হিজ এক্সিলেন্সী, প্রধান মন্ত্রী আনৱার ইব্রাহিম,
ঐহাক্কী নুংশিরবা মরুপশিং, ইচিল-ইনাওশিং,
সালামত ফতাঙ্গ!
ৱানক্কাম!
সুহমানো?
সৎ শ্রী অকাল!
বাগুনারা?
কেম-চো?
অদোমগী নুংশিজরবা য়াইফ-পাউজেল অসিনা ঐখোয়গী মান্নবা কলচরগী ফজরবা মখল-মখা কয়া অদু উৎলি।
অহানবদা, ঐহাক্কী নুংশিরবা মরুপ, প্রধান মন্ত্রী আনৱার ইব্রাহিমনা কম্ম্যুনিতীগী থৌরম অসিদা শরুক য়াবীবগীদমক ঐহাক্না থাগৎপা ফোংদোকচরি। ঐহাক্না মহাকপু ভারত অমসুং মালেসিয়াগী মরুপ ওইবগী চাং অমসুং তুংলমচৎকী ওইথোকপা য়াবশিং অদুগী মতাংদা মহাক্কী নুংশিরবা ৱাহৈশিংগীদমকসু থাগৎপা ফোংদোকচরি।
মদুখক্তমক নত্তে, প্রধান মন্ত্রীনা ঐহাকপু তরাম্না ওক্নবা এয়রপোর্ততা লাকখি, অমসুং মহাক্না ঐহাকপু মহাক্কী কারদা পুরকখি। মহাক্কী কার খকখক্তা নত্তনা মহাক্কী সিৎসু। মসিগী অখন্নবা থৌওংশিং অসিনা ভারত অমসুং ময়াম পুম্নমক্কীদমক মহাক্কী নুংশিবা অমসুং ইকায় খুম্নবা উৎচরি।
অদোমগী নুংশিজরবা ৱাহৈশিং, হোস্পিতালিতী অমসুং মরুপ-মপাং ওইবগী মরী অসিগীদমক থাগৎপা ফোংদোকচরি।
মরুপশিং,
ঐখোয়না হৌজিক্তি রেকোর্দ থম্বা কলচরেল পর্ফোমেন্স অমা উবা ফংলে। নীংথিনা চাং নাইনা জগোয় শাবী ৮০০ হেনবনা শগোয় শাখ্রে। ঐখোয়গী মীয়াম্না চহি কয়াগী মমাংদা পাংথোকখিবা থৌরম অসিবু নীংশিংদুনা লৈহৌরগনি। ঐহাক্না অদোমবু থাগৎচরি। ঐনা পর্ফোর্মর পুম্নমকপু থাগৎচরি।
মরুপশিং,
প্রধান মন্ত্রী অনৱার ইব্রাহিম অমসুং ঐহাক মহাক্না প্রধান মন্ত্রী ওইদ্রিঙৈগী মমাংদগী মরুপ ওইদুনা লাক্লি। ঐহাক্না রিফোর্মশিংদা মহাক্কী মীৎয়েং, মহাক্কী অচৌবা ৱাখল অমসুং ২০২৫দা আসিয়ানগী চেয়রমেন ওইবগী থৌনা অদু থাগৎচরি।
হৌখিবা চহিদা ঐহাক এ.এস.ই.এ.এন. সম্মিৎকীদমক মালেসিয়াদা চৎপা ঙমখিদে। অদুবু ঐনা ঐগী মরুপ অদুদা অথুবা মতমদা মালেসিয়াদা লাক্কনি হায়না থাজবা পীখি। অমসুং থাজবা পীখিবগুম্না, ঐহাক মফম অসিদা লাক্লি।
মসি ২০২৬তা ঐহাক্কী অহানবা মপান লমদা চৎপা খোঙচৎনি। কুমহৈগী মতম অসিদা অদোমগা লোয়ননা লৈমিন্নবদা ঐহাক নুংঙাইবা ফাওই। ময়াম পুম্নমক্না সঙ্ক্রান্তী, পোঙ্গাল অমসুং তই-পুসম য়াম্না নুংঙাইনা পাংথোক্কনি হায়না ঐনা থাজৈ। অথুবা মতমদা, শিবরাত্রিগী কুমহৈ লাক্কনি। নুমিৎ খরনিগী মতুংদা রমজান হৌরগনি অমসুং হরি রায়া অসি য়াম্না চাউনা পাংথোক্কনি। ঐহাক্না মীপুম খুদিংমক্তা নুংঙাইবা অমসুং হকচাং ফনা লৈনবা য়াইফ-পাউজেল পীজরি।
মরুপশিং,
মালেসিয়াদা মালেমদা ইন্দিয়ন-ওরিজিনগী অনিশুবা খ্বাইদগী চাউবা কম্ম্যুনিতী লৈ। ভারত অমসুং মালেসিয়াগী নুংশিবা কয়া অমগা অমগা শম্নহল্লি। মতম খরগী মমাংদা প্রধান মন্ত্রী আনৱার ইব্রাহিম অমসুং ঐহাক্না উখিবা একজিবিসন অসিনা মরীশিং অসি য়াম্না ফজনা উৎলি। নহাক অসি ঐখোয়বু শম্নহল্লিবা অহিংবা থোং অমনি।
অদোম্না রোতি চানাইবু মালাবর পরোত্তাগা শম্নহল্লে।
য়ুবী, স্পাইসিস অমসুং তশেংনমক তেহ তারিক...
কোয়ালালামপুর নৎত্রগা কোচিদা ওইরবসু মহৌ অসি য়াম্না মান্নৈ। ঐখোয় অমগা অমগা য়াম্না নীংথিনা খঙনৈ। মসি ঐখোয়গী লোলশিং অমসুং মালয়গী মরক্তা লৈরিবা মান্নবা ৱাহৈ মশিং য়াম্বনা ওইহনগদবনি।
ভারতকী ফিল্মশিং অমসুং ম্যুজিক অসি মালয়েসিয়াদা পাম্নৈ হায়না ঐহাক্না খঙই। প্রধান মন্ত্রী আনৱার ইব্রাহিমনা য়াম্না ফজনা ঈশৈ শকই হায়বসি অদোম্না খংই। অদুবু ময়ুমদা লৈরিবা ভারত মচা কয়ানা মসি খঙদে। মহাক্কী অরোইবা খোঙচৎতা, মখোয়দা নুংঙাইবা থৌদোক অমা থোকখি। মহাক্না ভারতকী অরিবা হিন্দী ঈশৈ অমা শক্লিবা ভিদিওশিং ভাইরেল ওইখি! মহাক্না শক্নাইরবা এম জি আরগী তামিলগী ঈশৈশিংসু পামজবা অসি য়াম্না নুংঙাইবা অমনি।
মরুপশিং,
ভারতনা অদোমগী থম্মোয়দা অখন্নবা মফম অমা লৈ হায়বা ঐ খঙই। ঐহাক্না ২০০১দা থোকখিবা থৌদোক অমা নীংশিংলি। ঐহাক্কী য়ুম ওইরিবা গুজরাততা য়ুহার হাখিবা মতমদা, নখোয় ময়ামগী মরক্তগী মীওই কয়া অমনা মতেং পাংনবা পুন্না লাকখি। ঐহাক্না ময়াম পুম্নমকপু থাগৎচরি।
অমসুং মদুগী মমাংদসু, ভারতপু নীংতম্লবা লৈবাক অমা ওইহন্নবা, অদোমগী ইমা-ইপাগা লিশিং কয়া অমনা অচৌবা কত্থোকপা কয়া তৌখি। মখোয়গী মরক্তগী অয়াম্বনা ইন্দিয়া উখিদ্রি। অদুবু মখোয় অসি নেতাজী সুভাস চন্দ্র বোসকী ইন্দিয়ন নেস্নেল আর্মীদা ইহান হানবা ওইনা য়াওখি।
মহাক্কী ইকায় খুম্নবা ওইনা ঐখোয়না মালেসিয়াদা ইন্দিয়ন কলচরেল সেন্তরবু নেতাজী সুভাস চন্দ্র বোসকী মিংদা মমিং ওন্থোকখি। ঐহাক্না মালেসিয়াদা লৈবা নেতাজী সর্বিস সেন্তর অমসুং নেতাজী ৱেলফেয়র ফাউন্দেসনগী হোৎনরিবশিংবুসু ইকায় খুম্নবা উৎচরি।
মরুপশিং,
চহি চা কয়াদগী চৎনবীশিং অসি অদোম্না ঙাক্তুনা থম্বা অসি য়াম্না শিংথানীংঙাইনি। হন্দক্তা ঐহাক্না ঐহাক্কী থাগী রেদিওগী থৌরম মন কী বাততা অদোমগী মরমদা ঙাংখি। ভারত মচা বিল্লিয়ন ১.৪দা ঐনা শন্দোক্না তাকখি মদুদি মতৌ করম্না মালেসিয়াগী স্কুল ৫০০ হেনবনা অঙাংশিংদা ভারতকী লোলশিংদা তমহল্লি।
তিরুবল্লুবর অমসুং স্বামী বিবেকানন্দগুম্বা অচৌবা সেন্তশিংগী ইথিল অসি মফম অসিদা ফাওবা ঙম্মি। মমাং চয়োলদা বতু গুরুংদা পাংথোকখিবা তই-পুসম অসি পলনিদা পাংথোকখিবা অসি পল্লনিদা পাংথোকপা অদুগুম্না মগুন লৈখি। শ্রী ভেঙ্কতেশ্বর মন্দির, বাগান দাতোহেদসু কলচরেল সেলেব্রেসনশিং অসি চপ মান্ননা চাউনা পাংথোক্লি।
গারবা অসি মফম অসিদা য়াম্না পাম্নৈ হায়না ঐনা খঙলে। মফম অসিদা লৈরিবা ঐখোয়গী শিখ ইচিল-ইনাওশিংগা লৈনরিবা কলচরেল কনেক্সনশিং অসি ঐখোয়না য়াম্না থাগৎলি। শ্রী গুরু নানক দেবজীগী পাউতাকশিং অসি ঙসি ফাওবা নাম জপো, কিরত করো, ৱন্দ ছকো অসিবু শৌগৎতুনা চৎথরি।
মরুপশিং,
মফম অসিদা ভারতকী মফম পুম্নমক্তগী লাকপা মীওইশিং লৈরি। কলচরেল য়ুনিতীগী লংলাশিংনা ঐখোয়বু মপাঙ্গল কন্না শম্নহল্লি। ঐখোয়গী পাঙ্গল অসি ঐখোয়না য়ুনিতী ইন দাইভর্সিতীদা লৈরি।
মরুপশিং,
তামিল অসি মালেমদা ভারতনা পীবা খুদোলনি। তামিল লিতরেচর অসি মতম চুপ্পগীনি অমসুং তামিল কলচর অসি মালেম পুম্বগীনি। অসিগুম্বা মওংদা, তামিল মীয়াম্নসু মখোয়গী হৈশিংবগা লোইননা মীওইবা খুন্নাইগী সেবা তৌরি। অমসুং ঐহাক্না চাউথোকচবা ফাওই, ভারতকী উপ-রাস্ত্রপতি, থিরু সি.পি. রাধাকৃষ্ণন জী, ঙসি ঐখোয়গী মরক্তা লৈরিবা ঐখোয়গী ফোরেন মিনিস্তর জয়শঙ্করজী, ঐখোয়গী বজেৎ অসি মাপললক পুথোকখিবা শেল-থুম মন্ত্রী, নির্মলা সীতারমনজী। ঐখোয়গী ইনফোর্মেসন অমসুং ব্রোদকাস্তিংগী রাজ্য মন্ত্রী, দা. মুরুগান, মখোয় পুম্নমক তামিল নাদুদগীনি।
মান্নবা মওংদা, মালেসিয়াদা লৈরিবা তামিলগী মীহুৎশিংনা তোঙান তোঙানবা লমশিংদা খুন্নাইগী সেবা তৌরি। তশেংনমক, তামিল দাইসগপোরা অসি চহি চা কয়াদগী মফম অসিদা লৈরক্লি। পুৱারী অসিনা পুক্নিং থৌগৎলদুনা, ঐখোয়না মালায়া য়ুনিভর্সিতীদা তিরুবল্লুবর চেয়র লিংখৎপা অসিদা চাউথোকচবা ফাওই। হৌজিক ঐখোয়না তিরুবল্লুবর সেন্তর অমা লিংখৎলগনি। মসিনা ঐখোয়গী মান্নবা হেরিতেজ অসিবু হেন্না মপাঙ্গল কনখৎহল্লগনি।
মরুপশিং,
মালেসিয়াগা লোইননা ঐখোয়গী মরী অসি চহি খুদিংগী অনৌবা থাক্তা য়ৌরক্লি। ২০২৪দা, প্রধান মন্ত্রী আনৱার ইব্রাহিমনা ন্যু দিল্লীদা চৎখিবা মতমদা, ঐখোয়না ঐখোয়গী মরী অসি কমপ্রিহেন্সিব স্ত্রেতেজিক পার্তনরশিপ অমদা পুখৎখি।
ঙসিদি, ঐখোয়না খোংজেল য়াংনা চৎমিন্নরি। ঐখোয়না অমগা অমগগী মাইপাকপশিং অসি ঐখোয়গী মাইপাকপশিংগুম্না পাংথোকই। চন্দ্রয়ান-৩গী পুৱারী ওইরবা মাইপাকপগীদমক প্রধান মন্ত্রী আনৱার ইব্রাহিমনা য়াইফ-পাউজেল পীরকপদা ঐহাক য়াম্না নুংঙাইবা ফাওখি। ঐহাক্না অদোম্না ফোংদোক্লিবা অদু য়ারে, ঐহাক্কী নুংশিরবা মরুপ। ভারতকী মাইপাকপা অসি মালেসিয়াগী মাইপাকপনি, মসি এসিয়াগী মাইপাকপনি।
মরম অসিনা, ঐহাক্না ঐখোয়গী মরী অসিগী লমজিং লমতাক্লিবা ৱাহৈ অসি ইম্পেক্তনি হায়না হায়জরি। ইম্পেক্তকী ৱাহন্থোক্তি অপুনবা ত্রান্সফোর্মেসনগীদমক ইন্দিয়া-মলেসিয়া পার্তনরশিপ হায়বনি।
ঐখোয়গী মরীগী খোঙজেলদা ইম্পেক্ত
ঐখোয়গী পান্দমশিংগী পাক চাউবগী ইম্পেক্ত
ঐখোয়গী মীয়ামগী কান্ননবগীদমক ইম্পেক্ত
পুন্না, ঐখোয়না মীওইবা খুন্নাই পুম্বদা কান্নবা পীবা ঙমগনি!
মরুপশিং,
ভারতকী কম্পনীশিংনা মতম পুম্নমক্তা মালেসিয়াগা থবক তৌমিন্নবা পাম্মি। ঐখোয়না মালেসিয়াগী অহানবা অমসুং এসিয়াগী খ্বাইদগী চাউবা ইনসুলিন মেনুফেকচরিং ফেসিলিতী শেমগৎপদা শরুক য়াবা অসি য়াম্না নুংঙাইবা অমনি।
ভারতকী আই.তি. কম্পনী ১০০ হেনবনা মালেসিয়াদা থবক তৌরি অমসুং থবক লিশিং কয়া ফংহল্লি। মালেসিয়া-ইন্দিয়া দিজিতেল কাউন্সিলনা ঐখোয়গী দিজিতেল কোলাবোরেসনগীদমক অনৌবা লম্বী অমা শেমগৎলি। ভারতকী য়ু.পি.আই.না অথুবা মতমদা মালেসিয়াদা লাক্লগনি হায়না ঐহাক্না নখোয়দা হায়জবদা নুংঙাইবা ফাওই।
মরুপশিং,
ঐখোয়না ভারত মহাসাগরগী মান্নবা হিগোক মচুগী ঈশিং শেয়র তৌমিন্নরি। সমুদ্রগী মপান্দা, ঐখোয়না অমগা অমগা চৎনবা পাম্মি। ঐহাক্না ময়াম পুম্নমকপু ভারতকী তোঙান তোঙানবা মফমশিংদা চৎনবা হায়জরি।
হৌখিবা চহি খরা অসিদা, ভারতনা ইনফ্রাস্ত্রকচর অমসুং কনেক্তিবিতীদা মমাংদা অমুক্তা ওইখিদ্রিবা মওংদা চাউখৎপা উবা ফংলে। ঐখোয়গী এয়রপোর্তশিংগী মশিং অসি দিকেদ অমদা শরুক অনি হেনগৎখ্রে। হায়ৱেশিং অসি রেকোর্দকী খোঙজেল য়াংনা শাগৎলি। বন্দে ভারতকুম্বা মোদর্ন ত্রেনশিং অসি মালেমগী থাক্তা শকখঙনরি। ঐনা ময়াম পুম্নমকপু ইনক্রেদিবল ইন্দিয়াদা লাক্নবা অমসুং এক্সপরিয়েন্স তৌনবা পুক্নিং থৌগৎলি।
নহাক্না নহাক্কী মালয়গী মরুপশিংসু পুরকপা তাই। অদোম ইথন্তা লাক্লোইদবনি। মরমদি মী অমগা অমগা শম্নবা হায়বসি ঐখোয়গী মরুপ-মপাং ওইবগী য়ুম্ফম্নি।
মরুপশিং,
ঐখোয়না ২০১৫দা উনখিবা মতমদা, ঐহাক্না অদোমদা ভারতকী ওইথোকপা য়াবশিংগী মরমদা হায়খি। হৌজিক, ঐহাক্না অদোমদা ভারতকী পর্ফোমেন্সকী মতাংদা হায়জরি। চহি তরাগী মনুংদা, ভারতনা অচৌবা অহোংবা অমা উবা ফংলে।
মতম অদুদা ঐখোয়না মালেমগী খ্বাইদগী চাউবা ১১শুবা ইকোনোমী ওইরম্মি। হৌজিক, ঐখোয়না অহানবা অহুমগী মফমদা নকশিল্লি। ঐখোয়না মালেমগী খ্বাইদগী য়াংনা চাউখৎলক্লিবা মরুওইবা ইকোনোমীসু ওইরি।
মদুগী মতুংদা, মেক ইন ইন্দিয়া অসি মতম অদুদা চারা মচা অমা ওইনা লৈরম্মি। হৌজিক্তি, ভারত অসি মালেমগী অনিশুবা খ্বাইদগী চাউবা মোবাইল মেন্যুফেকচররনি। ঐখোয়গী দিফেন্স এক্সপোর্ত অসি ২০১৪দগী হৌরগা শরুক ৩০ হেনগৎলে। ভারত অসি মালেমগী খ্বাইদগী চাউবা স্তার্ত-অপ হাবসু ওইরক্লি।
ঐখোয়না মালেমগী খ্বাইদগী চাউবা দিজিতেল পব্লিক ইনফ্রাস্ত্রকচর অমসুং মালেমগী খ্বাইদগী চাউবা ফিনতেক ইকোসিস্তেম শেমগৎলে। ঐখোয়গী য়ু.পি.আই. প্লেৎফোর্মগী মতেংনা মালেমগী রিএল-তাইম দিজিতেল ত্রাঞ্জেক্সনগী শরুক অমা ভারত্তা পাংথোক্লি।
খোঙজেল য়াংনা চাউখৎলকপা মতমদা, ঐখোয়না ঐখোয়গী চাউখৎপা অসি ক্লিন অমসুং গ্রীন ওইহন্নবা হোৎনখি। খুদম ওইনা, চহী তরাগী মনুংদা, ঐখোয়গী সোলার ইনর্জী অসি শরুক ৪০ হেনগৎলে।
মরুপশিং,
মমাংদা, ভারত অসি অচৌবা কৈথেল অমনি হায়না লৌনরম্মি। হৌজিক্তি, ঐখোয়না ইনবেস্তমেন্ত অমসুং ললোন-ইতিক্কী মফম অমা ওইরে। ভারত অসি চাউখৎপগী থাজবা য়াবা পার্তনর অমা ওইনা উরি। য়ুনাইতেদ কিংদম, য়ু.এ.ই., ওস্ত্রেলিয়া, ন্যু জিলেন্দ, ওমান, ই.য়ু. নৎত্রগা য়ু.এস.এ. ওইরো, লৈবাকশিংনা ভারতকা লোইননা ললোন-ইতিক্কী য়ানচে তৌরি। থাজবা অসি ভারতকী খ্বাইদগী মপাঙ্গল লৈবা শেনয়েক ওইরে।
মরুপশিং,
ভারতনা অদোমবু মতম পুম্নমক্তা নুংশিনবা উৎলগনি। মরম অসিনা ঐখোয়না থা খরগী মমাংদা পুৱারী ওইরবা ৱারেপ অমা লৌখি। ঐখোয়না ও.সি.আই. কার্দকী ইলিজিবিলিতী অসি ভারত মচা ওইরবা মালেসিয়াগী নাগরিকশিংদা তরুকশুবা জেনরেসন ফাওবা শাংদোক্লে।
ঐখোয়না ইন্দিয়ন স্কোলারশিপ ত্রস্ত ফন্দদা মতেং পাংলি। হৌজিক ঐখোয়না ভারত্তা মহৈরোইশিংনা মহৈ তম্নবগীদমক তিরুবল্লুবর স্কোলারশিপসু পীরগনি। অমসুং ঐখোয়না নহাকপু নো ইন্দিয়া প্রোগ্রামদা উনবা ঙাইরি।
ঐখোয়না অথুবা মতমদা মালেসিয়াদা ভারতকী অনৌবা কন্সুলেৎ অমা হাংদোক্লগনি হায়বা খঙবদা অদোম নুংঙাইবা ফাওগনি। মসিনা ঐখোয়বু হেন্না নকশিন্নহনগনি।
মরুপশিং, ভারত মচা বিল্লিয়ন ১.৪না ২০৪৭ ফাওবদা চাউখৎলবা ভারত অমা শেম্বা পাম্মি।
ঐখোয়না চাউখৎলবা ভারত অমা শেমগৎপা পাম্মি, নৎত্রা? ঐখোয়না চাউখৎলবা ভারত অমা শেমগৎকদ্রা নৎত্রগা শেম্লরোইদ্রা? ঐখোয়না ঐখোয়গী মঙলানশিং অসি মপুং ফাহনগদ্রা নৎত্রগা ফংহল্লোইদ্রা? ঐখোয়না ঐখোয়গী মঙলানশিং অসি ৱারেপশিং ওইনা ওন্থোক্কদ্রা নৎত্রগা ওন্থোক্লরোইদ্রা? ঐখোয়না ঐখোয়গী ৱারেপশিং অদু মপুং ফাহনগদ্রা নৎত্রগা ফাহল্লোইদ্রা?
খোঙচৎ অসিদা ঐখোয়গী প্রভাসি ভারতীয়াস, ইন্দিয়ন দাইস্পোরা অসি মরুওইবা পার্তনর অমা ওইরি। অদোম্না কোলা লমপুরদা পোক্লবসু নৎত্রগা কোলকাতাদা পোক্লবসু, ভারত অসি অদোমগী থম্মোয়দা লৈরি। অদোম্না মালেসিয়া অমসুং ভারতকী খুমাং চাউশিল্লকপদা থৌদাং লৌরি। অদোম্না চাউখৎপা মালেসিয়া অমসুং বিক্সিত ভারতকী মঙলানবু মঙফাওনহনবদা মতেং পাংগনি।
জয় হিন্দ!
জাম্পা লাগী!
মিকা নন্দ্রি!
