প্রধান মন্ত্রী শ্রী নরেন্দ্র মোদীনা ওক্তোবর ৩০দগী নবেম্বর ১, ২০২২ ফাওবদা গুজরাত অমসুং রাজস্থান্দা চৎকদৌরি।
ওক্তোবর ৩০দা, প্রধান মন্ত্রীনা ভদোদরাদা সি-২৯৫ এয়রক্রাফ্ত মেনুফেকচরিং ফেসিলিতীগী উরেপ উয়ুং তমগনি।
ওক্তোবর ৩১দা, প্রধান মন্ত্রীনা কেবারিয়াদা চৎকনি। মহাক্না স্তেচু ওফ য়ুনিতীদা সর্দার পতেলগী মফমদা শ্রদ্ধাঞ্জলি কৎকনি। তুংদা মহাক্না রাস্ত্রিয় এক্তা দিৱস থৌরমদা শরুক য়াগনি। আরম্ভ ৪.০ লোইশিনবগী থৌরমদা ৯৭শুবা কম্মন ফাউন্দেসন পোর্সকী ওফিসর ত্রেনীশিংগী মফমদা প্রধান মন্ত্রীনা ৱা ঙাঙগনি। মতুংদা, প্রধান মন্ত্রীনা বনস্কন্থ দিস্ত্রিক্তা চত্তুনা, থারদতা তোঙান তোঙানবা চাওখৎ থৌরাংগী প্রোজেক্তশিং উরেপ উয়ুং তমগনি। মহাক্না অহমদবাদতা মরুওইবা রেলৱে প্রোজেক্তশিংসু লৈবাক মীয়ামদা কত্থোক্কনি।
নবেম্বর ১দা, প্রধান মন্ত্রীনা রাজস্থানগী বনস্বারা দিস্ত্রিক্তা চত্তুনা, মফমদুদা ‘মঙ্গর ধাম কী গৌরব গাথা’গী মীয়ামগী থৌরমদা শরুক য়াগনি। তুংদা, মহাক্না গুজরাতক পঞ্চমহল দিস্ত্রিক্তা লৈবা জম্বুঘোরাদা তোঙান তোঙানবা চাওখৎ থৌরাংগী প্রোজেক্তশিং মীয়ামদা কত্থোক্কনি অমদি উরেপ উয়ুং তমগনি।
ভদোদরাদা পি.এম.
প্রধান মন্ত্রীনা লৈবাকসিগী অহানবা প্রাইভেৎ সেক্তরগী এয়রক্রাফ্ত মেনিফেকচরিং ফেসিলিতী ওইগৌরিবা সি-২৯৫ এয়রক্রাফ্ত মেনুফেকচরিং ফেসিলিতীগী উরেপ উয়ুং তমগনি। ফেসিলিতী অসি, তাতা এদভান্স সিস্তেম লিমিতেদ অমসুং এয়রবস দিফেন্স এন্দ স্পেস, স্পেনগা খুৎশম্নদুনা ইন্দিয়ন এয়র ফোর্সকী সি-২৯৫ এয়রক্রাফ্ত ৪০ শানবগীদমক শীজিন্নগনি। ফেসিলিতী অসি দিফেন্স সেক্তরদা আত্মনিরভর্তা পুরক্নবগী মায়কৈদা মরুওইবা খোঙথাঙ অমা ওইগনি, অমদি সেক্তর অসিদা প্রাইভেৎ প্লেয়রশিংগী মতিং ফুদোকহনবদা মতেং ওইগনি। প্রধান মন্ত্রীনা আত্মনিরভর ভারতকী মখাদা এরোস্পেসগী লমদা চঙশিল্লিবা তেক্নোলোজী অমসুং মেনুফেকচরিংগী ফীভমশিং উৎপা একজিবিসন অমদসু চৎকনি।
কেবারিয়াদা পি.এম.
প্রধান মন্ত্রীগী মঙলান্না মতুং ইন্না, লৈবাকসিগী লিংজেল মান্নবা, অপুনবগী শক্তম অমদি ঙাকশেলগী ফীভম ঙাক্তুনা থম্নবা অমদি মপাঙ্গল কনখৎহন্নবগীদমক ঐখোয়গী খোঙফম চেৎশিলহন্নবা সর্দার বল্লভ্ভাই পতেলগী মপোক নুমিৎ হায়বদি ওক্তোবর ৩১বু রাস্ত্রিয় এক্তা দিৱস হায়না পাঙথোক্নবা ২০১৪দা ৱারেপ লৌখি। প্রধান মন্ত্রীনা কেবারিয়াদা লৈবা স্তেচু ওফ য়ুনিতীদা পাঙথোক্কদৌরিবা রাস্ত্রিয় এক্তা দিৱস থৌরমদা শরুক য়াগনি। থৌরম অসিদা সি.এস.এফ. অমসুং, অৱাং থংবা জোন (হরিয়ানা), নোংচপ থংবা জোন (মধ্য প্রদেশ), খা থংবা জোন (তেলঙ্গনা), নোংপোক থংবা জোন (ওরিসা) অমদি অৱাং নোংপোক থংবা জোন (ত্রিপুরা) হায়রিবা স্তেত মঙাসিগী পুলিস ফোর্সশিংগী কন্তিঞ্জেন্তশিংনা শরুক য়াগদবা রাস্ত্রিয় এক্তা দিৱস পেরেদ পাঙথোক্কনি। কন্তিঞ্জেন্তশিং অসিগী মথক্তা, কম্মনৱেল্থ গেম্স ২০২২দা স্পোর্স মেদল ফংখিবা পুলিস তরুকসু পেরেদ অসিদা শরুক য়াগনি।
থৌরম অসিদা অখন্ননা মীৎয়েঙ চিংশিনগদবা থৌরম অমদি অম্বাজীদগী ত্রাইবেল অঙাংশিংগী ম্যুজিকেল বেন্দগী পর্ফোর্মেন্সনি। হায়রিবা বেন্দ অসিগী মেম্বরশিং মতম অমদা অম্বাজী লাইশঙদা চাক্নিবা ওইরম্মী। প্রধান মন্ত্রীনা মমাঙ থাদা মহাক্না অম্বাজীদা চৎলুবা মতমদা হায়রিবা অঙাংশিং অসিনা মহাক্কী মমাঙদা থৌরম পাঙথোকখিবদা পুক্নিং থৌগৎলমখিবনি। অতোপ্পা মীয়ামগী পুক্নিং চিংশিনগদবা থৌরমশিংগী মনুংদা “ঐখোয় অমত্তনি, ঐখোয় পাঙ্গল কল্লি” হায়বা ৱাখল্লোন্দা পাঙথোকপা এন.সি.সি.গী অখন্নবা সো অমসুং জুরা শেম্লবা স্তেতশিংনা পুন্দুনা ঐখোয়গী নাৎকী ফজবশিং উৎকদবা এক ভারত শ্রেস্থ ভারতকী নাৎকী থৌরম য়াওরি।
প্রধান মন্ত্রীনা আরম্ভ ৪.০ লোইশিনবগী থৌরমদা ৯৭শুবা কম্মন ফাউন্দেসন কোর্সকী ওফিসর ত্রেনীশিংগী মফমদা ৱা ঙাঙগনি। আরম্ভগী ৪শুবা ইদিসন অসি পব্লিক সর্ভিস দেলিভরী মপাঙ্গল কনখৎহন্নবা অমসুং লাস্ত মাইল দেলিভরীবু লৌথুপ লৌকোই লৈতবা, মতিং লৈবা অমদি মপুং ফাবা ওইহন্নবগীদমক তেক্নোলোজিগী ওইবা পাম্বৈশিং কমদৌনা শীজিন্নগনি হায়বা ওফিসর ত্রেনীশিংদা তাকপী তম্বিবগী ৱাখল্লোনগা লোয়ননা “দিজিতেল গভর্নেন্স: ফাউন্দেসন অমসুং ফ্রন্তিয়র্স” হায়বা হীরমসিদা পাঙথোকপনি। বেত্চ অসিদা স্তেত অমসুং য়ু.তি. ২৯দগী সর্ভিস ১৩দগী লাকপা ওফিসর ত্রেনী ৪৫৫ শরুক য়ারি।
প্রধান মন্ত্রীনা কেবারিয়াদা মেজ লৈকোল অমসুং মিয়াৱাকী উমং হায়রিবা লম কোয়বশিংগী পুক্নিং চিংশিনগদবা অ্রনৌবা মফম অনিসু মীয়ামদা কত্থোক্কনি। মেজ লৈকোল অসি লম একর ৩ পাক চাউনা শন্দোক্তুনা লৈবাকসিগী খ্বাইদগী চাওবা মেজ লৈকোল ওইরি। মসিদা কিলোমিতর ২.১ শাংবা খোঙ লম্বী য়াওরি। মসি মফমসিদা অফবা ইনর্জী পুরক্কনি হায়না থাজনরিবা ‘সিয়ন্ত্র’গী মওংদা শেম শাবনি। লৈকোল অসিদা পুন্না পাম্বী লাখ ১.৮ থাদুনা মফম অসিগী ফজবগী মতিং হাপ্লি। মিয়াৱাকী উমং অসি লম একর ২দা শেমগৎপনি। মসিদা লমদমদুগী লৈগী লৈকোল, তিম্বর লৈকোল, উহৈগী লৈকোল, হিদাক পাম্বীশিংগী লৈকোল, মিক্স স্পেসিস মিয়াৱাকী সেক্সন, অমসুং দিজিতেল ওরিএন্তেসন সেন্তরশিং য়াওরি। মসি তেল্লবা মতমদা অশোঙবা, নেতিব উমং শেমগৎপদা মতেং পাঙখিবা জাপানিজ বোতনিস্ত অকিরা মিয়াৱাকীনা শেম্লম্বা থৌওং শীজিন্নদুনা শেমগৎপনি।
বনস্কন্থদা পি.এম.
প্রধান মন্ত্রীনা বনস্কন্থদা লৈবা থারদতা চৎকনি। মীয়ামগী ওইবা থৌরম অমদা, লুপা করোর ৮০০০ হেনবগী ৱাতর সপ্লাই প্রোজেক্তশিংগী থবক হৌদোক্কনি। প্রধান মন্ত্রীনা লুপা করোর ১৫৬০ হেন্না চঙগদবা মেন নর্মদা কেনেলদগী কাসারাদগী দান্তিৱারা ফাওবগী পাইপলাই য়াওনা তোঙান তোঙানবা প্রোজেক্তশিংগী উরেপ উয়ুং তমগনি। প্রোজেক্তশিং অসিনা লমদম অদুগী ৱাতর সপ্লাইগী ফীভম ফগৎহনগনি অমদি লৌমীশিংদসু কান্নহনগনি। থৌরম অদুদা সুজলাম সুফলাম কেনেল হেন্না ফগৎহনবা, মোধেরা-মোতী দাউ পাইপলাইনবু মুক্তেস্বর দাম-কর্মবৎ পাৎ ফাওবা শাংদোকপা, সান্তপুরা তালুকাগী খুঙ্গঙ ১১দা পায়খৎকদবা লিফ্ত ইরিগেসন স্কীম অমদি অতৈ কয়া য়াওনা তোঙান তোঙানবা প্রোজেক্তশিং লাউথোক্লমগনি।
অহমদবাদতা পি.এম.
প্রধান মন্ত্রীনা অহমদবাদকী অসর্বাদা লুপা করোর ২৯০০ হেনবগী রেলৱে প্রোজেক্ত অনি লৈবাক মীয়ামদা কত্থোক্কনি। প্রোজেক্তশিং অদুদি অহমদবাদ (অসর্বা) – হিম্মতনগর – উদয়পুর গোজ কন্ভর্তেদ লাইন অমসুং লুনিধর – জেতাল্সর গেজ কন্ভর্তেদ লাইন অসিনি। প্রধান মন্ত্রীনা ভাবনগর অমসুং জেতাল্সর অমদি আসর্বা অমসুং উদয়পুরগী মরক্তা চেনগদবা অনৌবা ত্রেনশিংসু লমথাগনি।
লৈবাক শিনবা থুংনা য়ুনি-গেজ রেল সিস্তেম লৈহন্নবগীদমক, রেলৱেজনা হৌজিক লৈরিবা নন-ব্রোদ গেজ রেলৱে লাইনশিংবু ব্রোদ গেজতা ওন্থোক্লি। প্রধান মন্ত্রীনা মীয়ামদা কত্থোক্কদৌরিবা প্রোজেক্তশিং অসিনা মায়কৈ অসিদা থাংজিনবা অতোপ্পা খোঙথাঙ অমা ওইগদৌরি। অহমদবাদ (অসর্বা) – হিম্মতনগর – উদয়পুর গেজ কন্ভর্তেদ লাইন অসি কিলোমিতর ৩০০লোম শাংই। মসিনা লমদম অসিদা কন্নেক্তিভিতী ফগৎহন্দুনা অমদি লম কোয়বশিং, লল্লোন ইতিক তৌবশিং, মেনুফেকচরিং য়ুনিৎশিং অমসুং ইন্দস্ত্রীশিংদা কান্নবা পীদুনা লমদম অসিদা থবক পীবগী খুদোংচাবা হেনগৎহনগনি অমদি খুন্নাই-শেন্মিৎলোন চাওখৎহনবদা মতেং ওইগনি। কিলোমিতর ৫৮ শাংবা লুনিধর – জেতাল্সর গেজ কন্ভর্তেদ লাইন অসিনা ভেরাবাল অমসুং পোর্বন্দরদগী পিপাভাব হিথাংফম অমসুং ভাবনগর ফাওবগী হেন্না তেনবা লম্বী অমা পীগনি। প্রোজেক্ত অসিনা সেক্সন অসিদা পোৎলম পুথোক পুশিনগী কেপাসিতী হেনগৎহন্দুনা চিল্লবা কনালুস – রাজকোৎ - বিরামগম লম্বীদা চিনবা হন্থহনগনি। হৌজিক্তি মসিনা গির সেংচুএরী, সোম্নাথ লাইশঙ, দিউ অমসুং গিরনার চীংদা অপনবা লৈতবা কন্নেক্তিভিতী ফংহন্দুনা লমদম অসিদা তুরিজম চাওখৎহল্লগনি।
পঞ্চমহলদা পি.এম.
প্রধান মন্ত্রীনা পঞ্চমহলগী জম্বুঘোরাদা লুপা করোর ৮৬০রোমগী প্রোজেক্তশিং মীয়ামদা কত্থোক্কনি অমদি উরেপ উয়ুং তমগনি। মহাক্না শ্রী গোবিন্দ গুরু য়ুনিভর্সিতী, গোধরাগী অনৌবা কেম্পস মীয়ামদা কত্থোক্কনি। মহাক্না ভাদেক খুঙ্গঙদা লৈবা সন্ত জোরিয়া পরমেস্বর প্রাইমারী স্কুল এন্দ মেমোরিএল, অমদি দান্দিয়াপুরা খুঙ্গঙদা লৈবা রাজা রুপ সিংহ নায়ক প্রাইমারী স্কুল এন্দ মেমোরিএলসু মীয়ামদা কত্থোক্কনি।
প্রধান মন্ত্রীনা গোধ্রাগী কেন্দ্রিয় বিদ্যালয়গী শঙ শানবগী উরেপ উয়ুং তমগনি। মহাক্না লুপা করোর ৬৮০ হেনবগী গোধ্রা মেদিকেল কলেজ শেমগৎপগী অমদি কৌসাল্য – দি স্কিল য়ুনিভর্সিতী পাকথোক চাউথোকপগী প্রোজেক্তশিংগী উরেপ উয়ুংসু তমগনি।
বনস্বারাদা পি.এম.
অজাদী কা অমৃৎ মহোৎসবকী শরুক অমা ওইনা, নীংতম লালহৌগী শিংথানবিদ্রবা ত্রাইবেল হীরোশিংগী কত্থোকপবু মীয়ামদা খঙহন্নবা খোঙথাঙ কয়া লৈঙাক্না লৌখৎলে। মসিগী মনুংদা, নবেম্বর ১৫বু (ত্রাইবেল নীংতম লান্মী বির্সা মুন্দাগী মপোক নুমিৎ) ‘জঞ্জাতিয় গৌরব দিৱস’ হায়না লাউথোকপা, খুন্নাইদা ত্রাইবেল মীয়াম্না লৌরিবা থৌদাং শকখঙনবা অমদি নীংতম লালহৌদা মখোয়না কত্থোকখিবশিংগী মরমদা খঙবা হেনগৎহন্নবগীদমক লৈবাক শিনবা থুংনা ত্রাইবেল ম্যুজিয়ম শেমগৎপনচিংবা য়াওরি। মায়কৈ অসিদা লৌখৎপা অতোপ্পা খোঙথাঙ অমদা, প্রধান মন্ত্রীনা নীংতম লালহৌদা শিংথানবিদ্রবা ত্রাইবেল হীরো অমদৌ অথৌবশিংনা কত্থোকখিবগীদমক শ্রদ্ধাঞ্জলি কৎনবগীদমক রাজস্থানগী বনস্বারাদা লৈবা মঙ্গর চীংদা পাঙথোক্কদবা ‘মঙ্গর ধাম কী গৌরব গাথা’ হায়রিবা মীয়ামগী থৌরমদা শরুক য়াগনি। থৌরম অসিদা, প্রধান মন্ত্রীনা ভিল নীংতম লান্মী শ্রী গোবিন্দ গুরুগী মফমদু শ্রদ্ধাঞ্জলি কৎকনি অমদি ভিল আদিবাসী অমদি লমদম অদুগী ত্রাইবেল মীয়ামগী মফমদা ৱা ঙাঙগনি।
মঙ্গর চীং অসি রাজস্থান, গুজরাত অমসুং মধ্য প্রদেশকী ভিল কাঙলুপ অমদি অতোপ্পা ত্রাইবশিংগীদমক্তা য়াম্না মরুওইবা মফম্নি। নীংতম লালহৌ মনুংদাভিল অমসুং অতৈ ত্রাইবশিংনা বৃতিশশিংগা য়াম্না কুইনা মুক্নখিবদা, শ্রী গোবিন্দ গুরুগী লুচিং মখাদা নবেম্বর ১৭, ১৯১৩দা ভিল লাখ ১.৫ হেন্বনা মঙ্গর চীংদা লান চঙখি। তিল্লিবা মীয়ামদা বৃতিশশিংনা নোংমৈ কাপশিল্লক্তুনা মঙ্গর মেসেকরগী থৌদোক খোকখি অমদি ত্রাইবেল ১৫০০ রোম্না থৱায় কৎখি।
