প্রধান মন্ত্রী শ্রী নরেন্দ্র মোদীনা ২০২৬গী মার্চ ১১দা কেরলা অমসুং তামিল নাদুদা চৎকনি। নুমিদাং পুং ১:৩০ রোম তাবদা, প্রধান মন্ত্রীনা কেরলাগী ইর্নাকুলমদা লুপা কোতি ১০,৮০০গী চাউরাকপা দিবেলপমেন্ত প্রোজেক্ত কয়া শঙ্গাগনি, উরেপ-উয়ুং তমগনি, লৈবাক মীয়ামদা কত্থোক্কনি, উরেপ-উয়ুং তমগনি অমসুং ফ্লেগ ওফ তৌগনি। প্রধান মন্ত্রীনা থৌরম অদুদা তিনবা মীয়ামদা ৱা ঙাংগনি। মসিগী মতুংদা নুংথিল পুং ৫:৪৫ রোম তাবদা, প্রধান মন্ত্রীনা তামিল নাদুগী তিরুচিরাপল্লীদা লুপা করোর ৫,৬৫০গী চাউখৎ-থৌরাংগী প্রোজেক্ত কয়া শঙ্গাগনি, লৈবাক মীয়ামদা কত্থোক্লগনি অমসুং উরেপ-উয়ুং তমগনি। থৌরম অদুদা প্রধান মন্ত্রীনা মীয়াম তিনবা মীফমদা ৱা ঙাংগনি।
ইর্নাকুলমদা পি.এম.
প্রধান মন্ত্রীনা ভারত পেত্রোলিয়ম কোর্পোরেসন লিমিতেদ (বি.পি.সি.এল.) গী কোচি রিফাইনরীদা পোলিপ্রোপিলিন য়ুনিৎকী উরেপ উয়ুংসু তমগনি। প্রোজেক্ত অসিগী ইনভেস্তমেন্ত অসি লুপা করোর ৫,৫০০ হেনগনি। পোলিপ্রোপিলিন য়ুনিৎ অসিগী কেপাসিতী অসি চহি অমদা কিলো তন ৪০০ ওইগনি। পোলিপ্রোপিলিন অসি পেকেজিং, ওটোমোতিভ কম্পোনেন্তশিং, মেদিকেল দিভাইসশিং, তেক্সতাইল, অমসুং য়ুমথোংগী পোৎথোকশিংদা শিজিন্নবা মরুওইবা পোৎশক অমনি। ফেসিলিতী অসিনা ভারতকী দোমেস্তিক পোলিমর মেন্যুফেকচরিং কেপাসিতী মপাঙ্গল কনখৎহল্লগনি, ইম্পোর্তকী মখা পোনবা হন্থহল্লগনি, ইন্দস্ত্রীএল গ্রোথ প্রমোৎ তৌগনি অমসুং লমদম অসিদা থবক ফংহন্নবা খুদোংচাবশিং ফংহল্লগনি।
লম্বীগী ইনফ্রাস্ত্রকচর সেক্তরদা প্রধান মন্ত্রীনা অচৌবা হাইৱে প্রোজেক্ত অনি শঙ্গাগনি। অহানবদা, এন.ঐচ.-66গী থালাপাদি-চেঙ্গালা সেক্সনগী লেন তরুক্না শাবা অদুনি। মসি লুপা করোর ২,৬৫০ হেনবগী শেনফমদা শাখিবনি। সেক্সন অসিনা মুম্বাই-কন্যাকুমারী ইকোনোমিক কোরিদোরগী শরুক অমা ওইরি অমসুং মসিনা কাসারাগোদ অমসুং কন্নুর জিলাশিং অমসুং মঙ্গলোর অমসুং মুজহাপিলোংগাদ য়াওনা য়ুম্লোন্নবা মফমশিংগী মরক্তা কনেক্তিবিতী হেঙ্গৎহল্লগনি। প্রোজেক্ত অসিনা কাসারগোদ, বেকাল, পয়ননুর অমসুং কন্নুরগুম্বা মরুওইবা শহরশিংগা শম্নবা হেনগৎহল্লগনি, অঝিক্কল পোর্তকা শম্নবা হেনগৎহল্লগনি অমসুং তুরিজম অমসুং ললোন-ইতিক্তা মতেং ওইরগনি।
অনিশুবা প্রোজেক্ত অসি কোঝিকোদে বাইপাসগী লেন তরুক্কী ভেঙ্গালমদগী রামনাততুকারা ফাওবা চাউরাক্না লুপা করোর ২,১৪০ চংনা শাবা অদুনি। প্রোজেক্ত অসিনা হৌজিক লৈরিবা অনি থোক্না খায়দবা লম্বী অসি নাকল অনিমক্তা সর্ভিস রোদশিং লৈদুনা তরুক থোক্না খায়বা হাইৱে অমা ওইহল্লগনি। মসিনা চিনবা য়াম্না হন্থহল্লগনি, ত্রাফিক কেপাসিতী ফগৎহল্লগনি অমসুং লম্বীগী সেফতী হেঙ্গৎহল্লগনি। হায়রিবা মফম অসিদা চৎপগী মতম অসি পুং অমদগী হৌরগা মিনট ১৫-২০ ফাওবা হন্থগনি হায়না পানরি। প্রোজেক্ত অসিনা কোঝিকোদে বীচ, বেয়পুর পোর্ত অমসুং কাপ্পদ বীচকুম্বা মরুওইবা মফমশিংগা শম্নবা হেনগৎহল্লগনি। মসিনা লমদম অসিদা তুরিজম অমসুং ললোন-ইতিক হেনগৎহল্লগনি।
প্রধান মন্ত্রীনা কেরলাদা প্রধান মন্ত্রী গ্রাম সরক য়োজনা (পি.এম.জি.এস.ৱাই.) গী মখাদা শাখিবা খুঙ্গংগী লম্বী ২৩সু শঙ্গাগনি। লম্বীশিং অসিনা খুঙ্গংগী অমসুং অরাপ্পা মফমশিংদা কনেক্তিবিতী ফগৎহল্লগনি অমসুং কৈথেলশিং, এজুকেসন, হেল্থকেয়র অমসুং থবক্কী খুদোংচাবশিং ফগৎহনবদা মতেং পাংলগনি। মসিনা খুঙ্গংগী পুন্সি মহিং মপাঙ্গল কনখৎহল্লগনি।
প্রধান মন্ত্রীনা অমৃত ভারত স্তেসন স্কিমগী মখাদা নৌনা শেমগৎলবা রেলৱে স্তেসন অহুম - শোরানুর জঙ্কসন, কুত্তিপুরম অমসুং চাংগানাসরী শঙ্গাগনি। মসিগী স্তেসনশিং অসি পেসেঞ্জরশিংগী খুদোংচাবশিং অমসুং এক্সেসিবিলিতী হেঙ্গৎহন্দুনা মোদর্নাইজ তৌখ্রে। নৌনা শেমগৎ-শাগৎপদা লোকেল আর্কিতেকচরেল ইলিমেন্তশিং পুন্সিনবগা লোয়ননা পেসেঞ্জরশিংগীদমক মোদর্ন, সেফ অমসুং কোম্না চৎপা য়াবা মফমশিং শেমগৎলি।
প্রধান মন্ত্রীনা শোরানুর-নীলম্বুর রোদ রেলৱে লাইন ইলেক্ত্রিফিকেসন প্রোজেক্ত জাতিদা কত্থোক্কনি। মরুওইবা রেলৱে সেক্সন অসিগী ইলেক্ত্রিফিকেসন্না শোরানুরদা লোকোমোতিব হোংবগী তঙাইফদবা লৈতবনা হেন্না থুনা, হেন্না ইফিসিএন্ত অমসুং তুং কোইনা ত্রেন ওপরেসন তৌবা ঙমহল্লগনি। প্রধান মন্ত্রীনা পলক্কদ অমসুং পোলাচীগী মরক্তা অনৌবা ত্রেন সর্বিসকীসু উরেপ-উয়ুং তমগনি। মসিনা কেরলা অমসুং তামিল নাদুগী মরক্তা রেলগী কনেক্তিবিতী হেঙ্গৎহল্লগনি। সর্বিস অসিনা রাজ্য অনি অসিগী মরক্তা নোংমগী চৎথোক-চৎশিন তৌবা মীওইশিং, লাইখুরুম্বা মীওইশিং, ললোন-ইতিক তৌবা মীওইশিং অমসুং তুরিস্তশিংদা কান্নবা ফংহল্লগনি।
প্রধান মন্ত্রীনা কেরলাগী কোল্লাম জিলাগী নোংচুপ কালেদাদা মেগাৱাৎ ৫০গী ফ্লোতিং সোলর প্রোজেক্তকী উরেপ উয়ুংসু তমগনি। প্রোজেক্ত অসিনা ভারতকী ক্লিন ইনর্জীগী পান্দমদা মতেং পাংগনি অমসুং তুং কোইবা অমসুং কার্বন হন্থবা ইনর্জীগী তুংলমচৎ অমগী মায়কৈদা লৈবাক্কী অচেৎপা ফিরেপ অদু মপাঙ্গল কনখৎহল্লগনি।
তিরুচিরাপল্লীদা পি.এম.
প্রধান মন্ত্রীনা তিরুচিরাপল্লীদা চাউরাক্না লুপা কোতি ৫,৬৫০গী চাউনা চাউখৎ-থৌরাংগী প্রোজেক্ত কয়া শঙ্গাগনি, উরেপ-উয়ুং তমগনি, লৈবাক মীয়ামদা কৎথোক্কনি। প্রোজেক্তশিং অসিনা পেত্রোলিয়ম অমসুং নেচরেল গ্যাস ইনফ্রাস্ত্রকচর, লুব্রিকেন্ত মেনুফেকচরিং, রুরেল কনেক্তিবিতী, হায়ৱে দিবেলপমেন্ত অমসুং রেলৱে সর্বিসশিং য়াওনা মরুওইবা সেক্তরশিং কোনশিল্লি।
পেত্রোলিয়ম সেক্তরদা, প্রধান মন্ত্রীনা নীলগিরিস অমসুং ইরোদ জিলাশিংদা ভারত পেত্রোলিয়ম কোর্পোরেসন লিমিতেদকী সিতী গ্যাস দিস্ত্রিব্যুসন নেতৱর্ককী লুপা করোর ৩,৬৮০ হেনবগী শেনফম থাদদুনা উরেপ উয়ুং তমগনি। প্রোজেক্ত অসিনা য়ুমথোং লাখ ৮.৮ হেনবদা পি.এন.জি. কনেক্সন ফংহল্লগনি। কম্মর্সিএল ইস্তাব্লিশমেন্ত ২০০ হেনবদা গ্যাস সপ্লাই তৌগনি অমসুং সি.এন.জি. স্তেসন ২০১ হেন্না লিংখৎকনি।
প্রধান মন্ত্রীনা চেন্নাইগী মনালিদা ইন্দিয়ন ওইল কোরপোরেসনগী চহিগী ওইনা মিত্রিক তন ৬৭২গী লুব ব্লেন্দিং প্লান্ত জাতিদা কত্থোক্কনি। চাউরাক্না লুপা করোর ১৪৯০গী শেনফম থাদদুনা শেমগৎখিবা প্লান্ত অসিনা ভারতকী লুব্রিকেন্ত মেনুফেকচরিং কেপাসিতী মপাঙ্গল কনখৎহল্লগনি।
প্রধান মন্ত্রী গ্রাম সরক য়োজনাগী মখাদা, প্রধান মন্ত্রীনা তামিল নাদুদা কিলোমীতর ৩৭০ শাংবা খুঙ্গংগী লম্বী ৮৯ অমসু শঙ্গাগনি। মসিনা খুঙ্গংগী মফমশিংদা কৈথেলশিং, স্কুলশিং অমসুং হকশেলগী খুদোংচাবশিংগা মরী লৈনহনগনি। প্রধান মন্ত্রীনা এন.ঐচ.-৮১দা লৈবা গঙ্গাইকোন্দা চোলাপুরমগী মনাক্তা গ্রীনফিল্দ বাইপাসকী উরেপ উয়ুং তমগনি।
প্রধান মন্ত্রীনা অমৃত ভারত এক্সপ্রেস ত্রেন অনি, এক্সপ্রেস ত্রেন অনি অমসুং পেসেঞ্জর ত্রেন সর্বিস অমা ফ্লেগ তৌদুনা তামিল নাদু অমসুং তেলঙ্গনা, কর্নাতকা, কেরলা অমসুং নোংপোক ভারত য়াওনা অতৈ মফমশিংগী মরক্তা রেলগী কনেক্তিবিতী মপাঙ্গল কনখৎহল্লগনি। মসিনা পেসেঞ্জরশিংদা কান্নবা ফংহল্লগনি অমসুং রিজনেল ইকোনোমিক গ্রোথতা মতেং ওইরগনি।
