତ ଟନୀ ଆବଟଙ୍କୁ ଅଭିନନ୍ଦନ ଜ୍ଞାପନ କରୁଛି । ଦୁଇ ଦେଶ ମଧ୍ୟରେ ବାଣିଜ୍ୟ ଚୁକ୍ତି ସ୍ୱାକ୍ଷରିତ ହେବା କ୍ଷେତ୍ରରେ ଆବଟଙ୍କ ଅବଦାନ ଭୁଲିବାର ନୁହେଁ ।
ବନ୍ଧୁଗଣ !
ଖୁବ୍ କମ୍ ସମୟ ମଧ୍ୟରେ ଏଭଳି ଏକ ଗୁରୁତ୍ୱପୂର୍ଣ୍ଣ ରାଜିନାମା ସ୍ୱାକ୍ଷରିତ ହେବା ଘଟଣାରୁ ପ୍ରମାଣିତ ହେଉଛି ଯେ ଦୁଇ ଦେଶ ମଧ୍ୟରେ ପାରସ୍ପରିକ ବିଶ୍ୱାସ କେତେ ନିବିଡ । ଆମ ଦ୍ୱିପାକ୍ଷିକ ସମ୍ପର୍କରେ ଏହା ବାସ୍ତବରେ ଏକ ଐତିହାସିକ କ୍ଷଣ । ପରସ୍ପରର ଆବଶ୍ୟକତା ପୂରଣ କରିବାକୁ ଆମ ଅର୍ଥନୀତିର ପ୍ରଚଣ୍ଡ ସାମର୍ଥ୍ୟ ରହିଛି । ମୁଁ ନିଶ୍ଚିତ ଯେ ଏହି ଚୁକ୍ତି ଫଳରେ ଆମେ ଏସବୁ ସମ୍ଭାବନା ଓ ସାମର୍ଥ୍ୟର ଉପଯୋଗ କରିବାର ସୁଯୋଗକୁ ପୂର୍ଣ୍ଣମାତ୍ରାରେ କାର୍ଯ୍ୟକାରୀ କରିପାରିବୁ ।
ଏହି ରାଜିନାମା ଫଳରେ ଦୁଇଦେଶ ମଧ୍ୟରେ ବିଦ୍ୟାର୍ଥୀ, ବୃତ୍ତିଧାରୀ ଓ ପର୍ଯ୍ୟଟକ ଆଦାନପ୍ରଦାନ ପ୍ରକ୍ରିୟା ସହଜ ହେବ । ଏହା ମଧ୍ୟ ଦ୍ୱିପାକ୍ଷିକ ସମ୍ପର୍କକୁ ଆହୁରି ଦୃଢ କରିବ । ଭାରତ-ଅଷ୍ଟ୍ରେଲିଆ ଅର୍ଥନୀତିକ ସହଯୋଗ ଆଲୋଚନାର ସଫଳତା ଏବଂ ବାଣିଜ୍ୟ ରାଜିନାମା (ଇଣ୍ଡଅସ୍-ଏକ୍ଟା) ସ୍ୱାକ୍ଷର ପାଇଁ ମୁଁ ପୁନର୍ବାର ଦୁଇପକ୍ଷର ଟିମ୍କୁ ଅଭିନନ୍ଦନ ଜଣାଉଛି ।
ଆଜିର କାର୍ଯ୍ୟକ୍ରମରେ ଯୋଗ ଦେଇଥିବାରୁ ମୁଁ ପ୍ରଧାନମନ୍ତ୍ରୀ ମୋରିସନଙ୍କୁ ହାର୍ଦ୍ଦିକ ଧନ୍ୟବାଦ ଜଣାଉଛି । ଅଷ୍ଟ୍ରେଲିଆର ଆଗାମୀ ନିର୍ବାଚନର ସଫଳ ପରିଚାଳନା ମଧ୍ୟ କାମନା କରୁଛି । ଆସନ୍ତାକାଲି ଅନୁଷ୍ଠିତ ମହିଳା ବିଶ୍ୱକପ୍ କ୍ରିକେଟ ଫାଇନାଲ ପାଇଁ ମଧ୍ୟ ଅଷ୍ଟ୍ରେଲିଆ ଦଳକୁ ଶୁଭେଚ୍ଛା ଜଣାଉଛି ।
