ঐগী নুংশিরবা ইরৈচাশিং, খুরুমজরি।
হন্দক্কী নোংজু থা অসিদা, মহৌশাগী খুদোংথিবশিংনা লৈবাক অসি চাংয়েং তৌরি। হৌখিবা চয়োলশিংদা, ঈশিং ইচাওশিং অমসুং লৈবাক নিংখায়বনা শাথিনা অমাং-অতাশিং থোকহনবা ঐখোয়না উরে। মফম কয়াদা য়ুমশিং মাঙহল্লে; মফম কয়াদা লৌবুকশিং থুম্লে; ইমুং কয়া পাকতক্ননা মাঙহল্লে, ঈশিংগী অকনবা ইচেলনা থোঙশিং চেন্থখ্রে, লম্বীশিং তাউথোকখ্রে; মীওই কয়াগী পুন্সি খুদোংথিবা ময়োক্নরে। থৌদোকশিং অসিনা ভারতমচাশিং খুদিংমক ৱাহল্লে। মখোয়গী নুংশিরবা মীওইশিং লৈখিদ্রবা ইমুংশিংগী অৱাবদা ঐখোয়না শরুক য়াজরি। খুদোংথিবা লাকপা মতমদা, ঐখোয়গী এন.দি.আর.এফ-এস.দি.আর.এফকী মীওইশিং, অতোপ্পা সেকুরিতি ফোর্সশিং, মীওই খুদিংমক মীয়ামগী পুন্সি কন্নবা অহিং-নুংথিল হোৎনরি। লান্মীশিংসু তেক্নোলোজিগী মতেং লৌরে। থর্মেল কেমারশিং, লাইফ দিতেক্তরশিং, হুইশিং অমসুং দ্রোনশিংগীগুম্বা অনৌবা পোৎলমশিংগী মতেংগা লোয়ননা, মতেং পাংবগী থবক য়াংখৎনবা থবক কয়া পায়খৎলে। মতম অসিগী মনুংদা, তেংবাং পোৎলমশিং হেলিকোপ্তরনা ফংহল্লে, অহোংবশিং এয়রলিফ তৌরে। অৱাবা মনুংদা, মীয়ামগী মতেং পাংনবা লান্মী থোক্লক্লে। অৱাবা তানফম অসিদা লৈকায়গী মীওইশিং, মীয়ামগী থবক তৌবা মীওইশিং, দোক্তরশিং, লৈঙাকপশিংনা পায়খৎপা য়াবা থবক খুদিংমক পায়খৎলে। চাংয়েংগী মতম অসিদা থবক খুদিংমক্তগী মীওইবগী মতেং পাংবনা হেন্না ফৈ হায়না থবক তৌরিবা মীওই খুদিংমক ঐনা থম্মোয় শেংনা তৌবীমল খঙবা উৎচরি।
ঐগী নুংশিরবা ইরৈচাশিং,
ইচাউ অমসুং নোংগী অমাং-অতা মরক অসিদা, জম্মু অমসুং কাস্মিরগী য়াম্না অখন্নবা মাইপাকপা অনি লৈরে। মীওই অয়াম্বনা মখোয় খঙদে, অদুবু হায়রিবা মাইপাকপশিং অদু অদোম্না খঙলকপা মতমদা, অদোম য়াম্না হরাওগনি। জম্মু অমসুং কাস্মিরগী পুলৱামাদা ষ্টদিয়ম অমদা মীওই খ্বাইদগী য়াম্না তিনখি। মফম অদুদা পুলৱামাগী অহানবা নুংথিল-নুমিদাংগী ক্রিকেত মেতচ শান্নখ্রে।
মসি অহানবদা ওইথোক্লমদে, অদুবু হৌজিক ঐখোয়গী লৈবাক্ত অহোংবা লাক্লে। মসি জম্মু অমসুং কাস্মিরগী তোঙান তোঙানবা তিমশিংগী ‘রোয়াল প্রেমিয়র লিগ’ গী শরুক অমগী মেতচনি। নহারোল লিশিং কয়া পুলৱামদা নুমিদাংদা নুংঙাইনা ক্রিকেত য়েংখি… মসি তশেংনা য়েংবা য়াবা অমনি। পুক্নিং চিংশিনবা অনিশুবা থৌদোক অদুনা লৈবাক অসিগী অহানবা খেলো ইন্দিয়া ৱাতর স্পোর্তস ফেস্তিবেলনি অমসুং মসিসু শ্রীনগরগী দাল পাৎতা পাংথোকখি। তশেংনা, অসিগুম্বা কুহ্মৈ অমা পাংথোকপা হায়বসি কয়াতা অখন্নবা মফম অমা ওইরবনো। মসিগী পান্দমদি জম্মু অমসুং কাস্মিরদা ঈশিংগী মশান্নশিং পাম্নহনবনি। ভারত শীনবা থুংবগী শান্নরোয় ৮০০ হেন্না মসিদা শরুক য়াখি। নুপা শান্নরোয়শিংগুম নুপী শান্নরোয়শিং শরুক য়াখি। মসিদা শরুক য়াখিবা শান্নরোয় খুদিংমক ঐনা থাগৎচরি। মেদল খ্বাইদগী য়াম্না ফংখিবা মধ্য প্রদেস, মতুং তারকপদা হরিয়ানা অমসুং উরিসা অখন্নবা ওইনা থাগৎপা ফোঙদোকচরি। জম্মু অমসুং কাস্মিরগী সরকার অমসুং মফম অদুগী মীয়াম্না তরাম্না ওকখিবা অদুগীদমক ঐনা থাগৎচরি।
মরুশিং, থৌরম অদুদা শরুক য়াখিবা শান্নরোয় অনি ঐনা ৱারি শানগে হায়না খল্লে… মখোয়গী মনুংদা উরিসাদগী রশ্মিতা সাহু অমসুং শ্রীনগরদগী মোহসিন আলীনি। মখোয়না করি হায়রি হায়বা ঐখোয় তারসি।
প্রধান মন্ত্রী: রশ্মিতা জি, খুরুমজরি!
রশ্মিতা: খুরুমজরি সার!
প্রধান মন্ত্রী: জয় জগন্নাথ ।
রশ্মিতা: জয় জগন্নাথ সার।
প্রধান মন্ত্রী: রশ্মিতা জি, শান্নবগী লমদা অদোমগী মাইপাকপশিংগীদমক অহানবদা ঐনা অদোম থাগৎচরি।
রশ্মিতা: অদোম থাগৎচরি সার।
প্রধান মন্ত্রী: রশ্মিতা, অদোম অমসুং অদোমগী শান্নবগী খোঙচৎকী মতাংদা ঐখোয়গী থৌরম তারিবশিংনা য়াম্না খঙনিংই… ঐসু য়াম্না তানিংই… ঐঙোন্দা খঙহল্লু!
রশ্মিতা: সার, ঐ উরিসাদগী রশ্মিতা সাহুনি। ঐ কেনোয়িং শান্নরোয় অমনি। ঐ ২০০৭ দা শান্নবা য়াওবা হৌখি। ঐ কেনোয়িং শান্নবা হৌরকখি অমসুং ঐনা নেসনেল লেভেল, নেসনেল চেম্পিয়নশিপ অমসুং নেসনেল গেম শরুক য়ারে। ঐনা মেদল ৪১ ফংখ্রে। সনাগী মেদল ১৩, সিলভরগী ১৪ অমসুং ব্রোঞ্জগী ১৪, সার।
প্রধান মন্ত্রী: কমদৌনা অদোম শান্নবা পাম্লকখিবনো! মসিদা চঙনবা কনানা অহানবা ইথিল পীখিবগে! মসি অদোমগী ইমুংগী ফিবমগা চুনবা মশান্না অমা ওইবরা?
রশ্মিতা: ওইদে সার। ঐগী খুঙ্গং অদু শানদে। তুরেলদা হি হোল্লি, মরম অদুনা ঐ ইরোইবা চৎলি। ঐ অমসুং ঐগী মরুপশিং ইরোই অমসুং তুরেল অদুদা কোনোয়িং-কিয়াকিংগী হি অমা লৈখি, মদু করিনো হায়বা ঐ খঙদে। “মসি করিনো” হায়না ঐনা ঐগী মরুপশিংদা হংখি। জগতপুরদা সাই সেন্তর অমা লৈ হ, মফম অদুদা শান্নৈ হায়না ঐগী মরুপশিংনা হায়খি, ঐ মফম অদুদা চৎখি। ঐ মফম অদু য়াম্না পামখি। কমদৌনা অঙাংশিংনা মসি ঈশিংদা হোনবগে হায়বা ঐ খঙদে। হি হোনবগীরা? ঐ মফম অদুদা চৎনিংই হায়না ঐনা হায়খি। কমদৌনা ঐ চৎকনি? ঐঙোন্দশু তাকপীয়ু? ঐনা য়ুমদা চৎখি অমসু পাপাদা হায়খি, পাপা ঐ মফম অদুদা চৎনিংই। মতম অদুদা পাপানা হায়খি, ফরে; মহাক ঐ মফম অদুদা পুবীখি। মতম অদুদা ত্রাইয়েল তৌরমদে। ফেব্রুৱারিদা ত্রাইয়েল পাংথোক্কনি হায়না কোচশিংনা হায়খি, মরম অদুনা নহাক ফেব্রুৱারি নত্ত্রগা মার্চতা লাক্কদবনি হায়না কোচনা হায়রকখি। ঐনা মতম অদুদা ত্রাইয়েলগীদমক চৎকি।
প্রধান মন্ত্রী: ফরে রশ্মিতা, কাস্মিরদা পাংথোকখিবা খেলো ইন্দিয়া ৱাতর স্পোর্তস ফেস্তিবেলদা অদোম করি থেংনরকপগে? অহানবা ওইনা অদোম কাস্মিরদা চৎপরা?
রশ্মিতা: হোই সার, ঐ অহানবা ওইনা কাস্মিরদা চৎপনি। মফম অদুদা অহানবা খেলো ইন্দিয়া ৱাতর স্পোর্তস ফেস্তিবেল পাংথোকখি। মদুদা ঐনা ইভেন্ত অনি শরুক য়াখি। শিঙ্গলস মিতর ২০০ অমসুং দবলস মিতর ৫০০। সার, ঐ অনিমক্ত সনাগী মেদলশিং ফংখি।
প্রধান মন্ত্রী: ওহ! অদোম অনিমক ফংবা!
রশ্মিতা: হোই সার।
প্রধান মন্ত্রী: থাগৎচরি।
রশ্মিতা: অদোম থাগৎচরি সার।
প্রধান মন্ত্রী: ফরে রশ্মিতা, ঈশিংগী মশান্নশিংগী মথক্ত, অদোমগী করি হোব্বিশিং লৈবগে?
রশ্মিতা: সার, ৱাতর স্পোর্তশিংগী মথক্ত, ঐ লমজেল খ্বাইদগী পাম্মী। ঐনা ছুতি চৎপা মফম খুদিংদা, ঐ লমজেল চেল্লি। ঐগী অরিবা লম্পাক্ত ঐনা ফুতবোল শান্নবা তমখি, ঐসু ফুতবোল শান্নখি।
প্রধান মন্ত্রী: অদুদি অদোমগী শিংলিশিংদা শান্নবগী ঈ চেল্লে!
রশ্মিতা: হোই সার, ঐনা স্কুলদা ক্লাস ১ দগী ক্লাস ১০ ফাওবা তম্বদা, ঐনা শরুক য়াবা থৌরম খুদিংমক্ত ঐনা মকোক তাখি, ঐনা চেম্পিয়ন ওইখি সার।
প্রধান মন্ত্রী: রশ্মিতা, শান্নবদা অদোমগুম্না মকোক থোংবা পাম্বা মীওইশিংদা অদোম্না করি পাউজেল পীনিংবগে?
রশ্মিতা: সার, অঙাং কয়া মখোয়গী য়ুমশিংদগী ফাওবা মপান থোকপা য়াদে, অমসুং নুপীমচা অমা ওইনা, “কমদৌনা অদোম মপান থোক্কনি” … অমসুং মীওই খরনা পরিক্ষানা মরম ওইদুনা শান্নবা তোকখি… অমসুং খেলো ইন্দিয়া স্কিম অসি, অঙাং কয়া শেনগী মতেং ফংলে অমসুং অঙাং কয়া মাঙলোমদা চৎখৎপা ঙম্লে। শান্নবা লেপ্তনবা ঐনা মীওই খুদিংমক্ত হায়নিংই অমসুং অদোম শান্নবগা লোয়ননা চৎমিন্নবা য়াগনি। শান্নবদি শান্নবনি অদুবু মসিনা হকচাংগী শরুক খুদিংমক ফহল্লি অমসুং শান্নবা চাউখৎহনবা অমসুং ভারতকীদমক মেদলশিং ফংবা হায়বসি ঐখোয়গী থৌদাংনি, সার।
প্রধান মন্ত্রী: ফরে, রশ্মিতা জি, ঐ হরাওরে। অমুক হন্না, অদোম কয়ারক থাগৎচরি অমসুং খুদোংথিবা কয়াগী মরক্ত মচানুপী অমা মাঙলোমদা চৎখৎনবা মহাক্কী অসুক্কী মতিক পুক্নিং থৌগৎপগীদমক ঐনা অদোমগী পাপা থাগৎচরি। অদোমগী মফমদা ঐগী য়াইফ পাউজে পীজরি। অদোম থাগৎচরি।
রশ্মিতা: অদোম থাগৎরি সার।
প্রধান মন্ত্রী: জয় জগন্নাথ।
রশ্মিতা: জয় জগন্নাথ সার।
প্রধান মন্ত্রী: - মোহসিন আলী খুরুমজরি!
মোহসিন আলী: - খুরুমজরি সার।
প্রধান মন্ত্রী: - মোহসিন জি, অদোম কয়ারক থাগৎচরি অমসুং অদোমগী তুংগী য়াইফনবা য়াইফ পাউজেল পীজরি।
মোহসিন আলী: - অদোম থাগৎচরি সার।
প্রধান মন্ত্রী: - মোহসিন, অহানবা খেলো ইন্দিয়া ৱাতর স্পোর্তস, মসিগী কুহ্মৈশিং… অমসুং মদুগী অহানবা সনাগী মেদল! অদোম ফংলে। অদোম করি ফাওবগে?
মোহসিন আলী - সার, ঐ য়াম্না হরাওই। কাস্মিরদা অহানবা ওইনা পাংথোকপা খেলো ইন্দিয়াদা ঐনা সনাগী মেদল ফংলে।
প্রধান মন্ত্রী: - মীয়াম্না করি ঙাংনবগে?
মোহসিন আলী –সার, মীয়াম্না য়াম্না ৱারি শান্নৈ। ইমুং হুপ্না হরাওরে।
প্রধান মন্ত্রী: - অদোমগী স্কুলগী ইমান্নবশিংদি?
মোহসিন আলী –স্কুলগী মীওইশিং খুদিংমকসু হরাওরে…কাস্মিরদা মীওই খুদিংমক্না ঐ গোল্দ মেদালিষ্ট অমনি হায়রে।
প্রধান মন্ত্রী: - অদুদি হৌজিক অদোম অচৌবা শক্নাইরবা মীওই অমা ওইরে।
মোহসিন আলী – হোই সার।
প্রধান মন্ত্রী: - ফরে, কমদৌনা অদোম ঈশিংগী মশান্নশিং পাম্লকপগে অমসুং মসিদগী অদোম করি কান্নবশিং ফংলবগে?
মোহসিন আলী –ঐনা অঙাং ওইরিঙৈদা, ঐনা দাল পাৎতা হি অমা হোনবা উখি; ঐ হি হোনবা ঙমগদরা হায়না ঐগী ইপানা হংখি, হোই, ঐ মসি য়াম্না পামখি, অদুদগী ঐনা মেদাম উন্নবা সেন্তরদা চৎখি অমসুং মেদাম্না ঐ তম্বীখি… বিলকুইস মেম।
প্রধান মন্ত্রী: - ফরে, মোহসিন, লৈবাক শীনবা থুংবগী মীওইশিং লাকখি, অহানবা ওইনা ৱাতর স্পোর্তস প্রোগ্রাম অমা পাংথোক্লে, অমসুং শ্রীনগরগী দাল পাৎতা, মরম অদুআন লৈবাক শীনবা থুংবগী মীওই লাকখি। মীয়াম করি ফাওখিবগে?
মোহসিন আলী –সার, ঐ য়াম্না হরাওই, অফবা মফম অমনি, মফম অসিদা খুদিংমক ফৈ, খুদোংচাবশিং য়াম্না ফৈ হায়না মীওই খুদিংমক্না হায়খি। খেলো ইন্দিয়াদা মফম অদুদা খুদিংমক অফবা ওইখি।
প্রধান মন্ত্রী: –অদোম শান্নবগীদমক কাস্মিরগী ৱাংমদা চৎপা য়াওখ্রবরা?
মোহসিন আলী –চৎলে সার, ঐ ভোপাল, গৱা, কেরলা অমসুং হিমাচলদা চৎখ্রে।
প্রধান মন্ত্রী: –অদুদি অদোম ভারত শীনবা থুংনা উরে।
মোহসিন আলী – হোই সার।
প্রধান মন্ত্রী: –মফম অদুদা শান্নরোয় কয়া লাকখি।
মোহসিন আলী – হোই সার।
প্রধান মন্ত্রী: –অদোম অনৌবা মরুপশিং শেম্বরা নত্ত্রগা শেমদবরা?
মোহসিন আলী –সার, ঐ মরুপ য়াম্না শেমখি, ঐখোয় দাল পাৎ, লাল চোকদা কোইবা চৎখি, ঐখোয় মফম শীনবা থুংনা চৎখি, ঐখোয় পাহালগামদসু চৎখি; সার, ঐখোয় মফম শীনবা থুংনা কোইবা চৎখি।
প্রধান মন্ত্রী: –য়েংউ, ঐনা জম্মু অমসুং কাস্মিরদা উরিবা শান্নবগী হৈথোই-শিংথোইবা অসি অঙকপনি।
মোহসিন আলী - হোই সার।
প্রধান মন্ত্রী: - ঐখোয়গী জম্মু অমসুং কাস্মিরগী নহারোলশিংনা লৈবাক্কী মিংচৎ পুরক্লে, মখোয় অসুক্কী মতিক ফৈ অমসুং মদু অদোম্না উৎলে।
মোহসিন আলী - সার, ঐগী মঙলান্দি ওলেম্পিক্সতা মেদল অমা লৌবনি, মসি ঐগী মঙনি।
প্রধান মন্ত্রী: - য়াম্না ফরে।
মোহসিন আলী - মদু ঐগী মঙলান্নি সার।
প্রধান মন্ত্রী: - য়েংউ, অদোমগী ৱাহৈ তাবদা ঐ তু চুংলে।
মোহসিন আলী - সার, ঐগী মঙলান্দি ওলেম্পিক্সতা মেদল অমা ফংবনি। লৈবাক্কীদমক জাতিগী ঈশৈ শকপা অসি ঐগী অমতা ঙাইরবা মঙলান্নি।
প্রধান মন্ত্রী: - ঐগী লৈবাক্কী শিন্মী অমগী ইমুংগী মচানুপা অমগী মঙলান অসি য়াম্না চাউই, মসিনা তাকপদি লৈবাক অসি য়াম্না চাউখৎলকখিগনি হায়বনি।
মোহসিন আলী - সার, লৈবাক অসি য়াম্না চাউখৎলক্কনি। মফম অসিদা খেলো ইন্দিয়া শীনবগীদমক ঐখোয়না ভারত সরকার থাগৎচরি… সার, মসি মফম অসিদা অহানবা ওইনা পাংথোকপনি।
প্রধান মন্ত্রী: - মরম অদুনা অদোম মখোয়না অদোমগী স্কুলদা থাগৎকদবনি।
মোহসিন আলী - হোই সার।
প্রধান মন্ত্রী: - ফরে মোহসিন, অদোমগা ৱারি শানবদা ঐ হরাওই অমসুং অদোমগী ইপা ঐনা থাগৎলকই হায়না তম্বীয়ু। মরমদি শিন্মী অমা ওইনা মহাক্না অদোমগী পুন্সি শেম্বীরকপনি অমসুং অদোমগী ইপাগী ৱাহৈশিংদা, মহাক চহি ১০ পোথাদনা থবক কন্না শুরকখি। মসি শান্নরোয় অমগী অচৌবা ইথিল অমনি অমসুং অদোম ত্রেনিং পীনবা হোৎনবদা থবক য়াম্না কনখিবা অদোমগী কোচসু ঐনা থাগৎচরি। ঐগী য়াইফ পাউজেল পীজরি, কয়ারক থাগৎচরি ভাইয়া।
মোহসিন আলী - অদোম থাগৎচরি সার, খুরুমজরি সার, জয় হিন্দ!
মরুপশিং,
লৈবাক অসি চাউখৎনবগীদমক “এক ভারত শ্রেস্থ ভারত” কী ৱাখল্লোন য়াম্না মরুওই, মসিদা শান্নবনা মরুওইবা থৌদাং অমা লৌরি। মরম অদুনা ঐনা হায়রি, শান্নবা মীওইনা মহৈ চাই। ঐখোয়গী লৈবাকনা তুর্নামেন্ত হেন্না শান্নরিবমখৈ, শান্নবা হেন্না ফগৎলক্কনি। অদোম শান্নরোয়শিং অমসুং অদোমগী মরুপশিং অনিমক্ত ঐগী য়াইফ পাউজেল পীজরি।
ঐগী নুংশিরবা ইরৈচাশিং,
অদোম য়ু.পি.এস.সিগী মমিং তারম্লগনি। ইন্সতিতুৎ অসিনা লৈবাক অসিদা খ্বাইদগী লুবা পরিক্ষা অমা ওইরিবা, সিবিল সর্বিসেস একজাম পাংথোকই। সিবিল সর্বিসেস মাইপাকখিশিংগী পুক্নিং থৌগৎনিঙাই ওইরবা ৱারি কয়া ঐখোয় তারে। নহারোলশিং য়াম্না ৱানা হোৎনখি অমসুং মখোয়না কন্না হোৎনবদগী থবক অসিদা মফম ফংখি- অদুবু মরুপশিং, য়ু.পি.এস.সি একজামগী অতোপ্পা অশেংবা অমা লৈরি। মতিক চাবা কেন্দিদেৎ লিশিং কয়া লৈরি; মখোয়না হোৎনবা অসি অতৈশিংদগী তাবা নত্তে, অদুবু খজিক্তং খেন্নবদগী মখোয় মাইপাকপা ঙমখিদে। হায়রিবা কেন্দিদেৎশিং অদু অতোপ্পা একজামশিং থানবা শেম শাখি। মদিনা মখোয়গী শেন অমসুং মতম মাঙহনখি। মরম অদুনা, অসিগুম্বা পুকচেল শেংবা মহৈরোয়শিংগী দিজিতেল প্লেতফোর্ম অমা হৌজিক লৈরে অমসুং মসিগী মমিং ‘প্রতিভা সেতু’ কৌই। য়ু.পি.এস.সিগী তোঙান তোঙানবা একজামশিংগী তাঙ্কক খুদিংমক পাস তৌরবা অদুবু অরোইবগী মেরতি লিষ্ট য়াওবা ঙমদ্রবা কেন্দিদেৎশিংগী দেতা ‘প্রতিভা সেতু’ দা য়াওরে। পোর্তেল অসিদা অসিগুম্বা লৌশিং লৈরবা নহারোল লিশিং ১০ হেনবগী দেতাবেঙ্ক অমা লৈরে। খরনা সিবিল সর্বিসগীদমক শেম শাখি, খরনা ইঞ্জিনিয়ারিং সর্বিস চঙবা পামখি, খরনা মেদিকেল সর্বিস চঙবা পামখি অদুবু অরোইবদা মখোয় খনখিদে- অসিগুম্বা কেন্দিদেৎশিংগী ই-পাউ হৌজিক ‘প্রতিভা সেতু’ পোর্তেলদা ফংলে। পোর্তেল অসিদগী লনাই কম্পেনিশিংনা অফবা মহৈরোয়শিংগী মরমদা খঙবা অমসুং মখোয় থবক পীবা য়ারগনি। থবক অসিগী কান্নবা ফংবা হৌরে। পোর্তেল অসিগী মতেংদগী কেন্দিদেৎ চা কয়া খুদক্ত থবক ফংলে অমসুং মার্ক খজিক্তং ৱাৎপদগী লৈহৌবা নহারোলশিং হৌজিক অনৌবা থাজবগা লোয়ননা মাঙলোমদা চঙশিল্লে।
ঐগী নুংশিরবা ইরৈচাশিং,
ঙসি মালেম্না ভারত পাম্নরে। ভারতকী তৌবা ঙম্বশিংদা মালেম শীনবা থুংবনা মীৎয়েংফম ওইরে। মসিগা মরী লৈনবা নুংঙাইরবা থৌদোক অমা ঐনা অদোমদা লিজগে। হৌজিক পোদকাষ্টশিং চৎনবী অমা ওইরকপা অদোম খঙলে। তোঙান তোঙানবা হিরমশিংগী পোদকাষ্টশিং তোঙান তোঙানবা মীওইশিংনা তানরি অমসুং য়েংনরি। হন্দক, ঐসু পোদকাষ্ট খর শরুক য়াখি। অসিগুম্বা পোদকাষ্ট অমা মালেমগী মমিং চৎলিবা পোদকাষ্টর লেক্স ফ্রিদমেনগা পাংথোকখি। পোদকাষ্ট অদুদা ৱাফম কয়া খন্নখি অমসুং মালেমগী মীয়াম্না মদু তাখি। পোদকাষ্ট অদুদা খন্নবদা, ঐনা হিরম অমা পুখৎখি। জর্মনিগী শান্নরোয় অমা পোদকাষ্ট অদু তাখি অমসুং মদুদা ঐনা পনখিবা হিরম অদুদা মহাক্না থৱায় তাখি। মহাক্না অহানবা ওইনা হিরম অদুদা থিজিনবা হৌখি অমসুং মতম অদুদা জর্মনিদা ভারতকী এম্বেসিগা পাউ ফাওনখি অমসুং হিরম অদুদা মহাক্না ভারতকা শম্নবা পাম্মী হায়না চিথি অমা ইরকখি। জর্মনিগী শান্নরোয় অমা ইথিল পীখিবা করম্বা মখলগী হিরম মোদীজিনা পোদকাষ্ট অদুদা ঙাংলমগনি হায়বা অদোম খনগদবনি, মধ্য প্রদেসকী সাহদোলদা ফুতবোলদা ঙাউবা খুঙ্গং অমা ঐনা পনখি। তশেংনা, চহি অনিগী মমাংদা ঐ সাহদোলদা চৎখি অমসুং মফম অদুগী ফুতবোল শান্নরোয়শিং উনখি। পোদকাষ্ট মনুংদা, ৱাহং অমগী পাউখুমদা, ঐনা সাহদোলগী ফুতবোল শান্নরোয়শিং পনখি। মদু জর্মনগী ফুতবোল শান্নরোয় অমসুং কোচ দিয়েতমার বৈরসদোরফরনা তারমখি। সাহদোলগী ফুতবোল শান্নরোয়শিংগী পুন্সি খোঙচৎনা মহাক অঙকপা পোকখি অমসুং ইথিল পীখি। তশেংনা, মফম অসিগী হৈথোই-শিংথোইবা ফুতবোল শান্নরোয়শিং অতোপ্পা লৈবাকশিংগী পুক্নিং চঙশিনগনি হায়বা কনা অমতনা খনখিদে। হৌজিক জর্মন কোচ অসিনা জর্মনিদা একাদেমি অমদা সাহদোলগী শান্নরোয় খর ত্রেনিং পীগে হায়রক্লে। মসিগী মতুংদা, মধ্য প্রদেস সরকারনা মখোয়গা উনরে। অথুবা মতমদা সাহদোলগী ঐখোয়গী নহারোল খর ত্রেনিং কোর্স অমগীদমক জর্মনিদা চৎলগনি। ভারত্ত ফুতবোল পাম্নবা হেনগৎলকপদ ঐসু হরাওই। মতম শংবদা ফুতবোল পামজবশিংনা সাহদোলদা চৎনবা অমসুং মফম অদুদা লৈরিবা শান্নবগী অওনবা য়াম্না নক্না য়েংনবা ঐনা তকশিল্লি।
ঐগী নুংশিরবা ইরৈচাশিং,
সুরতকী জিতেন্দ্র সিংহ রাথোরগী মরমদা খঙবদা অদোম হরাওগনি। জিতেন্দ্র সিংহ রাথোর সেকুরিতি গার্দ অমনি অমসুং মহাক্না মরৈবাক নিংবা মীওই খুদিংমক ইথিল পীবা অঙকপা থবক অমা পায়খৎখি। হৌখিবা চহি খর অসিদা, মহাক্না ইমা ভারত ঙাক্নবগীদমক মখোয়গী থৱায়শিং কৎখ্রবা লান্মীশিংগী মরমদা ই-পাউ খোমজিনখি।
মালেমগী অহানবা লাঞ্জাউদগী হৌরগা থৱায় কৎখ্রবা থৌনা ফরবা লান্মী লিশিং কয়াগী মরমদা মহাক্না খোমজিল্লে। মহাক্না অথৌবা লিশিং কয়াগী ফোতোগ্রাফশিংসু খোমজিনখি। নোংমা, অথৌবা অমগী মপা অমগী ৱাহৈশিংনা মহাক্কী থম্মোয়দা তিং লাওনা পানখি। অথৌবা অদুগী মপানা হায়খি, “ করিগুম্বা ঐগী ইচানুপা লৈখিদ্রবদি, লৈবাক অসি অশোই-অঙাম থোক্লোই, থোক্লোইদরা?” অসিগুম্বা ৱারোল অসিদা জিতেন্দ্র সিংহ রাথোরগী থম্মোয়দা মরৈবাক নুংশিবগী ইহুলনা পীক থনখি। ঙসি মহাক্না অসিগুম্বা অথৌবশিংগী ইমুংশিংগা উনরে। মহাক্না অথৌবা লিশিং ২.৫ রোমগী মপা-মমাশিংগী খুয়াগী উফুল খোমজিল্লে। মসি লান্মীশিং মহাক্না চেৎনা নুংশিবগী অহিংবা খুদম অমনি। জিতেন্দ্র সিংহ রাথোরগী পুন্সিনা ঐখোয়দা মরৈবাক নুংশিবগী অশেংবা পারা তম্বীরে।
ঐগী নুংশিরবা ইরৈচাশিং,
য়ুমথকশিং, অচৌবা বিল্দিংশিং, সরকারগী ওফিসশিংদা সোলার পেনেলশিং থম্বা অদোম উরম্লগনি। মসিগী মরুওইবা হৌজিক মীয়াম খঙলে অমসুং পুকচেল তিংনা মসি শীজিন্নরে। ঐখোয়গী লৈবাক অসি নুমিৎ কৌবা লাইগী থৌজাল ফংলে… মরম অদুনা করিগীদমক মহাক্না পীরকপা মঙাল শীজিন্নরোইদৌরিবনো।
মরুপশিং,
সোলার পৱারনা লৌমীশিংগী পুন্সিদা অহোংবা পুরক্লে। চপ মান্না লৌমী, চপ মান্না থবক, চপ মান্না লৌবুক.. হৌজিক অসিগুম্বা থবক কন্না শুবা অসি হেন্না কান্নরে। অহোংবা অসি সোলার পম্পশিং অমসুং সোলার রাইজ মিলশিংনা পুরকপনি। ঙসিদি লৈবাক অসিগী রাজ্য কয়াদা সোলার রাইজ মিল কয়া লৈরে। সোলার রাইজ মিলশিং অসিনা লৌমীশিংগী শেন্থোক হেনগৎহল্লে।
মরুপশিং,
বিহারগী দেবকী জিনা সোলার পম্প অমনা মহাক্কী খুঙ্গংগী মরাইবক হোঙহল্লে। মুজফরপুরগী রতনপুর খুঙ্গংদা লৈবা দেবকী জি হৌজিক মীয়াম্না “সোলার দিদি” হায়না কৌনরে। দেবকী জি মহাক্কী পুন্সি অরাইবা নত্তে। মহাক য়াম্না চহি নৌনা লুহোংখি… অপীকপা লৌফম অমা… অঙাং মরি য়োক্নবগী থৌদাং অমসুং তুংগী অফবা ফিবম অমতা উদবা। অদুবু মহাক্কী থৌনা হনখিদে। মহাক্না সেল্ফ হেল্প গ্রুপ শরুক য়াখি অমসুং সোলার পম্পগী মরমদা খঙখি। মহাক্না সোলার পম্প অমা ফংনবা হোৎনখি অমসুং ফংখি। মদুগী তুংদা, সোলার দিদিগী সোলার পম্পনা খুঙ্গংগী ফিবম অহোংবা পুরকখি। মমাঙদা, লম একর খর খক্ত ঈশিং পীবা ঙমখি; হোজিক সোলার দিদিগী সোলার পম্পনা লম একর ৪০ হেন্না ঈশিং পীরে। খুঙ্গং অসিগী অতোপ্পা লৌমীশিং সোলার দিদিগী ইহৌ অসিদা শরুক য়ারে। মহৈ-মরোশিং শঙবা হৌরক্লে অমসুং শেন্থোক হেনগৎলক্লে।
মরুপশিং,
মমাঙদা দেবকি জিগী পুন্সি ফক্লাং মরিগী মনুংদা লৈরমখি। অদুবু ঙসিদি মহাক মশাবু মপুংফানা থাজবগা লোয়ননা থবক তৌরে অমসুং সোলার দিদি অমা ওইনা শেন তাল্লে অমসুং য়ু.পি.আইগী খুৎথাংদা মহাক্না লৌমীশিংদগী ফংফম থোকপা শেন ফংলে। মহাক্না কন্না হোৎনবা অসিদা সোলার ইনর্জি অসি ইলেক্ত্রিসিতি খক পুথোক্নবা নত্তে হায়বা উৎলে, অদুবু হৌজিক খুঙ্গং খুদিংমক্ত অনৌবা মঙাল পীবা অনৌবা পৱার অমসু ওইরে।
ঐগী নুংশিরবা ইরৈচাশিং,
সেপ্তেম্বর ১৫ অসি ভারতকী শক্নাইরবা ইঞ্জিনিয়ার মোক্ষাগুন্দাম বিসবেসবারায়া জিগী মপোক নুমিৎনি। ঐখোয়না নুমিৎ অসি ইঞ্জিনিয়ারগী নুমিৎ পাংথোক্লি। ইঞ্জিনিয়ারশিংনা মেছিনশিং খক্ত শাবা নত্তে, মখোয় মঙলানশিং মঙফাওনহনবা কর্মোয়োগীশিংনি। ভারতকী ইঞ্জিনিয়ার খুদিংমক ঐনা থাগৎলি। মখোয়গী অফবা ওইনবা ঐনা য়াইফ পাউজেল পীজরি।
মরুপশিং,
ভগবান বিশ্বকর্মাগী শেংলবা পুজাগী থৌরমসু সেপ্তেম্বর থা অসিদা থোক্লে। সেপ্তেম্বর ১৭ দা বিশ্বকর্মা জয়েন্তি থোক্লে। মমাংঙৈগী ক্রাফশিং, স্কিলশিং অমসুং লৌশিং মীরোল অমদগী অতোপ্পা মীরোলশিংদা মখা তানা থংথরিবা ঐখোয়গী বিশ্বকর্মা ইচিন-ইনাওশিংদা নুমিৎ অসি কৎথোক্লে। ঐখোয়গী বিশ্বকর্মা ইনাওশিংগী মতেং পাংনবা সরকারনসু বিশ্বকর্মা য়োজনা হৌদোক্লে।
মরুপশিং, হৌজিক অদোমগীদমক ওদিও রেকোর্দিং অমা ঐনা খোঙলি।
খোঞ্জেল মতেক অমা
(ঐনা রাজ্যশিংগী পাংথোকখিবশিং নত্ত্রগা হায়দ্রবাদকীদমক ঐখোয়গী সরকারনা পাংথোকখিবশিং সর্তিফিগেদ অসিদা অদোম্না ইরে, মসি য়াম্ন ফরে অদুবু কমদৌনা ঐখোয়না হায়দ্রবাদকী কেস থেংনখিবগে, মসি কয়া য়াম্না খুদোংথিবগে হায়বা অদোম খঙগনি। নিংথৌমচা নত্ত্রগা নিংথৌ অমতগী অরানবা ৱারেপ অমতা ঐখোয়না লৌরোই হায়না রাজ্যশিং অমসুং নিংথৌমচাশিংদা ঐখোয়না ৱাশকখি। মীওই খুদিংমক চপ মান্ননা লোইনগনি, মীওই খুদিংমক্ত থোক্নিংবা থোকচরবসু, মখোয় চপ মান্ননা লৌগনি। অদুবু মখোয়গীদমক, ঐখোয়না তোখায়বা য়ানচে অমা শেম্লে।)
মরুপশিং,
মসি য়োৎকী মী সরদার ভল্লবভাই পতেলগী খোঞ্জেলনি। হায়দ্রবাদ থৌদোকশিংগী মতাংদা মহাক্কী খোঞ্জেল তাবদা অদোম চৈনা ফাওরমগনি। সেপ্তেম্বর থাদা ঐখোয়না হায়দ্রবাদ লিভরেসন দে পাংথোক্কনি। থা অসিদা ঐখোয়না ‘ওপরেসন পোলো’ শরুক য়াখিবা অথৌববশিংগী থৌনা নিংশিংগনি। ওগষ্ট ১৫ দা ভারত নিংতম্বা ফংখি হায়বা ঐখোয় খুদিংমক্না খঙলে। ওগষ্ট ১৫ দা ভারতনা নিংতম্বা ফংবা মতমদা, হায়দ্রবাদ তোঙানবা ফিবম অমদা লৈখি। নিজাম অমসুং রাজাকারশিংগী মীওৎ-মীনৈশিং নোংম নোংমগী হেনগৎলকখি।
মচু অহুমগী ফিরাল চিংখৎপা নত্ত্রগা বন্দে মাতারম’ লাউবগীদমক মীয়াম হাৎখি। নুপীশিং অমসুং লায়রবশিংদা মীওৎ-মীনৈশিং চৎথখি। মসিগী খুদোংথিবা অসি চাউথোরক্কনি হায়না মতম অদুদা বাবা সাহেব অম্বেদকারনা চেকশিনৱা থমখি। অরোইবদা, সরদার পতেলনা ৱাফম অসি মহাক মশানা পায়খি। ‘ওপরেসন পোলো’ হৌনবা মহাক্না সরকারনা ৱাখল তাহনখি। অকক্নবা মতম অমদা, ঐখোয়গী ফোর্সশিংনা নিজামগী মখুত্তগী হায়দ্রবাদ নিংতমখি অমসুং ভারতকী শরুক অমা ওইখি। মাইপাকপা অদু লৈবাক শীনবা থুংনা হরাওবা ফোঙদোকখি।
ঐগী নুংশিরবা ইরৈচাশিং,
অদোম্না মালেমগী চৎলবা মফম খুদিংমক্ত, ভারতকী কলচরগী ইথিল অদোম উবা ফংগনি। মসি মালেমগী অচৌবা সহরশিং খক্ত নত্তে, মসি অপীকপা সহরশিংদসু উবা ফংগনি। মসিগা মান্নবা ফিবম ইতালি অপীকপা সহর কেম্প-রোতোন্দোদা উবা ফংলে। মফম অদুদা মহর্ষি বালমিকিগী মীতম অমা মাইখুম হাংদোকখ্রে। থৌরম অদুদা লোকেল মেয়র য়াওনা মরুওইবা মীওই কয়া শরুক য়াখি। মহর্ষি বালমিকিগী মীতম অমা খিনবা অদুদা কেম্প-রোতোন্দোদা লৈবা ভারত্তগী হৌখিবা মীওইশিং য়াম্না হরাওখি। মহর্ষি বালমিকিগী পাউজেলশিংনা ঐখোয় পুম্নমক ইথিল পীরে।
মরুপশিং,
থা অসিদা, কনাদাগী মিসিসৌগাদা ফিত ৫১ ৱাংবা ভগবান শ্রী রামগী মীতম অমসু মাইখুম হাংদোকখ্রে। ভগবান শ্রী রামগী অচৌবা মীতমগী ভিদিও সোসিএল মেদিয়াদা য়াম্না উরে।
মরুপশিং,
রামায়ন অমসুং ভারতকী নাৎ নুংশিবা মালেমগী কাচিন-কোয়া শীনবা থুংনা য়ৌরে। রুসিয়াদা ব্লাদিবোষ্টোক কৌবা অফাওবা মফম অমা লৈ। নিংথম থাদা মফম অসি দিগ্রি সেলসিয়স মাইনস ২০ অমসুং মাইনস ৩০ য়ৌনা ইংবগীদমক মীয়াম্না মফম অসি খঙনরি। থা অসিদা ব্লাদিবোষ্টোক্ত একজিবিসন অমা পাংথোকখি। মফম অদুদা রামায়নগী তোঙান তোঙানবা থিমশিংদা রুসিয়াগী অঙাংশিংনা য়েকপা লাইশিং উৎখি। চাংদম্নবা অমসু মফম অদুদা পাংথোকখি। মালেমগী মফম কয়াদা ভারতকী নাৎ খঙবা হেনগৎলকপা অসি উবদা হরাওই।
ঐগী নুংশিরবা ইরৈচাশিং,
হন্দক্কী ‘মন কি বাত’ মসিনি। হৌজিক লৈবাক শীনবা থুংনা হরাওনা গনেস উৎসব পাংথোক্লি। নুমিৎ খরনি অসিদা কুহ্মৈ কয়াগী মঙালশিং শন্দোক্লগনি। কুহ্মৈশিং অসিদা অদোম্না শ্বাদেসি কাউরোইদবনি। খুদোল পোৎশিং, ফিরোলশিং, লৈতেংগী পোৎলমশিং মেদ ইন ইন্দিয়াগী ওইগদবনি। ঐখোয়গী পুন্সিদা দরকার ওইবা খুদিংমক শ্বাদেসি ওইগদবনি। চাউথোকচনা হায়সি ‘মসি শ্বাদেসিনি’, চাউথোকচনা হায়সি ‘মসি শ্বাদেসিনি’ চাউথোকচনা হায়সি ‘মসি শ্বাদেসিনি’। মসিগী ৱাখল্লোন অসিগা লোয়ননা ঐখোয় মাঙলোমদা চঙশিনগদবনি। লাইৱা অমা-‘ ভোকেল ফোর লোকেল’; লম্বী অমা- ‘অত্মনির্ভর ভারত’; পান্দম অমা-‘বিকসিত ভারত’।
মরুপশিং,
হরাওবা মরক অসিদা, লু-নান্না লৈনবা হোৎনসি, মরমদি লু-নানবা মফমদা, কুহ্মৈশিংগী নুংঙাইবা হেনগৎলক্কনি। মন কি বাতকীদমক ঐঙোন্দা অদোমগী মেসেজ মশিং য়াম্না থাবীরকউ। থৌরম অসিগীদমক অদোমগী পাউতাক খুদিংমক য়াম্না মরুওই। অদোম্না হায়নিংবা খুদিংমক ঐঙোন্দা থাবীরকউ। মথংদা ঐখোয় উনবদা, অনৌবা হিরমশিং ঐখোয়না খন্নগনি।
অদোম থাগৎচরি, খুরুমজরি।
Jammu and Kashmir has achieved two remarkable milestones. #MannKiBaat pic.twitter.com/HyjpGIrS2N
— PMO India (@PMOIndia) August 31, 2025
PRATIBHA Setu is a digital platform that connects capable UPSC aspirants who missed the final list with new career opportunities. #MannKiBaat pic.twitter.com/jXKehDntQ5
— PMO India (@PMOIndia) August 31, 2025
Today, the attention of the world is focused on India. #MannKiBaat pic.twitter.com/Z0ULy7oImW
— PMO India (@PMOIndia) August 31, 2025
Young footballers from Shahdol inspired a German coach, who has invited them to train in Germany. #MannKiBaat pic.twitter.com/xWLMUUcA5B
— PMO India (@PMOIndia) August 31, 2025
The inspiring story of Jitendra Singh Rathore Ji, a security guard from Surat, who has dedicated his life to honouring India's martyrs and keeping their memories alive. #MannKiBaat pic.twitter.com/aDoxSKP5jS
— PMO India (@PMOIndia) August 31, 2025
The inspiring journey of Devki Ji from Bihar's Muzaffarpur... #MannKiBaat pic.twitter.com/qaWXtviGlv
— PMO India (@PMOIndia) August 31, 2025
Hyderabad Liberation Day is a tribute to Sardar Patel's leadership and the people's courage. #MannKiBaat pic.twitter.com/t8HE0RPjsq
— PMO India (@PMOIndia) August 31, 2025
Indian culture takes over the world! #MannKiBaat pic.twitter.com/qM7eJaq3Yj
— PMO India (@PMOIndia) August 31, 2025
Let us celebrate festivals with the Swadeshi spirit. #MannKiBaat pic.twitter.com/7zVX4W8BKV
— PMO India (@PMOIndia) August 31, 2025
